بصراحه مدري شقول لك تدري ليش لأني من أنصار المرأه وأخاف أظلمك ...

شوف بحكم خبرتي فيه حل ممكن يعالج وضعكم ... هو الزواج الثاني يمكن تستغرب تقول كيف من انصار المرأة وتقول زواج ثاني ... انا من انصار المرأه الثانيه ... بس انتبه تروح تسويها بجد ...
لأنه ممكن تكون المرأة الثانية موجوده وهي غير موجوده .... يعني بإختصار جرب هالوصفه وبمشيئة الله تجيب نتيجه ...
خلك معاها طبيعي لا تغير شي من تعاملك معاها ... لكن غير نفسك يعني مثلا ... تشيك وتظبط وخذ لك شور وتعطر واطلع ولا تقول لها وين رايح واذا سألتك على وين قل رايح الاستراحه اذا قالت كل هالتكشخ عشان الاستراحه خلك ابرد من الثلج وقل لا حول ولا قوة الا بالله ... بالذات اليوم ماودي اتنكد وامش على طول ... وروح الاستراحه واستانس وروق المنقا ورد لبيتك ... اذا لقيتها صاحيه خلك مبتسم وبين انك مبسوط وحط راسك ونم ... بس انتبه مو تخربها سحبه بالاستراحه للساعه 1 والا 2 لا 12 او قبل بعد ارجع ... تدري ليش عشان تشوف انبساطك ... وانت عاد لا تصير جلف ولا تصير رقله خلك وسطي ...
بعدين احمد ربك ... احس زوجتك فاهمه ... من الكلام اللي ماكتبته أو على قولتهم اللي بين السطور ... يكفيك محاولاتها ان تأكلك من اللي جايبته من المدرسه ... وهذا دليل انها تقدم تنازلات لأجل الحياة تسير ... وانت تصرفت بشكل سلبي تجاه مبادرتها يعني مايضرك لو اكلت لك وحده ولو ماكنت تقدر تقول على اني ما أحبه لكن عطيتك يا أم فلان ماتنرد ... على الأقل تقول شكراً بعد ما تاكلها ... لكن حبيت تبين انك حاقد عليها ورفضت معتقداً انك تثأر لنفسك .... لكن لو فرضنا انها عطت أولادكم الشكولاته اللي هي جايبه وقعدت تاكل هي وياهم وطنشتك ... صدقني بتحقد عليها وتكره نفسك والساعه اللي رجعتها فيها ... عرفت ليش قلت فاهمه ... واللي بيتقدم خطوة للأمام عليه ان لا ينظر للخلف .... الا للتعلم من أخطاء مضت ....
تمنياتي للجميع بحياة ملؤها السعاده والأفراح ....