منتدى عالم الأسرة والمجتمع - مارايكم بردة فعل زوجي ؟؟ هل يعتبر غير غيور أم ماذا ؟

عفا الله عنك وعني أخي الكريم معدن الرجوله ..وصدقني كما صدمت بإتصال المعاكس ...صدمت من كلامك...وكتاباتك

لكن خلاص إنتهى الموضوع والله يغفرلي ويغفر للجميع والله يسعد كل من رد على موضوعي وبرد قلبي لأني كما قلت

مقهوره من ردة فعل زوجي ..كنت أسمع إنو الزوجه لوجات أشتكت لزوجها عن معاكس تلاقيه يبهدلها ويالطيف ممكن يشك

فيها وأسمع إنو يجيب تسجيل والحمدلله زوجي صحيح فيه غلظه وشده بس ماتوصل به الأمور لهادرجه

وكل ماقاله نفصل التلفون من شركة الإتصالات ..فقلت له صعبه نفصلو عشان ماعندنا تلفون تاني قال أجل أفصلي الفيش بعد خروجي

ولو المدرسه دقوا على البيت مالقيوا أحد يرد عليهم ممكن يدقوا علي ولوكان الجوال مسكر عندي خدمة موجود

وراح تجيني رساله وأتصل عليهم

والحمدلله إنتهى الموضوع على كدا وصرت أعمل إللي قالو وأرتحت ..وأرتاح قلبي

أخي الفاضل صحيح بيني وبين زوجي بعض المشاكل خاصة قبل زواجه وحتى بعد زواجه وطلاقه لزوجتو التانيه

لكني والله الحمدلله أحاول أحتويه وأقدم له كل مايسره وأكون صريحه معاه في كل أمور حياتنا وماأجعل أي شئ يكدر

علينا

وفي شئ حلو زوجي علمني هو ..قالي ياروعه لما تكوني زعلانه من أحد ونفسك ترسلي له رسالة عتاب وغضب

حتى أنا لما تكوني زعلانه مني أتبعي هالطريقه ..قالي أكتبي الرساله وأحفظيها بالمسودات كل كلام الغضب قوليه

في الرساله وأحفظيها ...خليه يمر يوم ..يومين ..ممكن يصير وفاق بيني وبينك ..وأول مانتصالح وإنتي في قمة سعادتك

روحي للمسودات ..وشوفي الرساله وأقرئيها وإنتي سعيده ..إيش بتكون ردة فعلك ..أكيد راح تضحكي على نفسك

وتحمدي ربك إنك ماأرسلتي لي الرساله الغاضبه.. كان زادت الأمور تعقيد ..وكبرت المشاكل أكتر وأكتر

فالواحد منا لابد أن يكون عندو نوع من الصبر والحلم وقت الغضب ويتعامل مع أي موضوع بهدوء لابنرفزه ...

وشكراً للجميع عسى ربي يجعلهم من أهل الفردوس الأعلى ..