|
عبوره حامل
كنا فرحانين مررررره وكانت عندنا وتتوحم وتتقرف من كل شي وانا اي شي اعرف انها تكرهه اجيبه لها واحطه قدام وجهها وهي تصرخ مره ومره تبكي من القهر وانا بس اضحك عليها كانت تشاركني ندى اوقات واوقات تحزن وتحن عليها وجت نوف وساعدتني بهالمهمه وصرنا نلعب عليها ونضحك عادي المدرسه ثالث متوسط حلوه بس مو زي ثاني انضمو بنات جدد لشلتنا خف شوي الهبال مشاكل ما فيه الا مشاكل عاديه بسبب الخروج من الفصل والرد على المدرسات واشياء عاديه جا موعد ولادة عبير وجت قبل بشهر وامي بدت تتعب وصار يجيها الام بمنطقة القلب وضيق بالتنفس وكل يوم تروح مستشفى وما يطلعون بتشخيص معين وكل واحد يقول شي وحالتها كل يوم اسوء من اليوم اللي قبله من هنا بدا كل واحد يبان امي اشتد عليها الالم وراحت المستشفى وطلع معها جلطه بالقلب غبت يومها وما كنت ادري كنت مواعده صديقتي واليوم الثاني ندوة امهات وقالت لازم تجين امي تبي تشوفك وغبت وصحيت الساعه 8 تقريببا والكل صاحي اسألهم وين امي قالوا بالمستشفى طيب ليه السكر مرتفع واسمعهم يتكلمون واذا دخلت سكتو حسيت ان اللي في امي اكبر من ارتفاع بالسكر بس محد جاوبني اخواني كلهم بنفس اليوم سافرو وجو عندنا والبيت فل اخواني وزوجاتهم رحنا زياره العصر ومن الفهاوه اللي فيني امي بالعنايه المركزه وانا مدري على بالي عادي وما ادري كيف شكل العنايه المركزه اسمع فيها بس ما قد شفتها اجهزه وصوت جهاز القلب قال عبدالرحمن يكلمني انا وندى ها شفتوها قلنا ايه قال بخير صح وتسولف وتضحك معكم قلنا صح قال معها جلطه بالقلب وتحتاج قسطره بواحد من الشرايين انا بغيت اموت من القهر قلت بس بتصير زي ابوي وواقفه اصلا ما في مكان للجلوس واقفه وما عاد اشوف شي داااايخه احاول يمين يسار مررره والف عشان لحد ينتبه واطلع واللي صدمني اكثر طلعت فارس بوجهي وحالته بالويل ومبين عليه كان يبكي انا خلاص ضعت فارس يبكي يعني فيه مصيبه واطلع اجلس برا ولحقني فارس وش فيك ما رديت عليه وابكي قلت بتصير زي ابوي قال لا ان شاء والله وش فيك انتي خلاص انتي شفتيها وعادي شي بسيط وبيعدي ان شاء الله ورحنا البيت لا اكل زي الناس ولا شي واعطو امي موعد للعمليه بجده وجو خوالي كلهم وراحو جده مع امي واحنا بدت الحركات نص الكم بالبيت وزوجات اخواني يستهبلون طلعت سالفه مال امها داعي على تركي البزر توه اولى ما يدري وين ربي حاطه وتهزء من اخواني بسبب زوجاتهم وكلامهم وقعد يبكي وقتها وصلت معي وانفجرت اهزء فيهم وما خليت احد ولا كلمه ما قلتها وزوجاتهم رحت اصرخ فيهم وقلت اللي بتقعد تقعد باحترامها واللي بتستهبل تطلع برررا ماحنا بعازتها وبعدين تروكم غثه ومحنا فايقين لغبائكم وزعلو واتضح الموضوع اكثر وان تركي مظلوم وكلها تلفيق من يومها لحد اللحين زوجاتهم ما بيني وبينهم اي تواصل لا كلام ولا شي اللهم سلام وكيف الحال بس وتطنييييش ولا اعبرهم ونوف وعبير وندى عادي معهم بس انا بنظري ما ابي احد اضحك واسولف معه وقت ما اكون رتاحه ووقت الشده يطلع هو والمصايب علي ليه اضيع وقتي مع ناس كذا ولا في امل ارجع اعطيهم وجه او اكلمهم لو يعطوني عيونهم ولدت عبير فرحنا بس مو ذاك الفرحه ومسكينه وربي تحزن محد اهتم فيها سوت امي القسطره وطلعت بعدها باسبوع على فكره كل شي يصير عندنا بالبيت حتى لو هي سالفه تاااافهه برا كله من زوجة عبالرحمن ان شاء الله نضحك انا وندى تطلع قالوا وسوو طلعت امي وخلصت عبير الاربعين وسافرت وسافرو اخواني وارتفع ضغطي مره من زوجة اخوي واعطيتها دقه محترمه وزعلت امي قلت يمه بالله زعلانه على ذي تدرين اللي زعلانه عليها وش سوت وانتي بالمستشفى ووش قالو عن تركي واعلمها امي انصدمت بس تسامح اكره التسامح ذا مع ناس ما تسوى يغلط يغلط وتسامح كذا ياربي صح انهم اعتذرو من تركي بس بعد ما برد قلبي قهرني موقف اخواني اخوك وشلون تصدق فيه شلووووون عرفت اشياء من البنات ما صدقتها ورحت سألت عبير ونوف يالغباء وطلع كلامهم صدق جتني حاااالة قرف من كل المتزوجين معد ابي اناظر احد متزوج وامي وابوي ما عاد اكلمهم الا بالغصب اخواني نفس الحاله اي وحده حامل اشوفها احس اني برجع وربي بلاني باستاذه حامل تدرسني كنت اكره حصتها كرره ما اطيق اناظر فيها احس بقرررف وبرجع وطول ماهي عندنا ما ارفع عيني فارس سافر لنوف وبعد فتره رجع ونسا عندها هديه من هدايا البنت العله اللي متعلق فيها ووديناه عند شيخ معروف وقرا عليه وحصلت اختي اشياء معقوده بالهديه واظافر على ما اظن ومدري وش سوو فيها بعدها ما عاد جاب طاري هالبنت وصار يقول وع وربي تجيب المرض ورجع يصلي وعادي شغالتنا طلعت الاخت مسويه فيها وتحب عبدالله وتحاول تتلزق قطوتنا موجوده وتسمع الكلام اللي تقوله امي ودايم امي تأكلها وتهتم فيها صارت تتعب امي بين كل فتره والثانيه من القلب وارتفاع السكر .............. |
يالله اكره هذي الذكريات
تحسسني بالاحباط وتكرهني بالحياه على كرهي لها بعد التخرج والاحداث اللي صارت وانا بثالث متوسط حتى حفلت تخرج مافي ما صدقو يشوتونا كنا اسوء دفعه مرت على حد قولهم وعشان كذا ما سوو حفلت تخرج اولى ثانوي بعد كانت نفسيه تعب امي من فتره للثانيه واختي والمدرسه اخذت فتره على ما تعودت عليها وبديت اتعود على البنات لان صديقاتي ما كانوا معي بنفس الفصل عاد الثانوي تشدد اكثر كملنا وما خلينا احد فترة الهدوء اللي حصلت باخر سنه بالمتوسط طلعتها باولى ثانوي وكل يوم بالاداره ووووو بقية الخارطه مع المدرسات بشهر واحد تقريبا تعبت اختي الصغيره مرررررررررررررررره ووديناها المستشفى وهالمره مافي الا انا وندى امي ما تقدر تتنوم معها لان حالتها الصحيه ما تسمح ولازم لها اكل معين وتبعد عن اي ضغط والشغاله مستحيل ويوم انا ويوم ندى والمدرسه قضيتها غياب انا وهي اذا كانت ندى معها عادي اذا جيت انا تنزل العنايه ليه مدري صدق وجهي وجه نحس واوقات لا انا مو متعوده على مواقف كذا وانا من الاساس خوافه من الناحيه ذي ما انفع ابدا جاني نقص بالاكسجين وعدم انتظام بضربات القلب طول الوقت قلبي يدق بقووووووه دوخه قوييييه كاني اركض حتى لو انا قاعده وبيوم دخلت علي الممرضه وجايبه البخار وجهاز على بالي لاختي طلع لي وش الطاري مدري وحطت لي البخار وقالت روحي المستشفى ضروري اليوم قلت طيب ورحت صرف لي الدكتور حبوب على قولته تنظم ضربات القلب لمدة ثلاث ايام وحده من قصصي مع اللي يسمونه الامل هذا قبل لما كنت اضحك على نفسي دايم اقعد ادعي وابكي ان ربي يعافيها وامي مره متعلقه فيها وكلنا واقرا منشورات عن الامل واشياء كذا قريت بيتين من ضمن اللي قريته واعطتني امل امل وكل يوم ازيد بالدعاء كانت اختي اغلب وقتها نايمه ووين وين تصحى دايم اقعد قربها واناظرها واقرا قران فتحت وقعدت تناظرني وضحكت وش اوصف فرحتي يومها ما اقدر اوصفها ومانمت من الفرحه قعد سهرانه عاد بالمستشفى كل الملل مافي شي يسلي والوقت بطييييييء انا مره طايره ما حسيت بالوقت قضيت الليل دعا الصبح نزلوها العنايه المركزه ورجعت البيت تحطمت بس قلت يالله كل مره تنزل وان شاء الله ربي يعافيها وباقي عندي امل ياااااااااااااااااااغبائي قعدت يومين رحت المدرسه من الراحه انها ضحكت وبداخلي بتتحسن باذن الله والعب ووكل شي سويته رجعت دخلت البيت الكل يبكي ليه وش فيه مافي مقدمات على طول مااااااااااااااااااااااااااااااااااااااااااااااااا اااااااااااااااااااااااااااتت وش فادني الامل بس حطمني زياده لو كنت متوقعه الاسوء كان خفت الصدمه بغيييييييت انجلط مجنونه الا تكه ما قابلت احد بالعزا ولا كلمت احد كل اليوم بكا ونوم بس حتى اكل ما بي اتذكرها وهي تضحك وتناظرني وكل الذكريات تمر بخيالي ملابسها كللللللللللللللللللللللللللللللللللللللللللللللللل للللللللل شي اخذت اخر بجامه لبستها وهي بالبيت يالله يا ذاك الايام ما انساها احس اني عايشه بمأساه بعدها بشهر صرت اخاف من الموت واحس اني بموت لا ومحدده شهر 8 بعد كرهت العافيه ولا ابي احد يكلمني عزززززله لا بالبيت ولا بالمدرسه مالي خلق اكلم احد اشوفهم يتكلمون اناظرهم بدون رد وساااااااااااااكته ما قلت لاحد و7 شهور وانا بحاله يررررثى لها استغفر الله صلاه ما ابي اصلي ولا اقرا قران مع ان المفروض احرص على الطاعه اكثر ما ابي اسوي شي لا طاعه ولا معصيه وجا شهر 8 وعدا وانا باقي طلع شهور ثاني يقول بشهر 10 قلت ما عليه يكفي اللي راح ورجعت زي ما انا يالله ياني كارهه نفسي اليوم ودي لو فيه شي ينسي كل شي مو زين ويخلي الانسان يرتااااااااااااااااااااااح خاطري بحبوب منومه ابي انااااام اليوم متضااااااااااااااااااااااااااااااااااااااااااااااا ااااااااااااااااااايقه بكل المقاييس مالي خلق شي احس بضيقه قويه نمت وصحيت وشعبت نوم وما راحت مع ان بالعاده اذا نمت ارتاح مهما كنت متضايقه بس اليوم غييييييييييييييييييييييييييييييييييييييييير ..................... |
ياااسماااااااجة ايامي
افرح يومين والباقي بين احزاني عاد الباقي سامج روتين يومي ممل دخلت ادبي يا لبى الادبي فلته ومافي حصص وفراغ اساسي بس خايسه من ناحيه وحده ربي رماني باول الفصل قدام وانا بالعاده احب اخر شي من اول ما درست دايم بالاخير بس ثاني ثانوي انخميت كانت معي وحده من صديقاتي بالشله ونجيب العيد دايم مع انا بالاول دايم نلعب بالفسحه بعلب المويه ونجيب اونو ومنبولي وقيم بوي ونلعب عليها ناخذ كتب بعض ومن زود الشطاره يضيع الكتاب وتمل اللي اخذته واحنا ما درينا عنه ضايع ولا موجود الكتب بالدرج ما اخذها البيت وحتى الدفاتر والشنطه فااااضيه للاشياء الجانبيه العاب بلونات شيبسات ببسي وكأن المدرسه فاضيه وناكل بالفصل ونطلع من الحصص استهتار ووناسه نجوود صارت تجلس مع شله ثانيه وارتحت اخيرا من معاناتي من خيالها الواسع الا محدود وما صار بينا بالمدرسه غير سلام وكيف الحال بس واذا تقابلنا بمناسبات برا بمنتزه شي عادي حلوه مرررا ايام الدراسه ليتها ترجع بالبيت الامن مستتب من لما كنت ثاني متوسط جاني خطاب بس ما انحرج واخذ السالفه مزح وهبال مع اخواني واقول لا 4 بس ما انحرجت >>يا قوة وجهي عاد ولاول مره استحيت بس لو اخواني قالوا لي كان عادي لكن اخته دقت علي وكلمتني وكيفك واخبارك واعطيتها الاجابه والله لا يفشلنا اكلم البنت واسولف واضحك بجناني المعتاد معها ليتني سويت نفسي هاديه على الاقل قالت شفتي اخوي فلان قلت ايه وش فيه قالت بنخطب له قلت احلى مبرووووك حركتات ولاني ما احب هالسوالف حاولت اقفل الموضوع وسألتها عن اخواتها قالت يا بنت اصبري ما قلتي لي من تتوقعين اللي بنخطبها قلت والله مدري بس اكيد من بنات خوالك قالت خطاء هي عندكم >>تقصد بالمدينه اللي احنا فيها قلت فلانه لا طيب فلانه كمان لا دلااااااخه لا توصف قالت عمى تستهبلين قلت لا وربي ما استهبل عديتهم كلللهم اللي عندنا ما افتكر اني نسيت احد قالت اكيد قلت اكيدين يالله عاد اخلصي تري طفشت قالت نسيتي وحده وهي اللي بنخطبها قلت وجع ما نسيت احد والله لو اني فاقده الذاكره قالت يا خبله انتي صمت انخميت وسكت وافصل التليفون قلت تمزح وارجع اشبكه قالت وين رحتي من جد ما اعرف وحده احلى منك وهو يحبك وووووو البكش الباقي على طول قلت لااا ما ابي دراستي >>مسويه نفسي قالت عادي يقول بينتظر بس كلام اللحين عشان تكونون لبعض قلت احسه زي اخوي هنا انفجرت االبنت خير وش زي اخوك >>انا مدري وش يزعل بالكلمه يحمد ربي مثل اخوي تكشفين عليه تجلسين معه عشان تقولين زي اخوي بلا هبال يالله فكري ولك ثلاث ايام وردي لي قفلت مصدومه وشبها ذي مو بصاحيه وما علمت احد وبعد ثلاث ايام ترجع تدق واصرف مره نايمه مره برا بعد اسبوع كلمتها وسالتني قلت زي اخوي والله بعدين رجاءا انا ما احب الكلام ذا كمان عصبت احاول اخلي البنت تفهمني مررره قلت كيفك افهمي ولابراحتك رجعو كلمو اهلي ونفس الرد لا ورجعو بعد شهرين كمان لا وقعدو فتره وكمان رجعت كلمتني ما غيرتي رايك قلت لا وانتهى الموضوع يووووه يا الاحرررررررراج لما تكلمني اضيع وبيوم اكتشفنا ان ابوي يمشي وعاااادي بالليل وظلام الغرفه مافي الا اضاءه بسييييطه وتو طالعين من عنده وكلمناه وقال انو اوقات يمشي بالليل وقعدنا نحاول يمشي دام يقدر بالبيت وحاولنا نساعده ما قدر طيب شلون بالليل وحده مشى واللحين احنا قربه وما قدر يخطي خطوه وحده جاب له راقي عبدالرحمن ومافي اي تأثر وبعدها بفتره شفناه للمره الثانيه ونفس الحاله ظلام وبوقت قصير ما مدانا نطلع بعد شهرين يمكن صحيته عشان يقوم يتغدا قام يأشر لي افتح الستاره فتحتها بس كمان يقول افتحيها اصلا الانوار شغاله يعني ما يحتاج استغربت بس قلت عادي وجلس بعدين حطيت الغدا قدامه شال الملعقه وحطها برا الصحن ويتحسس الاشياء اللي قدامه طااااح قلبي وقتها واقول تشوفني مرا يقول مرا ايه ومرا لا انفجعت رحت ناديت امي وجا عبدالرحمن وانا ابكييي مصيبه والله نايم صحا ما يشوف اعوذ بالله وطلع من البيت وهو ما سك يدي ويقولي لا تبكين موووقف صععععب كل ما اتذكره احس اني ببكي طلعت كمان جلطه بس الحمد الله نظره رجع وقعد بالمستشفى اسبوعين وطلع بعده جا دور امي وهي بعد تنومت عشان القلب وبعدين طلعت عبد الله صار عليه حادث بس الحمد الله ما صار فيه شي بس كسر بيده عاد انكسرت وما بغت تجبر الا بطلوع الرووح الباقي اشياء عاديه قلت باخذ دورة رسم واجلتها عشان المدرسه وبالصيفيه ما ينفع ارتاح من المدرسه اطيح بالدوره سافرنا رحنا ابها وتنونسنا قابلنا عمامي وخوالي وفليناها كانت صيفيه مقبوله نوعا ما |
بثالث ثانوي
كانت سنه حلوه بكل المقاييس من ناحية الدراسه على اني كنت اكره المدرسه لكن بثالث حبيت المدرسه والطابور وسوالفنا فيه وكل شوي نلف نشوف اذا كل الشله حضرت او فيه وحده غايبه ونراقب المدرسات اذا حاضره او غايبه ووملابسهم وكل شي حبيت فصلي اللي مرات يصير ساحة تزلج واوقات جلسات طرب او ملعب كرة قدم او قاعة زواج لعب وصراخ ونغني ونستهبل حبيت الطاولات اللي نخبي فيها مخالفاتنا المرايه ودفتر مذكراتنا والتويكس والكيندر والبيبسي والاونو وكل شي حبيت الساحه اللي نتسابق ونلعب فيها واذا جا مطر نسحب بعض في المويه ونفك المويه بوسط الساحه ونلعب اشتقت لكل شي لدفترنا اللي نكتب فيه كل شي يصير باليوم والتاريخ والساعه وكل التفاصيل يداوم معنا يوميا ونلزق فيه الاكياس الفطاير والشيبسات ونحط طوابع ونزينه ونكتب فيه كل حصه وش صار فيها خلصنا سبع دفاتر بسنه كل دفتر ابو 200 اشتقت للمخالفات ومراييلنا الضيقه وجزماتنا الفسفوريه والحمرا والصفرا وكل يوم سبت نروح من دون ما نقصص اظافرنا عشان نطلع ونقصص ونرمي القصاصات بالزباله مع ان المفروض نرجعها ونتاخر فوقها عن الحصه واذا قالت ليه تاخرتو نقول كنا نقصص اظافرنا وكل يوم بالاداره والاسباب تتعدد مره لمخالفات متكرره او لرفع صوت او صراخ وخروج من الفصل تاخر عن الحصه اكل في الفصل اعاقة سير الحصه كل شي كان حلو فييها ونسوي خلطات ونلعب فيها يالبى ذييييك الايام ليتها ترجع واادفع نص عمرررررررررررررررررررررررررررررررري وبيوم مغبررررررر وكئيب قالت لي امي اني انخطبت وقلت ما ابي بعد اقناع ومحاولات وافقت على اني اتقرف من الزواج وما احب سيرته وافقت كييييييييف ما ادري الى اللحين افكر كيف وافقت وين عقلي طار وقتها كنت مو صاحيه ملكت واول يوم من نحسه جاني صرع اول مره يجيني بحياتي بدت المكالمات والله وهو لزززززززززززززززززززززززززقه طفشني كل شوي يكلم مليت طقت كبدي ما ابي طيب اكلم اقول شوي اكلمك نص ساعه ويدق ياحووول مافي اخذ نفس ومن زين المكالمه كلها قلت ادب ما تخلص واقول لاخواتي يقولون عادي مع الوقت تتعودين بالبدايه بتتعب نفسيتك وبعدين خلاص قلت طيب وكلها اسبوع وبدت المشاكل كل يوم مشكله مشكله ورى مشكله وعلى اللي يسوى واللي ما يسوى ما يسكت الا لحد ما يرفع ضغطي ويعصبني وبعدها امزح يا ابو مزح تعرفه تعبت امي وكنت توي راجعه من المدرسه ورحت معها حتى غدا ما تغديت على بالي بنرجع بدري وقعدنا من الظهر للساعه 9 بين تحليل وتخطيط وقياس ضغط ووووو وكل شوي اسال الدكتور وش فيها يناظرني ويقول ولا شي واقعد شوي واروح اسال دكتور ثاني وش فيها كمان يناظرني ببلاهه ويسكت وما يرد رفعو ضغطي واروح لدكتوره خير وش فيها هي بعد ما اعطتني اجابه اخوي اقلقني كل شوي يدق وش فيها وش قالو اقول ما قالو شي ما يصدقني وراح سال قالو بينقلونها لمستشفى ثاني لان مافيه اسره بالعنايه ودق قالي بغيت اموووت من الخوف والقهر وصرنا العشا كل التعب فيني اطلع برا وابكي عشان ما تشوفني وارجع تقول مافيني شي لا تخافين تري عادي وهي من اول تقول ندى تمشي انتي اقعدي قلت لا واستاااااااهل اكلتها نقلوها قدامي باالاسعااف ورجعت البيت تعبااااااانه موت ما اقدر اتحرك الا بالقوه داااايخه ما اكلت شي ورقبتي تعوووووورني مررررررررررررررررررررره ومقدر الف لا يمين ولا يسار راسي ضغط فضييييع كنت ابكي بس وربي اول مره تمر علي هالحاله ابي ابكي بس من التعب ما فيني حيل حتى ابكي حزيينه ومقهوره ومافيني حيل ندى وتركي شافو شكلي قالو فيه مصيبه ويبكووون يسالوني ما ارد مالي خلق واروح ارمي نفسي على السرير وانام قالو لنا انو احتمال يعيدون لها القسطره هنا خلاص ما عاد فيني صبر لان خالي السنه اللي قبلها سوو له قسطره ومات بس الحمد الله ما احتاجة لها وهو ولا قدر وقال امها تعبانه احل عنها لا شغال مشاكل ومدهر قلت هذا شكله يبيني انا اقول ما ابيك ووقلت له خلاص يا خي ما ابيك ومسجات واتصالات ويدق على اخواني تكفون خلوها ترد وتليفون البيت لحد ما ارد ويرجع مثل ما كان طلعت امي من العنايه على التنويم وكنت معها يدق علي الاخ يكلمني باي وقت يفول اني بالبيت عشان اقدر اكلمه ومره دق علي يقول انا عندكم يقصد بنفس المدينه وانا اللحين عند المستشفى ابيك تنزلين لي خمس دقايق ابيك بالسياره قلت لا والله وين عايشين معليش ماني نازله قال طيب بالاسترراحه قلت ولا واذا احد دخل قال يوه طيب خلاص بالحمام خمس دقايق بس !!!!!!!!!! سلاماااااات هبلا انا ولا مضيعه عقلي قسم يقول يكلم وحده مرقمها دايم يقول بجيكم عند البيت وانزلي لي السياره او بأستأذن لك من المدرسه واخذك ماهو صاحي جاب لي المرض وليت افكاره زينه كلها زي وجهه مقززه تجييييييب الغثيان كمان عصبت من اسلوبه وربي لو اني وحده صايعه عشان يكلمني كذا طلعت امي الحمد الله وارتحت خلصنا اختبارات وسوينا حفلة بكا بالمدرسه لانا بنفترق وبكينا لين قلنا بس ودخلت الجامعه بس مو التخصص اللي ابيه وما استمريت بطلت عشان السنه الجايه ادخل التخصص اللي ابيه دخلت دورة تجميل حبيت الصبايا اللي بالمركز مرررره طيوبات نفس المشاكل مستمره ما تنتهي كل يوم الزواج بشهر وطلع لي بسالفة جوالاتي يا كائن حي انت جوالاتي وش عليك منها قال لا الناس وش تقول عندك جوالين والمصيبه يكلمني واذا خلص شحنه يقول دقي علي ادق عليه وبعد فتره انفصل جوالي واقول له سدد يقول لا مو لازم خليه شحن بعد محاولات وافقت وليته يشحن مالت بس بالقطاره وبالشهر مره بعد لا وبعشره او عشرن ام المذله من عام لشحن ومن مصروف شهري الى مصروف بعد كل خمس شهور لا وليتها على قد التاخير 500 مالت على اللي علمه يصرف وش اسوي فيها اتصور معها فشلني من اهلي طييييح وجهي بكل شي وش ارقع ووش اخلي يجي عندنا البيت اقول لاهلي لا تخلونا وحدنا يطلعون واقعد بها جميع انواع القرف يطلع منا ركض على الحمام ارجع واستخدم كل المنظفات والمعقمات من القرف وفوقها اقعد ابكي يقهر لزقه ما يوخر حتى لو دفيته يا شين هالذكريات تجيب لي الغثيان والضيق ............. |
وغيرها من مشاكله اللي ما تخلص
نقلنا من بيتنا اللي كنا مستأجرين فيه لبيتنا الملك انقهرت كثير لان تركنا البيت الاول كل ذكرياتي فيه حتى بعد ما طلعنا اي حلم احلمه هناك مو ببيتنا ذا وانا باقي على مشاكلي كل يوم مشكله ما يمديني اخذ نفس ياربي استغرب من هالانسان وشلون يفكر يعشق المشاكل وانا ما احبها يالله اخلص من اللي عندي يزيد قالو الملكه احلى فتره وكلام ماله اساس من الصحه ما شفت شي الا اسوء فتره مرت علي ثقالة دم فوق الوصف وغثا وازعاج يااااااااااااااااا الله استفزاز ورفعة ضغط كلام ماله داعي واخيييييييييييرا بعد ما طلعت روحي استقر على يوم وقال خلاص وقلت له عن القاعه اللي ابيها راح اخذ استراحه استراحة عزاب اكثر ما يقال عنها وراحو اخواني يشوفونها بما انهم قالو له من البدايه كل شي بينا نص بنص عشان يساعدونه وما يطيح بالديون واتوهق معه لكن ما ستاهل اخواني انصدمو وش ذا زباله مو قاعه جا فارس معصب خير وش يحس فيه ذا من جده بنزفك بذي مو صااحي اكيد وبـ1500 وبدون خدمات يوووه لما شفتها جاني احباط وش ذا هو مزحلط من زماان من عيني فما يحتاج يطيح لكن كرهت اليوم اللي عرفته فيه على شيينه بعد يستهبل مدري من ضاحك عليه وقال تراك قايد الغزلان تدلع على مزاجك يعني ما يكفي صبري وقلت يالله يا بنت اصبري اهم شي الاخلاق وطلع لا ذي ولا ذي توهقت فيه والله ليتني ناظرت فيه يوم النظره الشرعيه لكن مسويه مستحيه وهاذي النتايج بنات عمي انسطلو وحده تقول وربي لو مكانك ما اوفق الا على واحد يسوى مو ذا قلت يالله مو مشكله بعد طلع منتهي من جميع الجوانب لا وبعد يعيب انتي مدلعه انتي مغروره انتي عجوله انتي تبين كل شي عندك من قبل تطلبين وانا مو زي اهلك اقدر اوفر لك كل شي تبينه دامك مو قد الزواج ورى خاطب كان من اول وكرر كلمة مغروره اكثر من مره رفع ضغطي قلت له لو اني مغروره على قولتك كان ما اعطيتك وجهه من الاساس ولا وافقت عليك وترا لا يتواضع الا كبير ولا يتكبر الا حقير ووش قصدك وعشانك كذا تشوفين نفسك علي انا مو مستوعبه في ايش شفت نفسي عليه اقول له بايش طيب عطني مثال ما عنده والكذب لا اله الا الله حتى بالامراض يكذب ووصلت لسرطان يويلي منه وش بقى لغيره من الكذب ولاااا فوق القاعه اللي مثل وجهه لا ما في طقاقه حرام حطي دي جي والله يامت ضحك وقتها قلت الطقاقه حرام والدي جي حلال صح لا عاد تتكلم بحلال وحرام وانت ما عندك سالفه وكوشه مالها داعي ونقاشه مالها داعي وكل شي ماله داعي قلت وش رايك انا بعد مالي داعي اجي ومو لازم بعد فستان مره وحده ومافي داعي نسوي عرس اصلا لو بيجي لازم يسوي مشكله ما يجي كذا وانا مرتاحه نفسيا لااااا لازم يسوي مشكله كبيره ويعنيني جيت اراضيك على ما اكره الزواج لكن اللحين مو بس اكررهه الا تبت منه ولا عاد بعيييييدها مجنووووونه لو عدتها وبالاخر قلت له خلاص ما عاد ابيك والله لو تصير ملاك واطيب انسان على وجه الارض واحلى واحد وكل الصفات الحلوه فيك كمان ما ابيك اطلللللللللللللللع من راسي ويدق ويرسل ويكلم اخواني ويرسل عمي يكلمني وواحد من جماعتنا يكلم اخواني مو صاحي مو شايف اغلاطه مو شايفها وعمي يقنعني ماشاء الله عليه وخلاص كملي وو واعتبرك مثل بنتي كان ودي اقوله اسكت بالله لا عاد تتكلم والله لو بنتك ما قلت لها كملي واللي قهرني اكثر يقول لاخواني اعرف والله انو مو كفو بس ما سالتوني اطلع من راسي يا عمي وعمتي مطيرتنه السما قبل الملكه وبعد ما ملكت تقول مدري والله كيف هالزواج يتم ولا لا وشكل امه زوجته عشان يعقل وينك يا عمه توووك وامي واخواني وكل المؤيدين قلبو وصارو يتكلمون فيه وانهم عارفين اخلاقه وانو مو زين ووكل العيوب طلعت وليتهم تعبو وسألو سألو امه يا عيني القرد وهو قرد بعين امه غزال نفسي افهم ليه سوو كذا انا مستعده اعطيهم عمري ما فرقت معي واعطيهم وابقى انا وهم ولا هامهم اختي قبلي تزوجت سألو وكل شي ووافقو بعد ما سوو اختبار قدرات وتحصيلي وانا على طووول مشي حالك واللي بعدي وقالو ما يسوا وانا ماااااااااااااااااااااايهم عشان اخواتي عادي يعني اش ما يصير طبيعي وساحبين كل شي تمام وعشان انا اعطي وشايله همهم محد درى عني وليتها بس كذا غير يبون يزحلطوني يقول على قلوبهم ولا اكل من حلالهم ومسوين تأنيب ضمير وانا مسويه نفسي انهم ما صدموني والوضع فري قلت نصيب مالكم يد في شي وعلى طول قلتها من هنا طار تأنيب الضمير من هنا وبدى كلام ماله داعي وينقال بوجهي وسكت مو لاني مقدر ارد بس حبهم عندي اكبر من اني اجرحهم دايم احاسب على كلامي معهم لا اقول شي يزعلهم وهم فرررري ما خذين راحتهم يالله نمشي والاخ معطي شروط عشان يطلق طالب فوق المهر اللي دفعه عشان يطلق قلنا له طيب بس حل قال لا بالمحكمه واقص يدي لو حضر الجلسات ياااااااااااااااااااااااارب اخلص من هالموال اللي طفشني واتطلق وارتااااح نفسيا ثلاث شهور رايحه جايه للمحكمه ومافي ولا شي جديد مره الشيخ مو فيه ومره ترقى ومره بكره ومره الاسبوع الجاي.......الخ يوووووووووووووووه وربي مليييييييييييييييييييييييييييييييييييييييييييييييي يييييييييييييييييييييييت .......................... |
مليت اي وربي مليت
مليت من كلللللللللللللللللللللللللللللللل شي حتى من نفسي على اقل لما كنت ادرس اطلع كل الضغط بالمدرسات وباللعب لكن اللحين بالبيت مافي اي شي افكر اشوف لي اي دوره اهببها لحد السنه الجايه اوقات اقول يارب اموت وتنتهي كل مشاكلي وهمومي وارجع افكر طيب يمك ما ارتاح يمكن اصلا ما اكون في الجنه وش هي حسناااتي ومو ضامنه مالي خلق ابكي على فراق احد ولا اشيل هم احد ماااااااااااااااااااااالي خلق احد ابي ابعد عنهممممم كلهم مو كره لا بس تعبت من تصرفاتهم تطنيييييييش على برووووووود على اسلوووب مدري وش يبي خخخخ والقادم اكثر حزن متأكده المؤشرات كلها تدل على حزن ابدي ما منه طلعه حاجه وحده ابي اسيطر عليها دموووووووعي ابيها تثبت شوي ومو كل شوي تنزل تعبتني تحسسني بالضعف فوق اللي انا فيه ابكي من الضيق وويتغير مسار البكا حزن عليهم واقعد ابكي هذا مشكلته كذا وووو وانسا نفسي حتى لما ادعي اقدمهم على نفسي وبالاخررررررر .......... لا تعليق صراحه محد ماكلها ولا بياكلها غيري انا وتركي ياكثر اشياء اخذت فيها مقلب وانصدمت ياقووها احب احد واعزه وافتخر فيه بعد وهو ما عندك احد ويطلع عكس تصوررري مو حكاية اني حساسه لا ولا ان مشاعري متجمده مره انا ما ابكي من اي شي ولا انجرح من اي شي لكن كلماتهم وتصرفاتهم شي ثاااااااااني كنت اخذ كل شي غصب واللحين رجعت لوضع اطلب مره وحده واللي يبي ينفذ عارف وش ابي وما عاد اعيدها ما باذل نفسي زياده واقعد اشحت فيهم وياكثر المواقف والاشياء اللي مريت فيها يمكن ما وصلت مرحلة يكون عندي الجرئه اقولها وضعي مزرررري مافيه اي حل له غير اقضب ارضي وانتظر الحلقه الاخيره ,.................. |
يا نفسي متى تتعلمين من اخطائك
لا لا مو اخطائك والله لكن تتوبين تصدقينهم وتتعلمين انك ما تصدقين احد متى بتطولين على ذا الحال والمصيبه ليتهم كل مره بشي عشان اعذرك نفس السيناريو ينعاد مالك عذر كل مره يقنعوني بشي لحد ما اطب فيه واذاااا صار وقت الجد يتركوني ويقولون كنا عارفين ولا يووه كنت اتوقع كذا وهي باينه ان مافيها اي مجال للتوقعات خلاص ايه او لا واسوء احتمال ايه فليش يحطون ببالهم انو لا وانا اتوهق ومحد قال شي وعادي كل شي تمام واليوم انصدم انهم ما يبون ليه توهقوني في الشي اللي يخصني واللي ما يخصني احس اني بنجلط ولحد متى ودي اطلع من نفسي واصك نفسي كف وارجع عشان تتعلم مره ثانيه لا تسوي فيها اخلاق ودي اصير غير انا واروح صحراء الربع الخالي >>لا عاد مو كذا بس ابعد عن كللللل الناس بمكان وحددددي واريح مخي لا احد يبلشني ولا احد يوهقني بشي مالي شغل فيه ولا احد يزن على راسي يا نفسي تعلمي يرحم اهلك تراك اتعبتيييني بالحيييييل وفكينا من التناكه الزايده اتعلم من غيرهم بس هم لا ارجع اثق فيهم واسوي اللي يبون وتطيح على راسي ههههه والله حاله |
احزن على اللي يمشي بطريق خطاء
والكل يقول له غلطان وهو يدور على نفس المحور وما يسمع الا صوته ويطنش النصح مو بس يطنش الا مو راضي يستوعب تكلمت وحاولت اقنعه بكل الطرق الزواج يبي له وقت مو خبط لزق اصبر شوي هه لو كنت لاقيه احد قال لي تراك ماشيه بالطريق الخطاء ابعدي ما كان تاخرت ووخرت على طول عشان اوفر على نفسي الوقت وهو يقولون له لا وهو مصر استغرب منه ذكي ويلقطها وهي طايره عليه فلسفه عجيبه لكن اذا تنك ما يسمع الا نفسه عناد !!! ما اتوقع العناد بهالطريقه اوكي بعاند باي شي اي شي كان بس بمستقبلي وحياتي لا مستحيل ما وصلت لهالدرجه عاد احترت معه وللمره المليون لعبو علي وش معد اصدقهم حتى لو كانت امي ما اسوي شي ولا اتحرك بناءا على كلام احد فقدت ثقتي فيهم ملكتي اللي انخميت فيها كان المفروض انها تكون درس اتعلم منه وما انساه بالبدايه اول ما عرفت اخذت على نفسي عهد ما اصدقهم ولا عاد امشي بناءا على كلامهم يا اشوف بعيني ولا ما اصدق مع ان لسا ما خلصت من الخطيب ..... ولسا لحد اللحين مرتفع ضغطي منه صح اني ما اتذكر الا اذا جابو طاريه بس وبالنسبه لي زيه زي اي شي انتهت صلاحيته وخلاص لكن اللي ارجع اتذكره كلامهم المقلب الحلو وانقهر ههههههه نسيييييييت بسرعه وعلى طول رجعت الثقه وما كان صار شي ابي افهم هاذي دلاخه فيني ولا وش تتسمى الموهم ورجعت ثقتي فيهم وبعدها نففففس الشي تكرر واكلت مقلب ثاني يهبل زي الاول بس عاد ذا يهون مقالبهم ماهي مزح ولا ضحك ليه يعني عشان شافوني بضحي بكل شي عشانهم يقومون يلعبون علي كذاااا ابو الذكاء اللي فيني المشكله اني ما استوووووووعب واذا مره استوعب شهر وارررجع اوووووووووووف يالمشاكل اللي ما تخللللللص ياااااااااااارب رحمتك والله اني طفشت من كل شي |
سمعت كلام منك ما تمنيت اسمعه منك بالذات منطقك غرررريييييييييييب مرررره ولا اقدر اكتبه
من الاخررررررررررررررتحبيني ولا ما تحبيني يا يمه ؟؟؟؟ أوقات احس انك قريبه مني واوقات افعالك تخليني في موقف لا احسد عليه و ما عد اعرف اقرر وش المفروض اسوي اعاتب او انسحب بصمت ابكي اناقش اسأل داااااييم اوقف عاجزه عن التعبير قدامك اول مره اكتب عن امي شي او اعلق او حتى افكر لكن موقف اليوم وامس خلاني افكر واكتب ليه ترميني بالمقدمه وتتركيني ليه تحبين تحرجيني ليه تفتكرين اني انسانه بدون احساس لييييييييييييييه مو المفروض انك احن قلب علي وييييينك؟؟؟ مو المفرووض انك انتي اللي ما تحاولين تجرحيني ؟؟؟ مو المفروض انك اللي تدورين سعادتي ؟؟؟؟ طيب ليه كل شي يدل على االعكس !! مهما سويت واعطيت وبينت انا اخر الطابور عندك كل المشاكل على راسي وبعضها انتي طرف فيها ولا انتي ولا اخواني ولا صديقاتي ولا احد حسسني انه حاس فيني وانا اكون معكم للاخير وتاخذون جزء كبير من تفكيري ادري ان كل واحد له طريقته بالتعبير بس ما شفت ااي بوادر للتعبير سبحان الله انا وتركي مشاكلنا تنسا ومحد يدري عنا وكل واحد فينا لوحده بلا معين والباقين مااشاء الله عليهم قلوبهم على بعض وانا وانت لوحدنا كأنا محنا من العايله عيال الجيران الظاهر او انا من كوكب ثاني جايين سامحني يا تروك والله ما بيدي شي ما قدرت انفع نفسي عشان انفعك صبرك بس لحد ما اصحصح من اللي انا فيه واستوعبه ياقلبي عليك انت اللي فاهمني لا تحسب اني نسيت كلامك ذاك اليوم كلهم تكلمو وتناقشو وما درو انهم جابو العيد فيني وانت اللي فهمت مع انك اصغرررر واحد فينا خساره ليتك كبير ياااااااااابروودكم يا اهلي ويااااا عدم مبالاتكم اللي مدري متى تنتهي وياحب كل واحد لنفسه ومصلحته >>ما عمري تمنيت اكتشف هالصفه فيكم لكن الصدق مليت منكم ~~~~~~~~~~ [ |
ياااااااربي من هالبلشه
عجزت اعرف شلون يفهم تلميح ما نفع صراحه ما نفعت اجل وش باقي كل شي سويته الله يسامح من حط براسه اني اغار عليه انا وندى قالوها مزح وهو صدق اللحين لو اتكلم من اليوم لبكره بيحسب انو من باب الغيره يارب اعطني الصبر مافي وقت اخذ نفس مشكله ورى مشكله مافي وقت راحه يادوب اخلص من مشكله وابقى متأثره منها وبس ابدا ارجع لطبيعتي يصير شي ثاني والمحكمه انا ما بيجيب لي الضغط غيرهاااااا كل يوم اروح السبت الجاي بعد اسبوعين بعد شهر ياخوفي يوم السبت يقولون بعد سنه الله لااااا يسامحك ياااااا اللي مو راضي تفكني شرك كل يوم اكرهه اكثر من اليوم اللي قبله والله ما صارت ورقه ووقعت عليها ليت يدي انكسرت ولا وقعت كان ارحم من الطفش يبي نترجااااه يطلق مع نفسه والله بيطول ينتظر لو ما عاد اتطلق وجع ياكثر ما دعييت عليه ما صار فيه شي والله دايم افكر وين كرامته الكل يدري اني ما ابيه وكلهم يقولون له خلاص ما تبيك طلق كيف عايش مدري مافي عزة نفس والله شفت مقطع لو حده منزلته بالمنتدى اظن لعيون نوف عن اللي قالت له زوجته اذا عندك كرامه طلقني ومات هذا نقدر نقول انه رجال وعنده عزة نفس وكل شي لكن ذا الف مره مو مره بس قلتله طلق يا اخي ما عندك كرامه وهو ابد ما تاثر حتى بديت اشك انه انسان لا ومقفل جوالك كمان عساه يطيح وينكسر عاد اعرفك بخييل بيجيك حصبه عشان بتدفع وتشتري جوال ثاني والاحتمال الاكبر بياخذ ابو كشاف عشان يوفر على نفسه واذا فيه اقدم ما بيقصر ليه الواحد يبخل على نفسه ابي اعرف يا اخي بالاخر بتموت وش بتنفعك فلوسك اللي جمعتها ؟؟؟ يوه لو اني كملت معه عز الله كان رحت وطي فطور مافي مو لازم والغدا ثلاث حبات رز والعشا زيتونه ولو مثلا طلبته شي احبه هو ما راح يجيبه كذا بعد محاولات ووو بيجيب لي كورن فليكس مثلا ويقسمه كل يوم حبتين ينتهي تاريخه وباقي ما خلص استغفر الله العظيم سبحان الله وبحمده سبحان الله العظيم ,,,,,,,,, |
| الساعة الآن 06:29 AM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©