|
رد : هل هناك فجر قريب ؟ *فضفضة*
قبل يومين ارتحت معكم
رجعت لي الحالة اليوم، حاسة قلبي مقبوض و رغبة بالبكاء .. حتى مابغى رمضان ينتهي و مابغى يجي العيد ماشتريت اي شي للعيد و لا جهزت شي،، و مالي نفس أقابل احد بالعيد ماعرف السبب ؟؟؟ هل بسبب الاحداث و التغييرات هذه ؟ و لا بسبب حزني على امي ؟ و لا اكتئاب بدأ يصيبني ..؟؟؟؟ . . حتى مع وجود طفلين، حاسة ماني قادرة أخذ فترة استجمام لنفسي .. و اول مرة أتحمل مسئولية البيت، مسئولية كاملة .. و الشغالات جننوني و كل وحدة بمصيبة.. كتبت موضوعهم هناك و ماقدر استقدم شغالة و حتى سفر للخارج عشان سياحة و تغيير جو.. ماقدر عشان زوجي عنده مخالفات ساهر و ما يجددوا له جواز سفره . . ما احب اجلس اتشكى و اتظلم وووو الخ بس احس بيجيني الضغط من كثر ما بأكتم، عشان كذا أنا اليوم سلبية جدااااااااااااا |
رد : هل هناك فجر قريب ؟ *فضفضة*
اقتباس:
|
رد : هل هناك فجر قريب ؟ *فضفضة*
كريستالة ..
صح أي قرار يتعلق بي أو بالأطفال و البيت يكون بيدي ، لإنه زوجي ما يهتم و تارك لي الحرية .. بس أي قرارات ( تخصه هو ) .. فما أقدر أتحكم فيه .. . . و أدري إني ما أقدر أجلس من غيره إذا سافرت ، بس كل ما جات سيرة السفر .. يجلس يحبط فيا ، و يمكن ماقدر أروح .. و خلاص روحي لوحدك ووو إلخ .. مع إني عارفته ، أول ما يصير الموضوع جدي .. بيروح قبلنا ،، بس ما بيساعدني و يسعى لي بالأوراق .. كل شي لازم أعمله بنفسي .. . . كريستالة ،. زوجي انسان يبغى يعيش حياته .. مثل اللي خرج من سجن و أول مرة يشوف حرية .. . . مشكلتي دحين مع زوجي، إنه إذا شافني ضعيفة ، استهان بي .. و أنا بأمر بفترة صعبة حالياً ،. و ما أحب أكون متنكدة طول الوقت ، لكن غصب عني ( حزينة ) .. و زوجي ما يحب يشوفني ضعيفة ، لإنه بيستقوى علي أكثر و يتغير و يبدأ بمعاملتي مثل طريقة أهله يعني ما أقدر ألجأ له في (وقت ضعفي) .. لإنه بجد تغير الفترة الأخيرة .. لحد ما رجعت من أسبوع ( لنفسي ) .. و انتبهت على حالي .. و قبل أسبوع قريت مقالة لناعمة الهاشمي بعنوان ( احذري لحظات الصفاء ) .. و بجد انتبهت الحمد لله على حالي ، و رجعت أقوم من جديد .. . . الفترة اللي فاتت ، كنت بجد متأزمة و اغلب وقتي اجلس هادية و ساكتة و كاتمة بنفسي .. لإني ما صرت أثق بأحد ، و كنت زمان دايما اتصل على أمي أو أروح لها و نجلس نتكلم و نتحكى .. زواجات ما أروح و مالي نفس و لا أسواق، انبسط بالجلوس بالبيت أو مرات نتمشى بالسيارة أو مطاعم.. و أول مرة حالياً أتحمل مسؤولية البيت مسئولية كاملة ، فبأحط حرتي في البيت و تنظيفه و بالأولاد .. . . رجع دحين زي العسل ،. بعد أسلوب تعاملي الجديد معه .. لازم أحسسه إني مو بحاجة له (معنوياً).. عشان حياتنا تمشي و هو يبدأ بالبحث عني .. زوجي عكس الرجال .. . . و بإذن الله ألقى قبول عن قريب .. كان معاي قبول من بريطانيا و قابلت المشرف و رتبت كل شي .. بس عشان أمي الله يرحمها ، وقفت الدكتوراة مباشرة .. مع إنه هنا تشحططت أنا و زوجي و ولدي .. بس حتى في هذه ، ما رحموني فيها ( النماميين ) .. و قالوا أصلا و فصلا .. إلخ بس يكفي إنه أمي كانت مبسوطة لإني تركت كل شي و جلست جنبها .. |
رد : هل هناك فجر قريب ؟ *فضفضة*
بأشوف أحلام و تفسيرها إنه هناك ( أعداء ) يحاولوا التغلب علي ،، لكن ما يقدروا ..
و إنه هناك شخص ( نمام يسعى للتفرقة ) ،، بس برضو الحمد لله ما يقدر يقرب مني في نهاية الحلم .. و شفت كمان مرة حلم و تفسيره إنه ربي راح يظهر ( العدل و الحق ) .. بس ما عاد يهموني .. لإنه حتى العدو بنعامله بإحترام .. و حتى القتال لابد يكون ( بشرف ) .. . . ويُروى أن لقمان قال لابنه : إذا أرَدْت أن تُؤاخِي رجلا فأغْضِبه ، فإن أنْصَفَك وإلا فاحْذَرْه . فما بالكم بأشقاء ؟؟؟ . . بس شي ما عاد غريب أبدا .. . . و الله ولدي أمس بالليل زعلان من أخوه النونو ،، يقول ( ماما أنا خلاص ما أحبه ) .. سألته ليش ؟؟ قالي ( عشان بياخد لعبتي ) .. قلت له ( حبيبي ، مو عشان لعبة ممكن تتكسر و ترميها .. ما تحب أخوك .. لازم تحبه و هو يحبك .. و هو صغير ما يفهم ) جلس يفكر مع نفسه .. اليوم الصبح جا عندي و أعطى لعبته لأخوه و باسه و حضنه ،، قالي ( ماما أنا أحبه ) .. قلت له ( هو كمان يحبك ،، شوف كيف صغير و يجننن ،، و أنا كمان أحبك و أحبه هو كمان ) .. . . نسيت أقول .. حتى ولدي ما تركوه بحاله .. بجد شر البلية ما يضحك ؟؟؟ |
رد : هل هناك فجر قريب ؟ *فضفضة*
صبا الخير يا حلوة
انا مو معك في انك ما تتجهزي للعيد زي الناس والاوادم ليه يا روح ..! تدرين .. ذكرتيني بأول عيد يمر علي بدون أولادي نمت نومة طويلة من كثر الصياح و الزعل لكني ما استفدت شي :( العيد فرحة من ربنا وتضيعيها عليكي و على اولادك و زوجك بالعكس اتونسي واحمدي الله على نعمة الصحة و العافية روحي اشتري لهم واشتري لك فرحيهم و افرحي معاهم ماباقي على العيد الا شوي تبغي تحسي بالعيد صح روحي صلي صلاة العيد في المسجد و شوفي كيف العالم هناك البنات الصغار وفساتينهم و حلوياتهم و اشياء حلوة تعيشك الجو لا تفوتيها على أولادك مهما كان الحزن و الهم بداخلك , تعالي عليه على الأقل في هاذي المناسبة اللي مفروض كل مسلم يفرح فيها اساسا يا روح لما تروحي السوق تشوفي كيف البنات يتسوقو وراح تتحمسي والله انسي الحين كل همومك ولا تفكري الا بالعيد اعطيه حقه و انبسطي فيه تكفين روح .. وبعدها تعالي هنا واكتبي كيف نفسيتك متأكده حتتغير وتحسين انك صفيتي شوية الله يجعلك من كل هم فرج يارب يا قادر على كل شي |
رد : هل هناك فجر قريب ؟ *فضفضة*
الفردوس غايتي ..
كيف أخرج للسوق، و معاي طفل صغير ؟ كيف أمشي معاه و أدف عربيته و اشتري ؟؟؟ حتى المسجد كيف أخده معاي وسط الزحمة ؟؟؟ مرتبطة بهم و ماقدر أخرج من البيت .. . . أنا حأزور أقاربي مثل أعمامي و كذا .. لكن ما راح أجتمع باللي غلطوا علي، و لحد دحين محترمتهم .. و أمي توفت من قريب .. أحس مالي نفس .. بس اتفقت مع زوجي ، احجز شاليه إن شاء الله .. بس يمكن ثالث يوم العيد .. . . يمكن أنزل بس مرة وحدة للسوق ، اشتري طقم واحد للبزورة .. عندهم ملابس جديدة في الدولاب .. و بأخذ هدية لزوجي و لنفسي بأخذ عطر و مكياج و جزمة الله يعزك .. اللبس فيه عندي ، اشتريته من كم شهر و ما عمري لبسته .. . . أغراض البيت حلويات و كذا بأتركها على زوجي ،. عشان يتعود ، لإنه ما عمره جهز .. و إذا شافني مهتمة بيطنش .. زي مثلا ثوب العيد لولدي، شافني ماني مهتمة لأول مرة .. قام نزل بنفسه و راح اشتراه له أول مرة في حياته |
رد : هل هناك فجر قريب ؟ *فضفضة*
روح الطير ,, ربي يفرج همك حبيبتي وان شاء الله اكيد يوجد فجر قريب بس انتي خلي ايمانك بربك قوي وان شاء الله ما راح يخذلك
وتذكري انه ( لا يضر السحاب نبح الكلاب ) موفقه |
رد : هل هناك فجر قريب ؟ *فضفضة*
الغاليه روح الطير
انتي قويه ماشاء الله عليك وانا واثقه انها كلها فتره بسيييطه وان شاء الله بتروح حالة الضيق اللي انتي تعيشينها كلما حسيتي بنفسك متضايقه ومكتومه ادخلي هنا وفضفضي عشان ترتاحين لكن بنفس الوقت وأهم شي لا تنسين تفضفضين لربنا في صلاتك وسجودك ودعاءك صدقيني انا مو وضح يسمح لي انصح غيري لكن هذا الشيء انا جربته وارتحت كثييييييييييييييير .. بشرط اني ما اقوم من مكاني الا وانا طلعت كل اللي بقلبي والله العظيم اني ما اجاملك ولا احاول اكذب عليك لكن انتي تعطيني دافع اتطور واشجع نفسي .. وربي تعجبني فيك قوتك وثباتك ومعرفتك للشي اللي تبينه وتسعين له وتستمرين فيه برغم كل الصعوبات والظروف اللي تواجهك .. عزيمتك قويه وشخصييييتك حلوه كثييييير ماشاء الله .. تعرفين اني اتمنى اصير مثلك بدون مبالغه واعتبرك مثل (قدوه) بطريقة تعاملك مع الظروف وتغلبك عليها وبنفسك الحلوووه تدرين .. من فتره كنت ابي افتح موضوع خاص معك .. كنت ابيك تساعديني اصير قوية (لاني قريت مشاركاتك) مع نفسي ومع الناس .. كيف اتعامل .. وكيف اتغلب على تفكيري وسلبيتي .. لكني تراجعت لاني فتحت موضوع ثاني انا والله ما اقول هالكلام عشان شيء .. لكن يشهد الله اني حبيتك من غير ما اشوفك وهالمكان صار بيتي .. ارتاح فيه اكثر من أي مكان ثااااني .. تعلمت منك ومن كثير ناس من غير مايدرون اشياء كثيره غيرت فيني اشياء كثيره وبكون سعيده لو شفتك مرتاحه ومبسوطه ومحققه كل اللي تطمحين له بعترف لك بشيء :) تدرين انا تعلمت بعض الاشياء منك ومن ردودك لدرجة مرة مر علي موقف مشابه لاحد المواقف اللي مريتي فيها وجلست افكر .. وعلى طول تذكرتك .. وقلت روح لما صار لها مثل هالموقف سوت كذا وسويت مثلك (اقصد بطريقة التعامل) وارتحت ودعييييييت لك من كل قلبي ولا زلت ادعي لك كلما حسيت اني ابي اصير قوية طولت عليك صح :) اللي حابه اوصله لك .. انك انسانه جميله وشخصيتك اجمل ماشاء الله تبااااارك الله وانتي اقوى من كل شيء .. وبتتغلبين على كل الظروف بإذن الله وانا واثقه كل الثقه بالله انك راح تتعدين هالازمه وتطلعين منها اقوى من قبل لانك تستاهلييين كل خير والله ويمكن كلامي يساعدك والاغلب لا :22: .. بس هذا الشي واقع وصدقيني .. الفجر أقرب مما تتوقعين .. بس خلي املك بالله كبييير الله يوفقك ويسعدك ويريح باااالك ويبعد عنك كل امر يضايقك |
رد : هل هناك فجر قريب ؟ *فضفضة*
اختي العزيزه صاحبة الشخصية المثاليه..اعطي نفسك وقتك لتتخطي مرحلة او بالاصح دروس نفسيه تحتاج الى ترتيب وفصل تيار الالم (عنها) بمعنى.... حينما تكوني في لحظه وحيده او شاردة الذهن تجاه موقف (سلبي) اعطي الموقف حجمه وقرري ماذا ستتصرفين ايجابيا تجاه مسببات الموقف ثم اغلقيه بدون تفكير في التفاصيل... فيا عزيزتي حاجة اطفالك وزوجك اليك انت ادرى بها ..لذلك يجب ان تتمتعي بقوة روحية تستطيعين تخطي جراحك وفي نفس الوقت تضمدينها بلطف... فلو كان عفوك عن اهلك حقيقيا لما ذكرتيهم في الموضوع بهذا الكم من الحزن.. دعيني اساعدك وارجوا ان تتاملي في كلامي البسيط قليلا... الله تعالى خاطب نبيه الكريم قائلا(خذ العفو وامر بالمعروف واعرض عن الجاهلين..) فالحق سبحانه قال خذ ولم يقل اعطي.. لان العفو رداء النفس المطمئنه... والمسامح بحق هو المستفيد وليس غيره.. النفس المطمئنه..تمكنك من النظر للمسيء بنظرة الام او بنظرة الكبير الذي يفهم ان لفلان طيش او سوء ظن او وسوسه تجعله كالطفل الصغير يطلق كلمات صغيره.. ويظلم ولا يدرك حجم ما يفعل... لذا تصرفي كما كنت كبيرة واترك الايام تثبت جدارة ماتفعلي... اخيرا النفس المطمئنه تتحقق بامور كثيرة مثلا ...اطالة السجود....التأمل مع الاسترخاء ..القراءة النافعه...الاستماع لشيء مفيد... واخيرا الدعاء (اللهم اني اعوذ بك من الهم والحزن واعوذ بك من العجز والكسل واعوذ بك من الجبن والبخل واعوذ بك من غلبة الدين وقهر الرجال) ايضا خففي من تضخيم الامور والعواقب فانا وغيرنا مثلك نعاني من اعباء المنزل والاولاد وووو..لكن افعلي ما تستطيعين فعله واعذري نفسك فيما لا يسعفك الوقت فعله ..مع محاولة وضع جدول زمني لترتاحي مبدئيا... اما بخصوص الناس ..اعملي الخير وارميه في البحر..يعني انسيه بعد خلاص نيتك... فالقلوب معادن وفيه ناس مهما كان معروفك لهم سينسونه مع اول مشكله او زله او خطأ صدر.. فهم كالقرب المفقوعه...واحمدي الله انك مش منهم.. تأملي... عندما يضيء فجرك .....وانت.. متعافيه في بدنك:18: وعندك قوت يومك......... وامنه في دارك:.....اذن فالدنيا كلها بين يديك فقط تأملي نعم الله اكثر واكثر...... لتنعمي بطاقه نفسية مشعه من جديد....فمهما كان حجم المشاكل في حياتنا لن تكون بها نهاية العالم...ومهما كان هناك كره وعداوة فلن تستطيع هذه السيئه ان تكدر صفو حياتي لان المسيء يسيء لنفسه بافعاله ..ولن يستطيع ان يسيء لي الا اذا صدقته فيما يقول عني ..والناس لديها ذوق وعقل يعرفون الكتاب من العنوان.... ابدل الله احزانك لافراح... لن اطيل عزيزتي رغم انك وضعتي الموضوع فضفضه..لكن احببت مشاركتك بالتذكير وفقك الله |
رد : هل هناك فجر قريب ؟ *فضفضة*
نورة ..
أنا كنت أتمنى إنه عالأقل يكون الإحترام موجود ، لكن آخر خيط ( انقطع ) بيننا .. و الحمد لله بديت أنظر للجانب الإيجابي ( قدر المستطاع ) .. و الفضل لله ثم لكم .. و بديت أسأل حالي ؟ إيش الشي اللي اختلف عن قبل و دحين ؟ أتوقع : 1. المحافظة على أذكار الصبح و المساء ؟؟؟ بديت أهتم إني أقولها ( و استشعرها المرة هذه ) و أحصن نفسي و أولادي .. 2. الدعاء من قلب .. 3. امسك نفسي و أعصابي و لساني و أطنــــــــــــــــــــــــــــــــــــــــــــــش مثل ما كنت زمان ،. لإنه بفترة مرض أمي كنت ما أتحمل أشوف أحد و أنعزل قدر المستطاع .. و أعصابي مفلوتة كانت .. 4. فترة مرض أمي ، الصراحة نسيت نفسي ( أنا مين ؟ و أبغى إيش ؟ ) كنت بس أفكر ( أمي إيش تبغى ؟ ) صرت أعيش بروحها .. عشان كذا حاسة إنه عمري صاير 70 سنة .. 5. أنا مازلت يمكن غير متقبلة فكرة فراق أمي ؟؟؟ أتخيلها دايم أمامي ، و انتظر اتصالها .. هذا يمكن برضو سبب كبير للحزن .. . . بس إن شاء الله أتجاوزها ، لإنه صدمتي بموت أبوي الله يرحمه كانت أقوى .. لإنها كانت فجأة و موته ما كان متوقع أبدا ، و كان صغير و أنا كنت صغيرة و أول شخص بعيلتي يموت .. و الحمد لله تجاوزتها ,, , , و حكاية طناشي لأهلي مثلاً ما راح يضرني شي .. هما اللي ما يتركوني في حالي .. لا إذا قربت منهم ارتاحوا و ريحوني و لا العكس .. يطلعوا كلام عني ( كذب ) .. إيش الفايدة ما أعرف ؟ مثلا وحدة منهم تحب تتكلم عن الكلام ( الجنسي و الفاضح و النكت و كذا ) .. أنا ما تعجبني هذه الأشياء ، بس اسكت عشان مبدأها هي ( إن لم تكن معي فأنت ضدي ) .. عندها 100 نكتة جنسية ( معليه عالكلمة ) .. قالت لي إيش رايك أرسله لك على جوالك ؟ قلت له ( لا ما أحب ) .. قالت طيب أقرى لك .. قلت لها ( أحس هذه الأشياء لازم تكون بين الحرمة و زوجها ) .. لإنها تقول لي ( دمك ثقيل ) .. طيب مرة نكت وسخة .. و بعد ما تقرى النكتة تبغى كل وحدة تحكي عن زوجها .. و إذا قلت لها إنه ما يجوز .. خلاص تعاديني .. المهم ، زوجها شاف النكت هذه في جوالها ( و بهدل فيها و خاصمها ) من فيييييين جبتيها ؟؟؟ قالت له ( من روح الطير ) .. ؟؟؟؟ إيش الحل معاها ؟ أصغر عقلي و أتخاصم معاها ؟ هل راح أقدر أغير شي ؟؟؟ تجاهلتها و تجنبتها ،، و زوجها أكيد بياخد فكرة سيئة عني .. . . و وحدة تانية ، كنا أنا و هي مرات نتبادل ملابسنا .. زوجها إذا شاف عليها لبس حلو ، سألها من فين ؟ و قالت له ( من روح الطير ) .. صار يمدح دايم بذوقي أمامها ،، تقول لي ( من كثر ما يمدح فيك ،، كرهني فيك ) .. أنا إيش ذنبي ؟ خلاص لا تتبادل الملابس معاي ،، أو ترد عليه و تحرجه و تقول له ( أعطيني فلوس و وديني أسواق ماركات و بتشوف ذوقي ) .. تقول كرهني فيك غصب عني .. و بعد كذا ، صارت تسب فيا قدامه .. عشان يكرهني ؟؟؟ . . ما أهتميت ، كل وحدة و زوجها .. بس بأوضح طريقتهم و طريقة تفكيرهم ، و نفس الشي بيعملوه معاي و مع الأقارب .. بس الأقارب خلاص يعرفوني و حتى لو سمعوا لهم .. بس أزعل على نفسي إنه ( ما تركوا شي للغريب ؟ و لا للعدو ) .. . . بس خلاص بجد .. كنت خايفة أوصل للمرحلة هذه .. إنه قلبي يعافهم و يبرد تجاههم .. و أنا وصلت للمرحلة هذه بالفعل .. . . و كلامك و الله كله حكم و درر .. و صادقة بكلامك .. كنت جالسة أفكر - بيني و بين نفسي - من قبل أسبوعين ،، إني في العيد اشتري ألعاب و أروح لمستشفى الأطفال أول يوم العيد ، و أشوف اللي ما عندهم ( زوار ) و أعطيه لهم عيدية .. لإني دخلت مرة مع ولدي للمستشفى ( مرافقة له ) .. و شفت أطفال بالمستشفى جالسين من شهوووووور .. و فيه اللي زوجها طلقها و قال لها ( خليك مع ولدك ) و راح يشوف حياته .. عشاني أحب أولاد أخواني و أخواتي ،، و ما أدخل الأطفال أبدا بأي شي .. بس المرة هذه ما أظن راح أشوفهم بالعيد .. حتى بنت أخوي تحبني ( و أمها قاسية عليها عشان أمها تحب الأولاد ) .. أخوي يضرب بنته و يقولها ( عندك أم ، روحي لأمك ) .. خلاص براحتهم .. :) |
| الساعة الآن 08:25 AM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©