|
رد : زوجي لا يخاف علي ..
الله يجزاك خير ياسمو على الدعوه ويفرج همك
والله يابنات احترت اكثر كلمت ابوي وعلمته بكلامه ابوي انصدم قال والله ذي مشكله يفترض هو يحلها مانتدخل فيها المفروض انه يحسم الموضوع ويسفرهم وانا مابي اخرب بيتك القرار بيدك تبين اجي اتكلم تكلمت تبين اسكت ماراح اكلمه بشي بس احسبي حسابك ان تكلمت ماعاد بسكت لين يمشيهم او تطلعين معاي لبيتي الموضوع مو سهل صعبه افتحه واتجادل معه ولااتصرف وهو لو انه يستحي ماوصلها ل كذا بس واضح ان رده فعله ماراح يرد على كلامي وانا ماترضين علي اجي واناقشه واقوله كلام صارم واخر شي اخليه على مزاجه وان ماتكلمت وهو داري ان عندي خبر بيقول اهله خايفين ولاهمهم وماعاد بيهمه احد القرار لك تبين اجي جيت تبين اطلع منها طلعت ضعت زود على ماانا ضايعه حسبي الله ونعم الوكيل على كل زوج مايراعي ربه في بنات الناس |
رد : زوجي لا يخاف علي ..
اقتباس:
جهزتي لك كم سالفه حلوة وتونس قبل أي نقاش.. وعن طريقها تدخلين في السالفة الاساسية.. ممكن ببراعتك كأنثى تحكين له حكاية افتراضية من نسج خيالك عن وحدة مرت بنفس ضروفك واضيفي لها نهاية مأساوية وانك صرتي تخافين على نفسك وعلى اولادك منهم.. وتكونين متفقة مع أهلك أنهم يقدمون لك على سواق - وتوهمينه ان اهلك خافوا عليك من هالسالفة وقرروا يجبون سواق ثقة ومسلم.. وانهم مايبونك تكلفين على زوجك بما انه رجل مشغول وووو الخ وانك رفضتي بحجة انو زوجك ماراح يقبل انهم يدفعون راتبه فقولي له شرايك؟؟ اهلي مرة جازمين وادري انك انت كرجل ماراح تخليهم يصرفون علي وعلى مشاويري وان هذا الشي يضايقك .. وبنفس الوقت ما اقدر اسيئ لهم برفضي خاصة اني خايفة من هالسواقين.. وش رايك اقولهم أوكي بس بشرط ان احنا ندفع راتبه لان ماودي اكلف عليهم.. ولا أطلعهم من السالفه وحنا نسفر اللي عندنا ونجيب واحد مسلم غيره.. ما أتصور لوتكلمتي معاه بهذي الطريقه بيرفض وبيقول لك الكلام البايخ اللي قاله لك.. لانك نفختي ريشه بكونه نشمي ورجال ويعتمد عليه. وبنفس الوقت بينتي له حرص اهلك عليك بدون مايكون في تدخل بصورة مباشرة واعطيتي اهلك هيبه بنظره.. وبالاخير انت بتقرين اما انه بيقولك لا خلاص حنا بنحل موضوعهم.. او انه بيقول لك لا وحسافه حنا نعرفهم ومايحتاج نكبرها - تصيرين خلاص غسلتي يدك منه وتسوينها عن طريق اهلك ويجيبون لك سواق وانت تكفلي براتبه وقضينا.. |
رد : زوجي لا يخاف علي (مستجدات الرد 19-21)
السواقين ذنبهم عندده
انتي ريحي راسك واطلعي من هالسالفه |
رد : زوجي لا يخاف علي (مستجدات الرد 19-21)
اليوم طلع عنده شغل وللاسف تعقدت اموره مره وشكله خاف من ربي
رجع ندمان واعتذر قال وعد راح يسافرون اخر الترم وراح اجيب قبل مايروحون سواق مصري او سوداني وماراح اقولهم انه لي بقول لصديقي وابيهم يدربونه على شغلي لحد مايفهم قال انا امس تلفظت عليك وغلطت وخلاص انسي الموضوع وماراح يكون الا طيب الله يسخره ويهديه ويكفينا شر هالسواقين وكل من فيه شر شاكره لكم وجزاكم الله خير كل من رد او دعاء لي ارجو من الاشراف اغلاق الموضوع لانتهاء الاستشاره |
رد : زوجي لا يخاف علي (مستجدات الرد 19-21)
على فكرة
حتى لو جاب سواقين غير ، رح يجتمعون عليهم اللي متعودين على الشرب من قبل مع سواقينكم السابقين لا تتوقعين تغيرهم ممكن ينهي المشكلة وزوجك لما حرمك لانه يعتقد ان الحرية اللي معطيكي إياها تعبير عن حبه ودلعه لك، عشان كذا انقهر انك مو شايفه هالجانب وعاقبك عليه اسلوبك معاه كله تحدي واستفزاز الله يصلحك وكلامك اهلي وأهلي وأهلي ما يرضون زعلته انت تتعاملين مع شخصية نجدية مليءة بالعنجهية والغرور وجاااافه واسلوبك ما ينفع معه ابد هالامر ينحل بالسياسة ، اول شي واهم شي مفتاح أبوابكم المفروض ما تكون مع السواقين ثاني شي اقترحي عليه يبني بالخارج سور بحيث يطلع المطبخ كأنه داخل البيت ما ادري كيف أشرحها لكن كثير مسوينها ثالث شي اسكتي ولا تكبرين السالفة لغاية ما يهدأ اخيراً والله اني مستغربة كيف يسكرون والأمر عادي، سواق اهلي من عرفوا سفروه ما ادري الدنيا تغيرت والا شو السالفة؟!! |
رد : زوجي لا يخاف علي (مستجدات الرد 19-21)
اقتباس:
يغلق............... |
| الساعة الآن 09:37 PM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©