منتدى عالم الأسرة والمجتمع - الطلقة الثانية , و ما تبعها من احساس

اقتباس:

المشاركة الأصلية كتبت بواسطة شواقه2 (المشاركة 3461050)

السلام عليكم جميعا

انا كتبت موضوع قبل شهر تقريبا هذا رابطه
http://www.66n.com/forums/showthread.php?t=268813
تقريبا بعد اسبوعين اللي كانت مليئة بالاحاح منه و من اهله ان اسامحه و ارجع له
رجعت له ، بشروط و من ضمن الشروط حتى اضمن سلامة حياتي الزوجية
طلبت منه ينقل دوامه عندي مكان ما انا موظفة وافق على الشرط و جلس ف مجلسنا و اكد كلمته عند اخواني .
وكان المغزى من الشرط ذا بما انه مدمن و عاهد الله و حلف به انه ترك هالبلاوي
كنت ابغاه يبتعد عن الشلة الفاسدة ويبدأ حياة جديدة في مجتمع جديد راح اقدر فيه التحكم في حياتي بشكل اكبر و ضبطها افضل من اول
المهم ، رجعت لزوجي طلعنا فندق و تناقشنا كثير عن امور النقل و كنت قبلها معطيته رقم موظف معي واسطة يعني يقدر يشوف موضوعه و يتم باذن الله
تعشى زوجي و نام ، فتحت جواله ابغى اتأكد انه مافيه محادثة بينه و بين اللي كانوا يروجون له الحبوب بس مالقيت شي او انعميت لما شفت محادثة بينه وبين اخته عني و عن اهلي كلام يضيق الصدر و اكتشفت من خلال المحادثة
ان موضوع النقل كان مجرد حيلة منه عشان اوافق ارجع و كاتب لها بالحرف الواحد
( مامعي غير هالكذب و المسايسة لين ترجع لي و اذا رجعت والله لاطرد امها و اهينهم )
مع العلم ان اهلي ما سووا له شي هذا من غير نعته لامي بانها ملعونة و انها طمعانة بفلوسي ، و انها هي اللي خربت بيتي كلام سخيف لكن احرقني امي كانت اكثر وحدة خلتني اوافق عليه وهو يعرف
طبعا اخته تشاركه الحديث السيء عن اهلي , فجعته من نومه و واجهته طبعا مافيه مجال للأنكار
عذره ان هالكلام انكتب ساعة غضب .
و من ضمن الكلام ايضاً انه راح يحاول فيني ارجع بكل الطرق و اذا رجعت له بيطلب مني اسافر معه و اذا رفضت راح يعلقني و يرجع الديرة . قبل ما اقرأ المحادثات كان يحاول فيني ارجع معه قلت له اجازتي ما باقي عليها شي و انت ماعندك اجازة ترجعني ف وقت بسيط بنطول كنت افكر فعليا ارجع معه يعني كنت مصدقته و عمياء من كلامه و كثرة حلفه و وعوده , ساقني الله وشفت المحادثة و عرفت ان الموضوع مؤامرة
بعد محاولات ترجاني اني ما اعلم احد قلت تمام ابشر بسترك احتفظت بالمحادثات ف جوالي لاني اعرف انه جحاد و ينكر الكحل من العين
سافر و وصل بالسلامة و لمدة اسبوع يحاول فيني افصل من هالعمل و انواع الاغراءات
اخر شي قلت له واذا قلت لك مراح اسافر وبعدها ؟
قال انا بتزوج و انتي خليك كذا معلقة !
كلمت اهلي ف الموضوع خلاص عرفت انه شي مستحيل يتعدل
قلت له طلقني قال لو وش تسوين ما اطلقك
طلقني فجر الجمعة بعد ما تكلمت معه امي و قالت له طلق و الا ترى ظلمك لبنتي بيرجع لك ف حياتك و راح ادعي عليك ليل ونهار لين الله ياخذ حقها منك على اخلاقك و تعاملك معها , قال بطلق لكن بشرط تستروني ما واجهتوا مني و اذا سألكم احد عن سبب الطلاق قولوا اعترض انها تكمل عملها و هي طلبت الطلاق لان الوظيفة شرط من شروط العقد .

طلقني , و الشعور بعد الطلاق احرقني كثير بكيت تمنيت يتعدل كنت ناوية اعيشه احسن عيشة و ما اخليه يحتاج شي كنت ناوية على حاجات كثير حلوة بس دائما هو يهدم اي حاجة حلوة انوي اسويها دائما اذا نويت اسوي حاجة اكتشف شي يخرب
و هذا انا فالعدة من جديد ابكي احيانا و احيانا احس بشي مؤلم بس مو ندم
مادري هو الحب اللي حبيته و الا الذكريات اللي كانت ما ادري ايش بالضبط .

ابغى ردودكم مواساتكم اي شي من قلمكم

وشكرا jyh

وعليكم السلام ورحمة الله وبركاته ..
أختي أنا أزف لك التهاني والتبريكات مو المواساة.. الحياة مع مدمن جحيم ممتد طوال الحياة الدنيا إلا أن يشاء الله .. دمار شامل للزوجة والأبناء .. المدمن كيف يربي أولاده .. كيف يأمر بخير وينهاهم عن شر وفي الغالب يطلعون الأبناء مثله سرابيت وتعظم المصيبة على الأم في وقت تكون قد ضعفت بشدة .. أحمدي الله كثيرا .
شفت بعيني وسمعت أذني ووقفت برجلي على كم بيت مدمنين من ربعنا .. حياة ما تسر العدو .. تشتت وضياع وقل دين وقلة بركة وجوع مع رواتبهم العالية ..
أحدهم عنده راتب جيد ولا يصرف على عياله وبلغني من بلغني أن عائلته لهم أسبوع كهربهم مفصول بعز الحر بمبلغ كم ألف ولا سدده الحقير وراح وترك الحريم الضعيفات لحالهن وهن زوجته وبناته وفيهن بنات صغار حتى علم أحد جماعته فسدد عنه ، لله ثم رحمة بالنساء .. تتقولين وين العيال ؟ .. العيال مدمنين مثل أبوهم ، ويغيبون عن البيت بالأيام .. وإذا جاء بعد غيبة كم يوم دايخ سألوه يرد بعصبية .. وين بكون يعني .. أكيد مع أخوياي ..
أحيانا أمر أسلم على أمهم ( من قرابتي ) . تبكي وتقول لا تخلينا .. شف لنا مطاوعة يحاولون فيهم لعل الله يهديهم .. وأنا إذا سمعت كلامها وهي تبكي .. أقول بيني وبين نفسي وينك عن اللي نصحوك لا تتزوجين أبوهم وانحاشي عنه قبل تقع الواقعة ولا سمعتي لهم .. الآن جاية تبكين بعد خراب مالطة . وش بيدي أسوي لك ..
أنا أتذكر الأم يوم تزوجت المدمن وعرفوا أهلها قبل يتم الزواج فحاولوا قدر المستطاع أن يطلقوها منه وهي ترفض .. ولو طلقت خطبها من هو أكفأ منه وسبق وأن خطبت قبل زواجها من المدمن من أشخاص أسوياء معتدلين أشد الاعتدال ورجال بمعنى كلمة رجال . ورفضتهم وقبلت بهذا المعتوه اللي لا خير فيه ولا كاف الناس من شره ، والآن تتجرع الندم والحسرة ليل نهار .
أذكر مرة جيتهم في بيتهم بسلم وتفاجأت إنهم أخذين من جيرانهم كيس قهوة صغير لأن ما عندهم .
والكارثة إنك إذا ساعدتهم من باب الرحم والإنسانية عرف الحقير وأخذها منهم .
... يا أختي فتحتي علي باب مؤلم كنت نسيته . احمدي الله احمديه اللي خلصك منه ومن سيرته لا عادتها من سيرة .
المدمن مشكلة حتى على جماعته ، فممكن يكون واحد من جماعته شهم ويبي يساعدهم .. فإن عرف المدمن أن هذا يساعد أهله اعتمد عليه وأبلش أهله بياخذ اللي عندهم ، ويصل الحال بهم أن يبيع الثلاجات والمكيفات والفرن وحتى اسطوانات الغاز ب 50 ريال وفيها عشان يصرف على بلاويه ويعرف إن اللي يساعده من جماعته ماهو مخليه .
هذا مثال بسيط وقفت عليه بنفسي وغيره وغيره ، فاحمدي الله .. هذا غير الأمراض اللي ممكن يجيبها لك من أفعاله الدنيئة ، يا بنت أنت ربحانة 100 % احمدي ربك .. وإذا سألكم أحد عن سبب الطلاق أخبريهم بالصدق وأنك أنت وأهلك من طلب الطلاق بسبب إدمانه رفعة لأسهمك للخاطب الجديد ..وحتى لا تتورط فيه مسلمة مسكينة ما تدري وش السالفة .
وألف ألف مبروك التخلص من طليقك .. وأسأل الله أن يوفقك ويعوضك ..
jyh