مش عارفه انا ليه ببتسم وانا بقرا مشكلتك ومشاكل البنات الحلويين اللى زيك كده.......ببتسم مش استهزاء والله العظيم ببتسم من المجتمع الغريب اللى بنعيش فيه واللى من بره بس متدين وعارف ان الرزق بتاع ربنا وهو اللى بيأذن به فى ميعاده ومع كده ولاحول ولا قوه الا بالله بيحاسب البنت انها مش مخطوبه وان الوقت فات وإن وإن.....
طاب الرزق لو فلوس ينفع تبذلى مجهود وتموتى روحك فى الشغل طاب الزوج ده تعملى فيه أيه ؟؟؟؟؟؟
وانتى لسه صغنونه يا حبيبتى لسه ومش شرط انك عشان 26 اللى يجيلك يبقى مطلق او ارمل لا يا حبيبتى غيرك كان 19 واتجوزت مطلق ( غيرك ده أنا ) وده كان نصيب وكنت بحبه جدا جدا وامى اتقهرت انى اتجوزته وبعد 15 سنه جواز اتطلقت عااااااااااااادى
يعنى قصدى كله ان النصيب بتاع ربنا هو اللى بيقسم الرزق ده وله حكمه ما بيعرفها الا العاقل
مين قال لك ان ربنا مثلا مش عاوزك تتجوزى دلوقتى عشان تكبرى اكتر وتنضجى او انك تقدرى النعمه مثلا او ان شايل لك نصيب فى مطلق او ارمل هيكون سبب سعدك بس لو جالك الحين هترفضيه وربنا عاوزك تقبليه
مين عارف بكره فيه أيه؟؟؟؟؟
حاجه كمان طول ما انتى ملهوفه كده وبتفكرى عمر أملك ما هيتحقق عارفه ليه لانك بتدورى بأى طريقه وعقلك وقلبك مشغولين بالجواز بس فأى أفكار تانيه هتهرب منك وهتبقى مش أنسانه تجذب بالعكس هتبقى حد منفر
بالظبط زى اللى كل همه الفلوس عمره ما بتجى له لانه بيهمل كل الحاجات اللى تخليه ينمى روحه عشان يجيبها وبيركز عليها فطبيعى هيفضل فقران دايما"
ماتزعليش منى انا اختك الكبيره
عارفه دايما بيقولوا الواحد لو دور على الحب عمره ما يجى له انما لو سابه كده من غير بحث فجأه بيلاقيه عند اقدامه
بصى حبيبتى انا مطلقه لى 3 سنين وكنت مهمومه انى لوحدى وانى هموت كده وحيده وانى وانى وانى.......بلاوى والله كانت بتاكل دماغى
فجأه لقيت روحى مش بفكر فى الموضوع ده خالص واقتنعت بحاجات كتير
ربنا عارف قدراتى يمكن مش رايد لى فشل تانى
يمكن انا من جوايا ما ينفعش اتجوز دلوقتى
يمكن ربنا شايفنى حد كويس وشايل لى الاحسن
يمكن هتكون فيه مشاكل لو اتجوزت مع اولادى وطليقى وربنا مش عاوزنى اتقهر
يمكن ربنا شايل لى زوج اتهنى بيه ويتهنى بى بعد ما ولادى يكبروا وابقى انا وهو بس وابقى اديت رسالتى بالكامل وماحدش يضايقنى
يمكن ربنا مش رايد لى جواز فى الدنيا خالص وشايل لى فى الاخره عوض
بعدها وللحين راضيه رضا القانع مش العاجز وفرق كبير بين رضا القانع والفاهم ورضا العاجز المضطر
اصبرى ربك كريم
ادعى لى بقى ربنا يهدى لى اولادى ويبعد عنهم شر كل ذى شر ويرزقنى برهم ويرزقهم برى
نامى وارتاحى .......