|
عزيزتي اسرة ..
إن شاء الله أنسى بسرعة و الحمد لله إني مجرد ما أتكلم ، خلاص أبدأ أنسى .، بس ما حأدخل نفسي مرة ثانية .. و من جدددد الحريم غلبوا كيد الشياطين :29: أمها مقهورة منها و تقول ( من جد ، ضربني و بكى و سبقني و اشتكى ) .. :( كأني ضربتها و لا غصبتها عليه ؟ ++++++++++++++ عزيزتي أصعب حكاية .. لو تطور الموضوع ، كنت حأقول لهم من البداية .. هذا اسمه و هذا مكان عمله و هذولا أصحابه .. اسألوا بنفسكم و قرروا و أنا بأخرج عن الموضوع .. و المشكلة حاليا ، إنها ما حكت لأخوانها و أخواتها عن مواصفات الرجال .. و ما قالت لهم ، رفضته عشان وظيفتي ؟ دقت عليهم تبكي - تمثيل طبعا - و قالت لهم و أنا جالسة قدامها .. ( اهيييييئ اهييييييئ .. رووووح الطير جابت لي عريس متزوج و ماما غصب عني تبغاني اتزوجه و باقي الكلام ما سمعته ، لإني فتحت عيوني و فمي مو مصدقة اللي تقوله عني ) و بعد يومين عرفت باقي الحكاية و إنها دخلت المستشفى ووو إلخ و باقي الحكاية .. :( و لحد دحين ما شفتها .. و مالي نفس أقابلها .. +++++++++++++++ عزيزتي أحب زوجي .. ما أدري إنها هي كذا بتفهمني ؟؟؟ و شفتيها من البداية ما عارضت الفكرة .. بس شكلها رجعت من العمل متضايقة و حطت حرتها فينا و صرنا نحن كبش الفداء .. :( +++++++++++++++ عزيزتي أم مشموشة .. أدري إنه الأم قاسية على بنتها ، و البنت مضغوطة من أمها .. و كنت أحن عالبنت و أكلم أمها دايما بس البنت لازم تكون عرفتني خلاص ، لإنه مو أول مرة أجلس معها لوحدنا و أتكلم معها و أنصحها .. و مرات حتى أمزح معها و نتريق مع بعض ،، بس اللي حسيته و من خلال معرفتي و فهمي لها و لنفسيتها ،. بإنها لقيت حجة لنفسها أخيرا ، عشان تخلي الكل يتعاطف معها و تمنع إنه أمها تقيد حريتها و تتحكم فيها .. و تطلع المظلومة في نظر الكل .. حتى أمها تقول ( بكرة تعمل نفس الشئ مع زوجها ، و حيطلقها و وقتها ماحد بينفعها من أخوانها و المفروض أخوها الكبير يأدبها و يعقلها بدل ما يوقف معها و يتعاطف معها ) ++++++++++++++++ عزيزتي لوجينا .. امين يارب ،، بس ما فهمت ؟ كيف ماهي طبيعية ؟؟؟ يمكن فيه شئ لاحظتيه و غاب عننا ؟؟؟ لإني من جد ، تفاجأت من تصرفها الأخير .. +++++++++++++++++ عزيزتي ذكريات لا تغيب .. :d و لا يهمك ، بأغير العنوان من شان عيونك .. :d المشكلة إني ما حبيت أحط زوجي بموقف محرج .. لإنه الرجال يعرف زوجي و يعرف قريبنا و صاحب قريبنا بالمررررررة .. فأكيد إذا تقدم مثلا لقريبتي ، بيعرف إنها تقرب لصاحبه و تقرب لزوجة صاحبه .. و غير إنه الأم ( تعزّ علي ) و حبيت أول شئ أخذ رأيها مبدئياً .. ++++++++++++++++++ عزيزتي قلبي حنون .. و الله توي اللي افتكرت شئ ، تصدقي ؟؟؟ :11: أصغر أعمام البنت و هي مرة مرة تعزه و تموت فيه و تشوفها أحسن رجل في العالم ، طبعا عايش في مدينة تانية و مطلق زوجته من 10 سنوات لإنها كانت مدلعة و وحيدة أمها و أمها تتحكم في حياتهم و تبغى بنتها تعيش معها .. و عمره 40 سنة دحين ،، و تزوج من سنة ، وحدة عمرها 27 و بكر و طلعت في شعره الشيب من كثر ما تنكد عليه كل يوم و تشك و تغار عليه و غيره .. و قريبتي هذه اللي حكيتكم عنها ، هذاك اليوم تحكي لي عن عمها و زوجته .. و تقول لي : و الله ليت إنه يطلقها هذه كمان، من جد ما تستاهله ،، و دايما تعمل له مشاكل .. و هو طيب و يستاهل وحدة أحسن منه .. و هذه ما تنفع له .. بأقول لهم ، على حكاية عمهم .. إنه شخص طيب و في المرة الأولى و الثانية ما اتوفق بحياته فمو معناها إنه الرجال ماهو طيب .. :( |
عزيزتي المتفائلة ..
كان ممكن الموضوع ينتهي بهدوء و خلاص ، مجرد شخص ما ناسبها و انتهى .. بس تخليني أنا سبب المشكلة .. بجد شكيت في حالي و هذا ثاني يوم مانمت فيه :( ++++++++++++ عزيزتي حنين للأمل .. الصراحة ، جلست ألوم نفسي ، لا يكون جبت شخص غير مناسب و إني جرحتها من غير ما أحس ؟؟؟ و لولا كلامكم و رأيكم عن العريس و لولا كلام أمها بإنه شخص مناسب و ماحد ذمّ فيه و في أهله ، و لولا كلام أخوات البنت بعدين يوم عرفوا مواصفاته بإنه شخص مناسب .. كنت من جد ، جلست ألوم نفسي .. لإنه قبل كذا ، زوجي قال لي عن حكاية واحد من أصحابه ،، مطلق مرتين و يدور عن عروسة .. فقلت لزوجي ، هذا الشخص افتكر بيوم من الأيام إنك ( ذميت فيه و إنه فيه مرض نفسي و قلت إنه كذا و كذا ) .. و بنات الناس مو لعبة ، و اللي ما ارضاه لنفسي ما أرضاه لغيري ، و قفلنا عالموضوع .. و قبل كذا كمان ، يوم كنا عايشين في الغربة ،، واحد من أصحاب زوجي كان ( متزوج ) و عنده طفل واحد .. و كان متضايق من زوجته لإنها عصبية و دايم تطرده من البيت و تبهدل فيه .. و سألني زوجي إذا أعرف وحدة من المغتربات تقبل بصاحبه ؟؟؟ فقلت لزوجي ، أنصحه يرجع لبيته و يصلح أموره مع زوجته .. و أنا في المواضيع هذه ما أحب أدخل نفسي ، و إنت كمان لا تدخل حالك بينهم و ما تدري إيش بينهم .. يعني مو كل مين هبّ و دبّ ، قمت جبته و رميت قريبتي .. و قريبتي هذه مثل ما قلت ، شغلها هذا كل ما جلست فيه أكثر .. كل ما أخلاقها تغيرت أكثر .. و لو قلت لها كذا ، بتزعل مني و يمكن تعمل لي فيلم هندي كمان و إني و إني و إني :( ++++++++++++ عزيزتي على أمل اللقاء .. للأسف ، ماهم عارفين أنا مين و هي مين .. :) هم يعرفوا أختهم القديمة ، اللي كانت طيبة و على نياتها .. و ما يعرفوا أختهم اللي دحين بدأت تتغير مع الصحبة السيئة .. و كل واحد و وحدة من أخواتها مشغولين بحياتهم .. و الدليل ، إنهم يلوموا أمهم دحين عاللي صار .. و يقولوا المفروض أمنا تراعيها و تراعي إنها حساسة .. قلت لأختها الكبيرة ( معليييييه .. مين المفروض يراعي الثاني ؟ البنت تراعي أمها و لا العكس ..؟؟؟ ليه ما تقولوا للبنت تراعي أمها و تتحمل طبايعها و هي كبيرة في العمر .. بدل ما تقولوا خلي أمنا تراعيها و تتحملها ؟؟؟ انقلبت الاية من جد ) عاد ردت علي و قالت ( إنت أصلا دايما تدافعي عن أمي ) .. ++++++++++++ أخوي حرير .. هي ما أعطت مجال للتفاهم ، على طول ردت بالطريقة اللي قلت عليها .. و حتى يوم قلت لها ( استخيري ) و حتى المرات اللي فاتت كنت أقول لها ( تستخير ) .. للأسف ، ترفض و تقول مو لازم استخير ، خلاص ما أبغى و تجلس تعدد عيوب العريس .. ++++++++++++ أخوي شاطئ المحبة .. الله يضحك سنونك ، من جد عجبتني .. :D اليوم بأقول النكتة لزوجي و أضحكه ، لإني من أمس أقول له قول لي نكتة .. و إذا سألني مين قال لك النكتة هذه ، بأقول له ( أبو عصام ) عشان يرميني أنا في البحر :D و أنا و الله ما أبغى منها شكر ،، بس الواحد يا يقول خير أو يصمت .. مو تجازيني بالطريقة هذه و تتظلم و تكذب كمان و زيادة تمثل عليهم و مستشفى و تعبانة و منهارة ؟؟؟لايكون العريس واقف عند الباب و جالس يسحبها من شعرها و نحن نغصبها عليه ؟؟؟ :( حتى أمها قالت لها في الأخير ( ماله داعي تعملي في نفسك كل الحركات هذه .. العريس حتى لسى ما تقدم و لا طلب و ماجيت ضربتك و غصبتك عليه .. بس من دحين أقول لك ، إنت تحملي مسؤولية قراراتك من بعد اليوم و أنا يا دوب أتحمل نفسي ) .. . . و بالنسبة لحكاية الخطّابة .. فكرتني بحكاية اثنين من أقاربنا ، كان زواجهم بالصدفة عن طريقي و مبسوطين مرة في حياتهم .. و الله إني ما قصدت أبدا و كنت ماني فاضية لأحد و حتى إني كنت متغربة وقتها و اللي فيني كافيني .، بس سبحان الله .. جات باالصدفة و لحد دحين دايما يعلقوا علي الأقارب و يقولولي خلاص اشتغلي خطابة :D 1 - وحدة من زميلاتي كنت دايم أمدحها قدام أهلي و أقول لو عندي أخ ( عدل و يستاهلها :D ) كنت خطبتها له .. فسمعتني وحدة من قريباتي و كانوا يدوروا عن عروسة لواحد من أرحامنا و أخلاقه كويسة .. و سألتني عن مواصفات زميلتي و رأيي فيها .. و تقدموا لها ، و زميلتي يوم عرفت إنهم من طرفي ، طبعا سألتني عن الشاب و قلت لها كل اللي أعرفه من ميزات و عيوب ، و الحمدلله إنهم دحين عايشين و مبسوطين و عندهم ولد ^_^ 2 - نفس الشئ واحد من أقاربنا كان يدور عن عروسة و تزوج قريبة زميلتي ، دليتهم عليها يوم حسيت إنه طبايعهم تتناسب و دحين عندهم طفلين ماشاء الله ، و الولد يمووووووووووووت في زوجته ماشاء الله .. فصاروا زميلاتي يعلقوا مرات علي من الحكايتين هذه .. و كل مرة و الله كنت أحط قلبي على يدي و أقول ، أنا الملقوفة أستاهل .. إيش اللي دخلني ؟؟؟ :( و ما اتطمن غير يوم أسمع من أهاليهم إنهم مبسوطين و الحمدلله و إنه جاهم طفل و كذا .. :) فخلاص بأشتغل خطابة من اليوم :D ++++++++++++ عزيزتي بنت مكة .. و الله إنك تستاهلي سيد الرجال :) و البنت هذه و الله أتمنى لها سيدالرجال و أمها كمان تتمنى لها .. بس نحن بيدنا نصنع الرجال ..؟؟؟ اخر مرة تقدم لها شخص أهله في نفس المدينة اللي نحن فيها ، بس هو وظيفته في مدينة ثانية و كل أسبوع ينزل عند أهله ،، قامت البنت رفضته و من غير ما تستخير و تقول ما أبغى شخص برة مدينتي .. قلنا لها ، طيب أهله هنا و كل أسبوع بينزل لأهله و مصيره بينقل عمله لهنا .. فلا تستعجلي بالرفض ؟ و شوفي أخوك و زوجته و شوفي فلانة و شوفي علانة ... إلخ قامت رفضت و قفلت الطريق خلاص .. إيش نعمل لها ؟ نتركها كذا تضيع نفسها لا سمح الله .. و قلت لها ، زميلاتك بكرة كل وحدة تنشغل بزوجها و حياتها و يمكن يتركوا العمل .. و مااحد منهم بينفعك .. بس خلاص ، لما تقفل .. تقفل مرة وحدة .. :( ++++++++++++ عزيزتي في الإنتظار .. ألف شكر و معليه تعبناك .. كنت مرة متنرفزة و مانتبهت :D ++++++++++++ عزيزتي جراح الماضي و سعادة الحاضر و المستقبل .. ^_^ و الله الحالتين اللي قلت لك عنهم ، وحدة منهم زي اللي قلتيه صار لي .. كل ما صار شئ حلو ، مدحوا فيا و دعوا لي .. و كل ما صار شئ ما عجبهم ، أخوات العريس و أمه قالوا إني أنا السبب .. و أرد عليهم ، مو أهم شئ ولدكم مبسوط مع زوجته و مرتاح ؟؟؟ و بعدين من البداية قلت لهم ، مجرد ما تصير الشوفة و تسألوا .. خرجوني من الموضوع و مالي دخل فيه .. الموضوع نصيب و قدر ، و ربي خلاني في طريقكم لحكمة يعلمها .. بس الحلو ، إنهم مرات يدعوا لولدي بإنه يتوفق في زوجة المستقبل ..:22: مثل ما فكرت في أولاد و بنات الناس .. يقولولي الأجر كبير عند ربنا إنك وفقتي راسين بالحلال ، مثل ما أقرى هنا .. بس لحد دحين ما أعرف إيش الأجر من جد و ليه أجره كبير .. ؟ :11: يمكن لو عرفت الأجر ، من جد بأصير خطابة .. :d ++++++++++++ عزيزتي سيدة الموقف .. الصراحة ، أمس أمها تقول لي .. و الله من جد ، الله يجزاه خير زوجك إنه كفاية فكّر فينا .. و لا كل أقاربها و أخوانها و أخواتها ، كل واحد يفكر في نفسه .. و إذا أحد سألهم ( يقولوا .. ما ندري ؟ ) فالحكاية إنه كل واحد مشغول بنفسه .. و يقولوا ( عزة نفس و كيف ندل أحد على بنتنا ؟ و ليه ما عندنا كرامة ؟ ووو إلخ ) و هذا اللي ضايقني من البنت ، ليه ما فكرت إني كان ممكن أقول زي أي وحدة من قريباتها : ( نفسي نفسي .. أهم شئ إني مرتاحة في حياتي و بكيفها ؟ ) و أمها ماشاء الله الكل يمدح في أخلاقها و زوجت كل بناتها و أولادها .. بس دحين الأم كبرت في العمر ، و بنتها في العمل و الأم ما تدري عن بنتها و زميلات بنتها .. ؟؟؟؟؟ لإنه البنت ترفض إنه أي أحد يبعدها عن زميلاتها و تعاند أمها و ترد عليها .. ++++++++++++ عزيزتي كريستالا .. و الله إنه أختها الكبيرة يوم تكلمني أمس ،. تقول ليه تغصبوها على واحد ( مطلق و عنده بنت ) كأنها ( بايرة و ماحد يبغاها )؟ قلت لها ، أول شئ إنت ما كنت موجودة و ما تعرفي إيش الحكاية .. و الشئ الثاني أسألي أختك الثانية ، لإنها كانت معنا و تشهد على كلامي و قبل كل شئ ، ربي اللي يشهد .. أنا كلمتها أول مرة ، و كانت متحمسة و تسألني عن بنته كم عمرها ، و حكت لي عن فلانة اللي تزوجت مطلق .. و لو حسيت بلحظة إنها تضايقت ، كنت قفلت عالموضوع .. و أختها يوم سمعت بمواصفات الرجال ،. قالت ( و الله كل شئ حلو فيه و إنت من جد ما غلطتي و لو مكانك كنت حأعمل نفس الشئ .. و نحن فهمنا غلط ، لإننا سمعنا من طرف واحد .. و إنت ما تتكلمي زي ماهي تكلمت ) .. قلت لها ( يعني دحين هذا جزاة اللي يسكت و ما يغتاب و لا ينافق ؟ من جدددد .. دنيا عجيبة ؟ و ليه ما تيجوا تكلموني و تسألوني و تصارحوني ، بدل ما كل واحد يفسر من راسه و يشيل في قلبه ؟ ) قالت لي ( خلاص .. لو مرة ثانية أحد بيجي ، كلميني أنا و أنا أكلم أختي ) .. قلت لها ( خرجوني من أي موضوع ، و ما أبغى أي مشاكل من جد .. و أختك خليني بعيدة عنها أحسن ) .. |
عزيزتي أنثى أبكت القمر ..
السبب الأول مو صحيح ، لإنها ما تدري أبدا عن الكلام هذا .. و لا السبب الثاني .. أما السبب الثالث ، و عشان وظيفتها .. فأصلا وظيفتها مو رسمية و مجرد ( تعاقد ) و حتى أخوانها رافضين فكرة العمل المختلط ، بس ما يحبوا يجبروها على ترك عملها .. و ماغصبناها تترك وظيفتها ، بس أمها تبغاها تفكر بمصلحتها و أمها كبيرة في العمر و تخاف على بنتها .. ++++++++++++ عزيزتي متفائلة .. تدري إنه أخواتها الإثنين يوم سمعوا مني الحكاية بالتفصيل .. و واحد من أخوانهم عرف كمان .. كلهم قالوا ( خسارة .. و الله إنه كان مرة مناسب لها و حتى عيلته ، الواحد يتشرف بهم ) و هذا اللي شجع أمها ، تقول حسيت عمره و ظروفه مناسبة لبنتي .. ++++++++++++ عزيزتي همس .. كيف حملك ؟ ^_^ و ما زعلني الصراحة ، غير إنها راحت تبكي و تتبلى علي و على أمها قدام الكل .. و كلهم تعاطفوا معها لإنها دخلت المستشفى .. و صاروا يحطوا اللوم عالأم و علي .. بدل ما يخاصموا البنت و يقولولها ( راعي أمك و تحمليها على كبر سنها ) .. يعني ما قدرت نصيحتي لها و الكلام اللي كان ( بيني و بينها و ماحد كان موجود ) .. و خلتني مذنبة و غلطانة .. هذا اللي زعلني من جد و حز في نفسي كثير .. ++++++++++++ خالة قرين :D :D :p أضحك الله سنونك يا ابنة العرب .. :D يا بنتي ممنوع الدخول هنا و من غير موافقة ولي الأمر ( يعني البابا و الماما ) :p تدري ..؟؟؟ يهمني إنه الرجال يرجع لطليقته و يصلح بيته و ما يهدمه .. :11: بس أنا ما كلمت البنت و أهلها ، غير يوم عرفت إنه مطلق زوجته من 10 أشهر و مو إنه بيتزوج عشان يقهرها مثلا .. طلقها طلاق بدون رجعة ، و إنه هو و أهله بيدوروا عن عروسة تقبل فيه و ببنته و تهتم ببيتها .. و عرفت إنه زوجته رمت البنت و ما تبغاها و هي اللي طلبت الطلاق ، و هو طفش من كثر ما كل شوي تمشي وراء كلام أبوها و لحد ماخربت بيتها .. يعني لو حسيت بإنه هناك أمل في إنه يرجع طليقته ، كنت سعيت بالإصلاح و نصحت زوجي ينصحه .. و قريبتي ما أبغى أدعي لها و لا أدعي عليها ، لسى زعلانة منها .. : ( ++++++++++++ عزيزتي الماضي الدفين .. ما أخبي عليك ، إنه البنت و الله ما كانت زي كذا أبداااااااااااااااا .. بس تعرفت لها على صحبة سيئة من البنات في عملها و من يومها بدأت تقلدهم .. و أمها ما تقدر تجبرها إنها تترك عملها .. و البنت مشكلتها كمان تمشي وراء كلام زميلاتها و من جد ما تعرف مصلحة نفسها .. و قلت لها ، ترى كل وحدة في الأخير بتشوف حياتها و مصلحتها .. إنت كمان فكري بمصلحتك .. بس طلعت أنا اللي ( كخّة ) في الأخير ههههه :D ++++++++++++ عزيزتي سيلا .. أنا ما حأكلمها في الموضوع، و لا راح أعبرها و لا راح أفكر فيها و حأتجنبها تماما .. اللي زعلني مثل ما قلت ، المسلسل التركي اللي عملته قدام الكل .. و أنا فاهمة ليش عملت كذا .. أخدت الموضوع حجة لها ، و عرفت تكسب تعاطف الجميع و تبغى كل أخوانها و أخواتها يلوموا ( أمها ) .. عشان يقولوا لأمها بعد كذا ( خلي البنت تعيش براحتها ) و يصير تخرج و تدخل من غير رقيب و لا حسيب .. لإنه أمها من خوفها عليها ( ما تخليها تروح مكان ، إلا مع وحدة من أخواتها أو أخوانها و بإستئذان ) .. فالبنت تنقهر من الشئ هذا و تبغى تصير مثل باقي زميلاتها اللي في العمل .. ++++++++++++ عزيزتي Fahlung <- اسمك صعب :D البنت أصلا ما كانت كذا .. بس ما تعرف مصلحتها و تمشي وراء كلام زميلاتها .. ++++++++++++ عزيزتي اندلاقة عطر الصراحة ، كنت مرات إذا قريت في المنتدى مشكلة وحدة من الأخوات إنها تتمنى الزواج .. بس إنها ما تخرج مكان و ماحد يشوفها و لا يتقدم لها .. فأفتكر قريبتي هذه ، و أقول خليني أحط نفسي مكانها .. و أمها دايم مع نفسها تجلس تفكر ، متى يجي نصيبها و ارتاح و تفضفض لي .. فهذا اللي خلاني أعمل كذا .. و من بعد حكاية الماسنجر و الجوال ، خفنا عليها أكثر .. :( و خاصة إنه شخص يشتغل معهم في نفس العمل .. و هي عقلها صغير و تسمع لزميلاتها و تقلدهم |
انتِ تـتـكلمي كثير يا روح الطير حتى عيوني عورتني وانا اقرأ :(
اتمنى ما يكون زوجك كثير حكي زيك :d عموما الموضوع اشوفه انتهى ، ودائما التدخل في امور الخطبة والزواج وبشكل اكثر بين الاهل يجر معاه تبعات ومشاكل كثيره خاصة ان كان المتكلم عنهم او المخطوب منهم صعبين المراس من الاساس . انسى الموضوع ولا كأنه صار |
لا و الله ، زوجي أمس اتكلم معاه من كثر ما كنت ساكتة و زهقانة، و هو سااااااااااااااااااااااااكت ..
في الأخير قلت له ، من جد تسد نفس الواحد عن الكلام .. :( بأسميك جوال صامت من اليوم و بأروح أفتح صفحة المنتدى .، قال حتى أصحابي يقولولي إنت ما تتكلم أبدا :25: سألته ،، طيب ليه ربي خلق لك فم .؟؟؟؟؟؟ :( قام يضحك و يقول عشان أكل :d و معليه ، تكلمت كثير ، لإني ساكتة طول اليوم.. و يوم اعصب ، أبدأ أبربر و يطلع رشاش مني .. :24: وما أظن كلامي أكثر من بنت الحكمي :d <- يا ويلي منها .. :24: . . الصراحة ، يمكن الموضوع انتهى بالنسبة لي ..:25: لإني قدرت أوضح موقفي ، و كويس إني عرفت من بدري اللي بيصير .. بس أحس إنها خلتني أخد موقف من بعض اللي غلطوا علي بالظن السيئ .. و أتجنب ( النصيحة ) مع أي أحد و ماكنت أدري إنه تفكيرها كذا عني و طلعت بدروس من جد .. |
اختي روح الطير
البنت مو تبع زواج والله فكك منها لكن استغربت لمن كتبتي ان تقدم لها معاق ورفضته؟ كيف معاق؟ ممكن توضحي؟ على فكره تذكرت موقف موتني ضحك مع وحده قريبتي هي بنت توها ماتزوجت فمره جالسين بجلسة بنات فقالت انا ابي عريس ولد مو رجال:11: فأنا سألتها وش قصدك؟ قالت ولد يعني لم يسبق له الزواج اما الرجال تزوج ههههههههههههههه قصدها زي البنت والحرمه:d ففي بنات عقلها باقي مانضج:) تحياتي لك |
عزيزتي هياء ..
بأرد عليك قبل لا أروح أجهز الغداء ^_^ معاق قصدت به، عندهم مرض وراثي هو و أخوانه الأربعة الأولاد و وحدة من أخواته .. و ممكن ينتقل للأطفال .. و ما يقدروا يعيشوا من غير استخدام ( جاهز ) مرافق لهم على طول .. فالبنت أول مرة وافقت مبدئياً عالزواج منه .. و بعدين رفضته هي و أهلها لإنهم عرفوا إنه بدون شهادة و عصبي جدا جدا جدا ، و يدخن و راتبه حدود الألفين و يمكن أقل .. و يشتغل ( صبي في محل ) و بيعيش مع أهله كمان و عيلته الصراحة كان مستواهم أقل منهم بكثيييييير ، مو من ناحية المادة .. من نواحي ثانية ، يعني تعاملهم مع بعض تحسيه ( همجي ) و أشياء ثانية .. فيعني لو كان يعاني من الإعاقة فقط ، و كان راتبه ممتاز و عنده شهادة .. كانت البنت وافقت عليه .. على حسب كلامها .. مع إنه الأم ما عجبوها العيلة ،. بس سكتت و ما تدخلت غير يوم عرفت باقي العيوب و تركت القرار الأخير لبنتها .. طيب هذا الشخص متعلم ، و تاجر ، و سليم و طيب و ما يدخن و يصلي و بس إنه مطلق و عنده بنت .. و هذاك كانت حتقبل فيه لو إنه معاق ، و ماجات وقتها زعلت و قالت لأختها ( جبتي لي وواحد معاق ) ؟ :( و حلوة الولد و الرجال :d |
باسم الله عليج يا روح وعلى أعصابج .. وباسم الله على النونو.
شوفي حبيبتي .. قناعتي الشخصية ألا أتدخل في مثل هذه الأمور .. حتى لو كانت البنت والولد كاملين مكمّلين .. والكمال لله وحده .. وحتى لو كان أحدهما قريباً لي. وتزداد قناعتي كلما كبر عمر البنت .. فالبنت ـ في الغالب حسب رأيي ـ تكون حساسة أكثر فيما يتعلق بمواصفات الخاطب كلما تقدم بها العمر .. وفي مثل الموقف الذي حدث معك فربما قالت البنت لنفسها: يعني شافتني كبرت وقربت على الثلاثين خلاص تجيب لي أي حد؟!!! أنتِ نيتكِ خير ولا شك عندي في هذا .. وابنة عمكِ بصراحة أسلوبها وشخصيتها وأخلاقها ـ خاصةً مع والدتها ـ عليها مأخذ .. ولكن حقيقةً لا أحبذ اتهامها بعدم الصراحة ولكن لننظر للأمر على أنها بينها وبين نفسها فكرت في الموضوع من زاوية أخرى ولعب الشيطان برأسها وبدأت في إساءة الظن بكِ .. يعني يبدو لي أنها تحمست في البداية ثم راجعت نفسها بعد ذلك وربما خطرت على بالها تلك الفكرة التي ذكرتُها فربطت بين مواصفات الرجل وعمرها فتراجعت عن حماسها .. وربما لذلك تبلّت عليكِ واتهمتكِ بأنكِ جايبة لها مطلق وعنده بنت! لا أقول إنها تصرفها صحيح .. ولكنني فقط أحاول تحليل سبب سلوكها وتحويرها للأمر وقولها لأخواتها كلام غير الكلام الذي قالته لكِ. على كل حال .. الحمدلله أن والدتها إنسانة متفهمة .. والحمدلله كذلك أن كلامكِ مع أختها وضح الأمور وأبرأ ساحتكِ ..... ومرة ثانية ما عليج من حد تزوج والا ما تزوج http://smiles.r6r6r.com/smiles/13/3e...2d950c9183.gif |
الله يكتب اللي فيه الخير للجميع
|
اختي الكريمه فيه جزئيه مهمه وهي الرجال اللي متقدم اتمنى انه ماينظلم مع بنت مثل هذي
لانه مااظن انه بيتحملها هذا اولا وهي بنفس الوقت ماتتحمله لانها تحس انه ضغط عليها وخلاها تترك وظيفتها فتنتظر منه انه يكون كريم معها لابعد حد والحد هذا هو ممكن يراه اسراف ...وعلى الرايحه والجايه تمن عليه ... عالاقل كونو صريحين معاه -المستشار مؤتمن- انا متاكد انه مافكر يتقدم لها الا بعد مامدحتوها انت >> وللا سف الناس اذا اسمعو واحد يفكر يخطب وحده كلهم يبدون يمدحون فيها وفيه وهذا خطا بل تبين الايجابيات والسلبيات حتى مايظلم احد ... ومبدئيا اشوف ان البنت اصلا ماتنااااااااااااسبه خافو الله فيه ... |
| الساعة الآن 10:19 AM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©