|
*أعرف ماذا تريدين..وماذا تود أن تقولين لكن الحياء والخوف من العقوق يمنعك.
*هو هكذا..طبيعته هكذا..لا تحرجيه أو تضغطي عليه..تدبّري وضعك..انظري للأقرب من إخوانك الرجال لك..واطلبي منه المساعدة وتوضيح أنك محتاجة إليه..وابكي أمامه كي تستدرجي عاطفته. *إذا كانت الوظيفة جيدة...فاقبليها فوراً وإن كان راتبها ضعيفاً..لأني لا أريد أن تستمري هكذا في البيت؛ لأن حياتك ستتغير بعد الوظيفة. *ما هي الكتب التي اشتريتها؟ |
ماراح أحرجه أبدآ ,, قالها لي : يابنتي هذا أنا طبيعتي وش أسوي ؟! سامحيني .. أو حطيني تحت رجلك أذا ماأشرفك قلت له : مستحيييييل أنت فخري بهالدنيا .. ومهما سويت لي مارأح أزعل بس أنا أبي شدتك علي مهمآ كآن أنا بنت .. والحين تطلقت وخآيفه أهتز أذا ماوقفت معي أخوآني / للأسف بكيت عليهم قبل الطلاق وخذلوني .. وبعد الطلاق بكيت وخذلوني يمكن وآحد ماتزوج هو وآقف معي ... بس أنآ مآبي أنهآر قدآمه أخآف يجي يوم و يخذلني كما خذلوني المتزوجيـن ! الوظيفه نوعآ ما .. جيده ( تدريس روضه أطفآل ) وأنا مستحيل أجلس بالبيت أنا أبي أتغير أن شآءالله بكلمهم وأشوف الموضوع معهم يوم السبت الكتب / أشتريت قبل أسابيع كتابين لخالد المنيف , وكتاب الرجال من المريخ والنساء من الزهرة اليوم أشتريت سيرة الرسول وتفسير القرآن ... وكتآب عن القوه الدآخليه |
أخوي البليغ لمعلوماتك أنا ماكنت كذآ .. الكل يعرف عني بأني وآثقه من نفسي وسأنجح بزوآجي .. و و حتى خوآتي و أخوآني يغآرون مني .. يعني اللي أنا الآن مو أنا اللي قبل زوآجي ولكن زوآجي هزني بشكل ماتتصور .... حتى صديقآتي بآلآمس يقولون لي : زوآجك هذآ خلآك ماتدرين وش تبين ضيعك ( مع العلم بأني أحمل ثلاث شهآدآت ) .. والوظآيف أمآمي تعرض بين فتره وفتره أحس بأني زوآجي هذآ صدمني ( صدمه العمــر ) بس إن شآءالله قآدره أرجع مثل ماكنت بقوه أيمآني بالله .. ونصآيحك ووقفاتك جنبي |
اهلا اخوي البليغ :: خلال هـ اليوميـن تقدم لي ( معددييين ) وبيني و بينك أنهرت وكرهت الحياة ( أستغفرالله ) مقهوره على نفسي وحياتي ليـه صآرت كذا ودي أهرب ودي أرجع وراء .. نفسيتي زفت من جد كرهت لقب ( مطلقه ) .. بسبب كل يوم ناس داقين وكلهم ( معددين ) حسبي الله ونعم الوكيل وش أسوي ؟ والله قريبه من ربي وأعرف رزقي عند ربي بس الواقع هذا ( أوجعنــي ) يحسبوني رخيصه بوافق على طول .. بس كل ماتقدم لي شخص معدد نظرتي لقدام تخوف ( خــايفه يااخوي البليغ .. أعرف رزقي بيد ربي بس هالمجتمع مايرحم بيكرهني بالحياة ... معليش وانا اكتب منهاره شوي ومتضايقه أحس خلاص ماني قادره احلم والله مو قادره أحلم قبل زواجي بشهر يتقدمون لي شباب كثير والحين شياب سبحان الله يغير من حال الى حال ( بس لاني صرت مطلقه ) تقدموا لي شياب مع ان عمري لساته .. مابين الحال الاول والحال الثاني الا 7 شهور او 8 شهور يارب ارزقني الزوج الصالح وهون علي يارب <<< متضايقه حيييييييييييييل مو مستوعبه ابدا كلها زواجي شهر وملكتي شهر وطلاقي شهر وأنظلم بهالمجتمع يارب رحمـــاك |
*أقدر مشاعرك وآلامك، ووجعك لاستيعاب ما يجري.
*أنتِ تعيشين مرحلة الإنكار لما يحصل وما يجري معك..وهي مرحلة طبيعية تمر عليك..وستمر عليك هذه المراحل النفسية فاصبري. *انظري ماذا يصلح معك من ناحية الزواج بشكل عام من عدمه. *استمري على الخطوات السابقة..واضغطي على نفسك ضغطاً شديداً. *أعانك الله..أعانك الله..أعانك الله. |
أعتذر منك أخوي البليغ .. تصدق أنا الحمدلله أكون بأحسن حآلآتي دآئما فقط لما يتقدم لي شخص أنهآر يوم يومين وأبكي كثير لدرجه ودي ألغي تلفون بيتنا لمدة شهور .. ! مابي أحد يكلم لأني يسبب لي تعب كبير خصوصآ ( المعدد و االمطلق ) أبي فتره كبيره أعيش حياتي لوحدي بدون أي ضغوط أو حتى خطبه المفاجاه اليوم وحده من صديقآتي كلمت ( طليقي ) ليه ؟ مدري ! حسب مافهمت منها كانت تبي تصلح بيننا طبعا كلمته وأنا ماكنت أعرف عن السالفه أبدآ ماذا قال طليقي : أنا للحين أحبهآ و ماكرهتها بس المشكله فيني أنـا ودي أرجع لها بس السبب قوي وهو فيني وغير كذا طلاقنا بائنآ .. وهي مافيها شي لدرجه شخص مكلمني يسأل عن طليقتي ومدحتها له وفيه كلام كثيييييييييييييييييييير .. تفاجات حيل .. ليه كلمته ؟ وليه هو رد عليه ؟ وليه قالها كل هـ الكلام ؟ وموضوعنا منتهي حسبي الله ونعم الوكيل مدري وش يصير من وراي لا من صديقات ولا من طليقي الله يعوضني خير منه يآرب |
أنـا من شفته يرد على صديقتي و و ويسولف ويأخذ ويعطي معها وكأنهآ زوجته حمدت ربي أني تطلقت منه |
أخوي البليغ بكتب لك تفاصيل المكالمه بين طليقي وصديقتي .. وأبيك تفسرهآ لي .. بس بسمع من صديقتي الحوار الكامل بينهم واسباب الحوار وهو قآل لهآ : أخبري ندمآنه بتفاصيل المكالمه .. وش رأيك ؟! <<< أحس إني ودي أذبحه هو واياه .. مدري يحسب اني ميته عليه أو شي ومدري متى بينهي الموضوع ماشاءالله تفاصيل حياتنا عند صديقتي ! اخاف صديقتي قالت له اني ابيه او شي .. مدري انا موصيتها راح أعرف التفاصيل .. وأخبرك لتفسرهآ لي ! |
*كل كلمة أو همسة أو لمحة سوف تؤذيك هذه الأيام. ستفكرين فيها مراراً وتكراراً..وتشبعينها بحثاً وتحليلاً وتفسيراً. *لكن سيأتيك وقت لن تهتمي بأية كلمة..ولن تثيرك أية كلمة. *بل ربما تضحكين وتقولين: كيف كنتُ أنا هكذا في الماضي؟! ::: -لا بأس سأنتظرك مع أني أرى عدم الاهتمام بمعرفة تفاصيل المكالمة أبداً، ونسيان الموضوع أو تجاهله على الأقل؛ لأن الكلام سيذبحك، وسيعيدك إلى الوراء كثيراً. -أما كلامه فشهادة عليه وشهادة لك..وهذا هو الحق، والحق ما شهدت به الأعداء. -فضفضي هنا ولا حرج عليك. ::: نصيحة: 1) بما أن الطلاق بائن بينونة كبرى فحذري صديقاتك من التواصل معه، أو التدخل في موضوعك أبداً. 2) احفظي أسرارك قدر الإمكان. |
كلامك على راسي اخوي البليغ .. صارت اشياء كثيره ومنها موقف المحكمه .. وأحتمال كبير ألغي رفعها خصوصآ عرفت اشياء كثيره .. والحمدلله طليقي يأنبه ضميره هـ الفتره وهذا الكلام يخليني ( أتأكد بأني ماظلمته بشي ) لأني كثير يجيني أحساس بأني ظلمته بشي خصوصآ مافي أي سبب بيننا يوصل للطلاق .. وكنت كثير أجلس مع نفسي وأقول يمكن إني ظلمته يمكن و يمكن ... هذا الاحساس كان بالبدايه لما طلقني كنت خايفه اكون ظلمته وانا مدري بس الحمدلله الحمدلله .. قآل : هي ماظلمتني بشي و و و ورآح يضيق صدري أذا ماتزوجت لان أنا السبب .. ودي أخطب لها زوج كفؤ لأنهآ تستاهل << اوما يخطب لي:d كان يقولي لما كنت أنا زوجته : ماأرتحت الا لما طليقتي الاولى تزوجت الغريب بأنه كلم صديقتي ثلاث مرآت وصديقتي تفاجات كل شوي يدق عليها .. وقآلهآ : توصلي كلام كثير وصديقتي قست كثير عليه بـ الكلام لحد ماخلته يعترف بأنه ظالم لأنه كان متكبر ومايعترف بخطآه قبل .. وبعد كل هـ الشهور ولما جلس مع نفسه أعترف لصديقتي ويقول أني أحس بتأنيب ضمير ومآرآح أرتاح الا أذا تزوجت ( يقصدني ) طبعآ أنا جدآ متفاجاه منه ومن صديقتي ! تبرير صديقتي ليه كلمته تقول / بخليه يحس شوي بأنه ظلمك هذا اللي صار موضوع المحكمه :: موعد جلوس المستشار والمفتي وطليقي يوم الأحد وأنــا أفكر بقوووه أنهي الموضوع .. اليوم السبت لأن خلاص مسامحته لوجه ربي ... مابي أي موضوع يطول حتى لو كان معي الحق لأني قريب إن شآءالله ربي بيرزقني وأبتزوج .. ومابي سمعتي تتآثر لأن حنا بمجتمع ظالم .. يخلي البنت هي الظالمه وهي الغلطانه وهي وهي يعطيك العافيه أخوي البليغ وعسى ربي يطول بعمرك ويسسعدك ويهنيك |
نسيت أقولك أخوي .. طليقي كلم أخوي ( اللي مايسلم علي ) وقآله كل شي .. كان بالأول يتكلم مع أخوي ويحط الغلط فيني عشان محد يقوله شي من أخوآني والحمدلله الآن .. تكلم الله يسامحه خلى أخوي يكرهني و يشك فيني بس الحمدلله على كل حآل |
*سبحان من أنطقه فقال الحق. *والآن سواءً ندم أم لم يندم فالأمر لا يعنيك، وهو يتحمل مسؤولية نفسه وقراراته لوحده. *أعتقد أن لديه مشكلة نفسية عميقة، وأمره إلى الله. *قولي لصديقتك أن توقف التواصل معه فالأمر انتهى، ولا داعي لنبشه، ولا داعي للأخذ والرد معه فليس محرماً لها، ولا تدعو الضرورة لهذا أبداً، وتحذف من مخيلتها التبريرات والإسقاطات ومحاولة جره لدائرة الندم وخلافها، وما أراها إلا حيل نفسية شيطانية عليها..فنبّهيها يا أخية. *أما موضوع التنازل عن حقك في القضية فآمل مراجعة ردي عليك في موضوعك السابق التي طرحته للاستشارة..وهذا ما أميل إليه مع قول "حسبنا الله ونعم الوكيل". *أخبريني بما يستجد في حوار المفتي غداً إن شاء الله. *أسأل الله أن يرزقك بالزوج الصالح. ::: ملاحظة: أعتقد أن الوقت حان لتغيير معرفك الالكتروني..أليس كذلك؟ |
الحمدلله اللي كنت أتمنآه .. صآر والله ظهر الحق .. وصديقتك كلمته مره وحده فقط .. قبل أمس وأمس كلم عليهآ ( وهي تفاجأت ) بس قال كلام كثير وأعترفات ( وحس بتأنيب ضمير ) وأعرف صديقتي هذي بنت تخاف الله فقط كلمته مره وحده وماتواصلت ابد معاه كانت مكالمتها بالبدايه بتسوي خير فقط لاغير وهو رجع كلمها ثلاث مرآآآآآت .. والحمدلله بالنسبه للمفتي أذا فيه جديد راح اخبرك مع اني الغبت فكرة رفع القضيه بس مدري هم شرعا بيشوفون الموضوع ( الرجال ) امين عسى الله يرزقني الزوج الصالح اللي يسعدني ويعوضني مافات بالنسبه للمعرف : ايه والله يااخوي صادق حان وقت تغييره وأنا طلبت من الاداره تغيييره .. بس ماوصلني شي منهم ؟ أو أدخل بمعرف جديد لا أعلم ربي يسسعدك يالبليغ .. ويكتب لك الاجر أنا اليوم معاي ورقه وقلم وجالسه أعيد كل اللي أنت كتبته لي .. وأكتب اللي يخصني عندي بورقه وحطيتها جنب سجادتي وكتبت أسمك بالورقه عشآن ماانساك من دعواتي ربي يحفظك لأسرتك.. مهما أقول ماأوفيك حقك ووبأذن الواحد الأحد أي خطوه هامه بحياتي .. رآح أستشيرك فيهآ |
اقتباس:
جزاك الله خيراً.. لا أريد سوى صالح الدعاء في أوقات الإجابة |
ويآك أخوي البليغ ... ربي يوفقني ويوفقك بسألك لأني زوآجي الأول ماستشرت أحد فيه وكانت غلطه مني : تقدم لي شخص ( مطلق ) له سنه مطلق زوجته سبب طلاقه زوجته لم ترتاح معه ( مو عيبآ فيه أو عيبآ فيهآ ) كما سمعنا ! مدة زواجهم أربع شهور عمره 35 وموظف << شي طيب سبق وعآش ببريطآنيآ والآن من سنه عآيش في بيت لوحده لأن وآلدآه متوفيآن الناس يمدحونه وهو رجل طيب وخلوق لكن فيه شي يشبه طليقي الا وهو : عايش لوحده سنوات كثيره وطليقي كذلك .. كان عايش لوحده سنوات صرت ماأحب أو متخوفه من اللي عآيشين لوحدهم .. وش رأيك أخوي ؟ ماذا تنصحني فيه ؟ أنا ماني مستعجله أبدآ .. أبدآ ( وهو مستعجل يبي يتزوج خلال شهر نفس حركة طليقي ) طبعآ من المستحيلات خلاص التجربه الأولى علمتني بس مسألة الرجل اللذي يعيش لوحده لأسبآبه ... وش طبيعتهم ؟ بحكم إنك رجل ؟! طليقي كان عايش في منطقه أخرى لمدة 5 سنوات لوحده .. وكذلك هذا الشخص ... اللي عايشين لوحدهم .. صرت متخوفه منهم ! يعطيك العافيه |
طبعآ صآرت أشياء من طليقي أمس .. وحركآت ورسايل شويه عليه كلمة ( قلة أدب ) قسم بالله أستحي اقول إني كنت زوجته سآبقآ ! ماأقول الا : الحمدلله , الحمدلله , الحمدلله ربي كتب لي الطلاق لانه خير لي |
سبب الطلاق للي متقدم لي : ( لم ترتاح الزوجه له ) ... ويقولون ( نصيب ) هل هذا السبب كآفي ؟ كيف أعرف أكثر .؟ ليه ماأرتاحت معه ؟! أهلهآ يقولون ماارتاحت وبس ! لو هو ماأرتاح لها .. أقتنع بس كذا مدري ؟! الله يكتب اللي فيه خير |
1) نعم! قد يكون هذا سبباً حاصلاً وهو عدم ارتياح أحد الطرفين للآخر..وهي مسألة قلبية وجدانية حتى ولو لم يكن بأحد الأطرافين أو كليهما عيوب مقنعة. 2) وقد يكون هناك أسباب لكنها أسباب سخيفة جداً يستحي الطليق أو الطليقة من قولها فيُكتفى بكلمة "نصيب". 3) لا نستطيع الحكم من عدمه حول عيشه بمفرده؛ لأننا نخشى من سوء الظن أو الثقة الزائدة. 4) أقدر مخاوفك الطبيعية من خوض تجربة جديدة..وأعرف ما يدور في عقلك وقلبك الآن. 5) بعضهم يعيش لوحده لأسباب منها: أن يكون له نظاماً معيناً في حياته فلا يحب أن يتعارض مع الآخرين وسلوكهم..أو يكون بطبعه شخصية انطوائية..أو لا يريد أن يوسّع حياته والمجال مع الآخرين..وهكذا. 6) احتفظي برسائل طليقك وأخبري أخاك عنها ليقرأها، ويذهب ليتفاهم معه حولها بقوة ورجولة، وأخبروا أباه أيضاً. 7) أنصحكم بما يلي: أ- اطلبوا من أهل الخاطب إعطاءكم فرصة للتفكير. ب- السؤال عن هذا الرجل في مكان سكنه، وفي عمله، وفي المسجد الذي يصلي فيه. ت- محاولة الوصول إلى أحد أصدقائه للسؤال عنه. ث- اطلبي من أخيك أن يدعوه لبيتكم أو خارجه لتناول القهوة معه، وتبادل أطراف الحديث لاكتشاف شخصيته قدر الإمكان، والتركيز على كلماته. ج- سؤاله أين سيسكن بعد الزواج، وكيف نظامه، وحياته. ح- اطلبي نظرة شرعية لمقياس ارتياحك القلبي له من عدمه. خ- صلي صلاة الاستخارة كثيراً. 8) ماذا حصل مع المفتي في موضوعك القديم؟ 9) سأنتظر جديدك. |
يعطيك العافيه اخوي .. بجاوبك بموضوع المفتي بوقت ثآني لأني بسآفر بس بالنسبه للخآطب الكل يمدحه : - حسب مافهمت سيذهب بعد ثلاث شهور ( بعثه لبريطانيا ) الحياة ببريطانيا كيف ؟ والغربه ؟ << متردده بالهالموضوع - عآيش مع ( شغآله فلبينيه ) .. أقصد عايشه معه هالشغاله بالبيت مدة اربع سنوات لأن أمه وابوه متوفين وخواته متزوجات موضوع الشغاله .. ششرأيك ؟! أخآف زوجته الأولى تركته بسبب الشغاله ! رجل لوحده وعايشه معه شغاله .. ! أربكني موضوع الشغاله والله خآيفـــه وأبكي كثير الله يكتب اللي فيه خير |
1) الحياة بالغربة تكسب الشخص معارف ومدارك أخرى...وبالطبع سوف تشعرين بالحنين والوحدة في بدايتها إلى أهلك ووطنك..وهي فرصة هناك للدراسة وتعلم اللغة.
2) اسألي الأخت موهبة الكويت فهي قد عاشت في بريطانيا. 3) اسألوا جيداً عنه، وعن دينه، وعن أمر الشغالة إن أمكن. 4) استودع الله دينك، وأمانتك، وخواتيم عملك. |
| الساعة الآن 09:54 PM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©