|
الله يصلح حالك
وش جديدك؟........عساها تعدلت؟ |
الله يهديها ويصلحهاا وياارب تتحسن أموركم ..
أخي الفاضل , اذا رأيت منها شيئ جمييل ابتسم وجامل وامتدحهااا لآ تنسى هالنقطه امتدحها داائماً .. مثل القهوة , قول لها امممم قهوتك طعمه والله , الله لآ يحرمني منك ولا من لمساتك الحلووة .. شفت شكلها حلوو اليوم , قول ماشالله تهلبين ولا القمر مو مثلك .. وصدقني رااح تتحسن ان شالله .. بس انت بسك لا تكووون جااف معها .. دمت بوود=) |
يا ختي (افهمني تملكني ) ...
اشوى انك منتب رجل .. اسلوب الضرب بالعقال ما يستخدمه الا الانسان الضعيف ... وحتى الشرع اللي حدد عقوبة الناشز ما ادرج هالعقاب القاسي .. البنت بزر + تدرس وعندها دوام مثل ماعندك دوام فلا تقارنونها باللي جالسة بالبيت لا شغل ولا مشغلة + وعندها طفل غير كذا ما فيها شئ لو امك ترسل لها غداء طالما جايه من دوام ..وهم مصلحين وش يضر لو ارسلوا لكم لكن تنظيف البيت لا يلمسون شئ.. دايما امي ترسل لزوجة اخوي واختي غداء ,وهن سنعات وستات بيت , بس ترحمهن جايات من دوام وروسهن دايخه من الشغل ,, تقول مصلحه الغداء مصلحته وش فيها اذا ارسلت ؟ غير كذا تعتبر اسلوب الدلع بالطلعات والسفريات والتمشيات والفلوس ,, من اللحين اعلمك اللي يقول هذا سلوب دلع ترى ما عنده سالفه انا كزوجه لو بيعطيني زوجي ما عتبرته اسلوب دلع ولا يعجبني .. اسلوب الدلع واللي فعلا اعتبره دلع هو الاشباع العاطفي .. المدح والثناء على الزوجه ,, اغراقها بمعسول الكلام ,, البوس والضم .. وان بغى يصير فقير داج بس اهم شئ يسد حاجة هذي واحطه بعيوني الثنتين .. مشكلتها الكبرى هي الصلاة ... ياليتك تسال مفتي او شيخ بالنسبة للحكم في حالة زوجة ما تصلي .. |
والله ونا اختك ياأصليه أن كان ماينفع أسلوب الضرب أجل وش ينفع معها
ياأختي نعرف ناس والله ماشاء الله تبارك الله عليها عليها سبعه عيال وتشتغل والله يابيتها لادخلتيه ورده ونظافه وريحه الزينه وعيالها لما تشوفينهم تقولين لا إله إلا الله على ذي الأم أجمعت بين الزوج والعيال والبيت وشغله وهذي ماعليها إلا واحد موب سبعه ولا عشره واحد بس ومسويه كذا أجل لاجابت 6 أطفال وش بتسوي أتوقع يمكن بيتها راح يطلع البلديه لابد من وقفه حازمه معها واللي يقول غرقها بأسلوب الدلع والغنج ومدري وشو وش ذي الحياة وسخه وأدلعها من غير مقابل وأهلها صراحه ماعرفو يعلمونها الصلاة وحقوق الزوج جات من بيت اهلها ماتعرف شئ وش ذي وكاد أذا كانت تعبانه فأكيد راح يراعي ظروفها بعد وين هي بزر لا بالله ماهي بزر قدها مره وأم ولد وين صارت بزر معه اللي مثله يشيلون خمس بيوت وهي بيت مقدرت تشيله لو أني منه أرجعها لبيت أهلها وأقول علموها الطبخ والسنع والنظافه وشلون تحترم الزوج وقبل كل شئ الصلاة وأذا صارت حرمه وينضرب فيها المثل ذيك ساعه أخذها من بيت أهلها وأحطها على راسي |
8
كل حرمة ولها مفتاح ,,, وكل حرمه لها الاسلوب اللي يناسبها واللي يجيب نتيجه .. حريم تمشي بالعين الحمراء وحريم لا .. بالذات العنيد اسلوب الهواش والتحطيم بيزيدها عناد ولا راح يجيب اي نتيجه ... وزوجته قلنا طفله لان عقليتيها عقلية طفل ...واغلب اعمار 20 وتحت عقلية اطفال .. |
الحمد لله والصلاة والسلام على رسول الله وعلى آله وصحبه، أما بعـد:
فنشوز النساء معناه استعلاؤهن على أزواجهن وعصيانهن وعدم طاعتهن فيما تلزم الطاعة فيه، وإذا ما حصل من المرأة ذلك فعلى الرجل أن يتدرج معها في الأمور التالية، فيبدأ بالأولى، فإذا لم يفد ذلك انتقل إلى الثانية ثم إلى الثالثة، وهذه الأمور هي: 1/ الوعظ ومنه تذكير المرأة بحق الزوج، وأن طاعته بالمعروف من طاعة الله تعالى، ومعصيته معصية لله. 2/ الهجر في المضجع ومعناه أن يبيت الرجل مع المرأة في فراش واحد لكن يوليها ظهره ولا يجامعها. 3/ الضرب ويشترط لجوازه أن يكون ضربا غير مبرح. |
لي عوده على بعض الردود الي فهمت القصه غلط عموما صار عندي عزا واضطريت للسفر ولما ارجع لي عوده
|
غلاتي الماضي الدفين
احب ادرس الشخصيات مضبوط انا وش الجماليات الي بشخصية زوجته ؟ بصراحة ما شفت ولا جمال انا اقتباس:
انا نومي اكثر من ثمان ساعات وفعلا اعاني من فتور همة وكسل فظيع اقصد ماحب اشتغل كثير شي بدني .. احب اقرا اي شي يشغل مخي هل انتي تحسين مالك خلق تسوين شي ؟؟ وان سويتي مرة عشر مرات ما سويتي ؟ |
تاكد ياصاحب الموضوع أن زوجتك ماراح تعرف حقوقها إلا لما تعرف حق ربها عليها
وأنتبه ذا الشئ يكبر معها وتكون انت معها متهاون معها من ناحية الصلاة الله يهديها يارب ويعصم قلبها بالهدايه والأفضل تشغل الرقيه الشرعيه في بيتك |
رحم الله من مات، والحمد لله على سلامتك. أنا بانتظار جديدك. |
السلام عليكم
انت ذكرت مميزاتك بس معقوله هي مالهاولاميزه يعني كل شيء فيها سلبي مستحيل انت لك سلبيات وهي بعد لها سلبيات اخوي انا زوجي تزوجني ودرست عنده ثاني ثانوي وربي ياامه بدايه السنه ترسل الشغاله وتسوي الغداء وانه يجيب المقاضي وتخرب ولمن دخلت ثالث ثانوي تعلمت وصرت هاديه واطبخ وتعلمت وبيتي نظف والحين بالجامعه ومازلت اهمل وهو يساعدني ويعلمني وربي انه دخل معي المطبخ علمني الطبخ يعني لازم تصبر لاتحط انك ماقصرت وانك سويت المستحيل راعيها اعتبرها طفلتك وعلمها وفهمها وسوي المستحيل عشان يستقيم البيت وارحم طفلك وش ذنبه.... انت دامك تزوجتها بهذا العمر لازم تكون الاب والزوج والصديق والام باقي صغيرها بعمرها وشافتك معطيها وجه زادت انت شد عليها شوي وبعدين لاتدخل احد بالمشاكل الي بينكم ... انتم تحبوا بعض بس كل واحد يعاند الثاني عشان يفرض شخصيته تنازل في بعض الاشياء اذا شفتها نايمه صحيها من نومها _حاول يومين وراء بعض تطبخ وربي انها راح تستحي منك خلك ساكت لاترد عليها *الي يقول اضربها اتحدا احد تجرا وضرب زوجته خافوا ربكم هومعصب وانتم تزيدوه :22: وعظم الله اجرك اخوي |
ربما يكون ردي مخالفا للأغلبية لكني سأجتهد فيه بما لدي.
بكل بساطة زوجتك لم تقم بما هو ((معروف)) بين الزوجين و ليس بما هو ((واجب)) *المعروف التي تقوم به الزوجة و له أجر كبير و يزيد الألفة و المحبة بين الزوجين ,تنظيف سكنه , طبخ طعامه , الغسل , الكوي , الترتيب .و غيره من أعمال المنزل الغير واجبة شرعا عليها *الواجب هو تمكينك من نفسها متى شئت ,الأستئذان منك ,,,, فالحل عوضا ان تطالبها (((بعنف))) بـ((المعروف)) لتزيد ((غصب)) ((الألفة و المحبة)) قم بما هو ((واجب)) منك فقط و لا تقم بما هو ((معروف)) *الواجب توفير السكن و المأكل و الملبس و معاشرتها بالمعروف و لا تقطعها 4 أشهر *المعروف السفريات و الهدايا و الطلعات إلى أن تستحي منك فتقدم لك المعروف على طبق من ذهب لن يفهم المرأة المتزوجة المبتدئة غير المرأة المتزوجة منذ سنوات أسلوب العنف لا ينفع مع كل امرأة اجبار المرأة على الخدمة يسلبها قيمة الأحساس بأهميته في زيادة الألفة و يجعل مكانه الأحساس بالخوف و حكم القوي على الضعيف,, تأكد تماما أن هناك فرق بين اتهامك لها أنها لا تصلي و بين أنها تؤخر بعض الصلوات , فلو سلمنا انها لم تصلي المغرب و العشاء بوقتها , فغير معقول ان تكون نائمة فجرا و ظهرا و عصرا!! و أنت في عملك في الظهر و العصر و انا لا استهين بعظم تأخير الصلاة لكن فرق بين تأخير و (((ترك))) بقولك (((لا تصلي))) وفقك الله و هداها لك بأحسن ما يكون |
ههناك مثلين ينطبقان على زوجتك :
إن لم تستح فاصنع ماشئت .. والثاني : من أمن العقوبة أساء الأدب .. |
أخي الكريم وفقك الله لهداه وأرشدك طريق الصواب وأعانك الله على تحمل مشاكل بيتك. أخي : أطلعت على موضوعك وقد قرأته مراراً وحاولت التوصل لفهم المشكلة قبل التوصل إلى حل لها وقد تبين لي أن هناك لغزا لم تبوح به وهو ما أدى إلى تطور الأمور لديك. فعلماء النفس يقولون لكل فعل ردة فعل. فهل قضيتك مبتورة لتجعل من نفسك أنك صاحب حق؟ أنا لا أبرر ما تفعله زوجتك وما تفوهت به لكن يجب التحري ونطرح هذا السؤال : ما هي الأسباب التي دفعتها لأن تتساوى الأشياء أمامها ؟ ترفض البيت !! ترفضك أنت !! وحتى ترفض ابنها!! أخي : إن كنت صادق فيما تقول وأنها جاءت للترفيه والتسلية من بيت أهلها، فعلاج أمرها هو : 1. الحرص على القيام بأمور الدين والعبادات، بأن تحرص على تنظيم جدول ديني بالمنزل ( قراءة القران قبل النوم ، صلاة الوتر، الاستماع إلى قنوات دينية ). والمغزى من هذا أن تستشعر عظمة الدين وأن تراعي هذا الأمر. 2. عدم الخوض معها في سجال ومناقشة بل دعها وشأنها وأهجرها ولا تطيل من الجلوس بالمنزل ولا تطلب منها شيئاً، أي دع البيت للنوم فقط. 3. لبي لها ما تحتاج من ضروريات فقط. 4. حاول أن تقلل من صلتها بالآخرين سواء أهلك أو أهلها لكن لا تمنعها مطلقاً. 5. عاملها بمبدأ التسويف، فمثلا في موضوع الجامعة قل : إن شاء الله ، يصير خير ( واسحب ). 6. تحتاج إلى الشدة تارة و إلى الإرخاء تارة أخرى. 7. عدم إدخال الأقارب في مشاكلك سواء أهلك أو أهلها. 8. عدم ضربها أو إهانتها. 9. بين لها أنك لست بحاجة إليها وأن أمورك بالتمام وأن بالإمكان العيش سواها. 10. لا تذكر أفضالك عليها ولا تدع لها فضلاً عليك. أعانك الله وسدد خطاك حسام |
اقتباس:
انا مع هذا الرد اول مايسال عنه العبد يوم القيامة "الصلاة" فأن صلحت صلح سائر عمله -- دور لك شيخ يفصل لك هالكلام بالتفصيل سوف تصل لهدفك احد الصحابة والله اعلم اذا ماخانتني الذاكرة يقول اذا اذنبت ذنبا رائيتها في دابتي او كما قيل في اهلي لذلك ترى المعاصي امرها موهب هين وترك الصلاة وانت لم تجاهدت نفسك علي اصلاح بيتك وانت الرجل عمود البيت مثل مايقولوا لازم انت اللي تناصحها اذا ابت شهد عليها بترك الصلاة وبلغ اهلها وعليك بالدعااااااء فهو مفتاح كل شي وانا اسمي الدعاء بالعامي " مثل المستر كي " يفتح لك اي شي بالدنيا والاخرة وذلك بأذن الله تعالي فكر في كلامي وترا حنا مثلك نواجه من حريمنا اللي مايعجبنا بس ان الواحد يمسك عصاه بالنص لاكن ترك الصلاة حط تحتها مليون خط شي اخر وش وضع القنوات الفضائيه عندك عادي اغاني ورقص وترى هاذي تحسوك في بيتك وانت ماتدري نصيحة اخيرة وعلقها باذنك من اقبل علي الله اقبل الله علية بالقبول وفقك الله يا اخي |
اقتباس:
افضل رد قرأته حتي الان |
اخووي أنا كنت زي زووجتك داايم نااايمه طوال اليوم اصلي وارجع اكمل نوومي جلست تقريبا شهر حتى كنت اروح لأهلي ونفس الشيء اكمل نوومي واكره البيت والشغل كسل موو طبيعي وخموول بس عرفت السبب ليش من مانع الحمل الي كنت استخدمه وتركته والحمدالله ترا مانع الحمل له دور في تغير نفسيه الزوجه أدا كانت تستخدم *
|
الله يكون بعونك بغيت اقولك طلقا طلقه بس طلعت مطلقها مرتين وبرضو ما اتادبت صراحه غريبه
وترى السن له دور بالذات مع بنات هدي اليومين وما انكر في بنات اتزوجو صغار بس ما شاء الله عليهم عشان كدا الحل اللي قالو الاخ حسام01 احسن حل يعني طنشها وقضي الضروريات بس يعني لاتتدلعها واعتبرها مو موجوده يمكن تحس وتتعدل او اذا كنت تقدر تعدل تزوج فوقها ليش لا لان مستحيل تكمل حياتك كدا او اصبر وشوف نهايتها مع ان وحده لاصلاه ولا ادب ولا احترام حتى ولدها عندها كانو لعبه مو مهتمه فيه اغسل يدي منها والله يكون بعونك |
اقتباس:
كلامك سليم ماقدر اتخذ قرار |
مساكم الله بالخير جميعاً اعتذر عن سرد احداث اخر يومين وذلك لظرف عزا في الخبر اضطررت للسفر وتأدية الواجب عموماً اخواني انا توني واصل للرياض امس الظهر توفى قريب لي واضطريت للسفر و طلعت من البيت انا والوالد وجيت عندها وفتحت باب الغرفة وحصلتها نايمة الظهر وطالعت فيني وقالت طف النور وسكت ماقلت انا مسافر ولا ارسلت لها الا لما وصلت عموماً الساعة 6 مساء وقبل الرياض ب 80 كيلو اتصلت عليها وقلت نا جاي سوي عشا قالت متى تبيه قلت ابيه الساعة 9 وسوي قهوة ترى نص ساعة واكون في البيت ركزو على الكلمة هاذي نص ساعة....... الحمد الله وصلت البيت وكان معي ناس وحلفو اتعشى واتقهوى بس اعتذرت قلت انا عشاي وقهوتي جاهزة في البيت وبنام وراي دوام وراح الوالد لهم. دخلت البيت وتصكني ذيك الريحه الي معتاد عليها مادري زبايل مادري خياس ولا ايش وقلت مشي بس ياولد بدخل الحين بعد تعب سفر امس رايح واليوم جاي وعزا مارتحت ونفسيه زفت دخلت مجلسي قلت بحصل القهوة الحين وللاسف مافيه شي وتجيني ام العبيد واروح للمطبخ الا ولله مافيه شي وباب الغرفة مسكره !!! دخلت الغرفة ونزلتي ثوبي وطلعت الا هي جاية تسلم من زين الخشة وارد من دون نفس مطنقر منها،،،،، قلت وين القهوة قالت جاهزة بس اسخنها واطالع في المطبخ مافيه شي ؟ الا وهي قاعدة تركبها من جديد قلت هاذي الي تسخنها وسكت واكلمكم وانا صاكتني ام العبيد اخس مناخيري طالع منها شرار بالله هذا استقبال ماتجي القهوة الا بعد ماجلس وافصخ ملابسي تروح تركبها !! ماقول غير صبر جميل والله المستعان المشاركين السابقين مع اخوي البليغ ارجو الرد على اخر المستجدات والحل بها دمتم بود |
انت خلها تشم ريحه خطبه
وبتشوووف النتيجه |
عليك كلمات :25: حتى المعجم الوسيط وقف عندها بالأول "عوبا" وترجموها الأخوان الحين "صاكتني أم العبيد" وش أم العبيد ذي ؟؟ |
اقتباس:
اولا عظم الله اجرك واحسن الله عزاكم وغفر الله لمتوفاكم واسكنه فسيح جناته ثانياً رووووووووق روووووووووووق روووووووووووق نفسيتك اخاف تأثر عليك... :( :( وكثر التفكير في سلبيات الطرف الآخر يزيد من شينة النفس ويرتفع ضغطك انا لو منك اروح وأتقهوى مع الناس اللي عزموك وأغير من جو السلبية اللي تنتظرني (مع انك منبه عليها تجهز القهوة والعشا).. انت تدري ان زوجتك ماهي بتكانة يعتمد عليها .. فلا تلومها لأنك انت من وضع عشمه في غير محله.. وبعد ما أخلص اجي للبيت ... لو كان فيها خير وزينت شي ابقول لها ابوي لزم علي مع ربعه واستحيت منهم وانا شاكر جهودك ولو مازينت شي اتركها بتقوم بتثقال تزين اي شي قلها الله لا يكثر خيرك.. عرفت من دون ماتزينين شي انك جثة هامدة .. عشان كذا اول ماعزموني الناس رحت معهم.. لأني اعرفك في البيت مثلك مثل دفاشة باب البيت كل شي عندك مغلق... :d :22: :d اجل لو اني ملزم عليهم وجايين معي وش بيكون وضعك..؟؟ :29: :29: احرجها خلها تعرف مكانتها عندك خلها تعرف انك جالس لها على الوحدة |
يا أخي الفاضل:
-غيّر نفسك؛ كي تتغير هي. -تحلّى بالصبر في هذه المرحلة المهمة في حياتك الزوجية. -كان من الأفضل أن تسأل: أين القهوة؟ أين العشاء؟ ماذا قلتُ أنا في الهاتف؟..كلمتي لا أريد أن أكررها مرتين، فهل تفهمين هذا أم لا؟..ثم خرجت من البيت. -حينما تصدر الأمر، لا بد من متابعة التنفيذ. -الآن قد وقع ما وقع فلا تعاتب أبداً، وانظر للمستجدات التي ستحصل. -أرجوك استمر على ما قلناه لك على الأقل 3 أسابيع، وادعس على قلبك؛ كي تسير حياتك وفقاً على ما تريده...وبعدها لكل حادث حديث. -في البدايات لا بد أن تفهم أنك ستقابل منها صدوداً، وعصياناً، وطاعة بعض الأحيان، وتمرداً، وخضوعاً منها..هل تعرف لماذا؟ لأنها تود جسّ نبضك عن جدّيتك في التغير أم أنك غير جاد..هل فهمتني يا سيدي؟ فإن رأيت الجدية منك -بمعنى الكلمة- فحتماً ستستجيب بإذن الله. |
اقتباس:
والله مادري الاخت بليدة لو اتزوج عشر يمكن تطق اصبع:14: |
اقتباس:
[B]احس كلماتي مفهومه خاصة عند معشر النساء الا اذا انتي مقطوعن سرك في كندا :d ]قوقليها في ترجمة قوقل وتطلع لك في مصطلحات حريم السعودية:22:[/B |
اقتباس:
يارجال عساك سالم كل ماشكينا من شي قالت انت تدور العيوب تحسب الي تسويه عادي نبهت عليها واستخدمت اسلوب التخويف وقلت ترى الرجال الي جيت من عزاه مات وهو زعلان مايندرى هو من دوامه هو من مرته وقفل على نفسه الغرفة لين انفجر في راسة عرق ولا درو عنه الا اليوم الي عقبه انتبهي و خافي الله يابنت الناس ترى اهلي عارفين بوضعنا ودارين اني كل يومين وانا زعلان وكل شوي صوتي طالع وعارفين بقلة ادبك بس الظاهر انها ماتفهم الكلام الي اقوله يطلع مع اذنها الثانيه والله احسها انها جالسة على الفاضي كني عزوبي يالربع مافيه فرق بصراحه |
اقتباس:
ياخوي البليغ شلون اغير من نفسي الي حسيت اني تغيرت فيه اني البارح كل ماقالت شي كلمة ورد غطاها ولا كلمتها ابد قالت ترى الموضوع عادي والقهوة جتك. قلت خلاص الموضوع بالنسبة لي انتهى شوفي كم الساعة اتصلت عليك وقلت لك سوي قهوة راحت تقول انا احسبك بتجي الساعة 9 :( وش ذا العبط الي فيها،،،،،،،، الا تبي النوم وبس النقطة الي تقول كان سئلتها وين القهوة وين الشاهي,,,,,,,,,تتوقع ماقلت الشي هذا ؟ في بداية موضوعي قايله اول مادخلت ادور قهوة ولا حصلت شي ويوم سئلتها قالت جاهزة بس اسخنها وهي نصابة توها تركبها انا متنرفز وتعبان ولا نمت زين وجاي من مقبرة الدمام على الرياض على طول ادور المطيح في الارض مابي الج راسي في خرابيطها. وشلون تبي اطلع بعد التعب هذا كله ! حنا قاعدين نمشي على الكلام الي قلته والبارح شفتها تصلي عسى الله يقبلها.. بس كان لي ملاحظه عليها وراح اتوقع ان اليوم راح تصير،،،،، طبعاً هي داومت في الجامعة وجت ونامت ولا صحت الا بعد ماجيت من السفر البارح، واليوم راح اتوقع انها نفس الحكاية بتسحبها نومه رغم اني مخطط اطلع من الدوام بدري وراح ابلغكم بأي تطورات واحداث |
ارسل لها رساله بالمختصر الي تبيه 1-
2- 3- بجي من الدوام والطلبات جاهزه ماتحمينها ابيها جاهزه |
اقتباس:
اعطها توجيهات واوامر وراقب ماذا تفعل بدون ماتشحن نفسك... روق لا تخلي هذا الامر يأثر عليك.. ترى ابدى ماعليك صحتك وانا خووووك مرات البرود من تعاملها معك مع قل السنع يصيبك باحباط.. لأنك تحب ان يكون ردة فعل الاخرين مثل ردة فعلك اتجاههم ..وهذا غير صحيح.. لا تشحن نفسك.. خلك طبيعي فأنت الان تحاول ولست متأكد من النتيجة 100%.. فلا تأثر على نفسك انا جداً متعاطف معك ومريت بنفس المرحلة اللي انت فيها.. بس اتخذت سياسة النفس الطويل عشان لا اركز واتعب شف لك اي شي يلهيك عن وضعك في البيت وانت موجود في البيت ان شالله لو تلعب بلوت في النت.. بس لازم ما تشحن نفسك .. لان عين السخط تبدي المساوئ ..وهذه المساوئ تحبطك وتزيد من سلبية نفسيتك وفقك الله |
احسن اللة عزاك اخي الكريم متورط بمرتي قم صل لك ركعتين بنية التيسيرفي امورك واللة بيفرجها عليك واللة ماادري وش اقولك انالو بمكانك اشردها من اول ليلة زين مني لقتها حية لكن اخوي ااصبر ورح تنفرج
|
ابشركم جاني مسج تعزمني على العشاء والسهرة بس القلب شايل ورفضت الدعوه حيث ان اجندتي ماتسمح لي ــــــــ> مسوي مهم :d وردت الله يحييها ان شاء الله مره ثانيه :15: لو القلب ماهو شايل همومن كايدة كان وافقت :eek: |
اقتباس:
ما أدري ؟؟ بس الحرمة تبي تعتذر ومجهزة لك عشاء وترفض !!! لو حضرت العشاء وأخذتها فرصة في أنك تفتحون صفحة جديدة ذكرتني بتوم وجيري، تطاردون ببعض :21: |
اقتباس:
وش هالعيشه الي عايشها اقولك زوجتك ماعليها شرهه قلت تنام لليوم الثاني قلنا اوكيه تحمل قلت خميمه ببيتها هم مايخالف قلت خميمه بنفسها قلنا صبرا جميل والله المستعان لاكن متعود على ريحة خياس وزبايل ولا تصلي ......... احس الناس الحين يتقرفون يجون بيتك حتى هلك واحد من خوالي نفس وضعك تماما قسم بالله كل العايله يتقرفون منه هو وعياله حتى بنته ماحد يسلم عليها من القرف الي هي فيه |
مدري احسك غلطت برفض دعوتها
كذا بتحسك بس تدور الزله عليها وماتنتظر منها تقدّم يعني بس شايل وتبي تتذمر منها مو جاد بمحاولة تغييرها .. فياخوفي بعدين ماتبادر مثل هالمره وتصير ماستفدت شي لو مكانك برسلها هل الدعوه مازالت قائمه ؟ وتعوذ من ابليس هو اللي يخليكم عكس بعض كل مره لازنت شانت ولاشنت زانت |
اقتباس:
مشكورة ام نايف |
اقتباس:
النقطة هاذي اشارة لها اخوي البليغ الله يعافية بأن نجلس جلسة هادئة.... بس سبق وانجلسنا اكثر من مره وتواعد وتخلف وفي الاخير حليمة على عادتها القديمة يعني تعودت وتقول في نفسها بيزعل يزعل وفي الاخير يرضى،،،،،،،،، هالمرة ماني قابل شي منها وكلمة ورد غطاها مني غيره ماني فاتح مواضيع ولا شي وحتى جلسات في البيت ماني جالس لما تحس اني جدي في موضوعي وان السيل بلغ الزبى وكل الكلام الي راح ماجاب نتيجة وبعد نصائح اخوي البليغ الي ماشي عليها وقاعد اطبقها بدخل موضوع خطبة بس مو من طرفي ابي يجيها العلم ونشوف بعد هذا كله وش تسوي تتغير كلياً ولا لا. |
بما أنك رفضت دعوتها فالبس أحسن ثيابك الليلة، وقم برش أحسن العطور على نفسك وملابسك واخرج خارج البيت وارجع متأخراً قليلاً. وإن رجعت للبيت لا تتكلم في شيء..فقط ألقي السلام، وتوضأ، وصلي ركعتين مع الوتر، واسهر لوحدك، أو ارقد. |
اقتباس:
بس اتمنى ماتكون زعلت الصراحه دايم تجرح بس اهم شي تحل لك موضوعك انا ماقول اضربها او طلقها او تزوج عليها بس خلك حازم في كلامك زوجتك يبيلها تتثقف في امور الزواج اشتر لها كتب قولها تشترك بالمنتديات الزوجيه بس لازم تكون حازم في صلاتها ونظافتها >>>> يارب ماقصدي ازعل حد /FONT] |
زيييييين ماشالله انا اشوف الوضع تطور:22:
يعني قلت قامت تصلي دام اهتمت ب هالنقطه صدقني رااااح تتغير في اشيااااء كثيره بس لاتنسى كل مره تذكرهااا ع هالشي وثاني شي عزمتك على العشااا:14: معناتها (نادمه )على فعلتهاا الي امس وتبي تعوضك وحست انك جاااد معهاا في كلامك امس عشااان كذا جاها شعور الندم خلك على كذااا:22: وموضوع الخطبه ياليت تنساااهـ الحييين حراااام عليك ترى هي مهما سوت مو معنااا هذي انهااا ماتبيك او تكرهك تبي تجننها انت اصبر شوي الله يديك منت خسرااان شي بالعكس انا اشووف ان هي تبي تتقرب منك اكثر وتبي تكسر الحواجز الي بينك وبينهااا بس انت مستعجل:18: ترى الشي الي تبي تسويييه يحز في نفس المراه كثييير يعني يكمن تحقد عليك انااا اشوف تأجل هالموضوع شوي,,,, |
| الساعة الآن 02:17 PM. |
Powered by vBulletin® Version 3.8.7
Copyright ©2000 - 2026, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©