|
دودي دبدوبي وزني ووزن لوف ماهو بالبعيد عنك ابدا وتقدري توصلين له في سنه بالكثير اذا التزمتي بجديه بريجيم غذائي وبعدتي عن اللخبطه على العموم حبيت اقول لك معلوماتي الشخصيه عن ريجيم البروتين لأني اسمع عنه كثير في القنوات الفرنسية هنا وشفت مقابلات كثير مع حريم فرنسيات كانت اوزانهم فوق الميه ومشوا على ريجيم البروتين لأكثر من سنه وقدروا يخسروا اوزان بين الثلاثين والاربعين كيلو وكلهم كانت انطباعاتهم كويسه عنه من حيث انهم وصلوا لأوزانهم الثاليه لكن الاطباء يقولوا إنه له اثار جانبيه على الجسم واولها مشاكل تخص الكلى لأن كثرة تناول البروتينات مرهق جدا للكلى في عملية التصفية ويفضل ان الناس اللي عندهم مشاكل كلويه مايتبعوا هذا الريجيم واللي ماعندهم مشاكل سابقه لازم يتابعوا مع طبيب في كل فترة الريجيم ومن عيوبه الثانيه هو ان الجسم يتعود على حصص غذائيه كبيرة من البروتين فلما تنتهي من الريجيم وتحاولى ترجعي لأكل متوازن ماراح تحسي بالشبع بسهوله وراح تكوني في حالة جوع دائمه وهذا ممكن يكون سبب في استعادة وزنك اللي فقدتيه بسهوله وكمان عيب ثالث هو أنه بمجرد ما ترجع الكربوهيدرات تدخل في اكلك جسمك راح يرجع يخزن الطاقه وممكن ترجعي بالشكل هذا جزء كبير من الوزن اللي تعبتي في تنزيله عشان كذا يبغالك تكوني حذره في كل فترة الريجيم وكمان بعد ماتنتهي منه لأانه على قدر ماهو سهل انك تنزلي وزنك الان بالريجيم على قدر ماحيكون صعب عليكي انك تحافظي على وزنك ثابت لاحقا حتى لو كان اكلك خفيف ومتوازن مختصر الكلام هو ان الريجيم فعال لكن له عيوب لازم تكوني حذره منها في تقرير لسه شفته من فترة قريب وهو ان في مجموعه كبيره من النساء الحريم اللي يتبعوا الريجيم هذا سوا لهم موقع خاص على النت ويحمسوا بعضهم وكونوا لهم جروب كبييييييييييير من الصديقات وصاروا يتزاوروا فيما بينهم وينظموا رحلات وتجمعات لهم رغم انهم في مدن فرنسية مختلفه ومتباعدة منهم من خلصت الريجيم ودخلت مرحلة تثبيت الوزن ومنهم من لسه مستمره فيه لكن كلهم يقولوا إنه الريجيم ماأثر على صحتهم سلبيا بالعكس كان له الفضل في تغيير حياتهم للأحسن |
نورا ودودي أنا كتبت لدودي قبل ما اشوف ردودكم الأخيره لأني شفتها دخلت الموضوع الله يبارك فيكم حبايبي وعقبالكم وجوه خير بالتأكيد بس وينها من زمان عني :d الله يسعدكم حبايبي وينولكم مرادكم |
السلام عليكم و رحمة الله و بركاته
ها اشوفكم كسلتوا؟؟ خير؟ اللهم اجعله خير محد فيكم دخل من امس ان شاء الله اخبار الرجيم تمام ؟ انا حاسة ان هذي المساحة الوحيده اللي اقدر افضفض فيها براحتي معليش اتحملوني ههههههههه انا ما اخبي عليكم اني قبل اسبوع يوم الجمعة كانت عندنا ملكة و من يومها و انا كل يوم تخبيصة شكل صحيح اني بعد الملكة بيوم شفت ال104 و اتحمست او يمكن صابني الغرور و الكسل زي اللي حسيت بالراحة و انا هدفي قرب هدفي الاول كان اني انزل عن ال100 كجم و بعدها يسهل النزول هذا حسب ما سمعت المهم اتفجعت و انا اطلع عالميزان اول الاسبوع السبت و الاقيه 106 الله اكبر لكن بصراحة كانت متوقعه لانه مافي شي كاربوهيدرات الا و اكلت منه بالذات الخميس و الجمعه في الليل و السبب التاني اللي خلاني مرة اترك لنفسي هواها و هو خطأ فادح جدا عند اكثر متبعي الريجيم و هو الوقوف على الميزان مية مرة في اليوم هذا يعطيني احساس خاطيئ بالنزول و اتوهم اني نزلت و ابدأ اكل و اقول بس اليوم و بكرة ابدأ ما يضرني لو خربته اليوم طالما اني بانزل نزول طبيعي دي الحركة خربت لي الدنيا و خدعتني و خلاص من يوم السبت وعدت نفسي ارجع امسك نفسي قدر المستطاع ان شاء الله و اشوف نتايج حلوة ان شاء الله اخر الاسبوع امس و اليوم افطرت سلطة ورقيات و فجل و مرة مع البيض المسلوق و مرة مع التونة و الغداء امس جبنة شدر و العشا سلطة تونة و الغداء اليوم برجر بالجبن و المشروم و اللحم المقدد بدون عيش طبعا و العشاء سجق مقلي على الطاوة بالزيت و الحمد لله على النعمة و ان شاء الله اخر هذا الاسبوع اشوف نتيجة حلوة او على الاقل ارجع لل104 انا راضية و متفائلة اني حارجع لها بقوة الله ************ عفراء شكرا على ردك و تشجيعك انا فعلا حاسة بنشاط احسن من اول بكثير لاني لاحظت ان اعراض متلازمة مقاومة الانسولين عندي تظهر فقط لما اكل كاربوهيدرات و بالتحديد سكريات بكثرة و تجيني حالة هبوط السكر بسبب ارتفاع الانسولين و يجيني نهجان اضل اناهج مرة كثير و اعرق و اتعب و هذي و اللهم لك الحمد انسب حمية و الله يجعل لي فيها الشفاء من هذي المتلازمة و يبعد عنا شر الأمراض ايش رأيكم نحدد يوم السبت نوزن فيه اسبوعيا اول شي في الصباح يصير حمااااااااااس |
دبدووووبة يا نوارة الصفحة
احبك في الله يابنت صراحة انا استحييت ادخل لانو الاسبوع الي فات خبصصصصت تخبييص فظيييييع بس خلاااص خلاااص قررت التزم و من اول امس ماسكة نفسي حتى اول امس اللليل جععت بس الله يبارك لها حلم حياتي وقفتني :) ربي ينحفنا بصحة و عافية ياارب يالله شدي الهمة و نحن وراك :) |
السلام عليكم و رحمة الله و بركاته
كتبت رد و مدري فين راح يلا نعيد مو مشكلة الفطور اليوم بيض مع جبنة ايدام الشمع اللي يغلفها اخضر و هي بالاعشاب مرة لذيذة و تغيير عن الجبنة العادية و طعمها خرافي عجبتني الغدا شيش طاووق مشوي اسياخ + جرجير العشا جمعت كل بواقي الخضار اللي في الفريزر و عملت بيهم ايدام تونة بزيت التونة +(كوسة فلفل رومي بصل اخضر فاصوليا خضرا بقدونس) بكميات قليلة مع كاري و ثوم لذيذ مرة الوجبات الخفيفة مرة كانت حفنة لوز و مرة كانت جيلي بنكهة الفراولة بدون سكر و مرة كوب قهوة و اخر اتكنز بار كان عندي للاسف خلص و اخر حبة بالفول السوداني والله طعمه زي السنكرز و الحمد لله و الشكر |
بنات ممكن اشارك معكم؟؟
أنا طولي 158 سم و وزني الحالي 63 و حابه أوصل ل 55 في البداية و بعدين ل 50 إن شاء الله هل عندكم رجيم مشترك؟ ولا كل وحده تتبع رجيم خاص فيها؟ هل تدخلوا كل يوم و تكتبوا ايش أكلتوا؟؟ |
دبدوووبة ..
حلوة فكرة الايدام شكلي بعملها اليوم .. ابوالشباب مو موجود يعني مافي طبخ :) امس الحمدلللللله قاومت الجوع و اخر وجبة كانت الساعة 6 المغرب .. وحاولت ما اكل كثير اليوم فطرت كورنفليكس مع حليب و مشيت نص ساعة .. بس الجووو زففت استغفر الله مايسااعد ابدا مطر و برد و رييح و البيبي كمان معايا :( الغدا يمكن ايدام دبدوبة :) العشاء باذن الله ساندويتش جبنة .. دودي نسيت اقولك فكرة الوزن حلوة ان شاء الله ماننساها بس اختي والله احيهم .. اهلا فيك حبيبتي ... يالله شاركينا و عسى تستفيدي و تنحفي معاااانا لا عادي الموضوع مفتوح السبت تدخلي تكتبي وزنك و بقية الايام اذا حابة تدخلي تكتبي ايش كان ريجيميك واذا نفع عشان غيرك يستفيد من تجربتك . |
دودي لاحظت إنك ما تسوي رياضه؟و هذا شي جداً مهم. أولاً عشانه يحرق السعرات أكثر و بذلك يسرع في نزول الوزن و ثانياً عشان يشد الجسم و خاصة إذا ناويه تنحفي كثير و عشان ما يصير الجلد مترهل بعدين ادخلي اليتوب و سوي ايروبك أو خصصي منطقه معينه ليوم واحد، مثلاً الأثنين البطن. الثلاثاء: اليدين و الكتف، الأربعاء: القسم السفلي و إلخ سوي رياضه أقل شي من 3-5 أيام في الأسبوع و من نص ساعه إلى ساعه و راح تلاقي إن شاء الله فرق في الوزن و الجسم يا عفراء يا حبيبتي من جدك انتي وصلتي ل 47 ؟؟؟ و لسه كمان نازله ترى لما حسبت الBMI حقك من خلال طولك 157 و وزنك 47 طلع 19،1 و هذا مؤشر للنحافه و غير صحي أبداً اقتباس:
نورا حبيبتي خليكي مستمره بالشكل هذا خففي أكل بس لا تجوعي نفسك عشان الحليب و بنتك يعني كل ما جعتي خذي تفاحه برتقاله جزره أي فاكه قدامك، أو كلي زبادي خالي الدسم و استبدلي الحليب بخالي الدسم، و الخبز التوست بالأسمر. كثري سلطه و كلي السلطه قبل ما تأكلي الوجبه.. و اشربي ماي كثير ولا تنسي الرياضه،، حتى المشي نص ساعه كويس و إذا كنتي مثلي من محبي الشاي و الكوفي و لازم أقل شي 3 أكواب في اليوم استبدلي السكر الأبيض العادي بالسكر الأسمر أو السكر الصناعي تغييرات بسيطه بنظام الأكل ممكن يسوي فرق جداً كبير في الجسم |
رشييقاات لا تكسلوا
لوفي ربي يعاافيك عالتشجيع و النصايح.. ايوة كدا يا بنت ... خلييك معانا على طول ربي يجزاك الخير امس فطرت كورنفليكس .. والغدا غديت ابني من ماكدونالدز .. و اكلت كم شبساية معاه و بعدين شفا عدد السعرا عليه قمت وقفت .. و رميت البااقي :) .. عكس كل مرة كنت اكملها و اقول حرام نرميه امس قوويت قلبي و ارادتي و قلت حرااام يتخزن عندي .. و على طول رميته بعدين مشيييييييييييييييت يمكن 3 ساعات رغم الجو العاصف :) و دخلت اشتري بنطلون .. و اتعقددددددددددت :) و قررت و صممت اكمل في الرجيم المهم كملت المشي و روحت اكلت كورنفليكس علغدا و بعدها انشغلت بشغل البيت شغغغغغغغغغغغغل شغغغل. الساعة 8 اتعشيت توست اسمر و جبنة و حليب و بس كملت ششغل .. لين الساعة 10 بالليل خلصت و نمت 11 و اليوم فطرت شكشوكة و خبز اسمر و شاي ... و اصلا صبحت مرريييضة انفلونزا فا شهيتي مسدودة الحمدلله .. بس اشرب سوائل ... ان شاء الله ابدا من بكرة اكثف بالرياضة |
السلام عليكم و رحمة الله و بركاته
هلا بيكم والله في موضوعي ههههههههه لوف انا بس امشي بس ما اعمل رياضة لان وضعي الان يسمح بالمشي افضل من الرياضة ان شاء الله راح اداوم عالمشي الين انزل عن 90 عالاقل و بعدها ابدا رياضة باذن الله عشان يخف الوزن على ركبي و ظهري يوجعني بالرياضة هذي الايام نورا شدي الهمة و لا تكسلي الاحظ انك مرة حاذفة الخضار و الفواكه من اكلك عالاقل خليها خضار لان قلة الالياف اللي في الثمار تجيب امساك انتبهي و هذا يسبب بطء النزول حاولي كل يوم عالغذا تاكلي طبق سلطة ورقيات والله لزيزة مع البلساميك و زيت الزيتون انا كمان صار لي يومين ماخدة برد و مالي نفس اكل لكن الحمد لله عدت على خير الحمد لله وزني رجع نزل و وصل ل 104 زي ما هو مكتوب في التيكر تحت و الف حمد و شكر لرب العالمين اني نزلت اللي طلع من التخبيص الاسبوع الماضي و ما دخلت اليومين اللي راحت لاني كنت تعبانة و اكلي غير منتظم و لكن الخلاصة انه كان تقريبا كل يوم بيشبه اللي قبله يعني الفطور بيض مقلي مرة بالجبن و مرة بالخضار و مرة بيض عيون و مرة سادة و الغدا و العشا دجاج عملت كمية اسياخ و طبختهم و فرزنتهم كل ما جعت طلعت من الفريزر و حميته في المايكروويف و السلطة موجوده في الثلاجة ساعات اكل سلطة و تونة و بس الحمد لله |
| الساعة الآن 06:38 PM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©