|
ما راح اطول الموضوع عليكم
المهم انا نصحت وحذرت من هالمواقع لكن مع هذا المس رغبة من بعض البنات بدخلوها( ما الومهم الوحدة صعبة والعمر يركض) لذلك اقدم لك طريقتي في دخول هذه المواقع واللي بفضلها حماني الله من هؤلاء النصابين ترى بعضهم مراهقين داخلين للتسلية لا اكثر ولا اقل والبعض يدورون علاقات محرمة سواء جسدية او حتى ما سنجرية( جديدة كلمة علاقة ما سنجرية ( تعني باختصار الزنا الكلامي سواء كتابة او محاثة صوتية او كاميرا ويب) شفتم شلون خلوني ادخل عالمهم القذر واعرف بلاويهم اول خطوة واهمها هي صلاة الاستخارة ثم الدعء وعليك بهذا الدعاء كرريه دائما خاصةلما تدخلين الموقع (( اللهم من أرادني بسوء فاجعل تدبيره تدميره واشغله بنفسه)) اللهم اكفنيهم بما شئت واذا ارتحت لشخص ايضا صلي صلاة استخارة حول الاستمرار معه بالموقع واعطائه اي معلومات طبعا بعدها راح تشتركين بالموقع ( وانصحك ابتعدي عن مواقع الزواج المجانية لان اغلبها مراهقين وداخلين للتسلية)) اشتركي بالمواقع اللي بفلوس لفترة شهرين ( شهرين حتى ماراح تكفي) ا |
بعد الاشتراك راح تدخلين الموقع
واغلب المواقع توفرخاصية الرسائل الخاصة من خلالها تتواصلين مع الموجودين بالموقع اهم شي لا تغلطين غلطتي وهي اني وافقت ادخل الماسنجر بحكم انه اسرع في التواصل من الموقع ولان الموجودين دايما يقولون نبي نكلم ماسنجر لان من خلاله اعرف شخصية البنت وطريقة تفكيرها كنت ارفض في البداية واصريت على التواصل فقط عن طريق الرسائل الخاصة لكن محد عطاني وجه فاضطريت قبول الماسنجر وكنت لما ادخل الماسنجر على طول اوضح للشخص اللي ضفته اني ما دخلت الماسنجر الا لاعطيه فرصه يقول اي ظروف لديه سواء اجتماعية او مادية واي شروط يريدها ولتوضيح ما قد يريد السؤال عنه الماسنجر ايضا كان فرصة من خلاله اكشف الشخص لان اغلب من يدخله بعد المحادثة الاولى او الثانية يظهر على حقيقته ويقول باختصار ما يريد اهم شي لا توافقين علىدخول الماسنجر الا بعد التواصل بالرسائل الخاصة يعني بياناتك معروضة في الموقع احرصي على عدم ذكر الاصل القبلي الا من خلال الرسائل الخاصة يعني الشخص اذا ارسل يسأل ويقول انتي تناسبينه من حيث العمر والحالة الاجتماعية والوظيفة يبقى الاصل فاذا سأل عنه اطلبي منه ان يقول اصله في الاول فاذا كان من الاصول التي لا تتزوجين منها اعتذري منه ولا تخلينه يدخل في متاهة الاصول وليش التمييز والتفرقة( هالقضية الحديث فيها مقتول اجتماعيا وان انتي قبلتي الاهل والمجتمع لن يقبلوا) اذا وجدتي من يناسب اصلك اتيحي له الفرصة للسؤال عن ما يريد واجيبي بشكل عااااااااااااااااام يعني اذا طلب شنو وظيفتك مو مشكلة قولي شنو وظيفتك ( مدرسة - طبيبة او غيره) لكن لاااااااااااااا تقولين اين مكان العمل نهائيا قولي مكان العمل راح تعرفه لما يصير نصيب وعن طريق اهلي طبعا الخطوة الثانية راح يطلب منك محادثته ماسنجر لا تقبلي بسهولة قولي الرسائل الخاصة موجودة لكن اذا اصر اقبلي لان بعضهم يريد ان يتعرف على تفكير البنت وشخصيتها من محادثته لها بالماسنجر واذا دخلتي ماسنجر مثل ما قلت لازم توضحين سبب قبولك للماسنجر وقولي مع انك مو مقتنعة ان الشخصية والاخلاق يمكن اكتشافها من خلال الماسنجر لكن قبلت لاعطائك فرصة للاستفسار عن اي شي وللتحدث عن اي ظروف لديك او شروط بعضهم يتواصل معك ثلاثة ايام والبعض اسبوع والبعض شهر لانه يرى ان كلما طول يقدر يتعرف اكثر على شخصيتك ( وان الطبع يغلب التطبع) تدرون مرة من المرات تواصلت مع واحد ماسنجر لمدة اسبوع وكان مبين عليه واحد زين لكني حذفته لان كان يحادثني والمؤذن يؤذن لصلاة العصر انتظرت حتى يستأذنني للصلاة لكنه لم يفعل وطاف وقت الصلاة ( بالنسبة للرجال طبعا) عندها سألته عن السبب ولماذا لم يصلي بالمسجد سكت بعدها رد وقال تعبان شوي وراح اصلي بالبيت؟؟؟؟؟؟؟ على طول حذفته اللي ما يصلي ما فيه خير اكمل معاكم بعدين السالفة الظاهر اطول مما توقعت |
وفيه نقطة مهمة بالماسنجر
لا تقبلين اي ملف يرسله لك لان اغلبهم هكرز يرسلون ملفات تجسس ويسحبون كل المعلومات الشخصية في كمبيوترك اكثر من مرة اضطريت اسوي فورمات للكمبيوتر بسببهم والبعض عنده مهارة فيقدر من خلال الماسنجر وايميلك انه يسرق الايميل واقتصري فقط على المحادثة الكتابية ارفضي المحاثة الصوتية والكاميرا ولا ترسلين له صورتك اذا طلبها وعلى طول احذي اي شخص اذا اعطاك رقم هاتفه او الح انك ترسلين صورتك بالايميل وقولي موضوع الشوفه له طريقة ثانية تضمن لي الامان |
والله اليوم قبل مادخل على موقعي هذا كنت داخله على كذا موقع زواج ومفكره في الموضوع الواحد يقول اجرب وش راح اخسر.....
بس بعد كلامك يا ليدي احس انو الموضوع معقد كثير ونا خلقه مااثق في احد ....... الحين ربي يقول اذا بغيت شي لازم تعمل الاسباب يعيني حنا (العوانس))وش نسوي......طيب وش رايكم في الخطابات .....؟؟؟؟؟ وهل يوجد شاب صاحي (على قولتنا )يروح يدور عند خطابه.....؟؟؟؟؟؟؟واحنا ماجلسنا عند اهلنا الا عشانا مو اى احد نوافق عليه يعني ليش نروح للبشر ونترك الخالق الكريم الجواد ... الله بس يرزقك ياليدي برجل يحبك ويخاف عليك عاجلا غير آآآآآآآآجل |
اقتباس:
تدرين يا مشاعل كلمة مرة سمعتها وخلتني مرتاحة واسوي الشي بدون اي خوف كنت مترددة لما فكرت بالخطابات ونزلت موضوع بهالخصوص في احد المنتديات النسائية طبعا اكثرهم خوفوني لكن وحدة من البنات قالت كلمة (( ليش تخافين من الخطابة؟ سجلي عندها واذا لك نصيب راح تاخذينه واذا الله مو كاتب لك لو تروحين الف خطابة ماراح يصير لك نصيب)) وفعلا الحين يمكن صار لي اكثر من سنتين او ثلاثة( ما اذكر) من خطابة لاى اخرى ولم يكتب الله لي نصيب ليس بسبب االخطابات بل بسبب نوعية الرجال عندها لكن يمكن انتي المجتمع اللي عايشة فيه غير يمكن اللي عند الخطابات ناس زينين حسب الدولة وتذكري انه مافيه شي مضمون سواء بالزواج عن طريق الاهل او الخطابات لكن اللي يهم في الموضوع كله هو ان البنت تحاااافظ على سمعتها وهذا اللي يخليني احذركم من مواقع الزواج |
اكمل معاكم
الخطوة الاخيرة والنتيجة الطبيعية لاي طلب زواج اكيد راح يطلب مني ان اعطيه اسمي الكامل ورقم الهاتف وعنوان البيت ليتقدم لخطبتي الطريقة اللي اتبعها هي ااني أطلب منه دليل لصدقه وهو ان يرسل عبر الايميل صورة للهوية الشخصية والتي يوجد بها الاصل والعمر الحقيقي والجنسية وهي امور مهمة في الزواج( اضافة الى ان من خلالها اعرف اذا هو مجرد مراهق عابث او جنسية اخرى لا يصلح لي او كبير بالسن ) واذا رفض وقال هذي عدم ثقة قولي هذا حرص والمفروض تفخر اني حريصة واني ما اعطي اسمي لكل من هب ودب وانا المعلومات اللي بأعطيك اياها مهمة ( الاسم والبيت والتلفون) ولم اطلب سوى الهوية عبر الايميل واذا قال هذي هوية صعب اني ارسلها بالايميل اخاف يساء استخدامها قولي اشطب بالاسود على اسمك واي رقم والصورة واترك فقط الاصل وتاريخ الميلاد والجنسية واذا رفض شجعيه وقولي انا راح ارسل هويتي وارسلي الهوية بعد شطب المعلومات قبل تصويرها واتركي فقط الاصل وتاريخ الميلاد والجنسية واشطبي على الصورة ايضا وارسليها اذا جاد راح يسوي نفسك واذا مو جاد راح يتحجج بانك ما تثقين فيه وقولي انت ما اثق فيك شلون اعطيك معلومات عني ( اسمي وتلفون البيت وغيره لان بهالطريقة تتخلصين من العابثين سواء مراهقين او نصابين على فكرة صارت في وحدة من البنات قرأت موضوعها في احد المتديات تطلب المساعدة تقول انها وثقت بالرجل واعطته اسمها وعنوان البيت ليتقدم لخطبتها وطلع واحد حقير قام بتهديدها بانها تسوي علاقة معاه او ينشر اسمها ويفضحها ويقول هذي فيها وفيها غير انه هددها انه راح يوقف عند باب بيتهم ويلاحقها واذا احد وقفه راح يقول هذي رفيجتي ولي علاقة معاها هل تحبين تحطين نفسك في نفس موقفها؟؟؟؟؟؟؟؟؟؟؟ صدقيني بمجرد انك تطلبين منهم اثبات الهوية راح ينكشفون على طول محد راح يرسلها الا واحد فعلا جاد ويتحججون بحجج لعد ارسالها (( هذي عدم ثقة -وشنو هذا صايرة محققة شرطة- وانا ما احب المرأة اللي تفرض شخصيتها وتمشي كلامها علي) قولي انا تعبت من النصابين وما لقيت الا هالطريقة اذا عندك طريقة افضل قول طبعا ما عنده الا الكذب ويطلب انك تثقين فيه اعتذري وقولي سمعتي اهم شي عندي وما دخلت الموقع علشان اوزع اسمي وبيانات عني لكل من هب ودب اما موضوع الرؤية الشرعية فله طريقة اخرى لان اغلب اللي بالموقع يرفض الزواج من اي وحدة لم يراها ويطلب مقابلتها في اي مكان وعلشان تثق فيه يقول قابليني في مكان عام هنا احذري لانها طريقة لاستدراجك ويلاحقك ليعرف مكان السكن |
بصراحه اشكرك على جرائتك وطرحك للموضوع
و بالفعل الموضوع شيق جدا و أنا و ربيعتي كانت لنا تجربه في أكثر من موقع و بالفعل كل اللي بالمواقع يبغون يتسلون .......................و طبعا يزنون عن طريق الماسنجر او التلفون المفاجأه هي انك ممكن تلاقي بهالمواقع شخصيات المجتمع المرموقه اللي فاجأني فعلا أنا كشفنا....:11: :11: :11: أنا وربيعتي أكثر الضباط اصحاب المناصب القياديه الحساسه .........:d :d :d ...... لا و عادي ممكن تلقين طبيب و مهندس و غيرهم تستغربين ليش هالناس داخلين هالمواقع.....؟؟؟؟ تسليه فقط لا غير ... و على فكره أكثرهم متزوجين .... و يستغلون مواقعه و مناصبهم علشان النصب على البنات....... طبيعي البنت بتنغر في الريال لو قالها أنا ضابط برتبه( مقدم طيار) في القوات المسلحله......... أو أنا ضابط برتبه (رائد ركن مهندس) في البحرية...... بس أنا مستغربه وين الاستخبارات عن هالنوعيه من الضباط .... الله يعلم.....؟؟؟؟ و غيرهم و غيرهم...................على فكره أنا تأكدت منهم بالفعل أنهم حاملين هالمناصب و هالشهادات....... بس مثل ما قلت لكم كلهم كذابين ونصابين لا تصدقون أي واحد فيهم لان اللي يبغي يتزوج يعرف شو هي الطريقه الصحيحه للزواج و على فكره ما فيه غير طريقه وحده للزواج الذهاب للأهل مباشره بدون لف ولا دوارن أصلا مجتمعنا يرفض التعارف و العلاقات قبل الزواج المثير جدا في سالفتي اني مره دخلت موقع زواج باسم رجل و كنت اكلم الشباب علشان استشيرهم شو رايهم بالموقع و بالبنات اللي في الموقع و اذا عندهم نصيحه لي كرجل لاني ابغي اتزوح بنت من هالموقع ههههههههههههههههههههههههههههههه خدعتهم و قدرت أكشف اغلبهم ما تتصورون وشلون الرجال يتكلمون مع بعض عن البنات اللي في هالمواقع يحتقرون البنات بشكل فضيع واحد منهم قالي هذيل اللي في الموقع (بقر.......بقر.....بقر......) و كلهم كان ردهم يا خوي روح تزوج لك بنت عن طريق الاهل أحسن لك البنات اللي في الموقع قليلات ادب و ما يستحون على و جوهم شفتوا يا بنات كيف طريقه تفكير الرجاجيل فكونوا يا خواتي اذكى منهم و لا تسمحون لهم يخدعوكم او يتسلون فيكم حتى لو كانت هالتسليه عن طريق الماسنجر للاسف الشديد كل الرجال صاروا عارفين انه الزواج نقطه ضعف الحرمه و انها مستعده تسوي اي شئ علشان يتحقق هالحلم فصاروا يستغلون البنات في كل مكان سواء كان في المواقع على الانترنت او في العمل او غيرها فالحذر الحذر يا أخواتي نحن ما لنا الا سمعتنا و البنت اي كله ممكن تأثر عليها و على سمعتها |
اشكرك اختي ليدي سوفت على جرأتك وخوفك على اخواتك في الله
والله اقرأ وانا قلبي يعورني كل هذا صارلك مع هالنصابين لاحول ولا قوة الا بالله أختي انا قصدي انك أنتي تطلبين منه هو رقم هاتف امه او اخته وتكلمينها من مكان عام لتتأكدي انها وحده مو واحد ومافي احد كاذب راح يعطيج رقم تلفون امه اظن فهمتي قصدي ثم انه يا اختي ممكن هذا الشخص النصاب يرسل لكي صورة هويته مدام انه راح يشيل اسمه ورقم تلفونه فراح يكون شي عادي جدااا عنده لأن مافيها بيانات مهمة فقط الميلاد لازم يرسل صورة الهوية كامله وحتى لو يرسل الهوية الكامله لا تثقي فيه لأن الرجل ما يهمه شي بقول هويتي ضايعه واسيء استخدامها ففيه نصابين محترفين وداشرين ما يهمهم اي شيء ابدا وسمعته بالطين اصلا انتبهي لا تثقي باحد حتى لو اذن وقالج بروح اصلي انتبه يا اختي الله يحفظك وانا ارى والله اعلم ان حلي هو الحل الوحيد لمن كان جاد في طلبه وهو ان تجي امه للبيت وتشوفك وترى ان كانت معلوماتك التي اعطيتيها اياه صحيحه او لا ,, وبعدين يجي هو للرؤية الشرعية اذا اراد ذلك يعني في الموقع معلومات سطحية ( اسم القبيلة المهنة الثقافة ..اي شيء سطحي ) واذا يبي المعلومات القوية مثل الرؤية الشرعية او الاسم وغيره تجي امه للبيت كيف ؟ تطلبين منه رقم هاتف امه وقولي له لتزورنا امك وترى بنفسها ان كنت اصلح لك ولا لا او ان كنت صادقه او لا شوفي بعد ما يعطيك رقم هاتف احد محارمه تكلمينها من هاتف عمومي لتتأكدي انها فعلا امرأة وليس رجل وبعدين تعطينها العنوان اذا تأكدتي بطريقتك الخاصة صدقيني مستحيل واحد نصاب يعطي احدا ايا كان هاتف اهله الا اذا كان جاد فعلا في طلبه ويريد التقدم أرجو أن تكون وضحت الفكرة وأسأل الله لكم التوفيق ولا تنسين تذكرين طريقتك اذا طلب منكي الرؤية الشرعية لنطلع عليها ونرى ان كنا نوافقك الرأي او لا |
والله شيء يعور القلب كل هذا يحدث
اللهم استر عوراتنا وعورات المسلمين وآمن روعاتنا وروعات المسلمين ويحفظ فروجنا وفروج المسلمين اللهم آمين يا ارحم الراحمين |
ليدي ماشاء الله عليكي .,,,,
انا بانتظار التكملة ,,,, مااصدق هذا كله يحصل :24: حسبي الله عليهم والله لادعي عليهم ربي يبلاهم في اخواتهم وبناتهم لانهم حقيرين لعابين ,,,, الله لايوفقهم ايش يبغوون ؟... اف والله مرررررررررة مصدوومة ما ادري ايش اقوول :( |
| الساعة الآن 01:01 AM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©