انا فهمتك .. انت نفسك تبتدي على نظافة ومن اول وجديد .. ويبقى القلب صافي

وتبني بدون رواسب في النفوس وجميع الاطراف يبتدوا على بياض .. بس مع زوجة تانية بأه ..

بيتهيألك ..

التجربة الاولى لازم هتعلم جواك في كل حاجة

شوف اللي بينحفر في القلب صعب يروح بسهولة .. حاجة مش بإيدينا .. خصوصا في الحب والمشاعر والالم ..

وكل واحد عنده الاختيار في انه يكمل مع شريكه او ينفصل عنه .. انا بتكلم في وقت مفترق الطرق .. الواحد بيوازن المشاعر دي يشوف مين اللي كفته هترجح

وفي حالتكم الحب هو اللي كفته راجحة عن الالم وتقدروا تتغلبوا عليه

حقيقة ًبعد ما اي زوج ومراته بيصطلحوا او بيرجعوا لبعض ، بعد أي مشكلة كبيرة اه بيكون في بعض الالم

بس بيفهموا بعض اكتر .. وحاجات كتير بتترتب صح ،والمشاعر بتعمق اكتر من الاول وبيكون في حسن تقدير من الطرفين تجاه بعضهم ،، وبيكونوا جربوا الم الفراق ومش عاوزينه تاني

والعلاقة بتنضج كمان جدا جدا .. بيتحول الموضوع ما بينهم لموضوع بناء راسخ قوي

عكس لما تبتدي في حته تانية من اول حجر تااااني !!

على فكرة احنا في الدنيا ، يعني ماتتوقعش انك هتتجوز تاني مثلا وهتلاقي الحياة سعيده جدا وبيس وبتاع... ابدا ابدا .. هتلاقي مشاكل برده .. وهتبدي ترسبات تانية مع نفس واحدة تانية تااااااااااني .. ماهو احنا مش في الجنة لازم هيكون في مشاكل برده .. الشطارة في التعامل مع الترسبات دي ومعالجتها وصياغة قوانين تريح الكل من البداية

يا استاذ اتحاد ان كتر الاحتكاك حتى انت مع اخواتك لازم يعمل مشاكل .. ولكن علاقتكم كصلة رحم ودم مش بتنقطع وبتوجب وبتلزم الوصال من تاني .. اي زوجة بتوصل اهل جوزها بيكون عشان بتحترم جوزها بس ، لكن لما بيحصل احتكاك ومشاكل وتقييد حرية بتحس انها مش ملزمة تواصل لإن لا في صلة رحم ولا دم مابينها ومابينهم .. مش مضطرة ولا كدا هي بتعصي ربها مثلا !

الاساس في العلاقة الزوجية بينك وبين مراتك انكم تواجهوا مشاكلم وتحلوها بدل العند وتنشيف الدماغ وتكون في حلول وسط ، انت تتنازل وهي كمان تتنازل .. والامور هتمشي ،، وتحطوا اسس لبداية تانية مابينكم ، وقواعد

خلي بالك انت عندك احساس العيلة مهم ليك ،، مش عيلتك هي اللي في حد ذاتها مهمة ،، يعني تحاول تفهمها ان دي حاجة بتسعدك واولوية عندك ،، وانت كمان لازم تفهم ان احساسها واستقلاليتها وراحتها اولوية واهم حاجة عندها

وتوفق ده مع ده وهي كمان ..

وتروح تبينلها ان عندك استعداد تتنازل شوية وهي كمان لازم تتنازل في المقابل .. وكبداية تعمل حاجة توضح حسن نواياك .. وهي هترتاح وتلين دماغها

هي دي الدنيا هنعمل ايه ؟؟!! مافيش حد ماشي بسلاسة للأخر ،، والجواز حياة مشتركة مش حياة شخص واحد .. فمفيش واحد بياخد الغطا بتاعه وينام بيه لوحده .. لأ بيستغنى عن جزء منه لشريكة في الفراش !

ولعلمك مشاعر الحب دي هي اللي هتخليكوا تستمروا مع كل مشكلة .. وتعدوها بسلام .. والقواعد في كل مرة بتتحسن وتتحول لحد ماخلاص كل واحد يوصل للدرجة اللي مش محتاج فيها يشرح كتير ويريح التاني على طول .. هتوصلوا للحاجات اللي تريحكم انتوا الاتنين وبس .. لا عيلتك ولا عيلتها مهمين للطرف التاني من المعادلة ، دول على زوال وانتم باقيين مع بعض ، وفي النهاية بيتقفل عليكم انتوا الاتنين لوحدكم باب واحد

وبكرة اخوك ينشغل وهو شخصيا مش هيجيلك كدا .. وزوجته هتحب يبقى ليها خصوصية .. بعد كم سنة هتلاقي كل عيلتك دول مشغولين جدا بحياتهم برده .. ومش هيبقالك الا مراتك واولادك

اومال المغتربين يعملوا ايه ؟!!

في حاجة كنت عاوزة اقولهالك اخي اتحاد تكملة لكلامي خاصة بشخصيتك انت

انا اعتقد انك شخص حبوب جدا ..هادئ مسترخي صاحب نكته وحلو الكلام .. والقعدة معاك ماينشبعش منها ابدا.. ماشاء الله يعني.. وانسب انسان تتحمل مراتك في عصبيتها مهما عملت الا الصوت العالي عدوك اللدود .. شوفت سبحان الله :d

بس في المقابل في حاجات لو تظبطها هتكون انسان رائع وخلافاتك مع زوجتك هتقل

من ابسط حقوق القوامة هي الصرف .. واي ست مهما كانت تملك الملايين .. تحب لما ترتبط براجل مكتمل الرجولة مهما كانت حالته المادية

يكون مسؤول عنها .. ويجيبلها هدايا من وقت للتاني .. على قد الماديات اللي معاه بس يفتكرها بالحلو

اي ست طبيعية في الظروف العادية والطبيعية ... لو أعطت لزوجها جزء من مالها بانتظام و خصوصا بطلب منه ...

بيفقد من جواها معنى واحساس كدا .. مش عارفة اوصفهولك .. يمكن بيفقد جزء من رجولته في نظرها

خلي بالك .. من الحتة دي

عادة الراجل اللي بجد ، هوملك نفسه وبيته رأيه صارم قوي .. قراراته واموره مش متأثره بأي حد لا بعيلته ولا بأصحابه .. صاحب فكر .. ليه رؤية واضحة عن مستقبله وحياته ... تعيش (تحت جناحه ) انثى يقوم هو بكل شؤونها .. !

ده اخر كلامي وربنا معاك