|
الأخوات صريحة جدا وزرقة البحر ..
والله العظيم ما أدري ويش أقولكم .. كلامكم يثلج الصدر ويقوي العزيمة! أختي صريحة جدا .. بالنسبة لإقتراحك بأني أتزوج زوجة ثانية على زوجتي من غير أن أطلقها فما أدري ويش أقولك ماديا أي نعم أقدر أفتح بيتين ولكن عاطفيا ما أقدر أحب ثنتين .. وعلى قولهم رحم الله أمرؤ عرف قدر نفسه، أنا أنسان شخصيتي كذا ما أقدر أعطي كل ما عندي الا لإمرأة واحدة .. ممكن كرجل وبغريزه جنسية أقولك والله خوش فكرة تغيير لكن هذي مسؤولية أكبر من أنها إشباع غريزة وشخصيتي تمنعني من أني أقصر في مسؤولياتي لأني محاسب عليها يوم اللقاء الأعظم. وبالإضافة لكل هذا تخيلي تطلع الثانية مثل الأولى كيف راح تصير حياتي مع ثنتين من طينة وحدة؟؟ أما بالنسبة لتحليلك بأني ممكن أتزوج من أخرى وتطلع نفس زوجتي الحالية مستغلة طيبتي .. فقد حذرني أهلي من ذلك لدرجة أنهم قالوا لي ترى لو تزوجت وصار لك نفس الشيء زوجتك الأولى راح تشمت فيك هي وأهلها .. قلتهم يا جماعة أنا ما نبداخلن حرب عشان يهمني شعور زوجتي الأولى وأهلها .. أنا يوم أتزوج ثانية أكيد طريقتي بتختلف معها ولكن ما تزوجتها عشان أحاسبها بما جرى لي من زوجتي .. يعني أكيد بأستفيد من تجربتي السابقة ولكن موبشرط أنه يفشل زواجي ثاني مرة لأني طيب زيادة على اللزوم على حد قولهم. هذا أنا خلقت كذا أخاف أظلم الناس وأحب أنهم يعاملوني بنفس الطريقة .. ما أحب أقسو على أي شخص فما بالكم لو كانت زوجتي!! أيه أقدر أقسو بس كلمة حلوة تخليني أسامح ودايما أحس في داخلي شي يأنبني يقولي ليش كذا هذا مو طبعك ؟؟ وبعدين القسوة تولد الكراهية وأنا ما أحب أني أعيش مع أحد حاقد علي في داخله لأني قسيت عليه. ممكن من عيوبي هي العناد على الحق .. فلو أتخذت قرار وأنا على علم 100% أنه صح فمستحيل أقتنع أبدا الا في حالات نادرة .. وعنادي دايم ما يجي في الوقت الضايع على قولهم. وعيب ثاني هو أني أسامح لكن ما أقدر أنسى أنه شخص معين جرحني. فلما أفكر الحين وتجي زوجتي على بالي دايم أفتكر كم مرة قالت وقالت فيني وجرحتني يعني وصلت الى مرحلة ما أقدر أفكر أنه ممكن أقدر أعيش معاها تحت سقف بيت واحد مرة ثانية .. كانت على الدوام تختلق المشاكل وحتى لو مافي مشكلة تطلعها من تحت الأرض .. يعني مثلا حصلت كم مرة تكون هي نايمة مع بنتنا بدري لأنها دايم تصحى اخر الليل وأكون أنا مافيني نوم فأجلس أناظر التلفزيون أو أقرى وتروح علي نومه في غرفة المعيشة (الصالة) .. يوم أصحى الصباح اللي زوجتي مادة بوزها (يافتاح ياعليم يارزاق ياكريم) .. أسالها: ماشاء الله متى صاحيين؟؟ ترد علي من غير حتى ما تناظرني (أنا أصلا عارف من ملامح وجهها أنها زعلانة لكن أنا ما سويت شيء يزعل) : ما لك دخل؟ من يوم ما ترد علي ردود مثل هذي: أطنشها! (كنت في بداية الزواج أسألها: شفيكي زعلانة .. ترد رد جاف: مافي شيء خليني في حالي.) المهم .. يوم أطنش هي تفتح الموضوع من نفسها وتقولي: ليش نايم في الصالة .. ماتعرف أنه فيه شيء أسمه غرفة نوم؟ أقولها: لا بس كنت مضيع الطريق .. الظاهر أنك تبين مشاكل اليوم ؟؟ شفيها لا راحت علي نومه في الصالة .. كفرت يعني .. أنت قلتي داخلة أنام قبل لاتصحى البنت جيت يمك قلتي مافيني حيل خلني أنام لأن البنت راح تصحى وانت ما عليك حتنام طول اليوم .. يعني ويش تبني أسوي أنام غصب! تقولي: لا المفروض تنام وقت مانمت مو لازم تسهر! فأخرج عن طوري وأقولها: تحمدي الله سهران في بيتنا ولا تبيني أروح أسهر برى أحسن شرأيك؟ يعني أشياء من هذا القبيل .. مرة متصل عليها أقولها: أنا رايح مطعم فلان (أعرف أنها تحب أكل هالمطعم بالذات) شتبون تأكلون؟ تقولي: لا أنا ما بي أكل شبعانة. يوم أدخل معاي الأكل ونجلس: هي ما تأكل شيء بس لقمة لقمتين على خفيف. فمرة حاولت أستخف دمي وقلت لها مبتسما (باين أني أمزح): ماشاء الله ماتبين وشبعانة ومخلصة الأكل كله أجل لو كنت شبعانة ممكن تأكليني أنا (على فكرة أنا اللي مخلص الأكل وهي يالله أكلت لقمة لقمتين). تخيلوا ترمي الملعقة وتقوم تبوز طول اليوم. وصارت كل ما أشتري أكل من مطعم ما تجلس تأكل أقولها: تعالي كلي تقولي لا أخاف أكلك أنت وبنتك بعدين. أكون أناظر تلفزيون ومندمج مع أخبار ولا أي شيء .. يتصلون أهلها حطي قناة مدري وشو .. تمسك الريموت وتقلب ولا كأني متابع شيء .. ويوم أقولها رجعي القناة مثل ما كانت تقولي: انت أناني وتحب نفسك. أقولها أنا طول اليوم في شغلي أو أقضي مشاويري حرام يعني أكون أحب نفسي على قولتك وأتحكم بالريموت ساعتين قبل النوم .. وبعدين التلفزيون عندك طول اليوم جات علي أنا! (يعني أقدر أعمل مثل أي رجل وأفرض سطوتي عليها بالقوة لكن أحاول أن أسايرها وأقتل المشكلة قبل لا تولد). يوم شفت أنه الموال كل شوي ينعاد .. أروح وأشتري تلفزيون ثاني وأحطه في غرفة الضيوف .. ماعجبها العجب تقولي: حتى في البيت ما تبي تجلس معنا في نفس المكان! أشياء كثيرة صحيح أنها تافهه ولكن من كثرتها تسبب فجوة في العلاقة وصلتني الا أني أكون داخل البيت صنم ما أنطق بأي كلمة عشان لا تخلق لي مشكلة من تحت الأرض. الحين رغم أني أحن بعض أحيان لنكدها الا أنني لولا فراق بنتي والبعد عنها فأني مرتاح راحة ولا بعدها راحة .. أنام في المطبخ في البلكونة .. ولا حد يقولي شيء. صحيح الأكل ماله طعم لحالي لكن البال مرتاح. أما عن بنتي وحضانتها قبل ماتبلغ السابعة فأنا على يقين أنه ولا أحد حتى والدتي الله يطول في عمرها ممكن يعوض بنتي حنان أمها ولا أفكر أخذها غصب مثل بعض الأزواج اللي يستخدمون الأبناء كوسيلة للأنتقام فمشكلتي مع زوجتي لم ولن تسلبها حقها في الأمومة الا لو رأيت منها التقصير في ذلك. وبخصوص نفقتها لو يبي يحكم القاضي 500 بأعطيها 1000 .. من لي أنا غير بنتي؟؟ أما الفلوس فهي وسخ دنيا وماتسوى بسمة أشوفها ترتسم على محيا بنتي! الان هي حاضري وبيكون لها على الداوم أغلى الأماكن في مستقبلي. ورجائي منكم جميعا أن تدعو لبنتي بأن تنشأ نشأة صالحة وتكون قرة عين لنا و يسعدها ويحفظها من كل مكروه ويجازي كل من كان سبب في فراقي لها أن شاء الله .. امين امين امين يارب العالمين اللهم رحمتك أرجو فلا تكلني الى نفسي طرفة عين .. اللهم أنك تعلم أني قد تهاونت في أخذ حقوقي ممن ظلمني لأني على يقين بأنك شديد العقاب ... يارب أرني فيمن ظلمني عجائب قدرتك أنك تعلم مافي نفسي أنك أنت علام الغيوب. حسبي الله ونعم الوكيل واستغفر الله واتوب اليه. |
اقتباس:
اقتباس:
وشتفسر زعلها من تصرفك ؟؟ شمعنى لمن تقولك ماتعرف شي اسمه غرفة نوم !!! معقوله ماعرفت ؟؟؟ معناته تحبك وتبيك قريب منها !! لو ماتحبك او تكرهك ماهتمت !!! تنام وين ماتنام !!مو تزعل لانك مانمت بغرفة النوم ؟؟ يعني المفروض ماتزعل وتفرح انك تهمها !! اقتباس:
صدقني تصير في كل بيت وبصراحه المفروض تضحك من كلامها وتبين لها انك تضحك وتلح عليها انها تاكل وتقولها ترى والله ماامد يدي على الاكل لو ماكلتي خليك رومنسي شوي ترى الحريم كلمه تجيبهم وكلمه توديهم اقتباس:
وخاصه لمن صرنا متفاهمين يعني عادي اغير القناه سواء كان الاتصال من هلي او كان مسج في جوالي من صديقتي او اختي وتقولي حطي على القناه الفلانيه يعني شي عادي وخاصه لمن يكون فيه تفاهم وطبعا انا ماقلب القناه على طول اعطيه خبر وهو يشوف بعد معاي وكثير صارت يجيني مسج على الجوال واقراه واقوله وافر القناه على طول او يتصلون هلي او خواتي ويقولون لي اتابع شي واقوله بسرعه في شي في القناه الفلانيه واحيانا انا اقوله غير القناه يقولون لي فيها شي يعني عاااادي جدا وانا بعد لمن اكون مع زوجي لو شفت شي مهم اتصل على هلي اقولهم شوفوا القناه الفلانيه واحيانا اطرش مسجات لصديقاتي وخواتي واقولهم تابعوا القناه الفلانيه صدقني امور عاديه ماتعتبر مشكله وانا اشوف تصرف زوجتك طبيعي لانها ماخذه راحتها معاك والواحده فينا لو تبي زوجها تكلمه تناقشه تزعل من تصرفاته لانه يهمها !!! بس لو ماتحبه ولا عاد يهمها ماتكلمه ولا تساله وين رايح ومن وين جاي وليش مسوي كذا وليش ماسويت عااادي عندها .... اكل والا لا .... نام وين مانام ماتهتم لانه ولا شي بحياتها !! صدقني المشاكل اللي تتكلم عنها انا للحين اشوفها تافهه !!! انا مريت بمشاكل مع زوجي اسوأ ومن اللي تسويه زوجتك انا اعتبر تصرفات زوجتك ولا شي !! وصارت لي تدخلات بحياتي اسوأ من تدخلات ام زوجتك !! لو قلت لك اني وصلت معاهم حتى الاكل مااكله ماعاد ابي اشوفهم او احتك معاهم ومره صارت لي مشكله كالعاده تدخلات ام زوجي وبناتها طبعا هم يفسرون الاحترام للكبير وحسن المعامله وعدم الرد انه ضعف ويتمادون فطلبوا شي اسويه مو من حقهم وكان اجباري علي ورفضت مع انه لو فيه كلمه طيبه عادي عندي المهم زوجي سلبي وورى امه على طول وقام يامرني وقالي امي قالت ولاتناقشين واسمعي كلامي على طول قلت له كلامك والا كلامها !! المهم تطورت المشكله ولان الكل ضدي ومحد قال كلمة حق قلت خلاص انا مالي قعده معاك بروح بيت هلي وتفاهم معاهم انا مالي قعده معاكم زوجي لان بس ام زوجي قالت مافي روحه بيت هلج قلت لزوجي يوديني مارضت امه رحت اتصل لبيت هلي سكرت التلفون وسحبت فيشة التلفون قلت شنو هالحركات وين احنا في معتقل والا وين عايشين!! قالت لي ماتروحين حتى ابواب البيت قفلتها وقالت مافي طلعه ومافي حتى تروحين تدرسين كل هذا وزوجي ساكت ومو قادر يتصرف وقتها قمت اصيح ورحت غرفتي وانا احلف واقول مصيري بيجي وقت وبكلم هلي واستحاله اقعد عندهم وحاول زوجي يكلمني بس كنت اصيح واقوله اطلع من عندي روح للماما انا مالك شغل عندي وحركات العصابات هذي لاتتوقع اني راح اسكت عنها وراح اقول لابوي ( زوجي يخاف من ابوي وحتى ام زوجي وهاي اللي كان مخليها تمنعني من الاتصال ويمكن لانها تعرف اني اذا هديت واحسنوا معاملتي راح انسى ) وفي قمة قهري سبحان الله يجون بيت هلي لعندي زياره تخيل بدون سابق انذار !!!!!!!!! ام زوجي وزوجي ارتعبوا استغربوا شكوا اني اكون كلمتهم رغم ان ماعندي أي وسيله اتصال ووقتها ماكان فيه جوالات واستقبلت ام زوجي اهلي وهم مرتبكين وامي وابوي يسلمون عليهم عادي ودخلت ام زوجي غرفتي وهي مرتبكه وتقولي وهي تحاول تبتسم وتكلمني بكل لطف ابوج وامج موجودين يبون يسلمون عليج طالعتها وانا مو مصدقه قلت بقلبي سبحان الله يمنعوني من هلي وهلي يجون عندي بنفسهم غسلت وجهي وقلت اللحين بانتقم منهم بشتكي لابوي منهم واقوله شسووا فيني!! ودخل زوجي وعاد لي نفس كلام امه وانا مارديت على أي واحد وطلعت لاهلي وانا كلي قوه وسلمت عليهم ولمن شفت شلون كانوا فرحانين بشوفتني وشفت شلون الارتباك بوجه ام زوجي وزوجي فكرت بلحظات وقلت اكلمهم واسويها مشكله بين هلي وبينهم واكبر السالفه والا اسكت خاصه ونية هلي من الزياره الاجر وصلة الرحم واكيد لو تكلمت بتصير مشكله وبتنقطع زيارات هلي لاهل زوجي وبتصير قطيعه بينهم في الاخير قلت ماراح اكلم هلي وعلى طول قمت اضيف هلي ومن ضمنهم ام زوجي وزوجي واسولف معاهم واضحك مع الكل وكأن ماصار شي وطلعوا هلي وهم مستانسين ويدعوون لي بالتوفيق وام زوجي مستانسه وفرحانه بس اول ماراحوا هلي رحت غرفتي بحجة اني للحين زعلانه زوجي ممكن حاول يتقرب بس امه سكتت يوم ورجعت ثاني يوم ناس تفكر ان التعقل والاحترام ضعف ماعرف شلون تفكير هالناس ماتعرف اني سكت وانا في موضع قوه وهلي وسندي عندي ماتعرف ان هذا يسمونه العفو عند المقدره !! يفسرونه شي ثاني ضعف او ماعرف وشو !!! وطبعا زوجي بتاثير امه رجع مره ثانيه وطبعا صارت مره ثانيه تدخلات ومشكله جديده وقدرت اكلم هلي واروح عندهم زعلانه لان لو على زوجي ماراح يوديني بيت هلي وامه ماراح ترضى يعني لازم اطلع بدون ماشور زوجي لانه ماراح يرضى يوديني وبنفس الوقت ما يقدر يكفني شر امه وهله ويحميني !! المهم رغم اني وزوجي ماكنا متفاهمين كثرة المشاكل خلتني واياه نكره بعض ودايما نختلف وكل واحد يندم انه تزوج الثاني وكل واحد يقول انا صابر علشان اليهال ودايما كنت استفزه في قمة غضبي خاصه لمن انقهر اقوله لو رجال طلقني ليش صابر علي وكنت جاده وربي في هالكلمه كنت انوي الطلاق يعني شسوي اعيش مع ناس حياتهم كلها مشاكل وزوج سلبي والمشاكل اثرت علينا ومانحس لبعض باي مشاعر يمكن ماتمنى له الشر بس ماحبه مايهمني اكل ولا ماكل نايم والا صاحي مسافر والا موجود عاااااااادي ماعندي له أي مشاعر بس سبحان الله من استقريت في بيت مستقل وبعد عشره جديده وحياه جديده استقرت فينا السفينه وبدى كل واحد يفهم الثاني ويعرف حقيقة مشاعره وبعد سنوات من سكني انا واياه في بيت مستقل .......الحمدلله!! ....الله عوض صبري خير زوجي تغير صار مايستغنى عني وانا فعلا صرت احبه واحس انه جزء مني دايما اقوله احس انك شخص ثاني غير اللي تزوجته فعلا متغير صاير طيب وحنون ومتفهم وكل شي فيك حلو وهو دايما يحلف لي انه من زمان يحبني ولو مايبين بس طبعا انا ماقدر احلف لاني ماقدرت احبه زمان ولا حبيته الا لمن استقليت في بيت بروحي ومع العشره معاه عرفته وحبيته واوقات كثيره يتاسف مني ويستسمحني على اللي صار بس انا ارد امتدحه واقوله انت بعد عاقل وتصرفك حكيم انا ياما طلبت منك الطلاق ورغم انك تسمع كلام امك في كل شي الا انك في مسالة الطلاق ماسمعت كلامها وهذا يدل على تصرفك الحكيم وتعقلك وانك ماتهورت وخليتني على ذمتك الين شفت منك الجانب الطيب وكلام كثيييييييييييير نقوله لبعض وكله حب ومشاعر رقم اني والله العظيم لمن رجعت له اخر مره وفي بيت مستقل ماكان عاجبني كنت اقول لو طلقني كان احسن ماكنت متخيله انه راح يتغير ابدا ولا كنت متخيله اني في يوم راح احب زوجي !! وانا لو بسوي مثلك يا خوي Fahacci واكتب كل مشكله لي مع زوجي واهله والله العظيم مايكفيني مجلد كامل من المشاكل اللي مريت فيها مشاكل غريبه وعجيبه وسكوت وتنازل من قبلي لمن اشوف الانكسار فيهم كنت اسوي باصلي وبتربيتي مع ناس ماتعرف شمعنى الاصول وكل مره اقول بصير مثلهم وبنفس طباعهم الا اني ارجع واسوي باصلي ماقدرت اسوي مثلهم نفسي ترفض الدناءه لكن في الاخير الحمدلله انا مرتاحه ومتوفقه وسعيده مع زوجي وابو عيالي حتى ام زوجي زوجي ماعاد يسمع كلامها ويتاثر فيه وهي تغيرت كل شي تغيرت والحمدلله والدور والباقي عليك وعقبال ما تستقر وبالتوفيق اختك صريحه جداً |
الأخت صريحة جدا ..
أولا شكرا عى ردودك واهتمامك .. علقتي على زعلها من نومي في غرفة نوم بقولك: طيب شتفسر كلامها ؟؟ وشتفسر زعلها من تصرفك ؟؟ شمعنى لمن تقولك ماتعرف شي اسمه غرفة نوم !!! معقوله ماعرفت ؟؟؟ معناته تحبك وتبيك قريب منها !! لو ماتحبك او تكرهك ماهتمت !!! تنام وين ماتنام !!مو تزعل لانك مانمت بغرفة النوم ؟؟ يعني المفروض ماتزعل وتفرح انك تهمها !! يا أخت صريحة جدا .. اللي أعرفه أنه فيه طرق وأساليب أخرى للتعبير عن الحب وبعدين أنا موجود وسط البيت ما نمت برى وتمد بوزها شبرين .. ايه معاك أنه حب ولكن من نوع اخر الا وهو حب التملك .. هي ما أمتلكتني أنام متى مابغت وتحاسبني يوم تروح علي نومه في صالة ولا مطبخ ولا أي مكان. يعني لكل شخص رأيه في هالموضوع وأنا أحترم رأيك الا أنني بهذه الطريقة حتى لو قلنا أنه بدافع حب منها فأنها تحسسني أني في سجن مالي حرية حتى في بيتي! وفي سالفة الأكل وتصرفها .. تقولين: عاادي تصرفها يصير ويمكن هي حساسه شوي صدقني تصير في كل بيت وبصراحه المفروض تضحك من كلامها وتبين لها انك تضحك وتلح عليها انها تاكل وتقولها ترى والله ماامد يدي على الاكل لو ماكلتي خليك رومنسي شوي ترى الحريم كلمه تجيبهم وكلمه توديهم طيب شرأيك أني أول مرة قمت الى مكان جلستها ومعي في معلقة شوية أكل وأقولها لازم تأكلين أقل شيء هذي ولا ما راح أكل .. الا يوم أوصل لها تدفع المعلقة وانتشر الأكل على الأرض .. تقول: لا حول ولا قوة الا بالله والله ما نظفته أنت السبب نظفه أنت؟؟ أما بخصوص قصة التلفزيون .. ففيه شيء أسمه أحترام الاخر مو تجي تقضب الريموت وتقلب من غير حتى أستئذان وبعدين لو مشينا سالفة الأستئذان ... فيه أسلوب في الكلام يعني المفروض الشخص ينتقي ألفاظه .. كل ما قهرني في المسألة أنها أتهمتني بالأنانية لأنه طريقتها في أخذ الريموت ما كان فيها أي تقدير لي .. أنا عن نفسي يوم أدخل البيت وهي تناظر التلفزيون وأبغي أقلب القناة أسألها: متابعة هالقناة .. وبعدين: أقلب في القنوات. وحدة يوم أقولها والله العمل والدراسة مع بعض تعب وأشتكي لها أن علي أشياء كثيرة لازم تخلص مثلا خلال شهر .. تقولي أجل بطل دراسة انت عمرك 29 وتدرس والله لو أنا منك أستحي كفاية عليك الماجستير وعندك وظيفة شتبي في الدراسة! يعني أنا أبغيها تشاركني همومي وتوفر لي جو أقدر أركز فيه وتخفف شوي من نكدها .. فبدل ما تدفعني للأمام تزيد همومي هموم. عالعموم .. مثل ما قلت هذي توافه أمور ولكن والله أنها كثيرة وأنا ما قلتها الا من باب الذكرى لا الشكوى وأقسم بالله يوم أتذكرها ما عرف أضحك ولا أبكي من سخافتها.. بالطبع لها تأثير في حياتي! ما أشتكي من هالأشياء أنا أشتكي من تدخلات أم زوجتي أما زوجتي فهين كنت على أستعداد أتحملها لكن مثل مايقول المثل رضينا بالهم والهم مارضي فينا. |
شوف ياأخي المواقف اللي كرتها مع زوجتك ، بصراحة أنت الغلطان فيها وأنت اللي تعاند..
في هالنقطة هذي بس راح اكون مع زوجتك ..!! كل الأزواج والزوجات يصير بينهم هالأشياء ، أنا لو زوجي ينام في غرفة ثانية راح أنجن .. ترى الحركة خطيرة وقوية جدا ..انتبه ..! وحكاية القنوات ، ياأخي طيب هي موقصدها تعاندك ، ياأخي خليك سهل ولين .. وحكاية الجوال ليش ماتشتري لها جوال ؟! ، ليش هي وش ناقصة عن الناس ؟! الحين الشغالات والسواويق معهم جوالات وزوجتك لاء.. والله حرام ..!!! بصراحة بديت أتراجع عن نصحك بالطلاق ، شكلك حتى أنت فيك حقك ..وتعاملها بدونية وتحرمها من اشياء سهلة وبسيطة!! واشهد الله إني مانصحتك بالطلاق إلا بسبب تدخل أم زوجتك ، وليس لهذه المواقف العادية اللي تحصل لك مع زوجتك .. عموما تريث أخي وراجع نفسك ، ولعل هناك حلولا أخرى غير الطلاق .. ومن اليوم فصاعدا لن أنصح أحد بالطلاق إلا بعد سماع الطرف الآخر .. صعب جدا أن تحكم على قضية بسماع طرف واحد ، فمهما كان لن تظهر الحقيقة كاملة وبالتالي لن نستطيع الحكم بحيادية وواقعية .. |
الأخت الفاضلة زرقة البحر .. شاكر لك على تواصلك أما بعد ..
تقولين: " شوف ياأخي المواقف اللي ذ كرتها مع زوجتك ، بصراحة أنت الغلطان فيها وأنت اللي تعاند.. في هالنقطة هذي بس راح اكون مع زوجتك ..!! " طيب ولنفترض أني أنا غلطان .. أول شيء أنا لم أدعي الكمال لأنه لله وحده ولكن وجهة نظري تختلف وفيه مواقف سردها غير كافي ولو أنك عشتي المواقف اللي ذكرتها رغم أنها تافهه الا أنها تترك أثر في نفسية الطرفين ! تقولين: "كل الأزواج والزوجات يصير بينهم هالأشياء ، أنا لو زوجي ينام في غرفة ثانية راح أنجن .. ترى الحركة خطيرة وقوية جدا ..انتبه ..!" طيب عادي وسواء كنت أنا أو هي غلطانين .. لو أني نايم في غرفة من باب العناد كان أقولك معها حق لكن الواحد قد ينعس وهو مو داري شفيها لو صارت مرة مرتين .. حرام يعني! لو ركزتي فيما كتبته راح تلاحظي أني أحاول أني أنام معهم ويوم أنه مايجيني نوم أحاول أن أداعب زوجتي فتردني لأنها لازم تنام عشان البنت راح تصحيها بدري .. أنا مازعلت منها لكن مافيني نوم .. أروح أناظر تلفزيون لين وما أدري عن نفسي الا وأنا نايم!! وبعدين انا نايم داخل البيت شفيها يعني .. والله ما أشوف فيها شيء خطير لهالدرجة. تقولين: " وحكاية القنوات ، ياأخي طيب هي موقصدها تعاندك ، ياأخي خليك سهل ولين .." فيه شيء أسمه احترام أقل شيء تقولي قبل ماتغير ولا أنا كرسي في البيت مالي قيمة .. وفي النهاية لا تكلمت قالت: أناني وتحب نفسك. تقولين: "وحكاية الجوال ليش ماتشتري لها جوال ؟! ، ليش هي وش ناقصة عن الناس ؟! الحين الشغالات والسواويق معهم جوالات وزوجتك لاء.. والله حرام ..!!!" مرة ثانية أنا ذكرت بانه في أول زواجنا رفضت .. وبعد ماجات البنت كل مايطلع جوال جديد أشتريه لها وأنا أخذ جوالها القديم وعاد تخيلوا كم جوال نوكيا جديد يطلع في السنة. تقولين: "بصراحة بديت أتراجع عن نصحك بالطلاق ، شكلك حتى أنت فيك حقك ..وتعاملها بدونية وتحرمها من اشياء سهلة وبسيطة!!" أحترم رأيك وللمرة الألف أنا ماقلت أني ملاك .. كل أنسان فيه عيوب أما المعاملة فالله وحده عالم فيها ما يحتاج أعيد وأزيد أي نعم في بعض الأحيان أمتنع عن وليس أحرمها من الأشياء البسيطة والسهلة لأني تنازلت لها عن الأشياء الأصعب وماعمري حسيت بتقدير منها. تقولين: "ومن اليوم فصاعدا لن أنصح أحد بالطلاق إلا بعد سماع الطرف الآخر .. صعب جدا أن تحكم على قضية بسماع طرف واحد ، فمهما كان لن تظهر الحقيقة كاملة وبالتالي لن نستطيع الحكم بحيادية وواقعية " أقولك والله ودي تدخل زوجتي المنتدى وتسمعون منها كل ماعندها ولكن ماباليد حيلة. أختي زرقة البحر .. الزواج شراكة والمفروض حد علمي أنا أستحملها وأكيد كوني بشر غير معصوم من الخطأ هي المفروض تستحملني أما أنه كل ما صارت مشكلة تافهه راحت بيت أمها .. وتقوم أمها تغلط علي وتقول فيني وتشتم مع أحترامي مو أسلوب وماصارت عيشة. عالعموم .. المواقف اللي ذكرتها ليس لها علاقة بالمشكلة والمشكلة أكبر من أشياء أكيد تصير مع كثير من الأزواج على أختلافها معتمدة على الزوجين ومدى وعيهم بتحجيم المشاكل. |
الله يصلح حالك أخي ..
ويوفق بينكما .. أعرف جيدا أن التدخلات الخارجية أكبر بكثير من الخلافات الداخلية .. ماأدري وش اقول ..؟! ،غير : الله يصلح زوجتك ويردها لك ردا جميلا ، ويكفيكما شر أم زوجتك.. |
والله أنه يوم صارت مشكلتي الحالية ..
أم زوجتي متصلة على أمي وتقولها: "أنت السبب .. المفروض يوم جيتي تخطبين تقولين لي أنه ولدك ما يسمع الكلام" فيه عبارة أوضح من هالعبارة توضح مايريدونه ومايصبون إليه! |
عندنا نظام معمول فيه في البلد وهو انه مايطلق اي شخص زوجته ولا تقبل اي قضيه في المحكمه
الا بعد المرور على الاستشارات العائليه ومحاولة فهم القضيه ودراسة الحاله ومحاولة الاصلاح وحل المشكله فاذا انحلت بكتابة شروط مثلا ويلتزم فيها الاشخاص والا فتتحول للمحكمه بعد كتابة تقرير من الاستشارات العائليه عن الحاله وتعتمد عليه المحكمه فانت ليش ماتروح للاستشارات راح يسمعون اقوالك واقوالها وبعدين يجمعونكم مع بعض ويسوون لكم حل يرضيكم واذا ماعجبتكم حلولهم فعندكم المحكمه اخر حل اقتباس:
وان بنتك ماتسمع الا كلام امها !!! ترى كان بيكون لنا موقف ثاني!!! بس حابه اقولك عااااااااااااااااااااااااااااادي ياخوي تصيييييييييييييير انتوا متزاعلين بتسمع كلام اكبر من كذا !!! طول بالك يا خوي تراك مو اول ولا اخر واحد بس يمكن للحين مافهمت الحياه وماعندك خبره بمسائل الزواج يعني انا بنفس عمرك بس الفرق اني تزوجت صغيره وخضت معارك الحياه وانا توني عتبر في زمنا هذا طفله !!! بس الحياه علمتني كيف اواجهها وعلمتني اشياء كثيره ..... فلا تعتقد انك انت بس اللي تعاني في مثلك كثير ولمن خسروا قالوا احنا استعجلنا بس شنسوي ماكان عندنا خبره بالحياه !!ومحد وجهنا !! وهذا احنا نوجهك !! و احب اشكر اختي زرقة بحر على محاولتها مساعدتك فهي مثلي حابه تساعدك بما مرت فيه من خبره في حياتها وكذلك جميع الاخوه ممن شارك في موضوعك وخلاص يا Fahacciارجع اقرا الحلول اللي كتبناها لك وشوف وشو اللي يناسبك واستخير وتوكل على الله وماعليك من الكلام اللي تسمعه نبي منك تطبيق ... عمل... مانبي نسمع كلام وبس !! وكفايه عند وسكوت !!! شد حيلك تصرف ...... ولا يهمك الكلام اللي تسمعه ويالله نبي نسمع افعال واخبار زينه وبالتوفيق |
الأخت صريحة جدا ..
قسم إصلاح ذات البين فكرت فيه أنا ولكن صعبة أحكي لهم حكايتي علني وهم يعرفون من أنا ومن أي عائلة .. يعني فيها إفشاء علني لخصوصياتنا أنا وزوجتي .. أضف الى ذلك أنه أمها أكيد راح تجي وممكن يصير مالايحمد عقباه قدام الله وخلقه تغلط علي وفي النهاية سوف يقع الطلاق. والان وبصراحة متناهية .. من يوم ماقررت أني أعطيها اللي تبيه وأطلق في أقرب فرصه أقدر أنزل فيها المدينة اللي هم فيها أرتحت وكنه هم وأنزاح عني! خلاص خلها تشوف حياتها والله يسعدها و لو أني أموت فيها موت وما أقدر أعيش من غيها ماعاد أبيها باختصار عافها الخاطر وطابت .. طبعا أنا الان وصلت لمرحلة ماعندي فيها أي جديد .. لو صار شيء بعلمكم! لكن والله العظيم أني من يوم دخلت المنتدى أرتحت وأرجو أن يجزي كل من قام على إنشاء واستمرار هذا المنتدى العظيم خير الجزاء بكل أعضاؤوه اللمميزين والمبدعين والنشيطين والجديدين. والسلام عليكم ورحمة الله وبركاته |
جزاكم الله خير
صريحة جدا فعلا اسم على مسمى الله يوفقك لقول الحق زرقة البحر كلامك عين العقل الاخ fahacci لو سمحت لاتزعل من الكلام والله ان الاخوة لايريدون لك الا خيرا وبما كتبوا تبصير لك حتى ترى الحقيقة قبل ان تراها في يوم لاينفع فيه معرفتك بحقيقة الذي حدث اخي العزيز مبين عليك حساس تزعل بسرعة وتكتم في نفسك او تظهره بشكل سلبي تدري ان هذا التصرف يسبب المشاكل في الاخير تدري ليش؟؟؟؟؟لانك تكتم في نفسك وتحاكم الشخص وتصدر عليه الاحكام فيظهر عليك بصورة عناد او عقاب لترتاح نفسيا,,,,,,,,,وهذه التصرفات في الحقيقة لاتزيد المشاكل الا توهجا. اخي الحساسية وكتمان الضيق في نفسك من اي تصرف خطأ,,,,,,,, والحوارات ولانتقادات الداخلية لابد ان تؤدي الى تصرفات سلبية الصراحة ضرورية لكن بأسلوب حلو الكلمات الحلوة ضرورية بين الزوجين للتخلص من سؤ الفهم بين الزوجين المبادرة من الزوج اذا أخطأ بالتوضيح لتصفى النفوس المداعبة والممازحة بين الزوجين خاصة من الزوج لزوجته شي تحبه الزوجة الكلمات العذبة التغزل الابتسامة والضحكة والكلمة الطيبة والمداراة وجبر الخاطر لو بكلمة حلوة لو بتعويض معنوي او مادي يستطيع الزوج يكسب زوجته وينسيها نفسها و أهلها وطوايفها بعد. الرجل العاقل يعرف اشلون يسيطر على عقل مرته ويخليها تموت فيه وتدوب بدباديبه على قولت اخوانا المصريين المرأة عاطفية تحب الرجل اللي يعاملها بلين برومانسية المرأة تلف عقلها وقلبها بكلمتين حلوين انت أخوي مبين عليك طيب معدنك طيب بس ماتعرف باساليب وفنون التعامل مع النساء المرأة ما يمشي معاها اللين في كل الامور ,,,,,وبعد ما تمشي معاها الشدة على طول المرأة تمشي بالشدة في لين ,,,,,أفهمتني زوجتك بعد مبين عليها حساسة وكانت منتظرة منك تكون أكثر شاعرية ومرونة تدري في كثير من الرجال ما يسوون لزوجاتم كل اللي يطلبن منهم ويمشون كلمتهم,,,,,,, لكن بأسلوب يجعل الزوجة تحبه وترضى بقراراته. أخوي انصحك تعيد النظر في مشكلتك وحياتك المستقبلية . |
| الساعة الآن 11:07 AM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©