منتدى عالم الأسرة والمجتمع - تصرفات أخي تخيفنا ماتفسير حالته (( مستجدات في الرد 37 ))

شوفي يا اختي والله اني سجلت بالمنتدي عشان ارد عليكي
اذكرت كل شيء مر عليا كانوا امس
كان عندي اخو الله يرحمه كان ذكي جدا من صغروا ومثقف جدا رغم مرضوا النفسي
والله ما بالغ ان قلت ان اخويا لولا المرض والظروف لا صبح عالم او مبتكر او مخترع لكن للأسف احنا كنا جاهلين بنوعية مرضوا " علما انوا اخويا اتعرض لاعتداء جنسي خارجي وهوا صغير من عموا للأسف "

لمن كبر كان عاطل عن العمل ومنعزل تماما ماعندوا اي صداقات الا نادر جداااااا واكثر وقتوا بالغرفة واتوقع ذا الشيء اثر عليه سلبيا ...

المهم انوا كان يتخيل انو احنا نكهروا وان الناس يبغوا يأذوه وانوا فلان يراقبه وان هذا مترصدوا ساعات واحد غريب بالشارع يقول ذا يكرهني ويراقبني رغم انوا مانعرف الشخص ولا هوا يعرفوا بس عندوا خيالات غريبة،
ويتخيل اشياء مالها وجود من الاساس ودايما مشاكله بالبيت
يكسر القزاز والمزهريات ويرمي الصحون حقة الاكل ويكسرها ويشيل السكينة ويهددننا فيها ومرا حط السكنية علي رقبة امي

والله اني ابكي وانا اكتبلك اشياء حصلت معايا كانت متعبتني جدا كنت ماحس بالامان بوجوده نهائيا اخاف منه ومن وجوده اخاف فجأة يقلتنا رغم انوا كان مجرد تهديد بس تعرفي الحالة كانت تخوف جدا قعدنا على ذي الحالة سنين،
والله انوا ساعات كنت ارتجف من الخوف جسمي كلوا يرتعش واروح المدرسة بس ابكي وما اعرف ايش اسوي ومشكلتوا كانت ان كل مشاكلوا مع امي رغم ان امي انسانه طيبة جدا لكن كان يقولها انتي تكرهيني ومن ذا الكلام الغريب رغم انوا مع ابويا علاقتوا كويسة بس مع امي العكس ،

المهم في مره من المرات سوا مشكلة كالعادة قام ابويا اصر ان يودية لدكتور نفسي وبعد ماوداه الدكتور قال هذا دلع ماعندوا شيء رغم انوا الدكتور كان وقتها مخطأ كيف ماعندوا شيء وتصرفاتوا غريبه، بعد كذا ابويا من كثر المشاكل استأجرلوا شقة برا البيت اللي احنا نسكن فيه وخلاه يعيش هناك لحالوا ينام بس يجينا وقت الغدا او العشاء ، وبعد فتره رجع البيت وصار ساكن معانا ، وفي النهاية اخويا اتوظف وصار شويا بعيد عن البيت وهديت نفسيتوا وكلنا كنا مستغربين من تصرفاتوا قبل الموت صار انسان هادي وتغير وبعدين مات الله يرحموا ،

وبعد وفاتوا اخذنا مذكراتوا اللي كان يكتب فيها وعرضناها على دكتوره قامت قالت عندوا هلاوس وفصام وشخصت حالتوا بس بعد ايش ؟؟

الغلط الوحيد اللي ارتكبناه عارفه ايش هوا

الجهل ثم الجهل ثم الجهل

كنا جاهلين بالامراض النفسية ويمكن لو اخويا تعالج من البداية كان ماتدهورت حالتوا
لكن بسبب جهلنا بالعائلة بالامراض النفسية كنا نحسب انوا شيء عادي وانوا عاق ومن ذا الكلام او فيه جني او شيء من ذا الكلام وللأسف الجهل خلانا نقول ذا الكلام

شوفي اللحين اخوكي ماشاءالله حالتوا افضل من اخويا بكثيير وغير كذا هوا حاب يتعالج اخويا ماكان يبغى يروح مستفشيات ابدا اخوكي كذا بالسليم .

بس اهم شيء لا تقطعوا العلاج عنوا واتثقفوا في البيت عن مرضوا وحاولي تسألي الاطباء .
وانصحي مامتك لا تنكر شيء موجود فيه اساسا عشان ماتدمر حياتوا انا عارفة احساس امك هيا تحبوا والام مستحيل تفكر انوا بناها مريض بس لو تحبوا من جد تساعدوا علي العلاج والجلسات ان كان محتاج مو تخبي مرضوا وتنكروا كذا راح تضروا اكثر .

واسالي الدكتور حقوا هل هوا يحتاج ادويه وحبوب بس ولا كمان يحتاج جلسات علاجية مع الادوية ركزي على ذا الجانب اختي...

أخيرا الله يربط على قلبك وقلب والدتك ويشفي اخوكي عاجلا غيرا اجل راح ادعيلك ان شاء لاني حاسة بمعاناتك جدا ومريت فيها .