|
رد : محبتكم روح الطير..محتاجتكم [ مستجدات بالرد 30 - 31 - 34 ]
رجعت .. و سامحوني ما كنت أقدر اكتب
لإني بعد ما كتبت هنا ، نفسيتي تعبت .. و ما حبيت أرجع إلا و أنا مرتاحة .. طبعا ما أقدر أصلي لمدة 6 أيام ، و لا كنت لجأت لله و دعيته و استخرته .. . . زوجي من قبل سنتين قلت له ، إنه جوالات الأيفون و البلاك بيري خربت بيوت كثيرة و كأني بأحذره منها .. لإني أعرف زوجي ( عقله صغير ) .. قبل سنة ، و نحن في تركيا و أنا حامل بالشهر الخامس .. شفته مرة سهران و تاركني نايمة ،، سبحان الله ، دايما احساسي يصدق .. عشان لا واحد أو وحدة تقول إني منشغلة عن زوجي .. صحيت الصبح و لقيته محمل برنامج ( هوز هير ) .. و بس لقيت وحدة راسلة ( هلا ) قمت زعلت منه و حذف البرنامج و وعدني ما يحمل أي برامج دردشة . . ببداية رمضان شفت اهتمامه الغريب بالجوال .. سكتت ،، ( شكله وقتها قام بتحميل برنامج - بادو - ) . . لمحت له و طنشني .. و ما رضي يشيل كلمة السر .. تركته ، و قلت لو فيه شي ربي بيكشفه .. بس دايم احساسي يصيب .. . . اطلب منه نجلس سوى ، يطنشنييييييييييييييييي .. اطلب منه يهتم فينا ، يطنشنيييييييييييييييييييييي .. اطلب منه يفضى لنا شوي ، أنا كمان محتاجة لحب و حنان عشان أقدر أعطيه بالمقابل .. يطنشنيييييييييييييييييييييييييييييييي .. و فوق هذا ، أخلاقه صايرة ( زفت ) معليه عالكلمة .. صاير جامد و جاف و لا يصرف و لا يهتم و يضرب بأولاده و ينام بالصالة و الجوال تحت راسه لو دخل الحمام الله يعزكم ، يجري ياخد الجوال .. و زي كذا .. ( طبعا الموضوع مو بس جوال ) |
رد : محبتكم روح الطير..محتاجتكم [ مستجدات بالرد 30 - 31 - 34 ]
:* |
رد : محبتكم روح الطير..محتاجتكم [ مستجدات بالرد 30 - 31 - 34 ]
ما أخبي عليكم ، جموده و أخلاقه السيئة و سهره ..
و أنا جالسة أصرف ، و هو ما يصرف .. و اهتم بالبيت و بكل شي و بالأولاد .. و هو عايش حياته ؟ و فوق كله ظروف أهلي ، و عدم خروجي لأي مكان عشان اهتم ببيتي و أولادي و بعبادتي برمضان .. خلتني خلاص اشعر بإحساس الوحدة .. و افتقد أمي بشكل كبير .. و أهله كمان ما يحتاج أحكي و أقول .. أخوي ولي أمري ، قلبوه علي .. ( و قبل يومين اعترفت لي زوجته إنها هي اللي قلبته علي .. و قالت له كلام كذب عني .. و لإنها قريب تتطلق منه .. فخربانة خربانة على قولتها .. فصارحتني إنها قالت عني كذا و كذا لأخوي .. و دحين احتمال هي و أخوي يتطلقوا و الله أعلم .. و كانت نفسيتها تعبانة و ما توقعت أبدا تكون هي ) أخوي بدون ذنب مني ، سبني و شتمني و طردني من حياته .. خلاص ما عاد لي أحد بالدنيا .. هذا كان احساسي وقتها .. . . صرت حزينة و ابكي .. و زوجي نزل راتبه في رمضان و اختفى و ما عرفت غير بعد أسبوع .. يوم 21 رمضان عرفت إنه نزل راتبه من أسبوع و هو مقصر معانا .. سألته طيب فين اختفى ؟ عصب و انفجر و نكد علي و نكدت عليه .. يتحجج بالسيارة وووووووو إلخ . . اعتذرت منه و تركته ما كلمته ، التجأت لكم بعد الله عشان لا أنكد على زوجي .. اعترف إني أهنته باللحظة هذه ، بس مو حجة له .. لإنه هو اللي بدأ الجفاء ، لإنه هو اللي ما أعطانا مجال للتفاهم .. لإنه هو اللي رافض يحل أي مشكلة ، لإنه هو اللي عاجبه وضعه .. لإنه هو اللي مقصر ماديا و مو داري عن شي .. . . صرت أدعي طوال العشر الأواخر .. اللهم ابعد زوجي عن أصحاب السوء و زد محبتي في قلبه ووو إلخ . . و بيوم 26 رمضان تقريبا .. قمت من النوم متأخر أنا و هو .. رحت بسرعة اجهز الإفطار ، و هو منشغل بالجوال و راقد بدون فنيلة .. و تركت ولدي عنده بالغرفة ، لإنه يحبي و يزحف و يجي عند الفرن .. و صكيت الباب عشان لا يخرج ولدي من الغرفة .. هو لاهي بالجوال و يضحك معاي ، و باين إنه مخه مو معاه .. و شوي أشوفه ماخد صورته و يصوره بالجوال .. و أنا متنقلة ما بين غرفة النوم و المطبخ و دايخة ،، مزحت معاه ، قلت له ( تصور صورتك لحبيبة القلب ؟ ) طبعا هو انصدم مني ، و مزح و قال ( إيوة لصاحبتي ) .. طبعا يمزح يعني إنه .. عشان يبعد الشك عن قلبي .. بس احساسي و الحمد لله دايم يصيب .. |
رد : محبتكم روح الطير..محتاجتكم [ مستجدات بالرد 30 - 31 - 34 ]
بعد شوي حطيت سفرة الإفطار .. و سبحان الله قلبي وجعني ..
حسيت فيه شي ، ماني غبية و لا هبلة .. أذن و أنا بالمطبخ و هو أبرد ما عنده و مشغول مع الجوال .. و ولدي يبكي الصغير و التاني جوعان .. . . حطيت السفرة و فجأة انقلبت من ضحك و مزح ، لزعل .. و قلت له بحزم و شدة ،، مو بصراخ ،... و الجوال بيده : (( أنا ماني شغالة عندك ، أحط السفرة و اعمل كل شي ، و أنت نايم طول الوقت و غايب عن العمل و تصحى و تجلس تتكلم مع بنات الحرام )) قام عصب و قفل جواله و قال تعصبي الواحد و تشكي بس و تتهمي الواحد عالإفطار تركته و رحت الغرفة ، خلاص احساسي صحيح مو بيدي .. و بالفعل كان احساسي صحيح .. . . رجعت و كلمته و أنا أبكي .. قلت له يا فلان ،، أنا أعرفك لما تكون مرة مهتم بصورتك و كذا .. يعني فيه شي .. في بريطانيا وقت نزلت صورتك بالفيس بوك و مرة مهتم بإختيار الصور .. كانت جاتك إضافة من وحدة بريطانية تدرس معاك .. قالي حذفتها و خلاص .. قلت له ، الحكاية بس بموضوع تصويرك للصورة .. خلاص تعقدت طيب بسببك .. ليه تعيشني بشكك ؟ خليك صادق .. ما تبغاني ، اتركني .. . . قالي جوالي و مالك دخل فيه .. و بأحط كلمة سر .. ( إن عجب ) قلت له ، يعني تعمل علاقات برضو و عادي ؟ قالي ( إيوة و مالك دخل ) .. بس طبعا يحاول يستفزني .. . . قلت له و طبعا أتكلم و الدموع تنزل من عيوني .. و هو جامد .. على قد ما تقولوا كلكم قوية ، بس قلبي ضعيف .. و مجرد ما أتكلم بصراحة و من قلبي تبدأ عيوني خلاص تغرق بالبكاء .. . . قلت له .. أنا ما راح امسك جوالك ، و لا تشيل كلمة السر .. و لا همني شي .. لكن حط ببلاك شي ، و لا تنساه .. أنا كل شي ممكن اتحمله و أنساه ، إلا الخيانة .. شوف بيتك ، و شوف أولادك قدامك ، و شوف كيف عايشين براحة .. لا تهدم بيتك بنفسك ، لا تهدم بيت الولدين بنفسك .. أنا ما قصرت معاك ، ما تبغاني اتكلم .. لكن قسم بآيات الله ، لو إنك تكلم وحدة أو بنات .. ما راح تشوفني طول عمرك .. و بيكون اخر يوم بيني و بينك .. و راح تنحرم مني .. . . طنشني و قام لبس ثوبه و خرج .. . . طلعت بعد شوية و لبست عبايتي .. لإني كنت منهارة خلاص و جوالي مخلص رصيده .. و شفته راكب السيارة و مشغول بالجوال .. كنت بأقوله له خرجنا للسوق تعبانة خلاص .. بس لا شعوريا قلت له ( جالس تفضفض لصاحبتك ؟ ) . . و الله يا جماعة إنه مو شكك .. لإنه كلامي صحيح مية بالمية .. و تأكدت بعدين .. إحساسي مو بيدي و غصب عني .. |
رد : محبتكم روح الطير..محتاجتكم [ مستجدات بالرد 30 - 31 - 34 ]
قبل هذا اليوم ، يمكن بيوم 24 ..
رجع زوجي من برة و جالس بالصالة يكتب بالجوال بالواتس أب أكيد .. عالساعة 9 تقريبا .. كنت أنا نايمة بالغرفة ، و خرجت بهدوء .. و هو ما توقع يشوفني قدامه .. مجرد ما شافني عند باب الصالة داخلة .. ارتبك و قفل الجوال .. كنت مبسوطة و مافيا شي ، حركته هذه خلتني أتأكد إنه فيه شي .. قلت له وريني الجوال .. حلف إنه ما يوريني لو تتطبق السما على الأرض .. و عصب و طول لسانه .. قلت لكم صاير قليل أدب .. قلت له ، مافيها شي .. إيش بك ارتبكت لما شفتني ؟ صار يكذب وووو إلخ .. . . أنا طبعا خلاص ، مليت منه .. و طنشت .. إيش اعمل له ؟؟؟ قلت له ، ليه نايم لوحدك ؟؟؟ يتحجج بأي شي .. . . مع إنه ما كان عمره ينام بعيد عني .. . . بس صاير كذا في العشر الأواخر .. يتسحر ، و يأذن الفجر .. يخرج من بعد الفجر و يتحجج بأي شئ و ما يرجع غير عالساعة 9 أوو 11 أو 12 .. نبهته و قلت له ، غريبة من 3 أيام تطلع بعد الفجر و تتأخر ؟ يجلس يتحجج بأي شي طبعا .. |
رد : محبتكم روح الطير..محتاجتكم [ مستجدات بالرد 30 - 31 - 34 ]
طبعا بعد ما رجعت من السوق ..
دلعته اخر دلع و اعتذرت إني ما قصدت أكلمه عن الجوال ، بس افتكرت أمي ووو إلخ شايفته ساكت و جامد .. أنا ألصق فيه و أدلعه و حبيبي و أحضنه ، و هو عيونه عالتلفزيون .. ( يمكن كان بيأنب ضميره ، و ما يحط عينه بعيني ؟ لإنه بالفعل كان غلطان هو ) .. . . طنشت شكي به ، و لا اهتميت .. قلتله ، لو فيه شي ربي راح يكشفه و أنا ما راح أسأل .. و بالفعل ، ربي كشفه من غير ما أدور .. لإني صادقة مع ربي ، و علاقتي بربي قوية .. حتى لو إني مقصرة بالعبادات .. دلعته اخر دلع ، من يوم جيت أفضفض عندكم .. خلاص تحسنت نفسيتي و صرت أروح السوق ، و ألعب الأولاد و أدلع زوجي .. و كلمته إني معليه كنت متضايقة شوي الأيام هذيك بسبب اللي مريت به .. بس ما عاد أزعلك خلاص ، و مو قصدي و أنا اسفة وووو إلخ .. صرت زي كذا .. رجعت اهتم فيه أكثر من قبل ، و علاقتنا مرة حلوة .. لإني وقت جيت هنا فضفضت ، كنت أقرى مواضيع بالمنتديات و منها مملكة بلقيس . . لازم أنام شوي ، لإني دايخة مرة .. ما أكلت من كم يوم ، و القفص الصدري أحسه باين .. و أمس رحت الدوام بس وقعت مباشرة و استأذنت بالخروج من العمل، و كل زميلاتي ارسلوا لي ( إيش فيك ؟ شكلك باين مرة تعبانة ) و دقوا علي يسألوا عني .. و ما بأنام من كم يوم .. و جاتني كمان ( المحروسة ) من يومين ،، حاسة بدوخة و يمكن بيجيني فقر دم و الله أعلم .. |
رد : محبتكم روح الطير..محتاجتكم [ مستجدات بالرد 30 - 31 - 34 ]
صار يتقصد يترك الجوال قدامي أي مكان .. عشان لا أشك فيه ..
باين حركة مقصودة ، يحسبني غبية .. صاير يفتح الجوال بكلمة السر قدامي ، عشان يبعد عن نفسه أي شكوك .. و ما اهتميت ، لإني كنت مقررة من فترة إنه مالي دخل فيه .. إذا فيه شي ، ربي يكشفه .. و طنشت .. صار يتقصد يفتح جواله قدامي .. مثلا يكون جالس عالأرض ، و يناديني اجلس وراه عالكنبة و أحط يدي على شعره .. و يقوم يفتح الجوال ، يا يحمل ألعاب أو يلعب سباق سيارات .. المهم ،، يتقصد إنه الجوال يكون قدام عيوني .. و أنا بجد ، مطنشة و أعرف كلمة السر بس ما فتحت و لا فكرت .. لإني ما أبغى وجع الراس .. . . ليلة العيد ماني ملحقة أعمل شي لنفسي أو للأولاد أو البيت .. هو ناااااااااااااااااااااااااااااااااااااااااااام من بعد الإفطار لحد الساعة 11 الليل و صحي و خرج و ما شفته غير عالساعة 3 الفجر .. طلع يصلي للعيد و راح بيت أهله ، و ما رجع غير عالساعة 11 الصبح .. نام ، و رحت اشحن جوالي بعد المغرب و شفت جواله مشحون .. شلت الشاحن من جواله ، و شحنت جوالي .. . . فكيت جواله بس كذا ، أشوف كم الساعة ؟؟؟ و سبحان الله ، قلت بس خليني كذا أطالع بالواتس أب .. عديت بشكل سريع جداااااااااااااااااااااااااااااااا .. بس شفت رسالة منه لأخوي ، و هي هذه اللي فتحتها .. بس الباقي رفضت أفتحه .. . . سبحان الله ( ما أعرف ؟ فيه عندي احساس من ربنا ماني قادرة أوصله لكم ؟ بس احساس صادق ) و الله و أنا بس كذا امر على الأسامي و ما أقرى شي .. أشوف اسم ( و قلبي ينغزني ) و الله العظيم .. اسم غريب .. أوقف عنده و ارفض ادخل و افتحه .. قلت بداخلي ، ما راح أفتح شي .. عشان لا أشوف شي ما يسرني لا سمح الله ، و طول العمر ما أقدر أنساه .. لو فيه شي ، ربي راح يكشفه بنفسه .. . . تويي بس افتح الجوال و تجي عيني على اسم أخوي .. و أروح للغرفة عشان أعطي الجوال لزوجي ،، إلا أشوف زوجي صاحي و مستعجل يلبس عشان يروح الصالة يلحق عالجوال .. بس شافني أنا جاية عنده و جايبة له الجوال بنفسي و مبتسمة .. |
رد : محبتكم روح الطير..محتاجتكم [ مستجدات بالرد 30 - 31 - 34 ]
أنفي بدأ ينزف منه دم الله يعزكم ،،
من يوم تزوجته ، كذا يصير معاي إذا تضايقت و كتمت بداخلي .. أنفي ينزف من الداخل ؟ ما أعرف ضغط و لا إيش ؟ . . المهم .. من عيونه وقت أعطيته الجوال فهمته ، فوق هذا كله يقولي ما أفهمه ؟ ماحد فاهم زوجي مثلي .. طالع بعيوني ، حسبني شفت شئ .. جلس بالصالة بالكنبة اللي قدامي ، و أنا ساكتة أطالع فيه .. شايفته شغال يمسح شئ ؟؟؟ جاني الاحساس هذا و سكتت .. و لا فكرت أسأله و لا أدور خلفه .. تجاهلت احساسي .. و طنششششششششت .. . . تاني يوم العيد ، سبحان الله .. هو نايم و أنا بأغسل الملابس و البيت نظيف و خلاص كل شئ حلو و تمام .. رحت عالمغرب تقريبا أصحيه للصلاة .. شفته نايم في سابع نومة .. و أنا أصحيه ، شايفة الجوال تحت مخدته .. طنشت و استمريت أصحيه ، ما قام .. طالعت بالجوال ، و افتكرت عيونه أمس و نظراته لي و هو جالس يمسح و يمسح و يمسححححح .. قلت يا بنت ، خذي الجوال و طالعي بس إيش كان يمسح ؟؟؟ . . افتح عالواتس أب .. و ما دخلت أقرى شي .. بس ألاقي نفس الإسم اللي شكيت به أمس ، راسل كلمة : بـيـبـي يعني حبيبي اللي ما يعرفوا انجليزي |
رد : محبتكم روح الطير..محتاجتكم [ مستجدات بالرد 30 - 31 - 34 ]
( شفت الإسم هذا الوحيد اللي محادثاته ممسوحة كلها ) ..
اخدت الرقم و سجلته بجوالي .. دقيت و ما ردت علي .. رديت عليها : هلا حطت أيقونة : وجه مع بوسة و كتبت : إيش بتعمل ؟ قلت لها : نايم قالت : ههههههههههههههههههه قلت لها : و إنت ؟ ( طبعا أنا لحد دحين ما أدري إذا بنت و لا ولد .. أعرف زوجي كذاب ) قالت : خواصري توجعني من أمس الظهر ( قلت بداخلي ، لسى مو باين بنت و لا ولد ؟ بس طريقة الكلام باين إنها بنت ) قلت لها : ما عيدتوا ؟ قالت : لا ، جالسة فوق الكنبة افترج عالتلفزيون . . كلمة جالسة كلمة بيبي بوسة و ضحكة و صورة رمز للبنات كله خلاص خلاني أعرف إنها بنت . . رحت عنده و أدري إني استعجلت ، بس ما حبيت أشوف شي تاني .. صحيته و قلت له مين هذه .. قلت له دق عليها دحين .. قالي ، يا هبلة هذا صاحبي .. قلت له ، دحين دق عليه .. رااااااااااااااااااااااااااااااافض مرة ، و يقول ما أدق .. قلت له أنا أدق .. دقيت من جوالي ، و ردت علي .. قلت ألو ، قالتلي ألو نعم ، قلت لها السلام عليكم ، تعرفي إنت فلان ؟ قالت لي : إيوة .. قلتلها إيش علاقتك به ؟ قفلت الخط .. طبعا هي صوتها مو أنثوي ،، صوتها زي الأولاد شوي .. زوجي يضحك و يقول : ههههههههههههه يا هبلة هذا صاحبي انفجع منك و قفل الخط بوجهك .. فجعتيه .. |
رد : محبتكم روح الطير..محتاجتكم [ مستجدات بالرد 30 - 31 - 34 ]
توفي و فيصل ، قرأت الردود
لا و الله العظيم ما قصدتك و لا قصدت أحد لإنه كانوا هناك بموضوع الأخ أبو خليفة ناس تدخل و ما تعطي حلول أو مشاركات و حتى ما أفتكر الأسامي ، يمكن مجرد زوار كانوا ؟؟؟ بس يقولوا كلمتين و خلاص : (( هاه ، صار شي ؟ )) . . |
| الساعة الآن 12:03 PM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©