نفس الطلقة اللي قبلها طلاق بدعي لأنه طلقك في طهر جامعك فيه
إذا الطلقتين زي ماوصفتي فهي واقعه عليك
يعني باقيلك طلقه !!!
والمصلح قصدي المفسد يستنى الطلقه الثالثه عشان يخطبك :30:

تأكدي من واقعة الطلاق للجماع اثناء الطهر ، لان بعض العلماء يفتون بوقوعه وانه طلاق سنة لا بدعه ومنهم بعض العلماء المشهورين بالافتاء ، تأكدي من مصدر آخر

- هذا انسان يلعب .. وش فيك يا ندمانه كأنك مغيبه
أدري الصدمه قويه عليك بس ليش تسمحين له يلعب بمشاعرك

- اول شيء المصلح هذا احذفي رقمه ويا ليت اخوك والا ابوك يكلمه يعطيه تهزيئه تأدبه
والله ما أحب العنف بس فيه ناس ما يجون إلا كذا .. قال مصلح قال
أصلاً أنا ما أدري كيف زوجك رضى إن المصلح يأخذ رقمك ويكلمك لوحدك ..

والله زوجك ينخاف منه وغير مؤتمن أبداً

احمدي ربك انه بين من البدايه وانا مع رأي الأخ ثنيان

جوالك عطيه أخوك وزوجك لا بغى يرجعك يعرف كيف يرجعك ...
بدون إسبوع افكر واسبوع استخير
ندمانه ليش مرخصه عمرك ..

والله انا اقول اتركي المجال لأهلك يتصرفون معاه.. وانتي الي استخيري وفكري
وموقفه الأخير مخزي للأسف

لا توترين أهلك .. والا بتجلسين سنين وانتي تنتظرين أمل كاذب
للأسف انه انسان لئيم ..
وانتي غصب طيب تبين تجملين صورته وانه مو قصده .. ويحبك
لا ما يحبك.. يحب نفسه
ولئيم واستغلالي ..
وحتى موقفه من ابوه وردة فعله بهربه اسبوع من ابوه يدل على من هو؟
الأب يفهم السالفه منكم مو من ولده ..
ما يعطيك الموقف هذا صوره للإنسان هذا

الله يعوضك ..

بسم الله الرحمن الرحيم
وش العلوم هاذي إللي تكدر الخاطر وش فيه هالرجل مايبغى يتعدل ويفهم الحب والرومنسية على أصولهاإللي يحب بحق وحقيقي مايعذب حبيبه زوجك هاذا كل إللي فيه مو بعاطفه والعاطفه والحب بعيدة عنه كل البعد بالذات بعد مواقفه الأخيرة معك هاذا أنا أسميه هبال وجنون مو حب إذا كان صادق وفعلا يحبك كان من يوم ماطلعتوا من الشقة إللي أخذتوها على طول للمنطقه إللي يعمل فيها وكان أستأجر لك هناك شقة مفروشه وسكنك عنده حتى يلاقي له بيت ويفرشه مثل الناس هاذا إذا كان مايقدر على بعدك شوفي هيه وحدة من الثنتين يا إن زوجك في عقله شئ يا إن أنتي يحتاج لك شيخ يقرأ عليك علشان تفوقي من سكرة الحب
إللي أنتي فيها أخاف لاقدر الله إن الرجل هاذا مسوي لك بلى ماعاد تشوفي إلا هو ولاتسمعي إلا هو ولاتبغي إلا رضاه هو يا أختي قدري شيبات أبوك المسكين وأقلبي الطاولة بوجهة هالزو ج وطنشيه إلين يصحى ويفوق من سباته وأحلامه أنا والله توقعت إنه بياخذك عقب الأسبو ع مو يقول أفكر أرجعك ولا لا زوجك هاذا لعاب ولعاب كبير يوم حس إن اليلة إللي قضاها معاك دليل رجعتك له قام يقول أنا طلقتك مرة ثانية ترى الطلاق ثلاث مرات بس مو ألف مرة وكلمة الطلاق مو بوابة عبور لأهواء زوجك ورغباته يحقق عن طريقها مبتغاه بس تبغين الصدق وبدون زعل هو ماتصرف كذا إلا لما شاف ضعفك وإنهزامك قدامه زاد أستقوى عليك وشاف نفسه بزيادة وجالس يمرمط فيك وإللي مثل هاذا بدايته ينعاف تاليه زوجك هاذا وبكل أسف لايستحقك ولايستحق إللي تسوينه علشانه والمصلح هاذا إللي يقول لك إذا جاك زوجك إطلعي معاه مرة ثانية لاتصدقيه وتطلعي معاه مرة ثانية يمكن ترجعين إلا وبطنك قدامك حامل بعدين يتركك ويغص قلبك وبدل ماتكوني لحالك تصيروا إثنين وبعدين رقعيها هاذا زوج ماهو بكفو ولاهو حق حريم هاذا حق زواج المسيار يليق عليه يصلح له مادام طبعه كذا وأنتي إنتبهي لنفسك وإرحميها وإرحمي حال أمك وأبوك وأضغطي على قلبك وحبك علشان تستعيدي هيبتك وقوتك وتواجهينه و تخلينه يحس بأنه إن راح وإن جاء أمره ماعاد صار يهمك وراح تشوفي
إذا ماجاك إلين باب بيتك ويترجاك أنتي وأبوك إنك ترجعين له هاذا إذا ماكان ماخذك إنتقام لرفضك السابق له لأن إللي جالس يسويه فيك تعذيب نفسي وإذا كان فعلا صادق يحبك وتبغين تعرفينه على حقيقته سوي له إختبار بسيط جدا خلي واحد من أهلك يتصل فيه ويقول زوجتك تعبانه وتحتاجك لجنبها ولازم تجي بأسر ع وقت وأنتي إذا أتصل عليك هو ولا المصلح لاتردين عليه طنشيه حتى أهله لاتردين عليهم وشوفي إذا كان فعلا يحبك والله ماغير يجيك مثل الطير الطاير أما إذا ما أهتم فيك ولا جاء فنصيحتي لك غسلي يدك منه ثلاث مرات مو مرة وحدة لأنه مايستاهل ظفرك وهو الخسران وأنتي عوضك على الله بإذنه تعالى .