|
بعد فشلي في الحلال ساعدوني على تجاوز التفكير الجاد في الحرام
بسم الله الرحمن الرحيم ( اللهم إنني أشكو إليك ضعف قوتي وقلة حيلتي ) أيها الإخوة / لا أدري لماذا أحس أنني أصبحت عاله عليكم في هذا المنتدى المبارك من مشرفين وأعضاء غير أنني وإزاء ما اشعر به سوف أحدثكم وسأظل أحدثكم حتى يفرج الله همي ويزيل كربتي .. غبت عنكم لعلي آتيكم بخبر خطبتي وزواجي إلا أنني وللأسف آتيكم في هذه الظهيرة وقد تكالبت عليّ الهموم فلم أعد أتمالك نفسي ، أتمنى أن أتزوج وأن أعف نفسي عن الحرام الذي راودتني نفسي إليه فهو لا يعدو أكثر من ساعة بالطائرة لدولة ترعى الحرام لأقضي بذلك على نفسي فعلاً .. يا إخوة كنت أعزو سبب تأخري لعدم وجود امرأة مناسبة أما بالأمس وقد وجدتها أجد أمي هي التي تقف في وجهي ، بنت الكل يمتدح أخلاقها ودينها وجمالها وبياضها وشعرها ووالدتي بكل ما أوتيت من سحر البيان تحاول أن تجعلها في عيني مثل الذرة فقط لأن ( وجهها طويل من النحافة ) يايمه أنا استخرت وودي أشوف البنت تقول لي أنا عارفه أنها مب جايزه لك ، يايمه النحيف يسمن ومعروف عن البنت أنها تسمن بعد الزواج قالت أنا أعرف انها مب جايزة لك وأنا والله يا إخوة من غير شعور انطلق على أمي بنهار رمضان الله يعفي عني ويغفر لامي .. يعني أنتي بالأمس كنتي رافضة زواجي قبل الوظيفة ولا صرحتي بهذا واليوم يوم اتوظفت وفرحت أني لقيت زوجة مناسبة رحتي تعذربين فيها ياربي أنا حقيقة انهرت انهيار كامل وأبوي رايق قاعد ينكت علي ويقول لي والله صرت سالفه أنت وعرسك .. قلت له يبه المشكله أنه اللي يقول هالكلام أبوي ليته واحد من الناس من برى البيت ما اشره عليه لكن ألقى هالتحطيم في بيت أبوي هذي والله اللي ماتنوالى .. يا إخوة قسم بالله أبي أبعد عن الحرام والله العظيم وربي يعلم ونفسي تدعوني للحرام بشتى الوسائل والله يا إخوة أن الحرام كما تعلمون يسير الوصول له وأنا ما حاولت افهم هلي هالشي لأنهم ناس ماعندهم استعداد يحطون بروسهم أنه أنا إنسان عندي غريزة إنسان عندي ميل للأنثى مثل ما ابوي يميل لامي مثل ما ابو الجيران يميل لأم الجيران يعني أنا بشر من لحم ودم عجزت أفهمهم خلاص ياناس زملاي كلهم اتزوجوا ياناس الكل يطالع فيني يقول ماشاء الله إمام مسجد ومرتب محترم وبيت مسجد يالله وش تنتظر وأنا أموت من القهر وأقول الله ييسر ونفسي والله العظيم تتقطه قهر وحسرة يعني أنا وش منتظر بهالدنيا إذا أهلي يوقفون بوجهي لحاجة تافهة وصغيرة .. والله يا إخوة إن الحرام حصل لي بأكثر من مرة وأنا أمنع نفسي من السفر والله رحلات مجانية ولأني عارف أنه أنا إنسان ( مضغوط ) ماحبيت أنه أجر على نفسي الشر والله إني أكتب هالكلام من حرقة ومن ألم مايعلمه إلا ربي قسم بالله .. أي أبو يقرأ كلامي حلفته بالله لا يوقف عائق في زواج ابنه أبناؤكم يا آباء والله العظيم يستحون يصرحون أنه الشهوة ذابحتهم قدامكم لأنكم بأنفسكم صانعين حواجز مع عيالكم .. حلفتكم بالله كونوا عونا لأبنائكم على طاعة الله لا تخلونهم يلعبون بذيلوهم من وراكم لا تضطرونهم يصيرون منافقين وهم قادرين يصيرون مؤمنين ... ياربي فرجك ياكريم ياربي فرجك ياكريم ياربي فرجك ياكريم |
قطعت قلبي بكلامك ..
أكتب رسالة للوالد .. قول له إنكتخجل تقول هالكلام وجها لوجه ففضلن تكتبه .. وبين له مدى حاجتك لأشباع غريزتك .. وإنك في معركة حامية مع الشيطان اللي يزين لك المعاصي وطريق الحرام .. أو كلم خالك يقنع امك .. أو عمك يقنع ابوك .. بس تصرف.. ولا تخلي الفاس تقع في الراس.. إنت إمام مسجد .. والناس ينظرون لك كقدوة لهم .. فلا تخذلهم .. والله يهدي الوالدين اللي ينسون الرغبات الخاصة لأبنائهم .. .. |
كلامك مؤثر تمنيت لو لي القدرة أنقل الكلام لأهلك
اسأل الله العلي القدير الرازق الكريم في هذا اليوم الفضيل ان يرزقك الزوجة الصالحة التي تسر عينك عاجلا غير آجل |
أسأل الله أن يعينك ويوفقك ويرزقك الزوجة الصالحة أخي أشكرك من الأعماق مصارعتك مع الشيطان وانتصارك عليه بعدم الذهاب إلى الحرام هذا وإن دل فإنما يدل على قوة إيمانك .
لكن برأيي أن توضح للوالد والوالدة ولا مانع من التصريح ببعض النقاط ليتفهموا الأمر ومع ذلك تذكر أنهم والديك لابد من الرفق . وشكراً |
لاحول ولاقوة الا بالله
اخوي صالح احنا مانسيناك من الدعوات اصبر والله يجبر كسرك وان شاء الله ربي يعوضك تأكد ياصالح ربي يمتحنمك يشوف صبرك وقوة ايمانك هذي ايام فضيله الجا الي الله روح المسجد اعتكف اطلب ربك طول الوقت والله اني اتمنى اجلس في المسجد اكثر من جلوسي فترة التراويح اتوكل على الله كما تعودنا عليك انت قوي وربي ان شاء الله بعزته وجلاله يرزقك الزوجه الصالحه غمض عيونك شوي شوفها زوجتك جالسه تدعي ربها انه يسخرك لها ابحث واطلب الله وبإذن الواحد الأحد بييسر امر زواجك اذكر الله وردد ياجبار اجبر كسري يافتاح افتح لي فتحا مبينا ربي لاتذرني فردا وانت خير الوارثين ودعواتي لك ربي يسعدك ويفرج همك وينولك مرادك وييح بالك ويرزقك ربي الزوجه الصالحه اللي تسعدك وتصونك الله يجبر كسرك ويفتح عليك حصنتك بلا اله الا الله الله يعصمك عن الحرام واستودعتك الله |
الله يكون في عونك يا اخوي يا صالح
والله كنت مفكره انه امورك مشت لا حول ولا قوة الا بالله اخوي انت لازم توقف وقفه حاسمه امام اهلك لازم تبين لهم انه الموضوع جد |
عليك باالصيام والدعاء وربك بيفرجها انشالله
|
الحال من بعضه ياخوي صالح
حقيقة ْ حزنت لموضوعك ... وانا متفهم لوضعك ولما تمر به الان .. اعاننا الله واياك . وزوجنا واياك عاجلا غير اجلا . . وحفظنا الله من كل شر ... ( عندي لك نصيحه : حاول ماتروح للاماكن اللي فيها نساء مثل الاسواق.. ) اخوك - مشاعر مهملــهـ |
الدعااااااااااااااااااااااااااااااااااااااااا ااء وكثره الاستغفار ............اسأل الله لك الزوجه الصالحه التى تعينك على دينك ودنياك واخرتك اامين
|
الله يعينك .. ويهدي اهلك اكثر من الدعاء لأهلك ان ربي يسخرهم لك
وبعدين قول لأمك انا البنت عاجبتني واستخرت اكثر من مرة وان شاء الله بتقدم لها خلها في النهاية هي تضطر تتقدم مو انت وبعدين عيبها ان وجهها نحيف الحمدلله وش هالتفكير كل البنات كذا ولا اعرست كبرت خدودها وسمنت حاول ولا تيأس ولا تخلي للشيطان عليك مدخل .. الله يرزقك ويرزق اخوي بالزوجة الصالحة عاجلا غير اجل والله ذكرتني باخوي مالقينا له للحين لاحول ولا قوة الا بالله |
| الساعة الآن 07:25 PM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©