|
ابشركم.. خطـــــبت باركولي...
بسم الله الرحمن الرحيم
هلا اخواني واخواتي الغاليات .. بلامقدمات طويله انتم تذكرون موضوعي اللي تعتبكم فيه معي يالغالين اللي كان عنوانه يارب تعبت معها ساعدوني.. ووصلت الردود ل190 رد والحمد الله يشهد الله اني استفدت من ردودكم حبيت ابشركم اني خطبت الحمد الله وخطبت بهالسرعه لاني مستعجل ابي اتزوج لاني راح اسافر لبريطانيا دوره لمده خمس شهور بالصيف وراح تصير هالدوره شهر عسل وشغل بنفس الوقت .. واللي خطبتها تقرب لنا من بعيد وهي من الرياض عن طريق وحده من خالاتي ولله الحمد.. وسالت عنها وعرفت من خالاتي انها الحمد الله ست بيت ممتازه وراعيه ذوق بالاكل وفن ووتحمل المسؤليه لاني بصراحه ماعندي استعداد اربي وحده من اول وجديد والمؤمن مايلدغ من جحره مرتين.. وسالت عن الدين والحمد الله قالو انها راعيه دين وماتترك الفرض وتصلي بااخر الليل وانا ابي وحده تعيني على ديني وخليت خالتي وامي يسالون الناس اللي مالهم فيها صله قرابه كيف اخلاقها والحمد الله طلعت ونعم البنت من اصل وفصل ومن ناحيه الشكل كلمت اختي وشافتها وقالت هي مملوحه يعني مقبوله الشكل لكن اهم شيء الاخلاق.. هاذا الموضوع باختصار اما من ناحيه طليقتي فانا الشهاده لله اني مشيت بمشورتكم قبل لاكلم الشيخ واتاكد وارسلت جميع اغراضها من ملابس وذهب واشيائها الخاصه بشنطه وخليت السواق يرميها عند الباب.. والله يااخواني احس براحه عجيبه واحس انه كأن هم كبر الجبال وانزاح عن صدري باذن الله راح اتزوج باللي تحبني وتقدرني وتحطني بعيونها وراح اخلي حياتها افراح بافراح.. اليوم طلعت اتمشى مبسوط ومرتاح .. وبالي راايق. فعلاا بعض الزوجات تقلب حياتك جحيم بمعنى الكلمه .. طليقتي السابقه اهلها الا الان متمسكين فيني حتى امها دقت علي وحاولت فيني اني ارجع بنتها وان بنتها غلطانه لكن خلاص انتهى الموضوع بالنسبه لي.. وهي مادقت الا يوم درت اني خطبت وانا حرصت اني اوصل الخبر لها عن طريقتي الخاصه .. باذن الله انا خطبت اللي تبي تقدرني وتحطني بعيونها وراح اسوي عرس خيالي بمعنى الكلمه... وراح اخصص بطاقه خاصه دعوه لعرسي لطليقتي مع امها عشان يعرفون ان فيصل الف وحده تتمناه بلافخر وان البنات كثير . لكن حظي السيء خلني اتزوجها.. عموما مالكم بطول السيره انا حبيت ابشركم وحبيت تشاركوني فرحتي وحبيت اشكر كل شخص ساعدني واعطاني نصيحه ويعلم الله اني ادعو لكل من نصحني وجزااكم الله الف خير ... اخوكم المبسوط فيصل.... |
الله يبسطك ويسعدك ويوفقك (آمين)
ألف ألف ألف مبرووووك . |
اللهم لك الحمد حتى ترضى ولك الحمد إذا رضيت ولك الحمد على كل حال ...
اللهم لك الحمد كم من هم فرجته وكم من أيم زوجته وكم من كرب نفثته ... اللهم هذا أخي فيصل أحبه في الله ، بارك له في عمره وأهله وماله ... اللهم يسر الخير له واصرف الشر عنه ... اللهم يارب البريات وياسامع الحاجات هذا أخي فيصل عوضه خيرا واجعل أموره إلى خير ... اللهم أدم السعادة عليه واجعله من السعداء الذين لايشقون أبداً ... اللهم رضه وارض عنه ... اللهم صلي وسلم على نبينا محمد وعلى آله وصحبه وسلم ... الله يبشرك بالخير وأسأل الله أن يبارك لك ... أخي الفاضل فيصل قرأت موضوعك السابق أكثر من أربع مرات ولم أكن أود أن أضيف شيء حتى أجد أن عندي كلام مفيد غير ماقاله الإعضاء لك ... أخي ماشاء الله عليك ونعم الرجل في عشرتك وفي تعاملك وفي إحسانك لأهلك وأسأل الله أن يوفقك لما أنت مقدم عليه ولكن هالله الله أخي فيصل وأنت صاحب الخلق والدين وأنت والله رجل المواقف والرجال قليل لا تجعل للشيطان مدخلا عليك وتكون خطبتك أو أسلوب تعبيرك للفرح فيه انتقام لطليقتك احذر أخي وتذكر قول الله ولاتنسوا الفضل بينكم ... أخي اعرف كم هي كانت معاناتك وكم كانت خسارتك وكم وكم ولكن اعفوا واصفحوا هو أقرب للتقوى ومن عفى وأصلح فأجره على الله ... أخي والله أخاطبك وأطلبك وأذكرك وأنت رجل شهم صاحب خلق ودين ... فلا يراك الله إلا محسنى ... أخوك أبو عبدالعزيز |
الله يوفقك اخوي والف مبروك الله يسعدك ويهنيك ويتمم لك على خير
|
الف مبروك ياعسل
وانا بعد ابشرك متكلمين فيني ههههههههه لا جد والله فيه حكي يعني عسى الله يرزقنا اللهم امين |
ماشاء الله تبارك الله ،، الله يوفقك ويسعدك ويعوضك خير ..
فرحت لك كثيـــــر والله لأنك تستاهل، وزين إنك سألت شيخ ورجعت لها أغراضها .. وخلاص اقطع الي بينك وبينهم نهائي حتى الزواج ماله داعي تعزمهم، كأنك تتشمت فيهم أو تبي تقهرهم !! وإنت إن شاءالله أكبر من هالأمور ،، خلاص هذاك ماضي وانتهى ويكفي الي سويت فيهم ،، الطلاق لوحده أكبر عقاب ممكن تعطيهم إياه، وإنت ماشاءالله ماقصرت عطيتها كلام من العيار الثقيل وعقبه أرسلت أغراضها بطريقة مهينة ،، يعني أخذت حقك وزيادة، فخلهم الآن فيهم الي كافيهم ... أما عن العروس الجديدة فماشاء الله تبارك الله ،، الله يبارك لك فيها ويجعلها خير زوجة ،، أنصحك ياأخي الكريم إنك ماتجيب لها طاري طليقتك الأولى لابخير ولابشرّ نهاااااائيا لأنك لو جلست تسب فيها بتطيح من عين زوجتك وبتقول هذا ماله خاتمة .. وانتبه تكرر نفس أخطائك الي في زواجك السابق، كل شي يزيد عن حده ينقلب ضده ،، دلّع لكن بحدود ... ربي يوفقك ويسعدك وييسر أمرك ويسهل دربك .. |
مبروك أخي الفاضل ...
والله يوفقك لما فيه سعادة الدارين ... لكن نصيحة من أخت ... بلاش ترسل كرت دعوة لا لطليقتك ولا لأمها... هي أكيد حست بغلطتها ومجروحة فلا تزيد عمق جرحها .. أرجوك .. خليك أحسن منها وادعيلها يجيها اللي يسعدها وتسعده ،، واحنا ندعيلك الله يسعدك مع اللي اخترتها وتكون الزوجة الصالحة اللي تقر عينها فيك وتقر عينك فيها .. وبارك الله لكما وبارك عليكما وجمع بينكما على خير ... أختك .. أم حمزة |
الحمد لله
الله يعطيك خيرها ويكفيك شرها.. والله يهدي طليقتك ويصلحها ويرزقها زوج تحترمه وتقدرة.. لكن أتمنى مايكون في قلبك شي من القهر والإنتقام لطليقتك.. لأني حسيت منك أنك ودك تقهرها.. ياأخي أتركها وأنساها وعيش حياتك من جديد وأبدأها صح.. لاتقول بسوي عرس خيالي لأن الله نهى عن الاسراف التبذير.. اللي تقدر عليه تصدق فيه للفقراء والمساكين بنية إنه الله يوفقك في حياتك الجديدة والله ولي التوفيق |
ألف مبرووك ..
ماشاء الله تبارك الله .. الله يتمم لك على خير ويسعدك .. وأنا مع أختي جنة الدنيا .. والله يوفقك ويرزقك الذرية الصالحة .. ولاتنسى دعائك لطليقتك بأن يعوضها الله خيرا .. |
الف مبرووووووووووووووووووك
الله يوفقك ويعوضك ويسعدك في حياتك الجديدة واهم شي انك تدعي لنفسك ولخطيبتك بالتوفيق اما طليقتك لاترسلها و لا لامها بطاقة دعوة خلاص لان اللي بينكم انتهى ويكفيها الم طلاقها0 |
| الساعة الآن 04:33 AM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©