|
زوجي مدمن يرفض الاعتراف!!
بسم الله الرحمن الرحيم
والصلاة والسلام على اشرف الانبياء والمرسلين نبينا محمد وعلى آله وصحبه اجمعين... مثل ماشفتوا العنوان للاسف..زوجي مدمن خمر وحشيش ومخدرات...لكن طيب ومسالم ومحترمني.. يحبني و كنت احبه..لطيبته معاي ومايرفض لي طلب.. اول ماخطبني وصارت بيننا النظره الشرعيه..رفضته رفضا قاطعا كذا قلبي ما ارتاح له..لكن للاسف ابوي طنشني واخواني مالهم كلمه..يسألوني ليه رافضه هالشاب اقول ..ما ادري مو مرتااحه قلبي مو راضي يتقبله.. واجبرت على الزواج منه..وبدأت الحقيقه تنكشف يوم ورى يوم..اول ما اكتشفت الحبوب,, لكن بطبعي انسانه مساااااالمه سكت وقلت لما يحبني بيتغير..صدق كنت بريئه..ومع الوقت حبينا بعض واتعلقنا ببعض كثير..بعدين اكتشفت الحشيش... ونفس الشي سكت وماعلمته اني ادري عن شي.. وهو عايش حياته مبسوط على باله مو عارفه بشي.. وآخرتها بعد سنتين من الزواج رجع وبعنف للخمر والمخدرات مع شلة الفساد.. وللاسف اكتشفت ان اهله عارفين هالشي عن ولدهم وما قالوا لنا.. بعدين بدأ يلمح لي انه يبي يسافر للخارج..نزهه بريئه طبعا..لحاله وانا اروح لاهلي لين ما يرجع.. بعدها انا توكلت على الله وقلت ما ابيييه خلااااص..الحمدلله ماعندي منه عيال.. ويوم عرف اني ما ابيه وخايفه على عمري من افعاله..قام يهدد انو بيعلقني وبيوريني نجوم الظهر.. واني مو كفو للزواج..واني دلوعه وما عندي سالفه وان اسبابي تافهه .. وللاسف كثيرات يقولون ليه ماتصبري وتنصحيه يمكن يتعدل..على بالهم الموضوع بسيط ويقدر يتركها متى ما يبي.. ما يدرون لو يوم ما يلاقي حبوب تنقلب نفسيته ويصير يهذي ومخه فاصل وانا انواع الرعب..صدق اللي يده بالماء مو مثل للي يده بالنار.. عطوني ارائكم في قراري؟؟ من حقي انقذ نفسي.. ولا اصبر على خرابه يمكن يتغير؟؟ |
الله يكون في عونك ويهدي زوجك .........ورايي انك تتركيه من الحين قبل يجيك عيال ويربطك معه ....................اما من ناحية انه يعلقك فما يقدر ومجرد ما يعرف الشيخ هالامور راح يطلقك منه بدون ما يشاوره اذا انتي طلبتي الانفصال .............. الله يوفقك و ييسر أمرك
|
حاولي تقنعيه أختي الكريمة انه يتعالج من االإدمان,.....ذكريه بعقاب الله.....حاولي تصوريه فيديو و هو في حالة السكر أو فقدان العقل والإتزان بعد تعاطيه المخدرات, وخليه يشوفها اذا صحى و إستعاد عقله....
و إذا جربتي هذا الأسلوب و مانفع معاه, فلكل حادث حديث و قتها.... الله يهديه ويجمع بينكم على خير |
ربى يصلح حالك يا اختى
الله يكون بعونك والله حزنت ان فى كذا حال تحياتى |
الاخت الفاضله سحابة ورد
يتعدل .. ينصلح حاله كيف ؟ بمجرد الكلام ؟ زوجك مدمن , يعني مكانه مستشفى الأمل وليس بيت به زوجه معرضه للخطر منه في أي لحظه الحياة مع المدمن خطرة جدا , وخصوصا مدمن المخدرات فعندما يحتاج المخدر , قد يفقد عقله من اجل الحصول عليه واذا فقد عقله سيتخلى عن مبادئه وشرفه وعرضه وماله وطفله من اجل الحصول على المخدر فالخوف شديد جدا على من يعيش معه انت لا تستطيعي لوحدك حل المشكله , ولا حتى اهلك ولا اهله زوجك بحاجة علاج طبي عن قناعة منه وليس بالاجبار اذا لم يتعالج من الادمان فورا , فاهربي منه وانفذي بجلدك واحمدي الله لعدم وجود اطفال بينكم انفذي بجلدك وشرفك وروحك منه ابلغي اهلك بالموضوع بأسرع وقت ممكن ولا تنتظري وعودي لهم قبل ان يلحقك منه أذى اما موضوع الطلاق فلا تهتمي له كثيرا , ووالدك سيكون بجانبك ان شاء الله ويعرف كيف يتصرف المهم كوني صريحة مع والدك ولا تقولي , زوجي وعيب افضحه فالخطر عليكي شديد ولو حدث لك مكروه من زوجك لا قدر الله سيقول اهلك لماذا لم تبلغينا من قبل ان زوجك مدمن ؟ والله يرعاك |
بسم الله الرحمن الرحيم
الله يعنيك اختي ,,الله المستعان حاليا ضروري ابوك واخوانك يكونون بالصوره وبصراحه رجال مثل هذا صعب ينعاش معاه وصعب تحسين بالامان معاه والحمد لله انه مافيه اطفال بينكم خصوصا انك تقولين اذا مالقى حبوب ينقلب حاله فبيت اهلك آمن لك ومتى ماتسنع وصار قد المسؤليه هذيك الساعه يصير خير الي يقهر بالموضوع ان اهله يدرون ومع ذلك زوجوه انا ابفهم يرضون مثل حالة ولدهم يعطونه زوج لبنتهم |
بلغي اهلك اولا
وانقذي نفسك لن يتعدل إلا بالعلاج ولن يتعالج إن سكتي عنه ! لا تدوري في حلقةمفرغة ولن يكفي الحب ابدا لتستقر حياتك |
طيب أختي في حال تعالج زوجك وتاب وأنجبتِ منه أطفالا وعاد إليه حنينه إلى إدمانه فمالذي ستفعلينه حينها؟
أنتِ تخاطرين بحياتك كلها وحياة أطفالك في المستقبل مع شخص لا تضمنين شفاءه, برأيي أن فراق زوجك تفوق آثاره الإيجابية على سلبياته فالعيش مع البخيل وشارب الخمر لا تجلب إلا التعاسة والشقاء.. فكري بمستقبلكِ ومستقبل من ستحملينهم في أحاشئك مستقبلا ووالدهم شاربٌ للخمر.. والقرار الأخير بيدكِ أنتِ.. تحياتي.. |
اقتباس:
الله يعطيك العافية اخي في الله ابو الحكيم نفس الراي اختي هذا كلام سليم 100/100 بالتوفيق وبادعيلك من كل قلبي الله يعينك على هذا الزوج الضالم :29:الله المستعان |
اقتباس:
الرحال55 جزاك الله خير..وفعلا الحمدلله انو ماعندي اطفال..لكن حكاية اني اثبت انو مدمن هذي صعبه.. يببلها شهود..واثباتات..من وين احصلهم؟؟ |
| الساعة الآن 11:52 AM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©