|
زوجتي تريد ان تقتلني .
بسم الله الرحمن الرحيم
السلام عليكم ورحمة الله وبركاته ،،، نعم زوجتي تريد ان تقتلني : هذا كلام زوجتي لي وهي معترفه فيه وتهدد دائما بالكلام هذا . 1 - تقولها بالفم المليان ( سوف اقتلك واقطعك واحطك باكياس ) 2 - تقول سوف اقطع ................ من جذورة ، اذا سويتها . بصراحة انا خايف ، لانها سبق وان اخذت السكين اكثر من مرة تريد قتلي ، وتجيب سكين كبيرة في غرفة النوم ، وتقول شوف هذي (السكين) ترى بتشغل صح اذا تزوجت ، واشيل السكين عنها وترجعها وانصحها واعوذها من الشيطان واقراء عليها مافيها فايدة . وفي احد المرات حاولت قتلي فعلا وهربت منها ، ليس خوفا بل مراعاة لشعور اطفالنا ، لانها فقط شكت . وبعد ما رضت وهدأت قالت الي الحمد الله علشانك هربت ولو وقفت كانت طعنتك فعلا لاني فاقدة شعوري ولا احس بشئ . جت سلامة من ربي ولا كان رحنا بخبر كانا . طبعا السبب : ،،، فقط علشان قلتها ابغى اتزوج وشافت بوادر بسيطة . الان ودي بالزواج لكن صراحة خايف منها لانها مرعبة وتتوحش لما تسمع طاري زواج ، وخايف على مستقبل اولادنا . بتقولون وش حدك على الزواج احمد ربك ، ومادام هذا الشي يضايق زوجتك ، كلامك صح . لكن فيه بعض الاصدقاء والاقارب يقولون ليش ماتتزوج وتنبسط ، ياخي عيش حياتك ، استانس . وكلهم يقولون زوجاتنا عادي مايزعلون اذا بنتزوج ، وترى المرأة تزعل شوي وبعدين ترضى . ودايم اسمع الكلام هذا : المفروض تتزوج الي كبرك عنده زوجتين وثلاث وانت يالله وحده بس . ما قدر افاتحها بموضوع زي كذا ولو سويتها بالسر بعيش برعب طول حياتي ، والله لو تدري ان تسوي الهوايل وهي تقول تراني ماعرف امي من ابوي اذا سويتها . وفعلا اذا عصبت تخوف اذا الدعوه فيها ان واخواتها . ترى هي كويسة بالبيت وحياتنا مستقرة ولله الحمد ، بس الاصدقاء والاقارب يضغطون علي بموضوع الزواج ، صراحة ودي اسكت الاصدقاء وارضى الاقارب بس الخوف من الزوجة ذابحني الله يهديها ، وصعبة اقول مشكلتي هذي لهم لانها ماتنقال ، الي بيقول خواف والي بيقول مو صاحين . واذا استمرينا على هذا الخوف شكلي ماراح اتزوج ابدا . . ويش الراي الان محتار في امري ياجماعة الخير ، هل فيه علاج لعصبية زوجتي ياناس . |
اخ تو الناس
غيرة زوجتك طبيعية (رغم التعبير غير الطبيعي لها) لكن الي مهو طبيعي !! سبب رغبتك بالزواج !! الحين انت تبي تتزوج بس عشان كلام الناس !!!! |
اشلون عايش مع زوجه تهددك بالقتل
انا اعرف الزواج سكينة وطمأنينه بس مو فيلم رعب وقتل اشلون متحمل طريقة تفكيرها بهالشكل وتقول حياتنا مستقرة ومدام هي زينة في البيت ليش تسمع كلام الناس وتتزوج عليها |
هي طبيعيه بكل شي الا هذا الموضوع .
انا استغرب معقولة فيه نساء زيها يفكرون كذا . صراحة علي ضغط من اقرب الناس لي ويقول انا اتكفل بالمصاريف . |
مادام زوجتك مجرمـه
ليه تفكر بالزواج عليها وانت عارف ايش راح تكون نهـايتك :d |
اقتباس:
وبعض الحريم نفسيات ياكافي ممكن الوناسه زواج مسيار هذا أوافق الرجال يستانس أما تجميع حريم وراعي حريم أمحق وناسه خاصه إلي حساس ولا يتحمل لأنها كلها صياح ومشاكل وتجميع الحريم مو تجاره وبعدين الحريم كلهم مثل بعض لايلعبون عليك وإلا يقولون خذ لك وحده تطيح الطير إلي تطيح الطير مااتوافق علي معدد ولاتفكر فيه اقتباس:
والله أعظم وبعضهم تقلب حياته وحياتها جحيم لما يحصل الطلاق وبعدين علي أقاربك وربي فيه شايب راعي حريم هالشايب مخيم في بيتنا ويزن علي ابوي والنسوان يعني إلا تزوج والزواج و24 ساعه المشكله هالشايب ساكن عندنا من جد كل وقته عندنا مدري نسوانه ليه مايستقبلون :d والظاهر يبي أبوي يصير نفس حالته انا أستعجب من المعددين وراعين الحريم يبون الرجال كلهم يتزوجون مثلهم أتوقع يعذبهم ضميرهم علي زوجاتهم ويبون كل الحريم كذا أو يبون الناس تتعب مثلهم يعني حسد مثل زوج خالتي تزوج بعد أخوه طبعا عشان ترضا الاولى يعني مره أخوه الاول إلي تزوج ولما تزوج رجل خالتي إرتاحت >> نذاله تبي الشعب كلهم فوقهم ضرات بس تزوج كانك غاوي شقى محد ماكلها إلا إنت وعلي فكره الحريم ماوراهم وناسه وكل شي لازم تحسبه حتي اللقمه لازم تحطها بينهم بتساوي ولازم تشتري لثنتين يعني طقم الذهب بثنين :d والله الله بالمصاريف بس لين مت عاد شي ثاني الأبو قتل والام قصاص الله يصبر عيالكم :25: |
لو قالت لك انا موافقه انك تتزوج علي لكن بشرط قبل تملك عليها تطلقني
هل تطلقها ؟؟ |
تبي الصراحه اشك بمصداقية الموضوع
واذا كنت صادق انتبه تسويها ثم تروح بخبر كان!!!! |
عليك ضغط من بعض القرايب ويبغى يتكفل بمصاريف الزوا ج
طيب ومشاكلك بعد الزواج بيتكفل بحلها هاذا القريب وقريبك هاذا ليش مصمم يزوجك تبغى الصراحة لو أنا مكان زوجتك أول ما أبتدي بالقريب هاذا فاعل الخير وبعدين يرجع الدور عليك شوف الحين قريبك عايش ومرتاح وأنت عايش في خوف ورعب بسبب نصايح قريبك هاذا إذا كانت حياتك مستقرة وانت مرتاح وش له وجع الراس علشان الرزه والوجاهة بين الناس إن عندك زوجتين روح تزو ج الله يستر عليك والله ماغير زوجتك تحطك مثل التونة تحت الساطور واتوقع اول ماتبتدي براسك تطيره لك علشان ماتستغيث بالناس . |
يعني اقاربك يقولون لك تزوج و ( عيش حياتك ) ،،، وهو في واقعك تزوج و ( موت قتيل )
يا أخي طالما إنك سعيد معاها وحياتكم مستقرة بكل الأمور ، وهيه طبيعيه على حد قولك، ومافيها مرض نفسي كما توقعت باديء ذي بدء،،، إذآ هل تسمع كلام الناس وتدمر حياتك مثلآ ؟؟!! هل تغضب زوجتك وتجعلها تفكر بطريقة جنونية ؟،، أكيد هيه زوجة مخلصه لك لذلك كانت صدمة حياتها عند اخبارك لها بالزواج ولعدم وجود مبرر شافي لديك امامها ..... اتق الله في زوجتك،، ولا كل من قال تزوج يعني روح تزوج ،، الناس لايهمها خراب البيوت وممكن هؤلاء الناس متورطة وتعبانين بزواجهم لذلك احبوا انهم يورطوك معاهم ... اسمع قصص المتزوجين بأكثر من زوجة وانظر عن كثب لحياتهم ، ليس جميعهم لكن المعظم الا من رحم ربي .. قوة الشخصية ليس بعدم قولك لأقرباءك عما يحدث بينك وبين زوجتك ،،، قوة الشخصية ياأخي بأن تخبرهم وبحزم وبإصرار بأن يتركوك وشأنك وأن لايفكروا عنك ،ويقررو لك حياتك مثلما ارادوا ، فهي حياتك وكل انسان ادرى بوضعه ،، وأنت رجل ولك كلمتك أمامهم ،، لن ينفعوك بمستقبل،،،، ولا بعد ان يقع الفاس بالراس ،عندها سيكونو اول من يتركك ويتخلى عنك .... لا يعني انه تصرف زوجتك الجنوني هذا صحيح ولا مبرر لها ما تفعله ابدآ ،،، لكن انت السبب، ومن ادخل هذا الأمر على بيتكم .... قل لها لن اتزوج عليكِ ابدآ وانظر ماذا ستفعل ؟؟ |
| الساعة الآن 02:03 AM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©