|
هل أفقد الأمل أم أستمر في محاولة ارجاعها ؟
بسم الله الرحمن الرحيم
السلام عليكم ورحمة الله وبركاته اخواني لا أريد الاطالة عليكم اظن اغلبكم قرأ موضوعي السابق وعرف مشكلتي صارلنا 8 شهور منفصلين انا و ام ابني ومحاولة ارجاعها من قبلي مستمرة طبعا بين فترة وفترة عن طريق اهلها ولكن بدون فائدة . الآن طليقتي تريد ان ارسل لها اغراضها و ورقة طلاقها لاني لحد الحين كل اغراضها موجودة عندي وورقة الطلاق لم استخرجها للان من المحكمة . هالاسبوع بجهز الاغراض وباستخرج ورقة الطلاق . طبعا والدتها خبرتني بهالشي وقالت لي انت سوا الي هي تبيه وجيب اغراضها وورقتها وانت بعدك حاول وانا بحاول فيها حتى لو جبت اغراضها وو ورقتها والله يقدم الي فيه الخير قلتلها ان شاء الله بسوي الي تبيه ما اعرف الصراحة شو اسوي من بعد هالكلام احس معنوياتي لمواصلة المحاولة تحطمت وفنفس الوقت اريدها وماقدر اصبر عنها . كثير ينصحوني بالزواج بس انا ما متقبل مسألة الزواج بغيرها نهائيا وماريد اخذ حرمة واظلمها معي اخليها ديكور واعيش معاها بدون مشاعر وقلبي مع طليقتي وام ولدي . والله كنت مشتري اغراض حق الولد ومن ضمن الاغراض حاط هدية ورسالة لها ومن شدة الاحباط فكرت ما احطها فالاغراض بس بعدين قلت بسوي الي علي دام جايبنها ما برجعها . نصحوني الله يجزيكم خير محتاج مشورتكم ومساعدتكم الكل تعب من هالموضوع من الي حولي وحتى خلاص ما صرت افقتحه نهائيا حتى قدام اهلي الشخص الوحيد الي اتكلم معاه فهالموضوع هي والدتها فقط جزاها الله خير محتاج اسمعكم واسمع آرائكم ونصائحكم . |
رد: هل أفقد الأمل أم أستمر في محاولة ارجاعها
طيب كمحاولة اخيرة ارسلها روابط مواضيعك لو مافيها انتقاد لها من جهتك يمكن تعرف قد ايه انت متمسك فيها ولو ماغير فيها شي يبقا الشكوى لله
|
رد: هل أفقد الأمل أم أستمر في محاولة ارجاعها
اقتباس:
لما افقد الأمل نهائيا واقرر التوقف عن المحاولة فذاك الوقت برسلها روابط المواضيع وعاد يصير الي يصيير |
رد: هل أفقد الأمل أم أستمر في محاولة ارجاعها
اعتقد يا اخي
بأنك سويت كل الي عليك .. ممكن رفضها الرجوع إليك المقصد منه درس قاسي لك .. وربما هي بالغت بذالك .. وربما هي فعلا .. تريد الخروج من حياتك .. أعطي نفسك قليلا من الراحه وحاول تهدي .. الوضع بينكم .. وسوي لها كل شي تبغاه وانسحب بهدوء .. وابدأ بمعاملتها برسميه .. يمكن تحس بأنها ستفقدك .وتعطيك اشاره على رغبتها فيك .. |
رد: هل أفقد الأمل أم أستمر في محاولة ارجاعها
اقتباس:
بصدق ماصار عندي شي اسويه واساسا خلاص ماعارف شو اسوي عشان كذا فتحت هالموضوع خلاص بسوي الي تبيه كنت الفترة الماضية ما راضي اودي اغراضها بس خلاص ان شاء الله هالاسبوع اغراضها وورقتها بوديهم لها 8 شهور اختي وبعدها ما حست انها بتفقندني !!!!! على فكرة مابينا تواصل من زمان من بعد العدة يعني تقريبا من 5 شهور ما تواصلنا الا 3 مرات مرة كانت فبيتهم وجه لوجه ومرة بالتلفون ومرة رسالة على الايميل المرة الي فبيتهم بينتلها اني بعدني اريدها اما المرتين الباقيات ما كان فيهم كلام يخص موضوعنا . ارسلت لها رسالة اليوم مكتوبة بخط يدي مع هدية وحطيتها ضمن بعض الاغراض الي ماخذنها حق ولدي بينت لها فيها رغبتي بلم الشمل وارجاعها ونعيش مع بعض بدل هالشتات الي عايشينه من 8 شهور وذكرتها بأيامنا وذكرياتنا الجميلة الي عشناها مع بعض وذكرتلها بأنه شهر رمضان قرّب وفرصة نبدأ فيه صفحة جديدة كإشارة ضمنية مني اني اريد رد منها قبل شهر رمضان ماعرف اذا بتفهمني هذا اذا ردت علي اساساً وكاتبلها فيها كثير اشياء . والحمدلله على كل حال من الاحوال . مشكورة اختي على ردك بارك الله فيك |
رد: هل أفقد الأمل أم أستمر في محاولة ارجاعها
الله يفرج همك ويصلح زوجتك اخي استخير في ارجاعها اذا في رجعتها خير سيقربها ربي لك واذا شر سيصرفه الله عنك
|
رد: هل أفقد الأمل أم أستمر في محاولة ارجاعها
اقتباس:
من ناحية الاستخارة استخرت اختي اكثر من مرة بس ماعرف فداخلي احساس يقولي اصبر ولا توقف محاولات ماعرف هالاحساس ما يفارقني يمكن لاني انا السبب فالي صار هذا كله يمكن بسبب تأنيب الضمير واني اريد اصلح الي ضاع يمكن دعائي مصبرني ومقوني على الصبر عشان اقدر ارجعها بصدق ماعارف لنفسي ابدا ومن ناحية ثانية احبها والله ما اقدر اصبر عنها وعن ولدي اريدهم يعيشو جنبي تعبت من هالشتات والوحدة ذبحتني اليوم قابلت صديق من زمان ما تقابلنا انا وهو واستغرب يقولي شو مسوي بنفسك ليش كذا صرت ضعيف والله ماعرفت شو ارد عليه ولا شو اقوله . الحمدلله على كل حال والله يسر الامور |
رد: هل أفقد الأمل أم أستمر في محاولة ارجاعها
لاتفقد الامل اخي ،
الي بتزرعه راح تحصده فوض امرك لله فقط ، واطلبه تسخيرها لك خطوه الرساله حلوه ، والاحلي انها مكتوبه بورقه تقرائها اكثر من مره ، الكلام الطيب يحرك العواطف والرجال كل مايبين للمراءه انه متمسك فيها ، تلين معه اكثر والزن علي الاذان امر من السحر ! كيف علاقة المدام اخي بولدكم ، كيف حبها له وخوفه عليه ؟؟ |
رد: هل أفقد الأمل أم أستمر في محاولة ارجاعها
هلا بالطيب
كنت منتظر هاللحظه خلاص غير التكتيك طلقها وابتعد بعد عندكم طلقتين خلها اتجرب فراقك الحقيقي لو تبيك اب ترجع لك لو ما تبيك ما اظن الرجعه حلوه لك التشابه بيني وبينك كبير ياخوي واعتقد اني الوحيد بس انا سابقك وماره عليي الأحداث الي انت قاعد أتمر فيها النفسيه تعبانه والصحه انتلفت وهذا مؤشر خطير احس اني مطعون طعنات كثيره ومحتاج ابتعد ولا عاد فيني حييل للرجوع ابي ارتاح واعيش لأولادي في حديث عن الرسول صلى الله عليه وسلم كل ما اذكره احس اب تحسن كبير ((المؤمن القوي خيرٌ وأحب إلى الله من المؤمن الضعيف، وفي كلٍ خير، احرص على ما ينفعك، واستعن بالله ولا تعجز، وإن أصابك شيءٌ فلا تقل: لو أني فعلت كذا وكذا وكذا ولكن قل: قدر الله وما شاء فعل، فإن (لو) تفتح عمل الشيطان )) ( رواه مسلم ) عليك بالصلاة والدعاء ان الله يخفف عنك ويساعدك ويفرج همك ملاحظه اخيره: طليقتي لا زالت تسال الولد الكبير " شنو قال والدكم عني؟ " وتستجيب لطلبات خاصه للاولاد مع ان قانونا مالي حق فيها. وتستجيب للنصح بخصوص علاقتها مع اولادها. حصلت مواقف ومشادات نصح لها شخصيا لكن بالاخير تستجيب. مع كل ذلك محتاج أظل بعيد لاني الي ارتاح في الوقت الحالي. |
رد: هل أفقد الأمل أم أستمر في محاولة ارجاعها
اقتباس:
الامر كله بيد الله سبحانه وتعالى والحمدلله ادعو الله ليل نهار بأن يجمع شملنا ولكن من باب الاخذ بالاسباب اقوم بهذه المحاولات . والحمدلله يعني ذكرت فرد سابق على الاخت سديم يعني احساس عندي يقولي واصل أما بخصوص علاقتها بولدنا فهو حياتها تحبه طبعا وتخاف عليه وتهتم فيه بشكل كبير فوق ما تتصوري . |
| الساعة الآن 05:57 PM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©