|
لما تكون شاذ عن قبيلتك !
السلام عليكم ورحمة الله وبركاته
اخبار الجميع وعيدكم مبارك انا نزلت مواضيع سابقه عن بلاوي الي ربي بلاني فيها وانا متحمل وصابر عندي مشكله كبيرة قسم بالله تأزمنت نفسيا الله لايوريكم السنين كلها شلون عشتها رهاب اجتماعي ماعرف اتصرف وسوايس تحرشات اسمع كلام من الي رايح والي جاي وكلها الغلطة غلطة الوالد ماعرف يربيني مثل الرجال اقسم بالله على هذا العمر لازال عندي رهاب في مجالس الرجال وعمري 19سنه كم مره مليون مره اتفشل عند الناس حتى اذكر كنت عند بيت عمي ومابقى احد في الخيمة الا انا وعمي ابوي طلب اصب القهوة وانا انخرعت ماعرفت وعمي يطالع طبعا نظرات عادية وهو من داخل مصدوم قلت للوالد اللحين فلان الي هو ولد عمي بيجي والله فضيحة ي فضيحتي عيال عمي المبزره يصبون وانا ماعرف اتركوا ذاه المصيبه والطامة انا من قبيلة بدوية ومن قبيلة كبيره ولها سمعتها ولها تاريخها حتى استحي اذكرها لكم لاكن من باب لعل وعسى احد يساعدني قبيلتي ..............والله ما اتشرف اسم القبيلة ذي انا مايل بشكل كبير للحضارة وعارفين تصير فضيحة عند المجالس اذا كلامك مثل اهل الحضر ومحشومين والله موقصدي شي اقسم بالله بس غصب يصير كلامك وافعالك مثل البدو ولا منت رجال طبعا ماضيي قصة عن مليون قصة كل هذا من اهمال الوالد والله ي كم مره قعدت اصيح من الققهر والي يقهر ابوي يشوفني عادي ولا قبل كان مجنني في مجالس الرجال ومايدري اني خايف افضح نفسي والله فيني هموم الى دنيا الله يسامح ابوي مشكلته يخلي عياله ولا ينتبه لهم ولا يعلمهم الولد اذا ماتعلم من ابوه يتعلم من من قسم بالله كم مره اسمع كلام وتجريح من كل اقربائي ابوي عزلني عن الناس من يومني صغير حاذفني في بيت خوالي اروح معا الوالدة واجي قسم بالله عندي كلام واجد ومواقفي الي تفشل مالها حد كل هذا سنين احاول اطنش الكلام لاني حاط في بالي مستحيل اصير مثلهم ماعاد بقى وقت والله لو الود ودي اذبح عمري وارتاح او اهاجر وافتك طبعا الي صحاني سمعت كلام ثقيل من ولد خالتي قسم بالله كسرني كسر وهو صادق انا اشوف نفسي كذا والكلام صحيح قال انت ماطلعت على ابوك لا من اقوال ولا من افعال اذا حتى اخوي احيانا يعايرني اذا تهاوشت معه يالي ماتعرف تعزم وغيره من الكلام والله اني خايف اكبر ويوصل عمري 30 وزلابه ماعرف اتصرف في شي وافشل اهلي واغبنهم والله اقولكم مصيبه حياتي كلها مشاكل وهم وغم قبل امس صارحت ابوي وقلت له واختصرت كلامي وقال مافيك شي هذا كلامك مثلنا ولاتشك في عمرك شف فلان فيه كذا وشف علان فيه كذا مايدري عن خطورة السالفه الوالد قلب بشكل مخيف صار بارد وعادي مايهتم لي ولا قبل كان يحاول وانا ارفض قسم بالله تعبان نفسيا اقارن نفسي بالكل سواقة السياره بالموت عرفت اسوق ومشاكل واجدة طبعا انا 24 ساعه في البيت ماعندي اي اخوياء ولا ربي رزقني الا واحد وقد صارحني في عيب فيني وعدلته وكله من بعد عن المجالس الي يقهر ماعاد بقى للجامعه الا شهر واقدر اللحق على عمري والكل معترف اني كلامي مو مثل كلامهم والله اني ادعي ان ربي يفرجها علي والثقة عني انكسرت بعد ماسمعت الكلام من ولد خالتي وانا اكبر منه ب 3 سنين والله ماعاد اقدر اشكي همي لاحد واليوم حاولت افتعل مشكله عشان اقطع علاقتي بولد خالتي لاني من اروح احيانا اسمع كلام جارح وهو صحيح ومابي اكلمه في ذا الموضوع اذا عيال عمي بعضهم مايعرفني عشاني ما اجيهم انا قسم بالله مخنوق ان لله وان اليه راجعون اشوف نفسي انا الوحيد الي مبتلي بالمصايب قوية قسم بالله تعبت في طفولتي ومراهقتي انا بس احتاج اقوي ثقتي من نفسي عشان اقدر اعيش والله يعين |
رد: لما تكون شاذ عن قبيلتك !
حبيبي محمد واضح عليك انك حساس جداً و مبالغ جداً
مافي انسان يجي من بطن امه عالم مع الوقت و الاختلاط كل هذا يروح صدقني و الدليل انك قدرت تتعلم السواقة وخذهل نصيحه اذا جلست تلوم نفسك و تراقب نفسك صدقني راح تتعقد |
رد: لما تكون شاذ عن قبيلتك !
الله يفرج همك يإرب عندي كلام كثير بكتبو ان شاء الله.بس حاليا الجهاز مايساعد
|
رد: لما تكون شاذ عن قبيلتك !
وهذا هو اخ محمد صرت تعرف تسوق وبتدخل الجامعه ما شاء الله متقدم .. لا تقعد تلوم نفسك كثير
وتقارن نفسك بغيرك .. يمكن توجهك ومستقبلك مختلف عن الي حولك انت بس اجتهد وركز بالدراسه وان شاء الله مستقبلك وشخصيتك راح تتغير مثل ما تريد واكثر |
رد: لما تكون شاذ عن قبيلتك !
انت حساس وتضخم الامور الصغيرة ..
صدقني الناس مايشوفون ان عندك مشكلة .. انت بس اللي تحس داخليا .. تنقصك الثقة بنفسك .. طور من شخصيتك .. اجبرها انها تتفاعل مع الناس وتختلط بهم .. تحدى نفسك وقول انا اقوى من كذا وانا افضل وانا اقدر اصب القهوة .. لو غلطت مرة مرتين ثلاث بعدها بتتعلم .. محد يطلع للدنيا عارف كل شي .. بس الدنيا صعاب وتحديات .. واحنا عشان نتعلم الشي لازم نسويه ونعيده لين نتقنه .. |
رد: لما تكون شاذ عن قبيلتك !
حاول ان تقرا كتب و مقالات و تسمع نشرات اخبار تفيد بتعلم اسلوب و منطق الكلام
ثانيا حاول ان تكون قوي الشخصية و لا تضع كل تفكيرك بان تصبح كالآخرين من حولك كون شخصيتك المستقلة, اشغل نفسك بالدراسه وضع لك هدف في الحياة اهم شي ان يكون هدفك تكون راضي عن نفسك و لا يكون الهدف ان يرضى الآخرين عنك |
رد: لما تكون شاذ عن قبيلتك !
قريت كلامك ..ولا حسيت في شي من اللي تقصده ..كلامك مفهوم ..
المشكله فيهم ..هم اللي عاملين لنفسهم كوكبه خاصه فيهم .. اذا ما يلفتك طريقه كلامهم ..شي طبيعي ما راح تتكلم مثلهم .. واترك عنك ابناء خالك ..من وصفك لهم شكلهم من النوع اللي يقلل من امام الاخرين عشان يظهر نفسه ..ويخفي عيبه او قلة ثقته .. يعني اذا اشخاص آخرين ستجدهم يتصرفون معهم نفس التصرف ..ولانك سكتت عنهم خلاص اعتبروك كذا ... ليس مهما ما يعتبرونه هم ..المهم انت ما ترى نفسك .. اكمل دراستك ...ولا تقول ما باقي وقت عشان اتعلم شيء ... يا اخي اذا في ناس سكنوا البلاد واصلوهم مختلفه ..وتراهم يقلدون اهل البلاد الاصلين .....بعدين هذا التفكير من قبليتك واختلافتها قديم جدا والناس تطورت لا تفكر كذا ....انصحك ان تجلس مع الحضر حتى تتطور من مواهبك ونفسك بسلام ..واذا قالوا لك قل هم كيفي ..هذا جوي .. او انك تجلس مع بدو اخرين غير قبللتك ... في الجامعه ستختلط بالاخرين ..ونتحتك مع اشخاص من مختلف الجنسيات ويجب ان تتعامل معهم وتتقبلهم ...اترك عنك ايام المدرسه ...كلهم نفس الحي في نفس المدرسه ...في الواقع هم يستعبون كثيرا لانهم يجدون الجميع مختلف عنهم .. اذا انت بتقول ان مختلف عن قبليتك ..ما بالك بالذي يولد من ابوين مخلتفين الجنسيه ..! |
رد: لما تكون شاذ عن قبيلتك !
اسمع كثير بمجال تطوير الذات
وابحث عن الكتب الي تخص هالمجال والاهم حافظ على صلواتك واذكارك وخاصه دعاء الهم فهو عن تجربه يريح بالك ويبعد همك بحول الله وانت رجال وهذاك ماشالله بتدخل الجامعه وحكاية اعزم ومااعرم توك صغير وبتتطور ان شالله اذا درست الجامعه واختلطت مع الناس حاول تختار قسم حلو وشد حيلك علشان تبرز بقبيلتك وتصير فخر لهم فيك باذن الله دايم ادع الله بالي تتمناه الله كريم ورحيم لكن يريد منا اللجوء له والدعاء ليستجيب لنا فهو القائل سبحانه ( ادعوني استجب لكم ) |
رد: لما تكون شاذ عن قبيلتك !
ابدأ مع نفسك صفحه جديده خلاص اللي صار زمان انتهى مانقدر نغير الماضي خلي اللي صار فرصة تتقرب من الله حافظ على الصلاه بوقتها وادعي الله واستغفر شي ينفعك في الدنيا والاخره حاول تقوي نفسك ولاتتحسس وتلوم نفسك على كل حاجه الدنيا تجارب ان شاء الله مرحله وتعدي لاتضيع حياتك بااوهام |
رد: لما تكون شاذ عن قبيلتك !
أخي الكريم : محمد ، تحمل ثرثرتي وكلامي :
أولا : اعلم أن الماضي قضى وانتهى ، ولا يمكن أن نغير فيه شيئا ، لا يمكن لا يمكن ، من إهلاك النفس والعقل أن نفكر فيه بألم ، هناك من الناس من جعل الماضي كالوحل أو القيد الذي يقيد رجليه فلا يتقدم ، وهناك من الناس من جعل الماضي سببا للتعلم وتصحيح الأخطاء ، فكن من النوع الثاني. ثانيا : وكل منا له ماض سيء ومليء بالأخطاء ، وكل خطأ نقع فيه يكون سببا لباب كبير من العلم والتجربة ، كلما كان الخطأ فادحا ، كلما كان التعلم أفضل وأقوى. ثالثا : الأخطاء والذنوب ، نعمة من الله عز وجل ، حتى نتوب ونتعلم ويغفر الله لنا ، ونلتجىء إلى الله ، ونكون دائما قريبين منه سبحانه ، قال صلى الله عليه وسلم : (والذي نفسي بيدِه ! لو لم تذنبوا لذهب اللهُ بكم ، ولجاء بقومٍ يذنبون ، فيستغفرون اللهَ ، فيغفرُ لهم ) صحيح مسلم. رابعا : كل ذنب مهما كان ، مهما كان عظمه وكبره وقذارته ، فالله جل جلاله يغفر لك ، بل ويبدل سيئاته حسنات ، وحين يغفر الله للعبد فإنه يرحمه ويوفقه وييسر له أموره ويستره ويصلح شأنه ، فتقرب إلى الله وأكثر من الاستغفار فهو مفتاح كل هم ، وأكثر من الدعاء ، اسجد لله وأخرج دموعك وهمومك في سجادتك ، ستجد اللذة والخير والنور والسعادة. خامسا : صورتك عن نفسك ليست صحيحة ، فأنت تصف لنا نفسك كما تراها أنت لا كما يراها الآخرون ، أنت شخص آخر في نظر الآخرين ، أخي محمد : دون مبالغة ، هناك ملايين الناس يتمنون حياتك وصفاتك الجميلة التي فيك التي لم تنتبه لها ، لأننا نحن البشر نركز في السلبيات فقط ، بل هناك بشر يحسدونك ويغبطونك ويريدون 10 % من حياتك . سادسا : كلما زاد همك فتذكر أن هناك من هو أشد منك هما وذنوبا وأخطاء وتعبا. سابعا : لا بد لا بد أن تحسّن علاقتك مع الله ، فحين تحسن علاقتك مع الله ، يحسن الله كل شيء في حياتك ، الصلاة ، الأذكار ، القرآن. ثامنا : صب القهوة ، إكرام الضيوف ، وغيرها من المجالات الاجتماعية ، حلها مع كثرة التجارب وكثرة ممارستها ، وهي حاجز بسيط يذهب ويتلاشى ، وخاصة حين تبدأ بعلاقاتك جديدة مع أناس لا يعرفونك ، هنا تتجرأ أكثر وتتعود أكثر ، فأنت الآن على أبواب الدخول إلى الجامعة ، حاول أن تتعرف على أصدقاء جدد ، واعزمهم في بيتك أو في مطعم أو في حديقة وأكرمهم ، ستجد الحاجز يذهب مع الوقت دون تعب ودون جهد ، وستتعجب أن الموضوع بسيط جدا. تاسعا : الجامعة عالم آخر سيزيد ثقتك بنفسك ، في الجامعة أنت مسؤول عن نفسك ، لا طابور صباحي ولا اتصال بولي أمر ، أنت حر في الجامعة ، كثير من الشباب الذين مثل مشكلتك ، شفاهم الله بعد دخولهم الجامعة ، بدؤوا بعلاقاتك جديدة ، اهتموا بدروسهم ، وثق منهم أساتذتهم ، بدؤوا في تنظيم وقت للدراسة ووقت لممارسة الرياضة ، واشتروا ملابس جديدة ، وأدوات جديدة. عاشرا : واحمد الله أنك وصلت إلى الجامعة ، وهذا دليل على قوة عقلك وتفكيرك وتميزك الذهني ، هناك آلالاف الشباب الذين لم يقدروا على الوصول بسبب معدلاتهم الضعيفة وبسبب ظروفهم القاهرة ، وبعضهم بسبب الأمراض العضوية والنفسية ، هناك آلالاف يتمنون الدخول إلى الجامعة ولو دفعوا ملايين الريالات لكن لا يقدرون. الحادي عشر : هناك علاج القرآن ، القرآن شفاء ، الوصفة سهلة جدا جدا ، تتوضأ تفتح المصحف على البقرة أو على أي سورة تقرأ صفحة صفحتين عشر صفحات قدر استطاعتك ، وتنفث على نفسك بنية الشفاء من جميع الأمراض ، ستجد والله والله والله تغيرا كبيرا في حياتك ، لكن توكل على الله ( وإذا مرضت فهو يشفين ) الثاني عشر : تحتاج إلى علاج سلوكي وهو القراءة في كتب تطوير الذات ، تقوية الثقة بالنفس ، والاستماع للمحاضرات في اليوتوب في هذا الموضوع واستمع : للدكتور عبد الكريم بكار ، إبراهيم الفقي ، وغيرهما. الثالث عشر : هناك جلسات سلوكية ، تجلس مع شخص متخصص تتكلم معه يجيب عن أسئلتك ومشاكلك ، يوجهك توجيها صحيحا ، وتقرأ معه كتابا وتتناقش معه توجد هذه الأمور كما سمعت عند عيادات ميدي كير في الرياض ، وعندهم أيضا استشارات هاتفية تتصل وتستشير الدكتور عبد الله السبيعي أو أسعد صبر . الرابع عشر : لا تلم أحدا من أهلك ، صحيح عليهم جزء من الخطأ ، لكن ابدأ بإصلاح نفسك ، وإنقاذها من هذا التعب وهذا الهم. والمعذرة على كثرة كلامي ، أسأل الله لك التوفيق والإعانة. |
| الساعة الآن 10:14 PM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©