![]() |
أتمنى تفهموني من الغلطان!!!
السلام عليكم
ماني عارفة وش قاعد يصير .. هل هو عيب فيني ولا عيب في زوجي .. ولا اثنيناتنا محنا فاهمين بعض .. ماأعرف من آخر مشكلة صارت بيننا واللي سافر فيها زوجي لاهله في أسبوع الاجازة ورجعنا الحمدلله أفضل من الأول وماعاد صارت بيننا أي مشكلة ماعدا لحظات بسيطة وتروح بوقتها وأغلبها بسبب عصبية زوجي بس صرت أطنش وأعدي .. طبعا هو وعدني بسفرة ونسي وعده .. جاته زيادة حلوة في راتبه ووعدني بهدية وأيضا طنش .. قبل ثلاث أيام طلبت منه نسافر منطقة معينة نغير جو لأن لي فترة ماطلعت أو سافرت حول الشهرين تدرون وش رد علي !!! قال المصروف عليك... أنا وقتها أخذت الموضوع بمزحة وسكتت .. المهم أمس الجو كان حلو وقال العصر وش رأيك نطلع المنطقة الفلانية .. طلعنا ومامدانا ننزل من السيارة إلا أتصل والده يقوله أنه بنفس مدينتنا عنده شغلة معينه وطلب منه يجي له .. قاله زوجي نص ساعة وأكون عندك .. قلت له يلا نرجع .. ركبنا السيارة وحنا على الصامت أنا منتظره يعتذر عن الطلعة اللي ماتمت لكن ولا شيء كل همه يوصل بسرعة لدرجة السيارة الجديدة أكلت في الحفر والمطبات وانا ولا تكلمت لأني لو تكلمت راح يفسر كلامي تفسير خاطئ كالعادة.. ورجعني البيت قبل أذان المغرب .. بعد كم دقيقة اتصل وقالي جهزي دلة القهوة والتمر والفناجيل بجي اخذها بعد نص ساعة .. جهزتها وجاء اخذها .. ووالله ولا سألني تبين شيء تحتاجي شيء لانه راح يطول مع أبوه واللي جاي معه .. المهم أنتظرت لحد11بالليل وأنا جوعانة وماعندي أغراض وهو ولا فكر .. وارسلت له اني بنام لاني من الفجر مانمت وطلبت منه إذا يحتاج شيء يصحيني .. وقالي نوم العوافي..نمت بالصالة عشان الدفاية لاني كنت حآسة ببرد .. وأنا مقهورة ليش مايسأل يطمن .. أبد ولا شيء .. المهم جاء وطلب مني ادخل انام بالغرفة قلت له مافيني خلاص بنام هنا .. قال ماأعرف أنام وأنتي منتي جنبي ضحكت بهدوء وقلت لاماعليك بتنام..المهم قال جبت عشاء معي قومي تعشي قلت ماأبغى خلاص بنام .. الظهر رجعني من الدوام .. وطلع لأبوه وماعاد رجع الا قبل المغرب .. أنتو متخيلين رجعني بدون مايسأل تبين شيء تحتاجين أغراض .. أكل .. رجع قبل المغرب دخل نام .. صحي والقهوة جاهزة .. تقهوى وسولفنا شوي بتحفظ طبعا .. طلع يصلي العشاء .. اتصل تبين شي .. قلت اكيد أبي عشاء جوعانة .. قام عصب يقول ادري تبين عشاء وش تبين .. قلت عادي الشيء اللي بتجيبه باكل منه قام يعصب يقول انا ماباكل وهو معصب ويرفع صوته .. قمت قلت له خلاص ماعاد أبي شيء قفل السماعة.. قمت سويت لي شيء في البيت وحطيته وأكل شوي معي .. وبعدين قعدت اعاتبه أنه من الصباح ماأكلت شيء وانت تعصب علي .. قام يسكتني يقول اسكتي أحسن لك .. قلت ليش وش بتسوي بتطلقني .. عادي فكة .. سكت وماقال شيء.. على فكرة زوجي صار ينتقد كثير ويزعل كثير .. السبت اللي فات في الاجازة .. طبعا صحي الساعة11وراح جاب أغراض للفطور .. وانا متعودة يصحيني يقرب مني ويصحيني بهدوء .. أنا حسيت فيه بس مابغيت أقوم من نفسي بغيته هو يصحيني ..طبعا زعل لاني ماصحيت .. وراح سوى له فطور لحاله وفطر وماخذها زعلة .. المهم أنا صحيت صليت الظهر وجهزت فطوري وبعد مارجع من المسجد قال تفطرين وتخليني طبعا هو قاعد يستفزني ..المهم قلت له أني صاحية قال ليش ماصحيتي طيب وسويتي الفطور قلت له انت عودتني تصحيني .. وبعدين مافيها شيء حتى لو نايمة تجي تصحيني أسوي لك اللي تبي .. قال خلاص مليت أبي احس أني متزوج واصحى الاقي زوجتي مسوية الفطور قبلي .. قلت له من فين اسوي الفطور ولا في اغراض والغاز يومها مخلص .. قال عادي انتظري أجيب الغاز وسوي .. قال ليتني أحس إني متزوج وزوجتي تهتم فيني. . قلت يعني أنا ماأهتم فيك قال لا .. قلت أوك .. وبالرغم من كذا طنشت الموضوع ونسيته وتعاملت معه عادي ولا كأنه صار شيء.. على فكرة زوجي يذكرني بزوج كنافة نفس الاطباع بالضبط.. |
رد: أتمنى تفهموني من الغلطان!!!
أين المشكلة يا أختي ؟؟؟
خلافات بسيطة جدا و لله الحمد ... لكن لي عليكِ ملاحظتان حيرتاني : أولهما : كيف تحتاجين أكلا و تتحفظين سؤاله ؟ فما مانعُ الطلب ؟؟؟؟!!!! ثانيهما : غضبك و صمتك ليسا في محلهما ، فكان من الأجدر توضيح ما انتابك من مشاعر ، طالبةً التعويض في وقت لاحق ، فما هدفُ الكبت و الصمت هنا ؟؟؟!!!!!! |
رد: أتمنى تفهموني من الغلطان!!!
اقتباس:
اللي مانعني أسلوبه .. زوجي أي شيء مني يفسره تفسير خاطئ .. يعني لو مثلا طلبت منه أمس وهو مع والده إني أحتاج أغراض او أكل بيقول تبين تشغليني عن أبوي .. |
رد: أتمنى تفهموني من الغلطان!!!
اقتباس:
واضيف عليها .. هذا ريلج ، ما فيها شيء لو منج ومن نفسج اتصلتي فيه وبوء ولطف... حبيبي اذا ما عليك امر تشتريلي عشى.. ليس تنتظرين المبادرة في امور بسيطة مثل هذي! وجوابا على سؤالج : انتي الغلطانة |
رد: أتمنى تفهموني من الغلطان!!!
زوجي يطلب الحب والاهتمام والكلام الحلو وفي المقابل مايبي يعطي شيء .. عنده قناعة إنه إذا دلعت المرأة تمشيك على كيفها ..
|
رد: أتمنى تفهموني من الغلطان!!!
اقتباس:
شكرا لك........ |
رد: أتمنى تفهموني من الغلطان!!!
اقتباس:
لكني لك سائلة أختي الكريمة ، عن كيفية طلب الغرض منه ؟ و لنفترض جدلا ان رسالتك كانت قمةً في التهذيب و الادب ، و قوبلت برد مجحف قاسي ! هنا لو كنت مكانك لسألته سبب تعامله السيء معي ، و يكون بهذه الشاكلة : فلان ، انت ( اذكر محاسنه و قدره عندي ) لكني اراكَ أخطأت في حقي و أصبتني بظلم ، فأرجوك التراجع عما بدر منك في ( ذكرُ الموقف ) فهذه ليست من شيمك الطيبة و أخلاقك النبيلة ...! انتهى ثم إطوي الصفحة و تعاملي بشكل عاااادي حين اللقااء ، فالرسالة وصلت ، و المقصد بُلِغَ ... و هذا الاسلوب يأتي أُكله بلا ريبٍ وشكٍ بإذن الله الواحد الأحد !! الحوار يا أختي ..... عمادٌ اساسي تقوم عليه الحياة الزوجية ... |
رد: أتمنى تفهموني من الغلطان!!!
الصراحة انت الغلطانه ، كثير تتغلي وتتدلعي، وزوجك مو زي زوج كنافه، وانت مو زي كنافه😜
|
رد: أتمنى تفهموني من الغلطان!!!
اقتباس:
فكيف تفسرين موقفه حينما كنتِ نائمة ؟؟ |
رد: أتمنى تفهموني من الغلطان!!!
جميل كلام لوفتي 👍
كل شكواك هذي دلع طيب هذا هو جاب لك العشا وقالك قومي تعشي ورفضتي !! نصيحه دامك كسبتيه وتحسن وضعكم لاتخسرينه مره ثانيه . |
الساعة الآن 01:46 AM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©