|
تقريري الى سحر نيوزلندا // دراسه + سكن مع العائله
السلام عليكم ورحمة الله وبركاته راح اقولكم ياعيال ويابنات تفاصيل رحتلي الى نيوز لندا من طقطق الى السلام عليكم ... في البدايه رشحوني عملي لدوره لمدة ثلاث شهور مدفوعة التكاليف اي يعني مدفوعة الرواتب لمدة ثلاث اشهر .. فا الحمدلله بعد الترشيح والخ الخ .. تم تحديد لي 3 دول نيوزلندا و وكندا وامريكا فاتم الاختيار على نيوز لندا بعد تفكير طويل اخذ مني قرابت الشهر من مشاورات واستفسار والخ الخ وبعد الاتفاق مع نفسي قررت السفر الى نيوز لندا :21: وبدت رحلة البحث عن التذاكر في المكاتب والقلق والي يقولك 6000 والي يقولك 5000 فا الزبده عشان مااغثكم وماابثركم تم اختيار طيران الكاثي باسفك الي هو طبعا الطيران الصيني .. طبعاً طيران محترم واخذت التذكره بحدود 5500 ريال وتم ولله الحمد قص التذكره وتحديد موعد الرحله ... وابتدى وقت شراء الملابس .. والروحات والجيات والاتصالات من قبل اشخاص في المنتدى راح اعددهم لكم وهم لهم الفضل الكبير في تسهل اموري في نيوز لندا طبعاً اخوكم ماخلى ماكان ماطبه في اسواق الرياض ومافيه ملابس شتويه الا شريتها لان تخبرون نيوز لندا كان عندهم شتاء يعني مطر وثلج وبرد والي تبون شرينا الملابس وشرينا العطور وغيرنا النظارات ورحت لطيبه والعويس وتم شراء 8 بجائم داخليه على اساس امي القصيميه موصيتني اروح اشتريها من هناك طبعاً كانت رحلتي مابقى عليها الا كم يوم واسافر .. وبعد هذا كله بدو الربع يتوافدون علي وعزايم والخ الخ على اساس اني انا يعني الي يجمع العيال دايم والتكيه دايم تكون عندي المهم بعد مابقى على السفر يومين بديت ارتب اغراضي واضبط الشنطه في هذا الوقت كانت الوالده تترقب الاوضاع وتناظرني وانا راحي وجاي وكنها حاقده علي بس مدري ليش فا تخبرون قلب الام شو بيعمل في هل الوقت المهم رتبت الشنطه وجهزتها وصرت اشيك على اموري الماليه واموري المعنويه والنفسيه وبديت اشيك على المواقع الخاصه في السفر والنصايح والخ وعشان ابراء الذمه موقع العرب المسافرون فادني كثيررر مره مره وخاصتاً بوابة نيوز لندا ماقصرو في معلوماته وتقاريرهم وكلش جزاهم الله خير قربت الرحله وباقي يوم على السفر ونبضات قلبي تتسارع وتتسارع وتتسارع وتتسارع وتتسارع وتوووووقفت جاء موعد وداع الوالده طبعاً انا من النوع الي ماعمري هلت الدمعه مني في مواقف زي كيذا لاكن هل المره حاولت اني ماابكي قدام الوالده لاني ماحب هل المواقف ابد ودعت الوالده وكن واحد قاطع مني ضلع طلعت من البيت وجاء اخوي خلووود يسمكني مع رجولي ويقولي وين بتروووح انا هنا ماقدرت امسك نفسي وحضنته وبكيت شوي وانا مستغرب من نفسي كيف بكيت قدام طفل صغير عمره لايتعدى الـ 5 سنوات لاكن عرفت انها البتاعه الي قسمت ضهر البعير مشيت وقفيت وخليت كل العالم وراي .. المستقبل .. المستقبل .. ولقة العيش الكريمه هي السبب هي السبب ركبة مع العيال بسياره وكلهم يضحكون معي وسواليف وذب وانا معاهم ومو معاهم مومصدق اني ببعد عن اهلي فتره طووويلــه ..كيف كيذا هل انا صح الي سويته ولا خطأ .. ماعمري ترددت بشي او اعدت التفكير في موضوع الا هل الموضوووع .. عموماً وصلت مطار الملك خالد الدولي .. والعيال ينزلون عني الشنطه وانا واقف اناظرهم وعارف اني بشتاق لهم حطو الشنطه ودخلو معاي جوى المطار ووصلنا الى الحد الممنوع فيه الدخول الاللمسافرين وقتها قالي العسكري خلاص انت رح وهم يرجعون قلت له يبن الحلال خلهم يجوون معي تكفى عيا قال النظام نظام واناظر العيال واشوف عيوننهم يعني مقدر اوصف او اعبر بس ناظرت في عيونهم وقالي واحد منهم خلاص يا ابو احمد بتخلينا قلت لهم ياعيال ترى الي فيني يكفيني لاتزود جرحي ترى جرحي بليغ جو كلهم فجأه وحضنوني وضمووني ودموعهم تسبقهم وانا لاحول لي ولاقوه كانو اربعه وكلهم يبون اتكلم وانا اصلن على جرييف مابي اقول شي عشان ماابكي دفيتهم وقلت لهم خلاص روحو ومشييييييييييييييت ومشييييييييييييييت ولا التفت وبعد كيذا وانا ماشي جووو ناس ثانين اعرفهم ونادوني عشان ارجع اسلم عليهم اقول في نفسي وش ذي السفره الي كلها صياح رجعت وسلمت عليهم وانا دمووعي على خدي شلاللللللل خلصت ورحت انتظر الرحله في صالة الانتظار وطبعا وانا انتظر راح اوريكم معالم نيوز لندا ومعلومات عنها هذي خريطة نيوز لندا وموضح فيها معالمها بي العربي http://img155.imageshack.us/img155/5666/22776422.jpg وهنا بوريكم معالم نيوز لندا وصور لها قبل مانتعمق هذي الصوره الثانيه إضغط على الصورة لتكبيرها ... أبعاد الصورة الأصلية 800x510 وحجمها 150 كيلو بايت . هذي صور مقتطفات لنيوزيلند http://a7la-love-group.com/Pictures/...age012_002.jpg وتابعو مووضعي من الردود لاهنتم ملاحضه // هذا تقريري تعبان فيه لي سنه كامله وانا كاتبه فيه منتدى ثاني بيوزر ثاني والي يبي اثبات مستعد اثبت له صحة كلامي |
كان باقي على رحلتي قرابة النص ساعه
وانا متوتر لأبعد درجه وانا اقول في نفسي يبن الحلال اذكر الله وتعوذ من ابليس اول مره اشوف نفسي متوتر بهشكل قلت لنفسي خلني اروح اصلي لي ركعتين كوود ان الله يفرج همي رحت وصليت وتعوذت من ابليس وبعدها شافني واحد مطوووع وقعد ينصحني وكيذا وانتبه لنفسك والخ الخ قلت له جزاك الله خير .. وشكراً وقمت المهم جلس جمبي واحد دكتور يسولف علي وين بتروح ووش بتسوي تخبرون بثارة السعوديين قلته بدرس والخ ودوره :21: قالي تدري ان الطيران الصيني هو اكثر طيران حوادث .. فجأه التفت عليه .. قلت له وش تقول قالي ايه والله ياما طيارات طاحت من هل الخطوط .. :d ناظرت فيه قلت له من جدك قالي ايه قلت وش دراك ومن وين جايب هل المعلومات قالي انا ادري واعرف هل الخطوط المهم قل له يبن الحلال تعوذ من ابليس انا بركب هطياره الحين .. قالي انا قلت لك وانت بكيفك :23: قلت لنفسي لحوووول القاها منك ولامن اخوياي ولا من اهلي ..:14: وش ذي السفره الي كلها قلق .. جاء في بالي قلت ياخوي ماعاد ابي اسافر ابي الفكه بس المهم فتحو بوابة الطياره واعلنو على الرحله الي متوجهه الى هونج كونج لان انا اصلن خط رحلتي كتالي الرياض - هونج كونج هونج كونج - اوكلند طبعاً الرحله تستغرق من الرياض الى الصين تقريباً 10 ساعات ومن هونج كونج الى نيوز لندا 12 ساعه يعني المجموع كله 22 ساعه يعني ماعي تعب ومعاي فكك ومعاي نوم ونفس ذاك الوقت كنت مسافر في رمضان كان باقي على رمضان حوالي 8 ايام وينتهي المهم ركبت الطياره وتوكلة على الله ونادى الكابتن اربطو الاحززززمه انطلااااااااااااااااااااااااااااااااق طبعاً مااخفيكم ياعيال امتزجت مشاعر الفرررح ومع الحزن لاكن من بعد مااقلعت الطياره اموري زانت وانبسطت شوي قمت افتح الشاشه حقت الطياره واتفرج على الافلام والحركات وصديقكم زقرت ماله ولا عليه مستريح البال لا قيلاً وقال شاري الراحه ومالي بل هموم المهم وانا اتفرج على الافلام جاء ذاك الدكتور وقالي تسمح لي اقعد جمبك قلت افا عليك حياك الله قمت وجاء قعد جمبي ويسولف ويخربط ووش اخبارك وشلونك وش علومك بخير امورك زينه اخبار الاهل << صدع راسي وانا ارد طيبين الله يسلمك طيبين الله يسلمك وش اخبارك الله يسلمك الله يسلمك الحمدلله وانت وش مسوي الله يسلمك وبعد هل الاستلام ديور علي بهجمه مرتده مباغته وانفررد فيني وقال زي كيذا والله ياعيال وهو لابس النظاره قال .. هل تعلم ان المحيط الهادئ هو اخطــر محيط في العالم . . قلت له لا والله مدري شلون يعني اخطر محيط قالي ياصديقي انا اثقفك اكثر ناظرت فيه قلت ايه اسلم سلون مافهمت قصدك قالي جميع الطائرات تسقط في المحيط الهادئ .. قلت يبن الحلال وش فيك انت علي يوم احد مسلطك علي قالي يازقرت انا ابيك تقوي قلبك .. قلت له يبن الحلال وش اقوي قلبي هذا موت تراك لعبت في نفسيتي اسكت تكفى وغير الموضوع المهم سكت وقال بكيفك بس لاتجي تسألني مره ثانيه عن الحوادث الجويه قلت له يبن الحلال منيب سألك رووح بس الله يستر عليك ابشركم ياعيال الرجال راح من هنا وانا الي قمت اوسوس من هنا واقول في نفسي انا وش خلاني اروح لنيوز لندا والله لوقاعد برياض اشررف واحسن المهم جاني النوم ونمت طبعاً النومه بايخه كل شوي قايم مرتاع خايف الطياره تطيح وبعد 5 ساعات من النوم المتقطع جت المضيفه وقالت لي hiiiiiiiiiiiiiii قلت لها هلا والله .. ناظرتي قلت له سوري معليش نسيت حطت لي الاكل وراحت وانا اتفرج على الافلام والاغاني والقلق |
اذا فيه اقبال على الموضوع وتشجيع كملت او اذا كان غير كيذا ماراح اكمل |
المهم يوم صحيت واكلت وخلصت الحمدلله تعرفت على واحد ياباني اسمه شوتــا من طــوكيو الشخص هذا وش اقولكم محترم شويه عليه زقرت شويه عليه :22:
قعدت اسولف معه اقوله وين راح ووش عندك رايح على نيوز لندا قالي والله دراسه وبزنس قلت بزنس وش قال .. ياحبيبي انا انسان احب شي اسمه سياكل وانا راح نيوز لندا ادرس انجليزي عشان يساعدني في البزنس حقي طبعاً انا قلت في نفسي يلعن ام الفااااضي << تفكير سعودي المهم بعدها صار يبربر علي واناصرت ابربر عليه الحلقه الاخيره صار الرجال داشر ### والخ الخ وكانت فيه سواليف جانبيه بس .. مقدر اقولها .. المهم قربنا لي الصين او بمعنى اصح مطار هونج كونج فاجت المضيفه الصينيه الي ماودك الا تخليها مداليه بفتاح السياره بليييز اربطو الاحزمه .. واحس انها تقول بداخلها ياكلب اربط الحزام المهم نزلنا مطار هونج كونج وكان الانتظار عندي ساعه واول مانزلت قلت لنفسي ياصديقي وراه ماتتمشى في هل المطار الي يوسع الصدر والله ويجيكم صديقكم ترانزيت ويتمشى ويتفرج وحلويات واكل وشغل وردي وكان باقي على رحلتي 10 دقايق واركب الطياره قلت لنفسي خلني بس اروح ادخن قبل لاتطير الطياره والله ياعيال لو تشوفون مكان التدخين حقهم كنه مجلس كنب ومرواح وتكييف ومويه مجانيه وعلك يعطوونك هناك الله يخلف علينا ركبت الطياره ومااخفيكم ان الرحله كانت متعبه متعبه مره لدرجه اني بغيت انسدح في الارض من التعب حاولت انوم ماعرفت والله ابتلشت بعمري المهم على حضي لقيت نفس المضيفه الي ذكرتها لكم من اول قالت لي وش فيك قلت لها يابنت الحلال انا تعبان وابي انوم وعندي عمليه وكيذا ولازم اتمدد شوي قالت لي ولايهمك ياصديقي تعال معي رحت ادربي راسي وراها وقالت هذي خمس كراسي فاضيه انسدح واي شي تبيه نادني واجيك .. تشكرت منها .. ونمت وياحليلها كل شوي طاله علي وتقول تبي شي انادي لك الدكتور والله والله انها انسانه سحررريه .. وبعد كل هل الافلام ,, اعلن الكبتن قرب مطار اوكلند واربطو الاحزمه وانا الي انط على الشبااااااك واناظر .. سبحان الله تغيرت التضاريس وانقلبت الارض من مشهبه الى خضاااار وانهااااار وغيوووم .. شي سحري سحري سحري لحضه بيني وبين نفسي تنهت وقلت في نفسي ايه الحين الواحد يقدر يلعب كووره بدون عج وقلق هبطنا في المطار واعلن الكبتن ان درجة الحراره في مدينة اوكلند 2 تحت الصفرر يوم قال كيذا انا وجهي .. صار الوان وصديقكم لابس برمودا وتي شيرت عادي يعني بياكلني البردد نزلنا من الطياره واناتعبان اول مانزلت تغيرت الوجيه السعوديات خربوها فتشو وهل البناطيل واشكال استغفر الله .. الا واشوف هل النيوز لنديات الي يوسعون الصدر شقر وعيون زرق واجسام يالله من فضلك :d رحت عند الجوازات وقامو يسألوني وش عندك جاي الخ الخ .. قلت لهم يارربع انا جاي دراسه + سياحه .. قالو لي ماعليه يصير خير وفيه واحد يناظرني طوويل .. حسيت اني بفلم امريكي يقول انت انت شغلك مايطمن قلت له وش فيه شكلي مايطمن قالي الجرح الى علي خشمك من وشو .. قلت له حادث قديم قالي ايه حادث قديم رح رح هناك بوابه رقم 4 .. قلت في نفسي خلاص شكله ذا بوديني جونتنامو رحت بوابة رقم 4 واثر كل العرب رايحين لهل البوابه بما فيهم السعوديات الي تفصخو اول مادخلت صار واحد يسلم علي نيوز لندي وش عندك هنا وانا اصلن احسبه جايمن سفر زيي اثره طلع استخبارات قلت له مالك دخل اومشي << ترى قلت له كيذا على اساس اني مالي خلق ولا العاده اسولف بس ربي فكني منه دخلوني بغرفه والله ياعيال ماتشوف الا مرايات .. وانااعرف انهم يناظروني واسوي نفسي انا الولد المحترم الي مالي دخل .. دخلت وحده قالت افتح الشنطه وتبعد .. قلت في نفسي ذي وش تحس فيه يعني بحط قنبله بشنطتي ولاشي فتحت الشنطه واول شي شافته القران قالت وش هذا قلت هذا كتاب مقدس قالت يعني وش قلت لها قران قالت يعني وشو قلت كلام الله جت بتلمسه وعييت عليها قالت لي ليش قلت هذا اي شخص يبي يلمسه لازم يكون طاهر .. والله ياربع انا مو مطووع بس يعني كلش الا هل الامور ناظرتني قالت خلاص مو مشكله وصار تفتش الشنطه وطلع البوكسرات والفوط والكريمات والخرابيط قالت وش بتسوي بذولا كلهم قالت لها وش رايك يعني بلبسها قالت اووه يو ار ريتس مان قلت لها ايه ريتش مان وانا طفران في هذا الوقت كان فيه واحد برى ينتظرني اسمه ابو فيصل .. صديق واحد من العيال كان دكتاتوري ياحبيله موصيه يستقبلني تأخرت عليه على اساس يفتشوني خلصت من التفتيش ووصلت للتفتيش الثاني دخلت عند واحد هندي فتح الشنطه وقالي انت مسلم قلت ايه وقالي خلاااص رح ياخوي والله حسيت بي الحميه الاسلاميه الي عمري ماقد شعرت فيها الا في نيوز لندا تشكرت منها وشوي واحب راسه قالي روح دربك خضررر اول مادخلت صالة المستقبلين وشميييييت هواء نيوز لندا حسيت كني انولدت من جديد الله الله الله الله سبحان الله وقريت ايه قرانيه وطلعت برى الا ماشاء الله مطر وغيوم وشمس خفيفه جوو حق ثمامه الا على طول واطلع الزقاره واشعلها بكل لطف وحنيه الا اسمع واحد يقولي ترانزيت ترانزيت اناظر اقول وش ذا الي يعرفني والتفت الا الرجال ينتظرني برى وانا اصلن ناسيه قالي وينك تاخرت قلت له يبن الحلال ذولا فتشوني واشغلووني قالي يله يله مشينا .. تدرون وين الاحراج ان الرجال صايم وانا الي فاطر ودخان وفله ههههههه وركبنا السياره ووداني للفندق ونمت هناك وكيذا وانشاء الله اليوم او بكره راح اكمل لكم شلون سجلت في المدرسه وكيف قابلت العائله خلوكم قريبين وراح تشووفون الصور ومقاطع الفديو سلام من الرياض الى نيوز لندا خلوكم معي لاتروحون بعيد .. واعذرونا على الاخطاء الاملائيه |
يالبى بس الي يتابعوني :d
المهم بعد مادخلت مدينة اوكلند ..استأجرت فندق بقيمة 120 دولار ونمت واول ماقمت جاني اتصال من خويي.. يتحمد لي على السلامه وهو كان اول شخص اكلمه وانا في نيوز لندا سلم علي والخ الخ .. وصاني اجيب له نيوزلنديه :d المهم نفس الشخص الي استقبلني الله يجزاه خير الي هو ابو فيصل قالي ترى اليوم في جمعه للسعوديين عباره عن افطار جماعي مسويتها القنصليه السعوديه قلت له ابشر واخذت العنوان ورحت هناك وافطرنا مع الربع وسلمنا عليهم وطمنونا على السعوديين الي في مدينة كرايست شيريج من عقب ماجاه الزلزال القوي .. المهم .. رجعت للفندق وكان هذا اول يوم لي في مدينة اوكلند ..وكان يوافق يوم سبت يعني اجازه عندهم وبدت رحلة الضياع مع نفسي .. البلد غير البلد .. والناس غير الناس .. والطبايع غير يعني تقدرون تقولون فصل مخي شوي وانا في الفندق جالس اناظر الناس من البلكونه .. وانا طايره بوهتي في الناس .. تخبرون الويك اند عندهم كلهم سكارى وانواع الحركات الغبيه في الشارع لاحدث ولاحرج .. قلت في نفسي ليش ماتلبس وتروح تفلها مع الشعب المهم نزلت من الفندق .. وقالو لي انتبه لايصير لك شي .. وهذا رقمنا لو صار لك شي كلمنا .. انشاء الله لان فندقهم 5 نجووم ومره فخم وعلى كلامهم محد يسكن فيه الا الناس الكاشات ورجال الاعمال المهم نزلت الشارع وانا مشخص ### رحت اتمشى واشووف هل العماير والشوارع .. وتنظيم الباصات وادب الناس .. وياسبحان الله شي خورافي الجو مختلف والناس مختلفين .. وبردهم وش زينه يهبل ### هذي الايام الي كنت حاضرها في اليوك اند وكان يوم الاثنين موعد الدراسه ويوم الاحد موعد مقابلة العائله |
مثل ماقلت لكم حضرت الويك اند هناك وهيك وفي نفس هل اليوك اند ذكرت اني رحت لي جمعة فطور السعوديين في مدينة اوكلند .. مااخفيكم انه كان ويك اند بارد جداً بس برد من النوع الي يخليك تسفهل وتنبسط وهيك
المهم في هذي العزيمه اني تعرفت على شخص كلمة رجال بحقه شوووي وكلمة انسان خالع مره ماتوفيه حقه من الاخر اقدر اطلق على هشخص سوبر مان اوكلند .. او بمعنى اصح اخوك الي ماولدته امك طبعاً واحنا نفطر وكيذا كان جالس قدامي واسولف انا وياه .. الخ الخ << تخبرون سعوديين مع الاخذ والعطاء انا وياه والتحليل والتشخيص وهيك عرف اني رجال مدري وين الغن سارحه قالي وش تحس فيه انت لا حجزت لك معهد ولا ضبطت لك عائله ليش جاي .. رديت عليه قلت له يبن الحلال لاتدقق واجد لو تاخذها من هنظره انت بعد لابس جلابيه في نيوز لندا وش تبي بحياتك انت وبعد ماتبادلنا الذب والذبيب وهيك قالي وش بتسوي انت الحين .. قلت له ياصديقي انا بروح بكره اشوف المعاهد وكيذا واشوف والله يقولبنا ... قالي ماعليك انا اقدر اساعدك انا ايجنت وعندي خبره والخ الخ قلت له ممتاز .. بس قلت انا جاي مع ابو فيصل صديقي وهو مزهلي وهيك فما لها داعي يحقد علي قالي لاتخاف ابو فيل خله علي قلت له خلني انا اقوله واخذ رأيه .. كلمت ابو فيصل وقالي براحتك سو الي تبي << ماصدق خبر يبي فرقاي المهم كلمت صديقي الايجنت الي اسمه عبد الله الرشيد .. وقالي وش شروطك قلت له يبن الحلال ماعلى الكريم تشرط قالي اخلص وش تبي عشان اقدر اساعدك قلت له معهد مافيه سعوديين كثير وابي عائله مرتبه وحلووه ..واهم شي ماعندهم رجال ولا عندهم كلاب قالي طيب ابشر بشوف ورد لك خبر .. طبعاص كان هل الكلام بليل ويوم جاء يوم الاحد الى الي هو كنه جمعه عندنا دق علي عبد الله وقالي ياحلو ضبط امورك واحزم امتعتك وتجهز لكي انتشلك من شارع الفسق والفجور قلت له لاتقلق ياصديقي سوف اكون عند المتروو وهيك بعد ان قدم صديقي اقلني بمركبته الكويسه وهي كانت كامري فضية اللون ناعمة الملمس <<< جوووك فووول امهم وقالي صديقي شف يابطل ترى الهوم ستي حقك في القلين فيلد منطقه هاديه ومافيها لف ودوران وماحولك ماوريه ملاحضه : ياربع اذا فيه ماوري لايزعل علينا ترانا نمزح وهيك المهم بعد ماوصلنا المنطقه المنشوده وكيذا الا وانا اقول لصديقي والله شكل المنطقه طففففش ناظرني قالي وانت جاي يعني وش تبي قلت يعني ابي افلها واستفيد واختلط شكل الناس هنا منعزلين مره عاد قام يمون علي قالي اقول .. قلت هلا .. قالي تلايط .. قلت له سم المهم ولنا عند بيت الهوووم ستي .. وانا قلبي يقول بك بك بك بك << مسوي يعني الولد اسلوب المهم نزلت من السياره وهكا واول مانزلت .. الا وش اشووف اشوووف غرنوووق تناضرني وتضحك قالت لي هلا هلا هلا والله بلي دخل علينا نور البيت طال عمرك .. طبعاً كانت تقولي كيذا بي الانجليزي <<< نصاب كلب المهم لاجد سلمت علي واحنا برى البيت عند السياره حقت صديقي وسواليف وهكا الخ الخ قالت لنا اقلطو قلت لها لا يابنت الحلال احنا ماشين << خويي يناظر فيني وش تحس فيه يقولي وشو الي لالا مره ثانيه ### دخلت بيتهم وانا اشم رائحة عبق الخشب واحسست انني اريد ان اعش معاهم طول العمر <لغه فصحى كيف وقالت استريح عشان اعلمك وين غرفتك واعرف على بناتي .. هي يوم قالت بناتي وانا الي ارتز واتمسمس وهيك :d يتبع :21: |
المهم بعد ماجلست وريحت شوي وشربت لي كاس مويه ..
### جت الام حقتهم وقالت لي هاي .. انا صاحبت البيت هنا واسمي ميشيل .. قلت لها تشرفنا وقالت هذي بنتي الكبيره AReEe عمرها 19 سنه .. قلت وانا ثور في الحرس الوطني :d وجابت البنت الثانيه وقالت هذي اسمها ساشي وعمرها 14 سنه وقالت تراها اندر ايج حسيت كنها تقولي لاتفلها واجد :14: ناظرت خويي قلت له الله يجزاك خير .. ناوي تتعب نفسيتي انت .. قالي اها بس المهم جوو سلمو علي وانا الي وجهي صاير احمر اخضر مدري وش اقول :15: قالت لي ممكن تعرف بنفسك قلت لي من انت ومن تكون يعني .. قلت لها انا مجموعة انسان من كل ضد وبد تلقين فيني :d فيني هموم وافراح اوحزن اضحك ودمعي حايراً وسط عيني .... الله الله الله قلت لها .. هيك وهيك وهيك وهيك :d قالت ممتاز .. انا سعري هنا في الاسبوع 190 دولا في الاسبوع بس عشان عبد الله بخليها لك 170 قلت لها كويس شكراً شكراً قالت بس النظافه عندي اهم شي قلت لها اكيد مايحتاج وقالت مانبي ازعاج قلت لها ابشري من حقك قالت .. انا عندي بووي فريند يجينك وهيك ..عادي عندك قلت لها يابنت الحلال بسلامتكم سوو الي تسونه .. ... مالي دخل قالت طيب مسكت يدي وقالت تعال بوريك غرفتك .. وانا ماشي معها ومدربي هراس ودتني لغرفتي كانت حلوه وتطل على غابه ماشاء الله وفيها شباك وفيها دفايه ومره مرتبه قالت لي بغيت اي شي قلي ولاتستحي ..قلت طيب يا ماما رحت لخويي وتشكرت منه قلت له ماقصرت والخ الخ الخ الخ وشوي واحب راسه من زوود الخقه عاد تدرون ياربع ماتحس بقيمة الوطنيه من قلب الا اذا ررررحت غربه قووويه المهم خويي قال بكره تجي لشارع الكوين ستريت بي الباص وتروح تشوف العهد اذا عجبك ولالا ولا اذا ماعجبك قلــي اشوف لك غيره .. قلت له ياصديقي القصيمي والله اللسان يعجز عن الشكر قالي كلعاده تلايط وفعلاً تلايطت ورحت غرفتي ويوم قعدت بغرفتي واقعد افتح اللاب توب وهيك وشبكت النت والحمدلله دق باب غرفتي ..قلت ياليل شكل الموضوع فيه وهقه وانا ابي انووم تعبان مانمت زين من يوم ماجيت من السفر .. والا هلي يطق الباب ملزززم الا افتح الباب << حس انه توهق اقول في نفسي اكيد ذي العله امهم تبي تسولف معي وانا لغتي دجه الا واسمع صووت غريب .. صوت رجال .. الا واطلع له .. قالي هلا انا اسمي ماريو من البرازيل وانا فرحان انك جيت معنا هنا .. قلت له ايه ايه هلابك والله وش تبي قالي تعال معنا تعشاء وقت العشاء قلته يله جاي جاي رقيت فوووق عندهم لان غرف كل الساكنين تحت البيت وصالتهم فوووق رحت وسلمت وقعدت الا اشوف طالب ارجنتيني وطالب برازيلي وحده يابانيه وثنتين روسيات قلت في نفسي اهلن اهلن الله يجزاك خير ياعبد الله والله انك سنايدي ياصديقي ياقوي سلمت وقالت لي ميشيل راعيت الهوم ستي .. تسميني تروي TROY عرف بنفسك .. قلت لها مايخالف بعد العشاء قالت شاطر يله كل زين عشان تنوم بدري يوم قالت تنوم بدري ضاق صدري ابي اسهر وهيك مع الربع <<< نظام استراحات وملاحق تعشيت وكانو حاطين بطاطس وخضروات بدون ملح ؟؟؟؟؟ << ماجاز لي قلت فيه ملح قالت فيه خذ الي بدك اياه اكلت وصار البرازيلي يناظر فيني وحسيت ان بيني وبينه توامه ...قالي عجبك الاكل قلت له ايه ايه زين زين ماعليه الحمدلله .. والا شوي اشوف البنت ذي الروسيه تناظر فيني نظرات يعني مو نظرات اعجاب بس قالت لي انت سعودي قلت لها ايه قالت انتم عندكم نظام دكتاتوري ... طوووط طوووط .. قلت لالالالالا نظامنا كويس وسكري على الموضوع ضحكت وقالت طيب عندك سياره ..قلت لها ايه قالت وش سيارتك ..قلت هيك وهيك ..قالت اممم طيب انت عندك قيرل فريند قلت لها ايه ومو ايه قالت شلون يعني انا اعرف ان المسلمين ماعندهم هل الكلام قلت لها يابنت الحلال كنت خاط\ب وفكيت الخطبه يعني دخلتها مخرررج عنيييف ... ودخل البرازيلي وزبد للبنت قالها وش اسألتك الغبيه الرجال توه جاي من سفر وتعبان وانتي تسألينه ..خليه ياكل وبعدين اسأليه والله ماتتخيلون كيف انقذني هل البرازيلي .. وه بس |
المهم بعد ماخلصت الاكل وشبعت الحمدلله رحت غسلت وخلصت وهيك
ونزلت لغرفتي .. اوخذت الفووطه لأجل التروييش وهيك رقيت فووق وقلت لراعيت الهووم ستي باخذ شور قالت دززززز ياصديقي ماعندك مشاكل دخلت دورة المياه كرمتو وكنت ابي شسمه هاه عرفتو :d المفاجأه ياربع الي مافيه لي مويه او بمعنى اصح خرطووش اوب معنى اصح رشاش مويه :21: ايوووه وش السواة الحين ولا معي قارورة مويه صحه وقعدت اغرررد جوى شوي الا طقت اليابانيه علي باب الحمام وتقولي اخلص ... ياربيييييييييييه وش السواة قلت لها اصبري شوي :23: قعدت اتلفت يمين ويسار هاه الله يستر وادعي ربي وش هل الوهقه :27: الا واناظر الا عندكم جركل ازرق حق مزارع << قلت لنفسي هوووو الدواء ياعصمان :d طلعت من الحمام كرمتم وانا نفسيتي داون يييييع حامت كبدي من نفسي :d دخلت الحمام الثاني وتروشت وشوي اذب نفسي مع الشباك ماعا ابيني ذبيت نفسي في القمامه خلصت شور وطلعت وانا فيني النوووم مرررررره منتهي الا لقيت الزقرت قاعدين ويشربون الخمر الفجررره الكفررره لعنهم الله .. قالي البرازيلي تبي تشرب .. قلت له هاه .. لا انا مسلم مايصلح قالي يارجال تعال وش مسلمه بس تعال اقعد معي قلت لالا بروح انام مره تعبان :23: رحت وريحت نمممممممممممممممممممت واحلام وهيييك وفله طبعاً خويي قالي قم الصبح بدري ورح للمعهد صديقكم ترانزيت ماراح الا الضهررر رحت وسجلتي عندهم وشفت المعهد ولحسن حضني مافيه الا سعودي واحد ونفسييه بعد مهوب لمي ولا يحب يسولف مع احد طبعا المعلومات هذي وحده عراقيه تسولف علي سجلت معهم لمدة شهرين وكنت ناوي اسجل معهم 3 شهور بس صار لي ضرف وهيك دفعت لهم 6500 ريال بهل المده شامله تأمين وكتب ونت وكمبيوتر شخصي وكلاس تقوويه وخدمات اخرى بعد ماسجلت قالو لي تبي تداوم اليوم ..قلت لهم لا خلوها بكره احسن قالو ليش ابدأ اليوم احسلك عيييت ### المهم طلعت من عندهم وانا فيني النووووووووووووم تعبان مره مانمت زين وجوي فكوك ابي اريح وابي اعرف مكان الباص يعني مره متقروش رحت تغديت في مطعم هندي مسملين وهكا وقعدت نص ساعه اتفرج على العالم رايييحيين وجاييين ..فلم فلم جت الساعه 6 وقلت خلاص يارجال رح البيت عشان تروق وانا يقاالي فاهم وحذق وانا من جنبها .. والله مدري هو فيني ولا في الخيشه فهاوة السعوديين موجوده في كل حي وفي كل مكان |
مررررررررررررررره انسجمت بالقصه
كمـــــــــل اسلوبك مره مره حلو ودمك خفيف اعجبني صديقك هذا اللي فزع لك،،،يازين السعوديين ،، بالغربه كانكم اخوان كمل ،، انتظرررررررررك |
اقتباس:
بكمل وهيك بس خليني اروق شوي واجيك بلباقي :d |
متابعة للقصة وننتظر الصور اخي الفاضل
الله يسامحك خليتني اضحك وانفضح بالدوام خصوصا على الصينية اللي ودك تحطها علاقة مفاتيح ربي يحفظك ويستر عليك كمل متابعين |
اقتباس:
|
ههههههههههههههههههههه
انا عآآآد انسجــام + تنآآآحه + ضحك مو طبيعي ...واي شي .. عاد كلوو كوووم والرجال يللي يقوولك الخطوط الصينيه كلها حوادث . والمحيط الهادي مدري وشوو ههههههههههههههههههههههههههههه الله اكبر عليه خليه يصلي ع النبي او يقوول شي ولا يسسسسكت ..,~ متـــابعه لك بصمت وفقك البااري =) |
سكوت و ربي مدري وش تحس فيه أنت !!
حاسة بمسؤوليتي تجاه الأمة الي تقرا القصة لابد يعينوني مترجمة لك بذا لكن تبي الصدز مبدع صراحة أطلق ما بوه مزجك العجيب بين القصيمية و النيوزلندية يا تروي خخخخخ |
آخوي آلفَلّة
{ ترآنزيت آو ترويّ . . ='( ھھھھھہِ يآ حلآة روحك وحسّك وآسلوبك آلخنفشآري . . بصرآحة ضحكت من قلبي . . الله يسعدك يآربّ ؤربّي حمآس وفعلـآ سعوووودي وعآيش آلدّور { آهنيك يآ كويّس !! قو هيد .. كلنآ عيون مفهيّة في صفحتك آلقميلة . . * { وزين مآ سوّآ فيك خويّك آلمرعب آللي بآلطيآرة لعب بآعصآبك =))ھھھھھہِ لكن لآحظت كم هو دلخ !! لآنو يخوّفك وآهو معآك ! لكن آلنّذآله ومَ تفعل . . *{ آحييّ فيك آعتزآزك بدينك وتمسك بمبآدئك وحبيتهآ منّك يوم صليت بآلمطآر ركعتين . . بس عسى مآ تخورهآ بآلجديد آلقآدم =)ھھھھھہِ *{ وبخصوص آنّو موضوعك بمنتدى ثآني . . إحنآ مصدقينك ومَ يحتآج تثبت لـآحد وآلـلّي هآوي عبط مَ إلك إلآ { تطنشو بكل سهوله ويسر . . * { ننتظر تتمّة آلموضوع . .بكلّ حمآس فـ رجآءً { لآتطوّل علينآ . . وآشكر لك آلمسآرعة بإنزآل آلموضوع لآنّك حمستنآ كثير عليه بموزوعك آلسآبق . . وفعلـآً آبدعت وكآن يستحق آلتشويق آللي آنتآ آثرته بدوآخلنآ يآحلآة آلموآضيع آللي هيك توسع آلصدر وتخليك تضحك بقمّة آحزآنك ملينآ من آلترآجيديآ . . وتكرم منت بثور . . بل رجل بقوّة آلف ثور «- خربتهآآآآ (^_^) وآصل يآ زقرت . . آيم ويتنق . . : ) |
بسم الله نرجع نكمل واسف على التأخير ياصدقائي
تخبرون مخيمات وبر وفله وهيك :d ارجع اكمل التقرير ,, ووقت ماوقفنا عند المطعم وانا رايح للباص :21: المهم خلصت غدى الحمدلله وبعد وهيك قلت يارجال ورى ماتروح البيت وهيك واكيد بلقى الربع هناك :d المهم تعرفون الباصات هناك في اوكلند بكرووت يعني ورقه حقت اسبوع وفيه حقيت شهر والخ بس انا ماخذ ورقة ايجار الباص الاسبوعي وباصي رقمه 955 :d والله ياهذا الرقم اني احبه مره مدري ليه كل ماشفت هل الباص اقبل انبسط :d المهم .. رحت للباص وركبت وانا واثق من نفسي المهم الجو برى مطرر وبرد شوي وهيك :21: وكل شوي الباص يوقف عند محطه وينزل ناس وانا اتذكر مكان محطة النزول المهم مع المطر وكيذا انعميت ماعاد اشوف :( وكل شوي ناس نازلين .. بعدين قلت في نفسييي ايوووووه ضيعنا هذا الي مانبييه :d وحسيت اني توهقت وكل ماله الباص يبعد عن المكان الي ابيه :d قلت في نفسي تدري انزل بس وامش على رجولك منها تسأل ومنها تتمشى << يسلك لعمره :d المهم نزلت وخذ لك يامطررر وخذ لك يابرررد وخذ لك ياماوريين << زي خوال امريكا دشير :d حسيت اني في النسيم وكل الدشير يدورون حولي :d قلت في نفسي ايييييييييييييه شكلك رحت فيها يا تروي ماتسوى تروح عليك :d المهم امشي وامشي ودور هل البيت لحوول وين بيتهم فيه :21: فجأة جوالي خلصت بطاريته فجأة ملابسي تملت مويه فجأة ظلمت الدنيا والمشكله العنوان حق البيت في الجوال يعني ابلش :23: المهم جعت وفيني النووم وبررد ومطررر :21: وقلت وش اسوي الحين ابي اتصل على احد مقدر والشوارع ظلام ومافيه الاانوار خفيفه وصرت امشي لين ماحفت رجولي شوي الا جزمتي قامت تتفكك كنها لعبه اوف اوف مهوب وقتك ابد :14: قلت يارجال ابي اسأل اي احد تورطت نسيت مكان البيت والله شغله تفك المخ :23: وبعدين بيوتهم تتشابه وماتذكر الا اسم راعيت البيت قلت تدري خلني ادق على هل البيت شكلهم حبيبيين وبيساعدوني :27: ترن ترن ترن << جرس يعني ... مين قلت انا واحد مضيع :d قالت وش تبي قلت لها يابنت االحلال انا طالب جديد هنا ومضيييع :15: قالت اوف اوف شكلك تعبان :25: قلت ايه والله .. والله فيني البتسووه .. :d قالت وين بيتكم قلت مدري قالت طيب اسم الشارع قلت مدري .. قالت طيب شلون بساعدك قلت مدري ناظرتني قالت انت سكران قلت لا ..:d قالت طيب شلون كيذا قلت لها بطاريتي خلصت المهم شربتني شاهي وهيك .. وسواليف قالت مقدر اساعدك تبيني ادق على الشرطه قلت لها لالا مابي شي سلام عليكم بطلع .. نظارتني وقالت ايييه هذا فيه بلى :( قلت لو سمحتي عندك شاحن جوال نوكيا قالت لا :30: انا شفتها قالت لا قلت بس شكلها بتدق على الشرطه ههههههه :30: نحششششششت ورحت امشي المهم شفت بيت كنه بيتنا قلت بسسسس هذا هو لنذهب الى هناك رحت ولا صار بيتنا مهوب بيتنا .. لحووووووول وش هل البلشه :d وش ودانيي انا لهل المنطقه واقعد تقريباً ضايع 5 ساعات ذبحني الجوووع وابي الحمام وضعي سيئ مره مره مره مره :d وقلت تدري خلني انوم تحت هشجره احسن لي ومن اصبح افلح بعدين قلت لنفسي اخاف يحسبوني متشرد ويسفروني :d ياربيه وش جاني انا شوي واصيح من التوتر :d الله لايعيدها من دراسه الله لايعافي العدوو مابقى احد الا سبيته من اخوياي والي نصحوني بسفر لحد يزعل بس هذا الصدق :d المهم لقيت واحد يمشي وقلت له تكفىىىىىىىىىىى تكفىىىىىىىىىىىى انقذني وقالي وش فيك ..قلت له كيذا كيذا :d المهم طلع ماوري قالي باخذ منك 20 دولار قلت له لوو تبي 100 بس انقذني :d والله شحن جوالي ووريته العنوان ووداني يوم وصلت للبيت ودخلت ناظرتني ام العائله ... ونقزززت نقززززززززه قالت لي وينك وين رحت قلت لها ياصديقتي انا ضعت وكيذا وكيذا ناظرتني قالت يبن الحلال انت طيب قلت ايه :d جو الساكنين وهيك وسلمو علي وينك يارجال تاخرت قلت الله يلعن ام الحاله الشكوى على الله :d انا هذا الوقت متخدررررررررررررررررررر تعببببببببببببببببببببببببان مييييييييييييييت ماعاد فيني شي صاحي :23: قلت خلني اريح انا تعبان :23: يتبع |
المهم ريحت وسويت لنفسي اندومي لانهم اكلو عني وهيك
اكلت الحمدلله وقعدت معهم على الساعه 9 ونص ليلاً جاني ماريو يسولف معي وكيذا وقالي انه زيي ضاع اول ماجاء هنا :d قلت يارجال الطرريق صعب المهم ضحكو وجو هروسيات ويسولفون الخ الخ (( مشفرررر )) :d واليابانيه وتسولف وكلن يسولف وماريو صديقي الداشر عايش جووه :d وكلن فالها انا ياربع مااخفيكم اني كنت مبسوط ومنطلق معاهم بي الانجلش واحمد ربي ان عائلتي وسيعين صدر ولا بعض العائلات تغثك وقالت امهم بكرى كل واحد فيكم يسوي لنا اكله وش رايكم قالو موافقين المهم فيه وحده من هروسيات معهدها قريب من معهدي وقلت لها تكفين بكره برجع معك .. قالت طيب رحنا بكره المعهد وتعرفت على كلاسي وعرفت معهدي واسم معهدي اوكلاند لانجوج سكوول وحطوني مستوى انتر ميدياد ... تعرفت على زملائي الطلبه وقعدنا سولف وهيك المهم اننا بدينا بشرررح وخويكم ضايع مدري شلون حطوني بهل المستوى افهم واقدر ارد بس مشكلتي في الرايتنق والقرامر شوي المهم جنبي واحد مكسيكي ووحده المانيه والله ياهم يتفلسفون فلسفه ويذووبن كلمات قوويه الله يخلف علينا يالله الواحد يجمع كلمتين راح الوقت وجاء وقت البريك و طلعت برى .. واسولف مع الاستاد حقي الي الى الحين مدري وش يحس فيه تخيلو زوجته تصرف عليه هو وسسسيم مره وزوجته ركبه والرجال ضاحك عليها ماعلينا :d الرجال تدريسه مره اوكييي وانا مره متسوعب الكلام الي يقوله راح الوقت وخلص اليوم الدراسي .. ورحت تغديت في المترو (( المترو عباره عن مجمع مطاعم )) دقيت على تريسي الروسيه قلت لها هاه وينك قالت تعالي عند كوافير :d اخسس كوافير قلت طيب بجي :d ورحت الا وش شفت الاخت جالسه وهيك :d وقاعده تزين شعرها قلت لها شو عندك قالت عشان الحفله اليوم قلت لها اييييييييييه حفله قالت خذ الاكياس هذي وخلها معك ... تخيلو عاد وش هل الاكياس (( بطول خمرر )) اعوذو بلله :d قلت لها وش تبين فيه قالت احنا بنشرربه قلت لها مين انتم قالت احنا والعيال والبنات انا سكت على اساس مادخل معها بتفاصيل :d وتحجر لي :d خلصت الاخت وكنها رايحه لعرررررس ### مشينا وكان فيه هواء وبرد حسيت انها بردانه .. قلت يارجال عطها الجاكيت على اساس اسوي نفسي ذوووق :d قلت لها خذي الجاكيت قالت ليه ..قلت عشان البرد قالت وش تحس فيه مو برد مابي شكراً :d انا وجهي صار كيذا <<< هههههههههههههههههههههههههههههههه صغييير :d:22::23: المهم سلكت لعمري وقلت والله اليوم صايره حلوه وانواع الترييش .. المهم البنت انبسطت وماصدقت اني مدحتها :d قلت معقوله ماقد مدححك احد وهيك قالت انتم يارجال مايبين بعينكم هههههه :d قلت اييهي الله يستر من نهايتها وش بيصير عاد تخبرون ياعيال انا قلبي رهيف وحنون مره :d قلت لها ماعليك فيه الي تقدر بس منهي الي تستاهل :26: المهم ركبنا هل الباااااااااص المخييييييس وانا حاقد على الطريق ابي احفض مع وين رحت ومع وين جيت يعني ابي اثبت المكان وصلنا وحفضت ام الطريق ... وارتحت بعدها اني صرت عارف الطريق وصلنا البيت ولقيت العيال سابقيني كلعاده :27: المهم كلن مسوي اكله وانا اقول في نفسي وش اسوي وش اسوي اثررري معاي تمررر وجبت زبده واحمسهم مع بعض يعني سويت قشط الي يعرف القشط سويته وحطيته المهم جاز لهم وبدينا ميشيل صارت تفك الشراب وتشرب وبناتها نفس الشي والبنات والعيال كلهم وجاء دووري قالو لي اشرب قلت ايييييييييييييه فيها شرب الدعوى قلت لهم طيب طيب بس مو الحين انا جوي غير << نصاب :d قعدت معهم لين سكرو وصارت حركات هيك وهيك وانا قاعد من بعيد وافترج ### الا شوي يجي البوي فريند حق ميشيل ويسولف ويوم دررررى اني سعوديييييييييييي ايييييييييييييييييييييييه جلسنا كلنا وصار يسولف لنا عن السعوديه وقام يسألني وصار كل الاسئله علي انا بيني وبينكم مابي كيذا ابي اسمع يعني لسينق بس انتم بسعوديه فلوسكم كثير << مره :d بعدين قال ليش ماتستفيدون من حرارة الشمس عندكم وتسووون مسبح كبيررررر وتأجرونه طبعاً الرجال سكران وقاعد يطقطق على راسي :d وانا اقوله صح صح فكره حلوه ماعليه بشتغل عليها :d ### قالي ورني صورة اختك قلت وشو قال اختتتتتتك << انا موحقدت الا قلت في نفسي وش اسوي بهسكران قلت له يبن الحلال مايصلح قالي ليه قلت احنا ماعندنا هل الكلام قالي ليش هي مرتبطه :d قلت ياليل ذا الي مايفهم شلون اعلمه سكران واشرح له على الدين والاسلام :d قلت شف مامعي ور بعدين اوريك :d انا يوم شفت الوضع كل ماله ويصير بايخ تعشيت وررررررحت نمت وخليتهم :23: يتبع |
بعد ماقضيت سبات الليله المحررجه .. وصحيت من النوم وكلعاده امطار وبررد وانا البس واروح لمحطة الباص والمشي في هل المطر والبررد والمضله الكويسه حقتي :21:
ملاحضه ياربع .. حي قلين فيلد حي راقي لاكن مشكلته الطلعات والنزلات وتخبرون السعوديين اول مايقومون من النوم مالهم خلق مشي وتمصع ويفضل تقوم بدري عشان مايفوتك الباص وتتقروش :d وبنسبه للبنات السعوديات الي تبي تروح نيوز لندا ويبون يسكنون مع عائله فيه هووم ستي خاصه بس للبنات وراعية الهووم ستي اجووديه وتعرف المسلمين وطبايعهم ..:d نكمل .. ركبت الباص وكان هذا اليوم الخامس لي تقريباً اذا ماخنتني الذاكره وانا اتكلم في نفسي لازم ياترانزيت تسوي لك رحله مع هل العالم .. المهم وانت راكب في الباص اكتشفت ان الشعب النيوز لندي مايحطوون عطور ا بمعنى اصح مايحرصون عليها ؟؟ من جد مستغرب لا من شباب ولا بنات :d العطور عندهم غاليه و مدري وش سالفتهم لاني انا من النوع احط بوورفيييم يعني مركز ماحط تواليت وانا جالس في الباص كلن يشمشم وش هريحه الكويسه وان فاك الكشره على اساس انك خقق :d المهم احنا ياالعرب نحب التشخيص والتعطر وهيك وهيك :) نزلت من الباص ورحت المعهد سوالف مع الربع وفلسفه كلعاده المهم استغربت من موقف صار قدامي لقيت وحده جالسه وتقرأ كتاب عربي ومتحمسه ومريت من جنبها ابي اشوف وش نوع الكتاب :d المهم لقيت اسم الكتاب عادات العرب والمسلمين .. قلت ايه الحين بتسألني والله النشبه :d واتصدد عنها الجميل في الموضوع اني قدرت ازبن منها (( ازبن )) يعني انحاش :d دخلنا الكلاس وبدى الدرررس وصديقكم مفهي افكر برياض واهلي والعيد جاي :d عاد قال الاستاد وش المناسبات الشعبيه الي عندكم .. وسبحان الله كنه داري عني :d قلت له ايه والله عندنا احنا عيد بعد كم يوم .. قالي صحيح والله .. قله ايه والله :d قالي يله طيب اطلع وتكلم عن عيدكم << وجهي صار كيذا :d قلت هاه ... قالي يله يله وقامو الطلاب يصرخوون :23: حسيت اني بطل قووومي قلت لهم ياربع وش بلاكم وراكم علي :d قالي يله اخلص احتس :d وانا امشي من بين الطاولات وطاقتني ام الركب :d قالي تحدث :27: قلت كل المسلمين عندهم عيد :d وبعدين قلت عيد الفطر يجي بعد رمضان ورمضان قبل العيد واحنا نسوي عيد عشان نفرح بي الافطار وهذا ديننا :d وتوالت الاسئله شين اعرف وشين ماعرفه :d المهم قالي وش تسوون في العيد .. قلت ياطويل العمر اروح ازور اهلي واصدقائي .. الخ الخ المهم خلصو اسئله وانا ماصدقت على الله :d وقعدت وقال الاستاد لازم نشوووفك بزي السعودي قلت يبن الحلال مايخالف ابشررررر يصير خير :23: المهم خلص اليوم الدراسي وطلعت على الساعه 1.30 وقعدت مع الشباب في المعهد سوالف وانجلش وكلمات جديده استفدت كثير واكثر شي استفدته القرامر ولسبيكنق لاكن السبيلنق عندي فيه مشاكل حتى الان كان باقي على العيد يومين .. وكنت فرحان بي العيد وللمعلوميه ماشفت سعوديين الا شووييين مره وكلمت المدرسه وقلت لهم عندن عيد وابي اجازه .. قالو لي اوكي تم 3 ايام اجازه :d قلت كويس بعد شوي بقولك وش سوينا في العيد والاحتفاليه حقت جامعة يونت |
المهم ليلة العيد قاعد اكوووي شماغي :d
وازين الثوب و وابخ من ثمي مويه تخبرون مافيه بخاخ مويه وشغل سريع سريع :21: والطلاب الي معي في البيت يضحكون يقولون وش تسوي انت .. قلت لهم عيد عيد قالو وش عيده يبو الشباب قلت لهم عيد المسلمين قالي ماريو اجي معك قلت وين تجي ..قال ابي اجي معك كود نلقى وحدتن طخمه :d قلت ياصديقي مايخالف خلني اخلص واشووف وش الله يقولبنا ... خلصت الملابس ولمعت الجزززمه وظهرت دهــن العووود (( قلب )) وبعدين يوم جت الساعه 6 الصباح لبست وتأنقت ورسمت وهيك وهيك وخصوصاً ان الثوب شتوي وكوحلي وشعار النصر والسعوديه يعني شغل مرتب :d لبست وماريو صديقي معي قلت له انا بروح اصلي العيد ..قالي يله معك .. قلت طيب انت مو مسلم قالي يارجال اهم شي فيه بنات :d << مدري وش اقوله انا مسلم وعيب ولا اقوله فلها ياصديقي ولا اسوي نفسي اغار على المسلمات :d ولا اقولهم هذا مسلم واطلع كذاب قدامهم واصير كذاب قدامه ... الزبده اني توهقت فيه :23: وانا طول الطريق وانا شايل همه اقول الله يستر لايسوي لنا جرريه هناك ويضفونا .. :d (( اقول في نفسي عسى مافيه هيئه )) واحنا ماشييين قالي زقرت قلت له هلا قالي انت شااااااااذ ..؟؟؟ وجهي صار خمررري :23: قلت له وش فيك قالي لبسك بس بنات .. ؟ قلت له لا وش بنات قالي الا لبسك زي البنات ثوب طويل زي الفستان :d وقماش على راسك وحاط عطررر .. موضووعك خالص :d قلت له ياخوي والله انك الظاهر سعودي منتب برازيلي امش امش معي وبتشووف الشاذيين الحين فيذاك شاذيين واجد :d مشينا يوم وصلنا للصاله حقت الاحتفال في العيد بحي القلين فيلد .. دخلنا وسلمنا :) واشوى صار ماريو عاقل واثره كان يطقطق على راسي ... سلمنا وكيذا والتفت ادوره مالقيته اختفى قلت شكله راح البيت بكيفه وقعدنا نفطر مع المسلمين ..بس مسلمينهم مهووب زي مسلمينا ..حمررر عطررررررررررررر ... ملعوب علينا بي المسلمين الي عندنا مسلمينهم طخووم ياربع الا وشوي القى ماريو داخل علينا ورقى المسرررح والرجال بيخطب ...قلت له وش فيك قالي هذا صديقي زقرت هو الي دعاني هنا عشان احضر الاحتفال .. وانا كنت اكره المسلمين وماحبهم بس الرجال هذا غير مفاهيم كثيره كانت تحوم في ذاكرتي طول السنين الي عشتها في البرازيل وبعدين قال ماريو .. انا لازلت اقرأ القران على خفيف واقرأ بعض سير صلاح الدين الايوبي ومحمد صلى الله عليه وسلم واخيراً قال .. انتبهو لنفسكم وترى اي وحده حلوه هنا انا مو مسئول عن تصرفاتي .. << جاب العيد والعيد عيدين صار ضحكووو الناس وانبسطو منه .. وكني اشوف خشته بعد الخطاب الي سواه قلت له وش سويت انت قالي عادي عادي ايزي ايزي مان مافيه مشكله انا وجهي صار خمرري من الحياء .. من جد ماتوقعت انه بيقول مثل هل الكلام ..كبر بعيني هل الاشقررر :d صلينا العيد وقعدنا نتقهوى ... وخلصنا من عيدهم واعلنت الملحقيه السعوديه عن الحفل الذي شوف يكون في جامعة يونت بوابه رقم 4 طبعاً انا كنت جاهز مرره قلت ياصديقي خلني اروح اريح في البيت وبعدين اروح للمعهد كل هل الكلام وماريو صديقي ساحب على الكلاس حقه وجاي معي |
بعد ماريحت في البيت وعينة من الله خير .. قلت لنفسي يارجال ليش ماتقوم وتسمي بسم الله وتسوي القهوه
المهم قمت وجبت زوليه وقعدت قدام البيت عل الثيل وانا معاي الدافور .. والقهوه على النار .. والتمر والطحينه :d والوضع مره عجيب ورذاذ المطر يتطاير من حولي وانا فرحان جداً الا شوي وادق على العود وادندن وهل القهوه ترد الروح ولحقها بتمره وتمره مغرقه بطيحنه وزقاره تلاعب الهواء ملاعب المهم اني طولت وانا اعزف ومبسوط مره مره الا شوي جت ميشيل تناظرني ..قالت وش جووك انت .. قلت ابد والله تخبرين عيد وانا مبسوط ضحكت .. وجت قعدت عندي وقهويتها وصارت مدح وهيك المهم جابت صديقاتها الي هم الجيران وسواليف وانا ادق عود وخر شي تحمست ميشيل وقالت غني لي ام كلثوم .. ههههههههههههههههههه والله يا اني ضحكت عليها قلت ابشري واغني لي ام كلثوم واقسم واقسم وهي مفهيه المهم ياربع اني الساعه جت 5.20 مساء قلت يارجال تدري قم ضف عفشك ورح انتظر الباص لاني الباص مابقى له شي .. قلت لهم بروح .. قالو وين قلت جامعة يونيت ..قالو وش عندك قلت احتفاليه والخ الخ قالت ميشيل بتروح هكا .. قلت ايه ..قالت لحضضضضضه راحت وجابت كميرا حقتها الا وشوي راحو صديقاتها وجابو كميراتهم قلت وش تبون .. قالو بنجي معك .. فكرت فكرت فكرت .. قلت في نفسي ذولا زيوون مره ... خطر عليهم يروحون هناك قالت لي وحده .. اسمها لوسي .. بليز بليز بليز خذنا هناك .. قلت لها اخذ ابووووك معك تامرين امر المهم ميشيل شغلت الفلكس واجن حقتها وودتني المهم .. انهم ودوني ستار بكس وعزموني وقاعده تريش فيني ميشيل تقول احسن واحد جاني في الهوم ستي هو انت ياترانزيت .. ونا اقولها ايه ايه شكراً ماتقصرين .. وانا ادري انها نصابه ههههه بس وش اسوي اذا صار حاجتك عند الشخص قله ياسيدي بص ياسيدي بعد كيذا قلت لهم نزلوني عند البوابه وروحو وقفو .. وانا بنتظركم هنا عند البوابه قالت ليش قلت لها روحي وبعلمك بعدين انا ترى يااصدقائي القراء شايل هم تصير فيه هيئه ههههههههههههههههههههههههههههههههههههههههههههههه من جدددددددددددد اقول الله يستر لا يضفونا .. وفس نفس الوقت خايف يشوفون معي البنات ويعييون علي ادخل مدري وش اسوي المهم ماامداني ابعد عنهم الا قابلوني من طريق مختصر ... الزبده اني تورطت .. ولقيت حقين الملحقيه لابسين البشوووت والثياب .. ويرحبون بلي جايين انا معي ذولي البنات ونشبة .. اقول لنفسي اديور وانحاش واخليهم .. ولاادخل انا وياهم ويضفونا الهيئه المهم مشيييت وسلمت عليهم السلالالالاالالالام ... وانا معاي الصواريخ المهم محد قالي شي ... اتذكر ان فيه سعوديين كانو اذا شافوني بشارع مايسلمون ههههه اول ماشافو الي معي .. صارو اصدقائي |
اليوم بكمل لكم شلون خططت لرحلة روتوروا وباي اوف ايلاند
طبعاً الرحله اخذت مني اسبوع كامل .. وهيك بعد ماخلصت العيد وانا راجع البيت اتصل فيني ماريو البرازيلي قالي ياترازين لك ولا لذيب قلت له يخسسسى الذيب سم امر وش بغيت تبي فلوس قال لالا هههه .. قتل طيب وش تبي قال بروح رحله تجي معي ... قلت له وين قالي روتوروا وباي اوف ايلاند قلت له كم يوم قالي اسبوع .. وسبحان الله الاجازه حقتي توافقت مع اجازته قلت له تمم ياصديقي وش نسوي قالي ماعليك فيه شركه اسمها اوكلاند ادفايستر تضبط لنا كل شي ... فكرت قلت كم قالي 500 دولا في اي بي سكن ووجبتين اكل ومشروبات وسياره خاص وهيك وهيك قلت له مهيب شينه قالي اعتمدك قلت له اعتمد وانطلقنا والحين راح اسدح لكم |
هذولا قروب اخويانا كانو ينتظرونا عند المحطه
طبعاً على طاري المحطه تذكرت محطة نوووف حقت الثمامه هههههههه فرق السماء عن الارض http://sphotos.ak.fbcdn.net/hphotos-..._1192498_n.jpg واحنا ماشين بعد ماتعدينا اوكلند بي 150 كيلو وقفنا على جمب على اساس البنات والشباب يريحون http://sphotos.ak.fbcdn.net/hphotos-..._1192498_n.jpg المهم بعد ماريحنا وكيذا .. لقينا ماريو ينادينا ... ولقينا بحيره وهيك هذا ماريو المنسم http://sphotos.ak.fbcdn.net/hphotos-..._2703172_n.jpg المهم مشينا وهيك .. واثر العالم كانو تعبانين وطفشانين ..قلت مابدهاش ياصديقي .. مارس عليهم البثاره وجايكم بطريق بوقت الغداء بس خلوني اروح اتغدى وارجع لكم |
عاد جاء وقت الغداء ووقفنا عند زي المحطه كيذا وتغدينا
وانا ميت مرره تعبان http://sphotos.ak.fbcdn.net/hphotos-..._3607290_n.jpg المهم ولنا لي الباك باكر عشان ننزل وننام فيه .. والمفاجاه انهم قالو لنا الحجز حقكم ماتاكد وراح عليكم المهم اخذنا الفلوس الي دفعناها لهم .. واخذ غرف رخيصه وحلوه ريحنا فيها ظوو وهذي صوره للربع وهم متوهقين وين ينامون فيه هههههههههههههههههههههه كنها امس ايه والله http://sphotos.ak.fbcdn.net/hphotos-...4_543289_n.jpg المهم نمنا واحنا تعبانين مررره ومتفككين على الاخر نمنا ويوم صحيت لقيتهم نايمين الشباب وطلعت برى ولقيت هل البطه الي وش زينها .. واخذت لها صوره http://sphotos.ak.fbcdn.net/hphotos-..._7235686_n.jpg وقلت في نفسي ياصديقي خلك ذهين وصور الغرفه عشان مايقولون ماصورت تفرجو ... والله ياهي مصممه تصميم صح ومن قلب http://sphotos.ak.fbcdn.net/hphotos-...6_757644_n.jpg الا وانا اتمشى لقيت عنز :d عنز مدري بقره مدري وشو المهم صورتها http://sphotos.ak.fbcdn.net/hphotos-..._5337265_n.jpg الا وانا اتمشى واتفرج على هل الخضااااااااااار سبحان الله شي مهوب طبيعي .. مابقى الا هايدي وبيتر http://sphotos.ak.fbcdn.net/hphotos-..._6976366_n.jpg يتبع |
waiting .... :d |
ماشاء الله طبيعة خلابة
متابعين الله يوفقك ويحفظك |
وآو !!
متآبعينك . . وآصل |
تذكر ياعزيزي القارئ انني سوف اقلع بك الى الخياااااااااااااال
ولذالك تعوذ من ابليس .. وشد الحزام .. والقرد بعين امه غزال << مالها دخل بعد ماروقناوهيك قررنا نتمشى في روتروا .. الا شوي ويصحوون الربع ويجتمعون وطبعاً ماريو جووه اول مايقوم من النوم جو خوال ماينتحاكى وانا جالس اتمشى وهيك جلست التقط الصور .. الي الى انا انا مو مصدق اني صورتها وكنت فعلاً هناك راح اوريكم الصور وقولو لي هل تصدقون ان فيه طبيعه بهشكل http://sphotos.ak.fbcdn.net/hphotos-..._5485098_n.jpg وهذي صوره لماريو الرجل الغامض بسلامته يسوون فيها رياضيين الله يصلحهم وهذولا الموزز الي غثو امنا ياله يتحركون وياله يمشوون ..سبحان الله البنات قلق في كل شي حتى بروحات ..شاعه عشان تقوم وساعه مدري وش الله يصلحهم بس الزبده كانو متأخرين . وانا متحمس واقولهم يله يله كأني شايب متقاعد المهم وصلنا لنقطة التجمع .. وقالي ماريو وش رايك وين تبينا نروح ..هل تبينا نروح للغابه ولاتبينا نروح البحر .. قلت له ياصديقي انا ارشح الغابه قال اوكي ..وسالنا الباقين ووافقو طلعنا للغابه وكان الجو رطب وحلو ماتدري هو حر ولابارد .. طبعاً انا ماشي واصور واكثر شي ضيق صدري ..هو التصوير .. كميرتي طفت مرتين بس الحمدلله ماطفت الا وانا راجع من الرحله مدخل الغابه ............... صور النساء مخالفة المهم مشينا مشينا مشينا وطبينا بهل المنحد بارد بارد وفيه شلال ومغاره ابد مو ناقصنا الا ماوكلي وكالو وشيرخان الي بنص الطويل صديقي ماريو والباقين اخوياء رحله سبايك .. بزقاره يصير صديقك وهذي صوره لشلال .. ويقول ارتفاعه 55 متر عن الارض ..ارتفاع مهوب سهل هي اصلن نبعه تصب من جبل مويتها ترد الروح وهذي صوره صورت الشلال من فوووووووووووق والله يالها نظرررره الييييمه http://sphotos.ak.fbcdn.net/hphotos-..._3300073_n.jpg هذا جزء وشويات وانزل الجزء الثالث:30: |
وهنا قررنا اننا ندخل الكهف الي تحت الشلال .. والله ياربع اسمع اصوات جن :d
وذولا قلبهم فضيع يقولون احنا مانصدق ان فيه جن :d تفرجو ولاتتحسرون ..عندكم ابها والطائف :d هذا ينك بلجيكي صديق ماريو ..بس اشغل امنا مسوي على راسي الولدالي يعرف انجليزي .. بس ماعليه الرجال شاذ ماينشره عليه وهذي صورة الكهف يوم شافو الربع الحصا مصفوف فوق بعضه قمطو العافيه قالو ترى مو لازم ومامعنا نور يمكن نطيح .. قلت لهم اقول خلو الهياط ومشينا http://sphotos.ak.fbcdn.net/hphotos-..._3213834_n.jpg صوره من فوق جبل بركاني ..مهدووم ومنفجره فيه نبعه زي الاول http://sphotos.ak.fbcdn.net/hphotos-..._1302885_n.jpg المهم وبعد المشي والتمصع ..طلعنا من الغابه وقررنا نروح للبحر الا يروحون البحر .. فله وساعة صدر ### وقفنا وقلنا نمدد رجولنا شوي تعبنات من الطلعات والنزلات .. ........... صور النساء مخالفة وبعد ماوصلنا البحر .. انانزلت اررركض من الخقه ابي انط في البحررر الصوره من تصوير ماريو مهوب انا http://a2.sphotos.ak.fbcdn.net/hphot..._3542637_n.jpg المهم جاء مطر وحاسنا شوي ومادرينا الا احنا رايحي فووق نبي نزبن صوره خياليه :23: http://sphotos.ak.fbcdn.net/hphotos-..._3454255_n.jpg وهذي صوره بعد ماروق الجو وصار اوكيييي منظر ولا في الاحلام ولا لقطه سينمائيه من جد http://a4.sphotos.ak.fbcdn.net/hphot..._5841514_n.jpg ثواني وراح انزل الجزء الرابع خلكم قريبين :d |
قصة اسلام ساره
وبنسبه لختنا ساره الي الحمدلله ربي هداها بعد نقاش انا وياها وشيل وحط في البدايه هي سألتني انها سمعت ان الرجل المسلم .. يزوج اربع حريم قالت هذا ظلم للمراه وهيك .. قلت لها يابنت الحلال الدين حلل اربع حريم ..بس الرجل مايلجأ للزواج من اكثر من زوجه الا اذا كان مضطر سكتت .. شوي وقالت كلمني عن الاسلام << توررطت قلت لها يابنت الحلال مدري وش اقولك لاكن ابشري بلخير الليله نروح للفندق واوريك لان المشكله هي ماتبي بي الانجليزي تبي بلغه اللاتينيه .. كلمت واحد من الربع وعطاني رابط موقع فيه معلومات عن الاسلام كثيره بلغه اللاتينيه والحمدلله البنت صارت تقرأ وتقرأ وتسألني واجاوب بستشارت شيخ في اوكلند وصار الشيخ يكلمها ويكلمها .. لين ماجاء ذاك اليوم وكنت في اوكلند في شارع الكوين ستريت ونادتني وقالت ترانزيت انا قريت وكل شي .. وكان وجهها احمررر مررررررره سبحان الله قالت ابي اروح المسجد معك قلت لها طيب رحنا مسجد اوكلند ودخلت جوى لكن هي ماتعرف تصلي وكانت تناظر البنات بس ماصلت طلعنا برى ولفت منديل زي الحجاب قالت انا قريت وخلصت قرايه وانا مقتنعه قالت لي ترانزيت ترانزيت ترانزيت .. وانا اقولها وش فيك والله اكبر وجهها صار احممررر ودموعها تنزل ... وانا طيره بوهتي .. قلت في نفسي شفيها ذي شكل احد زعلها قالت بصووووت عااااااااالي بصوووووت عالي قالت و.. وبحرققققققه اشهد ان لا اله الا الله واشهد ان محمد رسوووووووووول الله صار كل الي في الشارع يناضرون .. انا هنا اول مره بحياتي احس ان الارض تلف فيني شعوور صعب وصفه لاكن الي اقدر اقوله اني حسيت ان فرح العالم كله انطلق من هل البنت صاحت صاحت صاحت بشارع تقول انا مسلمه انا مسلمه انا مسلمه وقالت الشهاده ثلاث مرات بصوت يفقع الاذن وحسيت انها كانت توبخني وتوبخ المسلمين ..الي مقصرين الله اكبر بعدها ضمتها وحده مسلمه في الشارع .. تركيه وتقريباً كان فيه اتراك وكان فيه اجانب كثير كلهم كبرو الله اكبر وكل هذا بفضل الله ثم بفضل الشيخ .. ولا انا بس دليتها الطريق ولا هقوتكم انا وجه واحد يخلي احد يسلم اها بس بعدها صارت تتحجب .. وكان في بالي اصور بس خفت تعيي واطيح من عينها وهي وعدتني انها تاخذ عمره والله يستر عليها ويثبتها بس الي انا منحرج منه لو سألتني عن المسلمين الي مخربينها وش اقولها .. الله يعين .. هذي قصتها للي الحو علي فيها لكم المايك وجايكم بتكملة الرحله قريب |
سكوت قسم بالله إنك استاثمت بي
فقعت ضحك بالدوام يحسبونن انهبلت توي بالصفحة الثانية |
أخوي سكوت آسفه جدا قريت إلى المطار ووداع الأصحاب ....
وقعدت أصيح ... عاد أنا بجد أبيها من الله ضايقن صدري خلقه ولقيت شئ محزن لا ومشغلة أنشودة حزييييييييييييييييييينة .... تقطع قلببببي ... لي بآآآآك إذا عقلت وهديت ... |
خلصصصصصصصصصصصصصصصصصت كل الأجزاااااااااااء مسحت دميعاتي وقعدت عليها ... ولاقيلت ولاغمضت عيني قلت لين أخلصها ...
راااااااااااااااااااااااااائعة جدا والأسلوب العفوي جذاااااااااااااااااب .... بصراحة كل ماأقرأ جزء أتشوق للي بعده ... ننتظر البقية على أحر من الجمررررررر ياويلك تطوووووووووووووول علينااااااااااااااااااااااا ... عجبتني قصة العيد وفرحتك بالعيد ... عشت معك الجوووو والله .... وبعد عشاني أفكر بالإبتعاث فعشت الجو بجد ... يوم قلت قهوة وتمر وطحينية غبطططتك ههههههه قصة إسلام سارة أثرت بي سبحانك ربي .. الله يثبتها ... بس ضاق صدري تتن ياتروي .. وعود آفا بس آفا :21: |
سبحآآآآآنك ربيّ
آبي نيوزلندآآآآآآ وآصور عنزآت وآمزمز تمر بطحينه وهيكآآآآآ هـع !! آجل تتن يآذوق يالبّى قلبك مآعليه كلّه فتره حبّوبه بعدين آلحمد لله شي مرآآآ بسيط ومآينقص من قيمة الآخ شوفي آلرّجآل مآشآء الله حوليه كيف آثّر في آلموزآت بآسلوبه هههههههه وكيف مآ شآء الله ثآبت رغم آن الفتن قدآم عينه ترى مو كلّ واحد يدخن آنسآن مش كويّس بآلعكس والله ربمآ يكون هذآ الرجل آعظم منآ عند الله فقد آسلم علي يده آنسان والرسول اللهم صلي وسلم عليه يقول لآن يهدي الله بك رجلآ وآحدآ خير لك من حُمْر ألنِعَم موفّق خيّو ويتنق . . . . |
صراحة اسلوب يجنن وتقرير مبدع وحلووو
الحمدلله على سلامتك والله يسعدك مثل مارسمت الابتسامة على وجيهنا والله يجزاك بالخير على دعوتك لسارة ويجعله في موازين اعمالك ثقيل بس في مصطلحات مافهمتها <<< قصيمية عايشة بالحجاز وماتدري وين الله حاطها وبالنسبة للتتن ودي لو كل الشباب يتركونه مايجي من وراه الا الخساير والاضرار |
بسم الله ما شاء الله ربينا يتقبل منك سبحان الله لقد انعم الله علينا بالسلام ولكن مقصرين ولم نشكر الله عز وجل على هذه النعمة التى لا تقربها اى نعمة اخرى وكم من البشر الذين لم يسمعوا عن الاسلام وفقط اذا سمعوا اشهروا اسلامهم لانه دين الفطرة رحلة موفقة اخى العزيز وفى انتظار البقية |
موفق اخوي تروووي
الله يوسع صديرك بالعافيه ماقريتها الا تالي الليل وزي ماقالو البنات ضحكت غصبن عني زوجي جمبي ويتحمد الله <<<<<<<<<<<انواع الكركره بالانتظار وسلمنا على الدكتور الي مايدري وين الله حاطه وسلمنا على راعي الجلابيه الي سنعك يافديت قلبه |
ماشاء الله
من زمان بدي أقرأ وأعجبتني روايتك الله يوفقك ويثبتك .. ايش يعني هذي الكلمه ( ياتروي ) |
راااااائع
واصل في انتظارك |
اقتباس:
اتوقع تروي اسم دلع اولقب يارب يكون صح علي :) |
:26:نواره وانا اختك كانك رحتي اسراليا مع سكوت:23:
|
| الساعة الآن 06:14 PM. |
Powered by vBulletin® Version 3.8.7
Copyright ©2000 - 2024, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©