|
حياتنا صارت جحيم حلت الرد99
السلام عليكم ورحمة الله وبركاته
حياتنا صارت متكهربه هذا الايام ببدأ اولا بذهابه للبحرين ... قلت له اروح معاك .. رفض قاال رايح مع اصحابه ... وصارت بينا مشكله كبيره وجلسنا 3 ايام مانحاكي بعض... وكانت كلها مشاكل ومن مشكله لمشكله ثانيه .. قلت له دام معاك فلوس تسافر من بلد لبلد ودى ولدك المستشفى لأنه مريض ووداني عشان الصداع المستمر وكمان دكتوره نسائيه عشان اشوف اللولب بعد ماطحت ... طبعا ماقصر من الساعه 4 العصر لين الساعه 10 الليل واحنا من دكتور لدكتور .. وجلس بعدها يتمنن علي ويقول خلاص وديتكم وماني مقصر معكم وكل فلوسي صرفتها عليكم وجبت لك كذا وكذا وكذا .. والحين جا دوري وابغى اسافر اغير جو مع اصحابي ... انا حسيته انه يتمنن وماحب هالشي ... قلت له اذا انت تعايرني عاللي تجيبه لي جيب اللي اخذته مني ... ولا تنسى انك بعت ذهبي قبل كم سنه ... قال ورجعت اشتريت لك بدلهم ... قلت له في 3 خواتم بعتهم بعد زواطنا ومارجعتهم ... وهو سكت ولا تكلم وزعل مني وصار مايكلمني .. انا صح غلطانه بس هو اللي حدني على هالشي ... رجعنا البيت واخذ فراشه للمجلس ..واليوم الثاني اتصلت اخته تسالني عن الخواتم تقول ليش قال لها تشتري خواتم ولمين .. قلت له لا تشتري وقولي انك مالك دخل ... قالت اوك بس لاني ماعندي فلوس اشتري ... وبعدين رحت ارتب ذهبي واشوفهم شفت واحد ناقص حق معصم اليد وانا كنت حاطته بالكومدينه اللي بجهة زوجي فأرسلت له قلت له انت اخذتها ولا لا ... قال ما اخذت شي .. طبعا انا ماصدقته لانه دايم كان يخبي علي ذهبي لاني من النوع اللي ماحافظ على ذهبي اذا لبسته احطه حتى بالمطبخ .. جلست اكرر سؤالي وهو عصب ويقول دوريه وانتي مهمله وووو ... انا احس بقلبي نار قلت له انت أخذته عشان تبيعه ... قال تتهميني انا مو سارق وانا وانا ومن بكره بتسلف من اخوي واشتري لك مثل اللي ضيعتيه وبشتري لك خواتم وبعدين بتشوفي شي ماشفتيه وانتي وانتي وكلام كثير وحسيت ان بمعني كلامه انه بيتزوج ... قلت له بكيفك انا مالي دخل فيك ... وبعدها بيوم تصالحنا ومدري كيف تصالحنا بس قلت له انا ماتهمتك بس انت ظايم تخبي علي وفهمته ايش قصدي وان مايهمني الذهب كثر مايهمني هو المهم لما رجع جلس يدور معاي قلبنا البيت كله ... وقررت انسى اللي ضاع قلت يمكن طاح علي بالشارع .. جا يوم الثاني طاح علي المشط ورا السرير وشفت الذهب اللي ضايع الحمدلله واعتذرت مره ثانيه وجلسنا كم يوم حياتنا تمام الحمد لله ... وبالاخير ماسافر مدري ليه الين قبل كم يوم انقلب حياتنا فوق تحت لدرجة انه يبغى يطلقني بس خايف من كلام الناس على حسب كلامه ... طلعنا نتمشي ودخلني محل اكسسوارت وقال اختاري واخترت وهو يختار لي ووقفنا عند سلسال عجبني قال لا مو حلو انا اصريت اخذه مع انه مو غالي بس هو يقول ماعجبه ... دخلنا السياره معصب وانتي تحبي تمشي كلامك علي دايما تعاندي ووووو وانا ساكته .. وصلت البيت واشوفه قالب وجهه مايكلمني استغربت كل ذا عشان سلسال ... سكت الين وقت النوم دخل ينام من غير مايكلمني ولا شي .. وجلست اسأله وش فيك انا وش سويت يقول مايبغى يكلمني وطفي النور بنام قلت له لا ماتنام الا لما تقول لي انا وش سويت ... قال حتى بنومي بتتحكمي انقلعي من وجهي .. انا انقهرت قلت له كل ذا عشان سلسال رحت جبته وقطعته ورميته وهو عصب اكثر واخذ القطع ورماها بوجهي ويقول والله مانساها لك ... قلت له انت ماعجبك خلاص قطعته عشانك .. وانت دايم تتمنن اذا جبت لي شي .. يقول انتي مبذره ومغروره ومتكبره ودلعك زايد عن حده اانا مو قادر اتحملك هذا شقاي تعبي تقطعينه ليش ... وجلسنا متزاعلين الين امس قال البسي نطلع وانا رفضت وبالاخير طلعت عشان مايقول اني امشي كلامي عليه ... طلعتي وداني محلات ويشتري لي ويقول خذي اللي تبغيه ... وانا مستغربه طلعت من محل واحد بس ب 500 وفوق اقوله خلاص رجع مابي يقول خذي ...ورحنا محل ثاني وثالث وكل الاغراض لي يعني لا هو للعيال ولا للبيت ولا له ... اول مره من زواجنا يسويها ... صحيح انه مو مقصر معاي بشي بس هالمره بكثير ... المصيبه اني لحد الحين ماقلت له حتى شكرا ولاني قادره اتكلم معاه ولا احط عيني بعينه ... مو عارفه كيف لاني صعب اتأسف صعب كثير .. ابغى اعرف سر تغيره بيوم وليله مع انه كان يتوعد ويهدد عشاني قطعت سلسله ... وابغى اعرف كيف اتصالح معاه من غير ماعتذر . طولت عليكم بس حبيت افهمكم من البدايه انه دايم يتمنن بأفضاله علي حلت الرد 99 http://66n.com/forums/showpost.php?p...9&postcount=99 |
رد: حياتنا صارت جحيم
وقبل مايقول نطلع بيوم كان يتقرب مني يبغى حقه الشرعه وانا رفضت ماخليته يقرب مني لاني عارفه نقطة ضعفه وقلت ابحرمه بس كان عندي عذر شرعي وجات بصالحي وهو مو عارف على باله اني مابغاه
|
رد: حياتنا صارت جحيم
التكهرب يا اختي يحتاج طرفين ،، واعتقد انك الطرف الاكبر واللوم عليك اكثر ،، تصرفات مستفزة وبعيده كل البعد عن الحكمة والتسامح ،، زوجك رائع وكريم ،، لا تفرطين فية ،، اولا مايحق لك تمنعينة من السفر ولا يحتاج لاذنك ،، ولكن كرما منه ،، علمك ،،، وثانيا ارى الثقة بينكم ضعيفة ،، وبصراحة لا تستقيم الحياة بدون ثقة ،،،
يااختي احذرك من الجدال على الطالعة والنازلة ،، ومقابل الزوج بالندية ،، اعلمي ان زوجك اكبر منك قدرا وسنا ،، والرجال قوامون على النساء ،، اين الاحترام ! اخر شي ،، كيف يا اختي تحرمينة من حقه الشرعي ؟ ما تعلمين ان الملائكة تلعن المرأة الي ترفض بدون عذر شرعي ! اعلم ان كان عندك عذر لكن نيتك ترفضينة ،، والاعمال بالنيات ،، وفوق هذا كذبتي علية عشان تقهرينة !! جمعني سوء على سوء ،، اعتذر اذا كان ردي مزعج لك ،، لكن الدواء مر ،، والكي مؤلم ،، والله يصلح حالكم . |
رد: حياتنا صارت جحيم
سمورة انت بخير ؟
صدقيني حبيبتي لا ارى اي مشكلة يعني كثر خيره يحاول يرضيك ويشثريلك احمدي ربك يا بنت والله لو زوجي قطعت هديته الذهب في وجهه لا اضمن اني سأبقى على وجه الارض هههههه . الله يهديكم ويبعد عنكم كل شر |
رد: حياتنا صارت جحيم
تباااااارك الله ...
زوجك انسان رائع جداااا ... ما شاء الله لا قوة إلا بالله |
رد: حياتنا صارت جحيم
انا غلطانه بس هو الغلط الاكبر عليه مو انا يا اخي وانا مامنعته بس السفر ماكان وقته ابدا
ومين اللي يجادل عالطالعه والنازله ؟!!! بالعكس هو اللي يبدا مو انا لو قريت موضوعي صح رح تفهم ان هو اللي يدور مشاكل وانا من النوع اللي ماتحكم بنفسي ابدا حاولت كثير وماقدرت ... وفا هذا الايام مره نفسيتي تعبانه احس اني كارهه الدنيا كلها كل يوم مشاكل مو قادرين نتفق لوفتي !! انتي كمان .. هو بتصرفه مش طبيعي يعني وراه شي احس ينتقم مني او مدري وش سالفته ... كأنه يصفعني بمعاملته لي أمس وللمعلوميه انه مايتكلم معاي ابد ولا انا غير في الاشيا الضروريه وطلبات البيت والعيال .. أحيانا اقول يمكن يبغى يتزوج عشان كذا بيوفر لي كل شي .. لان هذا التلميح اللي لمحه لما تهاوشنا بسبب الذهب اللي ضاع ... |
رد: حياتنا صارت جحيم
معليش سموره أنتي وحده مستفزه
اجل تقطعي السلسله قدامه والغريب تقولي بدل ماتسافر عالجني ويوم عالجك تقولي تتمنن ياربي والله انا ماتحملت اكمل كلامك أجل كيف أفعال معليش بس تقهرين والله ولدي لو يقطع قدامي شي توي اشتريته له وربي لأدبه لا إحترام ولا تقدير انا استمتع لما يشاورني زوجي بشيئ خاص فيني ايش تحسين لما قطعتيه ؟؟؟ |
رد: حياتنا صارت جحيم
اقتباس:
حلوه أنا من النوع الي ماأتحكم في نفسي ؟؟ أجل مين الي يتحكم فيك؟؟؟ سالفة الذهب تقهر تقهر تقهر معروف عنك تضيعي ذهبك وتروحي تتهمي زوجك ؟؟؟؟ وبعد مااستفريتيه بشكل لا يطاق تبغينا نفسر حركاته!!! حتى رسول الله تعوذ من قهر الرجال |
رد: حياتنا صارت جحيم
اقتباس:
وبعدين قطعته عشانه هو لان قال مو عاجبه حسيت بالراحه بعد ماقطعته بس انقهرت عالسلسله لان كان نفسي فيه |
رد: حياتنا صارت جحيم
الله يرزقك السكينة والراحة
|
رد: حياتنا صارت جحيم
اقتباس:
|
رد: حياتنا صارت جحيم
اقتباس:
والله لو اشتريتي لزوجك شيئ وقطعه قدامك كان أختلف الكلام حسيتي براحه ع تقطيع النعمه ؟؟؟ فلوسها كم يوم تأكلك احسبي كم يوم ؟؟ بلاش نقول أهنتي زوجك بهذي الحركه لكن ماتخافي ربي يعاقبك ويحرمك من نعمه ؟؟ |
رد: حياتنا صارت جحيم
اقتباس:
أقول أرجعي لأبوك الحنون وبلاش تتدوشي راس المسكين والله كأني أتكلم مع وحده من أخواتي تبرر أخطائها بشكل مضحك ولا زال الزوج صامد معاها الله يكون في عون زوجك وزوج أختي عندهم عيوب لكن ردات فعلكم حتى الطفل احياناً مايسويها |
رد: حياتنا صارت جحيم
اعوذ بالله من قهر الرجال
تعاندي وتاخذي السلسال ويدفع الضعيف وبعدين تقطعينه حطي نفسك مكانه هداك الله |
رد: حياتنا صارت جحيم
مرحباً أختي
يبدو أن حزنك على والدك رحمه الله لازال يؤثر على علاقتك بزوجك ... ولابد أن تنتبهي لهذا الأمر أختي الأحداث التي ذكرتيها في موضوعك غير جيدة من طرفك .. والحقيقة أن زوجك كان يحاول يراضيك ويحتويك بأي طريقة ولكن أنتِ زودتيها شوية لذلك .. أحذري أن يستمر هذا التكهرب في حياتك الزوجية وحاولي أن تخرجي من حالة الحزن إذا كانت مؤثرة عليك وأن تعودي لطبيعتك مثل السابق وإلا .. فربما سيفكر زوجك بجدية إما في الزواج الثاني أو الإنفصال لاقدر الله وفي كلتا الحالتين .. قد تكونين أنتِ سبب قوي فيها أعانك الله |
رد: حياتنا صارت جحيم
أعتذر سموره لم أقصد جرحك لما قلت روحي لأبوك الحنون لاني لم أعلم إنه ميت
( رحمه الله) حتى أنا لدي أب حنوووون جداً لكن علاقة الأب ببنته تختلف عن علاقة الزوج بزوجته عموماً أعتبرتك أختي وعاتبتك كما أعاتب أختي بقسوة من يريد لك الخير ذكرتي الاحداث كلها الي خرجت منك ولازلتي مستغربه ليه هو يتعامل معاك في الآونه الاخيره كذا تبغي تستمري يعني ؟؟ الله يصلح مابينكم يارب |
رد: حياتنا صارت جحيم
من زمان مارديت ع مواضيع هينا
بس لما دخلت اقرا مشكلتك وانا حرمه صكني راسي من مشاكلك😩 لو انا رجل كان طلقتك 🌚 بجد مستفزه لابعد الحدود هدي ياختي هدي ماشالله واضح ان زوجك يدور رضاك لكن راح تخسرينه بطول لسانك وعنادك ليتك تتعمقين بالبوصله الشخصيه وتعرفي نفسك وزوجك اكثر قبل مايطيح الفإس بالراس الله يعينكم😩مشكالكم يوميه ع اشيا تافهه |
رد: حياتنا صارت جحيم
اسفه اختي انا مع كل اللي ردو عليك
ردود افعالك مافيها احترام لزوجك ابد زين منه متحملك الله يجزاه خير ومعليش يعني وش اللي بتقهرينه عشان ماراعى نفسيتك!! هذا يعني تعاملينه بالند وهذا اكره شي بالتعامل مع اي أحد أجل كيف بزوجك لو بتاخذين حقك منه بكل تصرف يزعلك فيه اقولك الله يعين زوجك ويعينك انتي على نفسك لانك بتتعبيييين نصيحه لوجه الله تسامحي من زوجك وبلا كبر وعناد اكثر وابتدي من جديد اصلحي بينك وبين نفسك ريلاااااكس اختي الحياة ماتستاهل كل اللي تسوينه بنفسك وفي زوجك هالمسكين |
رد: حياتنا صارت جحيم
انا مازعلت بس مستغربه من هالهجوم علي ... انتوا شايفين غير اللي انا اشوفه ... انا شايفه انه يدور على مشاكل مايدور رضاي مثل ماتقولون ... شايفه أنه يكرهني ويدور على أي زله عشان يمسكها علي ... شايفه انه يحاول يستفزني عشان اشوف قديش هو له افضال علي ...
اختي متفائله انا قلت له اخذته وبعته وانا متأكده انه ماباعه بس قلتها كذا عشان لو صحيح هو مخبيها علي يطلعها ... انا حابه نرجع مثل قبل بس ماني قادره اسيطر على نفسي ابدا ... عصبيتي زادت بشكل غير مقبول ... وهو والله العظيم يستفزني بطريقة تعامله معي وكلامه مستفز بشكل ... له كم يوم يقول انتي مجنونه انتي مرفوع عنك القلم مارح اتعب نفسي معاك !! وكل مره يرددها ويعيدها ... ليه شايفني مجنونه !؟!!! طيب ليه مايتكلم معاي كأنه مايشوفني بالبيت... حاولت افكر بطريقه اتسامح معاه ماعرفت مع اني جالسه معاه طول الوقت وهو يتفرج عااتلفزيون ولا معبرني |
رد: حياتنا صارت جحيم
واللي مقهور عالسلسال تراه مو ذهب هو اكسسوار عااادي وقيمته مايتعدى ال 50 ريال !!!
|
رد: حياتنا صارت جحيم
لا تزعلي من كلامي
لكن الزوجة اللي مثلك يا سمورة ( تستحق ضرة أو تستحق الطلاق ) مستفزة ، و لسانك طويل ، و كمان تطلعيه غلطان و هو باله طويل و الله يكثر من أمثاله |
رد: حياتنا صارت جحيم
الله يهديكي أسلوبك مستفز
يمكن عصبيتو لما قطعتيه حس باصتغرار عامل دوشه على حاجه بسيطه بس برضو حركتك مستفزه حاولي تغيري أسلوبك للاهدا اقرأي موضوعك كأنو مشكله لوحده غيرك وشوفي أسلوبك ياريت تطيبي خاطرو بكلمتين لتخلي الموقف يبكر بقلبو ربي يصلح احوالكم |
رد: حياتنا صارت جحيم
سموره شيلي من راسك ان زوجك بيتزوج
احذفي هالفكره تماما ولاتفسري اي تصرف لزوجك على هالاساس انتبهي ترى هذا الشي مخليك مكبره عيوبه لا توهمي نفسك وتصدقي الكذبه |
رد: حياتنا صارت جحيم
سمورة..
ليش صعب تعتذرين؟ |
رد: حياتنا صارت جحيم
برضو انا الغلطانه ؟
من اول ماتزوجنا وهو اذا جاب لي شي يجلس يتمنن وانا جبت لك وجبت لك وسويت لك شوفي غيرك يحلمو بهالشي .. وانا الهبله اقوله مشكور وووو ... قبل كم شهر طلعني اشتري ملابس وطلعت من المحل بمبلغ شوي كبير ... وهو اللي كان يختار واذا قلت له غالي يقول عادي ... وبعد كم اسبوع اذا تهاوشنا على اقل القليل يقول انا طلعتك وجبت لك ملابس بالمبلغ الفلاني ووو !!! ... طيب مشكلتنا ماله دخل ليه تجلس تتمنن وش هالطبع بس انا مشيتها له ... قبل سنه كان يجيني الم بصدري قلتي له اخاف يكون عندي القلب ... قاال عادي اجيب لك قلبي ووو .. قلت له الله لا يقوله بعدين ترجع تتمنن وتقول وتقول ... صار يضحك وقال انتي تدرين بطبعي ولازم تتعودين على كلامي ... يعني هو يدري ان طبعه يدري انه يحب الذل لي ويبغاني اكون ذليله له يحب يذلني باللي يجيبه لي ... بس انا كنت امشيها زمان له واسوي نفسي ماسمعه بس الحين ماقدر ابدا .. حتى الاكل صرت مابغى اكل شي اقوله بترجع تذلني وانك اكلتني وشربتني وعيشتني ... وهو ساكت او يقول مرفوع عنك القلم.. مهره .. لاني اعتذرت بمشكلة الذهب والسفر ... واخر مشكله قال لي بتجين تعتذرين بس والله مارح اقبل اعتذارك ... وبرضو جرحني كثير كثير كثير لو اطلع االي بقلبي رح اجلس اكتب لبكرا |
رد: حياتنا صارت جحيم
معليش اختي, انتي الغلطانه وتصرفاتك جدا مستفزة وتبين انك غير مبالية لزوجك!
1- اتهامه بالسرقة!! واتهامات غيره وغيره, مثل انه لايريد ارضائك! 2- تحاسبينه على الاشياء اللي ياخذها منك رغم انه لو طلبتيه يرجعها يرجعها فليش تتعبين نفسك تعايرينه وتطلبينه اشيائك؟ ليه ماتكونين متعاونه؟ لانه بالاخير هو زوجك! 3- رأيه لايهمك! او لا يعجبك ذوقه! يعني قال لك مو حلو السلسال! ليش اخذتيها؟ وانتي اساسا مو بتلبسينها امامه اكثر شي؟::: المفروض تسألينه يعني تنصحني اخذها ولا اغير اذا مو عاجبتك؟ بالسؤال هذا وان كان مو عاجبته ربما يقول خذيها عادي! ارى انك تحسني من تصرفاتك اذا تطمحين لحياة زوجية افضل! الحياة الزوجية بإختصااار هي مشاركه! المشاركة في كل شي في الاذواق والاختيارات والقرارات...وكل اموركم الحياتية وانت كانت صغيرة! .. |
رد: حياتنا صارت جحيم
اقتباس:
معميك التدقيق, الله يكون بعونك. .. |
رد: حياتنا صارت جحيم
سؤال صريح, انتي تميلين لمحبته ولا لكرهه؟
اذا موجود برا البيت مرتاحه تكوني؟ سألت هذي الاسأله لاني شايف انك مو متقبله لعيوبه! .. |
رد: حياتنا صارت جحيم
اقتباس:
اقتباس:
يا اختي انا ماتهمته بالسرقة وهو يدري اني احاول استفزه عشان اذا مخبيه يقول لي بدل ماجلس ادوره .. وهو يدور على مشاكل هذا اللي لاحظته لو ترجعي لموضوعي السابق رح تفهمي .. وبالعكس انا متعاونه معاه كثير ضحيت بأشياء كثير عشانه وهو يدري وفي اشيا كثيره كثيره ورأيه يهمني وهو يدري برضو ودايما اقوله ذوقك حلة ابغى من ذوقك بس هذا السلسال عجبني ونفسي فيه ... وبعدين انا مالبس له لوحده البس له ولنفسي ... انا عايشه لنفسي قبل لاعيش له ... اكيد لمحبته بس حابه اغير من اسلوبه واذا طلع من البيت في البدايه ارتاح بس بعدها احس بشوق له والله يعلم مابقلبي ... بس كرامتي فوق كل شي |
رد: حياتنا صارت جحيم
اقتباس:
المهم توقعي صح في انه ترتاحين...ليش كل هالتدقيق؟ لاني عشت هالوضع قبل مدة من الزمن مع زميل لي, كنت ارتاح لما يخرج, طبعا بتقولي فرق بين زميل وزوج, اكيد فيه فرق لكن السبب واااحد...اللي هو التدقيق, وبغضك لبعض من تصرفاته! .. |
رد: حياتنا صارت جحيم
انا مادققت يا أخي... كثير كنت امشيها له بس الحين كل شي واضح .. انا كنت زمان معميه اما الحين فتحت مادققت .. مدري ليه مصر على اني ادقق ..
هو تصرفاته سيئه كيف شايف انه تدقيق ؟ يعني اذا كل مره يذلني على شي جابه اسكت واقول مشكور لمتى ؟ |
رد: حياتنا صارت جحيم
اقتباس:
.. |
رد: حياتنا صارت جحيم
اقتباس:
اوك مانكر عنده ايجابيات ومايقصر معاي بشي وكل اللي ابغاه يجيبه لي بس عيبه انه يمحيها بالتمنان ... يعني وش بيصير له اذا جاب لي شي وسكت ماقال انا وانا وانا ... وللعلم انا ماقصرت معاه يعني اذا جاب والله اشكره وادلعه يعني مافي داعي يذلني وعلى فكره هو سألني نفس سؤالك بعد ماقطعت السلسله وجاوبته نفس الجواب اللي جاوبتك هنا |
رد: حياتنا صارت جحيم
اقتباس:
عطينا موقف بالتفصيل لمشكله صارت وبعدها بدا يتمنن؟ .. |
رد: حياتنا صارت جحيم
سمورة ، زوجك يقابل السيئة بالحسنة !! و هذا طبع جميييييييل جدا ..
★ زوجك انسان صبور جدا للإستفزاز ، فلا يضرب و لا يشتم و لا يهدد بطلاق ( اللهم بارك ) !! ★ زوجك يشاركك الحياة في ادق تفاصيلها ( ثيابك ) و هذه نعمة عظيمة يتمناها الكثيرون ! ★ زوجك يحبك حبا صادقة قويا اللهم بارك لكما ، و إلا ما قابل السيئات بالاحسان و صبر!! ★ زوجك يحترمك و يقدرك : و الدليل انه الغى السفر إرضاء لك !! صفاته المحمودة واضحة جدا في موضوعك ، أفيقي يا سمورة قبل ان تنتزع منك النعمة و تعطى لمن يستحقها فعلا !!!! |
رد: حياتنا صارت جحيم
اقتباس:
اقتباس:
يقول انا ماتمنن ولا اذلك انا هذا طبعي ... واذا مابغى اجيب لك مارح اجيب وانا مو ملزوم اجيب كل حاجاتتك الدلع... انا ملزوم للاشيا الاساسيه وبس ومن يوم ورايح اذا قلتي تبغين شي بقول لا وانسي كلمة حاضر وان شاء الله وانتي ماتستاهلين وووو كلام كثير جرحني ... حتى طلبت منه بطاقة شحن وكل مره اطلب ساعه بالكثير ويكون عندي بالتحويل واخر مره طلبته قال لي لا ... المواقف كثيره ... اكثر موقف نختلف فيه هو الجوال... انا لما اجي احط جوالي ارميه عالكنبه ... وهو يتنرفز من هالحركه يقول هذا جوال كيف ترمينه انا شاريه بقيمة راتب شهر كامل ليه ماتحافظي عليه .. طيب انا رميته عالكنبه مو عالارض !!؟؟؟ حتى لما خرب وربي خفت وانفجعت لاني ادري مارح يسكت ورح يذلني وبيقول اني مهمله لجوالي بس ربي ماراد لي المذله وبعد ساعه صلح بنفسه .. وكم مره احاول احطه بحنيه مثل مايبغى هو بس احيانا انسى وارميه وتتكرر المشكله ... ... لوفتي انا مانكر صفاته الحسنه بس والله مو قادره اتحمل الاذلال ابدا ابدا ... 6 سنوات تحملته يالوفتي الحين صعب صعب صرت ماتقبل منه شي ... امس يقول لبنتي شوفي ماما مجنونه !!! .. قبل امس وقف عند صرافه يسحب فلوس بنتي شافته قالت بابا خلاص بيخلص فلوسك ... قال والله مدري مين اللي عمره 5 سنوات انتي ولا امك ... والله مستفز وانا ساكته لاني لو تكلمت مابخلي كلمه مابقولها |
رد: حياتنا صارت جحيم
وموقف ثاني ولدي طاح من السرير وورم عينه وجبهته وانا خايفه عليه وقلقانه وهو مستلمني تهزيء انتي مهمله انتي وانتي ... كلامه من كثر مايكرره صرت حافظته ... لو تعطين لولدك وقت مثل ماتعطين لجوالك وقت يكون افضل ... اقوله متى والله اني مامسك جوالي كثير يقول 24 ساعه بيدك الغلط علي جايب لك احسن جوال وووو !!
|
رد: حياتنا صارت جحيم
اقتباس:
كلامه جداً واقعي, ومو هذا اللي انتي تبينه؟ ثاني شي هو ماقصر والله وضح لك انه مايتمنن ولا يذلك! جميل جدا كلام زوجك وعقلاني! اقتباس:
1. للدرجه ذي؟ كلامه الواقعي يذلك؟ اولاً هو في نظره انه رميك للجوال اهمال, وقالك واقعه انه اشتراه بقيمة راتب....هنا لا يوجد امتنان من جهتك! 2. رأيتي انه يذكرك بسبب النرفزه, لما لا تكون ضريبه بسبب النرفزه؟ 3. لا يوجد تقدير لما يفعله وهذا ما يظهر لزوجك! في نظري زوجك ينبهك ولا يمن عليك لما يراه من قلة تقدير واهمال من قبلك! .. |
رد: حياتنا صارت جحيم
اقتباس:
وهذا الموقف ايضا يؤكد ان زوجك يراك مهمله لذلك هو يقوم بتنبيهك طيلة الوقت! .. |
رد: حياتنا صارت جحيم
اقتباس:
اقتباس:
انا احس بالمذله ما احس انه ينبهني .. وبعدين ياخي هذا مو اهمال انا ماهملت ولدي هو اللي طاح وثاني شي الجوال رميته عالكنبه مو عالارض كيف يكون اهمال ... وكيف لا يوجد امتنان من جهتي !؟؟ يعني عادي يقول انا شاري جوال بقيمة راتب ؟ لا ياخي انا اعتبره هذا امتنان... وشي ثاني كمان ... قببل 3 شهور أزم نفسه وغير اثاث المجلس والصاله والغرفه وحط بدل المكيفات العاديه مكيفات مركزيه بشهر واحد بس ... وانا اقوله شوي شوي امسك فلوسك وهو راتبه مايكفي واضطر يتسلف وماسمع كلامي ... وبالاخير كل ماطلبت شي يخصني يقول مو وقته واذا جاب يقول هذا انا اشتريت لك ولسى ماقضيت ديون الناس ولا دفعت قيمة كذا وكذا ... طيب انا ماطلبت تغير كل شي بوقت واحد انا نصحتك وانت ماسمعتني ... يقول انتي تصرفي على اشيا مو مهمه ومالها داعي!! كلامه والله يقهر |
| الساعة الآن 07:33 AM. |
Powered by vBulletin® Version 3.8.7
Copyright ©2000 - 2024, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©