|
شورو علي.. ايش اقول لكل من يسألني
السلام عليكم على كل اعضاء المنتدى... لكل اللي مايعرفني ( (انا منفصله للمره الثانيه ....والمره الثانيه كانت فقط ملكه ..والكل كان متوقع زواجي بهذي الصيفيه ..لكن قدر الله وماشاء فعل)) .. بداوم بالجامعه السبت الجاي وكل صديقاتي متوقعين ارجع للدراسه وانا متزوجه ... لكن .. هذا هو نصيبي صديقتي المقربه تعرف اني انفصلت ...لكن باقي القروب مو عارف ... ماني عارفه ايش اقول !!!! جات فكره ببالي ولكن قولوا لي هل تعتبر كذب ؟؟ بقولهم (اني اجلت الزواج الى ان انتهي من الدراسه )....عشان ولاوحده تسألني وتقولي( متى زواجك؟؟):( لحد يقول لي عادي قوليلهم انك انفصلتي ......بسبب لو انه اول طلاق لي لكان الامر سهل لكن هذا طلاقي الثاني هل الحل اللي كتبته يعتبر كذب ؟؟ ياريت تجاوبوني ولو احد عنده حل ثاني يسعفني فيه..واكون شاكره لكم.. |
قدر الله وما شاء فعل
قولي لهم (( قدر الله وماشاء فعل)) :d
:d ادري انك بتقولين يا فلاحتك يا فالح :d بس هذا هو الحل الأمثل |
قولي لهم اللي تبغين هم صاحبات دراسه ماتربطك فيهم الا الدراسه ...:23:
اهم شي سدي حيلك بالدراسه ... وابدئي السنه الدراسيه بروح حلوه :d :d :d |
انا نصيحتي لش حبيبتي انك تكونين صريحه من البدايه وتقولين لهم من البدايه انه ماصار نصيب لانه مهما ماطلتي وحاولتي تخبين بيجي يوم وبيعرفون وكل ماعرفوا الناس بدري افضلش يمكن في احد يبي يتقدملش وانت مو عارفه؟؟ واذا خايفه من كلام الناس ماهمش احد الناس في كل الاحوال لازم تسوي هدره وبربره
|
اختي العام نعم للاسف يعتبـــر كذب ... وذلك واضح وضوح الشمس ولا ارى سببا مقنعا يستدعـــي ذلك !!!! وذلك لعدة اسباب .. عدم التوفيق قد يكون احداهن من تأتـــي لك بنصيب ... كل شئ ممكن لا بد ان ينكشف الموضوع يومــا ما وحينها سينظـــرن اليك نظرة شفقــة لأنكـــي كتمت الموضوع كما لو كنت راغبـــة في ان يتم الزواج وانك كنت على امل برجوع طليقك !!! ولن يقولن كانت منحرجة لقول ذلك !!! عزيزتـــي ارى ان تبالغين نوعا ما في شعورك وخاصة ان الزواج الثانـــي كان مجرد خطوبـــة بالطبــــع الطلاق تجربـــة اليمـــة للمرأة ولكن لا داعي ان نجعلها تؤثـــر على حياتنا لهذه الدرجـــة كل ما عليك قوله ما صـــــــــــــار نصيـــــــــب والحمدلله على كل شئ واذا جادلنكي بالسبب اقلبيها مزح ولا تشعريهن بحزنك او انك محرجة همســــة خاصـــة اليك : هذه اول مشاركة لي في موضوع لك الا اني دائمــا اقرأ ردودك وارى انه فيك من الحكمـــة الشئ الكثير ولدي انطبــاع بأنكي قوية الشخصية وفتاة واضحة وعاقلة جدا فهلا كنت كما عهدناك ؟!! والله يسعدك . . . اسماء |
مدرى ليه شايلين هم الناس قولى ماصار نصيب والحمد لله
لاهو عيب ولاحرام وكل شي بيد الله سبحانه |
اختي لو قلتي اجلنا الرزواج لن تنفكي من اسئلتهن عن زوجك وسكنك وجهازك فانت هنا تفتحي عليك باب يزيد المواجع كوني واثقه وانت تقوليها الله يعوضني خير ولحد الحين ماجا اللي يستاهلني الله يرزقك بالزوج الصالح اللي يسعدك يالغاليه |
الي صار لك لاهو عيب ولاحرام
هذي ارزاق من الله ارضاء الناس غايه لا تدرك كوني على طبيعتك افضل بكثير |
لا تاكلي هم اختي واخوات ما قصروا كوني قويه و عسى على خير و االانسان لا ياخذ الا نصيبه و كوني صادقه و لكن لا تذكري الاسباب حتى لا تقعي في الغيبه والنميمه فقط قولي ماصار نصيب .و الله يرزقك بالزوج الصالح و جميع بنات المسلمين.اختك في الله.
|
أنسب عبارتين :
ماصار نصيب والحمد لله قدر الله وماشاء فعل واذا طولوا في الاسئلة اكتفي بكلمة ما اتفقنا ماناسب بعض واللّه يوفقك في الدراسة وفي حياتك القادمة ياااااااربي ويحقق اللى في بالي ياااااااااااااااااااااا اللّه يا ربي يا كريم... |
انا مع اسماء
|
كل انسان ياخذ نصيبه من الدنيــــــــــــــــا
|
فعلا حبيبتي ... الصراحة أحسن شيء لأنه مثل ماقلتي " ما صار نصيب " ... وممكن فعلا يكون أمامك النصيب ويفوتك لأنك تقولي " سوف أتزوج بعد الدراسة" واصلا ما بنعرف كيف الناس يكونوا مرتاحين ... لأنهم أبدا ما بيرتاحوا خالص دعائي لكي أن يعوضك الله كل الخير ويرزقك بالزوج الصالح |
يا ستي انتي ما خسرتي شي ولا في شي تخبيه عن الناس
كل شي بالدنيا نصيب انتي ما الك بكلام الناس لانه لا بيقدم ولا بياخر |
أختي عن تجربه
أعرف وحده معروفه بالكذب و الذكاء بنفس الوقت لكن ذكاءها لم يشفع لها فكذبها في النهايه أوصلها أن تقسم كذباً و وقعت في ذنب عظيم بدأ في شيء رأته صغير و محتقر و لا يخفيك أن هذا الطريق مظلم و شائك لأن الكذبه تنسى ..فمهما حاولت تغطيها سيظهر التناقض و أنك مكشوفه حتى لو ما بينوا حتى لا يحرجوك أو مودة و رحمة بك فيأثروا الصمت هذا فضلاً على أن الصدق كصفه يظهر في هذه المواقف التي يرى فيها الإنسان أن الكذب ينجيه لا تقولي موقف و يعدي بل بالعكس ستتعودي عليه من حيث لا تشعري و يكون التوتر و القلق مصاحب لك لذا ..الصدق و لا حل غيره تكفي راحة البال ..أليس هذا مطلبك؟ و عن تجربه ..كل ما كنت بموقف صعب و أصدق فيه وإن لم يكن بصالحي ..أحمد الله على أني فعلت ذلك لأن النهايه هي راحة ضميري و قبل ذلك رضا ربي عني و الصدق طريق الأبرار تحياتي لك |
يقول عليه الصلاة والسلام
<< الصـــدق منجــاة .. >> بعض المرات يكون من القوة ان نواجه المخاوف بسلاح الحقيقة وفي قولة حلوة حق بول حنا أشهر كاتب تحفيزي باستراليا في كتابه ( ثق بنفسك .. وحقق ما تريد ) يقول : << المشاكل والمصاعب لاتدوم .. لكن الأقوياء يستمرون >> . خلك قوية وواثقة من نفسك :) |
حبيبتي لا تكذبي وخلك قويه وقولي ماسار نصيب
ومثل ماقالوا الاخوان اذا سألوا عن السبب لاتقولين لهم ابداً بس قولي ماتوافقنا والله يعوضك يارب _________________ انا الواثقة |
عزيزتي عادي قولي بإبتسامة إنه ما صار نصيب و إنك متأكدة إن بالأمر خيرة و غيري الموضوع و خليك قوية
|
نصيحة لاتكذبين بعدين دايم يسألون هاه وش جهزتي هاه كلمتيه ؟ ويحسرونك
قولي ربي ماكتب بينا نصيب ونصيحة عشان مايزعجونك بالأسئلة وتشوفين نظرات الرحمة اللي تضيق الصدر قولي الحمدالله اني انفصلت منه الحين ولابعد الزواج والله ربي راحمني فكة!! وخلك مبسوطة وانك واثقة انه منك عشان يكون الأمر طبيعي بالنسبة لهم وسعي صدرك كله يوم يومين يسألونك بعدين ينسون موفقة يالغلا والله يعوضك |
اقتباس:
اتفق مع هذا الرأي احنا مافي ايدينا شي الواحده منا تتمنى تعيش اميرة او ملكة حتى لكن هذا نصيب ومقدر قبل ان يخلق الانسان ونصيحة لا تحاول تبرري او تناقشي معهم الموضوع بس قولي مافيه نصيب وبس ولا تزيدي في الكلام اكثر من كذا والله يرزقك ويعوضك اخير منه |
الفارس26...شاكره لك ..الحمدلله انا مقتنعه ان هذا نصيب وقدر من الله .. لكن مين يقنع هذولا الناس؟؟
ياربي لاتحرمني...صحيح ماتربطني فيهم علاقه قويه يادوب في جروب الدراسه لكن جالسين مع بعض طول النهار من الصباح الى الظهر..والله لي نفس بالدراسه وروحي حلوه لكن لمن اتذكر الموضوع اضيق شويه..مشكورة اختي على كلامك |
Dana15...مشكوره على النصيحه ..تظنين انه ممكن يتقدملي احد عن طريق صديقاتي ..تصدقي وحده من البنات قالتلي بندور على اخويا على عروسه انا صرت كذا :23: ماصدقت خبر.. ..امزح معاكي
(اسماء)..اكره شي عندي احد ينظرلي نظرة شفقه ...وكلامك مقنع جدا اختي اسماء ... انا اصلا كل كلامي اقلبه مزح ..لكن اخاف كل وحده تقول بنفسها لو فيها خير ماتطلقت مرتين ....ومشكوره على رفع المعنويات وكلامك الحلو ربي يسعدك ... .بديت اقتنع بردك وبردوك الاعضاء ..مشكورة اختي ... |
الكبير...هلا اخوي ..انا شايله هم الناس لاني عايشه معاهم واختلاطي كثير فيهم ومن فرحتي يوم انخطبت ماخليت احد مالقتيه حتى الاستادة ...يعني فشيله الان اقولهم فسخت ...وانا معاك لاهو عيب ولاهو حرام..لكن مين يقنع الناس ...مشكور اخونا الكبير
فيافي نجد...لو اقولك جهزت كل شي الفستان الزواج والجهاز وصرفت حوالي 20 الف وحتى الشقه جاهزه لكن سبحان االله كل شي انكشف ...خيره من عنده سبحانه ... وصادقه بفتح علي باب اسئلة ماينقفل... بصراحع بديت اقتنع انه لازم الصراحه ....مشكورة على رفع المعنويات ..الله يجبر بخاطرك |
أختي العام
بقلب قوي قولي مافي نصيب و بدون شرح وتفصيل واللي يبي يتكلم يتكلم غير مهم كلام الناس لأنك لو قلتي أجلت الزواج لا تتوقعين أنهم رح يسكتون صدقيني بين فترة والثانية رح ينفتح موضوع الزواج ويجرح قلبك الله يسهل أمورك دنيا وآخرة |
jeans.... الحمدلله على كل حال ..حالي على قول شوبارد افضل من حال ..وهذا كما قلتي ارزاق بيد الله...شاكره لكي حبيبتي
swzy...همي الوحيد هم نظرات وكلام البنات ....لاني تعديت هذي المرحله من اقرابي ...وذكرتيني بشي جزاكي الله خير ..وهي الغيبه والنميمه..وآمين ربي يسمع منك أنتظر الأمان...هذا كلامي مع اهلي ..(مو مناسبين لبعض) لكن البنات بعضهم ملاقيف يبغو يعرفو ايش اللي صار بالضبط...لنا ولكي ان شالله ...ومشكوره على الدعاوي.. ام مزنه..انا كمان عجبني ردها كثير جزاها وجزااكي الله خير ...مشكوره اختي نور الدنيا كلها....الحمدلله مقتنعه بلي اخذته ومقتنعه بنصيبي ..جزاك الله خير |
lovepeaceangel...هي الصراحه حلوه لكن ...مؤلمه احسها في حقي ..انا خايفه من كلامهم ونظراتهم ..ولو انه طلاق الاولى كانت سهله...اول كنت ابحث لنفسي عن النصيب لكن الأن اللي جي من الله حياه الله ..وماكنت استحي من طلاقي الاول لكن الآن مره صعبه مهما حاولت اخبي .. جزاك الله خير على الدعوه الحلوه..
ايكو_ايكو ...الحمدلله كسبت راحة بالي ..وصار تقربي من الله اكثر..وهذا اغلى ربح لي في حياتي...وكلمة لايقدم ولايأخر نقولها كثير لكن كلام الناس يأثر سيــسبــان ....هذا اللي انا خايفه منه اني ارتكب شي كبير واللي هو الكذب على شي مايستاهل ....واخاف افضح نفسي والناس مابتشوف دبلتي فبكذا راح انحرج ولا حفتك منهم ومن احراجاتهم.... وعلى قولتك القلق والتوتر ..انا ليش مافكرت كذا؟؟..وعن راحة بالي اشتريها بكنوز الدنيا ...والحمدلله...شاكره لكي اختي على توضيحك وتبصيري على العاقبه ...الله يجعله بميزان حسناتك almojaded ....خليها على الله بعض الاحيان القوة والثقه عندي مييح ..مشكور اخوي على كلامك المريح يجزاك خير |
انتي ما قلتي بكذب يعني انتي جاوبتي علي سؤالك
والله يوفقج ويعوض عليج باخير منهم |
انا الواثقة ....انا كذا ناويه اسوي من بعد ماقويتو ثقتي بنفسي :18: الله يعنيني عليهم ..شكرا واثقه ..
de rom ...هلااختي ...بضيف رأيك على الباقين ..ابتسم واغير الموضوع...الله يجزاكي خير شوبارد.... اهلين حبيبتي ..تصدقي من قبل حتى ماينتشر خبر زواجي بالجامعه وهما بس اسئله تقولي مافي غيري..ها فين حجزتو ؟؟ها فين بتسوي فستانك ؟؟ ها فين بتسافرو ؟؟ مين بتجيبي مطربه ؟جبيبي الصور ..و و و و و..كاني اول وحده تتزوج واخر وحده...وصحيح كلامك الحمدلله اني انفصلت منه الحين مو بعد ماتوقع الفاس بالراس ......وعلى قولك كلها يومين بينسو ..لكن بتظل ببالهم والله اني خايفه من يوم السبت:24: ...والف الحمدلله نفسيتي احلى مايكون كل قرايبي يقولو ماشالله عليكي كيف تجاوزتي كل المصايب ماتوقعناكي كذا قويه ...الا صحيح بسألك يوم السبت اجازة ؟؟ يعني بيكون اليوم الوطني ..ان شالله يكون اجازه عشان اريح شويه :25: الهوى نجدي...حتى انا اقول ماابغى اناقشهم واغير الموضوع على طول .حتى مافتح لهم مجال ..ياخذ ويعطو بالكلام ....لكن اخاف يبان علي التوتر والخوف ..مشكور اخوي deema72 ....مرحبا ديما ..والله مو مهم عندي كلام الناس واللي يتكلم يتكلم ..لكن انا خايفه من نظراتهم اللي تقتل اكثر من الكلام نفسه...لكن انا لمن قلت اني بقولهم اني اجلت الزواج ...الا انني سألت واحد من الاعضاء مدري مااتذكر اسمه قالي مايعتبر كذب لانك بالفعل اجلتي زواجك وربي عالم متى ..فعشان كذا انا اقتنعت ...مشكوره على دعوتك لنا ولكي ان شالله ... ربي يسمع منك يارب jassem_9 ...حاولت افهم لكن مافهمت القصد ..ياريت توضحلي ..والف شكر على الدعوه ..يجزاك ربي ااخير |
الا صحيح بسألك يوم السبت اجازة ؟؟ يعني بيكون اليوم الوطني ..ان شالله يكون اجازه عشان اريح شويه]
ايوه راح يكون إجازة:14: |
| الساعة الآن 08:34 PM. |
Powered by vBulletin® Version 3.8.7
Copyright ©2000 - 2026, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©