|
والله لو تدري عني جدتي تذبحني
حياكم الله
بدخل بالموضوع مباشره البنت من شهر رمضان متحول نومه بغرفة بنتها كراهة غرفتي ليش مادري وصار الأخ بالله ينام هو بنته بغرفتي >>>خوش جاره جاءت من الله تنام بغرفتي وصار يعصب على يوم يسكت يوم واضغط على نفسي ونامت بغرفتي بس أحس نفسي مكتوم مو قادرة أنام ولا أنام زين ألا إذا راح الدوام أروح الغرفة بنتي كان معي الألم بظهري قلت أكيد من الدورة الشهرية لأني متعودة الحمد الله وهي متاخره بس عادي دايم تتأخر راحت الدكتورة قلت انه متاخره وذبحتني بالألم قالت أول تحاليل قلت وش تحليل عطيني شيء ينزله ويخفف الألم حامل مافيه لا تفكرين لان عندي تكيسات على المبيض وضعف بالمبايض وكل ما قول الزوجي بعالج يقول الحقين على الأطفال طلع التحليل حامل ماتوقعت شكرت ربي لان قبل فتره رايح المستشفى من ورا زوجي طبعا وقايلين لي نسبة التبويض عندك 12 واقل شيء 18 لزم ابر منشطه بس الحمد الله ربي استجاب دعائي >>>>قصة قصة حياته يا كثر ها رجك ادخل بالزبد ه المشكلة بنومي بغرفتي يعني طلعت السالفة أن توحمي بغرفتي تخيلوه 9 شهور بيموت الرجال ويمكن يتزوج لا تقولون ينقل معك غرفة بنتك هو ما يعرف ينام ألا بفراشه ولو عذارني وسكت بيتعود على انه ينام بالبيت بعيد عني وهذا الشيء مابينه لان الرجال على ما يتعود عليه>>> يؤمن بالمثل الى يقول ((ابنك على ما تربيه وزوجك على ماتعوديه)) عطوني الدبر ه وش الحل مافيه شيء يخفف الوحم صعبة يستمر وضعي كذا >>>والله لو تدري عني جدتي تذبحني تقول دلع وتزوج زوجي>>جدتي دايم بصف الرجال وتقدسه |
طيب لو تغيرين بديكور الغرفة
او تبدلين مكانها مع غرفة البنت مايتغير الوضع |
ألف ألف ألف مبروووك حملك يا قمر
طيب ليش ما تقولي لزوجك لا تقفليها على طول عشانك وعشان البيبي يمكن يتنازل عن فراشه وينام معاك بغرفة بنتك جربي ما بتخسري شي واذا ما نفع نشوف وقتها حل ثاني *** |
اقتباس:
ماينفع غرفتي كبيره وغرفة بنتى صغيره ولو غيرت ديكور ماحبه كرهة الغرفه نفسها صارت اخذ ملابسي وراروح البس بغرفة بنتي ماستحمله |
اقتباس:
زوجي قلت له بس يقول لا السالفه كله دلع لزم تجبرين نفسك ولا بتأخذينه عاده مستحيل ينتقل معي اولا زوجي نومه صعب وغرفة بنتى على طول الصوت اهل زوجي فيه وثانيا يقول الى يبيني يجيني يعني مافيه امل ينتقل :29: |
الموضوع مخربط ولا يتهيألي؟ بصراحه مافهمت الا انك متوحمه بغرفتك والكلام الباقي كله مافهمته!
عموما مافيه شي يخفف الوحم مافي الا يتحمل وانتي من فتره لفتره اضغطي على نفسك ونامي بغرفتك ليلة ومافيها شي فيه بنات يتوحمون بازواجهم ويتركون بيوتهم سهله كانها الغرفه بس.. ولا يضيق صدرك الوحم مايقعد تسع شهور ان شاء الله الشهر الرابع او الخامس بالكثير وانتي نايمه بحضن زوجك بغرفتكم.. بالعكس في بنات تمثل انها متوحمه عشان تبعد عن زوجها ويشتاق لها ويولع عليها بعدها بكم شهر اذا رجعت له تلقاه ميت عليها ومشتاق لها مررة.. وبعدين كلها كم شهر مو عادة دائمه عشان يتعود مجرد فتره مؤقته وبالعكس فيها تغيير وتشويق لا تضيقين صدرك.. |
عادي حبيبتي كلها ثلاث شهور ويروح الوحام
نسيت اقول لك مبروك الحمل والله ييسر امورك اختك بالله جينز احمدي ربك ما توحمتى على زوجك ههههههههههههههههههههه |
ريفان أنا نفس وضعك الآن الله يهونها وحامي جا على غرفة نومي ويعجبني سرير بنتي يازين النومة عليه مع إنها ذلتني عنده بس مطنشتها بس صدقيني ثلاث أشهر ويخف الوضع وتتقبلين غرفتك وزوجك لابد يتفهم الوضع لأنه الوحدة والله مو بيدها اللي يسير لها في الوحام .....
لكن أنا على كل أجبر نفسي على النوم في غرفتي حتى لايزعل زوجي يعني إضغطي على نفسك في بعض الأحيان والله يعينا ويعينك ..... |
اقتباس:
ماحملنا الصاحين نحمل المهبيل :d :d تمثيل بعد00 تتوقعين الموضوع المصلحتى 00 تراني بسرعه اتاثر 00 يعني احط الموضوع عادي ولا يضيق صدري 00 |
الله يساعدج اختي انا كنت اتلثم من اخواني لما اشوفهم بس اذا كلش كلش ما تقدرين تحملي النوم تحت بس فى غرفتج اكيد ما راح تهونين عليه
|
jeans
هلا فيك الحمدالله كل شيء ارحم من شيء بنت طيبة الطيبه حياك الله تعلميني بحلاة السرير صار يجنن حتى النوم فيه له طعم خاص بس انا بنتى ماذلتني فرحة بالموضوع وصارت تنام مع ابوها الله يعينك ويعينا معك ويهون عليك وقومك بالسلامه |
اقتباس:
لاحول ولا قوة الا بالله اخوانك الضعيفين وش عليهم :29: مشكوره اختى على مرورك |
باالاول مبرررررررررررررررروك الحمل:25:
<<<< تعاني الوحام من بدايتووو الى اخر التالت :22: وانواااع الوحااام ============== أكره زوجي ماحبه ومااحب اجلس جنبووو واهجره لبيت اهلى:17: شهرين تنووويم وابر وجلكوووز وتنووويم بالمستشفى وجفاااف حاااااااااااااااد وينزل وزني 20 كيلو <<< شبح:24: اكره الاكل والشررررررررررررررررررررب اكره حيااتي اكره كل شي 24 ساعه نوم ولو صحيت ارجع وارجع انااااااااااااااااااااااااااام :::::::::::::: اصبري شهرررين ويرررررررررررررروح الوحاااااااااااااام:17: |
السلام عليكم ورحمة الله وبركاته
ألف مبروووووك غاليتي حملك
الله يتمم لك على خير يارب من قال لك ان الوحام يستمر تسع اشهر غالبا الوحام ينتهي مع نهاية الشهر الثالث وحاولي تضغطي على نفسك حبيتين وتنامي بعض الايام بغرفتك وعقبال باقي المحرومين ربي يرزقهم بالذرية الصالحة يارب تحيااااااااتي |
انا كنت يوميين فى بيت اهلي و 3 بيت زوجي و مشاكل فا كنت اتوحم في اخواني و من ريحت الاكل
|
مبروووك الحمـــــــــــــل
والله يعينك |
الف مبروك ...
وربي يعينك والحمد الله وقفت على غرفة النوم بس والا وحم بعض الحريم عجيب غريب ... ومهم ان زوجك يتفهم المرحله اللي تمرين فيها ويفهم نفسيتك ... وفهميه انها الاشهر الاولى بس وبعدين يرجع كل شي طبيعي ان شاء الله وكثير من النساء يمرون بهذا الشيء وفيه منهم الأسوء .... وفي حبوب تخفف عنك تعب الوحام ولكن للأسف مايحضرني اسمهم اذا محتاجتهم ممكن ابحث لك عن اسمهم ممتازين جدا وبعد رحمة الله كانوا سبب في راحتي بأشهر حملي الأولى الحمد لله ....... الله يتمم عليك يارب ويهونها ... |
الف الف مبروك اختي ريفاان وجعلهم إن شاء الله يملون عليك البيت
فيه موضوع قراءته عن طرق لعلاج الوحم اتمنى انك تستفيدين منه وهو للتقليل من مشكلة الوحم إليك بعض الخطوات العملية : 1 - تناول وجبة خفيفة في الصباح . و يفضل بعض النساء أن تتناولها قبل نهوضها من الفراش ، و أنصح بتناول قطعة خبز جاف و عليها قليل من المربى أو العسل ففي العسل فوائد كثيرة للحامل بصفة عامة و لمن تعاني من الوحم بصفة خاصة ، وفيه فائدة للجنين ويساعد على التقليل من الإمساك الذي يحدث للكثيرات ، كما أنه مهدئ للأعصاب ويساعد على النوم ، كما يمكن الاستعاضة عن الخبز بالبسكويت الجاف أو الفاكهة غير الحامضية . واذا استيقظت أثناء الليل فيمكن تناول أحد أقراص البسكويت . 2 - تجنبي الإكثار من السوائل ما عدا الماء ، إذ تشكو بعض الحوامل من تكرار التبول وهذا بسبب ضغط الرحم على المثانة فتصغر في الحجم فلا تستطيع إحتواء كمية كبيرة من البول 3 - لا تتناولي كميات كبيرة من الطعام مرة واحدة ، بل تناولي كميات قليلة من الطعام على فترات متعددة ، مثلا اربع أو خمس وجبات في اليوم وهذا يساعد على التخلص من الحموضة . 4 - تجنبي تناول الأطعمة الدهنية و المقلية و الفطائر و الشطة و البهارات و شوربة اللحم و المياه الغازية و الشاي و القهوة . 5 - نوعي غذائك ، فإذا كرهت اللحم فاستعيضي عنه بالفول و العدس و الحليب قليل الدسم أو منتجاته ، كما أن في الفواكه و الخضار فوائد لا تعد و لا تحصى بالذات للحامل و من خصوصية فوائدها أنها تمد جسمك بالفيتامينات و المعادن الضرورية لك و لجنينك كما أنها تقلل من مشكلة الامساك . 6 - ضعي في حقيبتك بسكويتا تحبينه لوقت الحاجة و يفضل أن يكون محتويا على الحليب . 7 - تأكدي أن من خلق هذا الجنين قد تكفل برعايته فسيأخذ ما يحتاجه و لو كان على حساب نقص تلك العناصر لديك ، لهذا احرصي على تغذية نفسك لصحتك أولا . 8 - لا تخافي و لا تقلقي اذا قل أكلك ، صحيح ان قلة الأكل مشكلة ستعانين من تبعاتها صحيا و قد يتأثر بها جنينك ، ومن عجيب قدرة الله سبحانه وتعالى أن جعل امتصاص العناصر الغذائية من الأمعاء بمعدل أعلى بكثير من الحالة العادية و لا يعرف كيف يحدث ذلك بالتفصيل . |
ينتقل لعالم المتزوجين
بوركتم |
ألـــــــــــــــــــــــــــف مبروك
ألف مبروك والله يهون عليك ولادتك ويتمم حملك على خير يا أختي ريفاان انا نفس حالتك كارهه بيتي ومتوحمه فيه والى الان وانا عند اهلي لسى داخله الشهر الخامس وان شاء الله على العيد يكون راح الوحم وارجع بيتي ,,, |
ألف مبروك .. ورزقك الله طفلاً سليم الخلق والخُلق ..وهون عليك حملك ووضعك ..آآآمين .. دخولي لتقديم التهنئة فقط .. للمرة الثانية أقول ألف مبروك .. |
ألف مبروك ياريفان ..
بالغصب فهمت كلامك .. لهجتك صعبة جدا.. بالنسبة للوحام عادي ياحبيبتي.. بس المشكلة بعض الأزواج مايقدرون يستوعبون .. ومايدخل ببالهم إن هالشي مو بيدنا.. على بالهم دلع بنات .. شوفي باحكيلك قصة واقعية أحكيها لزوجك .. يمكن يقدر ظروفك شوي.. وهذي القصة قديمة.. يمكن في ومن جداتنا.. في زوجة حملت وتوحمت بزوجها وصارت تكرهه وماتطيق الجلسة معاه .. فهو ما يتحمل وطلقها على باله هي كرهته خلاص.. وجابت بنت .. وتزوجها واحد ثاني.. وحملت وتوحمت فيه .. ونفس الشي ما قدر وضعها وطلقها .. وجابت بنت .. تزوجها زوج ثالث.. وحملت 7 مرات وجابت له 7 بنات .. وكانت بكل مرة تتوحم فيه وماتطيقه .. لكنه صبر عليها وقدر وضعها .. وعاشت معاه طول العمر.. أنا لما أحمل اتوحم بزوجي.. من أشوفه داخل من الباب أحط راسي في سلة الزبالة وإنتوا بكرامة وأرجع .. ولما يكون برع البيت يتصل يسأل عني.. ما اصدق أسكر من عنده .. وعلى طوووول راسي في الزبالة .. يعني حتى صوته ما اتحمله .. وما اصحى من اللي فيني حتى يقتنع إن حالتي صعبة ويوديني لديرة هلي.. أقعد هناك حول الشهر أو أكثر شوي.. واللي يبي عيال يصبر ويتحمل.. |
ليش ما تجيبين غرفة نوم جديدة .. وفرش جديد .. ممكن يتغير وحمك ... الله يعينك
|
مشكورين
الله يجزاكم الف خير |
| الساعة الآن 06:01 AM. |
Powered by vBulletin® Version 3.8.7
Copyright ©2000 - 2026, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©