|
الغترة سوت لنا مشكلة مالها داعي!!!
السلام عليكم..
ودي أعرض عليكم مشكلتي و هي بسيطة شوي لكن أنا حايرة ماني عارفه كيف أتصرف فقلت مافي غير أخواني و أخواتي هنا راح يساعدوني.. أنا لي 4 شهور متزوجة و الأمور الحمد لله تمااام لكن أحيان ما أحس إن زوجي يحبني :( أحسه ماعليه مني و إذا تزاعلنا أبد ما يجي يصالحني و لا يتنازل يكلمني.. كل الرجال كذا بس اللي أعرفه انه في الشهور الأولى يدلعون حريمهم شوي.. و قبل يومين وداني لأهلي و عطاني غترته قال خلي الشغالة حقت امك تكويها ( لأني ما اعرف أكوي الغتر و لا يمديه يوديها المغسلة وعلى فكرة أنا أكوي ملابسه كلهاااا إلا الغتر) المهم قال بعد شوي أمر آخذها .. قلت للشغالة اكويها بسرعة و رحت اتكلم مع أختي و أوريها ملابس شريتها للعيد و أقيسها و انشغلت مررررة عن الغترة مادريت إلا الأنتر فون يدق و انه زوجي شوي و يطلع من السماعة يضربني يقول وينك ما تردين ع الجوال و أنا و الله مدري الجوال وينه و قال بسرعة خلي أحد ينزل الغترة و لمن سألت الشغالة قالت نسييييت أكويها قلت له دقايق بس تكويها قال نزليها كيف ماتكون وإلا بأمشي أرسلتها له و هو معصب و لا هي مكوية .. و من ذلك اليوم إلى اليوم و هو ما يكلمني :( أصلا ما يديني وجه حتى يوم يكلمني من راس خشمه رغم هذا قلت خليني أراضيه و لمن جينا ننام اليوم الصباح قربت منه و حطيت يدي عليه راح قلب وجه ع الناحية الثانية :( و الله جلست أبكي و يمكن هو سمعني .. ماني عارفه كيف أتصرف خصوصا اني حاولت اراضيه بس هو ماعطاني وجه و أنا و الله معد أقدر أكلمه بعد هذي الحركة:( بالله كيف أتصرف دلوني الله ينور عليكم.. |
العتب عليج الصراحه زوجج قالج شى و انتي رحتي لملابسج لازم تراضينه طرشي له مسج حلو استسمحى منه بوسى راسه حتى لو ما عطاج ويه انتي الغلطانه
|
الغاليه
عندي احساس انه هو زعلان من شي ثاني او يمكن عدة اشياء تراكمت على بعضها لين صار ما يتحمل منك شي!!! الله يألف بين قلبينكم |
حبيبتي تفاحه هانم هو اكيييد انك غلطانه ومعاه حق يزعل بس بعد مو مفرووض تخلينه دقيقه وحده زعلان اولا عشان اهو زوجك ورضاااه مهم يالغاليه وثانيا انتي قصرتي بإنك ماسألتي الشغاله قبل وخصوصا انك عارفه انه مستعجل
الرجال يحبون الزوجه تكون ودوده مهتمه فيهم تراضيهم ولا تخلي فترة زعله تطول لانه كذا بيقول بخاطره انا ماهميتها وعادي عندها ازعل او ارضى00وانتي اكيد مو عادي شوفي حبيبتي لما يجي اعتذري منه وقوليله انا اسفه واوعدك ماعيدها وانا مالي غيرك اذا زعلت علي الدنيا بعيني ظلمه(لازم يحس ان رضاه يهمك) لان عمر السكوت ماجاب فايده وقولي كلام حلو ولا تقولين مو لازم او ماعرف ومااقدر بالعكس 000حتى اذا ماعطاك وجه ولف عنك لفي وراه واتعلقي فيه ولا تخليه بحاله الين يرضى الييين يرضى وايش مايقول عدي وحتى لو سبك وقال انتي مهمله وانتي همك نفسك برضو اتحملي واتنازلي خليه يقول اللي بخاطره وبعدها بيكون مرتاح وراضي ويدلعك بعد ونصيحه مني يالغاليه اذا زعلتي زوجك اعتذري ولا تخليه ينام وهو زعلان منك اضغطي على نفسك واحراجك و صلحي اللي قلتلك ياقلبي حتى اذا كان هو الغلطان سايريه وراضيه واذا هدأت اعصابه اتفاهمي معاه00000صدقيني انا مجربه وعرفت ان هذي انسب طريقه وصدقيني راح يحطك فوق راسه000الله يسعدك يارب |
السلام عليكم ورحمة الله وبركاته..
أختي تفاحة هانم زوجك متضايق لأنه لا يشعر بإهتمامك فيه!! حاولي تراضينه وتدليلينه وتدلعينه كثييييير :25: صدقيني في داخل كل رجل شامخ أو ذي جبروت طفل صغير :15: يحتاج الى الحنان قبل الحب!! وبعدين طيعيه دائماً وخلي أوامره تتنفذ على طول كذا بيتعلق فيك ولا راح يسيبك زعلانة ويراضيك على طول أغدقي عليه الحناااااااااااان :15: أتمنى أنك أستفدتي من كلامي تحياتي |
اقتباس:
يعني نست تكويها شصار سبحان اللي ماينسى ،،جل من لا يسهو اختي انتي مو غلطانه والعتب عليك مرفوع يعني نسيتيها ورديتي قلتي بتكويها وما رضى وزعل وراضيتيه خلاص انتي اللي عليج سويتيه وهوو كيفه |
بصراحه وبدون زعل .. انتي غلطانه .. اول شي ماتعرفي تكوي .. وثاني شي مااهتميتي اذا الشغاله كوت ولا لا ... وثالث شي ما اهتميتي اذا جوالك موجود معاكي ولا لا .. يعني كله يدل على عدم المبالاة في اهتمامك لزوجك ..
حبيبتي لاتزعلي من صراحتي ومن كلامي لكن إن شاء الله كله بمصلحتك .. لكن حاول بكل الطرق تراضيه وحتى لايدخل العيد عليكم وانتم زعلانين .. وقوليله بتعلم كوي الغتر عشان ماتزعل مني ثاني .. كلام الدلع لاتنسيه .. لاتزعلي مره ثانيه وخبرينا بالنتايج .. |
اقتباس:
الله يجزاك خير يا أم أنفال |
اقتباس:
اللهم آمين .. بس أنا والله مو مقصرة معه في أي شييييي .. الحمد لله .. وهو ماشاء الله إذا فيه شي مو عاجبه يقول ما يخلي فنفسه شيء:27: الله يجزاك خير عذوب |
اقتباس:
الله يجزاك خير و يحفظك لزوجك و يخليه لك.. |
اقتباس:
كلامك صح مية بالمية و ان شاء الله بدلعه واتدلع عليه من عندي غيره :15: الله يجزاك بالخير هو في قلبي |
اقتباس:
هلا بالغالية عيون فتانه.. اي و الله أنا ماغلطت أنا نسيت يعني الشغلة مو متعمدة و هو معه حق يزعل و يعصب لكن المفروض انه يرضى يوم جيته قبل ما ينام :( بأحاول أكلمه مرة ثانية وش أسوي عاد الله يهديه .. الله يجزاك خير يا ناصرة المرأة :17: |
الله يصلح الأمور بينك و بين زوجك ..بجاه هذا الشهر الكريم عند الله
|
حطيت نفسي مكان زوجك
لقيت الأمبير عندي طلع وشوي وينفجر ...................... تخيلي عنده موعد مهم ومعتمد عليكي ومع هذا اهتميتي بملابس العيد على غترته ؟؟ صحيح انك نسيتي بس المفروض اول ماطلعتي البيت تعطينها الشغالة وتوقفين على راسها لما تبدأ فيها وتخلين جوالك بيدك استعدادا لأي لحظة يدق ويطلب غترته بعدين عندك اليوم بطوله اقعدي مع أهلك وفكي ملابس العيد وخيطيها مرة ثانية لو حابة على طول يتبادر لذهن الزوج عدم الاهتمام والمبالاة واعطاء الأولوية لأوامره وهذا أكثر شيء يغيظ الرجال وعواقبه وخيمة وانتي شفتيها اللي صار صار، لازم تحاولي معاه بكل الطرق حتى يرضى وحتى لو صد عنك، وهذا بطريقتك ومعرفتك لنقاط ضعفه والله يوفقكم |
اسمعي يا أختي
لا يخفى على أحد أن المشكلة تافهة بالرغم من أنني أحملك الخطأ فالرجل دوما يحب أن يشعر أنه أول اهتمامات زوجته وعلى كل إليك الطريقة التي ترضيه بها ... لتكن طريقتك (كوميدية ) أحضري الغترة المشؤومة التي لم تكويها شغالة أهلك ولفيها حول رقبتك بعد أن تلبسي فستان أنيق ومثير وتصففي شعرك وتتزيني وتتعطري ثم اذهبي إلى زوجك وقولي له ساشنق نفسي بالغترة إن لم ترضى .. حاولي أن تقوليها بطريقة توحي بالصدق مع الطرافة والدعابة طبعا سيفتح المجال أمامه وسيلقي عليك باللوم وسيخرج كل ما في قلبه ومع ذلك تحملي ولا تنطقي بكلمة وهو يتحدث فقط انظري إلى عينيه بأسف كأنك تقولي أنا آسفة بتعابير وجهك وإذا انتهى من الكلام قولي : نعم أنا أعترف بخطئي وأعتذر ولك حق تزعل بس انت كريم وطيب ومتسامح .. وأنا أستاهل ... ثم ابتسمي ثم انهالي عليه بكلمات المدح والثناء (بكل ما لديك من دلال) وكيف أنه أغلى شيء في حياتك وأنك تحبيه بجنون وأنك لم تقصدي اهماله وإنما (فرحتي بالملابس التي اشتريتها لي الله لا يحرمني منك وفرحتي بأن هذا العيد سيكون أجمل عيد يمر علي لأني ساقضيه معك نستني موضوع الغترة) يعني باختصار قولي : ما شغلني عن الغترة إلا صاحب الغترة وقبلي رأسه وقولي ( يسلم لي هالراس اللي تتشرف الغترة بلبسه لها) وقولي له لن أقوم من هنا إلا وإنت راضي حاولي قدر الإمكان إنك تضحكيه وإذا ضحك ترى بيكون (طاح الحطب ) على قولتهم ثم خذي بيده واسحبيه إلى غرفة النوم في غرفة النوم تكوني قد أعددت المفاجأة مسبقا س/ماهي المفاجأة ؟؟ ج/هدية العيد.. س/ وماهي الهدية؟؟ ج/ غترة فاخرة مكوية جيدا ومفرودة على السرير وفوقها وردة وبطاقة عليها كلام حلووووو مثل ( ما تعجبني الغترة إلا على راسك يا تاج راسي ) وليكن هذا الموقف درسا لك لتتعلمي طريقة كي الغتر ... وصدقيني إذا كنت تحبين زوجك حقا فستتقنين كي الغتر حتى لا يكون لك منافس في ذلك أرجو أن يكون الحل الذي طرحته مناسبا وإذا طبقتيه أخبريني عن النتيجة دعواتي بالتوفيق |
اقتباس:
اوكيه ما ختفنا طيب انا صارلي سنتين متزوجه اوذا رحت عند اهلي يقول بادخل عند ابوكي وحطيلي كاس ماي ويجلس ينطني الين يروح وانا نسيانه لاكن يفهم شي ان انا او احنا الحريم اذا شوفنا اخواتنا اوامهاتنا ننسا كل شي انا باختصار قلوبنا رقيقه ومانتحمل الفراق اما عن ما تعرف تكوي برضو مالك حق تلومينها ماعاد احد الحين يتزوج وهوه يعر ف انا كمان تزوجت وماعرف اسط ملابسي عيل وشلون اكويها فلها الاسباب كلها ابي اقولك شي مهم جدا انا ادا صارلي كدا لازم ارجع من عند اهلي وهوه زعلا لاكن تدري متى اذا اديته وجه لازم يعكر مزاجي انتي اسكتي وعيشي حياتك حاولي تتدلليه وتدلعيه ولاكن تغلي في نفس الوقت دلليه اضحكيله حسسيه انك كبيره وما عندك إن شاء الله اني افدك |
أختي أولا وفقكم الله وزاج مبروك ان شاء الله
أختي زوجك من النوع الذي يكابر وهذه حالة عادية تحدث في بداية أي زواج يحاول بعض الأزواج نفش ريشهم امام زوجاتهم وهذا أمر طبيعي يتغير بمرور الزمن وبزيادة الموده والعشره ، ولكن تصرفك بإهمالك لطلبه كوي الغتره تصرف خاطيء فالرجل يريد زوجته أن تهتم به وترتب ملابسه فلا بأس انا أعرف ان هذا التصرف غير مقصود ولكن حاولي قدر المستطاع ان تكوني حريصة بتلبية طلبات زوجك ووفقكم الله ،،، |
اقتباس:
فعلا لما ابغى اعرف مدى خطأي على زوجي اتخيل نفسي مكانه حبيبتي انتي غلطااااااااااااانه من راسك لساسك فعلا سوي المستحيل علشان يرضى وحسسيه انك غلطانه وندمانه ومن الان حبيبتي تعلمي كواية الشماغ والغتره ابتغاء مرضاته عليك عساك عالقوه |
حبيبتي انتي غلطانه
ولازم تراضينه والغلط على قوله أختي مشكلتي أصدق من ساسك لراسك وغلطتك مو سهل أنتي تجاهلتي كلامه ورميتي الغتره على الشغاله ولا تابعتي موضوع الغتره معها طنشتي ورحتي تسولفين مع أختك وفوق كل هذا رميتي الجوال بعيد عنك !!! طنشتي زوجك عشان تسولفين مع أختك بالله من الأهم زوجك والا أختك والأغراض اللي شريتيها من السوق !!؟؟ الواحد يفكر بمنطق شوي معه حق يزعل ويعصب بصراحه اللي سويتيه شي يقهر الرجال معتمد عليك وانتي فشلتيه وطنشتي كلامه ولهيتي بتوافهه شي طبيعي بيزعل,, تبين نصيحه روحي راضيه ودلعيه وبوسي راسه وتأسفي منه وحاولي تمتصين غضبه.... والله يخليكم لبعض |
لا ابد اختي انت مو غلطانه وهو الغلطان المفروض يطول باله شوي بس الظاهر مستعجل على كل حال
اولا مبروك الزواج ثانيا الغتره صعب كويها وعشان تضبطينه لازم تاخذين وقت طويل بالكوي وامسحي عليها واجد بالمكوه يمكن تاخذ نص ساعه عشان تزين ثالثا وهذه نصيحة اذا كنت بساعة صفا مع المحروس تفاهمي معه على اساس اذا صار مشكلة او شي يعكر صفوكم يتكلم معاك ويقول اللي عنده بساعتها لانه اذا تعود يزعل ويسكت ويقاطعك ولا يكلمك بيكون ذا طبعه وتصير كل زعله بقطيعه وهذا شي مو طيب بتاتا المشاكل لابد منها لكن الزعل لمدة تتجاوز الكم ساعه ما يصير ويقطع الود طول المدة ويقود لمشاكل اكبر رابعا كيف تنشغلي بملابس العيد عن رجلك خلي زوجك شغلك الشاغل,,,, تفهمين والا لا خامسا انت ببداية الطريق وشي مهم انك تحاولي تعيشي حياة زوجية سعيدة لانه وبعد فترة لو صارت مشكلة يقول الزوج بنفسه انا من اخذتها بمشاكل معها وكذلك الزوجة يصير ما فيه لياقة ومقدرة لتحمل الزعل اما اذا كانت البداية طيبة ان شاء الله وصار مشكلة بعدين ممكن لكم تجاوزها لانكم عشتوا بسعادة لا احد منكم يريد التنازل عنها وصدقيني ذا شي مهم تفهمينه ومهم جدا تفهميه لزوجك سادسا من يقول ان اول الزواج دلع ؟؟ ليه انت ودك يدلع سنة ويكدر عليك باقي عمرك . احسن انه يكون على طبعه من البداية وتعرفيه زين . سابعا الزواج مو فلة وناسة بس اذا كنت بنت ذكية تعاملي مع زوجك كل المقرر بالجامعة سواء سهل او صعب مالك الا هو لا زم تنجحين فيه ثامنا اذا زعل بيني له انك متاثره كلميه واذا مارد عليك حاولي ثانية وثالثة ولو اضطريت ترسلين له رساله بالجوال وانت معاه بنفس البيت اكتب فيها كلام يستعطفه وقولي انا احبك ولا اقدر على زعلك وكوني صادقة تاسعا خلك ذكية وشخصية قيادية ترى مو كل الرجال يقدر يكون قائد ناجح بدون زوجة تعينه عاشرا الصلاة الصلاة الصلاة صحيه الفجر ولا تتهوني فيها بارك الله لكما وبارك عليكما وجمع بينكما بخير |
اقتباس:
هذا الكلام السنع:22: :22: تسلمين يالريم |
السلام عليكم
أولا مثل هذه المشاكل لا يخلوا منها بيت وهي ملح الحياة الزوجية حيث تعود بعدها العلاقة أقوى وأوثق......... ثاني مادام أنك في بداية الزواج يجب أن تعرفي شخصية زوجك والظاهر من هذا الموقف أنه رجل دقيق ومنظم ويهتم بالتفاصيل والدليل أنه أعطاك الغترة وأعطاك الوقت الكافي لاعطائها للخادمة ومتابعة كيها وموضوع نسيانك لأمر مهم بالنسبة لزوجك يعتبر مشكلة وخاصة أن الموضوع في نفس اليوم ومطلوب منك خلال فترة بسيطة وتهاونتي فيه فبعض الامور الصغيرة على دقتها قد تكون من الاهمية بمكان للطرف الآخر وخاصة الزوج فهو يتوقع منك اهتماما غير عادي أكثر من اهتمامه بنفسه خاصة في جانب ملابسه وجماله وخروجه بالشكل اللآئق لأنه بذلك يمثلك أنت ويعبر عن مدى اهتمامك فيه. وفيه ملاحظة انت تقولين أنه أحيانا احس ان زوجي ما يحبني وأنا اقول لك إحذري من هذا الاحساس ولا تجعلينه أمامك ابدا فهو لم يتزوجك الا لأنه يحبك ويريدك أنت لا غيرك أن تكوني زوجته. أما بالنسبة لحل المشكلة فأتوقع الا يطول زعله خاصة اذا زدت من اهتمامك به واظهرتي ذلك بشتى الطرق وخاصة انكم في الاشهر الاولى من الزواج وبحركات بسيطة تستطيعي أن تجعلينه ينسى الغترة وينسى نفسه معها ومدام أنك اقتربت منه وحطيت يدك عليه وتحول للجهة الثانية فالطريقة الأفضل هي أن تقتربي منه بجسدك دون أن تلمسيه وتجعليه يشعر بانفاسك في اذنيه وسيقترب منك هو بعد ذلك. آمل أن تجدي في كلاماتي ما تستفيدين منه في بقية حياتك وتتمتعين أنت وزوجك بالسعادة والهناء طوال عمركما |
ما اختلفنا هي غلطانه
بس مش لدرجه انه مايكلمها ؟؟؟ بصراحه هو كمان تصرفه غريب |
........................
الأخ الكريم شاطيء الذكريات أرجو منكَ التكرم بترك رسالة خاصة عاجلة باسمي في عالم الرسائل الخاصة . وشكرا |
أختِ الكريمة الفاضلة ... بداية كّل عامٍ وأنتِ بخير .. وإلى الله أقرب ... ومن ثم نعود لذات الموضوع ... فإني أتفق مع ما ذب إلأيه الغالبية من الاخوة والأخوات ... وهو الصواب إن شاء الله أنكِ مُخطأة أختي الكريمة .... ذلك باختصار ودون دخول في التفصيلات .... الزوج إذا لم يرَ الاهتمام من زوجته ... من من يراهُ إذا ؟؟؟ وأينَ يبحثُ عنه ؟ نحنُ نعلم علم يقين أنكِ لم تتعمدي ما فعلتِهِ .... ولكن هو يبقى خطئاً يحتاجُ إلى اعتذار ثم استفادة منه للمرات القادمة ... أختِ الكريمة ... نصيحة من أخ ... لا تكوني سبباً مُباشراً أو غير مُباشر في اشتعال النار من صغير الشرار ... بل وحقيره وإذا سألتِ عن الاهتمام منهُ لكِ .... فصدقيني هو سيهتم إذا وجد الاهتمام منكِ ... أتحدث وأنا رجل ... أي منطق الرجال ... فيما عدا ذلك .... يعتبر الزوج غير طبيعياً ... موفقة وربي يفتح عليكم .. وتعودوا سمناً على عسل ... بكم كلمة حلوة منك له ... احترامي ؛؛؛ |
أولا .. أحب أن أشكر كل من مر من هنا و ترك تعليق أو مشاركة سواء معي أو ضدي..
ثانيا: أنا أعترف و أعترف بأني مخطئة و لكني جديدة على هذه الحياة و طبيعي أن أنسى و أجهل بعض الأمور الزوجية و لكن إن شاء الله أتعود على الوضع و المسئولية قريبا.. ثالثا: أبشركم بأني تعلمت كي الغتر <<<<ناس تجي بالعين الحمراء:29: وقمت بكي غترته بعد يومين من خصامنا ووضعتها بجانب الثوب دون أن أتكلم و ذهبت لأنام لأن الحبيب ( مو معطني وجه أبد:( ) و حينما استيقظت وجدته ذهب للعمل و أخذ الغترة معه فرحت كثيرا لذلك بما يعني أن الكي نال اعجابه رغم انها المرة الأولى التي اكوي فيها غترة.. و حينما جاء من العمل تلك الليلة كان السحور جاهز و كنت أرتدي لبسا مرتبا و جميلا و وضعت القليل من المكياج و العطر و ما أن دخل حتى كنت في استقباله ابتسمت له و حضنته و قلت له وحشتني .. ابتسم لي وعطاني وجه و كلمني الحمد لله عااادي دون التطرق إلى المشكلة .. وحينما جلسنا معا على التلفاز استدار نحوي و سألني مبتسما : مين كوى غترتي ..؟؟ قلت : أنا .. قال ماشاء الله كويها ممتاز جدا و تقولين ما تعرفين !! قلت و الله ما اعرف بس عشان خاطر عيونك تعلمت.. و الحمد لله انتهت المشكلة على خير و طاح الحطب.. و الله يخليلي اياه و يحفظ لي و يبعد عنا وساوس الشيطان و أعين الحاسدين <<<< طبع المرأة إذا زوجها زعلها تطلع فيه كل عيب و نقيصة و إذا بس ضحكلها تشوفه ملاك و كله ملح و عقل .. اش نسوي عاد إحنا الحريم طيبين بزيادة:d |
.. اش نسوي عاد إحنا الحريم طيبين بزيادة
اي والله صدقتي انه متزاعله مع زوجي وهو الغلطان لكن انه اللي متلهفه ابي اكلمه ونتصالح:) |
ألف مبروك لعودة المياه لمجاريها
والله يديم المحبة بينكم ويبعد عنكم الفتن والمنغصات طريقة علاجك للموضوع ممتازة وجابت نتيجة والحمد لله |
حبيتي نفاحه
اعنقد انه معاه حق يزعل لانه الرجال يحب يشوف زوجته تهتم بيه وبكل ملابسه واغراضه المفروض توقفين على راس الشغاله اللين ماتخلص وتنتظرين زوجك وتنزللي الغتره بنفسك لازم تصالحيه باي طريقه حاولي مره واتنين وتلاته لانكم لسه في بداية حياتكم وماشفتي شي حتمر عليكم مشاكل اكثر من كده وشي ثاني لازم تتعلمي كيف تكوي الغتره والله يوفقك يارب |
الحمدالله تمت الامور على خييييييييير .......والله يخليكم لبعض :)
صدق موضوعك شدني كثير وتعلمت منه :) |
اقتباس:
يغلق الموضوع بناء على ما أتى أعلاه .. ونسخة إلى عالم المشاكل المحلولة والحمدُ لله على ما أتم وما أنعم ... والشكر كل الشكر لكل من شارك الأخت بتوجيه ونصيحة ... جعل الله كلماتكم في ميزان الحسنات ... احترامي وتقديري ؛؛؛ |
| الساعة الآن 10:39 AM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©