|
منصدمه من الناس وطريقة تفكيرهم
بحكم تأخري عن الزواج في مجتمع لايرحم
مجتمع نسي التوكل على الله وتناسى القضاء والقدر والنصيب مجتمع يحصل على اعلى الشهادات العلميه ويفشل في الحصول على ابسط شهاده ذوقيه بحكم كل هالظروف تمر علي مواقف كثيره واقابل نوعيات مختلفه من البشر ومع كل موقف اكتشف ان الناس وقحين ويفتقرون للباقه الاجتماعيه وكل يوم انصطدم بطريقة تفكير بعض الناس وسطحيتهم واتأكد من "ان كيدهن عظيم" ويثبتون لي بما لايقبل الشك نظريه ان الزواج كل شئ وانتي بدونه ولاشئ اللي صار اني كنت معزومه ورحت وانا كاشخه وماخذه جرعات اضافيه من الثقه بالنفس ومستعده لاي سؤال بايخ لاني اعرف مسبقا ان كل اللي بالعزيمه متزوجات طبعا مايحتاج اشرحلكم نظرات الشفقه وكني مسويه جريمه لازم اواجه حكم الاعدام عليها المهم وانا قاعده في امان الله الا تلتفت علي وحده قلت اكيد سؤال من العيار الثقيل مثل اللي اسمعهم دايم قالت غريبه ياريماني ماحضرتي الدوره اللي كانت بالمكان الفلاني؟ قلت ماغريب الا الشيطان كان ودي احضر لكن والله مره انشغلت وماعندي وقت ابد ردت علي "بصاعقه" وبصوت عالي خلت كل اللي بالمجلس ينتبهون واستنكار مبالغ فيه قالت الله يالشغل عاد؟؟ انتي فاضيه ماوراك شئ وماعندك مسؤوليات ولازوج ولاعيال انا فتحت عيوني على الاخر وكان ودي اكفخ الحرمه :29: بس تعوذت من ابليس وقلت انا احسن منها واكيد تغار مني لاني موظفه وهي بالبيت وحاولت افكر بايجابيه وسنه احاول بدموعي لاتنزلين وهي مصممه تنزل وتفشلني بس الحمدلله سيطرت على الوضع وطنشتها لان ماودي ادخل بجدال عقيم مع عقليه عقيمه مثل كذا ابي اعرف بس ليش الناس يعتبرون البنت اللي مابعد تتزوج ماعندها مسؤوليات ابد ويعاملونها كعنصر مهمش لايقدم ولايأخر؟؟ وبس تتزوج تصير هي المهمه وهي اللي يحسبون لها حساب وتصير ام المسؤوليات ؟؟؟؟؟؟؟؟؟ هل تقابلون هالنوعيه من الناس وتسمعون اسئله بايخه؟؟؟؟؟؟؟؟؟؟ وشلون تتصرفون؟؟ تردون ولاتطنشون؟؟؟ انتظر ردودكم |
وسعــــــــي صدرك وأنا أختك يامالك من المواقف مادام قلبك حساس ومادام للحين
فيه ناس مايعرفون حتى يحكون زين أو يسكتون أحسن بقولك رد قد كتبته لي وحده من البنات الله يسعدها هنا في المنتدى للحين عالق بذاكرتي لأنه فادني كثيييير مع نفسيتي لما يصير لك أي موقف تستائين منه كثييير لاتحملين نفسك فوق طاقتها من اللوم لأنه أي موقف يجيك من غيرك غيرك يتحمله ويعكس طبعه وتفكيره وانتي مو مسؤولة عنه صحيح إنه الكلام النظري غير لما يجي وقت التطبيييق لكن مره مرتييين صدقيني بيصير عندك إرادة قوية مع نفسك بأنه أي كلام يجرحك أو موقف يهزك تكونين قوية فيه وماتحملين نفسك أكثر مما تحمل يكفي الهم اللي هي فيه نزيد عليها مواقف اللي تصادفنا من هنا وهناك لناس مايعرفون في الدنيا الا الحكي اللي يجرح القلب وكأنها معمرة في هالدنيا وانه حياتها كلها خييير دائما ً حاولي اختي ترتقين بتفكيرك عن كلامهم مهما كان واذكري الايجابيات فيك وحطيها قدام عيونك وفوق كل هذا خلك مؤمنة أكبر بالله بأنه هو الرزاق اللي يرزقنا واللي رزقها بيرزقك والله يوفقك وييسر أمرك ويفرج همك ويرزقك الزوج الصالح اللي يعيينك على دنياك بالخير |
والله انا صرت ماخذة راحتي واعطيهم من ذاك الكلام عشان يتأدبون :26:
موظفة جديدة بالداوم.. سمعت بنات يتكلمون عن العنوسة وانا ماشاركتهم أبدا كنت ساكتة واصحح دفاتر طالبات واول ماطلعو التفتت علي قالت انا لاحظت شي بهالمدرسة كثيرات العوانس صح ياشوبارد التفت عليها وهزيت كتفي يعني مدري << عصبت انا مرة يوم قالت هالكلمة قالت ايش تتوقعين سبب العنوسة؟ قلت مادري قالت يعني تتوقعين هو غلاء المهور او البطالة او ايش بالضبط قلت بنفسي ليه ارتبك وليه انزل راسي كني مسوية فضيحة وعار ليه؟؟ الا ارد بوجهها وأأدبها عشان تحرم تتفلسف علي قلت لها والله ياحبيبتي انت اعلم مني اللي اعرفه انك عروس مالك الا كم شهر متزوجة واكبر مني يعني تعرفين الأسباب!! قولي لنا ايش هي الاسباب! قالت والله مانتي هينة يابنت الفلان قلت ايه ماني هينة ابد ابد وكملت تصحيح وطنشتها وتعالي شوفي صارت تشيل همي اذا بغت تكلمني انا من اول اذا كنت ساكتة اشيل بقلبي واذا وصلت البيت أبكي واتحسر واكره اللي جرحني اما الحين لأني اقولها بوجهها تلقيني مرتاحة ولااحد هامني بس بصراحة لما أهدى شوي أحس بتنأنيب الضمير واخاف اني قسيت عليها بس شسوي لازم أسكتهم عشان مايتمادون معي شرايك؟ |
الحمد لله على كل حال.....
يعنى انا معقود عليا وداخلة على سنة ولسه ماروحتش بيتى والناس مسلمتنيش كل ماتقابلينى واحدة تبادرنى"هتتزوجى امتى، هاه ناوية امتى؟!!!" مايعرفوش ايه اللى بيا والمشاكل اللى بينى انا وزوجى واننا على وشك الانفصال وحالتى النفسية الصعبة والله لو عاوزة بجد تحمدى الله اطلعى على مشكلتى فى عالم التزوجين باسم التزامى سبب انفصالى |
لما كنت أشتغل .. كانوا الزميلات لما أقول : والله تعبانة ولا ما عندي وقت .. يتريقوا : أكيد سيبوها مو الأولاد وأبوهم طفشوها http://www.66n.com/forums/images/icons/damp.gif هذا بالنسبة للناس اللي بيمونوا .. أما غيرهم .. فبصراحة أضربت عن الأفراح والمناسبات ما أحب أتعّب نفسي .. مدري أشعر شكلي بينهم مرررة غلط !! ريماني .. يا قلبي إنتِ أستاذة قد الدنيا وتأكدي الغيرة راح تعمل مفعولها .. الله ييسر لك الطيب اللي يرضيك عااجلاً .. آآآمين ،، |
ياحبيبتي انتي حساااااسه وحاطه في بالك ان اي كلمة يقولونها لك يعني يجرحونك فيها
ترى مو معقوله مااظن ان كل الناس تفكيرهم بهالسطحية لو انتي تاخذينها بمزح وتردين عليها وانتي تضحكين صدقيني راح تخف حساسيتك واتوقع راح يلاحظون ردة فعلك ويتوقعون انك تزعلين او شي زي كذا وراح يرحممممونك خليك وااااثقه من نفسك واي مكان تروحين له البسي زين واكشخي وخذي واعطي معاهم في الكلام وماعليك من احد الله اللي موزع الارزاق مو انتي ماتدرين هم كيف حياتهم -- يمكن انهم يحسدونك على حياتك وحريتك وانك تنامين وتصحين على كيفك صحيح الواحد تجي له حالات ضعف وافكار سوداء لكن لاتستسلمين لها انا اكلمك من واقع تجاربي وقراراتي اللي اتخذتها لنفسي وانا مثلك تجيني لحظات اضعف فيها بس الحمدلله ماعمر احد جرحني بالكلام مااقول الا الله يفرج علينا باللي يعوضنا ويسعدنا يارب |
اف من هكذا ناس و هكذا أشكال
بصراحة لم أقابل مؤخرا هكذا ناس . ربما لأنني بعيدة عن أهلي لكن أظن لو كنت مكانك لأجبتها بقولي ان لكل شخص مسوؤليات و مسؤولياتي لا تقل عنك .. لكنها في اتجاه اخر منصب علي و علي عائلتي .. فقط ثم أطنش بعد أن أفرغ مابي من مشاعر الى أمي حفظها الله لي لا تشيلي هم يا أختي .. و طنشي .. و لا تتعبي نفسك و لا تؤذيها .. فلن تستفيدي شيئا لو غضبت او حزنت .. بالعكس تجاهلي و استمتعي بهذه الأيام قبل الزواج بإذنه تعالى تقبلي مودتي و احترامي |
غاليتي علمتني الدنيا ان اظهر قويه دائما امام الناس فموقفك مر بي كثيرا مواقف مشابهه له ولكني اقلبها في صالحي اتذكر في العام الماضي عندما كنت موظفة كان كل يوم وحده عليها القهوه والحلى طبعا كلهم متزوجات ولديهم اطفال وكانوا غالبا في دورهم يجيبون معهم قهوه وحلى جاهز اما انا إذا جاء دوري احب اسوي الحلى بنفسي واحيانا اسوي اكثر من صنف وغالبا اصناف جديده واتفنن بطريقة التقديم بيني وبينك انا الحلويات خصوصا هوايتي واتقنها ولله الحمد فيكون يومي مميز .. وهذا من فضل ربي مع هذا كله تعالي اسمعي التعليقات والكلام اللي مليان غيره مثل ايه همة عالية فاضية وش وراها والثانية تقول ..يابختك لا رجل يطلق ولا خاله تفلق بعذرك معك وقت وغيره كثيييييير لكن دائما اذا سمعت مثل هالكلام اقول.... يوه الصراحه الله يعينكم ..اللي يشوفوكم يكره العرس وسنينه الحمد لله انا عند اهلي وقتي ملكي وحكمي بيدي >>>>>> تعزي نفسها وهي الله يعلم بحالها بكذا اقلب الموقف عليهم حبيبتي لا تنصدمين ولا تنهز شعره في راسك اظهري قويه وشامخه دائما لك تحياتي ياغاليه |
من غير مبالغه كل ماطلعت لزياره او اجتماع فيه ثنتين من قريباتي دايم يرمون علي كلام جارح
تخيلي كل ماشافوني يعيدون نفس الموال أول الامر كتمت وبكيت وحالتي حاله لمى رجعت البيت بكيت وانحاست نفسيتي لكن اخر مره قالوها طنشت وابتسمت مع انها كانت جواي زي السيف لكن خلاص الى متى ابين ضعفي قدامهم وبديت اخفف من الاختلاط بالناس والطلعااات لاني ماسلم منهم بس اروح لزياره واجب عشان فقط صله الرحم لاكثر ولا اقل و اخر سؤال جاني منهم ماقدمتي على وظايف؟ قلت الا قدمت على كثير بس لسى ماجاني قالت وجالسه كذا الحين قلت ايه قامت تبتسم ابتسامه ساخره وتقول اجل الحظ يلعب دوره عندك شكل حظك طاايح طبعا مارديت سكت لاني لو برد تسااقطت كل الدموع كتمت والشكوى لله والثانيه تقول ليه ماتزوجتي؟ وتسال بقواه عين !!!!وش ارد ؟؟ قلت اذ كتب الله تزوجت قالت ايه اشوا احسبك زي البنات المعقدات الي مايبغون سيره الزواج وانواع نظرات الرائفه. لكن مااقول الا الشكوى لله من جد وين ايمانهم بالله؟؟ وين توكلهم؟ وين وين اشياء كثيررره لكن الله المستعان وربي قادر على كل شي ثقتنا بربي كبيره ولن يخيب ضننا فيه مابين طرفه عين وانتبهتها يبدل الله من حال الى حال والحمد لله على كل حال أسال الله العظيم ان يرزفني وايااكن الزوج الصالح عاجلا غير اجلا |
تصدقين عاد
انا لاحظت اني مشغوووولة أكثر من صديقاتي المتزوجات بكثير صاروا هم يشتكون من المل الفراغ ..وأنا أشتكي ان ماعندي وقت .. سبحان الله الله يفرجها علينا اجمعين |
غـاليــة
اشكرك على النصيحه لكن تخيلي اني اقعد ايام وليالي ابني وابني وبالاخير اسمع كلمه تهدم كل شئ بلحظه قمة الاحبااااااااااااااااط :24: شوبارد ياااااحبيلك بصرااااااااحه رهيبه عجبتيني :22: ماينفع مع الناس الا كذا الله يعطيني الجرأه واصير مثلك انا بس حيلتي التطنيش :26: mahmoma عزيزتي من راقب الناس مات هما الحمدلله على كل حال وربي يفرج همك حسابات الزمن تسلمين على رفع المعنويات دايما اطمن نفسي بهالجمله كلام الناس مايقضي ابد مدري مايتعبون ولاوش سالفتهم؟؟ لكن جد زعلتيني :29: ليش الاضراب؟؟؟ وشكلك لاغلط ولايحزنون جاني هالوسواس فتره بس بعدين قلت مافي احد يستاهل احرم نفسي عشانه حالتي صعبة انا ماوضحت لهم اني تضايقت بالعكس طنشت والحمدلله الكل يشهد باناقتي وثقافتي لكن افضفض لكم عشان مايجي يوم وانفجر الوفية لوالديها احمدي ربك انك بعيده ومنتي مضطره تقابلين ناس بهالعقليات وكل مره اتفاجأ بوقاحة الناس اجل مره وحده تسألني وصلتي هالعمر وماتزوجتي ليش؟ ومالقيت حل الا التجاهل والتطنيش |
لا تتأثري بكلام الناس
بالنسبة للفئة هذي من الناس تلاقيهم يأخذوها اذية و محاولة تجريح و دمتي بخير |
والله حاسة فيك
أكره كلمة وإنت شو وراج لا ريل ولا عيال >>> ترفع الضغط عزيزتي وكل امرج لله واكثري من الدعاء والإستغفار أسأل الله العظيم رب العرش العظيم لي ولكِ ولجميع بنات المنتدى الأزواج الصالحون في القريب العاجل |
الإخت ريمانا
سلام قولا من رب رحيم ردت الفعل جميله والإنسحاب ليس اعلان الهزيمه .... ولكن الخسران يقطع المصران ..وبصراحه قرأت جميع الردود واذ بها تصب في عدم اطالة الحديث مع نوعية هؤلاء الناس....... اسعدكم الله ويسر لكم اموركم وكتب لكم الخير اينما يكن وعجل بالزواج لكٍ ولإخواتك بالزوج الصالح الذي تقر به اعينكن....في الدارين |
أنتي فاضية وش وراك؟؟ لا عيال ولا رجل
ياااااااااااااااااااااااه يا كثر ما أسمعها ينجن جنوني لما أسمع هالعبارة كأنه ما فيه أحد ينشغل إلا المتزوجات لا تضيقين صدرك يا وخيتي ناس سطحيين بقول لك عباره نفسية ردديها في بالك زين وطبقيها في حياتك <<< قد لا نملك أن نغير الآخرين.... ولكننا نستطيع أن نغير أنفسنا...وفي تغيير أنفسنا تغيير للآخرين >>> ولك تحياتي |
ريماني يا ريماني
ضغطي على الزر الحساس تعرفي صرت أعرف الإجابات اللي تؤدي إلى كلمات كهذه فأتحاشاها.. بعني لو مكانك وسألتني ليه ما رحتي ؟ أقول ما لقيت أحد يوصلني فتنكتم !! بعدين أسألها إنت رحتي ؟ أو أسألها سؤال أخليها تبدأ تشتكي من زوجها وعيالها وإنها مو لاقية وقت تسوي شي لنفسها وتبدأ تنحب !! وأنا أطبطب وأقول الله يعينك الزواج صعب ومسؤولية الله يستر بس ! ياما جاتني كلمات مثل هاذي أخرها وحده تقول لازم تدعي لنفسك بالزوج الصالح وبدأت تعطي نصايح قلت خالة لو كنت أبغى أتزوج عشان فرح وفستان ودبلة كان تزوجت او خاطب لمن كنت ثالث ثانوي بعدين إنتي ماشاء الله عليكي أدرى بالموضوع وما تزوجي بناتك لأي من كان وتتخيروا الأفضل !! بنتها أكبر مني بسنة وتزوجت مطلق لكنه طيب ما شاء الله.. بس الوقت اللي تكلمت فيه مو مناسب أبداً.. والله دمي نشف لكن تماسكت وطلعت مني الكلمتين هاذي. حتى المناسبات لو ما تخدمني ما أروح لها وإذا أحد حب يطلع معاي أطلع بكيفي والوقت اللي يناسبني.. لكن الأعمال الأخرى الإنسانية تحضى باهتمامي ولها أولوية. مرة عزمتني صديقة دايما تجمع بنات الفصل الدراسي حتى قبل ما تتزوج.. توجت وكنت مترردة في الذهاب.. رحت متشيكة وآخر أنتكة البنات اللي أتوقع منهم كلمات مالها داعي ما أجلس جنبهم وأتعمد تحاشي النظرات حتى لا أعطيهم مجال أنبسطت والله وأظهرت فرحي بصورة متوازنة أخذوا حريتهم بالكلام وتناقشنا ومزحنا وأضحكتهم كثيرا.. إنت بيدك تقدري تقولي الكلام اللي في لسانهم بطريقة مضحكة بحيث تجي منك ولا منهم. يالله الآن ثلاث من معارفي على وشك ولادة وتعالي شوفي حالي شايلة هم الزيارات والنظرات والأسئلة.. على فكرة لمن أحد يسألني ما تزوجتي؟ أقول لأ.. على يدك يا خالة ! هم كيف الناس تتزوج ؟ لازم إنت تدلي علية.. تعرفي صاروا يبطلوا يسألوني !! الحل تحاشي الردود التي تعرفي تعليقاتها لمحتملة سابقاً.. أعانك الله وإيانا على كيد النساء.. وهو عظييييم.. وأقول إذا الأقارب عقارب أمال الناس إيش !!!! |
ياما وياما يا حبيبتي سمعت هالكلام.."هذا وانت ما عندك زوج وعيال ومشغولة..أجل وش نقول حنا"...
لكن هذي الكلمة هينه..عندك كلام صحيح يجيب الهم مثل كثرة الأسئلة والاستفسارات "متى تتزوجي؟ ليه ما تزوجت للحين؟ شكل شروطك صعبة؟ لأنك مطلقة ما يجيك خطاب؟؟؟؟؟"" المصيبـــــــــــــــــــــــــــــــــــــــة إن المتزوجات أنفسهم يلعنوا ويشتموا بأزواجهم والوحده ما تصدق يصير زوجها برا البيت حتى ترتاح منه..والنوم ما تتهنى فيه..والطلعات والدخلات..وشقاء العيال.. لكـــــــــــــــــــــــــن..يظلوا بمجتمعنا الغالي يعتبروا المتزوجة إنسانة سوية وسليمة..والمطلقة واللي ما تزوجت عـــــــار |
همة عالية
ياحلوك الله يتمم عليك قوتك وثقلك مشالله تبارك الله :22: انا اسوي قدامهم ان ماهمني العرس وانهم يكسرون الخاطر وان الزواج هم والله يعينهم بس من داخل الله يعلم بحالي ويبقى الامل سبحان الله فيه ناس تخصصهم الكلام القوي والتجريح يعني مايخافون الله يبدل حالهم وياخذ هالزوج والعيال برمشة عين والله سبحانه قادر مثل مارزقها هالنعمه ياخذها منها انا بالفتره الاخيره صرت ادعي ان الله يشغلهم بانفسهم ويصرفهم عني بس جد لاتعرضت لموقف كذا احاول مااتأثر واقعد اعطي نفسي رسايل ايجابيه :17: واجاهد دموعي لاتنزل الله يفرج علينا ويريحنا من امثال هالناس اعذروها آآآآآآآمين انا بعد ملاحظه ان ماعندي وقت ابدا خاصه مع الدوام ومع كذا يعتبرون ان ماعندي شئ ويستغربووون لاقلت مشغوله انتهت حياتي فعلا اذيه وتجريح نسأل الله السلامه تسلمين على المرور الذئبة ايه هالكلمه بالذات ترفع الضغط وتذبح بعد مدري ليش لاسمعتها يجيني احبااااااااط فظيع متى نتزوج :14: ونفتك من هالاسئله البايخه الوزاري احمد الله ان من علي بنعمة السكوت ليس اعلان للهزيمه ولكنه ترفع عن مجادلة السفهاء جزيت خيرا على الدعاء الحـــــــائرة حلوووووه العباره نحتاج عبارات ايجابيه مثل كذا ياحبيلك من زين الجمله مكبرتها وبالاحمر من القهر الحال من بعضه والله يجن جنوني لاسمعتها:19: |
[COLOR="purple"]Miss Hawaii[/COLOR
]اي والله كيدهن عظيم ويتفنون في التجريح الله يرزقنا ازواج صالحين ويكفينا شر كل صاحب شر همس# انا لاسمعت هالاسئله ودي اصرخ واقوووول ترا الزواج نصيب يقدره الله كيف شاء ومتى شاء لكن مين يفهم بس |
ممكن انتي مكشخه على الاخر وسويتي لها لخبطه
النساء يحوسهم الاتي بينهم بين والله اعلم وليسو كلهم الكشخه فوق الطبيعي الملفته والوظيفه والهدوء + انتباه الناس لك والابتسامه والاحساس بالثقه الي مايذكر الله يصير صراع بين الحسد والقهر وعدم الوصول للاشياء هذي معى انها ميسره فيحصل شئ من الاسئله وهو اسئله انتقاميه او استفزازيه عشان تبررررررررررررررررررررد او تقلل وتكسب ثقه او تنهي الكشخه الي امامه هذى تصور خاص والله اعلم ولكن التطنيش مضاد حيوي فعال وقوي ابو فهد |
| الساعة الآن 04:34 AM. |
Powered by vBulletin® Version 3.8.7
Copyright ©2000 - 2026, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©