|
العمر و الخطيب
لا ادري كيف ابدا بصراحه انا متضايقه جدا... و حبيت افضفضلكم.. انا فتاه عمري 25 سنه ..و تقدم لي الشخص الذي احلم فيه و اللي اهلي يحلمون به.. و لكن المشكله في عمره ..الشاب عمره 36 !! مهندس راتبه ممتاز ..و مؤدب يصلي... خلوق.. انا بالاول كنت رافضه الموضوع بسبب عمره ..و رفضت اني اشوفه..بعدين امي اقنعتني اني اشوفه و يمكن يكون شكله و روحه اتدل على شخص عمره 30 .. المهم اقتنعت.. و جاء الشخص. و طلع يبين شكله 40 !!! يعني يبين عليه كبر العمر !!! انا بالاول انصدمت.. لانه مبين كبير... و لكن لما جلسنا و تبادلنا الحديث.. ارتحتله و ارتحلي.. و قبل ما يرويح من بيتنا سأل والدي انه شو الاجراءات عشان يمشي بالموضوع ( يعني اني عجبته و الباقي علي).. ولكن المفاجأه كانت عند اهلي.. انه انصدمو بشكله لانه يوحي بكبر العمر !! و بدأ التردد .. و امي ضلتها ساكته ..اسألها شو رأيك تقولي ما اعرف.. يا اخواني.. انا رح ارجع اشوفه مرة تانيه هذا الاسبوع .. و لكن امي تقولي حكمي عقلك .. ما تخلي عواطفك هي اللي تسوقك الى القرار.. و ما تخلي اي حد يأثر بقرارك.. يعني اذا وحده قالتلك منيح و ممتاز توافقي..!! يا جماعه انا احترت.. ما عارفه شو اسوي.. خايفه ارفضه بس لمجرد الخوف و العمر و انه ما نكون متفاهمين .. و مره اقول لأ فرصه و يمكن يحبني اكتر و يدللني لأنه عمره كبير و محتاج للحب و اللي تدير بالها عليه .. امي مره تقولي.. انها خايفه ما تقدر اتدلله مثل ما تدلل زوج اختي .. لأنه زوج اختي عمره 29 و هو من اقاربنا.. بس هذا الشخص غريب و عمره كبير يعني يمكن يبعدك عنا :( و الله محتااااااره موووت ... يا جماعه هل فرق العمر له تأثير.. صحيح انا كنت رافضه بالبدايه بس لما شفته صحيح اني انصدمت اولها بس بعدين اتأقلمت و حسيت انه عادي .. انا صليت صلاه استخاره اكثر من مرة قبل ما اشوفه و بعد ما شفته .... رجاءا من اللي متزوج و في فارق عمر بينها و بين زوجها او بينه و بين زوجته يقولي شو هي السيئات و الحسنات .. و شو تنصحوني.. انا في انتظار نصاحئكم و ردودكم المفيده... و شاكره لكم جهودكم الطيبه |
الفرق بينكم 10 سنين صح؟؟؟؟؟؟
ما عليكي من شكله اهم شي الدين الاخلاق لا يهمك الشكل اهم شي المضمون اهم شي الداخل لا الخارج لا تخلي شي خارجي يؤثر على حياتك دامك مرتاحه وما يعيبه الا شكله اللي مبين فقط انه اكبر بخمس 5 عن عمرة الحقيقي توكلي على الله استخيري والله يوفقك ان شاء الله |
اتوكلي على الله 11 سنه عادي وبعدين اهم شي انكم مرتاحين لبعض
ابوي اكبر من امي ب 15 سنه ولو تشوفيهم تقولي بعمر واحد ( ماشاء الله على ابوي ) :d اختك ام مجيد |
الله يوفقك... استخيري ياأختي, و غلبي عقلك زي ما قلت أمك
ولاتنسين انك انت 25 وبعدين الشاب مهندس, يعني إن شاء الله حتكونين مبسوطه معاه :) |
توكلي على الله واستخيري اكثر وان شاءالله الكبير هواللي بيدللك ويحبك ويخاف عليك بغدين والله موكبير مره عشان تقلقين عااااااااااادي الوضع يابنت والله يوفقك
|
إذا مرتاحه حاولي تعرفي اسباب أمك إذا كان بس على شكله حاولي تقنعيها ما أنصحك تتزوجي بعدم رضاها صدقيني احساس الام بمحله
وإن شاء الله ربي يكتب لكي كل الخير ويسعدك يااااااااااااااااااااااارب |
يا قلبي عمره مناسب لعمــرج وما عليج من شكله دامج ارتحتي لــه.. اخلاقه زينه ومصلي وراتبــه ممتاز وش تبين اكثر عن جــيه.. واذا ما وافقــتي هل تضمنين يجي لج واااحد مثــله ..؟؟؟ استخيــري كم مره وتوكلي على الله .. صدقيني يمكن هاي فرصــه ما تتعــوض.. والله يوفقــج.. |
استخيري الله وفكري بعقلك قبل قلبك
وربي يوفقك |
سما نجد mageed maha rashid ضايعه في الدنيا ام انمار الاميره الهادئه شكراااا لكم جزيلا على ردودكم السريعه .. و الله ما توقعت اشوف ردودكم و نصائحكم الغاليه بهالسرعه ... أم انمار... بتانسبه لخوف امي.. هي خايفه من موضوع العمر .. مع انها هي اللي كانت متشججعه بالاول و انا اللي كنت متردده ..و بعدين خوفها انه ما يحدث انسجام بينه و بين اهلي بحم عمره .. يعني زوج اختي يقعد معنا و يسولف و يتمسخر و يشاركنا في قراراتنا .. و يجي يتغدا عنا .. يعني انعامله مثل واحد من اخواني ..ب س امي خايفه انه هذا الشخص ما تقدر اتعامله مثل زوج اختي و انه يكون في رسميات بييننا.. مع انه الشب اهله موجودين في دوله ثانيه و هو وحيد بالبلد .. يعني المفروض انه يصير واحد منه و يتقربلنا اكثر .. ولا شو رايكم ؟ |
أولا تأكدي من عمره بالضبط من الأوراق الرسمية يمكن يكون أصغر أو أكبر من اللي قال لكم
أخي الكبير عمره 42 متزوج من بنت عمي 19_20 ومبسوطين وعندهم طفلين الآن |
اقتباس:
و الله طمنتني انه اخوك مبسوط مع زوجته و انه في تفاهم بينهم .. الله يسمع منك و يجيب االي فيه الخير.. شاكره مرورك |
الله يوفقك وعليكي بالإستخارة أكثر من مرة
|
إذا الشاب ممتاز وخلوق والهم محافظ
على الصلاة توكلي على ربك وخفة الدم شي من الله عيال خالي 2 يكونون عيال عم الاول خفيف دم ماشاء الله عليه والثاني عادي وزعول ودائما يسبب مشاكل مع زوجته اللي تكون قريبتي ولا يحب يروح لاهلها مع ان امها تكون عمته وكان دائما يروحلهم قبل الخطوبه وعمته ماتدخل في حياتهم مع ان فرق العمر5او6 سنوات وحده ثانيهمن قريباتي فرق بينهم 12او13سنه والحمد لله مره مبسوطه واحد كبير في السن 70او65سنه ويحبونه كبار وصغار من خفة دمه فرق العمر مو شرط للسعاده الزوجيه وخفة الدم من ربي تكون وإذا انتي مرتاحه توكلي على ربك والله يسعدك ولاتنسين صلاة الاستخاره واللهيسعد المسلمين اجمعين |
اقتباس:
حبيبتي زعلتيني بصراحــه.. من الحين تحكمون على الرجال قبل لا تقعدون معاي واتعاشرونه.. ما يصييير.. وش دخل الشكل والعمر بالسوالف والرسميــات..!!! ما يخصه ابد.. ياما انشــوف ما شااء الله اعمــار كبيره وربي فيهم خفه دم ويحبون السوالف والضحك اكثر من اللي اصغر مـنهم.. وان شااء الله ما يطلع جامد ورسمي .. ويمكن يطلــع مثل زوج اختج.. صح.. الله يوفقـج.. واستخيييييييييييييييييييييييري.. |
طالما انكِ استخرتِ ووالدتك نصحتك بأن تحكمي عقلك فحكميه ، وذلك بأن تضعي ايجابيات الرجل في كفة وسلبياته في كفة اخرى فإن رجحت كفة الايجابيات فتوكلي على الله . لا يوجد وضع مثالي 100% لذلك اختاري الانسب من حيث كل الظروف وليس الشكل الخارجي فقط والذي سرعان ما ستعتادين عليه سواء كان عادي الشكل او فائق الوسامة .
وفقكِ الله. |
اختي ضايعه في الدنيا ..
و الله انه كلامك صح 10000% و انا هذا اللي مضايقني جدااا.. يعني سودوا صورته في بالي و انا لسه ما قعدت معاه و اشوف اذا هو بالفعل يناسبني او لأ !! صدقيني هذه مو أول مره تصير.. كل ما يجي عريس.. يحاولو يدوروا على العيوب..و يضلوا يتكلموا عنها لحد ما ارفضه تماما .. يعني كل واحد اتقدملي.. من الزياره الثانيه و نرفض و هلم جره !! والحين طلعوا بموضوع البخل .. انه اكيد بخيل .. سألوا عنه وايد ..و الكل مدح فيه ما عدا واحد قال انه بخيل !! و هذا خوفني اكثر.. و كلام و كلام و كلام .. و انا اراه انه حينرفض مثله غيره ..و العمر يمشي و تروح علي.. انا استخرت ربي .. و امري لله |
أختي البتول ..
اشكرك جدا على مرورك الطيب.. و الله اني الشكل ما أثر فيه .. انا ما انكر اني لما شفته انصدمت لأنه يبين عمره كبير.. و لكن مو معناه انه هو قبيح.. بالعكس هو شخصيه جدا و طوييييل و ابيض البشره و عيونه خضر.. و انا والله افكر بعقلي.. بس للاسف امي دائما اتحسسني .. اني ما استخدم عقلي و اني بس ابغي زوج لمجرد الزواج و العرس و الحفله !!! حتى لما اسألها شو رأيك.. تقولي ما أعرف.. ما تحاول اتناقشني بوجهه نظرها .. و مثل ما قلت سابقا ..كل مواصفاته ممتازه .. ما عدا قصه البخل هذي اتخوف شوي و لازم اتأكد منها 100% لأنه اذا طلع بخيل .. فمستحيل اوافق :( لأنه ابشع صفه بالرجل هي البخل .. |
العمر مو مشكله
بالعكس الرجال وااعي كثير الله يوفقك هموووم |
الخطبه اقتربت و انا مازلت تائهه
اخواني و اخواتي...
انا في حيره من امـــــــــري... سأدخل بالموضوع تقدم لي شاب عمره 36 مهندس من عائله مرموقه.. يصلي متدين..كل شيء كامل.. و الكمال لله وحده.. انا عمري 25 و الحمد لله ما ينقصني شي.. المهم.. انا كنت خايفه من مساله العمر.. و الفرق 11 سنه بينا.. انا قلت يمكن تكون شخصيته مرحه و مساله السن ما تأثر.. قعدت معاه .. انبسطت .. بس خفت..لأنه من طبعه هــــــــادي..و قالي انا من النوع اللي ما يعصب.. بس المشكله وين.. فيني انا ...يعني انا شخصيتي.. تحب المرح و الطلعه و الاجواء الضجه و الزيارات الاجتماعيه .. يعني كأني نار و هو تراب .... انا من جد خايفه جدا .. انا شفته 3 مرات و صليت خمس مرات استخاره و الموضوع و الحمدلله ماشي بسلاسه من غير اي مشاكل .. اختي شافته كمان .ز تقولي ما شاء الله عليهمحترم و خجول .. بس قالتلي احسه انه ينفعه بنت هاديه ما الها صوت .. يعني عكسي تماما ...و قالتلي انها خايفه علي انه يطفسني و احس بالندم طول العمر :( الصراحه .. انا مو عارفه ..يعني انا حسيت بشوي من هذا الكلام..بس ارجع و اقول.. لمتى بنتظر.. العمر بيمشي.. و يمكن ما رح يجيني مثله مره ثانيه ... لأنه تقدملي الكثير.. بس كلهم اقل منه بكثير.. ارجوكم اسدو علي بنصائحكم و خبراتكم.. من ناحيه الهدوء.. من ناحيه فرق العمر.. او اللي يعرف مثل هيك قصه و شو كانت النتيجه ..و هل انا استطيع اغيره و اخلي مرح و مفرفش ؟! اشكركممن كل قلبي.. |
انا انسيت اقولكم..
انه ابي اعطاه الموافقه ..و بكره بيجي عنا البيت عشان يتفقوا على المهر و المأخر و هالسوالف ..و للعلم هوا يريد يتزوج بخلال 3-4 اشهر بالكثير ... |
بصراحه يا عسوله فرصه لا تعوض والحياة مثل ما قلتي تمضي بسرعه والحظ ما يجي دايماً للإنسان بصراحه الرجال ما عليه كلام وبالعكس صفة الهدوء ميزة في صالحك بإذن الله لأنه تخيلي لو بيكون إنسان عصبي شو بتسوين وبالنسبة للعلاقات الإجتماعية تقدرين شوي شوي تغيرينه أما المرح والضحك فأكيد هذي الصفه موجوده خاصة كونه إنسان هادئ الطباع فهم بالغالب يتميزون بصفة المرح وإن كان الآن غير واضح هذا الأمر عليه وذلك لكونه لم يعتد عليكي بعد فلا تستطيعين الحكم عليه وبالنسبة للعمر بالعكس أحس فرق العمر بينكم رائع فهذه فرصتك للدلع والدلال يا عسل
ألف مبرووووووووووك ولا تترددي عزيزتي خاصة أنكي صليتي الإستخارة وكل شيء ماشي على أحسن حال |
كم ارحتي قلبي يا دلع ...
و الله انا افكر بنفس المنطق اللي انتي قلتيه .. بس مرات اقول .. هذي حياتي ..و خايفه يعكنن و طفشني حياتي.. بس بعدين بقول هي الفرصه تيجي مره وحده .. و الشيء العجيب ..و انه الموضوع ماشي مثل ما قلت و لله الحمد بشكل هادي و ما في اي كلام او اشاعات ...و انا مؤمنه انه اذا ربنا ما كاتبلي الخير فيه .. بيوقف الموضوع باي سبب.. شاكره مرورك عزيزتي |
اختى العزيزة
اتكلي على الله احسن شئي في الرجل انه يكون هادي علشان ما يعصب بسرعة بعدين مش معنى انه هادي انه سوف يعزلك عن العالم وسوف يكون نكدي بعدين مسألة العمر تفضلي انتي دايما الصغيورة وهو بيدلعك ويشيلك في عينه ان شاء الله انتي صليتي استخاره وبتقولي ان ربنا ميسر الامور فلا تعسري الامور اتكلي على الله وربنا يتمم على خير |
حبيبتي ليش اتفكرين بهالطريقه..!!! بالعكس شي حلوو انج مرحه واتسولفين .. يعني تخيلي واحد هادي ماخذ وحده هاديه مثله.. بيصيرون مملين وما يقدرون يسلوون بعض.. بس اذا مثلا الزوج طبعه هادي والزوجه مرحه واتسولف بتغير الجو فالبيت شوي.. بعطيج مثال ثاني.. هل يصلح عصبي ياخذ عصبيه..؟؟؟ اكييد الجواب لا.. لان الزوج اذا عصب تقدر الزوجه تمتص غضب زوجها والعكس صحيح.. ففي حالتك عادي والله لا ااتحاين ولا اتصيرين حساسه كثير.. دام الرجال زين واخلاقه حلوه فررررصه ما تتطوف ابد..ومثل ما قلتي العمر يمشي.. والله يوفقج.. وعن الفرق بينهم ترى مناسب .. |
انا زوجي اول ما جاء يخطبني شكله هادي كثير ومحترم لكن بعد الخطوبة والزواج شخصيته كانت معي مختلفه فهو يضحك ويمزح كثير ولكن بس معاي انا يعني بره مع اهله واهلي تشوفينه هادي .. يمكن خطيبك يكون بنفس الطريقة ... وبعدين انا الزوج يصير ياخذ من طباع الزوجه يكون مرح وضحوك ... لا تفكرين في هالامور تراها تافهه ... فكري كيف تكون حياتكم سعيدة مع بعض ... انا ما اشوف ان في مشكلة اساسا حتى تقعدين تحتارين وتفكرين ...
توكلي على الله ... والله يسوي اللي فيه الخير والصلاح لكم اختكم |
حبيبتي اول شي مبروك ثاني شي دوام الحال من المحال انا مثلا قدرت اغير بيت كامل من خلال عشرتي معاهم من قبل كانوا مو هادييييين بس الا برووود فيهم وكنت اجي بيتهم وانط واضحك واصرخ (( خبله)) :23: وبدوا شوي شوي يتغيرون اشلون انتي الللي بتعيشين معاه في بيت واحد اهم شي اتصرفي على طبيعتك وبعدين كثير نا س متزوجين يتاثرون بزوجاتهم او العكس :15: خواتي تاثروا ببعض تصرفات ازواجهم ولك قصة ثانيه ذكرت اختي اخذت واحد صحيح انه عصبي عكس اللي جاي خاطبك بس ماله صوت واختي تحب الضحك والنط وحركات الاطفاال:23: والحين زوجها ما شاء الله تغير 360 درجة من مين من اختي ولان اختي يوم اتعودت على البيت ببدت تاخذ راحتها كانها في بيتنا :d واختي عمرها وقتها 18 وهو 26 يعني في فرق وشوفي ما شكل لهم مشكله :22: خلك من الدلع واتوكلي على الله خلنا نفرح فيك:14: |
معشوقه سوسو...
والله اثلجتي صدري.. انا كنت في انتظار هذا الكلام اللي يشججعني .. ابوي مطمن وايد منه و حتى ما اله نفس يسأل عنه .. لأنه لما يسأل عنه و عن عيلته .. يقولوله هذول ناس ما ينسأل عنهم ..معروفين بأخلاقهم العاليه و ما في عليهم اي غبار.. الله يتمم على خير و ان شاء الله ارجعلكم مخطوبه Love Allah....ضايعه في الدنيا ....بوبو 80 شكرا على مروركم عزيزاتي.. امي قالتلي نفس الشيء.. بكره بيصير مثلك و تقدري اتغيريه.. اصلا هو متعطش لانسانه اتشاركه حياته و تتدلع عليه .. و يمكن يكون هوا عكس هذا الشيء ..و يمكن يكون مستحي و خجلان و ما يبن على طبيعته .. انا قررت اني اتوكل علر ربي .. هو يختاري الخير..و بسكر اذني.. ما بسمع لحد.. خلاص قررت و الله يسهلي الامور بأذن الله ... و اللي عنده تعليق او خبره بالهموضوع ما يبخل علي فيها .. ما استغنى عن مشورتكم و نصائحكم دايما |
أختي .. أنا ماني شايف في الموضوع أي مشكلة !!
بالعكس عريسك لقـــطة وظيفة مرموقة وشخصية حلوة وإنسان محترم .. بالله ايش تبغي أكثر من كدا ؟ واختلاف شخصياتكم وطباعكم شي طبيعي .. أصلا ما في زوجين يتفقون بالطبايع إلا فيما ندر إما نلاقي الرجل انفعالي والمرأة هادئة أو العكس وما أعتقد إن مسألة المرح شي يلتفت له !! وفرق العمر بينكم إلى حد ما جيد .. وما يعتبر كبير والأهم من هذا كله إنك استخرتي خمسة مرات .. وفي كل مرة تحسي بارتياح صح ولا لا .. أجل اتوكلي على الله ووافقي وانت مغمضة .. ترى عريسك ما يتفوت .. ! |
يا حبيبتي لو شوفتي زوجي وضحكه وكلامه واجتماعياته
لقلت أكثر إنسان اجتماعي ممكن ترينه في حياتك لكن تعالي شوفيه الآن اكتشفت أنه اجتماعي إذا اضرته الظروف لكن دائما يرفض أن نذهب في اجتماعات أسريه وعائلية ، يقول ما أحب ما أحبب بالرغم أني على النقيض أعشق هذه الاجتماعات وهادئة جدا لا ليس سبب للرفض توكلي على الله وألف مبروك |
توكلي على الله انا اعرف وحده عمرها 15 سنه وزوجها عمره 27 سنه متزوجين من قريب والحين حامل وجدا مرتاحين مع بعض
والله يوفقج ... |
يا عزيزتي توكلي على الله .. أمثااال خطيبك نااادرون في هذا الزماااان واسأليني :d أما اختلاف الطباع .. أرى بأنه شيء إيجابي .. يعني تخيلي كلاكما هااادئ .. على العكس ستكون الحياة أجمل .. هدوء على مرح ,, وسيكتسب كل منكما شيئاص من طباع صاحبه مع الأياااام ! ماشاء الله تبارك الرحمن .. أسأل الله أن يبارك لكماااا ،، |
اختي وعزيزتي مافيه فارق كبير بالاعمار يعني 11سنه مو كثير صدقيني وبعدين تعرفين ؟؟؟ليش اهم حاجه انه يكون انسان محافظ وكفؤء انه يرتبط فيك سوي صلاه استخاره عشان يرتاح قلبك وبا التوفيق :23: انشا الله
|
باااااركووووووووووووولي...
مبارح كانت قراءه الفاتحه لي.. على نفس الشخص.. و لبسني.. اسواره و خاتم الماس.. والله ما صدقت اللي صار.. الحمدالله ربي.. العرس بيكون بعد 3 شهور... و كتب الكتاب الاسبوع الجاي.. الله يرزق كل بنات المسلمين بالازواج الصالحين ... أمييييييييييين |
^ ^ الله يبارك لكم ياااارب ويتمّم لك على خير.. ونفرح فيكِ عمّا قريب .. << عن جد فرحت والله http://www.66n.com/forums/images/icons/icon12.gif |
توكلي على الله يابنت لحلال ماراح تلقين واحد نفس طبعك بالضبط ..الله يوفقك يارب
|
مبارك عليكى اختى وفقكم الله
|
| الساعة الآن 12:46 PM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©