|
ابيه يموت فيني وينسى انه مغصوب :(
مرحبا انا ابيكم باستشاره
تمت ملكتي على شخص... وكنت مبسوطه وفرحانه....وبعدها عرفت شي من مصدر اكيد وموثوق :( الشخص الي ارتبطت فيه كان يحب وحده قبلي لحد الجنون وصارت بينه وبين اهله مشاكل كثيره علشانها ورفضو يتزوجها ...لانها من جنسيه غير جنسيته ...وبعد مرض ابوه وزعل امه وافق بالنهايه على انه يتزوج غيرها وخطبوني انا له :( وتوني عرفت يعني بالعربي الرجال الي ارتبطت فيه مجرررروح وزعلااااان ومايبيني ومغصوب علي وانا خلاص تورطت ..فكرت بالبدايه افصخ خطوبتي بس خلاص انا تملكت وبصير مطلقه :( وبنفس الوقت ولا احد يعرف بهذا الشي من اهلي بس انا اعرف وهو كمان مايعرف ان انا اعرف ...وانا لاحظت بملكتي انه كان مررررره مره حزين بشكل واضح ويتصنع الابتسامات رغم اني فعلا حلوة وبشهاده الكل جسم ووجه وكل شي وخفيفه دم ومثقفه و و و مابي اكمل لان هالاسلوب كاني امدح نفسي بس انا ابي احطكم بالصوره علشان فعلا انا محتاجه مساهدتكم لان نفسيتي دمار حزينه لاني تركت كل الي خطبوني وجوافقت على واحد طلع مايبيني :( جلست كم يوم بحاله يرثى لها تمنيت فيها اني اموت وحزنت على حضي بس بالنهايه قررت ما استسلم ..لان مو من عوايدي ولازم لازم اقدر اخليه يحبني ويميل لي ولا احطم حياتي بايدي بس فكرت وشلون؟؟ وهو الحين لانه مغصوب علي طبيعي يكون عنده ردة فعل عدوانيه مني زي ماتقولون عناد للي غصبوه خصوصا انه ظل متمسك برايه ولا همه احد بانه يتزوج الي كان يبيها بس مرض ابوه وتنويمه بعد الجلطه الي صارت له خلته يتراجع طالبتكم تساعدوني بالي تقدرون عليه وبقولكم على الي خططت عليه انا خليت ابوي يعزمه يوم الخميس هذا وبتكون بدايه المشوار الي لازم اكسب فيه بالنهايه ابي تقولون كل الطرق والوسائل والاساليب الي اقدر اسويها علشان استميله لي بس مابي تقولون خليك طيبه خليك حنونه خليك دلوعه ابي تقولون شلون كل شي ابي مثال واضح طالبتكــــــــــــــــــــــــــم لاتردوني مالي بعد الله الا انتو لان اهلي واخواتي مابيهم يعرفون اي شي عن هالموضوع ابي اخوض المعركه لوحدي ولازم اكسبها واخليه يحبني ولا اتطلق ابي اساليب وطرق وحركات وكلام وكل شي يخليه يستسيغني على الاقل بالبدايه واعرف ان فيه امل اكمل ......... طالبتكم ثبتو الموضوع |
ان تكوني ملتصقة به اكثر
بالنسبة لي احب ان اقولك اولا مبروك.. ثانيا يوجد اسلوب الطاعة والمساعدة له وخراجة من مشكلته التي هو فيها با تساعدية بالنسيان وهوان تكوني ملازمة له طول الوقت
|
أختى السلام عليكم أريد أن أقول لكى أن زوجك الأن كما قلتى مجروح فالواجب عليك أن تهتمى به عند حضوره أليكم ولا تبدأ أى محادثه إلا أذا رأيت أستعداده لهذا أو أنك تتكلمى معه عن مستقبلكم معاً فأذا تجاوب معك فأشعريه بحبك الكبير الذى تحملينه له وأنك ستجاهدى من أجل أسعاده وعلى العموم هذه المسأله ماهى إلا وقت وبأسلوبك الحليم الرشيد سيتحول بأذن الله أليك وربنا يجمع بينكم فى خير و يسعدكم آمين و أنشاء الله تخبرينا أن الأمور أصبحت تمام بفضل الله . وشكراً أبوعمار
|
كوني انتي،،، على طبيعتك،،،
الف مبروك،،، خطيبك،، الله يعينه،،، وانتي كمان الله يعينك، والله يسامح أهله،،، اللي حطوكم بمثل هيك موقف،،، لكن لازم تطلعي على قدها،،، وكوني على طبيعتك، وتصرفي معه،،، كأنه هو، خطيبك، وزوجك المستقبلي،،، وبالتوفيق بسؤالك، فتحت جراحاً ،،، وادميتها ،،،، وأعدت القلب الى ............................. |
الجراءة قد تنتج ردة فعل عكسية..
لايوجد وصفة سحرية لتحويل قلب خطيبك 180 درجة.. دع الأيام تنسيه ..خليلك بطبيعتك فقط وقدر الله وماشاء فعل .. |
أحمد عبد الفتاح أحمد وعلي قاسم الحياة امل نواف
شكرا على ردودكم وتفاعلكم......... بس ابي شي يحفزني اقوى من كذا لان لو بسكت وبجلس على طبيعتي بيدخل ويطلع ولا راح اقول ولا نص كلمه ولا راح اتكلم ولا راح اطالعه اصلا :( |
حبيه من اعماق قلبك .. لا تخجلي من اظهار الحنان و الحب .. على الأقل خليه يعرف انك طيبة و قلبك ابيض قبل كل شيء عشان يرتاح لك .. لا تزعلي من اي شيء يقوله لأنك اذا زعلتي منه ستكون ردة الفعل عنده سلبية .. افرضي فيوم من الأيام صارحك .. تقبلي الخبر ببروووود .. و قولي له ما يهمك الماضي .. اتمنى من اعماق قلبي ان الله يريح بالك و يبرد قلبك لأني حاسة ان الوضع صعب جدا .. بس عجبني اصرارك و هذا دليل انك شارية هالرجال و اتصور لو يعرف عن اصرارك هذا .. ينسى الدنيا و مافيها و يعيش عشانك و بس ...
دمتي بود |
اختي الغالية ... ادعي الله ملياً وصلى لله و ادعي فيه فإن الدعوة لا تذهب هباً ...
اولاً ابارك لكي مقدماً .... لكن انتي قلتي انه بيجيكم يوم الخميس و يوم الخميس قريب و غداً لناظره قريب لكن وردت لدي فكرة هو بأن تستعدي نفسياً و معنوياً و تصنعي بعض الحلوى انتي بنفسك لانه اسمعي هذا المثل < سر الوصول إلى قلب الرجل من بطنه > ... فا انتي قدمي له ما صنعتيه و قوليله مثلاً اش رائيك عجبتك ولا اروح اسويلك احلى و احلى مثلاً .. بس لا تحاولي تفتحي اي موضوع على شان ما يثار قلبه المجروح ... ولكن داويه و كثر الدق يفك اللحام .... و الشي الثاني اللي لازم تسويه بأنك تتزيني له بالملابس مثل التنورة الجذابه عاديه طالما انه في بيتكم ... و اذا كان بيتكم فيه حديقة صغيره اطلعي انتي و هو و تمشو و لأانه في الهواء الطلق و في جو الطبيعة تلين الانفسن و ترتاحان لبعضكما لكن تجاذبو اطراف الدعابة و الحديث و خفة الظل ... بعدها مهما كان سيلين قلبه لكي بإذت الله و يعجب بكي لكن مع الممارسة الدائمة و اثابتك اعجابك به .... ولا تفقدي الامل ابداً ابداً ابداً هذا انا كررتها اكثر من مرة و لكل مجتهد نصيب .... و ادعي الله لكما بالتوفيق و الله يوفقك و يحبك خطيبك و ينسى ما مضى من علاقات ... وشكراً .... Game Over |
شوووفي حبيبتي ممكن خطيبك الحين يمر بأزمه نفسيه صعبه
وممكن انه يتذكر ماضيه بس ثقي ثقه عمياء اذا شاف منك كل خير وشاف انك مثال الحب حتى لو انه ما يحبك والاخلاص والصدق صدقيني مارااااااح يفرط فيك بحااااال من الاحوال بس فيه سؤال ولا ابيك تزعلين هل هوووو له علاقه بحبيبته الساااابقه ولا تركها خلاص هذا شيء لازم تتاكدين منه وبعدين اهم شيء عند الرجل ان المراءه تكووون رزينه متفاهمه للامووورعلشاااان يحس انه احسن الاختيااااااار واسفه على تطويلي عليك ودمتي سالمه |
مرحبا ..يا اختي مصير ه ينسى بس كله بعتمد عليكي وعلى اسلوبك وشطارتك وكيف تحاولي تكسبيه وتخليه ما يستغني عنك ..
والله معاكي ويهنيكي |
مبروك يا اختي الله يسعدك ويهنيكي
استعدادك النفسي يكفي انك انك تخليه يحبك ويموت فيكي ودا طبعا نابع من حبك وحرصك عليه وطالما الراجل تقدم لخطبتك وعمل العقد يعني انه لديه استعداد ينسى الماضي ويبدا حياة جديدة بما انك عندك نيه تخليه يحبك موت اكيد هو كمان عندو نية انه يخليكي تحبيه يعني مفيش صعوبة في هذا الشي |
انا مريت بتجربه قريبه من تجربتك لكن لم اكن صبوره وخلصت القصه من الخطوبه. نصيحتى لا تيئسى وانا متاكده انه بالصبر والحب هيلين قلبه. اهتمى بنفسك فى اليوم ده جدا واظهرى ليه اهتمامك بيه. يعنى تاكل ايه طيب يعجبك ده. وممكن الاحاديث كلها تكون محايده لا فيها تلميح ولا مباشره . وكونى على طبيعتك مع الاهتمام بيه جدااااا
|
اولاً مبروك والف مبروك على اكمال نصف دينك
اختى الكريمة : - انصحك بعدم اللياس فامثال زوجك كثير وكثير جدا واحب اقولك شئ وهو ما فى اى شاب وما يمر بمرحلة حب قبل الزواج وخاصتا بمرحلة المراهقة وبتكون صعبة وتاتى الايام ويكتشف انهاء كانت غلطة عمره لو ارتبط بانسانة ما كانت دائما مسيطره على تفكيرة وذلك بمرحلة المراهقة فزوجك دعيه للايام سوف يكتشف ان ما كان يسميه حبا انما هو فراغ عاطفى بمرحلة عمريه معينه وليس له صله بالحب بتاتا اما وصيتى لك الوحيدة والتى سوف تجعلينه يحبك من كل قلبة هو اظهارك الاهتمام به والخوف عليه وتوصيتك له بالاهتمام بصحته واثناء مقابلته حاولى التحديق فى عينية وهذه المسألة لها واقعة بقلب الرجل وحاولى التظاهر بزعل مدلل منه لانه لم يسأل عنك وما شابه ذالك اختى الكريمة فالاخير انصحك بانك تستخدمين عقلك دون قلبك ................. اامل ان اكون ساهمت بما يجب وبما يستحسن تحياتى مع تمنياتى لكى وللجميع بالتوفيق والنجاح فى الحياه |
http://www.crearecountry.com/flowerdivider.gif اختي كل الي اقدر اقوله لكي خليكي على طبيعتك.. واليكي بعض الطرق .. وان شاء الله تفيدك.. لما يجيكم يوم الخميس.. البسي احلى واشيك لبس عندك.. ويكون ملفت للغاية..( مو ضروري ملفت يعني عاري مثلا) تعطري بارق العطور.. حطي مكياج ناعم وخفيف .. ولاتنسي اهم شيء في المكياج الكحل الاسود.. عليكي به .. دعجي عينك حيل.. وحطي الروج الوردي الخفيف بلمعه قوية.. جهزي له حلى مع القهوة تكوني انتي عاملته وزينيه بطريقة حلوة.. روحي لمحل قزاز واشتري له طقم عطور راااااائع وعيله القيمة( عطر/ جل شاور/ كريم للحلاقة) او اشتري له محفظه جلد انيقة + كبك للثوب ماركة معروفه ..من قزاز .. غليفها بطريقة رومانسية .. ولما يجيكي استقبليه بكل بشاشة وحب .. واظهري له مدى سعادتك بتلبيته للدعوة.. ولما تجلسون بروحك انتي وياه قدمي له الهدية.. واذا سألك عن المناسبة .. قولي له ارتباطي بيك احلى مناسبة واهم مناسبة.. وان شاء الله ربي يقدرني واسعدك طول عمرك.. وقدمي له الحلى واسأليه عن رايه فيه لانك انتي عاملته ومن هالكلام.. واكيد كل مرة تفاجئيه بشيء حلو يكون افضل . تقبلي تحياتي .. والله يسعدكم دوم.. تحياتي لكي.. اختك كيب.. http://www.crearecountry.com/flowerdivider.gif |
مساكم الله بالخير ياأخوات
في البداية اقول ألف مبروك لك أختي والله يتمم لك على خير كان الله في عونك عموما هي مسألة وقت حتى يعتاد عليك وعلى أسلوبك وطريقتك ( لا تزعلين مني ) بس هذا شيء طبيعي مع كل بداية عموما أنا تقريبا مريت بتجربة ولكن غير وهي أن حبيبي أجبر على الزواج من أخرى إرضاء لوالديه ( كل شيء قسمة ونصيب / قدر الله وماشاء فعل ) بس صدقيني أنت بيدك كل شيء أحبيه .....دليله .......عوضيه عما أفتقده من حبيبته كوني له أخته صديقته حبيبته زوجته أمه وسيكون لك ختاما عذريني على الإطالة بصراحة ماقدرت اكمل أختك منسية |
أختي العزيزة
أتفق مع الجميع انه يجب عليكي ان تقتربي منه أكثر , و أن تحاولي أن تكسبية ...................................... ألخ لكن صدقيني يجب عليكي أن تكوني صريحة معة , كما يجب علية أن يكون صريح معك . يعني صارحية بأنكي تعلمين أنة يحب واحدة أخرى , وأنه خطبك من أجل والدية . و حاولي أن تعرفي منة الحقيقة , قبل فوات الاوان طالما أنه لم يدخل عليكي بعد . و نصيحتي أذا صارحكي بانة لا يزال يحب أمرأة أخرى فلا تغامري بالزواج منة . و أذا كنت تحبيه ساعدية بأن يتزوج المرأة التي يحبها . |
أهلين أختي معالي ..
شوفي عزيزتي انا زيك الحين مخطوبه ومتملكه .. وكنت مثلك حابه اخلي خطيبي يموت فيني والحمدلله نجحت وطيحته بشباكي ههههه بس مثل ما قالوا اخواني واخواتي لازم تستنين شوي ما في شئ يجي بسرعه (اللي يجي بسرعه يروح بسررعه) وصدقيني انا حاسه فيك بس على مهلك خطوه خطوه وانا رايحه اعطيك بعض الحركات اللي سويتها لما يجي يزورني زوجي واسرة قلبه فيها.. اول شئ البسي شئ رايق وحلو وناعم .. ويفضل يكون اللون أحمر لانو 99% من الرجال يحبون اللون الاحمر ومكياج خفيف ..ولا تنسين العطر نجي للحركات : اول ما يدخل بيسلم عليك طبعا وبيمد ايده واذا ما مدها انتي مديها واسحبيه وبوسيه على خده اليمين والشمال بس بحنيه .. بها الطريقه تحسسينه بانك انسانه حنونه وانك مشتاقه له _ ناوليه فنجال الشاهي بايده وقوليله تفضل حبيبي _ اكليه الحلو بأيدك _ سبلي بعيونك وهو يكلمك _قومي سوي نفسك بتجيبين منديل ولا شئ وتتدلعي وتميعي بمشيتك _ اجلسي ناظري في عيونه واذا طالعك نزلي عيونك وراسك وانتي خجلانه _ سولفي معاه بكل هدوء وخجل وموده ونعومه _ اذا حسيتي انك صرتي تمونين معاه في الكلام وراحت الكلافه اجلسي تفلسفي عليه قوليله انا اقرأ العيون وانا اشوف في عيونك حزن.. ولا تسألين تقولين له ليش حزين .. بس حسسيه انك حنونه وانك تحسين فيه وللحديث بقيه .. آسفه أختي معالي بس مضطره اطلع آلحين بعدين اكملك .. ونسييييت اقولك شئ مهممم بالمره لا تنسين الدعاء ادعي ربي دااااايم انو يحببه فيك ويحنن قلبه عليك ويألف بين قلوبكم ترى الحب من عند ربي .. |
مرحبا اختي معالي ...
اختي كييب ...ماشاء الله عليكي والله يكملك بعقلك ...اجابتك اعجبتني جدا :) اختي قمر ... تقلك اول مرة بتقابله بعد الملكة !!!!!!!!!!!! تقولين بوسيه وتدلعي ؟؟؟ هههههههههههه قمر صحيح كلامك (برأيي) بنقطتين هم : _ اجلسي ناظري في عيونه واذا طالعك نزلي عيونك وراسك وانتي خجلانه _ سولفي معاه بكل هدوء وخجل وموده ونعومه معالي احب اضيف شي بسيط على.. انا خطبت بنفس طريقة خطيبك هاذي ... مو مرة لكن مرتين ..بالمرة الاولى البنت كانت تدري عن جبيبتي .. وكانت تسأل عنها اللي يعرفونها وتقلد كل حركاتها تقريبا لأنها تبي احبها ...لكن للأسف ذكرتني فيها اكثر والنهاية كانت اني انفصلت عن خطيبتي هاذي. المرة الثانية ... قررت اني استمر مهما كانت الظروف .. المهم نصيحتي لك .. حاولي تفهمين خطيبك وتعرفين كيف يحب تكون المرأة .. وفهمية بطريق مباشر او غير مباشر أنك يهمك سعادته وبس وانك مستعدة لأي شي في سبيل انه يعيش حياة سعيدة وخلي الابتسامة على وجهك رسولك له بأنك فرحانة بأرتباطك فيه وخبريه عن مدى سعادتك أنك ارتبطتي فيه ..واهم شيء..كوني انتي انتي ...لا تغيرين بسلوكك او عاداتك لمجرد ارضاءه لنك ممكن ما تقدرين تستمرين بالشي هذا بعد الزواج وبيكون عرف انسانة اخرى مو انتي ... ولك مني اجمل الامنايت بالتوفيق والسعادة معه :) |
اوووه آسفه ما دريت :
شكرا اخي الماستر على التنبيه معالي لا تاخذين بنصايحي سامحيني عزيزتي مادريت انو اول زيارة بس نصايحي طبقيها في رابع او خامس زيارة وفي اول زيارة صدقيني خذيها من وحده حالها مثل حالك .. كنت مثلك جلست ارتب كلام في راسي وحركات وآخر شئ تتدرين وش صار؟؟ مت من الحياء ,,الحيااااء قتل كل شئ كنت ناويه اسويه .. ولا تقولين لي انك جريئه انا قايلتها قبلك وتدرين صفة الحياء اول صفة حببته فيني.. كنت اصب له الشاهي وايدي تتنافض وجسمي يتراقص من شدة الحياء ويقولي من بعدها وانتي دخلتي قلبي وحسيتك حلوه وخفيفة دم مع انو التصرف هذا طلع مني لا ارادي .. فعشان كذا اخواني واخواتي اللي ردوا قبلي قالولك خليك على طبيعتك فعشان كذا انصحك يا معالي مثل ما نصحوك اللي قبلي خليك بطبيعتك .. واذا جاء استقبليه بابتسامه حلوه .. ترى الابتسامه لها تاثير كبير على النفس .. يمكن والله اعلم لما يشوفك تبتسمين ينسى حبه الاول وهمومه .. ويحس انو في أمل يعيش قصة حب جديدة واخيرا أحب اقولك كل شئ يجي حبه حبه .. وخليك صبوره المسأله محتاجه بس شويت صبر وطولت بال وربي يوفقك انشالله ويسعدك.. |
السلاااام عليكم ..مممم اختي انا عندي رأي مخالف شوي لاراء الاخوات اللي قبلي ..وهو انك تظهرين له حبك واهتمامك وتدلعي والحركات هااذي ...فكري فيها شوي ..ماتعتقدين انها ماراح يستسيغها منك اذا كان متعود عليها (سوري) من وحده ثانيه وبشكل ثاني وباسلوب دلع ثاني ..صدقيني الاسلوب هذا ماينفع..بعدين بصراحه..كونه صار خطيبك وهاذي اول مره بتشوفينه..مو معناه ابد انه صار حبيبك ولا شرايك؟؟انا اقصد بالنسبه لكي ..يعني اكيد متهيأه نفسيا انه بيصير زوجك وحبيبك وعندك خلفيه عن فتره الملكه كيف تكون وراسمه فخيالك اشياء .. اسمعي وش بقولك واللي يدلك عليه قلبك سويه..اول شي اهمتي بشكلك قد ماااااتقدرين ..بس بدون مبالغه..اهتمي اول شي بلبسك..واذا كان قلبه منعمي عنك شوي ..اجذبيه بريحتك ..الريحه لها اثر خياال..كمان اهتمي بنعومه جسمك..يعني الاماكن اللي تتخيلين انه ممكن يلمسها .. كفوفك وقت السلام..خدك..هاذي اول خطوه..ثاني شي ..اهتمي بالمكان اللي بتجلسون فيه ..يكون حلو مرتب تقدمين اشياء حلوه بس ابدا ابدا مانصحك تهدينه اي شي..احسها مو حلوه باول زياره وخصوصا انك عارفه الوضع انك تهدينه شي ..اما بالنسبه للمكان لو مايكون رومانسي يكون احسن..دامه حزين الجو هذا بيوديه عالم ثاني غير اللي انتي فيه..حاولي يكون الجو معقول من ناحيه الاضاءه وغيره..ثالثا انسي انك خطيبته وهو خطيبك..عااااااااامليه كصديق ..لاتقولي له حبيبي او عمري ومن هالكلمات الرومانسيه ..انتظري للمرحله اللي بعدها ...لانه اكيد متوقع بنت بتدلع وتحاول تجذبه وتتكشخ له وتغرقه بكلام حلو ومن هالاشياء ..خصوصا ان ابوك اللي عازمه يعني ماجا برغبته...بقولك وش تسوين ..سلمي عليه باسلوب حلو وابتسامه رقيقه بس لاتقولي كلمه حب وحده.. خليه ينسا انه مغصوب..لاتفتحي اي مواضيع تخص زواجكم الحفل او الترتيبات او السكن او وين بتسافرون او اي شي ممكن يجي من بين الكلام...كانك قاعده مع وحده من صديقاتك..بقولك ليش ...انتي عارفه ان الشباب هنا مايعرفون شي اسمه صداقه وانا ماقصد بها المفهوم العام للصداقه بين البنت والولد عندنا ..ماينفع تحاولي تكوني حبيبته ..لان عنده حبيبه.. وماينفع تعامليه برفق وحناان كانك امه.. امه موجوده.....كمان لاتكوني مستحيه وساكته وتقعدين تضيعين الوقت عشان ماتحسي باحراج بحركات مثل تصبي شاي وتجيبي كلينكي وتطلعي شوي .. وتجيبي مويه والاشياء السخيفه.. لانها من جد تطفش..كانه جاي ياكل ويشرب عندكم..يعني طول الوقت استميتي عشان تكوني طبيعيه رقيقه وكوني انثى بكل ماتحمل الكلمه من معنى...تكلموا فاي مواضيع ثانيه غير اللي قلت لك عنها...تكلموا عن دراسته عن شغغله حاولي تجذبيه يتكلم بشي تحسي انه ممكن يكلم فيه اي احد مو بس بين الحبيبه وحبيبها...تكلموا عن اي شي يجي سيرته ...عرفيه على نفسك بدون مايحس ..طبعا انا مو بس اتكلم عن يوم الخميس ولكن لفتره الخطووبه كلها ...تكلمي عن نفسك بشكل حلو ومايبين استعراض او غرور انتي فاهمتني ..تكلمي عن تفاصيل حياتك كبنت ماتتخيلي كيف الاشياء هاذي تجذب خصوصا فمرحلت التعارف ...وخلي دايما عيونك الللي مبتسمه مو شفايفك...حسسيه انك عاطفيه وحنونه بس بدون مايكون الشعور موجه له....اذا عندك اخو اخو اخت صغيره جيبيه عندكم ..ويكون طبعا مملووووح الطفل هذا ومكشخته..وسوي نفسك تموتين عليه ...لو ماعندك اخترعي هههههههه بنت اخو بنت اخت تصرفي ...حطيه فحضنك العبي معاه برقه لاطفيه تكلمي معاه زي البيبي انتي عارفه يعني كيف الكلام مكسر وحررررركان نص كم..قولي له اشرايك فعمو مثلا او قولي مين هذا تعرفه؟ كذا بتجذبيه يحكي معاكم طبعا بيجاملكويلاعبه ويحاول يساله الاسئله البايخه اياها وش اسمك كم عمرك هههههههه..تكوني انتي من اول مخبيه قطع شوكولاته باي مكتن فالمجلس بس يبان كانها من فتره موجوده وكل مايجي الطفل هذا تعطيه منها .. جيبي قطعه صغيره وعطيه اياها ... بيطلب وحده ثانيه ... خوذي قطعه وخبيها فجيبه خطيبك..طبعا وانتي تسوين الحركه هاذي لازم ريحتك تكون جنااااااان وخصووووووووصا شعرك ..كوني مبتسمه وحاولي بحركه خاطفه تلمسي صدره وانت تحطيها ..بيقوم اخوك او اختك يدور عليها ..اكيد بيجلسه فصحنه لين يطلعها ....انتهزي الفرصه وقررربي منه مرررره ..الصقي فيع على اساس انك تكلمي الللي قاعد فحضنه..خلي شعرك يكون قريب منه....وياويلك لو قلتي شعري قصيررر..وانتي تضحكي قربي راسك من كتفه ...كذا بينجذب له بدون مايحس بتانيب الضمير عشان حبيبته.. يعني يحس انه مو موجه الدلع هذا له وهو تقبله.. لان فاعماقه بيعتبر اي قبول لشي منك خيانه لها ..فلما تسوين شي يجذب بدون مايكون موجه له صدقيني بينجذب بدل الخطوه ثلاث ...وقيسي على الشي هذا ...حاااولي انكمتلعبون مع بعض اي شي بس بدووون مايبان انك مخططه.. مثلا لما تكوني معاه اتفقي مع اختك..ترسل لك مسجات من النوع اللي تكون كانها العاب عرفتي ؟؟ مثل الرساله االللي تكون شعورك اتجاه المرسل ...اختار رقم ... انتي قولي له وحده ارسلت لي مسج كذا وكذا وشرايك اي رقم اختار .. بيختار رقم وبترسلينه....وهي بترسل النتيجه ....انشالله يارب تكون تضحك.. بعدها قولي له طيب اختار رقم وبيكون هذا شعوري اتجاهك.... وكل الحركات هاذي بيتخللها ضحك واجواء تخليه يألفك ومايحس انك غريبه... طبعا انا قلت لك لاتناديه بكلمات دلع....هو طبعا بيستغرب... لانه بيشوفانك مو حياويه وماتتكلمين عشان كذا ماتقولي ... بيشوف انك جريئه بس بادب وحبوبه ولبقه فالكلام وجذابه ومع هذا ماتقولي له مثل هالكلمات..وانتي مابين فتره وفتره ارمي كلمه بس ماتكون قويه... يعني دلعي اسمه بس بعدم اهتمام... وانتي واقفه مثلا وكانك مشغوله قولي عبودي او حمودي...دلع اسمه اصب لك شاي كمان ...يعني يحس انك مو مركزه بردة فعله وبنفس الوقت طلعت منك الكلمه بدون شعور...ودايم الاسلوب هذا يحسسك ان صاحبه قاله زلة لسان وعبر عن اللي بقلبه....مرره قولي له بشكل سريع وانتي كانك مو منتبهه حبيبي..بيبان على وجه انه منتبه طالعيه وكانك بتقولي شي وبعدين ابتسمي ابتسامه حيااا ودلع بنفس الوقت ...........تعبت من الكتاااابه وعندي لك افكار كثيررر... وعد اكتبها لك قريب....وانشالله يعجبك شي من افكاري
|
مزعلة النساء
Game Over مو....شيء لوليا احمد hagy بيرو منير 11 olofi منسية الف شكر على الرد من جد حسستوني اني مو لوحدي وان فيه احد يساعدني واعطيتوني دفعات معنويه قويه الله لايحرمني منكم وان شاء الله يارب تشوفون كل خير وسعاده بحياتكم |
أختى العزيزة
الله يبارك لك ويسعدك أعجبنى رد الاخت جمرة كثيرا لا تحاولى الضغط على نفسك وعليه كثيرا فى البداية لانه ممكن تنعكس الامور وتملوا من بعض حاولى تأخذين رأيه فى بعض أمورك كأن تقولى له بأسلوب حلو وإبتعدى عن دلع الكثير لان بعض الازواج يحب الدلع فى حجرة النوم فقط ويكره فى مكان آخر فمن الافضل تحاولى أن تعرفى هومن أى شخصية وشو أهتماماته وهذا أهم شئ لان الرجل يحب من زوجته تحترم هوايته (مثلا اذا يحب القراءة وفى أي مجال حاولى تتثقفين فيه وناقشيه وخذى رأيه فيه أو كان يحب لعب الكرة حاولى تمدحى فريقه وسوى مفاجأه له وإلبسى له قميص او فستان بلون الفريق فى الزيارة الثانيةمنه...........لكن لا تحاولى إتبينى تلهفك عليه وخلى لك شخصية بعد عشان ما يحس إنك ما مصدقه ويبتدى يتكبر ومن صيغ الاسئلة (إهتمى بالسؤال عن أهله وخاصة والدته ولا تجيبى سيرة لعلاقة الزوجة بالحماة بتاتا أمامه ) ( بما إنك زوجى أى لون تحب ألبسه أوهل تعجبك التنورة أو الفستان لانى أحب رضاك عنى ) ( أبى آخذ رأيك فى شئ ممكن تساعدنى ) ( ابعثى له مسجات أدعية أحيانا ) بعد مده من التعارف قوليله ( حبيت فيك هاى الصفة أو مثلا حببنى فيك هذا التصرف وأحمد ربى إنى أصبحت زوجتك والله يقدرنا نسعد بعض ) وتمنياتى لك بالسعادة والوصول لهدفك إن شاء الله |
keep-In-touch
تسلمين يارب على النصايح الحلوة ويارب احاول اطبق اشياء منها واذا عندك بعد زيدي قمر شكرا على التفاعل وشكرا على النصايح والله يوفقك يارب الماستر شكرا على التعديل ..اشوى انك تكلمت قبل احوس الرجال وابوسه ويجيه ردة فعل عكسيه ويحرم مايدخل بيتنا جمره من جد من جد من جد مدري وش اقولك ردك اكثر من رائع حسيت انه هذا الشي الي اقدر اسويه لان زي ماهو مجروح وزعلان واكيد ما راح يتقبل شي مني انا بعد ما اقدر اسوي اي شي موجه لك احس اني انا بعد مقهوره منه لانه خلاني بهالموقف السخيف بس نصائحك كانت رائعه وربي لما قريتها من الفرحه حسيت نفسي بابكي يااااااارب تعيشين بسعاده وينولك ربي كل الي ببالك يارب واذا تقدرين تعطيني نصايح ثانيه اكون لك شاكره على فكره ما احد قالك انك عبقريه ؟ انا اقول :) |
الأخت /معالى 2
الف مبروك وجعل الله حضك أحسن وأجمل المهم نحن الرجال نحب الفتاه التي سوف تكون شريكة الحياة ان تكون الطباع مقاربه لطباعنا وهوايتهم مقاربه للهوايات التي نرغبها فعليك اولا معرفة الهوايات التي يحبها زوج المستقبل ومناقشته فيها والبحث عن اشياء تتعلق بهذه الهوايه وحاولي ان يكون تلك الترصفات عفويه وليست مسطنعه والله يوفقك ويميل قلبه وعقله فيك |
الله يوفقك يااخت معالي وتأكدي ان الشي هاذا موصعب ابداً بالعكس الايام تنسي الواحد كل شي وشلون لوعنده زوجه خلوقه مثلك ودامنك شاريته ثقي انه راح يكون لك اولا واخيراً000 لاكن الي ودي فيه انك تخجلينه من نفسه بطيبتك الزايده علشان تكوني له الوطن والعاصمه وانا يااختي مريت بالتجربه هاذي مع امراه لاكني اول ماخطبت بنت الحلال كرست حياتي كلها لها وصرت مااحب بالكون هاذا الاهي00000 وعلى قولة عبدالله رويشد مسألة وقت وأنسى0000
والله يوفق الجميع وانتي يامعالي وشكراً |
اختي العزيزة بصراحة موضوعك حساس جدا جدا اختي العزيزة انا كنت احب شخص طبعا حب نقي ارجوا ان تفهموني المهم ارتبطنا لمدة خمس سنوات خلال هالخمس سنوات صارت اشياء واشياء بامكانها التفرق بيننا اولا اهله خطبوا له وحدة متوسطة الجمال ولكن رفيعة المستوى لمدة شهر طبعا انا ابتعدت عنه كليا حتى اتصالاته لا ارد عليها على اساس ما اريد ادخل في دوامة الخيانة واضع نفسي مكان تلك الفتاة ولكن لم يستطع الاستمرار معها ابدا ففسخ الخطوبة وطبعا اهله عرفين السبب بس ما اهتموا خطبوا له بنت عمه خليصته في حدود شهر تم كل شيء ولكن ما فاجاني ولم اتوقعه انه طلقها خلال 10 ايام والان هو امتلكني وبرضى اهله ايضا اختي لست اقصد من هذه القصة كلها ان احطم معنوياتك ولكن نصيحتي لكي لا ترضي ان يدخل عليكي قبل ان تتاكدي من انه فعلا نسى حبيبته الاولى النسيان صعب جدا جدا بحكم اني مجربة بس اختي حاولي ان تكوني صديقته انسي انك زوجته حاولي ان تعرفي كل ما يحبه كل ما يغضبه ابحثي عن اسباب حبه لتلك الفتاة لماذا كل هذا الحب وكل هذه التضحيات من اجلها ماذا فعلت له كيف جعلته يحبها ويتعلق بها اختي تمنياتي لك بالتوفيق والسعادة ولا تستسلمي فالرجال كالاطفال !! اغرقيه بحنانك اشعريه بحبك وبصراحة انا فعلا معجبة بشجاعتك وعدم استسلامك اختي تاكدي انه انفصل عن حبيبته كليا ولم يعد يحدثها لانها قد تصعب المهمة عليك تحياتي لك |
http://www.nssaf.com/upload/5333.gif
::. برأي مو اللبس ولا الاسلوب الى راح يأثر بالرجال .:: ::. حبيبتي بأقول لك رأي وانتي مالكة نفســـك .:: .:: اذا جاكي سلمي عليــه قولي له كيف حالك .. وايش عامل .. بعد كذا قولي له انا عرفت انك مغصوب على انك تتزوجني .. بس أنا راح أخليـــك تحبــني يمكن من كثر حب الى كنت تحبها بس راح اخليــك تحبني .. .:: ::. وبعدها أسألي عنه دايماً .. كل مايتضايق كوني معــاه بتصرفك هذا راح تكبري في عيــنه صدقيني :) .:: ::. ومبروك والله يوفقكم .:: http://www.nssaf.com/upload/5333.gif |
السلام عليكم :
اتمنى اني ما تأخرت في الرد..ولكن قصتج يا اختي وكأنها الخيال بذاته وكأنها قصه تحكى لطفل في وقت نومه..انا مع الأعضاء في إلي قالوه..هذه الفتره حرجه بالنسبه لكما ومع الوقت وبإذن الله ينقلب الخيال حقيقة وتسعدي انشالله في حياتج :) |
ماشاء الله عليكي يا جمرة ...
بجد أن كيدهن لعظيم هههههههههههههههههههههه |
احم احم ...بااااك.. اول شي السلام عليكم .. ثاني شي اشوى انك عبرتيني يامعالي لاني انقهرت لما شفتك شكرتي كل اللي رادين الا انا اهئ اهئ ..بس اشوواا قلبي ماطاوعني اقفل الصفحه قبل اطمن ..ولقيتك معبرتني ...اليومين اللي فاتوا كلها وانا اتخيل وافكر ..قلبتي مخي وانا عندي اختبارات ..بس من جد حسيت ان اللي قاعد يصير معك قمممممه التحدي وممكن يصير لاي بنت...ومن يدري يمكن من حظك انك عرفتي عشان تحاولين تصلحين الوضع..المهم نرجع للحررررركات اياها...بكرا الخميس ومادري عنك وش بتسوين وكيف بتتصرفين وربي شااااايله همك...اسمعي معااالي ...طبعا احنا متفقين على حكاية انك ماتقدري تقولي له كلام حلو او تتقربي منه بالحركات الللي المفروض تكون بين الخطيب وخطيبه...فالحين بقولك شوية حركات ...تخليه يحس انك لك قيمه.. وان خطيبته مو اي بنت وخلاص... مميزه ومحبوبه ولها شخصيه جذابه...وانا اظن ان الاشياء هاذي فعلا فيك لان معرفتك للحقيقه ماهزت ثقتك بنفسك..بالعكس خلتك تتحدين عشان تكسبين الرجل اللي ربي انشالله كاتبه لك...شوفي ياستي ..طبعا انتي ماتقدري تقولي له انا محبووبه وانا شخصيه وانا .... هههههههه ..قصدي يعني لازم يكون في مواقف معينه يستننتج من خلالها الشي هذا لان هو بعقله الباطن يدور لك زله عشان يثبت لنفسه ان محد ينفع له الا الللي حبها.فيوم لما يكون عندكم...ويفضل يكون بوقت متاخر شوي ..يعني مو من اول مايجي ..ابيك من بدري تروحين محل ورد وتشترين باقة ورد رووووووعه على ذوقك...الباقه هاذي بتكون مهداه من صديقتك لك..فهمتي؟؟.. يعني خلال مانتم قاعدين مع بعض .. يرن الجرس .. دقايق الا الباب يطق عليكم مين؟؟ معالي (اي هين )والله جايه باقة ورد باسمك.. وروحي خوذيها عااااادي كانه مو شي جديد ولاشي غريب..خوذيها بهدوء.. شميها وانتي تمشين بحركات ناعمه..واجلسي قريب منه....افتحي الكرت وسوي نفسك تقرين اللي فيه..بعدم اهتمااااام..وقفلي الكرت وحطيه على طاوله قريبه.. وحطي الورد قريب منه.. بعدها بشوي سوي نفسك قايمه تجيبين اي شي او اتفقي مع احد يناديك بعد ربع ساعه تقريبا.. واحرصي انك تقفلين الباب وراك عشان هو يتطمن انه اذا قرا الكرت محد بيشوفه.. طبعا حطيه فمكان قررريب..نجي الحين للشي اللي بيكون مكتوب فالكرت..ممممم ممكن تكتبين بس طبعا مو بخطك.. الى احلى صديقه وارق اخت .. اعتذر اذا كنت ضايقتك الصبح.. واتمنى تسامحيني على اساس انها زميلتك.. او اي شي يناسبك بس مايكون تهنئه او من هالخرابيط.. لا يكون بسبب موقف معين والباقه اعتذاااار..بيحس ان لك قيمه.. الحركه هاذي من جد خطيررره ..ولها تاثير قوي على نفسيته.. على الاقل ماراح يعدي هالموقف بدون مايخليه ذيك اللليله لما يروح يفكر بينه وبين نفسه وش هالانسانه هاذي اللي لها قدر وقيمه عند صاحباتها لدرجه انهم مايعتذرون لها عادي او حتى يطنشوون..واذا تلقف وسالك عن شي..حاولي تقولين له سبب عادي .. ماتحسسيه ان في مشكله كبيره صارت ....ممممم كمان ممكن.. وقت ماتكونون مع بعض.. ويفضل تكونون مشغولين بشي..وتجيك مكالمه على جوالك..طبعا خلي اختك او اي وحده تثقين فيها تسوي معك الحركه هاذي .. ردي انتي .. وهي بتكلمك على اساس انها زميله لك اذا كنتي تدرسين او زميله فالعمل ..او صديقه اذا ماكنتي كذا او كذا..وخلي محور المكالمه هو انك مسؤله عن شي .. والشي هذا يضم مجموعه بنات بحيث انك انتي تراسينهم ويرجعون لك بكل شي ..اذا كنتي طالبه... خلي المكالمه تكون عن محاضره فالكليه مثلا .. او طبق خيري او شي منهالقبيل...واللي تكلمك تقولك مثلا الساعه كم تبينه.. ؟ ماقلتي لي سويتي الكلمه اللي بتلقينها او لا.. واي شي يجي فبالك ..وانت طبعا تردين باختصار وبكلمات تبين انتم تتكلمون عن ايش .... واذا ماكنتي طالبه او معلمه.... مممم سوي نفسك.. كانك مثلا مخططه مع مجموعه من صديقاتك انكم تسوون حفله لوحده من شلتكم تكون مفاجئه وانك انتي اللي مخططه لكل شي ...وهي تسالك مثلا جهزتي الاشياء حقت الحفله... طلبتي جاتووه؟ .. وانتي تجاوبين .. وانتي تضحكين ضحكات ناعمه.... قولي اوريك فيها بنجننها .... بجيب قالب كيك مكتوووووب فيه اسمها او معيارتها ههههههه..وبنلبس ملابس غريبه .... واللي يجي فباالك بس لاتطووولين ابد ابد فالمكالمه... هو بيسمعك طبعا .... وش بيجي فباله؟ ..... بيقول البنت حبوبه.... رومانسيه..... كلها حيااااة وخفة دم.... والشي هذا كله بينه وبين نفسه..... وانتي قيسي على هالموقف وسوي اللي يعجبك... والفكره الاساسيه انه شي يصير لك مع احد ثاني غيرررررررررره... هو يستنتج منه.. الشي اللي انتي تبين توصلينه.... يارب انك فهمتي قصدي.... تبينه يحبك؟ خليه يحس ان الناس كلها تحبك... تبينه يقدرك؟ .... خليه يحس ان لك قيمه عند ابوك واخوانك.... اذا دخل ابوك عندكم .... قومي وبوسي يده.... اذا دخل اخوك لاتسوين نفسك مستحيه... اضحكي مع اخوك وامزحي معه....خليه يحس انك مميزه بكل شي ....مررره من المراارريت .. لما يجي ... بدون اي سبب سوي نفسك تفكرين بشي شاغل بااااالك... سوي مثل حرركاته... سوي نفسك سرحانه ..وبنفس الوقت مو مطنشته.... تسولفين بس بنفس الوقت بالك مشغول ... تبتسمين ونفس الوقت... عيونك فيها نظره غريبه.... اشغلي باله .... لانك بتوصلين له ان في شي .... وبشكلك الخارجي مافيه شي .... يعني حركاتك ماتخليه يقولك وش فيك؟؟ وبيننه وبين نفسه بيكون اصلا مايبي يسالك.... بس في مثل يقووول كلن يشوف الناس بعين طبعه؟؟ خليه يحس ان في شي طبعا ابدا ابدا مو قصدي تشككينه فيك... لكن العبي باعصابه.... ولو يطلع من عندك ويسال نفسه مره وحده ياتري وش فيها؟؟.. بيكون انتصاار لك..بنفس اليوم اللي بتسوين فيه الحركه هاذي .... خلي شكلك رومانسي لآخر درجه....البسي لون فااااااتح .. ياليت يكون وردي .... والبسي حلق لولو وخلي شعرك نازل على كتوفك...وحطي بشفااايفك لمعه بس لاتحطي روج..وحطي كحل خفيييف مرره .. وشدوو وردي فاتح يكون فيه شوي لمعه....الاضاءه بتكون فيها شوي رومانسيه... خلي الجو باااارد قد ماتقدرين ...باارد = درجة الحراره حقت الغرفه.. مو درجة حرارتك انتي ..هههههههه..ابيه لما يطااالع شكلك كذا وعيونك فيها مسحت حزن... يحسك ملاك..ابيه يتمنى بينه وبين نفسه انك ترضين غروره بكلمه...او يحس انك منجذبه له وميته عليه.... يعني ابيك تصيرين السهل الممتنع... ماتحسسينه بجفاا ولا تحسسينه انك ملك يده.... خليه هو اللي يقعد يفكر ويخطط شلون يخليك تحبينه....معاااالي ادري ان افكااري مو مررتبه... يعني اطلع من جنان لرومانسيه والعكسسسس...هههههه بس اللي يجي فبالي على طول اكتبه عشان كذا اعذريني....خطرفبالي شي بس بصوره ثانيه ويدي تحكني ابي اكتبه...مممممم.. ابيك تكوني لابسه جنز... يفضل بنطلون واذا ماتبين تنووره... البسي بلوزه ستاان من درجات البرونزي او اي بلوزه تكون مع الجنز كشخه ... مو سبورر... يعني مو تيشيرت اوقميص بازرار ... والبسي حزااام ناعم الموديل اللي يجي على الورك مو على الخصر .... البسي صندل ناعم.... ومكياااجك برونزي... شعرك ملفلف بنعومه ولو مرفوع بشكل مو مرتب بيطلع احلى ... يعنى خصل نازله على وجهك بعفويه..واكسسوار كامل حلق عقد ناعم.. وخواتم فايدك...فاليوم هذا ابيه مايحس انك بنوته رومانسيه ...ابيه يحس انك كلك شبااااب..انيقه .. لك ذوق خاص باللبس حسب مزاجك... فاليوم هذا ..... ابيك تكوني جريئه مررره...المكان اللي تجلسون فيه خليه رومانسي وبنفس الوقت فيه حوسه بنت مو متعود عليها.. حوسه حلوووه.... يعني الطاوله عليها مجلااات... وشوكلاته انواع حلوه مرميه على الطاوله... جوالك.... كيس مقفل مايدري طبعا هو وش فيه.. مرايه صغيره شكلها ملفت مرطب شفاايف خاتم منزلته من يدك. ابيه يروح بجووو مايحس بالرسميه ابد ابد عشان ينعكس على نفسيته... لاتهتمين كثير بالتقديم... ولايكون تقليدي يعني شاي وقهوه...حطي اي مشروب ثاني بكاسات غريبه وشكلها شباابي ...جيبي تشكليه حلويااات ولو تكون من انوواع الجلكسي يكون احلى ... كيك شوكولا.. اي شي على ذوقك بس مايكون من الاشياء التقليديه للصغاار..خليه يحس انك اليوم مثاره.. قولي له ان كان عندك صديقاتك العصر مثلا ... بعد ماتجلسون بشووووي ... قولي انا تعبت من الكنب شرايك نجلس على الارض... افتحي التلفزيون على شي حلووو فلم آكشن .. اي شي بطريقك يطلع حلو.. سولفي عادي كانك قاعده مع احد من اصحاابك.. وانتي تاكلين وبعدم اهتماااام.. عطيه قطعه بفمه... طالعيه وسوي كانك شايفه شي على وجهه شوكولا او اي حاجه... قربي من وجهه وطالعي خده او قريب من فمه... وحطي يدك عليه كانك بتمسحينه.. وعيونك نظراتها حنونه.. ولاوصيك بالعطر الحلوووووو اللي يخلى قلبه يدق بقوووه لما تقربين منه. امسحيه وابتسمي ابتاسمه تذوب الحجر...حسسيه شوي ان مزاجك متقلب اليوم... شوي اضحكي شوي ..قولي فيني صداع باكل اسبرين... قومي بحركات متثاقله وكلها دلع.. تركي على كتفه وانتي قايمه..مممممم وربي صار فلم ههههههههه...احس الكتابه طلعت طووووويله مررره...مادري ينفع كذا ولالا... بنزل المجموعه القصصيه هاذي وبعدين اكمل ههههههه يارب تعجبك ويكون عندك الجرأه تسوينهااا
|
الجمرررررررره مدري وش اقولك اشياءك تجنن هييييييييه هيييييه احس اني مبسوطه يلا الحين بروح علشان اشوف وش اقدر اسوي منها باااااي برجع احكي لكم وش صار ادعولي باي
|
لا يوجد لدي اي شيء اضيفه
بس عايز اقول معالي انا مهجب جدا برد فعلك الله يوفقك جمره ..........؟؟؟؟؟؟؟؟؟؟؟ جمر فعلا وحراره افكارك وصلتني من الشاشه؟ الله يعينك في الأختبارات |
الحمــــد لله ان افكااري دخلت مزاجك يامعالي وحسيتي ان في شي منها قابل للتطبيق ...ويااااااااااارب انه يجي اليوم نفسه مفتوحه وووجهه مبتسم عشان يفتح نفسك .. تلعبين بحسبته وتنفذين تخطيطاتنا عليه هههههههههه...انشالله كلمايخطر فبالي شي بكتبه لك....أخوي متزوج وسعيد جدا ... مشكور على تعليقك وعلى دعوواتك.. الله يزيدك سعاده كمااان وكماان ..انا خلصت اختبارات وباقي النتيجه.. الله يستر ..ومعاالي يالدووبا لاتنسيني من دعواتك أبي انجح..عشان اتخرج من الكليه بسرررعه وأتزوووج... ماتتخيلي وش كثر ميته يصير عندي بيبي ..الشي هذا اهم من الزواج نفسه عندي ... أبي بيبي حلووو..ودبدوووب ويحبني كثير مثل ماحبه.. بيصير لعبتي ...<<<<< ياكثر احلامك... المهم يامعالي اصبري بس اروح اشرب شاي وامخمخ واررررجع لك..
|
بااااااك معالي ....مادري متى معاليك ناويه تطمنينا وش صار معك امس ... بس بما انك للحين مادخلتي اقدر استنتج انه طول بالسهره عندكم( انشالله يارب) وانك لللحين نايمه..نوم العوافي ياعرووسه.. المهم انا فكرت لك بعد باشياء تسوينها المرات الجاايه..طبعا بما انك امس صرتوا تمونون على بعض هههههه الايام الجايه ممكن تهديه شي ... بس مو هديه عاديه..يعني عطر .واشياء زي كذا ..لا هديه وبنفس الوقت مو هديه...ممم مثلا اهديه شتلة ورد... اختاريها انتي على ذووقك بس تكوون حلوه والعنايه فيها سهله... صدق بيبتلش فيها..بس عاادي ماعليك.. مره وهو طالع ودعيه عند الباب وعطيه الشتله..وعلبه من علب الهدايا شكلها حلوو وساده.. اختاري لون غامق شوي .. حطي فيها ورد مجفف بنفس لون العلبه وعطري الورد والعلبه من الداخل بنفس عطرك اللي استعملتيه .. خليه يحس لما يفتحها انك قاعده معه...وحطي فالعلبه هاذي كرت كبير شوي واكتبي فيه ..حبيبي.. أدري انك تقول بقلبك وش هالهديه اللي مالامها داعي ..بس تدري ليش انا اخترت من بين كل الهدايا شتلة الورد هذي ؟؟..لاني ابيك تحطها بغرفتك.. وكل يوم تهتم فيها وتسقيها .. ولما تكبر وتفتح...وش بتسوي فيها ...اكيد بتقطفها وتهديها لي ...أبي ورده رويتها بيدك..وعانقتها نظرراتك أياام.. وتنفست انفاسك وانت نايم..وأخيــرا بتهديها لي مع حبك...(وياويلك تقول ذبلت.. ولا تنصب علي وتجيب وحده ثانيه ترا انا معلمتها بشي وبعرف)..ووقعي بالاسم اللي تحبينه...واذا ماتبين .. ممكن تشترين عصفورين كنااري .. وقفص حلوووو وشكله رومانسي .. اضيفي عليه لمساتك..اختاري عصفورين حلوووين .. وسوي لكل واحد سلسله وتعليقه صغيررررررره ( عشان ماتضايقي العصفور) وتكتبي على كل وحده الحرف الاول من اسماءكم.. او تحطي خيط ملون عريض شوي وورق مقوى صغير وتكتبي فيه فقلم ذهبي او ريليف بيطلع احلى الحرف الاول او اذا حابه تكتبي الاسم وتعلقيه فارقاب العصافير الله يعينهم...وفالقفص نفسه جيبي علبه ..يكون شكلها ينفع للتعليق.. اربطيها بخيط فالقفص من فوق بحيث يكون متدلي بشكل حلو... العلبه هاذي حطي فيها قصاصات ورق صغيره ..واكتبي فيها..أشياء لاحظتيها عليه.... اكتبي فوحده.. ......ووحده ..تدري أني موت أحبك؟...ووحده اكتبي فيها عن عن شعورك بليله طلع من عندك وهم يضحك.. ووحده اكتبي فيها..ياثقل دمك..لاصرت رسمي ؟... واكتبي اللي يعجبك ..موقف حلو صار بينكم.. كلمه ضحتوا عليها ..بس انتبهي لاتكتبين ابد ....ليش حزين ولا ليش متضايق ...ولاعمرك تسالينه..عن شي زي كذا... خليه يحس انه هو قاعد يتعامل معك طبيعي بدون مايحس ... وانك مو حاسه بشي غريب بتصرفاته... لان هذا بينعكس على تصرفاته... قريت مرره .. ان الانسان ممكن يحزن على نفسه ..اذا شاف الناس تقوله وش فيك ولا انت تعبان ولا شفيك متضايق..وانه يتوهم فعلا انه مثلا مو قادر يسوي شي ... او ينسى شي... عشان كذا دايما عطيه الاحساس .. انه انسان طبيعي ومافي شي مكدره... وانه فاوقات كثير قدر انه يسعدك. وطبعا العلبه هاذي لاتقولين له عنها شي او تنبهينه خليه ينتبه ان في شي معلق جوا من نفسه..مره وهو طالع ..قولي له تدري ؟ انت اليوم كنت غير عن كل ليله...احس قلبي طاير من الفرحه معك... بيتأثر كثيررر.. لانه مهما كان حب البنت ذيك او تعلق فيها .. فهي تبقى بعيده يعني يكلمها يسولف معها ممكن يكون جلس معها ... بس ماعاش تفاصيل حياتها ... ماشاف ضحكتها ولمعة عيونها كل ليله... ماشم ريحة عطرها .. وحس بدفا بيدينها ونعومه بشكلها ... هذا كله شي من صالحك ولازم تستغليه ...والانسان يتاثر اكثر بالشي اللي يشوفه ويشمه ويحس فيه.. اكثر من شي يسمعه... انتي بيدينك اشياء كثيررر ممكن تستغلينها .. والفرصه قدامك مفتوحه...بما انه وافق على الخطبه وحاول انه مايبين حزنه وضيقه ... معناه انه عامل حسابه انه..لازم يتأقلم مع الوضع الجديد...دايم حاولي تتقربين منه كإنسانه اكثر من انك تكوني حبيبه... خليه اذا فكر يتركك..او حتى اذا فكر يكلم البنت ذيك او يشوفها ... انه يحس بتانيب الضمير .. على البنت العسل اللي ربي عطاه... ومو مقصره معه بشي وحلااله.. ويروح يخونها او يكدر خاطرها بشي... انتي من اول حركه تحسين انه تقبلك لو بدرجه بسيطه.. اتجرأي على طول واطلبي رقم جواله.. لاتتركين له فرصه يكلمها او يحن لها أملي كل وقته... طبعا ماراح تقولين له عطني رقمك خصوصا اذا ماطلبه... مره اتفقي مع اختك وهو موجود ترسل لك نكته حلوه ..او بيت شعر يعجبك.. وتوصلك وهو عندك... قولي جتني رساله حلوه برسلها لك .. كم رقمك..وبكذ تاخذين رقمه وخزني رقمك عنده..ولما تجي خانه الاسم.. قولي له وانتي مبتسمه.. مممم وش اكتب الاسم؟ ولا اقولك خذ انت اختارلي اسم.. وشوفي وش راح يسميك..وبنفس الوقت قولي له ... يالله انت خزن اسم لي .. وانا بخزن اسم لك بعدين كل واحد يقول للثاني وش كتب .. طبعا بيستحي على دمه وماراح يكتب اسمك حاف ..وبيتخلل هالحركه ضحكه حلوه منك ومنه .....انتظري يوم يومين اذا مارسل ولا اتصل ..ارسلي رساله فيها عتب رومانسي .. اكيد بيرسل لك وبينحرج يتصل ..لاتردي عليه برساله ولا شي طنشيه لين يزوركم مره ثانيه..واساليه برقه ..ليش مطنشني ولا خايف على فاتورتك.. وجيبيها بمزح عشان ماتحرجينه..اليوم اللي بعده ارسلي رساله الصبح مثلا وقولي له انا بنام الحين ممكن تصحيني الساعه الفلانيه.. بيرد عليك وبيقولك ايه اكيد.. بيتصل يصحيك.. كلميه بنعومه وبصوت هادي .. قولي له تصدق صوتك احلى بالجوال ..وسولفي معه بس لاتطولين عشان مايحس انك متقصده...بس اذا شفتي انه مروق وله خلق يسولف خليكي معه بالسوالف للصبح لكن ااذا كان عادي او رسمي ..لاتطولين معه..وقولي له احلى شي اني اصحى على صووتك..وقبل ماتقفلين.. قولي له بهمس .. في أمل ..تحن علي وتسمعني صوتك قبل انام....اكيد بالليل بيكون رايق وباله هادي ... خوذيه بالكلام والاسلوب الحلو للصبح...وقولي له ابيك الليله أبييييك ابي اسمع صوتك للصبح.. انشالله حتى ماتروح الدوام بكرا ...بس طبعا بانوثه...مممم وش بعد..ايه.....اذا كان داايم رسمي او مايتكلم كثير ...ومايبين عليه اذا كان مبسوط ولا لا ....طبعا ماظن بيكون عندك الجرأه تجرجرينه بالكلام لانك ماتمونين عليه بقووه.. اعرفي مشاعره من خلال كتابته... بتقوليلي كيف... انتي اكيد عندك اوتوجراف من ايام المتوسط او الثانوي ..اذا ماعندك اتصرفي اشتري جديد..وخوذي دفتر من اي وحده من صاحباتك وانقلي منه اشياء بس بعده خطوط وخلي شكله يبين انه مو جديد.. حطيه فالمجلس .. وقولي له ..هذا االاتجراف عندي من زماااان ..وسولفي معه وقولي له ماعندك واحد وخربطي عليه..بعدين قوليله وشرايك تكتب لي فيه بس لاتغش من الكتاباتك الموجوده.. اذا خذاه وبيكتب عندك قولي له لا .. خذه معك واكتب فالوقت اللي يعجبك..وجيبه معاك المره الجايه... واحرصي ان الكتابات اللي فيه ماتكون رسميه... يعني كلها مشاعر وضحك ..لانه اكيد بيقراها وبيحاول يكتب بنفس الطريقه...ولما يجيبه حسسيه انك متلهفه انك تقرين وش كتب ..واقري اللي كاتب لك وهو جنبك اذا كان كاتب شي رسمي وكلام بسيط....لاتبينين انك متضايقه او منصدمه اابد..لكن اذا كتب لك كلام رومانسي ورقيق.. ياخوفي تنزل دموعك من التأثر ..هههههه فاللحظه هاذي حسسيه وش كثر مشاعره مهمه عندك.. قولي له كلمه حلوه واطبعي على خده بوسه سغنووونه ونااعمه.. يحس انها بوسه بنت مستحيه ...مممم وش بعد...ممممم..اي تذكرت ....اذا كان عندك اخوان كبار او فسنه علاقتك فيهم قويه تجسرين عليهم مره...قولي لواحد منهم مرره انك تستحين تجلسين لحالك وان الجو دايما رسمي وحابه انه يجلس معكم... يارب يكون عندك اخ خفيف دم....خليه يجي عندكم...والعبوا مع بعض بلوت.. اومونوبولي او اي شي يحلي الجو ومايخلي الجلسه رسميه .. او يخشون جو مع بعض وانتي ساكته...شاركيهم..كمان اذا كان يجي بلبس رسمي دايما ... ثوب وشماغ... اقترحي عليه مره يجي ببنطلون وبلوزه او لبس رياضه او اي شي غير الثوب...قوليله انك حابه تشوفيه كذا...ولا ارسلي له هالكلام برساله وقولي له انا اليوم لابسه جنز وتيشيرت ومو حابه اغير لبسي .. شرايك تطقم معي ....ومن هالحرررركات...هذا اللي عندي لك اليوووم..وانشالله فيه شي يدخل مزاجك ميمي ... الله يسعدك ويوفقك يارب وتكفيييين طمنيني ولا بتوطا ببطنك..ابي اخبارك اول باول ...انا مسافره يوم الاثنين اتمنى تطمنيني عنك قبل ماروح... الله يوفقك ويكتب لك السعاده يارب .. باي
|
اختي الله يتمم عليكم بخير ويسعدكم ويهنيكم ببعض
احس انه في داخل كل رجل طفل صغير محتاج حنان وعناية واهتمام وهذا اول شي يشد الرجل للمراة خلي الابتسامة ماتفارج وجهك وحسسيه انكم بديتوا صفحة جديدة من حياتكم وانه هو كل شي بحياتك من اليوم ورايح وهمك سعادته وراحته حسسيه بلهفة اذا زاركم وشفتيه وبيني شوقك له ونفس الشي اذا جاء بيطلع وطرشيلة مسجات حلوة بين الوقت والثاني لكن لايكون فيها كلام حب ولا هيام مسجات حلوة خفيفة ومافي داعي تجيبين سيرة الحب نهائيا بهذي الفترة لانه هذي النقطة بتقلب عليه المواجع فهمتي عليي وشوي شوي بيحس فيك ولا بيستغنى عنك ورح ينسى كل شي والله يوفقكم |
جمرة وش هالجمرة انتي روعة الصراحة لا ترحمينا من طلاتك الحلوة
|
الف شكر لكل الي ردو علي
اما جمره لها شكر خاااااااص :D جمره من اليوم ورايح انتي مستشارتي ;) وان قلتي ارمي نفسك بالبحر قلت لك معصي :p ههههههههاي امزح امزح بارمي نفسي بس انتي قولي ;) مدري وش اقولك انتي انقذتيني امس كلامك اعطاني دفعه قويه ومن الصبح وانا استعد ولبست ملابس حلوة زي ماقلتي ومكياج نعوووم كله درجات البنك وشوي سموكنق على العيون ;) بس الطامه الكبرى اول ماجا انا حسيت برجفه خفت مدري ليش والي زاد الطين بله اول مادخل استقبله ابوي وسلم عليه وطلع ابوي على طول وبعدين اانا دخلت قلت السلام عليكم قال عليكم السلام ولا قام لما دخلت ولا صافحني ولا شي :( تخيلوووو :( وربي كنت بقوله برىىىىىى :mad: بس قلت بلاش وانا جالسه وساكته وهو جالس وساكت ولا قال شي واان ماقلت شي بتقولون كان حزين ؟ بقول مدري لاني ماقدرت اطالعه ولا ادري وش كان يسوي.... وانا قبل ادخل سويت الي قلتي عليه جمره وصيت صاحبتي ترسل لي رساله هذيك الي فيهات خيارات الرساله كانت اختر رقم وتعرف وش تغير فيك بالسنه الجديده وصلت الرساله وكان صوت الموبايل عالي واحنا ساكتين وبصراحه ماقدرت افتحها احس اني مصنمه واخيرا تكلم قال افتحيها طالعته لقيته مبتسم :) ومافتحتها ماقدرت قال هو افتحها انا ؟ اشرت له براسي يعني ايه اخذها وفتحها وبعدها مدري وشلون مرت اربع ساعات كنها اربع دقايق :) جمررررررررررره ياااااالله يارب انك تنولين كل الي في بالك ياااااارب ويفوقك وتنجحين وتاخذين كل الي تبينه يارب صحيح ان الاربع ساعات ماكانت مره مره هذاك الشي بس تقدم واااااااضح حسيت ان فيه امل كبير يتغير صحيح انه كان يسهم كثير ومدري ليش احس زي ماقلتي كل ماسوا شي ولا قال شي احس بعدها يجلس يلوم نفسه وانا ماقصرت سويت حركه البيبي وجبت بنت اختي وانا من جد اموت فيها والبنت تهبل وخفيفه دم حتى الي مايحب الاطفال ينهبل عليها اول ماجت اخذها بحظنه على طول وانا قربت كني اكلمها وكنت قريبه مررررره منه وسويت نفسي ابد مادري عنه ولا انتبهت له بس ماقدرت اسوي حركه التشوكليت الي احطها بجيبه مدري ليش :( بس قلت لها يلا بوسيني باستني قال هو وانا ؟ ويطالعني خلاها مبهمه ظاهريا كنه يقصد البنت تبوسه ويطالعني كنه يقول وانا انتي بوسيني قلت لها يلا بوسيه وباسته وبعدها اخذ البنت ونزلها من حظنه ورجع جلس على الكنبه :mad: وسوا رسمي بالعربي اليوم كله كن عنده انفصام بالشخصيه مره طيووووب ومره يكش ويرجع رسمي بس صح هالاشياء معناتها فيه امل كبير صح؟ على فكره لما طلع ماسلم علي قال يلا باي ولا حتى صافحني ولا شي قال يلا لازم اروح تاخرت مع السلامه سلمي على الوالده وطلع بسرعه :confused: قلت له باي حسيت انه لو ماهو يبتدي باشياء كثير انا ما راح اتحرك جمره ارجع اقول الله يوفقك حركه البنت الصغيره ورساله الجوال سوت المستحيل اتخيل وش كان بيصير من دونها كان دخل وطلع ولا قلنا ربع كلمه |
النصيحه لكي ولكل بنت او امرأة متزوجة
اقرأي نصيحة الاعرابية لابنتها في ليلة عرسها كوني له امة يكون لكي عبدا تطيبي له لايجد منكي الا الابتسامه والكلمة الجميلة حسسيه برجولته وبأنه كل الدنيا بالنسبة لكي اجعليه يغرق في بحر حبكي حتى لايلتفت لغيركي دائما قولي له كلام حب وبأنكي تدعين الله بأن يوفقه وان لايحرمكي منه ومن حبه لااعتقد بان اية فتاة تحتاج الى توجيه لكي تحب فالفتيات والنساء والاناث هن نبع الحنان وبحر العواطف وفقكي الله مع زوجكي |
الله يوفقك يارب يا معالي ...
بصراحة انا اول شي كنت مشتاق اعرف ايش صار معاكي ...لكن بعدين صرت مشتاق اشوف ايش تخطط لك جمرة بعد ههههههههههههههههههههه جمرة ...سمي نفسك داهية (من الدهاء ) مو جمرة :) |
على فكرة...مليون بالمية رح يحبك يا معالي لسببين ..
الاول انك ماشاء الله عليكي تسوين اي شي علشان يحبك ..والثاني ان جمرة تخطط لك :) بالنسبة للأشياء اللي ما قدرتي تسوينها ...المرة الجاية بتقدرين انشاء الله لنك تكوني تعودتي عليه اكثر :) |
| الساعة الآن 05:10 PM. |
Powered by vBulletin® Version 3.8.7
Copyright ©2000 - 2026, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©