|
بالله فسروا لي اللي صار معي ... مهــــــــــــــــم
بسم الله الرحمن الرحيم
طبعا مثل ما أنتم عارفين الله سبحانه وفقني بعد طول عناء ورزقني بخطيبه الحمد لله ما أسمع عنها إلا كل خير ولا اسمع عن أهلها أو أقاربها إلا كل خير .. لكن بعد رؤيتي للبنت وموافقتي طلبت منهم أن الوالدة تشوفها قالوا أن البنت ( تستحي ) ، طبعا أنا اتوترت كثير لأن الوالدة حساسة بقوة ويضيق صدرها من هالأمر أنها ما تشوف خطيبة ولدها فحاولت بجميع الطرق المشروعة وغير المشروعة أن الوالدة تشوفها ولكن الله سبحانه ماكتب أني اوريها والدتي .. البنت تدرس بأحد الدور القرآنية وكان عندهم طبق خيري حاولت أدري متى وللأسف أنه فات ولا كان خليت الوالدة تشوفها وتتطمن .. الوالدة قلّ حماسها وأحسها مب فرحانه مررة بزواجي مع أنه تتظاهر أن هي فرحانه مع العلم أنه أنا الولد الأول لها .. أنا حقيقة استغربت من تصرف أهل البنت كيف يسمحون لبنتهم بهالرفض غير المبرر بغير الحياء كيف تدخل علي أنا الرجال وتستحي من أمي وبعدين أمي خلاص الحين صارت خالتها المفترض هي تقول أبغى أشوف خالتي ... البنت عاقله ورزينه ولا أتوقع منها هالتصرف ، أخوها أحد المشايخ المعروفين للجميع هنا وبالتأكيد يرفض مثل هالتصرف ، أمها إنسانه كبيرة بالسن وفاهمه الأمور إلا أنها تتعذر من الوالدة بشكل يخلي الوالدة تستحي منها .. ! طبعا المشكلة أن الوالدة الله يحفظها ( ومن حقها ) أخذت انطباع من هالتصرف أنه ( انعدام ) تقدير منهم لها ومرة تقول والله فعلا يمكن البنت رافضه الشوفة فما أدري أنا الحقيقة أبغى منكم تفسير لها المشكلة الله يبارك فيكم |
بصراحة حتى أنا لا أجد مبررا على تمنع خطيبتك من رؤية والدتك لها ..
لا أدري كيف العادات لديكم .. ولكن عندنا تذهب الام مع ولدها عند التقدم للخطبة .. فتجلس النساء في غرفة والرجال في غرفة أخرى .. وتجلس الخطيبة مع النساء ثم تدخل على الرجال للنظرة الشرعية .. وضروري بعد الموافقة تذهب الوالدة مرة أخرى لكي تتفق مع والدة الخطيبة على أمور الزواج و المهر والحفلة .. إلخ .. كلمة الأم مهمة جدا في خطبة ولدها .. |
الأخت بحرينية
أهلا بكـ طبعا أحنا قصمان ، ومن عادتنا أن المهر من 40000 إلى 50000 ولا أحد يتشرط وفي أحيان يقل قليلا عن الأربعين .. وعموما ما ذكرتيه من ذهاب الأم مع الخاطب صحيح وكان هذا معي في خطبة سابقة ولكن هؤلاء لا أدري حقيقة ما طريقتهم مع أنهم ناس طيبين لأبعد الحدود .. مشكورة أخت بحرينية |
اولا الف مبروك والله يوفقكم ياااااااارب
وبعدين أنا معك ان اهل خطيبتك غلطو والمفروض يحترمون أمك مهما كان حياء البنت لكن أنا اتوقع إن البنت مالها ذنب يعني من أهلها ممكن بعد عقد النكاح (الملكه) تخلي أمك تشوفها بقولك عن زوجه اخوي طبعا إحنا ماشفناها بس اخوي راح وشافها وبعد الملكه قالت أمي اكلمها ابارك لها قلنا لها لا أكيد بتنحرج منك اما حنا ياخوات العريس كلمنها وعادي لكنها تستحي من أمي وبعد الزواج ماشاء الله عليها كانها واحده من بناتها لايضيق صدرك ياخوي والموضوع بسيط والحياء ذابحنا كلنا يالبنات بالتوفيق |
لحن السعادة
الله يبارك فيكي يارب زوجت أخوك ماشفتوها ابد لا أنتم ولا الوالدة إلا بليلة العرس .. ؟ |
اقتباس:
زوجة أخوي شفناها لما رحنا نودي لها الشبكه وأمي عادي ماقالت أبي أشوفها لما راح اخوي يشوفها وعادة مانشوف العرايس الا بوقت الشبكه لكن الخطبه هو الي يروح بس لان عادتنا الخطبه الرسميه رجال بس حاول تاخذ بخاطر امك وقل لها معليش يمكن فعلا مستحيه تخبرين هالبنات ومن هذا القبيل عشان ماتزعل بس في نفس الوقت قل تراهم غلطانين عشان ماتقول تدافع عنهم من الحين وتاخذ بخاطرهاا الله يفرجها لك ياااااااااااارب |
والله ياأخوي غريبة.. ومن حق أمك تشوفها الا لازم تشوفها
الحين دخلت عليك انت يالرجال والحرمة تستحي منها!! انا ماظنيت أنه حيا أبد.. الله اكبر تعتبرها جارتهم مثلا بقولك شغلة اخوي لما خطبنا له اولا شفتها مع امي ثم هو راح شافها يوم تملكو وبغى يروح اخوي يلبسها الشبكة قالت امي بنجي مع ولدنا قالت امه والله البنت تستحي ماله داعي تجون خلاص هو يجي وبس! قالت امي نبي نشوف ولدنا وهو يلبسها الشبكة بنجي بنجي << تعجبني أمي ورحنا وأخواتي وطار اخوي فينا لأنه كان شايل هم اول دقايق بيجلس معها ولطفنا احنا الجو معه تبي رايي ياأخوي تدق امك علي امها وتقول والله الولد يقول روحي تعرفي على أهلها وشوفي البنت واهلها وترى هذا زواج وتقارب بين عائلتين لازم نشوف بعض وابي أشوف مرة ولدي صدقني بتخاف امها انك تهون وتقنعها!! وخل امك تصر على كلامها ياعمري اميمتك حاسة فيها والله تلقى قلبها يفرك ودها تشوفها مالومها والله واذا ماضبطت هالطريقة خلها تروح للدار وتسأل المديرة عنها عااااااااااادي ماهو عيب ابد وتشوفها لو من بعيد << مع ان الحركة الأولى أفضل في حق امك وان شاءالله تشوفها وتعجبها وربي يسهل عليك وعلينا ياحي ياقيوم |
لحن السعادة : مــــشكورة عالمرور ..
شوبارد : بصراحة أنا ماكتبت الموضوع إلا بعد مااستنفذت أنا ووالدتي الحيلة وعلى فكرة أنا كنت البارح مع أخوها الكبير بعطيه المهر وقبل لا أروح له قلت للوالدة بقول له لأنه إنسان فاهم فهي حلفت علي قالت والله ماتقول له وتقول امي أن أم البنت تقول أن فلان تعني أخوها قال لها بس رفضت .. والدار كان حفلهم الختامي مع الطبق الخيري قبل البارح وأنا ماتصدقين كيف كانت وناستي يوم دريت أن الدار عندهم حفل لكن للأسف كان علمنا بالحفل متأخر وكنت أتمنى أن أمي تشوفها .. ومازلت أفكر بطريقة أخلي الوالدة تشوفها .. عموما مشكورة على مرورك وأنسابي الجديدين ذولا رغم طيبتهم وأخلاقهم ودينهم لكن تصرفهم هذا غريب بالمررة . أتمنى أي شخص زي حالتي يعطيني حلول .. ؟ |
قول لهم أمي بتجييكم بتجيب المهر ..
|
هلا والله بولد ديرتي 00شف ونا اختك 00 الشغله واضحه 00 هم مايبون امك تشوف بنتهم 00 يمكن بعتقادهم
ان الحريم يرخبن الخطبه 00 لأن نظرة الام او الاخت تختلف عن الرجل وهم يخافون ماتجوز لمك البنت وامن تهون بس خلي امك تدق عليهم وتصر انها تشوفها من باب التعارف وتقولهم خلاص اولدي مقتنع بنتكم لكن انا بجي اسلم وتعرف بس واذا وافقوا خلها تاخذ معها حلا او هديه:d |
رفضهم هذا يجيب الشك
لما شفت البنت في الشووفه الشرعيه هل تكلمت معاها ؟ يمكن فيها شئ وخايفين امك تكتشفه؟؟ ما ابغى ادخل الشك في نفسك لكن الامر محير خصوصا ان الشوفه اذا كانت سريعه وفي وجود ناس كثير من محارمها ماراح تديك الفرصه في انك تشوفها تمام او تتكلم معاها لازم امك ترووح وتشوفها تمام ... وهذا من حقها والاصول كذا لييش الرفض؟؟؟؟؟ في الاخير الله يكتب لك اللي فيه الخير تحياتي لك وبالتوفيق |
اقتباس:
لأني حسب ما قرأت الكثير من المواضيع هنا ,, فالكثير من الزواجات تلغى لأن نظرة الأم أو الأخت تختلف عن نظرة الرجل للمرأة .. ومن الممكن أن تشتري أنت هدية باسم الوالدة لكي تذهب وتقدمها بنفسها وترى خطيبتك ,, وقل لهم أن والدتك ستراها سواء الآن أو فيما بعد ,, فما المانع من أن تراها الآن .. نحن الفتيات لا نخجل لهذه الدرجة من مواجهة النساء :d وفقك الله أخي |
قول لهم بالحرف الواحد يا أما أمى تشوف البنت يا أما اللى ما يبغى أمك أنت ما تبغاه
بالفعل حق أمك تتأثر و خاصة أنك ابنها الأول |
وش هذا الله يهديك
تدخل هذي الأفكار براس الرجال رفضهم هذا يجيب الشك يمكن فيها شيء وخايفين أمك تكتشفه اخوي أنت تقول أنكم قصمان حنا حولكم بقولك كيف تفكير البنات ألان أن البنت بتتزوج الوالد ما راح تتزوج أمه أو خواتة يعني الرأي المهم رأي الزوج و شوفة الأهل مو ضرورية مهي قطعة أثاث كل واحد يطالعها شوي هي بتتزوج واحد مو العائلة كله بقولك عن طبيعتنا الزوج يشوف البنت فقط وأمه ماله داعي البنت تستحي تطلع له بقولك عداد البنات إلى تزوجوا من سنتين بالعائلة 8 بنات والله ولا واحده شافتها أم الزوج ولا تعرف شكله لا بعد الزواج نكتفي بشوفة الزوج وكافي كانت العائلة أزواجهم عادي عندهم ألا بنت عمتي طلبت أم زوجها انه تشوفة والله رفضت بنت عمتي وقلت إذا فيه شوفه الزوج فقط لكن الأهل لا مع انه والله حلو مو خايفه من شيء تفكيره صحية ماله داعي شوفة ألام اخو زوجي زواجه بالا جازه الماضي الخطبة كانت ثلاث سنوات والله ما شافها احد من العائلة ألا واحده من خواته بالكلية تدرس معه كافي شوفة الزوج يا خوي لا تتضايق ولا يدخل الشك براسك رفض البنت شيء طبيعي وأمك مقدره هذا لأنه طبع كثير من الناس بعد الزواج بتمل أمك من شوفتها آن شالله لا يضيق خاطرك هذي أحلا أيام العمر اخي أسأل الله الذي لن تطيب الدنيا إلا بذكره.. ولن تطيب الآخرة إلا بعفوه.. ولن تطيب الجنة إلا برؤيته.. ان يوفقك بحياتك ..ويجعل حياتك سعاده ..ويجعله قرة عينك.. ويسخر لك ..ويرزقك الذرية الصالحه |
اقتباس:
وش الظلم هذا من قال انهم مايبون امه رفضهم كثير من العائلة تسويه الحين والله مو رخص بامه او انهم مايبونها بس ينظرون ان شوفتها مو مهم كافي الزوج حرام عليك تفرق بين زوجين الله يهديك بس |
فعلا ً أنا أتوقع إنه رفضها شي معتاد عليه بعائلتهم وماتبي تكون غيرهم
ولو إنه عندكم ماحبيتوا هالتصرف صدقني أخوي صالح أنا أتوقع إنه مثل ماقالت ريفان عادة عندهم ويمكن تلقاهم استغربوا طلبكم مثل ماانتم استغربتوا رفضهم أتوقـــع كذا وبما إنك شفتها وعارف عنها كل شي يعني مافيه شي ممكن تخاف منه فااا كل شي بعده أحسه يهون الله يطمن قلبك وقلب أميمتك ويسخركم لبعض ويوفقكم |
يارب لك الحمد والشكر
الله يتمم عليك اخوي ويألف بين قلوبكم انا اقولك حركه حلوه خلي امك تعزمهم في بيتكم للتعارف ولاتجيبوا سيرة امي تبغا تشوفها ولاشي خلوها زياره بسيطه اخواتك وامك واخواتها وامها يجتمعوا عندكم على العشاء للتعارف بتكون سهره لطيفه وبكذا امك تشوفها وتشبعوا منها. احنا كذا زوجة ولد خالتي بعد الملكه خالتي عزمة العروس وامها واخواتها في بيتها واحنا جينا بحكم العلاقه القويه بينا مع خالتي والله ذاك اليوم كانت السهره مررره لطيفه والعروس تسولف وتضحك وخالتي شافتها وشبعت منها بعد جربوا هذي الحركه وان شاء الله تضبط هالمره كل المسأله حياء لاغير وربي يتمم عليكم ويألف بين قلوبكم وييسر أمركم والله اني فرحت لك من كل قلبي اختك في الله |
مع إني فرحت بخطبتك
بس بجد تصرفهم غريب والأغرب رد فعل أمك الله يعطيها العافية ماودها تضايقك الله ييسر أمرك اللي أعرفه أي عروس تحب تشوف خالتها بس تتمنع غريبه ؟!!! أهم شي الله ييسرها لك ومايكون فيه سبب ثاني .... بالتوفيق |
السلام عليكم
أما سمعتى يا أخت ريفان أنه قال أمه متضايقة و ماهى فرحانة يعنى نفسيا متأثرة من الموقف و الأم هيا اللى بتكون متلهفة على شوفت عروسة ابنها و خاصة إذا كان البكر و أنا ما أفرق بين زوجين هما أصلا ما تزوجوا فاهمة و لسا فيه أخذ و عطا لو أخى مكانه ماراح يوافق على هذا التصرف لأنه بمجتمعنا مش مقبول و تعتذر بالحياء هذا أبدا بالنسبة لى غير مبرر قولى وش فرحة الأم فرحتها بشوفة ابنها و عروسه لما تروح و تشوف عروسه و تختارها هى و تقول رأيها فيها |
هلا صالح بن صالح
بما اننا من اصل واحد (قصمان) فاكيد عادتنا وحدة وبقولك ايش اللي حصل لاختي,, بما انه زوجها ما يقرب لنا ابدا ابدا,, اهله (الحريم) ما شافوا اختي إلا يوم الملكة (الحفلة) بصراحة اشوف انه امك ما تشوف العروسة طبيعي لان لسسا السالفة خطبة ,, والخطبة شكلها ما كانت من جهه والدتك,, وطبيعي البنت ترفض بسبب حيائها ,, صراحة لو كنت مكانها بسوي نفس الشي,, الا اذا شفتها بعزيمة ولا حفلة ,, هذا شي ثاني :) والله يوفقك يارب .. انت ملك عليها بسرعه عشان امك تشوفها و تنحل :) والله يوفقك يارب |
هل انت متأكد ان البنت ما فيها عيوب خلقية
بعضهم يرفضون لأنهم خايفين تكتشف الأم بعض العيوب اللي ما شافها الخاطب * * أخوي فعلا يحز في نفس الأم الا ترى خطيبة ولدها المفروض انت تسوي حشيمة لأمك وقدر وتخليها اهي تخطب لك مو انت اللي تخطب من نفسك الحين ضروري تسوي مكانة لوالدتك عندهم الله يوفقك . |
ما أدري كيف أقول لكم ( ثانكيو من أعماق قلبي )
الحقيقة ردودكم أثلجت صدري .. !! حبايبي / البنت مافيها إلا كل خير وعلى فكرة البنت قعدت عندي يوم الشوفة وتمقلتها وناظرتها وتركوها عندي لحد ماقلت لأخوها ( خلاص خليها تروح ) .. رفضهم ليس لعيب في البنت وهو في الأصل من عادتهم أن الحريم ما يشفوفن الرجل اللي يشوف ( عادة بعض العوائل ) لكن بعد الخطبة وبعد ما يشوف الرجال الأم تزور وتشوف خطيبة ولدها .. والدتي بالفعل متضايقه وحاسه ( الله يخليها أنه الحركة منهم شينة بحقها ) لكن برضه كل البارح وأنا أطق في راسها اقول خليني اقول لأخوها وآمر عليه أمر أنا أبغاكي تشوفين خطيبتي تقول لي لا خلاص قالوا البنت تستحي خلاص والبنت مدحوها لي وقعدت تسألني عن شكلها ووصفتها توصيف دقيق لأمي .. وأبشركم البارح حست ( أنها يوم ما شافت خطيبتي ) أنه هذا صار جمرة (بتسبدي ) ووالله العظيم راحت هي الله يحفظها تعلمني عن بعض الأقارب اللي أمهاتهم ماشافوا زوجاتهم .. تصدقون عاد أنا أحس أن الفرحة ماتمت وأمي ما شافت خطيبتي أحس فيه شي كبير ناقص أحس الفرحة فيها فجوة كبيرة .. عموما الله ييسر وبإذن الله أنا متفائل أنه أمي راح تشوفها اليومين ذولي .. أخيرا صدق الدنيا كلها غثا وغرابيل كنت أحس أنه أنا لما بلقى الحرمة وأخطب وأنتهي بتنتهي مشاكلي أثاريها توها تبدأ المشاكل .. .................................. ثانيكو ومرسي أوي من أعماق قلبي .. |
| الساعة الآن 04:24 AM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©