|
oO نوعية الرجال لدى الخاطبات Oo
بسم الله الرحمن الرحيم
ودي أستشيركم بأمر بديت فيه بس خايفه منه وأبي مشورتكم ونصيحتكم بصراحه بعد ما شفت الوالد يرفض الأشخاص بحجج مختلفه حاولت آخذ منه التصور ألي بباله عن الشخص المرغوب وفكرة أني أوصي قريبة لي تتصل على خطابه وتطلب منها شاب يجمع ألي نبيه اثنينا ( أنا و أبوي ) والمواصفات شاب قبيلي لم يسبق له الزواج ملتزم ويكون جامعي وللأسف كل ألي عندها متزوجين أو مطلقين أو عزاب مستواهم التعليمي أقل من الجامعي بصراحه احترت جداً !! أصلاً فكرة الخاطبه إلى الآن لم تدخل عقلي .. أولاً خشية من نظرة الرجل للفتاة التي تضع أسمها عند خاطبه ثانياً خوفاً من الرجال ألي عندها ( لا أدري سببه ) ثالثاً أخشى كذب الخاطبه علينا في أمر وأكتشف خلافه وقبل هذا كله أحس نظرتي لنفسي تغيرت ، معقوله أسمح لنفسي بهالتصرف كيف أبحث لي عن زوج << وربي أحسها قووويه بعدين بصراحه كنت أتمنى شاب لم يتزوج قبل أبداً والآن أرى نفسي أفكر في متزوج ومطلق !! ثم أنني كنت أفكر في شاب ملتزم(ملتحي،لا يدخن،محافظ على الصلاة في المسجد،غير مسبل للثوب،يكره الدش ...) و أفضل كونه إمام مسجد .... والآن وجدت نفسي أفكر بالحليق !! لا حول ولا قوة إلا بالله أنتظر رأيكم في الموضوع أدري دخلت مواضيع على بعضهاااا لكن أستحملوني شوي الله يجزاكم خير أزيلوا حيرتي فهل أستمر في الطريق أم أنتظر الرزق من غير جهد مني !! ولا تنسوني من الدعـــــاء بارك الله فيكم |
أختي الفاضلة oOعبير الرياضOo
من أبسط حقوقك أن تتمني الزوج الصالح وتبحثي عنه شاب ملتزم (ملتحي،لا يدخن،محافظ على الصلاة في المسجد،غير مسبل للثوب،يكره الدش ...) الله يكثر من أمثالك هذا والله مانتمناه في أخواتنا الطيبات أمثالك اللاتي وعدهن الله جل وعلا بأن يزوجهن الطيبين ( الطيبات للطيبون ) فكوني يارعاك الله على ثقة كبيرة بوعد خالقك ورازقك . مقدر الأقدار وعالم الخفايا سبحانه أنتِ أختي الكريمة ترين الآن أنه من الصعب عليك ان تجدي شخص يتصف بماتتمنيه فكوني وسطا بين ذلك . سددي وقاربي لايمنع ألا تقبلي إلا الرجل الصالح وهذا ماأراده منك الحبيب صلى الله عليه وسلم من رأيي أن تبقي على صلة بالخاطبة حتى تجد الرجل المناسب الذي تقر به عينك لاتيأسي وعليك بالدعاء الجاد وبإلحاح وتضرع إلى الله تعالى والخاطبة مافيها شيء هي وسيط خير لاأكثر ولكن مع التحري والسؤال عن الخاطب وسيرته ودينه وأخلاقه وبلا شك فالاستخارة لها دور كبير والله يوفقك ويتولاك برعايته |
انا حاليلا افكر بامر الخطابه لكن فعلا متردده
اقول في نفسي كيف بينظر لي بعد الزواج ؟ وكذلك ماتهون نفسي اني ادور على زوج اتمنى يجي بروحه وكذلك الخاطبات لازم تضمن حقها من الطرفين تبي ربح مادي مني ومن الرجال يعني ماضمنها ابداا؟ انتي عمرك 24 العمر قدامك لو تصبري يكون افضل انا عمري 27 وعلى مشارف ال 28 لكن الارجح اني بحذف امر الخطابه من بالي ورزقنا على الله ونتوكل على الله الله يرزقنا اجمعيييييين |
بالعكس ياعبير خطوة جيدة
فعلتي السبب وتوكلي على ربك أولا ً وأخيرا ً ليش تقولين أحسها قوووية ؟! إنت ِ لما تختارين خاطبة معروفة بالصلاح والنية الصادقة ( تعرفينها من خلال كلامها ورأيها لك ) ومن يقول إنه الرجل ممكن يعرف إنك إنت ِ اللي تقدمتي لها بنفسك ؟! هي ماراح تقولها عندي بنت مكلمتني وتبي كذا وكذا راح تقولي مثل كل الخاطبات عندي لك بنت كذا وكذا ومستحيل تقول إنك إنت ِ اللي طالبة هذا الشي تدرين ياعبير كم مره تدق على أمي خاطبة وتسألها أمي كيف عرفتينا ؟ تقول ناس أجودين دلونا عليكم !! مع إنه أمي ولا أنا قد دقيت عليه خاطبة فاأكيد إنه فيه ناس ذاكريني لها وأنا مادريت وهذولا الناس أكيد يعرفوني فهمتي علي ياعبير ؟! يعني مش شرط حتى لو ربي كتب شي إنك تقولين هذا الشي لزوجك أصلا ً ميين بيسألك عن هالشي وقتها ؟ حتى إحساسك الداخلي بالعكس ارفعي راسك وافرحي بنفسك إنت ِ طلبتي الحلااااال ورحتي تدورين عليه وتركتي كل شي يغضب الله مع إنه متوفر لنا كلنا لو بغينا هذا شي صح ؟ أيام الرسول صلى الله عليه وسلم كانت بعض النساء تعرض نفسها على الرسول وتسأله ألك بي حاجة ؟ وإذا جاوبها بالنفي يعرض طلبها بنفسه على الصحابة مع إني أعرف الفرق بين أيامنا وأيام الرسول اللهم صلي عليه وسلم ولكن نطمح لأن يكون لنا قدوة أنا معك ياعبير إذا إنك قادرة تكلمين أحد أو توصين أحد ثقة عنك وبإذن الله ربي يكتب لك الخير وإذا على الخوف من الرجل إنت ِ ماراح تتزوجينه بدون سؤال من أهلك بتسألووون وبتتقصون عنه القريب والبعيد والكفو الله يوفقك معه الله يرزقك ويروقنا ويفرج علينا همومنا إنه رحيــم سميع الدعاء |
وكلي امرك لله سبحانه و تعالى و تضرعي لله وحده
و انشاء الله يرزقك بالزوج الصالح ... كثري من الالحاح لله سبحانه و انه الوحيد القادر على تفريج همومك و الله يوفقك و يرزقك ... |
al7olm6 أشكرك جداً على رأيك
أنا أشعر بأن الغالب في الخاطبات همهن جمع المال فقط ولا يهمهن بأي وسيلة كانت هذا الجمع ثم أنني أشك بأن الشاب الملتزم سيعتمد على خاطبه في البحث له !! بل سيلجئ إلى والدته أو إمام الحي أو رجل ثقه يعرفه شخصياً وهذا ما يقلقني فعلاً وصلني أن إحدى الخاطبات لديها شاب مطلق طبعا تقول بأنه غير مدخن وهذا دليل على إلتزامه !! وما أدري أحس بحيره هل سأصل إلى مرادي عن طريق خاطبه أم أنه تضييع وقت لا أكثر ويبقى الأمل صدقتي الرزق بيد الله لكن لا بأس من فعل السبب لكن ما يحيرني أن نفسي تستنكر ما أقوم به فأخشى أن يكون له أثر مستقبلاً وفقك الله لكل خير ورزقك من فضله |
غاليه الله يجزاك الجنه كلامك يبرد القلب والله أنك صادقه في كلامك
حتى أنا حرصت على قريبتي أنها ماتخلي الخطابه تشك أني أعرف شيء عن الموضوع يعني كأنه من نفسها فعل هالشيء بس عن السؤال عنه فخوفي بسبب أن نظرة أبوي تختلف عني تماما يعني هو يتمنى شخص غير متشدد يعني نص و نص ( وسط في إلتزامه مثل ما يقول ) و أنا أتمناه انسان صالح بمعنى الكلمه فكان ودي مايعرفون أهلي عن شيء ألين أتأكد من إلتزامه وهذا صعب من غير سؤال الخاطبه نفسها لأن ماعندي أحد يسأل غير أبوي هذا ان سأل عن دينه الله يكتب ألي فيه الخير |
و الله يا اخيتي المشكلة في أنك تريدين شابا ملتزما بارك الله فيك و والدك الكريم يريد شخصا وسطا ..
كيف يتم الحصول على هكذا صفات؟ ربما باقناع والدك .. ثم زيارة الأماكن التي يمكن ان تيسر هذا الأمر كالمساجد و التعرف على النساء فيه .. بصراحة شيء يحير ... انا أتكلم عن نفسي و عن عادات أهلي فهم لا يقتنعون بالخطابات و ماشابه إلا أنهم يقتنعون بفكرة عدم التقوقع و السعي في الأمر بنفسي كأن أحضر المناسبات ... الخ , لكني اتصور اذا كنت غير مقتنعة و خائفة من هذه الوسيلة فلا تستمري .. فكيف تبدائي حياة جديدة و انت خائفة من ردة فعله .. مجرد فكرة اختي .. ماعليك سوى الاستخارة و الدعاء الدائم وفقك الله اخيتي .. |
بالعكس مو عيب لانه انتي تبحثي عن الحلال والستر وربنا ان شاء الله بيرزقك باللي تتمنيه وافضل
والله انا اؤيدك ... الله يوفقك وتبشرينا بخبر خطوبتك |
أختى الفاضلة عبير أثبتِ على مواصفاتك رحمك الله و أعطاك ما تتمنين
و لا تنقصي من نفسك حيث أنك ستسعينين بخاطبة لا و ربي فأنت تقيمين نفسك أكثر من غيرك تريدين لها الستر و الحلال و لا يوجد في نظري أرقى من هذا (ما شاء الله) أخيتي ...فقط نصيحة استعيني بخاطبة ثقة (يعني ابحثي عن خاطبة ملتزمة جدا ...ستصدقك القول و سيكون فِعلها طلبا في الثواب و ليس في المال فقط !) أسأل الله لك التوفيق |
بما انك من الرياض اذن بساعدك لأني عايشة بنفس مجتمعك
الرجال وش يعرفه انك حاطة اسمك عند خطابة؟ ترى الخطابات يروحون لمدارس لجامعات لزواجات وياخذون ارقام البنات يعني ماهو شرط انت دقيتي عليها وبعدين الخطابة ماتمدح الرجال ولو فرضا مدحته لاتاخذين بكلامها خذي اسمه ومن وين وش اصله حتى شغله لاتسألينها ماعندها علم من كثر الرجال اللي عندها وهي تاخذ اسمك ومواصفاتك الشكلية ومن وين واذا كلمت اهل الخاطب وانت ناسبتيهم يدقون عليكم عادي وخذو المعلومات من بعض وابدأو أسألو انتم هنا ينتهي دور الخطابة الا ان كان تعطينها مبلغ بس! والله اخوي متزوج عن طريق خطابة وامورهم ماشاءالله تمام التمام انا مثلك مااحبهم أحس اني استعرض نفسي لكن لابد أن تبذل الأسباب موفقة يالغالية |
ليس عندي ما اضيفه على ماطرحه الاخوة والاخوات ولكن مجرد تسجيل وقفه معك اختي عبير الرياض .
اصبري وصابري واحتسبي نفسك عندك الله واهم شيء في اختيار الزوج هو الاخلاق ..واحيلك الى موضوع كتبته في عالم المقبلين على الزواج تحت عنوان ( احذري ........الاخلاق قبل كل شيء ) فارجوا ان تستفيدين من هذا الموضوع .. تحياتي. |
نفس حالتك ... كنت اشترط الدين واللحية ... والجامعي ...
لكن مع العمر ومع تقدم العمر خلاص تبدأ التنازلات ... شيئاً فشيئا ..!! اللي كنت أطلبه أمس اليوم خلاص مسحته من ذهني ... اما سالفة الخطابات ... فما أحبهم مرة خطابة كلمتني ... وأنا اساسا لم اسجل عندها اسمي كلمت والدتي واخذت رقمي ... بصراحة لقيت عليها كذبات رحت قلت لها : الحمدلله ربي سهل أمري ... وخلاص لا عاد تدورين لي فهمت اني راح اتزوج قريبا ... لقيتها تعرف كثير من زميلاتي ... وجلست تتكلم عنهم وعن ظروفهم بصراحة فضيحه ...!! اسأل الله ان يغنينا عنهن ولا يكلنا إليهن ... . . . . . . . بنان |
انا صار لي فترة عند الخطابات بعد ما دخلت الثلاثين
والله ما عندها الا اردى الناس طبعا كنت رافضة المتزوج وابي مطلق وفعلا حصلت مطلق لكن بعد السؤال عنه طلع مجرم بكل ما تعنيه هالكلمة له سوابق قلت ليش اخذ مطلق لان المطلق عنده اهله يدورون له خاصة ان المطلق يعتبر نفسه كالاعزب قلت اقبل بالمتزوج لاني فكرت فيها عدل قلت مادام زوجته صابرة عليه على الاقل اضمن انه مو راعي خمر ولا بنات ولا مخدرات ولا يضرب زوجته ولا عنده سوابق ولا عقيم لان لو كان كذلك لكانت زوجته طلبت منه الطلاق والمطلقين عن طريق الخطابة تخافين منهم لان احتمال كبير زوجته ما طلبت الطلاق الا لسبب قوي كأن يكون سكير او راعي بنات او مخدرات او عنده سوابق او عقيم او يضرب زوجته لذلك تجدينه يبحث عن طريق خطابة اما المتزوج اضمن انه ما يوجد به تلك البلاوي لكن للاسف اغلب المتزوجين يدورون زواج مسيار او زواج بدون علم زوجته وتعرفين شنو يعني بدون علم زوجته يعني كأنه زواج باالسر او مسيار هذيلي تعرفينهم بسهولة لانهم يرفضون خطبة الحريم ويقول يكفي حضوري للخطبة واذا قبلتي تحملي النتيجة مادام زوجته ما تدري عن الزواج اذن سيحلرص على عدم المبيت حتى لا تشك زوجته حتى الطلعات ما يطلع معاك يخاف احد يشوفه ويوصل الخبر لزوجته وربما سينكشف الامر في احد المرات وتزعل زوجته وتهدده بطلب الطلاق والنفقة وعدم رؤية الابناء الا اذا طلقك عندها ستكونين الضحية لهذا السبب لم اجد نصيبي عند الخطابات والى اليوم ابحث ومستمرة من خطابة الى اخرى وحاليا فيه متزوج عن طريق خطابة ربما اقبل به لكن اعتقد انه سيتزوجني دون علم زوجته واذا اصريت على حضور النساء للخطبة اغلبهم يتراجعون ويبحثون عن غيرك وفيه منهم نصابين يوافقون على خطبة النساء وتقوم الخطابة بارسال وحدة تعرفها لتمثل دور الاخت الكبيرة للمعرس والله صارت مع وحدة من البنات لكن اكتشفتها وعلى فكرة بعض الرجال ما عنده ثقة بالنت عن طريق خطابة اكثر من خطابة بلغتني هالشي تقول الرجاجيل يطلبون معلومات كاملة عن البنت وخاصة عنوان البيت ومكان العمل ويظلون يراقبونها شهر ويشوفون اخلاقها ووين تروح انا رفضت هالشي قلت اعطيه فقط رقم احد اخواني ليتقدم لخطبتي ومن اخوي يعرف عنوان البيت والعمل وتكون الطبة رسمية وبعدها يسأل على كيفه لان هذا الدف من الخطبة فترة كافية لا تقل عن اسبوعين ليسأل عنا ونحن ناخذ المعلومات منه لنسأل عنه وليس الخطبة اجبار على الزواج يقدر يتراجع بأي لحظة وانا اتحمل وابلغ اخوي بأي عذر في حال تراجعه لكن اغلب الخطابات ارفضوا واطلبوا كل المعلومات وانه يراقبني وانا ارفض اي شخص يلاحقني بمكان عملي يمكن يطلع واحد مو زين ويسبب لي الشبهه وفيه نوعية من المتزوجين يعطونك معلومات كذب في كذب لا عمر حقيقي ولا مكان عمل حقيقي بصراحة تعبت من هالموضوع ومو عارفة اتصرف |
اقتباس:
لسانك ياليدي انتبهي منه يمكن هو اللي معذبك ارفقي شوي على حالك .. |
و الله الزواج أصبح معقد للغاية ..
الله يسهل للجميع و يصبر الجميع .. تأثرت من قصتك يا غاليتي يا ليدي .. يا رب اجعل هذا التعب في التفكير في موازين اعمالك لانك تسعين للستر و العفاف احس بالاختناق |
الله يرزقكم ان شاء الله
وتخبرونا عن خطوبتكم قريب ان شاء الله كلكم عاجلا غير اجل امييييييييين |
والله يا اختي ارى ان تبتعدي عن الخطابة
فلماذا يلجاء رجل إلى خطابة اين اهله اخواته لماذا لا يخطبون له فعن تجربة شخصية لا يذهب غالبا للخطابة من الرجال الا من لم يجد من يقبل به في مجتمعه ومحيطه لعيب فيه او لسوء اخلاقه والله اعلم ايضا فكرة الرجل عن الفتاة التي وضعت اسمها وبحثت عن زوج لدى الخطابة ايضا سيئة والله اعلم والله يرزقك الزوج الصالح التقي النقي الذي على سنة نبينا محمد صلى الله عليه وسلم ولا تنسي او تهميلي الدعاء (وقل ادعوني استجب لكم ) |
الله يوفقك أخت عبير وعليك بالدعاء ثم الدعاء ثم الدعاء وأكثري من الاستغفار --أما الزوج فعليك بصاحب الدين والخلق الرفيع أبحثوا عن صاحب الدين والخلق
|
اناا كلمتني وحده قريبه لي وتقول انهاتعرف خطابه ولو تبغين
اقولهاتدور لك على رجال فقلت خليني افكر طبعاتقول لو تم الزواج تاخذ مني مبلغ من المال وتاخذ من الرجال مبلغ فمحتاره وللحين قلتها عطيني مده اشاور حالي مرات اقول لاا انتظر الفرج من عند ربي ومرات اقول اقولها تبحثلي فماريكم؟؟ واعذريني عبيرر لتدخلي في موضوعك لكن سبحان الله نفس تفكيرك احسها قويه اني انا الي ادور؟ ربي يوفق الجميع |
أختي
توكلي على الله وربي بيكتب لك اللي فيه الصالح , فعلتِ السبب والباقي على الله طيب ليه ماجربتي مشروع بن باز دامك تبينه بهذي المواصفات وحده قالت لي أن أغلب اللي عندهم ملتزمين وماقالته من فراغ هي جربت وماشاءالله جوها ناس بنفس المواصفات لكن المشكلة صارت في اهلها بنات اللي جربت خطابات واكتشفت انهم غير صادقات لاتعمم المسألة فهذا ظلم للبقية أهم شئ تتحرين الخطابة اللي سمعتها طيبة وطبعا هي ماعندها عصى سحرية تجيب لك المواصفات اللي تبينها بالحرف الواحد تحاول توجد نقاط التقاء بينكم وفي النهاية لابد من التنازل من الطرفين في بعض الامور مستحيل القى انسان بنفس المواصفات اللي ابغاها وهو بالمقابل نفس الحكاية وبعدين من قال أن الرجال اللي عند الخطابة هم من اسوء الناس او لعيب فيهم اضطروا لها فيه رجال ماعندهم خوات او امهات او او ظروف الناس تختلف عن بعض , اذا احنا نظرنا لها بهذي النظرة فمعناها اذا لجأنا لخطابة اذا فنحن من أسوء البنات أو لعيب فينا اضطررنا لها كونوا واقعيين أكثر أسأل الله العظيم بمنه وكرمه في هالايام الفضيلة أن يرزقنا بخير ممانستحق من الازواج الصالحين |
ماخلينا شيخ ولا خطابه ماكلمناها ومثل ماقلتي الاغلب متزوجين ومطلقين والعزاب قليل وصغار وكلهممم يبغون بنااات صغاااار
حتى بو خمسين وستين سنه هههههههههههه يتشرطون يتدلعون او مطلقه طيب والفتاة اللي ماسبق لها زواج ام ثلاثين محد يبغاها ؟ ياترى ايش السبب؟؟؟ مادري وش رايكم بالمطلقين !!! نخاف ان الكل يجلس يمدحه وبلاخير يطلع العكس !!! هل نقبل بالمتزوج افضل ! |
سبحان الله المعطي المانع الرازق
يا ما رجال يبحثون عن نساء للزواج منهن فلا يجدوا وياما نساء يبحثن عن ازواج فتعييهن الحيلة تحولات المجتمع التي عاصرناها من اكبر معوقات الزواج وجعلت بنات في عمر الزهور ومثل الورد تتحول الى عانسات حسبي الله على الظالم ولكن امر المؤمن كله له خير ان اصابته سراء فشكر له اجر وان اصابته ضراء فصبر له اجر اللهم ارزق الصابرات المحتسبات الصالحات القانتات العفيفات ما تقر به اعينهن من الازواج الصالحين اللهم امين |
| الساعة الآن 07:02 PM. |
Powered by vBulletin® Version 3.8.7
Copyright ©2000 - 2026, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©