|
آخر تطورات موضوعي السابق أختي تحادث الشباب ساعدوني ارجوكم
طرحت موضوع سابق بهذا العنوان (أختي تحادث الشباب ... ساعدوني ارجوكم )
على هذا الرابط http://www.66n.com/forums/showthread.php?t=110879 والكثير من الأعضاء والعضوات ما قصروا ولله الحمد وبعض الاعضاء طلبو مني اني اخبرهم بآخر التطورات طبعا النتيجه جات من زمان بس توني اكتب الموضوع بعد ما تأكدت من النتيجه تبغون تعرفون اكيد وش صار اللي صار اني كنت قاعد لحالي بغرفتي اشوف التلفزيون وجات عندي الغرفه تقول انها طفشانه وودها تقعد معي انا استقبلتها بكل رحابه وبدا حوار بيني وبينها بس تفاصيل الحوار ما اذكرها حرفيا لكن راح انقل المفيد واللي اذكره أنا : ليش دايما انتي طفشانه ( قلتها بممازحه ) هي : ما عندي احد اقعد معاه ولا اتكلم معاه ( مثل ما قلت لكم ان ما عندها اخوات بنات ) أنا : وليش ما تشوفين لك اي شغله مفيده هي : مليت من الشغلات المفيده من كثر ما سويتها .. ابغى شي يسليني يخليني اضحك أنا : زي ايش مثلا هي : نتجمع انا وقريباتي في بيتنا او بيتهم او مع صديقاتي في بيتنا او بيتهم أنا : طيب ما عندك وحده من صديقاتك تعطيني رقمها اتسلى معاها حتى انا طفشان ( قلتها بمزح ) هي : ( ضحكت ) انا حاسه ان عندك ارقام بنات أنا : وليش شاكه فيني ( قلتها بمزح ) هي : مو شاكه فيك بس انتم يا الشباب دايما كذا تحبون تتسلون أنا : وش دراك اني اتسلى .. يمكن اكون صادق هي : ما اظن لانك اخوي واعرفك زين ( قالتها بمزح ) أنا : طيب إذا كان واحد يكلمك انتي كيف تعرفين إذا هو يتسلى او صادق هي : (سكتت وطالعت فيني بإستغراب وكأنها ترددت انها تجاوب ) أنا : قولي الصدق .. وش دراك ان فلان ( قلت اسم اللي تكلمه ) صادق والا يتسلى ( قلتها بإبتسامه فيها عتاب) هي : ( استحت ونزلت راسهالا وما عرفت ترد ووضحت اثار الصدمه على وجهها ) أنا : (بإبتسامه ) خليني اتكلم معاك بكل صراحه .. انا دريت انك تكلمين واحد في الماسنجر والجوال وشفتك وادري فيك بس ممكن اعرفك ليش تكلمينه هي: (سكتت ما قالت شي ) أنا : قوليلي وبكل صراحه ولا تستحين واعتبريني صديقتك مو اخوك لان انا الوحيد اللي راح يسمعك هي :( تطمنت وتكلمني وهي متردده وما تعرف وش تقول وشوي وتبكي ) انا حاسه اني لحالي هنا في البيت ما عندي احد اتكلم معاه الا انت وانا ابغى احد يفهمني ويحس فيني واقدر اشكيله وانت مو دايما فاضي مشغول في دراستك ومع اصحابك أنا : (وبكل هدوء ) طيب انتي تتوقعين ان هذا اللي تكلمينه فاهمك وحاس فيك هي : ايه انا : وش دراك هي : لانه معبرني ويكلمني مع انه مو عارفني أنا : وتحسينه صادق في مشاعره وصادق في اللي يقوله وانه ما يتسلى هي : ايه أنا : طيب واللي يقولك عكس هذا الكلام هي : كيف أنا : انتي تتوقعين ان فيه رجال يرضى على نفسه انه يكلم بنت ويرتبط معاها بصدق وهو متأكد انها تكلم غيره .. لان مثل ما اعطته رقمها اكيد اعطته غيره والرجال بطبيعتهم إذا حبو بنت لازم تكون لهم وحدهم.. يعني تكون زوجه .. وحب غير كذا مافيه هي : بس هذا واضح من كلامه انه صادق أنا: طيب تبغين اثبت لك انه يتسلون .. (سمعتها مقطع لبنت تبكي في التلفون تترجى واحد تحبه انه ما يتركها وهو يكلمها بكل حقاره وبكل برود ) هي : ( سمعت هذا المقطع وسكتت وبانت عليها الصدمه ) أنا : لا تفكرين ان فيه شاب يقول كلام معسول لغير زوجته ويكون صادق وفيه من اصحابي كثيرين كذا وبهالطريقة يكلمون بنات ويقولون لهم انواع الكلام المعسول وانا اعرف ان مشاعرهم اساساً متبلده وما عندهم اي احساس والله يعين الزوجه اللي راح تكون من نصيبهم .. والشباب ترا يكلمون البنت قدام اصحابهم عشان يقولون شوفو ترا عندي بنت تموت فيني ويقولها بكل استهزاء والشاب إذا قدر يربط بنت معاه يحس بالكمال في ذاته وان مافيه احد قده ويحس اكثر بهالشعور اذا تركها وخلاها تترجاه وهذا شي انا شفته بعيني هي :( بعد اقتناع ) طيب خلاص انا بتركه بس خايفه انه يزعجني بالمكالمات أنا : هات شريحتك اعطتني الشريحه ( شرحه سوا ) كسرتها أنا : هاذي الشريحه وكسرناها وبعد 10 دقايق بنطلع اشتريلك شريحه ونروح نتمشى لحالنا انا وانتي كأن الدنيا كانت ظلام وخوف وصارت منوره قدامها وما تصدقون كيف حست بالسعاده سالتها : لو اني ضربتك او اخذت الجوال ومنعتك من الكمبيوتر وش كنتي راح تسوين هي : راح اكرهك واتعقد زياده اكثر من اني معقده أنا : طيب حتى لو .. على الاقل اضمن انك ما راح ترجعين مره ثانيه تكلمين شباب هي : ومن قاللك .. عندي ألف طريقه وطريقه اقدر اكلم فيها اي احد وانتم ما تدرون أنا : زي ايش هي : اقدر اكلم في جوال وحده من صاحباتي او من قريباتي وانت ما تدري .. انت بتقعد لازق فيني ومراقبني علطول!! أنا : يعني الحين ممكن تكلمين احد وانا ما ادري؟؟ هي : لا طبعا لاني اقتنعت ان هالشي غلط وان اللي كاااان يكلمني واكلمه واحد نصاب والحمدلله ما سرت الاحظ منها اي تصرف خاطئ ولما قالتلي عن الطرق اللي ممكن تستخدمها من دون ما ادري عرفت فعلاً اني لو استعملت معاها الشده كان خسرتني وتعقدت ولا راح تفهم ان هذا الشي غلط وفوق هذا راح تقدر تكلم اي احد بدون ما ادري اما بهاذي الطريقه الحمدلله رب العالمين تقربت مني زياده وعرفت ان هذا الشي غلط حتى لو كان ودها ترجع راح تعرف انه غلط الآن صارت كل مشكله تمر فيها لازم تيجي وتفضفضلي وانا اسمعها وبكل اهتمام وسرت ازيح عنها الهم بتلبية اي غرض ودها فيه الله يسامح بعض الاعضاء اللي طلبو مني استعمال الشده واظهار الرجوله ( المزيفه ) عليها |
أسأل الله أن يبارك فيك وفي رجاحة عقلك وأن يهدي أختك للخير وطريقتك رائعة وتحتاج لشخص لديه حلم وطولة بال وليس كل شخص لديه القدرة على ظبط أعصابه مثلك ........
وفقك الله |
بارك الله فيك وحفظ لك إختك وكل خواتنا يا رب
|
بارك الله فيك اخي ..
و اتمنى منك ان تراقب أفعالها من بعيد لبعيد .. و بدون ان تشعر خوفا من ان الحنين قد يجرها من جديد له و خاصة ان لديها هاتف نقال و كمبيوتر أخي ... نصيحة لوجه الله تعالى .. اخرجوا جهاز الكمبيوتر من غرفة النوم و ضعوه في الصالة العامة و لا داعي ( من وجهة نظري) ان يكون لها هاتف نقال .. فالهاتف الارضي يفي بالغرض و خاصة انها لا تزال صغيرة |
ماشاء الله تبارك الله قمة الحكمة والتعقل.....................الله يحفظكم لبعض ويرزقها بالزوج الصالح اللي يسترها ويصونها ويرزقك بالزوجه الصالحه آمين
|
اللامع ماشا ء الله عليك بجد ليت عندي اخ مثلك
يمكن اول مره اقولها علني بس بجد ليت عندي اخ مثلك ماشاء الله عليك الله يخليك لاختك |
الوفيه لوالديها صدقيني اذا اخوها ملي وقتها وكان كل شي عندها لو مليون وراها ماراح ترضي
|
ما شاء الله
بس لاحظت انها بسرعة اقتنعت وهذا دليل انها من الاصل عندها بذرة طيبة ومو مقتنعة باللي بتعمله |
اقتباس:
نفس كلامي |
ما شاء الله على رجاحة عقلك
الله يهديها ويخليك ليها بس مثل ما قالت الوفية راقبها من بعيد دون ان تدري بس زيادة اطمئنان |
ما شاء الله تبارك الله ..
هذا هو الموقف بالضبط الذي تمنيت أن تتخذه معها .. فالضرب والشدة لا يفيدان بل يزيدان من سوء الوضع .. |
شكري الجزيل لكل من رد على الموضوع
اقتباس:
اما الهاتف النقال راح تسال عن سبب منعه منها وخصوصا ان قريناتها من قريباها وصاحباتها يمتلكون هاتف نقال فما راح يكون هناك سبب واضح لمنعه وبيكون السبب في وجهة نظرها انها مستقصده وان اهلها يحاولون ان يجعلوها مسكينه ويحرمونها من اي شيء يسليها واما عن حاجته فهي تحتاجه فعلا لانها في بعض الاحيان تبات عند قريباتها ( بما انهم بنات ) فتحتاج الهاتف النقال للإطمئنان عليها او عن الحاجه لها لكن دام ان الموضوع هدأ فما فيه اي داعي اننا نشعله مره اخرى وفعلا انا اراقب من بعيد لبعيد بدون ما تحس |
ماشاء الله عليك
بارك ربي فيك هذا الإسلوب الصحيح ياريت كل شاب يمر بمثل هذا الشي يتصرف بكل عقلانية ربي يوفقك إنت وإختك لما فيه الخير والصلاح ويبعد عنكم كل سوء |
ونعم الأخ
|
ماشاء الله تبارك الله أسأل ربي أن يبارك فيكم أخي الفاضل وحقاً صَدَقت فالشدة قد تأتي بنتائج سلبية وخصوصا في هذه المرحلة الحرجة والخطيرة من العمر حيث العناد والرغبة في " التجربة أو التقليد " كُن لها صديقا مستمعا جيدا وستجدها تستنجد بك عند أي مشكلة لا قدّر الله أو ستطلب منك النصيحة والمشورة في أي موضوع أو حتي استمتعا بالوقت معاً في أي حوار حوار مفيد أو حديث مسل أو نُزهة لطيفة أو هدية بسيطة ولاحظ أنها ليست لها أخت تؤنسها ربما لا تفرق هذه المسألة بالنسبة للشاب لكن للبنت تتعبها كثيراً بارك الله لكم فيها وأسعدكم بها اختكم " زهرة " |
وفقك الله وبارك فيك وثبت أختك على طريق الحق وابعدعنها وعن بنات المسلين الذئاب البشرية ....
حقيقة لااستطيع أن اعبر عن اعجابي بموقفك وسعة صدرك لهموم أختك وتفهمك لمشاعرها ... ماشاء الله تبارك الله ... دمت بحفظ الله . |
تصرف رائع من أخ لأخته أدامكما الله
لكن هي الآن تحس بالوحدة تحس انها فقدت شيء كبير وكان له تأثير في حياتها من الطبيعي انها في أي لحظة ضعف وملل راح تفكر فيه وربما تنهار أمام الشيطان وترجع له..... أخي لو حاولت ملء وقت فراغها بأي برنامج أو دورة ............ أعانك الله وثبتها على اليقين |
الله يبشرررررررك بالخير يا اللامع:)
والله فرحت كثير لما عرفت اخر التطورات فعلا انت بحكمتك ملكتها وهي بتربيتها الاصيلة رجعت مثل اول الله يخليك لاختك يارب دائما و اوقف جنبها دائما,, وحاول تشغل وقت فراغها بشي حلو ومسلي ,, الله يوفقكم يارب و يحفظ اختك |
بارك الله فيك وكثر من امثالك...
|
ماشاء الله تبارك الله....... الله لا يحرمكم من بعض
وا أسفاااه على اخواني الله يردهم لنا بالسلامه.......ادعولنا ان الله يردهم لنا |
ماشاء الله تبارك الله ... ياليت عندي اخ كبيــر بهذا الاسلوووب ..
|
ماشاء الله
ماشاء الله عليك
ياحظ أختك وأمك وأهلك فيك يليت عندي أخ مثلك ومثل تفكيرك الله يوفقك ويسر أمرك وينور قلبك بالإيمان مع تحياتي وفائق إحترامي amola _ss |
روعه
لو انا ثبت الموضوع ماشاء الله |
شفتووووووو ياللي قااااالو اضربها وكفخها ومادري ايش عشان تتأدب.. عمــــــره الضررررب ما جاب نتيجه.. والدليل كلااام اختك اخوي يوم قالت لك اذا ضربتني بكرهك وبرجع اكلم واحد ثانــي.. والله وانا اقرى فررررررررررحاااااااانه بجد باللي صار معاكم..:22: ما شااء الله تبااارك الرحمن.. ونعم الاخ لانك قدرت تتقرب من اختك وتسمعها..يااليت عندي اخ مثلك.. الله يخليـــــكم لبعض ان شاء الله ويحفظكم من كل شررر.. |
أخوي ياليت الشباب كلهم مع خواتهم مثلك صدقني والله مافيه بنت أنحرفت والله تستاهل كل تقدير وأحترام والله أني
بكيت من حواركم أنا يعجبني الشاب اللي يحس بأخته ويكون هوالملاذ الوحيد لها بعد الله وولديها وأنا هالحين أربي أولادي الأولاد يكونون قريبين من أخواتهم البنات رغم أن البنات أكبر منهم صدقني لو كل أخ أعطى أخته من وقته لو ساعه باليوم يفضضفضون لبعض ويعلمها عن كل شي يصير برا حتى تكون حذره موبعض الشباب للأسف يستعرض عضلاته على أخته ويسوي نفسه ملاك وهو عنده بلاوي الدنيا بعد ماينسى يطلع أخته ويمشيها كل فتره عشان ماتمل ودور من يذهب مللها إذا بعض المتزوجات للأسف أنحرفت بسبب أهمال زوجها كيف البنت اللي قلبها مثل قلب العصفور إذا مالقت من يحتويها ويحس فيها ويعطيها الأهتمام صدقوني بنخسر بناتنا مع هذا الكم الهائل من الفضائيات اللي تدعوا الكثير منها للأنحراف عينك عينك !!! |
السلام عليكم ...
ما شاء الله عليك يا أخي ....تبارك الرحمن من شيمة الشباب كما أرى تتمثل هى إظهار الرجولة على أخواتهم ..و قليل ما تجد الذي يتفهم مشاعر المرأة .. (التي هى أخته !) لا أقول إلا أكثر الله من أمثالك في هذه الصفة |
بارك الله فيك اخي .. الله يهديها و ..الله يحفظكم لبعض
|
الله يتمم عليك عقلك وحكمتك ماشاء الله تبارك الرحمن دعوتي لك بأن يرزقك الله الزوجه والذريه الصالحه
وان يحفظ أختك من كل مكروه ويديم المحبه والموده والأحترام بينكم وان شاء الله تفرح فيها قريب بالأنسان اللي يستاهلها ويصونها ويحبها... ودمتم في حفظ الله ورعايته... |
بارررررررررررررك الله فيك والله هذي الرجوله بحق
قسم بالله كبرت بعينيييييييييي مرررررررررر وبعيون الاعضاااااء بعد تصرفك سليم ميه الميه عالجت المشكله من جذووورهاااا واعطيتها البديل اسمح لي اقول انت رااااااااااااااااااااااااااائع وقليل امثالك لو احد غيرك كان شرشحها وفضحها في البيت وحط عليها رقابه ومنعهااا بس انت اعتبرت هذا خطأ مثل اي خطأ وعالجته بحكمه الله يوفقك ويسعدك مع زوجة المستقبل ويصلح اختك ويرزقها بالزوج الصالح |
ليت كل الاخوان مثلك يتفاهمون ويا خواتهم والله ماشاء الله تبارك الرحمن انت فعلا عاقل وقمه بالتفاهم
الله يوفقك للخير |
ما شاء الله تبارك الله على رجاحة عقلك
والله فرحت بالخبر الله يوفقكم لما يحب ويضى |
ماشاء الله تبارك الله
نعم الاخ ونعم الاسلوب ونعم التربية ربي يرزقها الزوج اللي يستر عليها ويحفظها ويحميها ويحن عليها عاجلااااااا لا اجلااااااااااااا اسلوبك كان راااااااااااااائع ورااااااااااقي هذا الاسلوب اللي ينفع الاقناع والحوار مو الضرب والتهديد والحرمان ربي يسعدكم ويحفظكم |
ما شاء الله تبارك الله , يا ريت كل الشباب يعاملون اخوتهن هكدا
حفظك الله ورعاك تحياتي |
اقتباس:
والله اني اندمجت في قراءة قصتك مع اختك .....وعجبتني جدا لأنه فعلا تأكدت انك اخ وقت الشده ..وكنت عونا لأختك ولم تكن فرعونا ...وفعلا قول الرسول صلى الله عليه وسلم ما وضع الرفق في شيء الا زانه وما نزع الرفق من شيء الا شانه )) وبصراحه لا تتخلى عن اختك ابدا والله ان قلبي عورني عليها صعب جدا جدا البنت اللي تكون وحيده وما عندها اخوات ...الله يعينها ويسعدها ويبارك فيك ..والله انك بتكبر في عينها وما راح تخون اهلها ابدا بعد اليوم لأنك ما نسيت انها امرأة ضعيفه ولها مشاعر واحاسيس وممكن تنخدع بسهوله ..وانت كلمتها على هالأساس فوثقت فيك ...الشده والتهديد والضرب في هالمواقف ما وراه الا العند والبنت ساعتها بتصدق ان دون جواي هو الوحيد اللي يفهمها ويحس فيها .........الله يفرحك ويكرم اختك بزوج صالح ..رجل من ظهر رجل:22: ما نقول دلعوا البنات دلع يؤدي الى ما لا يحمد عقباه ..ولا نقول شدوا عليهن لدرجة الخنق والتضييق ولكن لا افراط ولا تفريط واهم شي الثقه واحترامها كأنثى وانها انسانه لها مشاعر واحاسيس وليست جماد ؟! |
ما شاء الله عليك يا ريت كل الاخوان متلك جزاك الله خيرا
|
الصراحة فعلاً أثبت إنك رجل مواقف ... الله يكثر من أمثالك في هالوقت ... ورأيي إنكم ماتخلون الكمبيوتر في غرفتها الخاصه ... ولا تخليها وراقبها من دون ماتحس ....بارك الله فيك من جد تصرفك أعجبني..وهي ماراح تنسالك هالموقف خصوصاً إذا كبرت وعقلت بتدعيلك صدقني... |
مشاء الله تبارك الله على هدوء اعصابك... ليت كل الرجال مثلك
|
الالمع .....
يـــــــــــاليتك اخوي ... وربي بصدق ريحت قلبي على اختك .. الله يعطيك العافيه ... من جد ياليت كل الرجال مثل رجاحه عقلك .. الشدة مو فى كل شي تستخدم .. الله لا يغير عليكم .. يارب ويستر على اختك وتتزوج .. |
والله العظيم انك انسان نادر بس احس انك نوعا مابارد في ردة فعلك يعني احس 10 ايام كثير؟
انا بنت اخوي طحت عليها تكلم تخيلي منو راعي المطعم وهي وزنها ثقيل عمرها 17او نص 16مااذكر فا من كثر ماتطلب منه اكل تعلقت فيه !! تفاصيل الحادثة مو مهمه المهم تحطت عليها تكلمه بالموبايل وعطيته كفين كبروا خددودها دبيلين اكثر ماهي كبيرة من قبل !! ومن عقبها سحبت الموبايل منها على ان احترقت الشريحه وماشابه وطبعا كتمت السالفه وحادثتها بعد يوم ودموع وحالتها حاله وقعدت فترة البنت العاجل المؤدبه بس للاسف كررتها مرة ثانيه وسلمتها لاخوي يتصرف معاها وصار الي صار !!!!!! الزبدة انهم مراهقات لازم يمرون على هالشيء اذا كان عندها وقت فراغ ...... انا وللـــــــــــــــــــــــــــه الحمد ابوي مستحيل يخلينا نقعد بوقت فراغ يسفرنا ويودينا معرض الكتاب يشركنا بنوادي تثقيفيه حلقات تحفيظ دورات يقعد معانا يغطيني هو بنفسه اذا نمنا تخيل انا الحين 21 ومملكه هو يجيني قبل لاانام اذا تاخر وماشفته ويقول :شعولتي نامت قبل لاتسولف علي !!والله هالكلمة لها صـــــــــــــــــــــــــــدى كبير عندي احبه احبه اموت فيه ولا يمكن ابداا اسوي شيء يغضبة فديته) <<<طلعت شوي اسفه اي اقولك وبعدين يسولف علي ويغطيني ويطلع صدقني هذي الحلقة المفقوده الي يدور عليها امثالك والشيء الثاني اخواني طبيبن وسوالفهم كلها عندي وسوالفي كلها عندهم بكل صغيره وكبيرة (الا الي نخجل منها طبعا) !! الزبدة زيدوا عليها جرعة الحنان والعطف والحب عشان تغطون النقص الي فيها والفراغ...... والله يستر على بنات الجميع ويفقهم ولاتشوفها في بناتك او اختك مرة ثانية والله يعين الجميع |
ياليت كل الأخوة مثلك..الله يسعدك
أختك حائزة |
| الساعة الآن 02:47 AM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©