|
أغضبني فأرسلت له رساله في الصميم!!
أحبائي أحترت كثيرا فيما سأكتبه
بالمختصر حدثت بيني وبين زوجي مشكله سخيفه جدا ماحدث أهل زوجي عندي لهم 3 أسابيع في البيت يعني (ضيوف شرف ) حفظهم الله زوجي من النوع الذي ينام مبكر جدا يعني 9 او 10 ويبيني أنام بدري زيه أنا ما أقدر أنام بدري بس عشان أرضيه أجلس معاه ألين أحس أنه بسابع نومه بعدين أطلع وأكون متأكده من نوم بنتي المهم قبل كم يوم كان معصب ومعتفس عطيته العشاء وقال لا تزعجوني تعبان بنام المهم نومت بنتي وطلعت برا الغرفه على أساس أنه بيريح ولا يبي أحد يزعجه وإحتراما له طلعت كانت أخته تعبانه اللي عندي بالبيت جلست معاها واسولف أنا وياها حتى الساعه 2 بالليل ودعتها وقلت بروح أنام كانت بالصاله وغرفتي تطل على الصاله فتحت الغرفه وأفتح إلا الباب مقفل أنصدمـــــــــــــــــــــــــت ماتوقعت أبدا يسوي فيني هذي الحركه وخصوصا أن أهله موجودين طبعا الموقف كان قدام أخته تخيلوا الإحراج اللي صار فيني ماتمالكت نفسي رحت اجمع نفسي أخاف أبكي قدامها المهم سألت وش اللي صاير وش بينكم وأنا من جد محتااااره قالت تعالي نومي عندي قلت ما أقدر رحت في مجلس الرجال برد موت جمده وطبعا كل البطانيات موزعه لأن أهله نايمين تجمعت شرهه في قلبي عليه كبر الجبال راجعت نفسي وش أنا مسويه وش الخطأ ليش هالحركه بالذات قمت أبكي من قلبي المهم أذن الفجر ولا فتح الغرفه إلا الساعه 6 الصباح وأنا واصله حدي من الزعل دخلت الغرفه وهو طالع تأخر برا أرسلت له هذي الرساله بالنص التالي: (تيقن أن تصرفك تماما كالأطفال وأنك خسرت الكثير غير أنك أصبحت حكي في أفواه الناس لكن حسبي الله ونعم الوكيل) دخل الغرفه وإلا الجوال في الغرفه سألته ليش تسوي فيني كذا ؟؟؟ ماجاوب وشلون سطى قلبك ماجااااوب قلت لو أني مسويه فيك الحركه هذي بالله عليك وش بتسوي برضو ماجاوب وجلسنا مانحاكي بعض إلى اليوم ولا ياكل وزعلان والخطأمنه حاولت أكتب له رساله لأنه مايحب النقاش لكن ترددت كثير في إعطائه إياها هل ترون أن الرساله اللي أرسلت سبب في زيادة الزعل ؟؟ وهل تعتقدون لو أعطيه الرساله التي فيها عتب وتوضيح مانحن فيه من شوشره في حياتنا وقتها مناسب أم أذهب لأهلي حتى تهدأ الأمور ويراجع كل منا نفسه مع العلم لو تنطبق السماء على الأرض ما أعتذر أرجوكم أرسوني على بر أريد حل مناسب لنا نخيتكم يأخوتي |
والله ما الومج يا خويتي
الحركه من جد مب حوه بس الظاهر تصرفات زوجج من زعله و عدم اكله احساس بانه غلطان بس مب قادر يعتذر تعرفين الرجاجيل ما يحبون يعتذرون فانتي ابدي عامليه عادي ولا كأن شي صار ولما تهدأ الامور عاتبه بالتي هي احسن ترى الموضوع مو مستاهل روحه لاهلج :) |
نعم زيادة الزعل ونص
صدقيني يمكن زعل لانه صحى من النوم وما لقاك بجمبه .. ترى الرجال لما ينام ويشوف زوجته تركته وراحت حتى لو ما فيها نوم يتضايق روحي حبي راسه وقولي يا حبيبي ويا مهجة قلبي انا اسفه واتمنى انك ما تكرر هل حركه .. راح يكره نفسه لانك انتي الي اعتذرتي وراح يعرف انه ظلمك بردت فعله وبس |
اختي الكريمة الصراحة هالحركة اللي عملها زوجك مو حلوه بس انت حاولي تهدي الامور وما تخليها تكبر لين ما يروحو اهل زوجك
وما فيها مشكله لو كتبتي لزوجك رسالة وقولي له اللي في قلبك بس انصحك لا تبتدي بالعتاب واتمنالك حياة سعيدة |
اقتباس:
أختي الغاليه صحيح كلامك بس فيه شي يصدني كيف أعتذر وهو اللي غلط علي تخيلي جلوسي برا الغرفه بالبرد حتى الصبح كيف اجي انا وأراضيه وهو الغلطان مومعقوله ياختي الغاليه بس الله يعين وشكرا للإهتمام بالموضوع ياغاليه |
اقتباس:
أنا لا أريدك أن تقف بصفي لكن ماكتبته حقيقة ماحدث بيننا فهو قبل أن ينام قال لي بالحرف الواحد لا تزعجوني يعني بفهمها وبطلع لحد ما أنام وصحيح كلامك بقولك ( راح يكره نفسه لانك انتي الي اعتذرتي وراح يعرف انه ظلمك بردت فعله) لكن في هذا الموقف أمتنع شكرا لك على ما سطرته اخي الفاضل |
اقتباس:
الغاليه corazon اشكر مرورك الكريم واعتقد هذا ماسألجأ إليه شكرا لك |
مممممممم... أرى أن الموضوع لا يستحق كل هذا !!
هو أقفل الباب مره واحده .. لأنه غضب .. و ليس عليه حرج .. المرء إذا غضب تتفاوت ردة فعله بين حين و آخر.. و كل شخص يعبر عن غضبه بطريقه.. أنت مثلا إذا غضبتي تنفسين غضبك بطريقتك .. و الرجل عادة لا يعتذر بالكلمات .. و إنما بأفعاله.. كالصمت عند المواجهة .. و عدم الرغبه في الخوض في موضوع النقاش.. اعراضه عن الطعام .. عدم قدرته على النظر في عينيك.. حبيبتي لا تنتظري منه الاعتذار .. و تضيعي عليك عمرا قد يكون سعيدا في رضاه عنك.. زوجك جنتك و نارك.. اسعي لرضاه .. و اعتذري إن بدر منك أي تصرف قد أثار غضبه أو حساسيته.. لا تعوديه على الفتور .. تقربي منه بصمت .. و حسسيه بتسامحك و قلبك الكبير القادر على احتوائه بزلاته.. أسعدكما الله و جمعكما بخير.. |
أنا دائماً في صف الرجل في حاله واحدة
وهي أن تقدم المرأه التنازلات الرجل يحتاج أن يحيا في بيته بحريته هو وليس بحريتك أنت ... لكن ليس دائماً هو مخطيء ولو أن تصرفه بينكما لهانت لكن أمام أخته وأنت واقفه لإكرام أهله لذا لاتكبري الموضوع وتعطيه أكبر من حجمه تصرفك منطقي جداً ومن حقك أن تغضبي هدأي الأمور وتخاطبي معه إن سألك عن شيء فأجيبي ببساطة قومي بحقوقه وواجباته فقط وبعدها عاتبيه لكن قللي الزن وكثر الملامة ولكن لاتجعلي الملفات مفتوحه فتتراكم ويصبح العتاب ملامة .... وإنتظري ليس من الضروري أن تتصالحا اليوم بهدوء ثم سأذكرك بشيء جميل أن تكونا معاً في كل شيء وغيري مواعيد نومك صدقيني حتى لك هي صحيه وافضل بارك الله لأمتي في بكورها ... وفقك الله |
لالالالالالالالا
ياقلبي انتبهي تروحين الاهلك بليس حريص لا اجلسي مع زوجك والله الله بالكلام الزين وبحزن اشرحي له حزنك على تصرفه وانك ماجالستي مع اهله الا غلا فيه هو علشان ومن الكلام هذا يمكن زوجك فشل منك بس كبرياء يمنع اقول رساله بيكون احلا بس كثرين من الكلام الزين اذا ماتعتذرين الزوجك من له بتعتذرين خلي الكبر الى بيضيعنا |
أختي الغاليه ..........لن اقول لك افعلي كذا وكذا ...أو انتي اخطأت بكذا وكذا ...
ولكن اقول لك لو كنت مكانك ..ما كنت فعلت ما فعلته ابدا ابدا ..ما فعله زوجك اعتبرتيها اهانه ليس لتصرفه تجاهك ولكن لأنه حدث امام اخته وهذا ما ضاعف من غضبك ...اسألي نفسك لو كان البيت خالي من أهله وحدث الموقف بينك وبينه هل كنت سأتصرف نفس هذا التصرف هل كنت سأغضب واحس بالاهانه ؟؟؟؟؟ علمتني الحياة والله انه ليس كلاما فارغا وليس كما يقال (اللي ايده في الميه مش زي اللي ايده في النار) ولكن تعلمت ان آخذ المواقف المحرجـه التي اتعرض لها امام الآخرين بالصمت او الاستغراب او ابحث لنفسي لتبرير اقنع به الطرف الذي ينتظر الاجابه (اخته مثلا) ...يعني الصدمه ابلعها وما اظهرها للآخرين ..اكون قويه وبلامبالاة أو اقول (شو مشكلته اكيد في حد ضايقه ..كان عادي ..غريبه .......الله معاه)! لو سكتي كان افضل 100مرة من الرساله اللي كتبتيها ...لو تركتيه يتحدث بنفسه عما حدث كان افضل ..لو كنتي عاديه وزدتي من الاهتمام والتربيت على كتفه والنكت والوضع كووووووووول كان افضل 100 مره لو ظل على صمته .........بعد ما الكل يذهب في حال سبيله .......اقول له تعرف يا قلبي اني ما زعلت منك بالعكس والله قلبي عورني عليك قلت اكيد فيه شي ضايقه مني أو من غيري أكيد تبا تفضى لنفسك ...الخ عالعموم حياتي صح فشلتني عند اختك ومت من البرد وما عرفت وين انام بس عاااااااادي ما همني ساعتها الا انت :23: شوفي عاد ساعتها كيف حسستيه انه اخطأ بحقك وخبرتيه بكل اللي صار بطريقه رومانسيه وكلها مشاعر واحاسيس تخلي الجبل ينطق وبدون تقليل من شأنه كرجل او اظهار انه اصبح صغيرا وطفلا بتصرفه :15: ........:( امسحي يا غاليتي من قاموسك الزوجي .......كلمة لن اعتذر له ابدا ..............ما هكذا تورد الابل عزيزتي:29: المرأة الذكـــــــــــــــــيه تحصل على ما تريد ! |
اقتباس:
بر الأمان كلماتك جميله جدا فأنا لا أنتظر منه الإعتذار لكني أردته أن يبرر موقفه إن كنت أخطئت لأعتذر لكنه لم يتفوه بكلمه واحده مما جعلني أحتار فيما فعلته ربما هي رواسب قديمه أفرغها تلك الليله ولا أعلم عنها شيئا أشكرك على ردك الرائع وكلماتك العذبه |
اقتباس:
أشكر لك الإهتمام لا حرمك الله الجنان |
محد كلمه من اهله هذا بدل ما يشيلك فوق راسه لانك مضيفه اهله و دست حتى على نومتك منشانهم كل هذا وما يغزر لا والله ازعلي و اقلبي وجهك عليه وانت لا تاكلي وشيلي غراضك واطلعي من الغرفة وهو راح يتنازل .
المشكلة ما تسوة تروحين على اهلك بس تسوة الزعل |
اقتباس:
جدا رائعه لكني لا أظني أستطيع أن أفعلها حزة غضبي خصوصا أن أهله كانوا موجودين وزاد الطين بله أخته التي زادتني غضبا بقولها ماله حق ومن هذا الكلا م الذي يثور الغضبان لكن وقع الفاس بالراس وهو الآن لا يكلمني ولا أكلمه حتى لم يبرر فعلته مالعمل ؟؟؟؟؟؟؟ |
اقتباس:
وأنا أييدك مليون في الميه الكبرياء هو العائق من ناحيته ومن ناحيتي لكن أعوذ بالله من الشيطان الرجيم |
\
انا الي يصير معاي العكس , اكثر الاوقنا الي انام مع اني ما انام مبجر بس هو دايما يخليني انام وهو يسهر وكل ما افتح عيني ما القاه جنبي حتى لو كان نايم معاي , يقوم بعد ما انا انام , كنت ازعل واتضايق من هذا الشي , وهو اذا نام ما يبيني اخليه , يبي اقعد معاه و انطره لين ما يقوم , يعني مشكلتي ان زوجي يبي اني اهتم فيه واكون معاه وقت ما هو يبي , والوقت الي انا ابيه ما القاه معاي .يعني حده مزااااجي . شنو الحل ؟ |
والله يا أختي من الممكن أنه زعلا ن من شئ أخر ,أوأنه خاف أن يكون أهله سمعوا الر سا لة التي وجهتيها له ,وكبريائه جعله يخجل من ذلك وأرجو أن تنهي هذه القطيعة ولا تأ خذ ي ذ لك على أنه ضعف منك
بل ستكسبين رضا الله ورضى زوجك أختك zayna |
احتمال وجود أهله مسبب له ضيق ,, ولهذا مو عارف يفسّر موقفه !! احتمال وارد !! |
اقتباس:
الرساله (المهببه) :d اللي كتبتيها ..ان كانت موجوده الى الآن عنده او في الغرفه احضريها حالا واقطعيها امامه وقولي له ...ادري ان هالرساله هي اللي شعللت الموقف بيني وبينك ...بس بصراحه انا كنت منفعله ساعتها وما قدرت انك محتاج تختلي بنفسك وخاصة انك قلت لي يا حياتي انك تعبان ؟ والله يا زوجي العزيز ساعتها كنت نعسانة موووووووت وما اشوف الا الباب خبط في وجهي (قوليها على مزحه) :d ......وبسك زعل يا من له القلب مشتااااااااق ........احمد ربك اني ما كسرت عليك الباب ساعتها وطلعت عضلاتي (قوليها بدلع ).:23: ........اعملي اليوم شوربه اوا ي شي ساخن يحبه ..وبخري بخور يجنن في غرفته ...قبل كلامك له او بعده ...كوني امرأة خدومه لزوجك ومتفهمه لوضعه ومنشغله باسعاده ..لا تضيعي احلى ايامك ووجود زوجك الله يحفظه لك امام عينيك بالزعل وهالخرابيط .........لا تتركي للشيطان مدخل :( .......انتبهي .. امسحي على راسه وقبليه ...ولا داعي لكلمة أنا آسفه ان كنتي تجدينها قويه على لسانك وكذا تكوني لا اعتذرتي له ولا خسرتي زوجك :23: |
عندنا زوجة اخوي حبيبه مره واذا رحنا عندها تسوي مثلك تسهر معانا وتترك اخوي وتصير مشاكل وبالاخير اكتشفت انه يغار اذا سمعنا نسولف وهي مبسوطه معانا بمعنى ان زوجك يبغاك تهتمي فيه قدام اهله وتنامي معاه ولاتتركيه لحاله الان اتركيه ولاتتكلمي معاه باي شئ وهو تدريجيا سيعود لطبعه زوجك غيور جدا انتبهي للنقطه هذي |
اقتباس:
|
هو متضايق من ابتعادك عنه وانشغالك بأهله ولكن لايريد أن يصرح بذلك يريدك أن تحسي بذلك وتعطيه حقه فما فعله نتيجة لغليان داخلي وصعبة يتكلم لأنهم أهله
|
قالت أيش قالت تروح لأهلها !!!!!!!!!!!!!!!
وش تروحين تبين يزيدون الطين بلة والأمر علة ؟! لا أنا أقول لك حتى لا تسوي زي ما قال صدى المشاعر لأنك لازم تحفظين لك كرامتك وش ذا الحركة يسويها المهم أنتي قلتي أنو ما يبيك تناقشينه وترى أحسن أنه ما يبي النقاش تفتكين منه ومن سواليفة وتكرار البلاوي بس شوفي اكتبي له ورقة خليها تفوح بالعود والورد وخليها حمراء وارسمي فيها شفايفك بسيطة الطريقة حطي روزج ما يثبت واطبعيه على الورقة كلها ثم سم الله وصلى على النبي ثم أذكري حبك له وحبه لك وتقديرك لذلك الحب واعتذري عن الخطأ ( أنا أعتبره خطأ إذا بينام بنام معه لو عندي عبد العزيز بن فهد مو بس أهله) المهم وذكريه أنو من تقديري لك وحبي لأهلك سهرت مع أختك البطيخة أقصد اللي مريضة واكتبي بآخرها من الكلام اللي عيب أقوله ههههههههههههههههههههه والله من جد ثم قولي له هاه تقبلني لو دخلت عليك أرجوك لا تردني حبيبي وكلام ثاني خليه يولع وبعدين أنتي خليك كل مكان فيك يفوووووووووووووح بالطيب اللي يحب وتزيني بالزينة اللي يحب طبعاً كأني أشوفه ما راح يتنازل يقول تعالي بس أنتي كذا تدللي وأدخلي كنك مستحية منه وخايفة وتطلبين رضاه وقولي له كذا بدلع وخوف أجي ؟! هههههههههههه يمكن يتنهت هو من الشياطين اللي براسه وما يتنازل يتغلى المهم روحي أنتي له وأحضنيه تعرفين معنى تحضنينه مثل ما تحضنين بنتك أو ابنك ولا تنسين تمررين يدك على رقبته ووجهه ومدري وش بعد المهم بعد فترة ميب قصيرة انكثي الموضوع وانتي تضحكين بس كلمة أو كلمتين تكون له درس بعمره كله قولي له بضحكة الله يخليك لو صار ببيتنا أي أحد لو تبي تذبحني لا يدرون ولا يحسون واقطعي الموضوع لا يرميك في متاهاته مرة ثانية والله يسعدك ترى ما نيب متزوجة بس هبال ههههههههههههههههههههههههههههههههههههههههههه يمكن ما تنفعك سالفتي |
الله يصلح الحال...أهم شي لا تفكرين تطلعي من بيتك...تراه بيتك مملكتك وكل الناس بينهم خلافات..زإذا طلعتي تكبر المشكلة...الله يوفقكم
|
والله معذوره اختي الصراحه قهرررررررر،،انه اقول خلج عاديه بتصرفاتج معاه بس بدون اعتذار لانج مو غلطانه
|
اختي الكريمه
اغلبيه بكرم اخلاقك و الك الاجر اعتذري منه و شوفي افهمي منه السبب لان صعب تبقي جاهله بالاسباب و ان كان منك السبب اعتذري منه ثاني مره حتى لو لم تكوني مقتنعه و لما يهدا ارجعي للموضوع بطريقه غير مباشره و وضحي له وجهه نظرك الله يصلح احوالكم |
أنا مع الأخت بر الأمان مليون بالمئه أفادت وأجادت
:22: :22: :22: |
اقتباس:
وأنا هنا أأكد لك برضائه التام لوجودهم بل يحدث مشاكل من أجل أن يأتو إلى بيته |
اشكر مروركم
الفلوجه زينه وباركك الرحمن أختي الغاليه غزالة دبي فكلماتك الرقراقه أثرت فيني ياغاليه بس ترى الرساله عبر الجوال مشكوره حبيبتي على إهتمامك |
السلام عليكم
|
اقتباس:
كلامك صحيح 100% أشكر مرورك العذب ياغاليه |
القناص 100\100
شرفت موضوعي شكرا لك صبا نجد شكرا لمرورك الكريم دلع دلوعة سوف يكون كلامك في الحسبان J_n شكرا لمرورك العطر عيون فتانه شكرا لمرورك الكريم والغاليه أم أثير أشكرك لكلماتك العذبه لكن هناك شئ يمنعني من الإعتذار مع أنه مردي للإعتذار وإن شاء الله راح أفهم منه السبب بس يكلمني وأفضها سيره |
أنا متابعة مشكلتك يأختي كيان الشوق وماشاء الله العضوات ماخلوا شئ أقوله
المهم خلاص لاتخلي الموضوع بينك وبين زوجك يكبر أكثر من كذا ارسلي له مسج ثاني بالجوال عبريه له إنك ضايقة وزعلانه عشان هو زعلان منك واهتمي فيه اكثر دعواتي لك بالتوفيق |
السلام عليكم حبيبتي كيان الشوق
بصراحة كان غلطان في البداية بس رسالتك مرررة قوية والادهى والامر (( حسبي الله ونعم الوكيل )) ما اقولك قوليله انا اسفه ولا ترسلين رسالة اذا جاء وقت نومه ادخلي الغرفة قبله والبسي وتكشخي _ لانك معصبة اكيد ما تكشختي اليوم _ ولما يدخل لا تكلمينه بس اجلسي بحضنه وخلي عينك بعينه وقولي يهون عليك هالوجه الحلو ماتكلمه بصراحة حتى انا ولهت على سوالفك وضحكتك الحلوه وعطيه بوسه حلوه ... صدقيني هذي افضل طريقة وراح يضييييع وما يقول ولا كلمة وبعدين مو شرط الليلة اشرحي سبب زعلك بطريقة انثوية والله يسعددنا ويةفقنا ويسخر ازواجنا لنا ويسهل امورنا وهذي الدعوات لكل النساء ... |
فيه نقطه في الموضوع <<<< محققه سابرينا
انا اقول احتمال سكر الباب ونسي وقفله لكن المشكله انه ماتكلم ودافع عن نفسه لو سواها .. ثانياً لازم تستخرجي الكلمات من فمه عشان تعرفي القضيه .. وبعدها تقدري تتحكمي هل تعتذري ام لا. ونصيحتي تعتذري عن رسالتك لأنها كانت القشه اللي قصمت ظهر البعير فبعدماكان الحق معاك صار ضدك ... والله معاك وخبرينا بالنتايج .. |
| الساعة الآن 12:31 AM. |
Powered by vBulletin® Version 3.8.7
Copyright ©2000 - 2026, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©