|
اطلع مع خطيبي واكلمه من وراء اهلي
السلام عليكم
أنا بنت و كاتبه كتابي من سنه تقريبا و زواجي بعد شهرين باذن الله زوجي و لله الحمدالله جدا متفهم و عاقل و يحبني و أحبه موووت (ما شاء الله تبارك الله لا حول ولا قوة الا بالله) موضوعي كالتالي: أنا وهو من نفس الجنسيه وهو أكبر عني ب 8 سنوات بس أنا من بيئة بدويه (اهل بر) و هو من بيئة حضريه (اهل البحر) وافقت عليه و انا ماعرف اي شيء عنه بس اهلي و اخواني يعرفونه و سمعته ما شاء الله تبارك الرحمن عاليه المهم عاداتنا نحن البدو شديده و معقده شوي لدرجه ان في اشيا جايزه و حلال و كل شيء بس يحرمونها علينا عشان كلام الناس و غيره و هذا من باب الحرص و الخوف علينا أول ما كتبت كتابي كان شرط الوالده لا مكالمات و لا مسجات و لا شيء :( مع العلم ان حفلة الملجه كانت كأنها عرس يعني دخل علي و يلست معاه و تصورنا و غيره ومشينا على الشرط لمدة شهر واحد بس!!!! هو دور رقمي من عند أخته وطرشلي مسج ومنه أنا عرفت رقمه بس من خوفي ع طول قلت للوالده وحذرتني ما ارد عليه ... المهم عشان ما ادخل بالتفاصيل وااايد أنا بالبدايه قمت ارد على المسجات و بعدها قمت اكلمه و الحين قمت اطلع معاه برضاي لأني فعلا احس اني محتاجه اشوفه (محد يعرف عن هالشي لا أهلي و لا أهله يعني بيني و بينه و بين الله) ازيدكم من الشعر بيت انا قلتله عن فكرة الطلعات يعني مني انا طلعت الفكره لأن هو مايبغي يجبرني على شيء لأن مثل ما يقول مايعرف شو ظروفي فأنا متى ماحصل الفرصه اقوله و نطلع (ايي ياخذني بوقت دوامي بالجامعه) ---ّ على فكره طلعاتنا كان فيها بس بوسات وضمات و بس ومستحيل يصير بينا اكثر من جيه لأن هو فعلا ريال يتحكم بنفسه وهو مايبغي شيءء اكثر من جيه (تقدرون تقولون حب عذري) ما شاء الله لا حول ولاقوة الا بالله العلي العظيم هو رغم ان نكلم بعض بس للحين يحاول يقنع الوالده ان يكلمني و يشوفني بس هي مو راضيه وهو يالس يحاول معاها لأن يريد يريحني من الوسواس اللي أنا فيه لأن وبصراحه قلتله ابغي كل شيء جدام اهلي مع انه ريلي وحلالي بس انا متخوفه من شيء واحد وصارحته وقلتله أخاف ايي اليوم اللي تشك فيني وتقولي أنتي سويتي هالشي من ورا اهلج تدرون شو كان رده، قالي: (أنا مستحيل اقولج هالكلام واذا حصل وقلته قوليلي و الله أنته ريلي وحلالي وأنا ما سويت هالشي ألا لأني عارفه أنك حلال و انا واثقه من نفسي) بغيت رايكم و ريحوني هل هالانسان الطيب المتفهم و العاقل من يوم ما عرفته وللحين بيتغير علي؟؟؟؟ و الله أحبه و هو يحبني وأنا مرتاحه وما وسوست ألا لأن هاك اليوم كانوا اهلي بيكشفوني لأن كل شيء يبين علي يعني ما عرف اخبي شي، ومن قلتله أن اهلي كانوا بيكشفوني وتميت اصيح قطع مكالماته ومسجاته لفتره عشان يبعد العيون عني ... يعني بصراحه هو خاف علي وقالي مابغي اكون السبب اللي يضيق صدرج وصح ان مب سهل اقطعج بس هالشي حل لفتره معينه على فكره هالموقف كان من شهرين أو اكثر وكل شيء رد مثل ماكان المسجات والتلفونات و الطلعات و حياتنا روعه و الحب حلو ودايما اقوله (ماذقت طعم الحب ألا منك) وبالعمد اقوله هاجيه عشان يعرف أن انا فعلا ماعرفت حد قبله يعني هو اول ريال يدخل حياتي وادعولي يصدق هالشي يالله يارب تحرسنا من العين وتزيد الحب بينا لأخر يوم بحياتنا (قولوا آآمين) الإشراف: تم تعديل العنوان ليناسب النص |
نصيحه حاولي تتواصلين معه عبر الهاتف فهذا الرجل سيصبح زوجك ان شاء الله و هو متعطش لمعرفة طباعك .
و فقكم الله |
الله يوفقك ويسعدك ويحفظك من الحاسدين
بس أنصحك نصيحة اخت لا تطلعي معاه حتى لو إنه زوجك واكتفي بالمكالمات والرسائل فقط أفضل لك وله وصراحة أنا ماشوف أنه فيها شئ عادي تكلمينه غريبه اهلك يمنعونك بس معليش عشان خواطرهم لا توضحين لهم إنك تكلميه وانتبهي وقفي الخروج معاه والحمدلله هانت كلها شهرين وإنت تحت سقف واحد إن شاء الله هههه الله يوفقك يارب |
عرسوا بسرعة و فكوا روحكم ....
الله يعينكم بصراحة على هالعادات و التقاليد الي ما لها اي معنى و لا طعم!! |
السلام عليكم
أختى عروس 2007 الله يتمم زواجكم على خير :14: ....أنا من وجهة نظرى ان يكون ما بينكم مكالمات و مسجات لان هذه الفترة فترة تعارف لاكن الطلعات يا أختى الغالية أنصحك بأنك ما تطلعى معاه صح هو زوجك بس لو أهلك عرفوا هالشيء سيكون موقف كثير محرج و ما تدرى ماذا يفعلون:29: أجلى يا أختى الطلعات إلى ما بعد الزواج و أنتم ما شاء الله كمان شهرين و تتزوجوا و بعدها تخرجى معاه و أنت مرتاحة اصبرى شهرين فقط أنا صار لى سنة و نصف ما شفت زوجى و لا طلعنا لان كل واحد منا فى بلد و حاولى إنك تتكلمى مع أمك و تقنعيها أنك تتكلمى معاه حاوريهابالكلام الطيب و الاسلوب الحلو :22: و يارب يسعدكم مع بعض و يبارك لكم فى حياتكم و يحفظكم لبعض و يبعد عنكم شر الحاسدين |
مشكورين على ردودكم بس ابغي حد يطمني أو يزيدني خوف مثل ما تبون المهم ابغي الصراحه وتنصحوني انتم يالرجال كيف ابينله في كلامنا ان انا سويت ها كله عشان افهمه ويفهمني و نبدأ حياتنا صح واخليه يبتعد كل البعد عن الشك حتى اذا كنت معاه بعد شهر وصرت عنده
هل أنتم يا الرجال تشكون بكل صغيره وكبيره يعني الحين اللي صار بيني و بين زوجي بيقيسه على اساس اني احبه ومشتاقتله (مثل ما قالي) أو بيشك فيني اذا مب الحين بعدين :( ؟؟؟؟؟؟ مع العلم هو دايما يقولي انتي شاطره بالكلام واتجننييين بس من اشوفج ما تكون فيج الجرأه اللي في التلفون :( لأني استحي وارتاح بالمكالمات اكثر بس من اشوفه فالبدايه اموت من المستحى بس بعدين ادرج معاه لأن اسلوبه فوق الراقي :) ربي يحفظه لي (ما شاء الله تبارك الله ولاحول ولا قوة الا بالله) كل شيء صار بالتدريج يعني حتى هو من نفسه يقولي الحمدالله الخوف والربكه اللي كانت فيج من ايام الملجه راحت :22: وصرنا نفهم بعض وااايد وهذا أهم شيء عندي (كنت دايما اتمنى افهم الانسان اللي بعيش معاه و الحمدالله كل شيء تمام هو يقولي انا صريح معاج وانا مصدقتنها بس الشيطان يخليني اوسوس وحتى احيانا اتغير عليها بمجرد التفكير بهالامور و زوجي يعرف اذا تغيرت عليه بس ما اقدر اقوله واكتفي بالسكوت و لما يلح علي اقوله أنت يتهيألك و أنا ما فيني شيء يقولي ياليت و اتمنى هالشيء (هو يلاحظ علي لما اكون جافه ومايسمع الكلام الحلو مني) بس غصبا عني يوم اوسوس مايطلع مني هالكلام و انا ما احب اجامله فأضطر اني اتم ساكته ياليت فهمتوا علي ابغي نصايحكم وكيف احل هالمشكله اللي انا فيها، بليز لا تجاملوني...انا ابغي اشوفه مره وحده كأخر لقاء قبل موعد الزواج لأني مشتاااااقتله وااايد ومحتاجه حضنه لأن باقي عن العرس شهرين ونص فأنا بحاول اشوفها خلال هالاسبوعين ان شاء الله اذا سمحت الظروف :) لا تقولولي لا تشوفينه و تخرعوني لن هو فعلا محترما ومش في باله اللي تتوقعونه من الرياييل المتهورين صدقوني انا واثقه و عارفه زوجي اترياكم على احر من الجمر |
مشكورين على ردودكم
والوالده الله يهديها ويخليها ألنا عنييييييييده ومستحيل تخليني اكلمه من جيه اضطرينا نسوي هالشي من وراها على فكره ترى اهل زوجي في البدايه حاولو معاي عشان اكلمه وحاولوا مع امي بس ما رضت وانا بينت لهم اني ما اكلمه عشان الوالده ما تعرف اهل زوجي مش مثلنا بالعكس هم بيئتهم عاادي الرجال يكلمون حريمهم و يشوفونهم في فترة الملجه بس زوجي نصيبه غير عن باقي اخوانه لأنه خذ وحده و اللي هي أنا (عندنا العادات والتقاليد فوق كل شيء وحتى على حساب راحتنا) بس انا فكرت هالمره أن هذي مرحله حلوه بحياتي و لازم اعيشها وبصراحه أنا الوحيده طلعت غير عن خوات وسوت اللي يريحني ويريح زوجي (بس يمكن خواتي سوو مثلي بس محد يعرف الله اعلم :) |
يابنت الحلال وسعي صدرك ولا تخلين وساوس الشيطان تلعب في راسك وانا انصحك انك استمري كلميه وكل شي وبطلي الطلعات وخلي حجتك ان باقي بس شهرين على زواجكم وانك تبينه يشتاق لك اكثر ..:25: ,,,, وشيلي من بالك انه راح يشك فيك وانه راح يفكر تفكير خطأ يوم انك طلعتي معه..... ارجو من الله ان يجمعكم على خير وتتهنون مع بعض ويجعلك قرة عين له ويجعله قرة عين لك ..... |
اشلونج يالعروس ان شاء الله بخير
عسى ربي يسعدج ويا ريلج ......ويتم زواجكم على خير اختي ادري انج مشتاقة حق ريلج لكن اختي احذري خاصة ان الأهل ما يدرون عن اللي يصير بينكم لوصار شيء بينكم يمكن ما يعترف الرجال ويقول مو انا ولا لو خذ اللي يبيه يمكن يقول ما ابيها خلاص فاحذري ولا تقابلينه الا في مكان عام بالنسبة انه يعايرج فييوم من الأيام انج طلعتي معاه ....انتي لا تفتحين عيونه على هالسوالف بالعكس قولي له انا ما أطلع معاك ولا أرتاح لما اكلمك الا لأنك زوجي حلالي واحمد ربي انه رزقني بزوج مثلك انت اللي تمنينته والحمدلله اللي جمعنا بالحلال وعسى ربي ما يفرقنا ..........فهمتي جي كلميه ولا تحطين الشك في قلبه وتعلمينه اشلون يشك فيج هاي غلط لا عاد تكررين عليه مثل هالسوالف ولا عاد تسوين شيء انتي بتتندمين عليه من غير ما تسألينه اسمحي لي كلامي متلخبط ان شاء الله وصلت المعلومة صح . الله يسعدج ويجمعكم على خير . |
هذي الفترة هي اجمل ايام حياتكم والمغامرات اللي مسويتها مع زوجك خلتها اجمل
ما عليك من امك واهلك هذا زوجك وهو ما راح ياخذ عنك فكرة سيئة بسبب اللي تسوينه من ورا اهلك هو فكرته عنك انك متحرره وتفكيرك منطقي وسليم وان اهلك تفكيرهم رجعي ومتحجر وهذا الشيء اللي يخلي خطيبك يحبك اكثر |
وفقك الله وجمعك به على خير
نور ماقصرت خليها مكالمات ورسايل والطلعات أجليها شوي خلاص هانت ياأختي كلها شهرين وتصيرين معاه بإذن الله |
الله يسعدج ويحرسج من العين... اميييييييييين
اما على طاري الطلعات انا كنت اسوي نفسج في فترة الخطوبه وكنت خايفه ان ياخذ فكره عني اني جريئه مع ان على فكره هو اللي كان يصر ويقول انتي زوجتي وحلالي بس بعد كنت خايفه بس الحمدلله تزوجنا وعاااااااادي بالعكس هو دايما يقولي ان فترة الخطوبه حلوه لانه يحسها فترة طيش ووناسه يعني نطلع بالخش بس حلال ودايما اي حد يبي يتزوج يقوله اطلع واستانس وبعض الاوقات اقوله انه المفروض ماكنا نطلع هو يقول لا هالايام مابترجع لازم كنا نعيشها بس ارتاحي ولاتخافين عادي مريت بنفس تجربتج ولين الحين مستانسه الحمدلله ومرتاحه والله يديم الوناسه والسعاده عليج وعلي وعلى كل بنات المنتدى |
والله يا أختي صراحة أنا رأيي أنك تحاولي في أمك مرة ثانية
وثالثة ورابعة حاولي يمكن الله يفرجها عليكي .....إللي أبغاه إن أمك توافق لك تروحي وتطلعي معاه لو مرة وحدة وبعدها تقوللي لزوجك إنك قلتي لأمك وإنك ما تقدري تسوي شي من ورا أهلك باذات الطلعات لأنها صعبة ..... هذا الكلام راح يفيدك بعدين لما تتزوجي ....... على العموم أنتي ما سويتي شي حرام هذا زوجك وحلالك ومن حقك وصراحة كمان على حسب شخصية زوجك هل أنتي شايقته متقبل خروجك معاه ولا فيه علامات إستغراب ؟؟؟؟؟ لا تحاولي تبيني له أنك تحتالي على أمك وأهلك ....دائما بيني له إنه ضميرك مأنبك دمتي على بركة الله |
ياختي هو زوجك بس مايصير من ورى اهلك تطلعين
اصبرو لين الزواج وتنحل كل اموركم الله يوفقك ويسعدك يارب هموووم |
انتفاضة قلب ---> آنا قلتله نبغي بعد طلعه وحده وخلاص لان العرس قرب وهو مب قادر يحصل هالفرصه بسبب شغله - وهو مستانس علي الطلعات وكل مايمر علي المكان اللي كنت فيه انا معاه يطرشلي مسج ويقولي المكان حلو معاج و بس وافرح وااايد :) ---> وكلامج صح لازم مافتح عينه علي سالفة الشك اكثر من جيه بس آنا فاتحته بالموضوع كذا مره يمكن ٣ او ٤ مرات بس من مده و خلاص ما بعيدها (بس آنا ما انلام لان اهلي يعقدوني --- دايما يقولولي طبيعة اي ريال شكاك و الريال ما عرف شوفيه لدرجه قمت احاسب بكل تصرفاتي وحتي ان كانت عفويه) :(
***نووور*** --> كلامج يجنن و ريحني وااايد وانشاالله بكلمه بالهطريقه ----> مشكوره فديتج و الله احس اني ياهل مافهم ولا عرف كيف اتصرف و هو فعلا مايفكر يشك فيني بس انا اوسوس (وهو بالعكس ذايما يقول للوالده ونعم التربية--> الوالده هي خبرتني عن هالشي يوم كان يحاول يقنعها انه يكلمني وايد فرحت) :) يجرح ويداوي --> كلامج بالضبط اللي هو قاله و بعد قالي اللي تشوفينه صح ومقتنعه فيه سويه :) هـمــسـات --> فديتج نفس احساسي و احس زوجي مثل زوجج و بين فترة و الثانية يقولي مغامرات حلوه نبغي نكررها بس ظروفي صعبه :29: سمو الأمير ---> مافي اي علامات استغراب ابدا بالعكس واااايد يفرح ويكون اثر الطلعه علينا لمده و لدرجه نشتاق اكثر و يقولي الطلعات بتذبحني مب قادر اصبر نج :) |
السلام عليكم ورحمة الله وبركاته
اختي الفاضله: تبغين الصراحه ومن غير زعل انا مااحب التصرفات هذي انك تخرجي من غير علم اهلك اسمحيلي انا اشوفها كأنك ؟؟؟؟؟؟ يعني التصرفات هذي توحي لي ولغيري انك طالعه مع واحد غير حلالك ياشيخه ايش يفيدك لو واحد من اخوانك شافك معاه!!!!!!!!!!! طيب صار لكم حادث لاسمح الله !!!!!!!! ودخلتوا مستشفى واضطروا المستشفى بتبليغ اهلك واهله بس فكري ايش بتسوين؟؟ كيف اهلك بينظروا لك؟؟؟؟ انك خاينه وطلعت من ورا اهلك بنتنا طالعه للجامعه واثرها تهرب مثل البنات اللي مايخافو الله ويطلعوا يقابلوا الشباب صحيح خطيبك بس لعلمك انت لسه تحت جناح اهلك انت لسه مسؤوله من ابوك واخوانك متى زوجك يكون مسؤول عنك لما تروحي بيته ويتقفل عليكم باب غيرك كذا لأ انا لو اختي تسويها والله مااكلمها وتنزل من عيني انتبهي اختي واسمحيلي ايش هذا الكلام ودي بس اقابله مره وبعدين خلاص انا اسفه واسمحيلي كأني جالسه مع احد البنات اللي يطلعوا مع شباب استغفر الله العظيم سامحيني اول مره اكون قاسيه في ردي بس بصراحه الكلام والحركات ماعجبتني يعني بالله خايفه تكلمي امك وتفتحي معاها الموضوع ومو خايفه من الحركات اللي تعمليها تخرجي من ورا اهلك وتكلمي من وراء اهلك قدامك شهرين تطلبي من امك،،، امي ابغا اكلم خطيبي لو مره في الأسبوع عشان اتأقلم عليه وافهمه قبل الزواج واذا قالت لك لأ كلام الناس قولي لها وايش دراهم الناس انا هنا في بيتي وبغرفتي اتكلم معاه ونتفاهم ونتعارف على بعض اكثر واسكر السماعه انا مارح اتكلم في الشارع وبين الناس وفي المجالس والكل يعرف اني اكلمه هذا الكلام بينا احنا العائله وكلها شهرين ياامي ونتزوج اطلبو تعزموه على العشاء جلسه عائليه واجلسوا كلكم معاه كلمي ابوك بالموضوع خليه هو اللي يفتح الموضوع مع امك وانه خلاص مابقي وقت على الزواج ويخلوكم تتعرفوا اكثر على بعض حاولي تقنعيها احسن من انك تطلعي من وراء اهلك واذا مارضيوا تسمعين كلامهم وتتركي عنك هذي الحركات مابقي شي اصلا على الزواج والله يستر عليكم وييسر أمركم |
http://www.l22l.com/l22l-up-1/0ca272a33f.gif اللهم آمين وبارك الله لكـ ِوبارك عليكـ ِ وجمع بينكما بخير ’’ حبيبتي ترى مو حلوهـ تطلعي من ورا أهلكـ تحسسي نفسك وزوجك وأهلك انك تعملي شيء غلط !! كلمي أهلكـ قوليلهم كيف اعرفهـ لو ماكلمتهـ وشفته !! حاولي تقنعيهم وقولي لهم انهـ زوجك خلاص .. ولو قدرتي اقنعيهم مبدأيا ً ان احد اخوانك الصغار او الكبار يخرجو معاكي ,, على الاقل عشان زوجك يعرف انكـ مابتستغفلي اهلكـ ,, ترى الرجال يحترمك من احترامك لأهلك .. اقنعيهم اما تكلميه من وراهم على التيليفون مو مشكلة .. الخروج من وراهم هو المشكلة لأنهم لو عرفو ممكن يفقدو الثقة فيكـ ِ.. ومبروكـ والله يعجل بزواجكـ ,, والله يسعدك ويوفقك دنيا وآخرهـ ويسكنك الفردوس الاعلى انتي ومن تحبي .. http://www.l22l.com/l22l-up-1/0ca272a33f.gif |
اقتباس:
ماشاءالله عليكي يا أختي روح الغالي والله عودتينا على رجاحة عقلك كلامك عين العقل الله يوفقنا وإياكي |
هو زوجك وحلالك بس حاول ماتكون طلعاتك معاه كثير
وان شاءالله يكون زواجكم قريب علشان ترتاحين نفسياا اختي تحيــاتي لك |
السلام عليكم ورحمة الله وبركاته
اختي الفاضله: ارجوا الإطلاع على هذه الرابط قد يفيدك ما حكم الخلوة بالمخطوبة؟ http://www.66n.com/forums/showthread.php?t=68597 |
يمكن كلامي راح يكون شوية مختلف
بس انا اقللك فللييييييييييييييها قد ما تقدري طالما انو زواجك ما بقي عليه الا شهرين كلميه واخرجي معاه وسوي اللي تبغيه راح تفتكري الايام دي انتي وهوا والله انها اروع ما يكون أنا كنت اروح انا وهوا أوتيل ((بكل أدب)) بدون ما اهلي يعرفوا صحيح انا كنت ابالغ شوية بس والله لها طعمهااااااااا وراح تحسي بالكلام دا لو اتزوجتي ان شاء الله الله يوفقك يارب ويتمم لك على خير ويجمعكم على خير يا رب |
سوي إلي في بالك فترة الخطوبة أحلى فترة إذا ما استمتعتي فيها راحت عليك وشيلي الوسواس من بالك أنا كنت مثلك كل طلعاتي معاه من ورا أهلي والحين لما نتذكر نضحك ونستانس ونقول لبعض شفت كيف كنا خايفين لا ننكشف بس ربي سترها لحد ما صار الفرح عقبالك.......
|
روح الغالي --> الغاليه كلامج علي عيني و راسي بس آنا كاتبه كتابي يعني هو حلالي و من ناحية آهلي هم السبب اللي خلوني اسوي هالشي لآنهم معقدين الامور وا ممنوع حتي اشوفه من ورا الباب بس عشان اجحل عيني بشوفته... حتي احيانا ودي اصرخ واقولهم لا تخلونانكتب كتابنا غير ليلة العرس مدام هذي المعتقدات بعدها عندكم و الله الله ما يرضاها .... احب اهلي واحترمهم و انا احس ان الوالده تعرف اني اكلمه بس ساكته لان ما تبغي اي حد يعرف هالناس و المجمع هم اللي مسويلنا سالفه .... صح نحن لازم نحترم المجتمع بس مب في سالفه مثل هاجيه (يا نااااااس حلالي ابغي احس بطعم الحب اللي ماعرفته الا من زوجي حلالي في فترة الملجه و نشاااالله بعد العرس) انا اريد يكون لنا ذكري حلوه ... والله يوم نذكر الطلعات في مكالماتنا وايدنفرح ونستانس ..... فترة الملجه بتكون مره بالعمر و الزواج نفس الشي فليييييش نعقد بالامور .... صح ان اللي سويته مابيرضي اهلي بس اذا صار واكتشفوا هالشي بقوللهم نفس الكلام اللي كتبته واحس و باذن الله بيقتنعون..... آنا ،و الحمدالله فتاة محافظه عمري ماعرفت رجال قبل هالانسان و هو عارف هالشي (من جيه حبي عذري وتصرفاتي جد عفويه ... واسوي اللي يمليه علي قلبي مش عقلي ... لانها فترة تعارف حب و مشاعر مب مجتمع ونااس)
و عن الفتوي اللي حطيتيها تري ما تنطبق علي لاني كاتبه كتابي و اعتبر زوجته مش خطيبته قمـــ هم ـــر + نورة الفرفورة ----> كلامكم يريح قلبيلان خلاص انا سويت هاكله و ماينفع اتراجع لاني مش ندمانه بعد ما سمعت كلامكم ... ومثل ما يقولون طاح الفاس بالراس :) ..... وبالعكس هالشي خلني اكتشف امور وايده عن زوجي و الحمدالله مرتاحه واااايد و من كلامه :) |
حبيت احط هذا الكلام للاخ منون و سنون لانه يدعم كلامي .... و كلامه جدا واقعي وصحيح مش بس في الحياة الزوجيه في كل شي ... رضي الناس غاية لاتدرك ....
الكاتب: منون و سنون كم روحا في جسدك ؟ - بسم الله الرحمن الرحيم الحمد لله رب العالمين, والصلاة والسلام على أشرف الأنبياء و المرسلين. هوى المرء و أمنياته ترهقه كثيرا, وربما ذلك الهوى و تلك الأمنيات كانت فيما نهى الشرع عنه فتكون سببا في شقائه, و كثير من الناس لا يعلم أن ( الشرع ) أتى بكل ما يخالف الهوى وأن درجة العبد في الجنة منوطة بشدة مخالفتة لهواه , ولك يا قارئ أن تتأمل قول ربنا تبارك وتعالى في كتابه : ( وأما من خاف مقام ربه و نهى النفس عن الهوى ), ما النتيجة ؟ ( فإن الجنة هي المأوى ) , ولك أن تتأمل بارك الله فيك وسدد خطاك قول المصطفى عليه أفضل الصلاة وأتم التسليم ( لا يؤمن أحدكم حتى يكون هواه تبعا لما جئت به ) وهذا فيه إشارة إلى أن كثيرا من أهواء النفس تكون مخالفة لما ابتغاه الله عز وجل من خلقه . ولك أن تتأمل بارك الله فيك قول رسول الله صلى الله عليه وسلم : ( حفت النار بالشهوات و حفت الجنة بالمكاره ) , وفي ذلك القول البليغ من المصطفى صلى الله عليه وسلم إشارة أيضا إلى أن هوى النفس لا يتوافق مع أوامر الله , و من أجل أن تدخل النفس الجنة لا بد لها من مخالفة هواها و فعل ما تكرهه لأنها جبلت على الراحة والدعة. فيا كل متزوج و متزوجة أنت تحتاج إلى مجاهدة هواك كثيرا حتى تكون سعيدا في حياتك الدنيا والآخرة , و تحتاج إلى صبر كبير حتى يتحقق لك ذلك, و صدقني , بالكاد تجد وقتا لمجاهدة هواك , و لن تملك الوقت الذي يسعفك في تحقيق هوى نفسك + هوى الناس . لا تملك في داخلك إلا روحا واحدة فلا تعش حياتك بأرواح الناس. تريد تحقيق رغبة فلان و علان , فلان يقول زوجتك كذا , و فلانة تقول لماذا زوجتك لا تفعل كذا , فلان يقول زوجتك ( دبه ) , وفلانة تقول سيارة زوجك قديمة . تلكم حياتكم يا أزواج , عيشوها كما تريدونها أنتم و أنتم فقط بما يوافق الشرع لا كما تريده عقول و رغبات الناس. صدقوني , ستستريحون كثيرا. من مدونات : أبو مريم رحمه الله |
اقتباس:
الريايل مثل اصابع اليد لو هالشي يعجب زوجك يمكن غيره ما بيعجبه.. ودامه قالك هالكلام انك حلاله وما سويتي شي غلط ما انكم مخطوبين بس ولا كان هذا كلام ثاني بس انتوا ملكتوا وصار زوجك حلالك وانت حلاله يعني عادي اختي...... بعدي الوسواس ومثل ما قالوا الاعضاء الطلعات خليها لبعدين احتراما للاهل وخلي بينكم المكالمات ما مشكله والله يوفقك اختي لما يحبه الله ويرضاه.. سلاااااااااام ظلم الناس |
يا حلوه ليش مستعجله! خلي شئ لبعد الدخله! وعلى الطلعات فإنتوا لاحقين الشهرين مش بعيد!
نصيحتي لج بلا طلعات وإكتفي بالمكالمات والمسجات!!! خليكم مشتاقين لشوفت بعض لين يوم الدخله...ترا إلها مذاقها الخاص! والله يوفقج |
:) مشكووورين و ماقصرتوا
وخلاص قراري الاخير ما شي طلعه للعرس عشان نشتاق لبعض اكثر مع اني ميته من الشوق و هو كذلك .... اهم شي اني بعدت الوسواس من بالي و اهم شي الثقه بالنفس و ثقته هو ... ادعولي ان الله يستر علينا ليوم العرس و نرتاااح و تكون ذكري حلوه بينا مش سبب للمشاكل بعدين ...... قولو ان شاء لله و لا تحرموني من دعواتكم :) |
أنا ما لفت انتباهي بالموضوع غير "ما شاء الله تبارك الله و لا حول ولاقوة الا بالله العلي العظيم" :d .. ياختي مو انتي وبس اللي مرتبطة، فيه غيرك متزوجات ومخطوبات وكل واحدة الحين ما تخلى :14:
هههههه مادري ليش بنات البدو إذا انخطبوا يخافون من العين بقوة... والله هالشي لاحظته في البعض من صديقاتي البدويات :d |
اقتباس:
يغلق لأكتفائه بالردود ونيابة عن جميع الأعضاء نسأل الله لك التوفيق والسداد |
| الساعة الآن 02:48 AM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©