|
صديق زوجي الذي لايبالي....
السلام عليكم ورحمة الله وبركاته.... مشكلتي تكمن في تعلق صديق زوجي به.... حيث ان هذا الصديق لايترك زوجي في حاله ابداً دائم الاتصال به لاأكذب عليكم ان قلت لكم انه يهاتفه مابين 5 الى 10 مرات يومياً ودائم الخروج معه (شبه يومي).. انا دائم اكلم زوجي وانصحه واقوله مايصير كذا هذا مايخليك في حالك وانت كله معه وتطاوعه والله لو كان عندي ضرة كان عدلت بيني وبينها وهذا صديقك انت معه دائماومن دون فايدة طلعات على الفاضي.. مرات ينفع كلامي معه فيطنش صديقه ولايرد على مكالماته ولايخرج معه ويقعد معي واذا بغيت اطلع يطلعني ومرات مايهتم ويقول لي انا حر واسوي الي ابي متى مابغيت اطلع معه بطلع ماتقدرين تمنعيني ومرات احسه ماوده يطلع معه بس صديقه هذا يلح عليه ويقوله اذا ماجيت معي بقاطعك فيضطر يروح معاه انا صراحة تعبت من هالعيشه ساعات اكون محتاجه حق زوجي ولااشوفه جنبي والسبب صديقه مشغول معه وساعات اكون محتاجه اطلع اشتري اغراض ولايكون موجود والسبب معروف مع صديقه مع العلم صديقه متزوج وعنده بنت وانا مستغربه من زوجته شلون راضيه له كل تاركها لحالها لانه حتى لو زوجي ماراح معاه نفس الشي يطلع لوحده ومن دون زوجته ومستغربه اايضا من كثر هالطلعات الي عنده لانهم مايروحون مكان واحد كل مرة محل وزوجي دوامه من الفجر الساعه 5 الى الساعه3 العصر وشغله ميداني يعني محتاج للراحه مو الهياتة والله انه زوجي يكسر خاطري اذا كان في غرقة نومه(بعد الدوام) ويتصل صديقه الف مرة عشان يقعده على شي تافه بعض المرات اذا حسيت بالجوال يدق احطه على السايلنت وامسح المكالمات التي لم يرد عليها عشان مايشوف المكالمات ويدق عليه ماادري تصرفي هذا صح ولاغلط... احس انه زوجي مب مستقر كله طاير وانا تعبت نفسيا لاني ياما احتجته ولااشوفه جنبي حتى بعض المرات وحنا طالعين يتصل عليه ويخرب ويقوله تعال لي ضروري عاد انا هنا اجن اقول هذا مايحس ماعنده ذرة احساس والله انه بعض المرات وحنا بالنام يتصل ويقوله اطلع لي بس شوي ابغاك في شي ضروري صراحة بديت اغار منه من كثر مازوجي يقعد معاه اكثر مني.... عذروني على الاطاله اللي عنده حل يعطيني ولكم خالص امتناني |
لا حول الا بالله بس الظاهر انه يعرفون بعض من زمان.... بعدين زوجك مو عزوبي عشان صديقه يتصل فيه متى ما يبغي! قولي هالكلام لزوجك وخليه يوصله لصديقه انه مو في أي وقت يتصل! عيب! لو بيت اختي ما اتصل متى ما ابغي واراعي انه يمكن زوجها فالبيت! وخليه زوجك بطريقته يوصل هالكلام لصديقه....
الله المستعان |
والله هذي مو مصيبه هذي طامه
بس في حل يمكن يكون طويل شوي حاولي تتعرفين على زوجته في البدايه وبعدين حاولي تعرفين حجم علاقتها بزوجها وليش هي مو مهتمه بعدين قولي لها وش مضايقك بالضبط وحلوها بطريقتكم أكيد هي تقدر تأثر على زوجها بطريقه معينه وطمنينا عن النتيجه:d |
اقتباس:
ايوة يعرفون بعض من زمان من ايام الدراسه وعلاقتهم جدا قوية يما حاولت اقنعه انه يوصل له هالكلام بس زوجي مو راظي يوصله يقولي انا متى مابغيت ماادر عليه مابرد امامسألة انه اقوله لاتتصل فهذي مستحيله لان هو اعز اصدقائي وانا عارفه انه هالمسأله عيب يعني الناس ماتتصل في اي وقت يتصلون في الاوقات المناسبه بس هذا غير عن البشر يتصل في اي وقت سواء في الصباح الباكر او في آخر الليل مايهتم بس مااأقول الا الله يصبرني ويحل مشكلتي |
اقتباس:
المشكله اني اعرف زوجته لكن زوجته مسكينه من اهل الله ماتقدر عليه وحجم العلاقه بينهم عاديه يعني ماحس انهم متعلقين ببعض لان لو كانت علاقتهم قويه جدا ماكان تركها على طول بس مامرة حاولت اني اوصل لها اني متضايقه من زوجها لانها تكسر خاطري اقول كفايه عليها الي هي فيه مابي ازيد همها ربي يفرج همي ويفرج هم كل مهموم عزي مشكورة على مرورج وان شاء الله اذا انحلت المشكله اطمنج |
عزيزتي الله يعينج ويفرج همج يااااااااااااااارب
نصيحتي يالغاليه انج ما تناقشين زوجج بموضوع صديقه واتصالاته لانج بهالطريقة بتخلين المشكلة تكبر وتتعقد ، زوجج اذا يبي ما بيرد على مكالمات صديقه بسهولة ، بس حاليا هو مرتاح ومو متضايق من الاتصالات واذا كانوا اصدقاء من ايام الدراسة يعني من فترة طويلة يعني هم متعلقين ببعض وااايد حاولي اذا شفتيه يطلع اتقولين له : الله يوفقك ، او ان شاء الله تستانس مع صديقك ، بس بشتاق لك او حاول انك ترجع بسرعة بجهز لك مفاجأة او اي شي من هالقبيل...وياليت تقولين لزوجته انها تحاول تشغله في البيت بمفاجأة معينة او تطلب منه انه يطلعها مكان .. ولا تحاولين تمسحين المكالمات او تلعبين بالموبايل علشان ما يزعل منج اذا عرف .. والحمد لله انه يطلع مع صديقه وما عنده سوالف ثانية لا سمح الله فلا تتضايقين الغاليه وان شاء الله تتصلح الامور وتبشرينا والله يسعدكم ويوفقكم ياااااااااااااارب اختج ---- لمني بشوق |
مشكورة عزيزتي لمني بشوق على ردك الرائع بحاول اعمل بالنصائح الي قلتيها وان شاء الله يفيد وصحيح ماذكرتيه انا كل مرة اكلمه عن صديقه هذا يتضايق ويزعل انا مو زعلانه من خروجه مع صديقه هذا بس ابيه يخفف من اتصالاته وان يحدد له يوم اويومين على الاقل يخرج معه فيه مو دائما والحمد الله انه ماعندهم سوالف ثانيه وان شاء الله تتصلح الامور وبحاول اشغل روحي ولااضايق نفسي عشان لااكتئب سلمتي على مرورك |
حاولي اتشوفين الجانب الايجابي.... يعني على الأقل اتعرفين هو مع من يطلع ومع من يتكلم وعادي تقدرين اتشوفين مكالماته في اي وقت.... ياما زوجات ما يدرون عن رياييلهم وين رايحين ولا مع من ولا حتى يقدرون يمسكون موبايله!
الله يعينج ويسعدج في الدارين ان شاء الله |
الاخت المبتلات الله يكون في عونك هذه مشكلة كبيرة ولكن حاولي انت ايضا ان تنشغلي بامور البيت وان تهمليه لفترة بحجة شغل البيت او متابعة برامج التلفزيون وحاولي الا تنظري اليه واجعلي نفسك دائما منشغلة بشئ ما دون اهمال واجباتك المنزليةولكل حادث حديث
|
يمكن علاقة حميمية دي ناتجة عن شغل مشترك بينهما او شىء معين بيجمع بينهما حاولي تفهمي طبيعة علاقتهما ولا تبالي كتير حاولي تفهميه بلطف انه يفصل بين علاقته بصديقه وعلاقته بيك وببيته حتى يكن في توازن في حياتكما ما تدمري قدامه على علاقته بيه حتى لا يعاند و يزيد واكتر سايسي معه بلطف وحاولي تشغلي وقتك و تناسيه وان شاء الله ينصلح حاله
|
اقتباس:
صدقتي الهم مشكورة على مرورج الذي اراحني |
اقتباس:
ممكن توضح اكثر شاكرة لك مرورك |
الله يعينك أختي على هذي البلوه
شوفي اتصلي بزوجت صديق زوجك وكلميها في الموضوع يمكن تتفهم الوضع وتنصح زوجه وأنتي أختي كلمي زوجك وخليه يحط حد لهذا المشكلة أما انتي او صديق زوجك والله يكون في عونك |
اقتباس:
لأني مرة لمحت من كلامها انها موراضيه بلوضع بس ماتقدر تسوي شي وانا ياما كلمت زوجي انه يحط حد لهذه الصداقة لكن اما انه يوعدني او انه يتهرب او انه يسكتني الله يكون في عون الجميع دعواتكم لي الله يفرج كربتي تحياتي |
والله انا مره كنت بكتب مشكله في المنتدى عن نفس الموضوع
حتى انا صديق زوجي كل شوي يتصله ولا والقهر يوم البس واجهز بطلع معاه يتصل يقوله انا تحت في بيتكم ابي اشوفك انقهر ولا زوجي شغله شفتات من اول مايرجع صديقه ينطره في المجلس زوجي بعض الاوقات مايبي يروح بس شيسوي انا تمر علي اوقات اقعد اصيح بس شسوي اذا لقيتي حل قوليلي مع انه خف الحين بس مافي الا الدعاء والله يفرج همك ان شاء الله |
نفس مشكلة اخو زوجى
وازيدكم من الشعر بيت .. مرافقهم حتى فى الاجازات والسفر فى انتظار الاقتراحات |
انا كمان نفس الحاله لدرجة ان ادا سهرنا مع بعض نصف الليل والى الفجر يتصل بزوجي ويطلعو يفطرو براا
والله شي يقهر........ لكن الصبر زين........ |
اقتباس:
حاسه بشعورج اختي همسات انا ياما بكيت من تصرفات صديق زوجي وان شاء الله بس القى حل اقولك الله يفرج همي وهمج |
اقتباس:
ولا كان جنيت لو انه يسافر معنا وان شاء الله الاعضاء مايقصرون في طرح الاقتراحات مشكورة |
اقتباس:
في غيري يعاني وانا كنت اعتقد اني الوحيدة ردودكم هذي اراحتني وان شاء الله ربي يفرج همنا اختي العروسة الصغيرة صج شي يقهر انا كثير امر بكذا مواقف واجلس ابكي مالي الا الصبر ربي يعين مشكورة اختي العروسة الصغيرة على مرورك |
ياختي مشكلتك عكس مشكلتي انا الي الي صاحبة ومو تاركتني في حالي
اربعة وعشرين ساعة تكلم مافي احساس وتبغاني اطلع معاها وتبغي تعرف كل خوصوصياتي بس اقول جد الله يعينك مصيبة مو مشكلة بس واعرف شعور زوجك ان ما يقدر يجرحة بس انتي ممكن تتعرفي علي زوجتة وتكلميها تقولي اليها |
اليوم صار موقف بجد قهرني [/FONT][/CENTER]من مدة زوجي وصديقه متفقين انهم يشتركون في صاله رياضيه يتدربون فيها المهم ان صديقه اليوم راح يسجل في هذي الصاله وبيسجل زوجي معاه وطلع دوام المدرب اللي بيدربهم العصر وزوجي مايقدر يروح العصر بحكم عمله اتصل عليه صديقه وقاله ورد عليه زوجي بأنه مايقدر يروح معاه العصر يالمغرب ولا مايقدر فصديقه زعل وقاله انت تقص علي ماتبي تشترك معي فهمه زوجي بظروفه وانه لو بيده انه يروح معاه بس الظروف اقوى لكن صديقه زعل وزوجي احتار معاه قلت له انا مو اجباي تشترك معاه هو مو غصب كل واحد وظروفه قال لي زوجي بس انا متفق معاه من قبل مايصير اخون العهد قلت له انت ماخنته بس ظروفك ماتسمح لك المفروض هو يقدرظروفك قالي بشوف بحاول القى طريقه مناسبه عشان اروح معه بجد انا انقهرت منه احس ان هالشخص عديم الاحساس |
اقتباس:
وانا احس بشعور زوجي انه مايبي يجرحه بس صديقه هذا ليش مايحس قاهرني بشكل ماتتصورينه بس ماأقول الا الله يعين والله يعينك على صديقتك مشكله الناس الي مايحسون مشكورة مروة |
| الساعة الآن 08:44 AM. |
Powered by vBulletin® Version 3.8.7
Copyright ©2000 - 2026, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©