|
حالتي النفسية سيئة للغايه ( خطيبتي وانـا)
السلام عليكم
صراحة يا اخوان ويا اخوات ما عمري بحياتي هذه ندمت على شي مثل ما ندمت على الاقدام على الزواج وعلى مكالمتي لخطيبتي اثناء فترة الخطوبة والحمد لله قضاء الله وما شاء فعل .. والحمد لله على كل حال . فكل شي .. من البداية الغلط مني.. ويتحمل جزء من الغلط امي التي اوصلت البنت الى القمر بمدحها والثناء عليها . .. استخرت وارتاح قلبي حينها .. ولم اكن اعلم ما خلف الاقنعة .. من واقع مرير .. وقت النظرة الشرعية. حينها كنت اسعد رجل في هذا العالم من تخطيط للمستقبل وما الى ذلك من احلام يقظه عشتها في ذلك اليوم . بعد كتب الكتاب حاولت جاهداً للمكالمة خطيبتي وهو اكبر خطأ في حياتي ندمت .. بالعامية يا احبائي قمت بالاتصال على عمي ( ابو البنت) وطلبت منه رقم خطيبتي قال لي : ما عندها جوال ... قلت ما عليه رحت اشتريت لها جوال وطلعت لها رقم وليتني ما شريت ولا طلعت .. وما عمري فكرت الا بالمستقبل بعد الزواج الا ان زرناهم بعدفترة من كتب الكتاب وقالت امي شكل البنت مجبوره شفتها كيف ماهي مضبطه نفسها وتجلس تدعي علي ابوها وامي ان كان جبورها انا عاد في هالوقت قام الشك يلعب براسي واسألها.... وهنا بدأت المشاكل ... علشان ما اكثر لكم حكي .. بسردهابنقاط : 1- مستحيل تتصل. 2- مستحيل ترسل الا لما ارسل .( في اغلب الاحيان ترد) . 3- ايام محددة من الاسبوع للمكالمه واحيانا تعتذر . 4- حساسه جداً .. لدرجة لما امزح معها راحت تقول لامها اني اتهددها من اللحين !! ... 5- المكالمه كل يومين بالاسبوع ( الفترة الحاليه منقطعين من شهر ونصف بسبب ان بيتهم مسوين له ترميم والكل محجوز بالملحق وتستحي على قولتها) 5- انا اللي اشحن لها لان اللي مطلع لها الجوال .. وعادي دام هالشي بيمشي العلاقه الى برى الامان... بس للاسف ماهي مقدره هالشي . 5- تأجل الزواج بحجه ان امتحاناتها تبدأ في قبل شهر من الزواج ( معهد) . اخر حدث حصل تبغى تأجل الزواج بعد ما وصلت لنصف الطريق !! .. وبحجه انها تستحي تكلمني لانها هي بمكان مجتمعين مع اهلها وما تقدر تكلمني على اساس كذا الدور اللي فوق جالس يجهزون له ترميم ومن هالامور تواصلنا عن طريق الرسائل للمره الثانيه من شهر ونص .. ولم اسمع صوتها خلال شهرين تقريبا .. تبغى تاجل الزواج بحجه دراستها وانها ما يمديها تشتري الاغراض .. قهر يا ناس .. دخلت احد من اخواتي لانها تستحي تكلمني قدام اهلها ردت على اختي وقالت خلاص معليش هو كان مجرد اقتراح ولكن لما تشوفون الرساله هو الحاح وطلب ورجاء وارجوك لا تردني وتقدر ظروفي واذا تبغى راحتي ومدري ايش !! ... ما عمري شفت مخلوقه مثلها زواجها تقول اجله !! .. قهر يا ناس .. ارسلت رسالها بعد ما كلمتها اختي قالت .. كان مجرد اقتراح وفكرتك بتتفهمني لكن براحتك وبعدين ارجوك لا تكرر حركتك هاذي معاي ترسل احد يكلمني !!! .. طيب ليه انتي رحتي دخلتي امك في مشاكلنا وقلتي اني اتهددك وانا كنت اساسا امزح ..( طبعا ما ارسلت لها لاني امر في حاله كرهه شديده لها .. وما عاد ابغاها خلاااص ) لذلك انصحوني وش اسوي امي لو درت بالموضوع راحت فيها ... وراحت عند الكعبه ودعت علي لان امي مرره جباره الله لا يوريكم ويطول بعمرها ويهديها .. وتسبني وتمدح كل الناس انا اللي فيني كل السلبيات والعالم كلهم متميزين عنك .. لذلك امي من ناحيه والمخلوقه هاذي من ناحية .. والعادات والتقاليد من ناحية اللي تقول اذا احد العريس قال ما ابغى الخطيبه هاذي مالك ولا ريال من اللي دفعته (70 الف ريال) والعكس .. اللهم اصلح لي زوجتي يارب واصلحني لها . وان كانت شرا لي فأصرفه عني وان كنت شرا لها فاصرفني عنها .. والله اني في حالة نفسية سيئة للغايه |
السلام عليكم ...
اول شي صل استخارة مرة مرتين وثلاث قبل ماتتصرف اي تصرف... لا تحاتي امك ولا تحاتي العادات والتقاليد ولا تحاتي خطيبتك ... الي ترتاح له عقب الصلاة سوه ... وحاول اتكلمها .. بشدة .. وقول لها ماتخلي احد يتدخل انت زوجها وانت مسؤول عنها... اذا حسيت ان مافاد فيها وبعدها اتدخل اطراف في اموركم .. جرب كلم احد من اهلها ثقه وهي تخاف منه .. وقول له كذا وكذا وكذا ... امك ان شاء الله بتتفهم لو قررت تنفصل بس حاول بزوجتك يمكن بعدها صغيرة يمكن صدق تستحي وماتعرف تتصرف يعني حاول اتدور لها اعذار .. والاستخارة اهم شي.. الله يعينك ويوفقك ويدلك للطريق الصحيح .. دمت بود ... أم وداد |
لازم الحياه الزوجيه في البدايه يسير فيها شوي مشادات لازم من الصبر لا تلح عليها كثير وطنش واتفق مع اهلك واهلها على الزواج والدراسه تكمل بعد الزواج وخلك حازم اشوي وقلهم احنا كان بيننا اتفاق على الزواج والدراسه ما رح امنعها منها 00000الله يسهل امورك
|
أعانك الله
لكنني لا أضن أن قلة إهتمامها بنفسها ولامبالاتها سبب لتركك لها . .. قليل من المصارحة ثم إن كانت في معهد ستجد ولو ثوان لحظات لتتواصل معك .... ربما قد يقدم لك سواي النصيحة لكنني وبصدق أرى مصارحتك لها حلاً أكيداً مريح لك ولها و عيب في أن تكلمها أنت زوج لها ثم أنني أعلم يقيناً أن أي فتاة ستكون هي من تهتم بكل تلك الأشياء لذا لابد من وقفة لك ولها ... تحياتي ،، |
اخوي هدي اعصابك .. و اصبر ولا تكبر الموضوع
طبعا اول شي استمر بالاستخارة و الدعاء .. بعدين انا بكلمك من واقع تجربتي على الرغم من اني لما خطبني زوجي كنت وصلت لعمر كنت فاهمه و مو صغيرة الا اني اطلبت تأجيل الزواج و كان زوجي رافض في البداية ولكن اتفهم الموقف في الاخير و وافق وكان لنفس السبب اللي قالت عليه خطيبتك وهو الوقت و الدوام لأن بالفعل التجهيز بالنسبة للبنت أمر مو سهل وأي بنت تتمنى تطلع احلى عروس . و احانا كنت أمر بفترات احس اني اكره خطيبي و ما ابغى اكلمه ( طبعا بعد العقد ) بالرغم من انه كان حنون وماقصر في شي بس صدقني البنت تخاف من المستقبل و ترى هذا تغيير كبير في حياتها ، و الأن الحمد لله انا متزوجة قربت اكمل سنة و سعيده الحمدلله في حياتي و كل مااتذكر هذا الكلام اضحك على نفسي .. يعني باختصار هذي مشاعر طبيعية افهم زوجتك و استحملها و الله يكتب لكم اللي فيه الخير |
اقتباس:
|
اقتباس:
كلام منطقي ... ومريح ... شكرا لك على المرور .. واشكر الاخت اللي قبل نسيت اشكرها على المرور |
اقتباس:
شكرا لك |
اقتباس:
على رأيك يا بنت الناس .. والله يريح قلبك زي ما ريحتي قلبي انا باصبر على طنشها وباصبر على كل شي يصدر منها الى ربي يكتب اللي فيه الخير والله يفرج هم كل مهموم |
اخوي هدي اعصابك ومافي الا كل خير واحنا بنات ونعرف بعض وصدقني هي ماترسل ولا تتصل اكيد احد فوق راسها يحذرها اخت كبيره او عمه تقولها اثقلي .. انا بصراحه كذا وماارسل الا لمن يسأل ولاااااا هذا كله اختي تحذر اثقلي
والزواج لمن تقولك أجل هي مستحيه لكن انت حدد يووم واتصل على ابووها يشوف يناسبهم والا لااا ولا تشيل هم اخوي ولاتكدر رووحك والله يووفقك ويسعدك ويتمملك على خير تحيتي |
الله يسعدك انت زوجتك ويسر كل اموورك
|
ماراح ازيد على اللى قالوه اخواني
بس انت خلك قرييب منها وحسسها بحبك لها واهتمامك فيها واذا في شي مضايقك بالشغل او اي شي اشكي لها وخلها تحس انك اقرب انسان لها وقول لها خلينا نبدا حياتنا بالصراحه اللى يتضايق من شي لا يخبيه على الثاني ومن هالكلام ووقت الزواج مو مشكله بتتفقون عليه وبأذن الله تتغير يمكن مي مرتاحه مغصوبه بس مو مستحيل انك تخليها تحبك وترتاح معاك والله يسعدكم ويجعلها لك كما تحب تحياااتي |
اقتباس:
الله يحفظلك البراء وابو البراء يا ام البراء ويسعدكم دنيا واخره |
اقتباس:
|
اقتباس:
ويسعدك دنيا واخره ويجزيك خير |
الله يسعدك انت زوجتك ويسر كل اموورك
|
اخوي صدقني كبدايه اسلوبها هذا مو منها من نفسيتها التعبانه لانها بتفارق اهلها
او تحس انها بتفارقهم وانا اقترح عليك لاتكلمها ابد تخيل ان مافيه جوالات وانك باقي على العهد القديم خل كل شي لليله الدخله عشان ماتصير حساسيات وبالتوفيق لكم |
هــون على نفسـك! ولا تتندم يا أخي الكريم فكل الموضوع هو حياء زوجتك ولم تجد منك الاحتواء والفهم الكافي والمطلوب منك الصراحة ثم الصراحة وابعد قليلا عنها حتى تهدأ ولتبدأ خطوة جديدة معها .. أما عدم اتصالك لها بسبب ظروفها فاعذرها هي تشبهني في هذه الحالة رغم أن خطيبي ابن عمي لكن ما زال هناك المزيد من الحياء ويزداد أكثر عند مكالمتي إياه أمام أهلي هذا إن كلمته أمامهم! ... وبخصوص تحديد موعد الزفاف بإمكانك إقناعها بالكلمة الطيبة وبأسلوب توضح لها مدى لهفتك وإن لم ينفع معها فلا تيأس فالفتاة عادة تصاب بالخوف والقلق من موضوع الزواج فطمئنها وكن لها خير معين واطلب منها تحديد الوقت المناسب للزواج واختبرها وانظر مدى تقبلها بعد تتبعك لكل ما سبق .. ولا تيأس .. وبإذن الله النتيجة مرضية وفقك الرحمن لما يحبه ويرضاه وأقر عينك بزوجتك |
اقتباس:
ويسعدك دنيا واخره ... ويجزيك بالخير على الدعوة الطيبة |
اقتباس:
رد منطقي ومريح الله يجزيك بالخير في البداية .... لكن احسها صعبه اخليها الى ليلة الدخله .. يعني بيكون الطرفين شايل على الثاني ومكتم ما راح تكون ليلة دخله بتكون ليلة تصفية حساب !! شاكر لك مرورك |
اقتباس:
الله يجمع بينك وبين زوجك باليمن والمسرات وبالخير وبالسعادة .. ويريح قلبك على الرد اللي المريح بصراحة ارتحت للرد بشكل احسه بالصميم واحسه طالع من خطيبتي .... اسال الله في هذه الساعه ان يريح قلوبكم جميعا ويجزيكم بالخير ويفرجها على كل مكرووب الاشراف: ارجو تغير التوقيع بسرعه لمخالفة لقوانين المنتدى |
هونها ياخوي وباتهون
ترى مشكلتك ذي مشكلة عادية .......بس لا تسوي من الحبة قبة بسيطة اخوي لو ظروفها ما تساعدها على التواصل معاك خلك متفهم مقدر رحيم حنون ........ اذا هي مشغولة اتركها تهتم مأمورها فما عليها عتب لو لم تتصل عليك دائما فهي الى الأن في بيت أهلها بنت تحت ولاية اهلها حتى تأتي لبيتك عندها يجوز لك تعتب عليها تدري انا بعد ملكتي رفضوا اهلي اني اقعد مع زوجي الا قدام الجميع وما كانوا يحبون انه يزورني وطبعا مستحيل كنت اقدر اكلمه ولا يكلمني بالتلفون ........رغم انه قريب لي .......ورافضين اي تواصل حتى الزواج تخيل وصبر زوجي حتى تزوجنا وانا لو خيرت بين زوجي واهلي في ذيك الأيام اختار أهلي لأني لازلت في بيتهم وتحت مسؤليتهم اخوي اعذر زوجتك ترى يمكن تكون مشغولة في الدراسة وترتيب البيت وامور اخرى لا تعلم عنها فلا تضغط عليها ............ انت اشغل نفسك بما هو مفيد وبما يطور من شخصيتك ومستواك المادي والأجتماعي والعلمي ومصيركم ان شاء الله تتزوجون وتجتمعون تحت سقف واحد الله يوفقك ويهديك ويصلح شأنك كله . |
ما ادري بعد هذا كله , هل بقي من كرامتك شي , تقابها فيه بعد الزواج
حبيبي ركضك وراها , ومحاولاتك المستميته للوصول لها , جعل صورتك امامها مبتذل , والمبتذل ماله قيمة ’ شخصيتك ورجولتك امامها وأمام اهلها ,, هي قيمتك المراة اذا رأت زوجها رخيص باعته , لكن انت الله يهديك , ما رسمت لنفسك شخصية امامهم , ورحت تراكض وتشتري جوال , وما سويت غيرها , كان الأجدر أنك تركد وترزن عندها يضربوا لك حساب , لكن هم عرفوا أنك طايح عندها .. عليك أن تكون صارم في هذا الأمر وتخاطب معها شخصيا انك منت راضي عن الحال أما تريديني أو لا , ولا ترضى بغير ذلك , والا تناقض مع ابوها , واحسم الموضع , والله لو بقيت على هذا الحال بعد الزواج , ينقلب حياتك الا جحيم .. ونصيحتي الركادة حلوه للرجل .. |
أخوي يجب عليك إنك تتحملها
وبالأخص في هذه الفتره لأنه شي طبيعي تكون نفسيتها في هذا الوقت تعبانه ومتوتره والله يوفقكم ويسعدكم ويجمع بينكم على خير ومحبه على مدى الحياة |
باالعكس امفروض تنبسط انزوجتك حيويه
|
لا تستعجل أخي ،،،
انت لازلت بالبدايه ،،، وشي طبيعي تستحي منك وتستغرب بعض الحركات منك بخلاف طبيعتها ،،، هدي نفسك وحاول تتفاهم معاها بهدوء ،،، بما تريد وترغب ،، وتكره وتحب ،،، وهكذا بعدها قم بوضع خطوط للمستقبل وكن جادا بدلا من انتظار المبادره منها ،،، فهي لن تبادر ،، وما فيها شي لو أخرت الزواج لو لم تسمح لها الظروف ،،، شي طبيعي ،،، ليش معصب ! |
الحياااااءءء
تصدق انا كنت مخطوبة و بعدها ملكت لاربع سنوات و لحد الان ( لي 5 شهور متزوجة) مستحيل اكلم زوجي قدام اهلي انت ما تدري باللي يحصل من احراج وقت المكالمة اضافة الى التعليقات من الاهل بعد المكالمة (اهها شفتي كيف كانت تتكلم .. اها شفتي ايش قالت .. الخ الخ ) تكره حياتك و تكره الاتصال بعدها اعذرها بذي النقطة .. مسألة تأخير الزواج لها طرفين طرف الدراسة و ذا لحاله هم ما ينلم و التجهيز الخ الخ ( لو تتفهم الموضوع و تقدر تأجله يكون احسن واذا ما تقدر .. كلمها او ارسلها رسالة انك ما تقدر تأجل لحبك و اشتياقك و انك مستني اللحظة اللي تجمعكم سوى بفارغ الصبر و من هذا الكلام اللي يخلي البنت تقوول لا حرااام زوجي ظز بالدنيا عشانه لا تاخذ الموضوع عناد و بس ) الطرف الثاني الخوف من المسئولية تصدق قبل ما اتزوج والله والله كثيير من الليالي كنت اقضيها بكا كيف باسيب اهلي و اخواني الزواج للبنت حياة جديدة بشكل كامل .. ساعدها برسم صورة ايجابية عن الزواج . كن متفهم حنون طيوب تحلى بحس الدعابة و الفرفشة .. خليها هي اللي تتمنى تعجيل الزواج بدل تأجيله .. لكن لما من الان تعاتبها و تلومها بتبين لها ان حياتها المستقبلية ما بتكون سعيدة فا بتحاول تأجل الزواج الله يوفقكم يا رب و عادي عدي لها اي شي الان هذي الفترات و ببداية الزواج يمكن تلاقي كثيير من الاختلافات بس لازم تتعودوا على بعض ربي يجمعكم عن قريب |
ترى تصرفاتها طبيعيه نوعا ما
يعني واضح انها من بيئه منغلقه شوي جايز اهلها شديدين عليها فالبنت شكلها من النوع المتردد وغير متزنه وقادره على اتخاذ القرار الصحيح في الوقت الحالي ممكن تكون تتعرض لضغوط نفسيه وانت مو حاس فيها يعني تخيل نفسك ببيت وضعه غير طبيعي ويترمم ومحجوز مع اخوانك بغرفه وتدرس هل تكون لك نفس بالتفكير والاستمتاع بوقتك اخي خلك مرن شوي وقدم تنازلات واعذرها البنت واضح انها فعلا غير مستعده ولا مانع من تأجيل الزواج وفرصه بهالفتره تحسن معاملتك معها وتساعدها على انها تحبك زياده لا تستعجل بأتخاذ قرارك وخلك هادئ الاعصاب وترى انا من البنات اللي فيني ثقل ولا احب اتصل على زوجي كثير اذا ابعدنا مع اني احبه يعني لا تتخيل انه فيها شي او مقصد لكن مجرد ثقل : ) وبالتوفيق |
| الساعة الآن 04:32 AM. |
Powered by vBulletin® Version 3.8.7
Copyright ©2000 - 2026, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©