ساعدوني... حياتي في خطر!!!!
 

السلام عليكم ورحمة الله وبركاته ...



انا عمري 21 سنه .. وزوجي عمره 22 سنه ... تزوجنا من سنه .. ومن بداية الزواج كل من تدخل في حياتنا .. امي وام زوجي.. وام زوجي اكثر.. اعتبرتنا صغار.. وفي بداية الزواج قالت لزوجي لا تحاتي السكن بناجر فيلا وبتعيشون فيها .. وبالاخير لا فيلا ولا هم يحزنون سكنت في بيتها .. واتعرضت لمشاكل كبيرة واتهامات .. طلبت من زوجي قلتله ابي نطلع بروحنا.. وهذا حق من حقوقي وعشان ماتزيد المشاكل واتصير قطاعه يعني نطلع بالمعروف.. سكنت مدة طويلة عندهم وانا حامل وتعبت نفسيتي.. محد راعى نفسيتي.. احب زوجي وهو يحبني .. بس المشاكل محاوطتنا.. وكم مرة افكر بالانفصال .. طول عمري اسمع ان الزواج استقرار بس انا من تزوجت وانا ماحس بالاستقرار.. زوجي صغير فيعاملني بطريقة غريبة .. يعني يوم نتزاعل مايراضيني.. وعادي عنده ما يكلمني بالساعات وحتى بالايام .. انا دايما الي اراضيه لو زعلت ورحت بيت اهلي يسحب عني الحساب ابي اعيش مع زوجي وبنتي بسلام .. عشان احنا نمشي حياتنا مو غيرنا الي يمشونها .. حتى لو بجحر.. هل طلبت شي غير طبيعي... ؟؟؟ ماحس بالامان .. اذا صارت مشكله اول انسان يعطيني ظهره ويمشي.. ويطنش بالايام "زوجي".. وبعدين انا الي اراضيه .. ويوم اقوله فراقك تعبني يقوم حتى انا هلكت.. انزين ليش مايسال ليش مايتصل ؟؟ ليش لازم انا الي دايما اكون بادية .. انا ابي اقعد في بيت بروحنا.. عشان محد يتدخل.. واذا صار واتدخلو .. يقول ليش كل من يتدخل؟؟ اكيد كل من بيتدخل حياتنا صارت كتاب مفتوح كل من يقدر يمشي كلامه ..

دايما يقول والله ان عمري مابحب غيرج .. والله اني بتم احبج لآخر ثانية بعمري.. بس مادري ليش يعاملني جذي.. ليش دايما يتصرف بهالطريقة .. ودايما يفشلني قدام اهلي.. احاول ارقع له مافي فايدة .. تعبت من كثر ماكذب على اهلي عشان احسن صورته .. تعبت وايد ..

قبل الزواج كانت عندي افكار وطرق لحل المشاكل وكنت اقول ان شاء الله اذا اتزوجت بخلي زوجي اسعد انسان في الدنيا .. حاولت والله بس كل من يتدخل .. والحين صار ماعندي ثقة بنفسي بالمرة .. الحين ماعرف اتصرف..

انا مابي من زوجي الا شيئين .. مسكن خاص على قدنا.. بالي يقدر عليه هو مابي احمله فوق طاقته والله ..

والشي الثاني حسابي يتم جاري.. لين ما لا سمج الله نوى الطلاق...

بس عشان احس بالامان .. واضمن راحتي وراحة بنتي..

جاوبوني بصرراحة .. من حقي ولا لا؟؟

وعلى فكرة امه عندها زوجها وولدها وبنتها .. عندها عيالها مو وحيدة في بيتها ولا كان والله قعدت عندها لو الشر كله فيها .. بس والله كلهم عندها..

وانا الحين عند امي.. وزوجي مو معاي.. فتحت معاه موضوع وانا الي المفروض اكون زعلانة زعل قبلي وطنشني.. وسالتني امي وينه زوجج .. شخباره ماله حس.. انفجرت فيها وصرخت .. عمري 21 سنه لا زوج وعندي بنت شايله مسؤوليتها بروحي وفوق هذا كله ماعندي بيت .. وانتي الي اقنعتيني اتزوجه ( الصراحة انا صليت استخارة ووافقت بعدين ) امي اتاثرت بكلامي وبلحظة غضب قالتله دبر سكن بعدين شوف زوجتك واطلع معاها .. وامشو بحياتكم بروحكم .. محد له دخل..


شو الحل بزواجي؟ هل وصلت لطريق مسدود ولا في امل؟؟

الله يكون في عونك

عليك بكثرة الإستغفار و قيام الليل

و أقترح عليك أن تبقي كم يوم عند أهلك و ما تردي على مكالمته حتى يعرف قدرك و يرجع من نفسه حينها حطي شروطك و أنك ما بترجعي إلا بهذه الشروط و شوفي وقتها شو بيقول

السلام عليكم ...

هلا اختي مشكورة على مرورج ...

انا سويت هالحركة ورحت بيت اهلي ... انا اصلا عندهم من زمان .. هو مايتصل عشان مارد على مكالماته لازم انا الي ابادر...

ان شاء الله بزيد بالاستغفار...

طيب ما يطلب يشوف بنته؟؟

استمري على موقفك عزيزتي و لازم يتصل

الله يفك ضيقتك و يفرج همك

المفروض تتوقعين هذا الشي لان زوجك صغير لحدالان ماعرف المسئوليه وتصرفاته هذاى الله اعلم من امه لكن دقي وحاولي مع تفهمينه بطريق غير مباشر انك تدرين ان تصرفاته وسماعه لكلام الغير ناتجه لعدم نضجه وصغرسنه واذ ابوه رجال طيب كلميه او خلي احد من طرفك يكلمة ويقوله يفهم اولده معنى المسئوليه وانك تبن بيت لحلك فهذا حقك
لله يفرج همك ويهدي لك زوجك

اختي الله يعطيك العافية ويرجعك لزوجك ويهديه لك
هذي المشكله يعاني منها الكثير لكن اتمنى من الله ان يفرج همك ولا تنسي السلاح القوي قوي علاقتك مع الله
ثانياقولي له ان الحياة الزوجية تقتصر على الزوجين فقط واطارها لابد انه مايخرج اكثر من الزوجين مهما حصل وذكريه باول ايامكم وبكلامه اللي يقوله لك
كان الله في عونك ووفقكم لما فيه الخير

هو في وده يشوف بنته ... بس هو حاس انه غلطان في حقننا يستحي يطلب يشوفها .. اصلا يستحي يمر بيت اهلي...

وتبين الصراحة .. انا ييت بيت اهلي مع ان كل من قاللي لا تكلمينه خليه هو يتصل .. بس طرشتله مسج .. عتاب.. فاتصل فيني اكثر من مرة بعدها.. كنت مترددة ارد على المكالمه ولا لا.. لاني الصراحة ماتوقعته يتصل.. قعدت ادعي ان المكالمه اتمر على خير .. وقعدت ارتب الكلام .. المهم وقلتله الي في خاطري.. واتاسف لي .. ووعدني انه يطلعني بشقه .. بس ماحس انه يتحرك .. احسه بارد .. مو معطي للموضوع اهميه .. فقلتله انه يسارع عشان انعيش بسلام .. وتمينا على المكالمات .. وطلب انه يشوفني قلتله اتشوف بنتك ماعليه بس انا ماقدر لان كل ماشوفك وبعدين اتروح عني تتعب نفسيتي.. فالاحسن نستقل بروحنا وانكون مع بعض على طول... فقال اوكي خلاص انا بتصرف دام انا احبج وانتي اتحبيني بتنحل كل امورنا.. طبعا كلامه ريحني شوي بس للحين ماحس بشي.. ولا احس ان في شي تغير.. وانا مابيه يتعود على فراقي لان الي بعيد عن العين بعيد عن القلب..

والصراحة انا يوم بادرت "كالعادة" وطرشت المسج ... كله من ايام .. والحين عقب ماقريت ردج احس اني ندمت على المبادرة ...

امي زعلانة منه .. وانا يهمني رضا امي على زوجي.. زعلانه منه لانها ماتحس ان بنتها مرتاحة .. واتحس ان هي السبب في هذا كله ..

واحس انا ان مخي مشوش..

عزيزتي أمك محقة فهي تريد مصلحة بنتها و تحب تشوفها سعيدة

أعتقد أن ما يغير تفكير زوجك هو كلام أهله و خاصة أمه فنظراً لصغر سنه أظنه بعد ما ينهي معك المكالمة يعرض الأمر على أمه مش ضروري إنه قصده يخبر أمه بس يمكن حب يخبرها إنه ينوي أخذك على بيت لوحدك و يمكن هي يلي لعبت بعقله و أثنته عما ينوي فعله عشان هيك ما أعاد الاتصال للآن هذا و الله أعلم ما حدث

من كلامك يبدو أن زوجك يحبك و متعلق فيك و ببنتك فاستمري على موقفك و صدقيني لا تتصلي فيه ولا ترسلي له أي شيء لأسبوع فقط ساعتها سينفذ ما طلبتي إن شاء الله

امالغالي ...

الصراحة في بداية الزواج .. ام زوجي كانت تسال وايد اساله وزوجي يرد عليها على اساس انه شي عادي.. وصح لو شخص ثاني يسال هالاساله كان ممكن اتكون الحياة اسهل.. مادري شو كانت اتسوي بالكلام تقلبه وتحورف فيه واتخليه كارثه وتتصنع المشاكل..
وانا عقب ماصارت المشاكل .. فقدت ثقتي بنفسي وغلطت نفس غلطته وسمعت كلام الغير.. على اساس انهم اخبر مني بهالامور واكبر مني.. وزدت الطين بله بدل ماكحلها عميتها ..
والحين انا احاول اصلح الامور.. لكن زوجي بعده على بروده ..
ابوه كلمته والله بأدب بس يمكن اتحمست بالسالفه شوي.. فاتحسس مني وقال اني كنت مو محترمة معاه .. مع اني والله ماقلت شي.. ولا حرك ساكن هو بعد .. مع انه طيب لابعد الحدود بس مادري شفيهم جذي!!!!

الداعي للحق..
صحيح كلامك .. وهذا الي بوصله له .. وهو اصلا كان يقول الي بيننا يتم بيننا .. لكن كان غافل عن التفاصيل الصغيرة الي امه تسال عنها على اساس انها تافهه ومالها تاثير..لكن مادري باي طريقة امه اتخلي السخافات شي كبير.. وتسوي مشاكل من لا شيء.. يعني مرة الفت قصة .. وقالت حق زوجي يوم وقف معاي اتصدق زوجتك واتكذب امك ؟؟؟
وهو بار في امه وايد .. وهالشي حلو .. دايما يقول لي رضا الوالدين .. وكنت استانس .. بس مو لهالدرجة عاد ..؟! انقلب مخه مسكين .. كل مايصير شي اتقوله وين رضا الوالدين .. ؟؟ وبعدين اتلف علي انا اتقول لي ترضين انا ازعل على ولدي لاول مرة في حياتي والسبب انتي؟؟؟! خلتني اموت ..
ومواقف وايدة لو اقولها يمكن تنصدمون ..!!!
وهالمواقف خربت اثرت وايد على علاقتي بام زوجي وخلتني اطلع من بيتهم .. والحين انا ماقوله امك وامك .. مع اني بلحظة غضب غلطت وقلتها .. بس الحين لا.. اقوله الاحسن نطلع في بيت بروحنا عشان ماتصير مشاكل خصوصا ان عندنا بنت الحين نحتاج مكان اوسع ومن هالكلام ..
وهو مفتنع .. بس مايتحرك ..

والحين امي زعلانه منه واتقول لي كيف اتصرف.. لكن انا مو مقتنعه بكلامها بالمرة .. وبعد مو عارفه اذا تصرفاتي صح او غلط ..

طمنتيني ياختي...

ادعيلي ..

هو يحبني صح .. بس مو عارف الصح من الغلط بالضبط مثلي.. ومرة قالي اعذريني شوي تراني مضغوط ..

السلام عليكم أختى فى الله

أسأل الله ان يفرج همك و يهدى لكى زوجك

أسمعى اختى أنا اتفق مع كلام الأخت blond_girl

و أعتقد حاليا ان زوجك فى أسوء حال لأنه بين نارين انتى او امه خصوصا انه صغير السن

انت معك حق و عادى انك انت اللى تصلحى كل مره لان أغلب الرجال كده بس انا مش عايزه الموضوع

يكبر عن كده لان فى النهايه ان شاء الله هتتصلحوا فرجاء أصبرى عليه طالما و عدك و أعطيه مهله زمنيه

لو مرت ساعتها دخلى اهلك وممكن تكليمه بس على فترات متباعده و ببرود خليه يشعر انك ممكن تتغيرى

لأن كل شئ له اخر و من حقق كزوجه ان يكون لكى حياتك الخاصه و ده ملوش علاقه بعقوق الوالدين

سكاي لايت ..

ايه والله صح كلامج ... هو يدري اني احبه وايد .. ومو متصور اني في يوم من الايام اتغير عليه ... والحين الصراحة انا باديه اتغير .. مو عشان شي .. عشان احبه وعشان مصلحتنا .. هو الود وده يعيش معاي ومع بنتي.. ويشتاق للايام الي كنا فيها مع بعض.. وانا بعد .. ان شاء الله ببتدي اكلمه ابرود .. وبين فترة وفترة .. عشان يتحرك .. ويدور سكن .. وان شاء الله اول مانستقل.. خلاص مابنسمع كلام حد ولا حد بيعرف حياتنا ..

ان شاء الله اموري تتيسر.. ياربي نور بصيرة زوجي وخله يفرق بين حقي وحق امه ... ان شاء الله نستقل في سكن بروحنا انا وهو بنتي وحبنا يجمعنا .. وان شاء الله من بعدها مانسمع كلام حد ولا انطلع تفاصيل عن حياتنا لو بسيطة عند حد ..

طيب اختي الله يعافيكي مدام انه رابط الحب بينكم
وكل ما اعلمه ان الحب لاتعجزه المعجزات ومن كلامك ان زوجك يقدرك ولاتنسي حديث المصطفى
جاء‌ت امرأة إلى النبي صلى الله عليه وآله فقالت: يا رسول الله ماحق الزوج على المرأة؟ فقال لها: أن تطيعه ولا تعصيه ولا تصدق من بيته إلا بإذنه ولا تصوم تطوعا إلا بإذنه، ولا تمنعه نفسها وإن كانت على ظهر قتب، ولاتخرج من بيتها إلا بإذنه وإن خرجت من بيتها بغير إذنه لعنتها ملائكة المساء وملائكة الارض و ملائكة الغضب وملائكة الرحمة حتى ترجع إلى بيتها، فقالت: يارسول الله من أعظم الناس حقاعلى الرجل؟ قال: والده، فقالت: يارسول الله من أعظم الناس حقا على المرأة؟ قال: زوجها، قالت: فمالي عليه من الحق مثل ماله علي؟ قال: لا ولا من كل مائة واحدة، قال: فقالت: والذي بعثك بالحق نبيا لا يملك رقبتي رجل أبدا.

كان الله في عونك ووفقك لما فيه الخير وجعل بنتكم قرةعين لكم انه سميع مجيب الدعاء

أختى فى الله أسأل الله أن يهدى لك زوجك و ما يخرج حبك من قلبه أبدا و ان ينعم عليكى براحه البال و

ان ينعم الله عليكم بالخير فى بيتكم الخاص و لايسمع احد عنكم الا كل خير و بارك لكم فى ابنتكم......

أمين يا رب العالمين

لا تيأسى من رحمه الله فان بعد العسر يسر

الله يعطيكم العافيه...

انا احاول قد ماقدر اني ماعصيه .. ولا ارد له طلب.. بس احس راسي بينفجر...

يارب اهديه .. ونور بصيرته

اشتقت لزوجي.. حييييييييييييييييييل

اختي ...الله يهديكم ويصلح اللي بينكم

انتوا الاثنين صغار جدا ...

وبالذات زوجك ...غيره على مقاعد الدراسة ..

صحيح هو في بعض الشباب ما شاء الله ..تلاقي عمرة 22 لكن تفكيره وتصرفاته تصرفات رجل ذو خبرة 45 سنه

وفي رجال تلاقي عمرة 50 سنه وتصرفاته تصرفات شاب مراهق

زوجك لا زالت معتمد اعتماد معنوي على اهلة ...يعني ما يقدر يتحمل مسؤولية بيت وزوجة

هل زوجك يعمل ؟؟؟؟ يعني عنده دخلة الخاص فيه او يستلم مصروفة من اهله ؟؟؟

في انتظارك

الحمدلله زوجي يشتغل ويدرس

ودخله زين ...

هل مازال قاطع اتصالاته معك؟؟؟

أخبرينا عن آخر المستجدات

الله يعينك أختي وييسر لك أمورك ويسخر لك زوجك ويهديه ويهدي الجميع ..