|
ابشركم خطبت و محتاج رئيكم بمسائلة تكاليف الزواج
السلام عليكم و رحمة الله و بركاته ,
ابشركم خطبت و البنت وافقت و اهلها وافقو بالاجماع و لله الحمد ... ما احد سال عني الا و لله الحمد و ذكرني بخير سوا صغير او كبير .. احبابي , ان سبق و قولت لكم انه انا مدرس و راتبي 6400 ريال سعودي و املك شقة و لله الحمد ... لكن علي قسط سيارة 1656 ريال سعودي و باقي تقريبا 42 شهر .. المهم باقي على السيارة 58600 ريال في حالة السداد والمبكر .... الحمدلله خطبت و النية اتزوج بعد سنة من الان ............ لكن في مشكلة .... اللي هي ... ان والدي قال لي يا ولدي لا تشيل هم من ناحية القصر و الزواج .... لكن انت الله الله بالمهر و تاثيث الشقة :29: طبعا تاثيث الشقة يحتاج له اقل شي من 50000 الى 70000 ريال اذا ما كنت غلطان ....... و المهر من 35000 ريال الى 40000 ريال ... باختصار يا جماعة الخير زواجي بعد سنة تقريبا من الان و اللي مطلوب مني تزبيط و تاثيث الشقة من سيراميك الى بوية الى اثاث و مطلوب المهر اللي بحد 35 الى 40 الف ... ابغى منكم افضل الحلول.. و هذي معلوماتي بشكل مفصل : المهنة : معلم الراتب : 6400 الاقساط : 1656 شقة ملك : نعم اتمنى مساعدتي و لكم جزيل الشكر و الله لا يحرمني منكم يا رب |
تاثيث شقة من 50 الف الى 70 الف ليششششششش؟
تاثيث الشقه ولاحظ انها شقه مو فله تكلف 30 الف بالكثير عزيزي لاحظ الشقق الجديده جميعها تأتي معها مطبخ والبعض الاخر مكيفات وتجيك كامله مكمله من بويه + سيراميك بخصوص القصر والفرح هذا دائما يكون على اهل العروس مادري عن عاداتكم انتم ممممممممم وش بقى نسيت شهر العسل يبيلك تقريبا 15000 |
|
السلام عليكم ورحمة الله
أخي الكريم انت بالضبط وش بـ تسوي بـ شقتك يوم كتبت 70000 ؟ أقصد وش مخططاتك حتى تأثث شقتك ؟ أساسيات فقط ؟ كماليات ؟ أكثر من كذا ؟ مودتي لك |
ماعرف ليش كاتب الموضوع يعني تنتظر معجزة؟ على كلامك ياخوي مايبقا من راتبك الا حول 4700 ريال يعني لو بتصرف 700 ريال وتشيل 4000 كل شهر اخر السنه بيكون عندك 48000 يعني يادوب المهر مع ثمانية الاف ريال! خلك منطقي حنا مانقدر نسحرلك فلوس لكن حاول انك تقترض مبلغ من احد او من البنك وتختصر مصاريفك شوي يعني ليش قصر وحفلة قل لابوك مانبي قصر ولا حفلة عطني هالفلوس احطها بالاثاث او المهر احسن..
وليش 70000؟؟ ياخي انت ظروفك على قدك حاول انك تختصر وتبدا بالمهم جدا يعني غرفة النوم وكنب الصاله والمطبخ والباقي بعدين حبة حبة لانك بالعربي ماتقدر تحط كل شي مرة وحده وهذي قدرتك المادية .. لا تنسا فيه شي اسمه شبكة ودبلة وشهر عسل وو.. يعني شف لك حل وخل ابوك يعطيك اذا هو مقتدر.. |
اشكركم جميعا على تواجدكم و مشاركاتكم ..... انا اسف ان كان موضوعي اثار غضب البعض .... على اية حال ....
انا كنت ابغى حل ... مثلا واحد من الناس اعطاني حل : قال لي حاول قد ما تقدر تخلي والدك و اخوانك يساعدونك تخلص القرض اللي عليك و خذ قرض 80000 ريال .... و خلال الفترة هذي حاول تدخل جمعية ب 3000 ريال .... يعني في النهاية يطلع معاك مبلغ 110000 ريال .... ايش رئيكم بهذا الحل ؟؟ |
ما اعنقد انك تحتاج هاي المبلغ حق الشقة ...
مو لازم اتاث الشقة بالكامل اهم شي انك اتاثث غرفة النوم والصالة والمطبخ و بعد الزواج اتاثث الباقي ... والف مبروك مقدما ... الله يعطيك خير المراة ويكفيك شرها ... |
انا طبعا ما اعرف بالامور الماليه كثير لان زوجي الله يخليه لي هو الي يتكفل فيها
بس ما اشوف الحل انك تخلص من اقساط السياره وتدخل مشكله القرض انا اايد فكره الاخ الي ذكر انك تحاول تقنع الوالد بدل العرس والخساير يهديك المبلغ وتمشي امورك واذا ما اقتنع عندي لك حل اذا فرضنا ان الي معك بيكون 48000 ريال بعد سنه من خلال كلامك عن قيمه المهر فمهت ان اهل البنت قنوعين وما يحبون المبالغه فلو قلنا المهر 35 الف يبقى معاك 13 الف اشتري فيها الطقم + الدبله ومو شرط يكون غالي مره بس المهم يكون ناعم علشان يعيش لعروستك وعندي استفسار بالنسبه لاهلك اخوانك وخواتك وش نوع الهدايا الي يعطونك اياها يعني مثلا اتفق معهم على فلوس او اذا عندك خوات كبار قل لهم ودي تساعدوني بالتأثيث اخوي يوم جاء يتزوج انا اهديته كنب الصاله طبعا هو اختاره مع خطيبته بس انا حاسبت واخواتي الكبار اهدوه المجلس وانا لما تزوجت نفس الشي اخوات زوجي اهدوه يا اما فلوس يا اما ساعدونه بالتاثيث واهم شي انت تفائل وفكر بحياتك الزوجيه لا تشيل هم الفلوس وكله بيد رب العالمين وفكر بالهدايا الي بتجيك ولا تورط نفسك بسالفه القرض وهذي نصيحتي ولو تعلمني كم اخ عندك وش طبيعه الهدايا واذا هي مبالغ كم توصل اساعدك ولو اعرف انت من وين قدرت اساعدك بالاسعار واسماء المحلات بعد وصدقني اذا تزوجت بتنسى كل شي وتعيش مع زوجتك حياة سعديه تخليك تقول تستاهل اصرف كل الي عندي علشانها :) وخلك متافئل تحياتي دلوعه زوجي |
اخوي كلام اخونا قزم بس عصبي صحيح
وشلون تاثيث شقه بخمسين الف ريال او سبعين الفلل الكبيره تاثيثها العادي حوالي ثلاثين وبعدين شف لك مناطق يكون فيها التاثيث رخيص مثل جده والرياض بالنسبه للزواج اذا السنه الجايه مثلا الصيف القادم يعني مايبقى الا قليل ويعطونك البنك قرض ثاني اذا قرب زواجك والله يوفقك نسئلك ونرد لك |
مبارك عليك أخي مقدماً
أمورك تمام كما ذكرت لك أول أما تأثيث الشقه بالمبلغ الذي ذكرته خيالي جداً 30 وقابله إلى أن تقل تكفي تدلع الشقة لك زي ما تبي .. ملاحظه / أنت في الرياض .. سوف أدلع على محلات أثاث رخصيه وفوق الخيال في جمالها .. |
انا ادلك على طريقة ممكن تنفعك
1/ اهم شي حاول تدفع المهر 2/با النسبة للاثاث الشقة طالما انها ملك تقدر من الان تاثث يعني كل شهر اثاث غرفة أ- ابداء اولا بغرفة النوم ب- غرفة النساء ج- المطبخ في نظري هذي اهم الاشياء في المنزل تحتاج تاثيث وباقي الغرف خليها بعد الزواج انت وزوجتك تكملونها كل ماتوفر معاك مبلغ وان جاك ضيوف تقدر تستخدم مجلس الوالد هذا مالدي والله اعلم اسئل الله ان يوفقكم ويجمع بينكم بخير |
محمد هيا
للوله مشوار الهجرة اشكركم من اعماق اعماق قلبي على المشاركة |
دلوعة زوجي ,
الله يوفقك و يسعدك يا رب ... مشاركتك ريحتني كثير و خلت عندي نوع من التفاؤل يمكن اخذ منك اسماء محلات الاثاث الخ الخ ووعد مني لك دعوة في ظهر الغيب ان الله يوفقك |
السيف المسلول ,
الله لا يحرمك الجنة و احرجتني والله بطيب اخلاقك ..... اخوي انا من جدة .... اشكرك على تعاونك و اسال الله ان يجعل حياتك كلها افراح ... دمت بود و سلام |
مع احترامي الشديد لك
ايش 70 الف اثاث راح تاثث قصر صدقني بالكثير 30 الف وتاثث بيتك احلى اثاث |
تستاهل اخوي والله يسعدك بحياتك الزوجيه
وزوجي لما قرا الموضوع يحب يقول لك بنت الحلال تجي ورزقها معها ورب العباد ما يتنسى عبده ولا تضيع احلى سنين زواجك بالتفكير بالقرض واقساطه 8 8 8 8 هذا كلام زوجي :) والحين كلامنا مع بعض لاني كما سبق وذكرت هو اعلم بالامور الماليه ولانه مر بمثل وضعك **الطقم(الشبكة) يفضل تختار ذهب مع زيركون لعده اسباب الالماس غالي جدا بيوصل الطقم 10 الاف وهذا اقل شي الذهب الكامل غالي لانه بيكون ثقيل بينما الذهب مع الزيركون فيه نوع يسمى شغل ديلوكس يعني زي الالماس والمقصد قصه الفص زي الالماس بس طبعا ارخص منه وارخص من الذهب لانهم يطرحون من الوزن وزن الفصوص وغير كذا شكله يجي احلى واوجه ولمعته حلوه تكشخ فيها زوجتك وبالنسبه لسعره 4 الاف تقريبا ** لما اقول ذهب مو شرط لونه اصفر لا تقدر تاخذ ابيض او بنك روز (نحاسي) بس فكر ان زواجك بعد سنه ** الدبلة : انا افضل تختارها الماس والسبب ان الالماس يتحمل الاستعمال اكثر وتضل لمعته وانت عارف الزوجه تحب تلبسها دايما وتقريبا سعرها 3 الاف ** ساعه : لانسى نفسك انت داخل حياه جديده وصورتك مهمه قدام اهل زوجتك اشتري لنفسك ساعه حلوه علشان تذكرك بالايام الحلوه وسعرها تقريبا من الف الى الفين عندك مثلا ماركه شيروتي اسعارها معقوله وفخمه ** قلم وكبكات: خله للاخير لانها غالبا ما تجي هدايا من الاصدقاء لان اسعارها معقوله مثلا اصدقاء وزملاء العمل واذا انت تهدي صدقني راح يهدونك :) وعلى كلا انا اقترح انك ما تاخذ ماركه لان ارخص شي هي ديور ومنتشره جدا وانت معرس جديد تبي تتميز وامكانياتك ما تسمح توصل القلم بعشره الاف انا من الرياض باذكر لك اسماء المحلات هنا وما ادري اذا عندكم بجده الحميضي ساعاته حلوه وعنده اقلام حلوه بعد زووجي خذ قلم من عندهم سعره150 بس بالمره حلو وما تعطيه هالسعر والاهم مميز فيه محل الفايز يجيب كبكات ماركه وانتر(اعتقد اسمها كذا ) زوجي اخذ من عندهم كبك حجر اسود مره حلو وسعره 150 والمحل يسوي خصم اذا عندك حساب في سامبا تقريبا صرفت 10 الاف الحين خلصنا مرحله مهمه والاهم انك تحط ببالك قدامك سنه لا تشوف الاسعار الحين انت عارف الحين السوق وقت موسم اجازه صيف ونجاح وزواجات الاسعر مرتفعه شوي بس شف الاسعر وقت الدراسه صدقني تنزل لان الطلب يخف على الذهب والساعات اذا كلامنا فادك (زوجي+انا) مستعدين نكمل بس للحين ما علمتنا عن اهلك تتوقع يعطونك هدايا ؟ وانت كلمت الوالد والا تتوقع يرفض ؟ تحياتنا دلوعه زوجي +زوجي :) |
دلوعة زوجي,
اشكرك على التواصل انتي و زوجك و الله لا يحرمكم من بعض و يسعدكم ... اختي الكريمة .... بعد اسبوعين تقريبا من الان لازم اشتري الشبكة .... طبعا الشبكة هذي للخطبة ما هي للملكة لان الملكة ممكن تكون بعد 6 او 7 شهور .... المهم ناس قالو لي اشتري شبكة رخيصة و لا تحمل نفسك فوق طاقتها لانه اذا اشتريت غالي في شبكة الخطبة راح تضطر انك تشتري اغلى في الملكة ...... اختي , لو تعرفي اسم محل في جدة و طقم معين حلو عجبك و سعره معقول و اذا عندك صورة له و الله اكون لك ممنون .. انتي تقترحي علي شبكة الخطبة ان سعرها مايزيد عن ....... ؟ بالنسبة لموضوع والدي و الله ما ادري كيف اتفاهم معاه ... هو على باله اني مجمع فلوس و انا اصلا مالي الا سنتين و نصف في الوظيفة .... كل اللي معايا الان 8000 ريال و 10000 ريال في الاسهم خسرانة ...... محتار كيف اكلمه .... هو المشكلة قال لي انت ما عليك في القصر و الزواج .. انت اهم شي بس تجيب المهر و الاثاث ... انا مشكلتي الوحيدة قسط السيارة و اللي باقي عليه 58000 ريال في حالة السداد .... فكرت ابيع السيارة ان كانت تجيب لي سعر نوع السيارة اكورد 2005 فل كامل .. بس كثير من اصحابي ما نصحوني ابيعها .... والله احس نفسي متلخبط و انا كل عجلة الخطبة هذي عشان البنت ما ابغاها تطير مني .... اسف ازعجتك بكلامي الكثير ... و اشكرك مقدما انتي و زوجك |
اتمنى نكون افدناك اخوي
وبالنسبه لطقم الخطبه لازم طقم؟؟ لاني اعرف ناس يقدمون ساعه او اسوره فانتم ايش عاداتكم ؟؟؟ وهل طبعكم لازم الماس وفخفخه والا تحبون الذهب الخالص؟؟ يعني وش طبعك بالضبط وبالنسبه للدبله انا كنت اقول الماس بس الحين غيرت رايي :) اختار دبله زيركون علشان تكون لمعتها زي الطقم وخذ معها دبله ذهب خالص وفيه محلات تقلد لك دبل بولغري او تيفاني وتطلع جميله جدا واذا اخترت تقديم دبلتين تكسب انها تلبس الذهب دايما بينما الثانيه مع الطقم في المناسبات والدبله الالماس كما ذكرت بتكلفك 3 الاف بينما الدبلتين مع بعض بيكلفونك الف يعني وفرت الفين وبدل ما يبقى معاك 3 الاف بيكونوا خمسه :) تحياتنا زوجي وانا |
ههههههههههه دوعة زوجي .... عجبني توقيعك " زوجي و انا " يدل على حبك الشديد له و الله لا يحرمكم من بعض ........
ان كان عن حكاية الطقم .... ايوه من عادتنا نقدم طقم .... و يكون ذهب ... طبعا الالماس بعيد عن شواربي خخخخخخ ... انا ان كان عن اخواتي و اهلي فهم يحبو الفخفخة لكن المشكلة كله راح يكون على راسي ... با اختصار يا اختي العزيزة ..... معايا الان 8000 ريال .... ايش تنصحيني اشتري فيها للخطبة .... يعني مثلا هل تنصحيني اخذ طقم ذهب ابيض بحدود خمسة الالف ريال و هدية لامها بالباقي ........ اعتبريني اخوك الصغير و قال لك يا اختي ما معايا الا 8000 ريال .... ايش راح تعملي و قتها بشي يبيض وجهه و لا يحرجه .... صدقيني كل سؤالي هذا لاني احب البنت و الا لو البنت ما هي اللي في بالي يمكن ما كنت اهتميت و كنت اجيب بالفين ريال طقم زي كثير من الشباب ... لكن سعادتها تهمني و في نفس الوقت ما ابغى انحط في موقف اطلع فيه محتاج ... يعني ما ابغى اكلف نفسي فوق وسعها ... و الله كل عجلتي في الخطبة و انا ما كونت نفسي عشان كنت خايف ان البنت تطير علي و كم تشجيع الشباب لي انه انا عندي شقة ملك و مدرس .... لكن السبب الرئيسي هو انا ما كنت ابغى البنت تطير مني .... اشكركم مقدما و دعواتي لكم بالسعادة الابدية |
السلام عليكم ورحمة الله :
كـ رأي إنك ماتحاول تطلع من قرض وتدخل في قرض ممكن جمعيه مو قرض احسن ابدأ بالضروريات زي ما مر : غرفة النوم - المطبخ - المجالس حاول اخوانك واهلك يشيلون عنك .. ولدهم انت مب غريب حاول تقتصد بمصاريفك لو كنت تصرف اقتطع من راتبك مبلغ تقول مثلا ً ابيه للثلاجة والتلفزيون .. وتوفرها لوقت شرائها لو مكانك سجلت الضروريات اللي بأثث فيها الشقة وأخذت لفة على محلات الأجهزة الكهربائية والتأثيث : منها : تاخذ فكرة عن أكثرها جودة وأقلها سعر ومنها بتلقى بعضهم يسوي لك عروض وتخفيض وممكن بعضهم يقسطها اذا كنت ناوي تقسط الله يوفقك ويتمم عليك وعقبالي مودتي لك ياغالي اخوك |
صراحه طبايعكم غريبه يعني لازم طقم في الخطبة وطقم في الشبكة ومهر وشقه واثاث وحفلة عرس بعد؟؟
احنا عندنا الشبكة وحده بس ومهر وبيت على الزوج وحفلة الزفاف على البنت احس منطقي اكثر! عموما اشتر لك طقم ذهب بزركون زي ماقالت لك الاخت زوجي وانا اوفر لك من الذهب الخالص لانه بيكون ثقيل.. والمهر لا تكثر لانك انت متكفل بكل شي بصراحه اذا حتى العرس انت بتتحمل تكاليفه يعني المهر لتجهيزها شخصيا بس يكفيها 30 ولا 35 الف.. والله يوفقك |
الله يوفقك وييسر لك
الأمور تساهيل إن شاء الله بس هدية بالخطبة وهدية بالملكة كثييييييييير صراحه ليش ما تحاول إن الملكة على طول وجيب هدية تبيض الوجه لها اقترح طقم وساعة ودبلة ورتبوها بشكل حلو مع سلتين حلى فاخر وبس.. الطقوم من خمسة إلى سبعة (الوسط ) أما البيت لا تشيل همة أهم شي غرفة النوم والمطبخ والباقي قلها أبغاه على ذوقك وشوي شوي تكملون إن شاء الله الله يسعدكم يارب |
هلا اخوي
اللاحظ انك مصر ان هديه الخطبه طقم ؟؟ بس من رايي انك ما تقدم طقم لانك بتقدم طقم بالملكه يعني الشبكه وش رايك تختار ساعه الماس حلوه واسعارها معقوله محلات الحميضي بالرياض اسعارها جدا حلوه يعني لو تاخذ ساعه للعروس شي فخم و تاخذ لامها بعد ساعه والسبب ان الساعه تجي شي يواجه لو قارنتها بخاتم او اسوره واذا عجبتك فكره الساعه انصحك تختار الماس تركيب المحل والسبب انه ما يفرق بالشكل عن الماس الوكاله والسعر يجي ارخص يعني تعطي العروس الحلوه ساعه الماس تتباها فيها وتقول هذا من خطيبي + دبله ذهب علشان تخطبها رسمي:) هذي صور بعض الخواتم طبعا انت تلاقي عند محلات الذهب العاديه نفس الشكل وارخص بكثير عند لازودي مثلا واذا الاهل يتعاملون مع محل معين يكون افضل لاني بصراحه ما اعرف محلات جده http://international.tiffany.com/sha...L_MED_OVER.jpg http://www.47collections.com/prodimages/bzero1_85-S.jpg http://international.tiffany.com/sha...L_MED_OVER.jpg هذي معها الماس خفيف تقدر تحط زيركون http://www.47collections.com/prodimages/bzero1dcs-S.jpg http://international.tiffany.com/sha...L_MED_OVER.jpg الخواتم تلاقيها اصليه عند تيفاني مركز الخياط او مركز التحلية او عند بولغري بس ما ادري وينه بجده تقدر تتفرج عليها يعدين تقارنها بمحل الذهب العادي من عند المحل توصل 3 او 4 الاف بدون الماس ومحل الذهب العادي يسوي زيها باقل من الف لانها بوزن الذهب وما يهمه الشكل يعني وقت الخطبه تقدم للعروس الساعه والدبله مع ورد طبيعي وكل هذا بيكلفك تقريبا اربع الاف وام العروس ساعتها تقريبا الف الى الف وخمس ميه وانا افضلها لان حجم الساعه وقت التقديم يجي اوجه وشوف الحميضي وهم بيساعدونك بالاختيار على فكرة ترى الساعه فكره زوجي يقول علشان اذا قدمت الطقم وقت الشبكه يكون له طله لانه اول طقم تقدمه وما تخرب على نفسك بطقم الخطبه وجه نظره اعجبتني ومن هنا كتبت الكلام الي فوق تحياتي زوجي وانا :) |
| الساعة الآن 06:49 PM. |
Powered by vBulletin® Version 3.8.7
Copyright ©2000 - 2026, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©