|
اكتبلكم ودموعي على خدي..سا عدوني
هذي اول مشاركه لي معاكم واتمنى تساعدوني في مصيبتي والله مو قادره استحمل..
انا متزوجه من سبع سنوات وعندي طفلين وزوجي يحبني واحبه ومو مقصر معاااي بشي وانا كذلك انسانه فاهمه وجميله يعني كثير يحسدونه علي .... بدات المشكله من دخل زوجي عالم النت وكنت واثقه فيه لدرجه ماتتصورون....وصار يشترك في المنتديات لدرجه صار مشرف و....و...لا ومسوي نفسه عزابي وصغير وسألته ليه قال علشان محد يعرفني على نياتي...حسبي الله ونعم الوكيل....... والله اكتب وانا مو قادره اشوف الحروف من دموعي..........من تقريبا سنه ونص اكتشفت خيانته طبعاا كانت عن طريق المنتدى وتطور الى الماسنجر ثم الى الجوال.......... واعترف لي واعتذرلدرجه انه حلف لي على المصحف انه مايرجع يكلم.......وانا سامحته ونسيت الموضوع.....ووعدني انه يطلع من المنتدى وفعلا طلع ............ لكن المصيبه انه اشترك في منتدى ثاني وحطوه مشرف مدري وش لا قين فيه.......لدرجه اي احد يسجل عندهم بنت او ولد يروح يضيفه عنده با الماسنجر ليه......والله اكتشفت با الصدفه وليتني كنت على عماي ارحم لي.......... تصورو انا دخلت ها المنتدى كنت بس ابغى اقرا مواضيعه وردوده.....بس لازم اسجل سجلت عندهم بايميل اختي هذا امس الكلام....والله ماكان في نيتي اراقبه لاني تقريبا وثقت منه........ واليوم يوم فتحت ايميل اختي والاقيه مسوي اضافه..........شفتوا طاش ما طاش......... وقمت اصيح وادعي عليه........والله والله لو اني موظفه واقدر اصرف على نفسي وعيالي اني اتطلق وارتاح ..........احس اني منهانه وغبيه........حسبي الله عليك الحين هو نايم.......مدري شسوي افكر اجهز اغراضي واقول ودني بيت اهلي واكتم في قلبي اما اني اواجهه احسها صعبه وبيخلي الغلط مني لاني راقبته......... حسبي الله عليه.......وش اسوي بموت من القهر...........مع العلم انه مدلعني دلع كل طلباتي مجابه مو حارمني من شي اخواتي حاسديني عليه طيب طيب...ومعروف باخلاقه وكبير عمره37 سنه وانا 26 سنه .. قولوا وش دخل العمر بس اقولكم انه كبير وناضج ليه ها الحركاات وربي افكر افضحه با المنتدى واقولهم انه متزوج وعنده طفلين....... الله يخليكم ارشدوني شسوي...وادعولي... |
اسال الله العلي القدير ياختي ان يهدي زوجك
والله يعينك على حركات المراهقه<<<<انا آسف على الاسلوب وصدقيني معاك عذر اذا راقبتيه وتغارين عليه يعني مامعاه حق انه يزعل اذا عرف انك تراقبينه لان مثل هالتصرفات يستاهل الواحد يراقبه ويشوف وش يسوي!!!!!! وانا اقول الكلام هذا رغم اني رجل لان الصراحه هذا مابي اقول مايحترمك لكن لو كنتي مكانه لاسمح الله كان مايرضى ابد انك تجلسين معه ونصيحتي لك انك تواجهينه وتفهمين وش يبي او بمعنى اصح وش اللي ناقصه اما اذا كان مجرد انه يرفه عن نفسه ويتسلى فاعرضي عليه انك انتي تبين تتسلين بعد وشوفي رد فعله...!!! والله يجن جنونه وفي الاخير اسال الله انه يهدي جميع بنات وشباب المسلمين ومنهم زوجك وانا وانا آسف على الاطاله |
اختي الغاليه بندوره
انا بقولك مثل الاخ الي قبلي بس انصحك بدون انفعال ادري صعب بس هذا زوجك وابو اولادك وش بتسوين فيهم لو تركتي له البيت ورحتي تخلين اولادك ايتام وابوهم عايش اصبري وادعيله بظهر الغيب واجلسي معه قولي انا مو زعلانه عليك انا مو ربك عندك رب بيحاسبك بس قلي وش ناقص وانا احاول اغطي النقص ولا تفكرين ببيت اهلك ابد ترى اذ تحملوك اليوم ما يتحملونك بكره ولا تكلمينه اللحين وانتي معصبه خليه لبكره ادري صعب الله يعينك ويشرح صدرك ويريح بالك انصحك روحي صلي ركعتين واقري قران وطلع كل الي بخاطرك من بكاء بس انتبهي عز الزوجه والعيال بيتهم قلبي معك وربي يفرج همك وهمي وهم المهمين من المسلمين |
هلا فيك اخوي سعود.....ومشكوره على ردك وفعلا انت صادق حركات مراهقين بس الى متى....
ومسأله اني اواجهه بتكون صعبه لاني عارفه ان الغلط بيكون مني ... الله يهديه اشوف نفسي ما قصرت الا هو اللي مقصر لدرجه انه ينام بروحه ب5 ب6 ايام ويتعذر يقول احب انام عند التلفزيون كل هذاا كوم وخيانته لي كوم......... يعطيك العافيه على مرورك والله احس اني ارتحت يوم كتبت مشكلتي لاني محتاجه احد اكلمه.... هلا فيك احلى انسانه وربي كلامك درر بس والله شي يقهر واكيد بيت اهلي مو الحل بس ابيه يحس بوجودي عنده ويفقدني..... ومو قاطع قلبي الا عيالي وش ذنبهم اذا كان ابوهم كذا الله يصبرني ......... والله مالي الا الدعااااء......تسلمين على مرورك |
اخيتي طولي بالك شوي و الله يهدي زوجك و اعلم انك مقهورة و حاسة انك انخدعت لكن احمدي ربك انت احسن بكثير من غيرك و عليك بالدعاء و صلاة الليل و ربنا يفرج همك و اقول لك خدي بالك من زوجك و اهتمي به اكثر و ما تقولي سوف اترك البيت لان دلك التصرف ليس بالتصرف الحسن و بدلك فانت تدمرين حياتك بيدك و ما دام مش قادرة تواجهين زوجك ادا انسي الموضوع و تعودي من الشيطان الرجيم و حاولي ان تجدبي زوجك اليك و الحمدلله انه بيحبك و مش مخليك محتاجة لاي شئ و بارك الله فيك و ربنا يسعدك دوما و تقبلي مروري اختي الحبيبة
|
السلام عليك
ما فهمت القصد الغلط بيكون مني ارجو التوضيح |
farhiaشكرا لمرورك.وكلامك صحيح بس وربي اتمنى مو بس اواجهه بس ما اقدر في ها الفتره يمكن لان نفسيتي زفت وراح يكون بينا جدال طويل واكيد احد فينا بيغلط على الثاني وانا ما ابي كذا.....الله يفرجها....
هلا اخوي الرماني فيه مثل يقول خوذوهم با الصوت لا يغلبوك وزوجي من ها الصنف رااح يحط الغلط مني اني راقبته ودخلت منتداه من دون اذنه واني مو واثقه فيه ورااح يبرر لدرجه يمكن يقول مالك شغل فيني واذا قال ها الكلمه اش راح اسوي....حكم القوي على الضعيف...مابي يكون موقفي قدامه ضعيف... ابغى المح له او بطريقه ثانيه يكون نفسيتي هدت شوي....وممكن اجيبها بطريقه غير مباشره.. اتمنى تكون فهمت |
الله يعافي زوجك مماابتلاه الله فيه
مابي ازيد كلام ..ماقصرو الاخوان كفوا ووفوا لكن اقترحي عليه ..انه نفسك تجلسين معاه وهو عالنت او من غير ماتقولين له ...اذا شفتيه فاتح الجهاز على طووول اجلسي جنبه ( صكي عليه ) وشوفي ردة فعلة .. وصدقيني هو بيكشف نفسه ..بتوتره وبكذا مايدري انك كنتي تراقبينه ..او تعرفين شي عنه وغير كذا استغليها فرصه وقولي عندي لك موقع مرررة حلو وش رايك نشوفه ( اللي هو هذا ) وان شاء يعجبه ويصرف نظر عن الخرابيط اللي ببعض المنتديات تحياتي لك وموفقه باذن الله |
بندوره وانا اختك اذ الحكي والكتابه هنا تريحك اكتبي وفضفضي
وانا اول وحده مستعده اسمعك وانا اختك الله يريح بالك |
بندوره2007 / عزيزتي
هدي نفسك وعارفة انه اللي تمرين فيه صعب ويقهر بس الوحدة منا مالها إلا بيتها وزوجها وزوجك بشهادتك طيب ومومقصر معاك بشي واجهيه بكل صراحة وقولي هذا الشي ماعاد اتحمله علميه انه غلطان بحقك وذكريه بعقاب الله سبحانه وبعدين انتي ليش ماتجلسي معاه وتشاركيه على النت؟؟؟ واعطيه رأيك و بعدها بيقولك تعالي نجلس سوا الرجل يبغى له مسايسة والكلام الحلو بيخليه تحت امرك ومستحيل يزعلك وفبل كذا عليكِ بالدعاء الخالص لله عزوجل بأن يهدي زوجك ويبعده عن هذه المعاصي ويحببه فيكِ ويحببك فيه أتمنى لكِ راحة البال والسعادة تحيـــــــــــــــــــــــــــاتي |
يا هلا ..
اختي بندوره اعانك الله على ما انت فيه ... والله المنتديات مثل ما لها ميزات فلها ايضا سيئات بالنسبه للنفوس الضعيفه و المريضه ... الخوفه ان زوجك يدمن على مثل هذه التصرفات .. اهم شي اختي اوعي تتركي بيتك لاي سبب كان ... اركدي و فكري زين قبل ما تخطين اي خطوه حتى ما تكون ضدك.. هذا شيئ ... الشيئ الثاني اوعي تواجهي زوجك لان في النهايه راح يقلب عليك الطاوله ... و تطلعي انت الغلطانه ... و بعدين راح يكلم البنات على المسنجر قدامك ... بيقول خلاص ليه اخبي عنها .. دام انها عرفت خلاص كل شي بسويه قدامها .. يعني لازم تكوني متأكده انك اذا واجهتيه راح يخاف و يبطل هذه الحركات و يتأسف و يستحي من عملته .. نصيحتي لك انك تراقبينه ... و تحاولين تلمحين له .. اذا شفتيه جالس مده طويله على النت قولي له و ش عندك طول هالمده على النت ... و مع مين يا ترى حاولي تنقلين له قصص عن صديقاتك ان ازواجهم يكلمون بنات على المسنجر وان صديقاتك متضايقين من مثل هذه التصرفات و شوفي وش ردة فعله ... لكن حاليا خليك هاااادئه و اهتمي بزوجك و دلليه و اهتمي بنفسك و خلي ثقتك بنفسك كبيره ليكون تهتز ثقتك بنفسك .. وربي يهدي زوجك و يسعدكم يا رب .. اختك أميرات ... |
هلا فيك ورود الغلا مشكوره على مرورك.....وانا سويت ها الحركه بس على طول يسكر جهازه بحجه انه بيجلس معاي.....نصاب.......
واتمنى يدخل ها المنتدى ويشترك فيه بدال خرابيطه....انا مره قلت له عنه وفتحه وقام يعلق مو عاجبه وانا فيه جرأه في الحوار...قهرني.. هلا حبيبتي احلى انسانه والله ما تصدقين اني ارتحت من ردودكم احس فيه احد جنبي وفاهمني لدرجه اني تناسيت مشكلتي.... والله ما قصرتوا كفيتوا ووفيتواا......الله لا يحرمني منكم. |
حبيبتي بندوره الله يعينك ويفرج همك والله شي صعب اللي تمرين فيه .......الخيانه :30: شوفي ياعيني ما اعتقد إن الزوج يفرش وقته للنت والمنتديات والماسنجرات الا من الفضاوه اللي عايشها يمكن زوجك مفتقدك كثير لذلك يشغل نفسه فانت إشغلي وقته لاتتركين له فرصه يخلو بنفسه وعوديه من الان تصاحبينه على الجلوس للنت وشاركيه بمواضيعه وحاولي تدخلينه على مواضيع قيمه وفيها فائده وفي محاضرات لمشائخ حاولي تشغلينها وقت جلوسه على النت لعل الله يفتح بصيرته ويهديه فتشي حبيبتي عن السبب وراء دخوله عالم النت وخيانته لك بالتحديد وأغرقيه بحبك وإهتمامك وحسسيه دائما بثقتك فيه وانك مازلتي تحملين له الكثير على موقفه الرجولي من توبته ومن صدقه معك خليه يخجل على نفسه من كرمك ومن استغفاله لك وضحكه عليك فيه نوعيه من الناس تختشي لكن ماتخاف الله يهديه ويبعد عنكم شياطين الانس والجن ويجعلك قرة عينه ويجعله قرة عينك |
هلا فيك اختي الماسه وتسلمين على مرورك..وهو يرفض اشاركه النت مستحيل لان لو هو على صواب ومواضيعه هادفه اكيد بيخليني اشاركه لكنه على غلط....
ما ادري افكر اكتب له رساله طويله وبروح لاهلي اسبوع يراجع فيها نفسه اختي اميرات هلا فيك وانا هذا اللي اقوله لو بوجهه زي ما قلتي بيقلب الطاوله علي....... ليتني أسلى كلامك واقعي لكن والله ما قصرت لدرجه اني كل خمس دقايق ادخل عليه اذا كان يبغى شي واطلب منه يسكر النت ويجلس معااي......لكن لا حياة لمن تنادي..... تعبت والله تعبت وما بيدي حيله......والى الان ما شفته..... بسوي نفسي طبيعيه وبكتم بقلبي بغصه..وبشوف اخرتها.. |
شوفي الرجل الآن في موقع ضعف وأنت صاحبة الحق وعندك سلطان عليه مايقدر يدافع عن نفسه وأنت عرفتي الموضوع بالصدفة ما تجسستي عليه , فقط عليك تجهيز خطة أستراتيجية لمواجهته (المواجهة لابد منها )
|
سوي نفسك ماتدرين وأرسلي له رسالة من خلال المنتدى الذي يشارك به والذي سجلت أنت فيه رسالة باسم رجل يذكره بالله و أنه يعرف أنه متزوج وسيخبر زوجته إن تمادى في الباطل وانظري ماذا يحدث..؟؟؟؟؟؟؟؟
هذا قبل المواجهة لعله يغنيك عنها ... أما الخروج لبيت أهلك فلالالالالالالالا لأن الجو يخلو له ولن يفقدك |
أختي : بندوره2007
- قومي باتباع الخطوات التالية : 1- عليك أن تبدأي من اليوم صفحة جديدة .. بنفسية المتفائلة جدا ً .. وحذار حذار أن تعيدي المواجهة مرة أخرى أو أن تخرجي من المنزل لمنزل أهلك لأنك بذلك الفعل راح تعطين للزوج مساحة أكبر للتحرك وتتسع بذلك الدائرة .. في هذه الظروف يجب عليك أن تكون ملازمة للزوج حتى تكوني مراقبه لتحراكته .. لأنها ستكون محدودة جدا ً وسهل السيطرة عليها .. كذلك الموضوع رجاء ً لا يخرج من المنزل لأنه مازال تحت السيطرة .. إذا خرج تأكدي تماما ً أنه راح يخرج عن السيطرة .. 2ـ الملل في الحياة الزوجية: الروتين والرتابة والملل من أعداء الحياة الزوجية، وهذا الملل يظهر عند الرجال أكثر منه عند النساء فيبحث الرجل عن التجديد خارج المنزل. 3-عدم اهتمام الزوجة بنفسها: فقد تهمل الزوجة نفسها ومظهرها ونظافتها بعد فترة طويلة من الزواج، وتستهين بزينتها وجمالها متصورة أن زوجها لا يعنيه ذلك وأنه لن ينظر إلى غيرها أبدًا ولن يفكر بالزواج من أخرى بعد العشرة الطويلة والأولاد. وهذا خطأ في التصور لدى المرأة العربية عمومًا. 4- ارواء الزوج عاطفيا ً وجنسيا ً لكي لا يبحث عن البديل .. قد تغفل الزوجة الحاجات العاطفية للزوج من حب وحنان واحتواء ورعاية لأي سبب من الأسباب وبالتالي يشعر الزوج أن زوجته راغبة عنه ولا تبدي له التعاطف أو الرغبة في تقبل عواطفه وهذا ما يسمى بفتور الحب .. وكلما تقدمت السن بالرجل فهو يحتاج للعاطفة أكثر .. 5- زيادة الاهتمام بالأبناء: المرأة العربية بعد زواجها وإنجابها الأبناء تتصور أن مهمتها هي المنزل والأولاد فيزداد اهتمامها الدائم بالأولاد وأعمال المنزل أكثر من الزوج وبالتالي يزداد إهمال الزوج بعد سنوات من الزواج، فيشعر الزوج بعدم أهميته لدى الزوجة وهامشيته في حياتها. وقد يسوء الوضع إذا كانت امرأة عاملة فيكون الترتيب الأولاد ثم البيت ثم العمل ثم الأهل والأقارب والصديقات ثم الزوج .. 6- الزوج سيلاحظ هذا التغير المفاجيء وربما يتعمد إلى خلق مشاكل لإعادة الوضع السابق على ما كان عليه .. على الزوجة الصبر والتحمل ونشر السعادة والفرح في المنزل .. وكلما أتى من الخارج يكون الإستقبال أفضل من ذي قبل .. 7- أنصحك بتذكير الزوج بالله تعالى بين الحين والآخر .. لأن القلوب تصدأ .. ومناصحته والابتعاد عن أصدقاء السوء مثلا ً ... وأن الله مطلع عليه في السر وفي العلن ... أن تكون بأدب وبسياسة فائقة جدا ً ... لكي لا تهدمين البناء ... ============================== أرجو أن تمشين على نفس التسلسل اللي أنا واضعه خطوة بخطوة وعدم استعجال النتائج وعليك بالصبر والدعاء والصدقة وكثرة الاستغفار ... ============================== أخوك : خالد الصالح مدرب معتمد ... |
زهره الورد تسلمين على مرورك..
الرماني اواجهه واقول عرفت با الصدفه اي صدفه اللي تخليني ادخل المنتدى نفسه...ويعطيك العافيه على الرابط افادني كثير..... خالد الصالح مشكوره على نصائحك والله يقدرني اني اتبعها مع العلم وبشهاده زوجي يقول ما قصرتي معاي بشي شكله يبي الفكه بس اخليه براحته.....هذا طبعه مع العلم لفارق السن بينا كبيرر احسه مو من النوع اللي يحب الدلع والرومنسيه لدرجه مررره سويت جو رومنسي بغرفه النوم وشموع وحركات وربي الغرفه تجنن.....يوم دخل قام يضحك ويقول نا ويه تشبين فيهاااا...والله والله اني انكسرت وخبيت دمعتي عنه وطفيت الشموع وقلت اسفه اني سويت كذا.......اوعدك ما تشوف ها الحركات مره ثانيه............ طولت عليكم...... الله يهديه ويسخره لي يااااااااااااااااااااااااااااااااااااااااااااااااا اااااااااااااااااااااااااااااااااااااااااارب |
لما قرأت كلمة دموعي على خدي دخلت مو عشان عندي نصيحه ....لا.....
لان دموعي اليوم غلست وجهي ليته على الخدود وبس المشكله ما بقى جزء من وجهي ما وصلت له هالدموع الي يشوف وجهي اليوم يقول مسويه تقشير !!!! محمر ..... ويلمع لاكن شتان بين حالي وحالك والله لا يوصلك لمثل حالي انا موضفه وراتبي ممتاز لاكني عجزت ان اصل الى ما تتمنينه الله يصلح حالي وحالك وكل مسلم . ما ادري ليش كتبت لك رد ..........يمكن عشان اهون عليك ! |
الحال من بعضه حتى انا اكتشفت خيانه زوجي الله يعين بس طالبه الطلاق انا ..
وحسبي الله ونعم الوكيل |
أنت من يقرر عزيزتي إذا كنت في مكان القوة فواجهيه أما إذا كنت ضعيفه عندك عيوب مهما كانت صغيره لا تواجهيه ,
تختلف شخصية الرجل من من فرد لآخر وأنت من يحدد ماذا يريد زوجك مثلا إذا كان يحب المرأة العاملة و أنت غير ذلك ..............إلخ أنا أرجح أن لا تواجهيه و اتخذي من كيد النساء لك طريقا مثلا أن تكوني أنت في منتدى و تشاركي فيه و تشدقي بذلك عنده حتى تقولي له بعد أسبوع أنك دخلت على المنتدى الذي يشارك هو فيه طبعا لا تقولي له عرفتك لكن احتالي الله يعينك و يصبرك |
ام الجود هلا فيك والله عورتي قلبي الله يهون عليك ويفرج همك يمكن مشكلتي تافهه في نظر البعض.....
لكن انا احسهاا كبيره..من شاف مصيبه غيره هانت عليه مصيبته...اتمنى تفتحين قلبك وتفضفضين والله انا ارتحت كثير يوم كتبت وفضفضت لكم.....الله يوفقك.... s.s.dهلا فيك وشكرا على مرورك......بس الطلاق مو حل خاصه اذا كان بينكم اولاد.....الله يفرج همك ويوفقك.... ام فروحه مشكوره على مرورك وانا يوم قلت مقدر اواجهه وضحت الاسباب وما اتوقع عندي عيوب تمنعني لاني اولا ابيه يحس اني تغيرت انه مو هامني عقب ما كنت مدلعته واداريه....... وفعلا اليوم وضحت له ها الشي بس يسألني وش فيك ........وطلعت اللي بخاطري عليه والله قعدت ساعه قدامه اصيح واقوله ان كنت ما ترغبني ليش مجلسني في بيتك فيني عيوب قول اصححها با العكس كاااان مرررره متعاطف معاااي واحس اني ارتحت......ومن امس ما جلس على النت كله بس علشاني...... الله يهديه صااار بيني وبينه حووووار طويل عريض بس طلعت اللي بخاطري...بس طبعا ما قلت اني فتحت منتداه......جبتها بطريقه غير مباشره.....واحسه فهم...ومن ناحيه انه يحب المرأه العامله ما اعتقد لو يحب كان وافق اني اتوظف واكون عامله.... وقررت اريح بالي ولا اراقبه لان مو انا اللي بحاسبه رب العالمين فوقه.......للاني تعبت. واشكر كل من تفاعل مع مشكلتي وطرح لي الحلول الله لا يحرمني منكم........ |
والله يا أختي إن قصتك عجب العجاب وعلى فكرة ترى فيه أزواج كثير يمارسون هذه الأخطاء السيئة
لكن لدي فكرة وأرجو أن ما في أحد كتبها لأني ماقرأت الردود كلها ألا وهي : ليش ما تسوين فيه مقلب بأنك تحادثينه في الماسنجر بإيميل أختك وتطرحين علية بعض الأسئلة يعني هل أنت متزوج ؟ كم عمرك ؟ أنت وين تشتغل ؟ كيف عرفت إيميلي ؟ وين تسكن ؟ وبعدين إن مشت الأمور على مايرام واعديه بأي مكان كمطعم أو غيره وإذا دخل أبو الشباب عليك واجهية لكن لا توصل إلى إنفعال وبهذا يعترف فعلاً إن ماله إلا زوجته . وبيني له إنك سويتي الأشياء هذي لتنقضيه من هوس الخيانة وذكرية بالله وماموقفه ولو أنتي سويتي كذا أو وحده من خواته لا قدر الله هل سيرضى . أسأل الله أن يهدي زوجك الى الصواب وأن يفتح على قلبه |
اختي العزيزة هذه مشكلة ولكنها ليست كبيرة بالشكل الذي تتصوريه انتي ولكن هناك نقطة واحده يجب ان تكوني ذكيه جدا حتى تستطيعي تنفيذها وهي المواجهة والصراحه اختي العزيزة
صدقي وخذيها نصيحة من اخوك صدقيني مواجهة الرجل بالغلط الذي ارتكبه هي اكبر لحظات الضعف التي يمر بها الرجل لا تداري ولاتخفي بصدرك لان ذلك الامر له سيئات اولها اتعاب نفسيتك وتفكيرك وايضا اعطاء زوجك مساحه من الحرية التي من شانها خلخلة اسس بيت الزوجية الذي فهمت من خلال كلامك انه قوي بالحب المتبادل والاحترام الذي يكنه زوجك لك كل رجل يمر بمراحل ضعف ونظرا لوضع زوجك بالمنتديات فان من واجبك تنبيهه وتحذيره من خطورة الامر الذي يقوم به مرة اخرة اقول لك لا تداري واجهيه بانك تعرفين كل شيء وليقل ما يقل تراقبيني نعم راقبتك حتى لا اظلمك انا احبك ومن واجبي ان احذرك وانتقدك وابين لك غلطك حتى لا افتح مجالا للاخرين بانتقادك حبيبي -- بهذه الكلمات واجهيه وبيني له ان كل همك الحفاظ عليه وبادري انتي بوضعه بخانة اليك قولي له اذا انا مو عاجبتك وجهني للصح كل انسان بغلط لكن من كلامك واضح انك مو مقصرة وان زوجك ايضا رجل طيب لكن بده فركة اذن عشان يرجع للطريق اهم شي انك تكوني ذكية اختي في مواجهة زوحك وتحكمي عقلك وما تخلي عاطفتك تتحكم بالوضع لانها بتفتح باب للشيطان يدخل بينكم تحياتي لك وامنياتي بان يقلع زوجك عن هذا السلوك السيء واحمد الله كثير الحمد لان منتدانا صارم في قوانينه من هذه الناحية وارجو من كل المنتديات ان تحذو حذوه مع خالص الامنيات لك ولزوجك بحياة ملئها الاستقرار اخوك صاحب الظل الطويل |
أعانك الله
|
طولي بالك ...
والله 95% من امثال زوجك ... اصبري عليه وبيجي الوقت اللي بيطفش من نفسه .... الله ياخذ النت واللي اخترعه .............سبب لنا مشاكل كنا في غني عنها . |
اختي لا تفكرين في الشر انصحيه ودعيلة
|
الله يهديه
والله يا اختى اقول لك اصبرى وكل هذه التصرفات بسبب عدم الخو ف من الله فخوفيه بالله ويجب ان يداوم على صلاة الجماعة ودائما اسمعية الشرائط الدينية وخصوصا التى تتكلم عن هذا الموضوع واخبرة بقول الرسول صلى الله عليه وسلم "عفوا تعف نسائكم" واخبريه ان الله قادر على نزع النعمة منه وهى نعمة الحلال والزوجه الطاهرة والاولاد ولا تتركية يجلس بمفرده على النت اما اتركى الاولاد معه او اخبرية انك تريدى ان تتعلم وتتسلى مثلة واجلسى معه اذا رفض ان تجلسى معه شغلى شرائط القرآن الكريم او اذاعة القرآن الكريم من غرفة اخرى حتى يخاف من كلام الله ولا مانع من ان تتمادى معه فى الماسنجر وتوصلى له كل ما تريدى عن طريق غير مباشر والله يهدى وماذا نقول انها الفتن واصبرى يا اختى فنحن الرجال نضعف فى احيان كثيرة واعلمى ان سنه هذه يطلق عليه المراهقة الثانية ويريد ان يحس انه مازل شاب ومرغوب فأدعى له لعنة الله على فتن النت والدش والجوال والله المستعان |
اسأل العظيم رب العرش العظيم ان يهدي زوجج ويفرج همج ويريح بالج ويصلح حالج اللهم امين
اسأل العظيم رب العرش العظيم ان يهدي زوجج ويفرج همج ويريح بالج ويصلح حالج اللهم امين اسأل العظيم رب العرش العظيم ان يهدي زوجج ويفرج همج ويريح بالج ويصلح حالج اللهم امين |
طيب مادري انا عندي فكره
العبي عليه وقوليله انك مشاركه بمنتدى مشرفه وفيه ناس مشرفين اضافوك بالمسنجر وانك وجدتي استحسان واستظراف من احدهم اونه خفيف دم الخ شوفي رده فعله ؟ بيعصب وبيقول ليش ؟؟ قولي حبيبي ماعرفت انه غلط لاني اشوفك تسوي هالشي وكما تدين تدان مثل ما انت تكلم بنات الناس وتستدرجهم فيه واحد كلمني بالمسنجر وطلب الرقم شوفي اذا ماطلعت عيونه 4 بعد هالكلام واتوقع يعتزل المنتديات كلها |
| الساعة الآن 08:33 PM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©