والله تعبت
 

مرحبا بيكم اعضاء وعضوات هذا المنتدى الرائع ...

بخبركم بمشكلتي وهي اني مخطوبة صار لي كم شهر بس ... الحمد لله انا وخطيبي نحب بعض كثيير وهو يبادلني هذا الشعور اكثر مني في كل الاوقات ... بس وين المشكلة ؟
المشكلة ان عمله جدا متعب توقعوا ان اجازته بس يوم واحد في الاسبوع وبقية الايام يكون تعبان ! يعني ما اخرج معاه واغير جو الا بس يوم واحد ! واحيانا ما نخرج ونجلس بالبيت .
هو مو مقصر معاي ... مصروفي ويعطيني بس انا حالي تعبان من التفكير ... صحيح اني ادرس وانشغل بالدراسة بس كل ما اشوف الكل يخرج ويتفسح الا انا ... ولا مرة سمعت بنت مخطوبة وهي متمللة وما تتفسح برى، اقضي معظو وقتي بالبيت جالسة او على النت حتى مرة ضايقتني بنت تقول لي ليش ما تخرجين ويا خطيبك ! ما يمر عليكي ! ! صدقوني نفسيتي تعبت من التفكير اخاف افتح معاه هالموضوع لانو بعرف انو هذا طبيعة شغله وما له يد ...

شو رايكم اخبره ولا اسكت ؟ واذا بخبره كيف

اعتقد مو وقت تحتاري وتغضبي وانتم في الخطوبة

اتركي الراحة والدخول والخروج الى بعد الزواج

السلام عليكم ورحمة الله وبركاته

اول شي اختي بارك الله فيك واحييك على صبرك على خطيبك " اتوقع انكم عاقدين قرانكم لانكم تطلعون مع بعض " ..

اختي ابي اقول لك .. ريحي نفسك .. ومش لازم تطلعون ايام الخطوبه .. يعني مب قصدي خير شر بس هو قاعد يشتعل ويتعب عشان يكون نفسه .. اصبري عليه وريحيه ..

واذا اي حد قال لك شي . قولي له والله زوجي يشتغل مب فاضي .. وانا مرتاحه معاه .. ومالكم شغل فيني << عصبت

لا جد بقول لك ليش انا حاسه فيك .. لانه ايام خطوبتي كان خطيبي يدرس برع .. وكانت وحده من البنات الله يهديها كل ماتشوفيني .. انت زوجك قاطك هني ورايج برع ومن هالحجي اللي ماله داعي .. وماتدري انه والله بتعبه يكبر بعيني .. وادري انه مايسوي كذا الا عشان يرفع راسي وراس هله ..

اختي حبيبتي ماقول لك الا اصبري واصبري واصبري .. لانه هو مب حارمك من هالشي بكفيه .. وصدقيني بعد الصبر راح تفرج .. ولاحقه على الطلعات ..

وصدقيني عقب ماتتزوجون .. ويخف ضغط شغله مع الايام .. راح يطلعك ويوديك كل مكان ..

اهم شي الصبررررررررررررر..

والله يحرسك يارب .. ويفرج همك ويهنيك ويسعدك ..

اسأل الله انيبارك لكم في بعض ويجمعكم على خير لاكن مو فاهم مخطوبين وتطلعون مع بعض ؟؟

ليش الاخوان مستغربين في كثير مجتمعات المخطوبين (العاقدين ) يطلعون من بعض ..

لان احنا مو مثلهم انحسها غريبة ..

بس الأخت تشوف اللي حواليها ..وفي وضعها ..وتقارن ..

حبيبتي لا تضايقين نفسج ..هذي طبيعة شغله شيسوي المسكين ..اعذريه ..وراح تمشي الحياة ..

الله معاج

هلا اختي

صراحة حاسه فيك من كل قلبي ..
لاني بالخطوبه صار لي كذا مثلك .. بس الفرق هو ان ما كانت السيارة متوافرة وقت الخطوبه ..
فكان قليل جدا نطلع ونتفسح ...
وكنت اضاااايق .. ليلة اجازة وكذا وانا مع خطيبي بالبيت قااعدين ..
بس كنا نسلى واحنا جالسين .. البيت فااضي محد معنا
ونتسلى .. بالتلفزيون .. بألعاب ونمزح وحركات حلووة كانت تصير .. واضيع الوقت ^_*

الله يوفقك اختي

تقبلي مروري

اتصبري يالغالية اكيد حتطفشي من الخرجات بعد الزواج ان شاء الله...وانتو اثنناتكم مشغولين

ولا تعقدي الامور والله كلكم معذورين

(الله يسهلك امورك ويوفقك)

مابعد الصبر الا الفرج

ولاتسمعي لكل كلام يجيك ويفسد عليك حياتك

تحياتي

يا أختي

إنتي وافقتي عليه من أول ليه ألحين مو عاجبك الوضع

قبل ما تقولين له إنتي عارفه إنه ماراح يتغير شيء

فأنصحك لا تكلمينه وتقبلي الوضع ولا تقارنين البنات بيك

تحياتي

اختي الموضوع سهل جدا

هو خطيبك اكيد لو بيده كان عطاك الوقت كله ... في احد يحب يكون بعيد عن بيته وعن راحته

لكن لا تنسين انه عمله برضو مهم لاستمرار الحياة وبالتالي يجب ان تتحملي شوي وتحاولين ترحينه اكثر لأنه محتاجلك مثل ما انت محتاجه له

تمنياتي لك بالتوفيق

عزيزتي ابدا لا اتفاتحينه في الموضوع راح اتضايقينه واهو ويش اسوي هذا شغله وانتي لا اتطالعين غيرج ترى اتعبين بعدين ما دام اهو مو مقصدر معاك وحنون هذا اهم شي ولا تاخذين على الظاهر ترى في ناس يطلعون مع خطيباتهم لكنهم مو سعداء احمدي الله على خطيبك لانه مو مقصر معاج وبعدين حاولي تتأقلمين مع الوضع ترى اهم شي انه حنون وكريم ويحبج اما الاشياء الثانية زي الطلعات والفوتات اشياء سطحية ومو مهمة واتطلعين مرة في الاسبوع تراه يكفي واذا ما قدر انتين لازم تتفهمينه واهم شي راحته وصحته

وموفقة حبيبتي والله يخليكم لبعض:22:

واخوي فهد الهاشم كفى ووفى

أول شي ألف ألف ألف مبروك عالخطوبة .....وبعدين حبيبتي الطلعات والفسحات مش مهمة أكثر من إنك توفقتي برجل صالح....هو معذور بحكم شغله ليش انتي ما تكسرين الروتين واطبقين بعض الأفكار الحلوة لما يزورك في البيت في الاجازة سويله عشا رومانسي في أجواء مختلفة اكسري الروتين اعزميه سويله حفلة مفاجأة اعزميه في أماكن ما قد سارلها..... الكرة الحين في ملعبك انهلي عليه بأفكارك واكسبيه.....لا تنتظرين من الرجل شي وخصوصا اذا كان مشغول......بعدها ان شاء الله راح يفضي نفسه لو 5 دقايق عشان يكون معاج....

بالتوفيق ان شاء الله

مشكورين اخواني واخواتي كلكم على الرد ...

:cool: والله انكم خففتوا عني التفكير في هالموضوع ...

والله اني صابرة مع اني كذا مرة احاول ابين له اني مستاءة من انشغاله بالعمل بس اتردد واقول ما بيده شئ لان هذا طبيعة عمله ... وما بحب ازعجه بعد .

واحاول اني ما اقارن نفسي ابدا بغيري بس ما ادري في بعض الاوقات اكون مضايقة لما اسمع من مرت حماي انها تفتخر انها تخرج ويا زوجها وتشتري كذا وكذا مع ان وضعهم المادي اقل منا ووايد اسمع من الكل يقول لي الحين فترة راحة واستانسوا شوي واخرجوا ويا بعض لان بعدين فترة الزواج راح تكون مرحلة اتعب وما عاد يكون للفراغ مكان من هالشئ .
والحمد لله انه مو مقصر معاي ومصروفي يعطيني بس مقصر معاي بشوفته لاني احيانا ما اشوف الا في اليوم شوي وبعدها يروح الشغل ويوم ثاني يرجع بتعبه وما اشوفه .



ومشكورين على الرد ريحتوني شوي

اقتباس : ومشكورين على الرد ريحتوني شوي

بصراحة ماني متعود ارد على المقال الواحد اكثر من مره لكن لما قلتي جملتك إلي فوق ضحكت كثير ( اسمحيلي )

أختي الكريمة ترى الناس هنا ما بيدهم شيء يسونه لك غير محاولة التخفيف عليك بس و بعد إقناعك بالواقع إلي بصراحة احس انه شيء ما يزعل واسمحيلي لو فكرتي كذا كثير فانت انانية بزيادة (( والحين )) يجي دورك انت تتفهمي الموضوع وتقتنعي وراح ترتاااااااحين كثير مو (( شوي ))

الله يوفقك

أعتقد ان ما عندك مشكله اصلا

ما المانع ان تبقى الزوجه في البيت ما تخرج منه الا في الشهر مره او مرتين

خليك من كلام البنات اللي يحبون ينكدون عليك العيشة انت وزوجك

والاصل قرار المرأة في المنزل

وما شاء الله انت تدرسين يعني كل يوم تقابلين صديقاتك في المدرسة

مرحبا اختي اولا احب ابارك الك و عقبال الزواج يارب
و انت يا حيبتي لازم تصبري لكن اذا يعني مرة مرة مو قادرة تصبري لمحي له قولي له ياربي انا مرة متملله ما اطلع معاك انا والله ودي اطلع معاك صار لنا فترة ما طلعنا مع بعض و هو مدام يحبك مثل ما قلتي اكيد بحاول يسعدك و اقترحي عليه ان هو ياخذ مثلا اسبوعين اجازة من العمل و انبسطوا فيها