|
عمري 26 /بتزوج واحد متزوج / ايش رايكم ؟؟؟؟
السلام عليكم ورحمة الله وبركاته
طبعا دخلت الموقع اطلب استشارة واتمنى ان يكون الرأي موضوعي بعيد عن العاطفة والغيرة وووووو انا عمري 26 واتقدم لي عرسان :( :( :( :( :( ولا احد يصلح .. صبرت + انو اخاف على نفسي من الحرام ... لان الحرام سهل جدا جدا جدا .. والفتن كثيره اللي اتعرضت لها وخلاص يكفي صبر ضاع عمري وانا جالسه استنى .. المهم امس اتقدم لي طبيب عمره 40 ملتزم دينيا استخرت ومرتاحه انا عاجبني عمره لانو انا ودي بواحد اكبر مني بكثير وعاقل وعنده تجربة بس ( اخاف زوجته الأولى تعمل لي مشاكل ؟؟؟؟؟؟؟؟؟؟ ) كمان زوجات اخواني خاصموني وقالوا جايه تفتحين علينا باب وما ادري ايش ؟؟؟ وامي قالت اللي يريحك .. انا ما اغار انا ابغى واحد يستر علي ويخاف الله وبس انتظر ردكم |
أنا زوجه أولى
أول شئ طالما أستخرتي الله ..ربنا يوفقك وأهم شئ ياقلبي حطي في بالك خوف الله بس الله يكون بعونك من زوجته بعدين شوفي ياعمري أنا أول ماأتزوج زوجي طبعاً زعلت وحزنت ومت قهر..لأنه زوجي فاجأني بهذه الزيجه وكمان زوجي ماهو من الرجال اللى يبغى الجنس على طول فهو مقصرمعايا من أول ولمن أتزوج بيقصرأكتر وأنا ماني مهمله هو أخذ الزيجه على إنها متعه له ( أنانيه منه ) المهم دحين زوجته هي بتعمل لي مشاكل وكلام وسب كانت ساكنه بعيده عني ...لكن لمن قربت مني في نفس البيت صارت مشاكل كتيره معها .غيره ..وطولة لسان وتصرفات الحمدلله وحتى زوجي بيفكرفي طلاقي ولكن خايف على الأولاد صاريميل لها ونسي عشرته معايا |
اختي اهم شي السؤال جيد عنه إذا كان اهلك يعرفونه اوقاربك و طلع انسان جيد وملتزم اتوكلي على الله وافقي
بس نصيحة اكثري من الأستخارة الله يوفقك اختك مهااااوي |
اختي روعه الله يسعدك ويرد لك زوجك
انا ما ابغى مشاكل بالعكس بس يا ناس ابغى اتستر وهذا الزوج افضل من تقدم لي .. معقول ارفض واضيع عمري على امل يجي احسن ويمكن ما يجي احسن .. طيب انا انسانه بتعرض للفتن الكثيره وما احد داري عني غير ربنا .. ارفض واستنى .؟؟؟؟ |
استخيري وتوكلي على الله
وتذكري انك مو صغيره ومسأله انه متزوج مو عيب صدق ان الزوجه الأولى راح تتأثر كثير وانتي عارفه الشي هذا انا متزوجه ومجرد تفكير انه زوجي يتزوج علي احس اني بنجن لكن هذا شرع الله وله سبحانه حكمه بالتشريع هذا الله يعينك ويوفقك |
شوفي ياقلبي سماح من ناحية إن زوجته تعمل لك مشاكل فتوقعي دا الشئ منها بسبب الغيره...
لكن أهم شئ مايكون موقف زوجك سلبي ويسمع كلامها وتساومه ويطلقك ؟ ويشهد علي الله من فوق سبع سماوات إن زوجي بالأول كم مره كان يبغى يطلقها وكنت أمنعه من كدا وأقوله بنات الناس مو لعبه لاتطلقها ودحين بأدفع التمن غالي زوجي بيعاملني معامله سيئه وغيرالسب منه والشتم وزي ماقلت لك بجد بيفكرفي طلاقي وأحياناً بيقولي إنتي هنا منتى زوجه لي إنتي خدامه لأولادك وبس والحمدلله ..برضي بأستغفرالله كتيروأدعي الله يفرج همي وكربي |
الله يسعدك يارب يا روعه
طيب انا خايفه انا ما بضرها أبدا ولا بعمل لها مشاكل .. لكن اخاف منها .. طيب ايش اعمل يا ناس والله رفضت صعب وقبلت صعب ؟؟؟!!! |
حببتي هذا زواج لاتطالعي للمستوي والمركز انتة لسة صغيرة وفية بنات في زي سنك ما يفكرو حتي في الزواج المهم لاتخلي حياتك من الاول علي كف عفريت وصدقيني الزواج ما يحتمل الا اتنين اذا دخل فية تالت اختل التوازن وكل شي قسمة ونصيب واللة يرسل لك ابن الحلال الي في سنك وبكر كمان تحياتي
اختي ارجو تغيير الصوره الرمزيه عاجلا |
ماأقولك أرفضي ..أستخيري كمان وكمان
والزواج من متزوج حبيبة عمري موعيب بس خذ عهد من زوجك إنه مايطلقك أو يطلقها بسبب مشاكل الغيره وكمان مع الأيام لوقدرتي تكسبي قلبها تخليها أخت لك تراه حلو أتمنى ياقمرتعملي بحث بإسمي في المنتدى وشوفي مواضيعي اللى كنت أكتبها عن زواج زوجي وكيف كنت أتمنى كسبها كأخت لي ..ولكن تأتي الرياح بمالاتشتهي السفن والحمدلله رب العالمين |
اقتباس:
ــــــــــــــــــــــــــــــــــــــــــــــــــ ـــــــــــــــــــ روعه الله يسعدك يارب ويوفقك انت شايفه ان عمري صغير ؟؟ تعرفي انا احب يكون اكبر مني .. ما ادري ؟؟ |
الحمدلله استخرتي ومرتاحه ورجل عمره بعد مو كبير في قمة شبابه ولا تترددين ابداااا بل وااافقي وعلى بركة الله والله يوفقك
|
هلا والله بخواتي العزيزات..
هذي اول مشاركه لي بهالقسم وسبحان الله اول مشاركة لي بهالموضوع وارجو من الله ان اكون عضوة خفيفه على قلوبكم ^ز^ اختي سماااااااااح الحال من بعضه و والله موضوعج يا عالعوق.. اتوكلي على الله دامج استخرتي لكن اهم شي خلي رب العالمين بين عينج واذكري انج الي تحبينه وتبغينه حبيه لعديلتج... ويارب يارب يسعدج وايكون الزوج الصالح لج قولوا اميين وادعوولي خواتي الله يسهل علي بعد انا نفس حالة الإخت صاحبة الموضوع والله العالم اني ارتحت للريال الله يسهل اموري وامور الإخت وكل مسلم اللهم امين... |
مس ذوق الله يوفقك يارب يعني مو لوحدي بنفس الفكرة ..
انا عاجبني عمره وعلمه وعمله ودينه واخلاقه .. بس قالت لي اختي ان ب الأربعين الرجل يكون مراهق و يحب يثبت وجوده وشبابه وانه فترة مراهقه بس !!!! |
اذا انتي استخرتي ومرتاحه
توكلي على الله ولا تهتمين لكلام الناس وبالتوفيق |
أكثري من الدعاء والإستخارة ..
إذا اتسهلت امورك .. اعرفي في الأمر خير بإذن الله وإذا لا .. لا سمح الله .. يكون شر والله صرفه عنك الله يوفقك اقتباس:
إنت بجد واحده رائعة .. ماشاء الله .. إستمري بعطائك .. والله ما يكسر ظهر الرجل إلا الطيبة والكلمات المعسولة والتعامل الراقي الطيب .. صدقيني راح يجي اليوم اللي تحصدين فيه كل خير .. بسسسسسس الصبر وهدوء البال لا تندمي على نصيحة زوجك .. إنت نصحتي لوجه الله .. رغم إن الأمر كان صعب عليك .. لكن ارفعي يدك للسماء واشكي الحال لله وقولي يارب يا علام الغيوب إنت أعلم إن زوجي جاء يشكي من زوجته وأنا نصحته بعدم طلاقها إبتغااااااء لوجهك .. وطلب لرضاك .. يارب إنت ادري إني ما كنت اقصد من نصيحتي مصلحة دنيوية .. يارب اسألك بعملي هذا تكفيني شرها وتحنن قلب زوجي علي وعلى أولادي ..... وادعي الدعوات اللي تناسبك .. لله معك .. |
أثر فيني توقيعك اختي فرح الله يجزاك كل خير ..
|
الله يوفقك انتي استخيري واذا كان الرجال اخلاق .............خلاص توكلي على الله .......ز
الله يوفقك |
شوفي يا أختي
من وجهه نظري قليل الوحدة بعمرك بتحصل لها زوج أكبر منها ومو متزوج كمان يعني أما متزوج مثل حالتك أو مطلق المهم أنت ي شوفي الرجاااال وصفاته هل تناسبك أو لا من كل النواحي وثاني شي قعدي معاه وتكلمي معاه في عده نقاط مهمه أولها - أنك مو راعية مشاكل وما تتمني مشاكل من زوجته الأولى - خبرية أن زوجته لازم تعرف عن زواجه لأن هذا يخفف من بداية المشاكل وكمان يقلل الصدمة لها - خليه يعلمك شنو سبب زواجه منك ؟ ( مثل هل زوجته ما تجيب عيال وهو يبي عيال أو مو مرتاح منها أو غيرها) هذا يخليك اذا وافقتي خلاص تعرفي عن زوج المستقبل كل شي واذا كان يبي عيال وماعنده تروحي تعملي فحوص انك سليمة عشان بعد تقللي من المشاكل. - حاولي تكسبي زوجته قبل الزواج تعرفي شخصيتها تقللي من غيرتها وتطميها أنك من النوع الطيب ويبي الستر فقط. الله يوفقك |
انا مثلك عمري 26 وتزوجت بزوج متزوج وملتزم ولله الحمد
صحيح اشعر بالنقص احيانا وبالوحدة احيانا والندم احيانا ولكـــــــــــــــــــــن 1. رفضت رفضا تاما التعرف على زوجته الاولى مع انه حاول كثير اني ازورها اوتزورني وحاولوا اهلي واخواني واصريت مااتعرف عليها لان هذا اكبر باب للمشاكل ... وكان اول شرطي بيت مستقل بعيد عن زوجته وقر يب من اهلي وهذي اكبر حاجة مريحتني ولا عندي اي فضول في التعرف عليها 2. اذا كان عندي في البيت مايجيب سيرتها لا بخير ولا بشر حتى اسمها ماينطقه وكذلك انا واعتبرها غير موجودة في الحياة ( يعني اتخيل انه زوجي لحالي) احيانا يبات عندي يومين او ثلاث ورا بعض مااساله فين زوجتك ولا ليش ماتروح هناك لانه ماتهمني اخبارها كانه اخذ اجازة من عمله وجلس معاي واستقبله بصدر رحب واودعه بصدر رحب 3 . يمرني في يومها ساعتين او يوديني ويجيبني لاي مكان لانه اذا طلع في يومي ماأدري وين رايح .. واحتمال انه اكيد مرها وجلس معاها يعني واحدة بواحدة بس اسوي نفسي ما ادري انه مرها 4 . اذا كسبتي اهل زوجك امه واخواته بالكلام الحلو والهدايا والاتصالات والزيارات تاكدي انك كسبتي زوجك 5. لا تتنازلين عن اي حق من حقوقك المادية والمعنوية والله يوفقك |
السلام عليكم ورحمة الله وبركاته ..
اول شي اختي ابي اقول لك الله ييسر لك الخير يارب وين ماكان ويرضيك به . بس اختي انتي ماقلتي لنا هل هو بيخبر زوجته الاولى والا بيكون الموضوع بالسر ... واذا بيخبرها هل هي موافقة .. وشنهي الاسباب اللي دفعته للزواج من ثانية .. مب لشي ولكن تعرفي هل سيأخذك عن قناعه .. او انه مجرد نزوه مثل مايقولون وبعدين يرجع لام العيال .. اتمنى تلاقين اجوبه لهذه التساؤلات ويطمن قلبج .. واظن انها بتفتح عقلك لاشياء كثيره .. أخيراً اخيه احذرك من الزاوج بالسر .. او من الزواج بدون علم ال2 .. لانها اذا علمت بعد الزواج قد تتسبب بمشاكل تكون سبب في طلاقك لا قدر الله .. الله ييسر لك ويسعدك يارب .. |
حرام عليج والله
عمرج 26 سنه وووايد اصغير توه العمر جدامج وبيلج اللي احسن منه بعدين هو ووايد اكبر منح انصحج لاتاخذينه تفكيرج غير عن تفيكيره لاتقولين شايب بيدلعني لا صج يدلعون بالفلوس لكن بالكلام ولا شي مانصحج بعدج صغيره والحياه جدامج بس القرار الاول ولاخير لج |
والله ياجماعة مستخيره دحين وحاسه بإنجذاب نحوه ..
اقتباس:
السبب / لا اعرفه / هو عنده اطفال / زوجته / انا حاسه بخوف منها لكن هو مرتاحه له جدا وهو طيب جدا اقتباس:
اللي محيرني زوجته بس عاجبني كثير انه اكبر مني .. ما عندي استعداد اتحمل شاب ما عنده خبره ويحتاج ووووووووووووو هذا رجل عنده تجربه ويعرف يتعامل مع المرأة .. اضافه اتمنى شخص عاقل رزين يعني حتى لو كان مو متزوج هو راح اختاره .. |
انا اول مره اشارك واقولج لو لنتي بمكانه بتوافقين طبعا لا
|
السلام عليكم و رحمة الله و بركاته
عزيزتي... لقد شعرت بنفس حيرتك التي تشعرين بها الآن..عندما أصبح عمري 26 ..و تقدم لي الكثيرون من الأرامل و المطلقون و راغبي التعدد ( زواجا ثانيا أو مسيارا أو بالسر) و ذوي الرواتب الضعيفة الراغبين في راتبي .. كم كانت تسود الدنيا في وجهي عندما أشعر بأنني غير مرغوبة سوى من هذه الفئة..:( كم كنت أشعر بالمرارة عندما أسمع همسات القريب و البعيد و أرى نظراتهم...( أيش مستنيه؟؟ هي شايفه نفسها مين؟ ليش ما تمشي حالها؟ كأني عالة عليهم أو كأني هم على قلوبهم و لا جالسة على رأسهم ...حسبي الله و نعم الوكيل في كل مين يجرح من تأخرت في الزواج) ولكن دائما كان هناك بصيص الإيمان بالله عز وجل و قدرته إللي فوق كل شيء..فكنت مؤمونة بأن الله راح يرزقني على قد نيتي ...و يرزقني الرجل إللي تتوفر تقريبا كل المواصفات اللي رغبت فيها.. كان دائما يرن في أذتي ليش أميل بختي؟؟ أيش فائدة الحياة مع رجل أنا مني مقتنعه به؟ أيش فائدة الزواج إللي ممكن يكون من وراه مشاكل كثيرة أنا مرتاحه منها و أنا بدون زواج ؟؟ على الأقل مشاكل العنوسة أهون من مشاكل الزواج بمتزوج تغار مني زوجته الأولى و يحقد علي أبناءه و من الممكن أن ترجح كفتهم و يتركني بمجرد أن تزول سكرته....أهون من أكون مجرد وسيلة لقضاء وقت ممتع..فأنا اسمى و أرفع من ذلك.. إما الزواج اللي أحلم به أو العزوبيه بدون ندم..خصوصا إني لم أجعل الزواج هو هدف حياتي الوحيد..ولدي أمور كثيرة تشغلني و تجعل لحياتي طعم... أرجووكي فكري مليوون مرة قبل الزواج بمتزوج...و لا تدعي 26 عاما سبب في تنازلك عن شروطك و مواصفات شريكك و أحلامك بسهولة..و لا تجعلها تكون في أن تمضي بقية عمرك تمشية حال و بس.. |
اقتباس:
الله يسعدعمرك حبيبتي فرح ويجعل كل أيامك فرح وسرور كلامك حلو ودعاءك أحلى الله يجزاك خيرويجعل الجنه مقرك ومستقرك يارب تسلمي ياعمري |
اقتباس:
ــــــــــــــــــــــــــــ a_gleam فارس احلامي تزوج وعنده اولاد وانا مات قلبي خلاص وما عدت احب الحب مات عندي ابغى الستر بس ... |
اقتباس:
يعني خلاص تدمري نفسك و حياتك علشان ما صار نصيب مع واحد أتمنتيه؟؟ اللي خلقه قادر يخلق غيره.. و ممكن تبدأي حياتك من جديد..مع شخص فعلا يستحقك... فكري و لا تدعي الضغوط تجبرك على الإستسلام.. |
اقتباس:
أعصابك ياقمر a_gleam على الحلوه سماح هي بتستشيرنا وتبغى رأينا مونهاجمها أسمعيني ياسماح موعيب تتزوجي متزوج ...مالك ومال كلام الناس ..كلام الناس مايوكل عيش حبيبتي خليكي مع ربنا وأدعيه كتيروأستخيري ياقلبي وربنا يسعدك ويوفقك وماتدري فين نصيبك تحيتي لك |
لا هو اتزوج من 9 سنوات بس هو الشخص اللي اتمناه وانتهى حلمي عنده وما ابغى افتح قلبي لاحد ثاني .. لانه ما عندي استعداد اتحمل معناة جديدة يكفي هم خلاص
هالرجل مناسب بس انا متردده علشان شعور زوجته وبس لكن هو مناسب جدا .. كنت استشيركم وماشاء الله عليكم - روعة - اثلجتم صدري وفهمت ايش مفروض اعمل ما اظلم زوجته الاولى ..ابدا .. هل يحق لي المطالبة بسكن لوحدي شكرا .. |
روعه ان شاء الله اشوفك بالجنة قولي آمين
بالفردوس الأعلى وتكوني على رأس الحور مغفورة الذنوب يارب (( روعه على اسمك - فرحتيني قلتي حلوه هههههههه ))) انا استخرت طول الليل اليوم ولسى اسبوع كمان مرتاحه كثير والله ياروعه بس شويه خايفه من زوجته بس .. الله يجيب اللي في هالخير |
نعم من حقك حبيبتي تطلبي سكن لوحدك
وأنا ماقلت إنك تظلمي زوجته أو شئ حطي في بالك ..زي ماهي زوجته ولها حقوق إنتي كمان زوجته ولكي حقوق ومطلوب منه العدل بينكم ومايفرق بينكم في شئ اللهم المحبه القلبيه دي بيد ربنا عزوجل اتمنى لك السروروالسعاده طول العمر يارب مع من تحبين |
اقتباس:
اللهم آمين الله يسعدك ياسماح على رقة كلامك وجميل دعاءك إنتي بالفعل حلوه بدينك ..وأخلاقك وطيبة قلبك وأستخيري ياعمري وتوكلي على الله وكمان أبغى أقولك شئ حبيبتي موشرط الرجال يتزوج على زوجته لعيب فيها لاوالله بل دا حق من حقوقه ولله الحكمه البالغه في تشريع التعدد الله يوفقك وأسمع عنك خبرحلو إنك تزوجتي وإنك في بيت حبيب عمرك تجيبي لنا سموحه صغيره يارب |
تسلمين لي ياروعه
اقتباس:
كل ذوق يا روعه وان شاء الله ربي يوفقني ويوفقك ويكتب لك الخير مشكورة حيل على وقفتك ويارب يارب ما يحرمني منك اكيد الزوجة الاولى مافيها عيب خاصة اا كانت مثلك ... صدقيني انتي قدوة لي ... بالتوفيق |
اقتباس:
|
يا اختي fulla7 الله يجزاك خير ومشكورة على حرصك ووقتك
انا ما اتقدم لي رجل من سني اللي بقبيلتي ما يبغوني يقولون كبرت البنت واللي برا القبيلة ما يصلحون يعني واحد مطلق عنده 4 اطفال ما اقدرهم انا وصعب ادخل حياتي الجديدة على اطفال ومشاكل ومسؤولية ما اتقدم لي الأفضل حتى الآن انتظر يعني وارفض بس لانه متزوج //////////////// طيب يا اختي لو انا في رجل يحاول يتقرب مني لا لاجل شيء غير الحرام وانا ابتعد عنه واحافظ على نفسي قد ما اقدر اخاف من الحرام يا اختي والله قريب وسهل ومايمنعني غير خوفي من الله لكن النار تحرق الحطب ممكن في بنات بسني لكن ما عندهم فتن مثلي ما عندي اخلي النار تحرقني او ؟؟؟ |
أعقليها وتوكلي على ربك وعليك بالأستخارة
أختي الكريمة أعقليها وتوكلي على ربك واستخيري الله تعالى وعمرك كبيرة 26 تنتظرين مين؟ والعمر كالزهرة بالنسبة للفتاة إذا لم يقطف مبكرا ذبل ، وبما أنك تخافين على نفسك فنصيحتي لك بالزواج من هذا الرجل ففيه مواصفات مغرية (طبيب ذو وجاهة ، راتبه عالي جدا ، عمره صغير 40بالنسبة للرجل مناسبة ) ولا تخافين من زوجته أيام وترضى بالأمر الواقع وعاملي زوجته كأختك ، وأبنائها كأبنائك وأدعي الله أن يلين قلبها ويسخرها لك ويكفيك شرها 0 نصيحتي لك بعد الأستخارة إن رأيت أنشراحا فتزوجيه وربي يسهل عليك 0:14: :14: :14:
|
شكرا ياروعه على الدعوة الحلوة الله يعطيك أضعافها ..
نصيحة نسيت اذكرها لك حاولي يوميا تقرئين سورة البقرة وتخلي الإستغفار دائما على لسانك .. واصبري صدقيني بهذه الطريقة الله راح يحنن قلبك زوجك عليك ويشيل الغشاوة اللي على عينه واستمررررررري بطيبتك وإحسانك له .. الله يسعدك سماح إذا ربنا سهل أمر زواجك إن شاء الله من هذا الخاطب املي عليه هذه الشروط .. طبعا الأمر في الأول والآخر راجع لك 1- بيت مستقل بعيد عن البيت الأول 2- العدل في المبيت ومصاريفك ومصاريف البيت وفي السفر والفسح ما تتفضل أبدااااااااا أي واحده على الثانية 3- ما يجيب سيرتها عندك ولا سيرتك عندها 4- ما يرد على إتصالات أي زوجة في يوم الزوجة الثانية أو إذا سمح لنفسه يرد على إتصالات واحده لازم يعامل الثانية بالمثل صدقيني ترى الإتصالات تسبب غيرة ومشاكل إذا افتكرت شئ راح ارجع للموضوع |
اقتباس:
الله يجزاك خير على نصيحتك فادتني كثير اقتباس:
مشكور على نصيحتك والله يجزاك خير ويجعل نصيحتك في موازين حسناتك اقتباس:
فرح الله يفرح ويبشرك بالجنة ويسر كل امر لك ويشرح صدرك ويقوي عزيمتك ويستر بالدنيا والآخرة مشكورة على نصيحتك انا طبعتها هههههه حتى ما انساها .. الله يجزاك خير .. |
السلام عليكم
أختي سماااح أنت عمرك 26 وخطيبيك عمره 40 فلنجلعها معادلة في الرياضيات يعني كم هو فارق السن بينكما ؟ الجواب 14 سنة . الآن عندما يخطب أي شاب لماذا يطلب بنت عمرها صغير جداً ؟ الذين أعترضوا عليك من الأعضاء ورفضوا فكرة هذا الزواج أسألهم بالله لو كانت هي أو أختها أو بنتها لا تتجاوز اعمارهم 18 سنة وأتا شاب ليخطب عمره 30 سنة فيه المواصفات التي تحلم بها كل بنت من دين وخلق. كم الفارق بين سن هذا الشاب وسن هولاء الفتيات ؟ الجواب 12 سنة فلو تقدم هذا الشاب لأحدى هؤلاء الفتيات هل ستوافق أم لا ؟ أجزم أنها ستوافق ولن تقول أن هذا الشاب أكبر مني بكثير . فنصيحتي لكي أخيتي أنه مادام أن هذا الرجل ذا خلق ودين ويعمل في وظيفة مرموقة وأخلاقه عالية فأنصحك بالزواج منه ولا تترددي أبداً وأجعلي هذا هو آخر رد تسمعيه لأن كثرة المشاورات قد تجعلك في حيرة وتشتت وتفكير طويل . وكل بنت تتمنى الزواج خاصة في هذا الوقت والله أعرف بنات في سنك لا يمانعن أن تكون هي الرابعة لأن في وقتنا الحاظر قل تفكير الشباب في الزواج والسبب قلة الوظائف وارتفاع العقارات والمعيشة أصبحت صعبة . وتذكري ما قلتيه (خلاص يكفي صبر ضاع عمري وانا جالسه استنى ..) وأنصحك بأن تجعلي خوف الله بين عينيك وأبتعدي عن الفتنة ولا تحرضي على الشر بين الرجل وزوجته الاولى وأكسبي ودهم . وياحبذا لو يكون لك سكن خاص . أسأل الله بأسمائه الحسناء وصفاته العلاء أن يكتب لك مافيه خير وصلاح وإن كان هذا الزواج فيه خير لك أن يكتبه عاجلاً غير آجل إن كان هذا الزوج شر لك في دينك ودنياك أن يصرفه عنك وأن يبارك لك الخير حيث كان |
الله يوفقك ياسماح يانورعيني إنتي وكل وحده بتطلب السترمن الله حبيبتي أتمنى إنك تأخذي زوجة زوجك أخت لك بجد أنا كنت أبغى دا الشئ ..لكن الله يسامحها من أول ماأتزوجها وهي تقوله إذا مرتك زعلت ماعندي مانع إنك تسيبها وأنا أجي مكانها وأربي لك الأولاد وكم من فتن وكذوبات تعملها بيني وبينه ..غيرإنها تدخل نفسها في كل صغيره وكبيره حتى الجماع بيني وبينه دائماً تسأله إنت لمن تروح لروعه تنام معها ولالأ ..وتفضل وراه علين تعرف نام معايا ولالأ حتى أنا تسألني عن مواضيعي الشخصيه اللى بيني وبينه تصدقي ياسماح من كترماتدخل نفسها حتى عرفت إيش من فوط صحيه أنا أستخدم وقت الدوره لهادي الدرجه وصل بها الأمر!!!!!! فنصيحه مني لك ياقمر راعي الله في كل شئ وأصبري حتى لو زعلت زوجته ..أكسبي قلب زوجك ولاتغيره على زوجته وأولاده واللى ماترضيه لنفسك ماترضيه لغيرك وصدقيني ياعمري إذا إنتي راعيتي الله ربنا راح يسعدك ويوفقك وينورطريقك أصعب شئ أنا أعاني منه إن زوجته التانيه بتحاول إنه يطلقني على تأخذ كل شئ وأنا صابره لجل عيون صغاري ماابغى أشتتهم وأخرب بيتي أو بيتها هي تعيش حياتها وأنا أعيش حياتي والمشكله أنا أحزن عليها لأنها مطلقه وعندها من أول ولدين فماأتمنى إنها تتطلق تحيتي لك ياعسل |
| الساعة الآن 03:02 PM. |
Powered by vBulletin® Version 3.8.7
Copyright ©2000 - 2026, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©