|
والدي يريد زوجي أن يعتذر وزوجي رافض ،،استخرت وابي استشيركم
السلام عليكم
عندي مشكلة واستخرت وابي استشيركم ( فماخاب من استخار ولا ندم من استشار) صارت مشكلة بيني وبين زوجي وبصراحه هو انسان مو مقصر بشي بس مشكلته عصبي بشكل غير طبيعي ولما صارت المشكلة بينا مع انها تافهه عصب وانا غلطت لأني استفززته وكان بمكاني اسكت وتتنتهي المشكلة وغلط علي وزعلت ورحت بيت اهلي وهذي اول مرة في حياتي ادخل ابوي بمشاكلي الزوجية وتوقعت من الوالد الحكمة في الموضوع وقلت ممكن يحل الموضوع بهدوء ويناديه وينصحني واياه ويفهم منا الاثنين اللي صار بالضبط بس للأسف الوالد عصب وقال لا ترجعين له هو مالقاك في الشارع عشان يهينك و الخ ... وكلم ابوه وقال اذا يبيها يجي ياخذها ويعرف قدره واذا ما يبي الباب يفوت جمل ومنعني ارد على اي اتصال يجين منه وقال اذا اتصل عليك قفلي في وجهه وحذرني اني اتصل عليه الين يجي يعتذر وبصراحه ابوي كبر المسألة فووووق حجمها وكان بإِمكانه يحل الموضوع بطريقه غير هذي ، والحين الوالد يشجعني اتطلق اذا ماجا واعتذر عن كلامه اللي قاله في حقي وانا اعترضت على طريقته في معالجة الموضوع وكلمته بس للأسف هاوشني وقال انتي ما عندك شخصية وتبين تعيشين منذله قلت له الحين بينا عيال وهالطريقة غلط قال اذا رحتي له ما اشوف وجهك مرة ثانيه عندي .... وانا محتاره الحين اكلم زوجي واحل المشكلة هذي بينا ونتصافا وخلاص؟ والا اسمع كلام ابوي وانتظره يعتذر واذا مااعتذر يصير القطيعه والفراق؟ وانا استبعد زوجي يحي يعتذر لأنه يحس هذي اهانه له وشتم الوالد وكلامه فيه وفي نفس الوقت اخاف ارخص في عيون زوجي اذا جيت انا اعتذر واصلح الموضوع بنفسي ويتمادى في الايام الجايه اذا حس اني ضعيفة ومحتاجه له.... ارجوكم عطوني من تجاربكم وارائكم انتظركم بفارغ الصبر ... تم تعديل العنوان ليتناسب مع المضمون |
والله موضوعك مرة معقد ومن جد يحتاج لتفكير وتدبير
ومن راي انك كنت صائبة بالاستخارة لانه ربنا هوا اللي راح يحل الموضوع ثانيا :كوني مقتنعة بماتريدنه يعني لو تبغي ترجعي لزوجك ارجعيله واقنعي الوالد انك تبغي فقط تحسسي زوجك بغلطه مو كنتي تبغي تقطعي وتطلقي واكيد الوالد راح يفهمك لو كلمتيه بهدوء وحنكة.. لكن لو انتي مازلتي زعلانة وتبغي حقك انتظري لغاية مايجيكي الحق ويجي زوجك ويعتذر .. انا ماقدر احكم في الموضوع لانك ماوضحتي سبب الشجار والنقاش . فانتي ادرى هل الموضوع يستحق هذا كله ولا لاء . وصدقني ربنا راح يحل مشكلتك ويساعدك طالما استخرتيه |
اشكرك لوليموا الموضوع والله ما يستاهل وفيه ازواج عندهم مشاكل اكبر من هذي والمسألة هي ان زوجي لما يعصب يشتمني وهذا اللي ابوي زعلان منه ، فيه ازواج يضربون زوجاتهم وتصير مشاكل اكبر من مسلة الشتم والكلام وزوجي انسان طيب واحبه ويحبني بس مشكلته اذا عصب ينسى نفسه ويشتمني وقال لي مره ان هذا مو من قلبه ، وانا ابي ارجع له بس بطريقه تحفظ كرامتي وكرامته ومحتاارة كيف رح تصير هذي وتنحل بطريقه ما يكون فيها طرف ضعيف وطرف موقفه اقوى من الثاني...
احيان كثيرة تراودني فكرة اني اتصل عليه وخلاص انهي الخلاف بس اتردد لأني دخلت ابوي ورح يزعل مني اذا انا اتصلت وبادرت ،،، وفي نفس الوقت اذا جلست انتظر زوجي مارح يجي لأنه زعلان مني اني دخلت ابوي في الموضوع وبعد ابوي ما قصر في كلامه اللي قاله لأبو زوجي والموضوع الحين اذا انتظرت زوجي اخاف يعاند ولا يجي وتكبر المشكلة اكثر ويصير طلاق وفراق وفي نفس الوقت اخاف انا اللي ابادر ويصير موقفي موقف الانسانه الضعيفة وممكن يكرر زوجي الغلط نفسه معي مستقبلا لأنه يعرف اني ما اقدر استغني عنه والله محتااره حسبي الله ونعم الوكيل |
ما عندي حل حبيبتي بس عندي نصيحة من تجربة مريت بها هيك زي مشكلتك
الي بدي اقوله هو لمن نكون بمشكلة ويطلع الاهل عليها بنروق احنا ونتصافى ونتعاتب وهات يا هدايا وشوق وابصر شو وننسى في لحظة صفا بس الاهل ما ينسو ويظلهن شايلين ع الزوج وكارهينه ولو ماقلت ودافعت عنه ما بيغير شئ لانه حضرتك بس تكون زعلانة من زوجك بتحكي كل الدفاتر القديمة بتمنى تكون فهمتي علي والله يسير امورك ويزيح هالازمة ويسعدك ام وليد |
انا من رايي اختي تكلمي الوالد وتفهميه
واذا ماطاع تكلمي ابو زوجك وتفهمينه وضعك وان شاء الله يتقبل منك ويحل المشكله بطريقته الله يهون عليك |
اشكرك عالنصيحه ام وليد واللي صار صار نا اقدر ارجع اللي فات ياليت مادخلت اهلي بالموضوع بس لما يفوت الفوت ماينفع الصوت
اختي همسة وفا كل الشكر لك مشكلة ابو زوجي ماله اي كلمة على ابنه ومارح يفيدني بشي :( وهذي والله مشكلة اما ابوي حاولت اكلمه بعد صلاة الفجر عصب علي وقال تبين اعزك رح اخليه يرجع يعتذر واذا مارجع واعتذر خلاص اتركيه ولا تذلين نفسك قدامه في رأيكم اتصالي فيه غلط؟ انتظره والا انا اللي اتصل (احساس قوي في داخلي يبيني اتصل واحل كل شي معه) وفي نفس الوقت مترددة اخاف اخرب كل شي واحط الوالد في موقف بايخ ويزعل مني |
ينقل الى قسم الثقافة والتوجيهات الزوجية مكانه المناسب
تحياتي ،،، |
اشكرك ابو فيصل لكن موضوعي كان في القسم المناسب وكان هناك تفاعل سريع وانا محتاجة للاستشاره بشكل عاجل لأن التأخير ليس في مصلحتي،،،،،، واريد اراء حكيمه كي اضع حد لهذا الهم الذي ارقني ....
سامحك الله |
الصراحة يا اختي انتي اللي كبرتي السالفة مب أبوك يعني زعلك ورجعتك لبيت أبوك شي طبيعي يخلي أي أب يدور كرامة بنته....اللي عليك اتسوينه اتكلمين ابوك واتفهمينه وتشرحيله السالفة بس مبسطة مجرد هاذي عادة عند زوجك وتريدين مساعدة أبوك في هداية الزوج وقوليله انت راعي خبرات وحكم وأكيد تعرف تجيب زوجي بالحكمة..... واتكلمين زوجك هو الآخر بوجه نظرك في عصبيته وزعلك وسبب تركك للبيت واشوي دلع وشوق ولاتقولين انه ابوك يدري بالسالفة اعزمي عالغدا أو العشا في بيتكم مع أبوك واتكون عزومة مصالحة وان شاء الله يارب يهدي سره قولي آمين....
|
:22:
اقتباس:
|
يا اخواني قلت لكم اللي صار صار وانا فعلا ندمانه اني قلت للوالد عن المشكله بس هذا شي صار ومااقدر ارجع الزمن فياليت ماابي عتاب منكم اصلا انا نفسيتي تعبانه ومابي عتاب ارجوكم ابي حلول
بالنسبه للوالد انا كلمته بس ما تقبل مني ابدا ............ هو مصر على ان زوجي يجي يعتذر |
طرح حلول جيدة جداً بل ممتازة , ولكن من وجهة نظر اخوك
انك تتصلين بالزوج , وتفهمينة الموضوع (انك ما ترضين الاهانات, وانك كلمتي ابوك وهو كبر المسألة) اطلبي منه يأتي ليأخذك , في حال أن الزوج شاف نفسه ورفض يجيك, اتصلي بأم الزوج وفهميها المسألة لعلها تضغط عليه, كل هذا يحصل وابوك رعاه الله لا يدري ما الخبر إن لم تنجح هذه الخطط إرجعي لأبوك , ولفي عليه الموضوع , قولي السالفة انت فاهمها غلط . إذا قال لا هو يهينك ويذلك , قولي أنا اللي غلطت عليه وأهنته بس ما كان ودي اقول لك بعد كذا سيحس الأب انه هو وابنته على خطأ , عندها لن يتصل بالزوج لكي يأخذ البنت (لكن ربما يفعل) بل الذي سيفعله حتماً أنه سيخفف من شروطه على زوجك (بدل ما يجي ويعتذر, يجي ويأخذك) ولا تنسي تدخلين الوالده في الموضوع , وإذا رأيتهم زعلانين على زوجك , اجعلي الغلط عندهم منك أنت حتى لا تخسري زوجك , ولا يعني يا اختي الغالية رجوعك إلى زوجك مذله وإهانة شيلي هالتفكير من رأسك , المرأة مالها إلا زوجها , ومافيه أحد بالعالم محتاجها أكثر من زوجها وأحلى ساعات الفرح والسرور التي تمر على زوجها هي حينما تأتية الحبيبة معتذرة قال (صلى الله عليه وسلم): (ونساؤكم من أهل الجنة الودود، الولود، العؤود على زوجها التي اذا غضبت جاءت حتى تضع يدها في يد زوجها وتقول: لا أذوق غمضا حتى ترضى). وفقك الله لما يحب ويرضى |
و الله اخت خلود انا من رئي تتصلين بزوجك وتعتدرين منه بالتلفون وتخبريه انك لم تنوي حدوت كل هدا ولكن قدر الله ماشاء فعل و انا الان اعتدر واطلب منك ان تاتي للبيت تاخدني لدا كنت لازلت تحبني لاني انا اشتقت لك وكلمات هيك من عندك اتراضيه وقولي له يخليها سر بينك وبينو علشان الوالد ما يزعل ويارب يجمع بينكوبين زوجك يارب
|
حاولي مرة ومرتين ومليون جيبيله اشوي من محاسن وايجابيات زوجك يعني مايصير اتقولين صار اللي صار .....اللي صار لازم يتصلح صح ولا لأ......حاولي مع أبوك أحسن لأن كل أب يريد مصلحة بنته بس ما يرضالها الطلاق وقوليله هذا ريلي وانا اعرفه بس هاي مشكلته وانا ابغي المساعدة منكم في انه يتخلص من هالعادة لأني ما أحبها.... قوليلهم إنه مب مقصر معاج في شي وانج ما راح تلقين احسن منه وقوليلهم بكل صراحة انج ما تبين الطلاق شو هي لعبة قوي قلبج وخليكي تعرفين شو تبين بالضبط عشان ماتكونين مهزوزة أو مشوشة ويارب ينصلح الحال والله اني ادعيلك من قلبي....لا اتكلمين زوجك قبل ما تتفاهمين مع زوجك .....وإذا أبو زوجك يقدر يعمل حاجه شوفي شو وجهه نظره.....
|
اسمعي حبيبتي انت كلمي زوجك وقوليله ان ابوك قسى عليك كثير وانه قاعد طول وقته يعصب عليك ويحط كل اللوم علي ويقول هذا عقاب لك وقوليله انا ودي اجيك وبدون شور ابوي لانك زوجي والمسؤول عني بس ابوي ماراح يرضى وانا بين نارين كرامتك وعذابي انا مايهون علي اخليك تنحط بموقف يمس شعره من كرامتك زوجك بيتاثر ويخاف عليك وبيجي لابوك او العبي على الحبلين قولي لابوك زوجي ارسل رساله يطلب السموحه منك وانه خايف يجي وتفشله وقولي لزوجك كلام على لسان اوك وهكذا تهدا الامور بينهم طبعا الكذب هنا جائز الله ييسر امرك استغفر بنية اصلاح حالكم ورجوعك لزوجك وبكثره وان شاء الله ترين خير الله يسمعني عنك كل خير حبيبتي وكافي تانيب بحق نفسك الله يسعدك ويريح قلبك |
شوفي يالغلا خلود
أنا ممكن تكون خبرتي ضعيفة بس والله تخيلت نفسي مكانك وإن شاء الله أقدر أساعدك في نظري إن الحل تكلمي زوجك بالخفاء ومن دون مايعرف أبوك وتتأسفين منه إنك دخلتي الطرف الثالث وتبينن له ندمك وتصلحي الأمور بينك وبينه وفي نفس الوقت تحلفيه إنه مايوصل لأبوك إنك كلمتيه إذا هو يبي المشكلة تنحل وصدقيني إذا تصافت قلوبكم هو بيشتاق لك ويحن عليك خاصة إذا بينتي له إنك مشتاقتله لكن بيعرف إنك مغلوبة على أمرك فأطلبي منه بإلحاح يجي يعتذر من أبوك وأوعديه إنه إذا جاء تكون المرة الأولى والأخيرة اللي تطلعين فيها مشاكلك برى وبإذن المولى ربه يهديه ويحنن قلبه عليك وتنحل مشكلتك أتمنى أكون ساعدتك |
المشكله اذا دخلو فيها الاهل تكبر..
الله يعينك والله .. ظلي صلي استخارة .. بس تبين نصيحتي كلمي ابوك حاولي تقنعينه .. زوجك يتصل بك ؟ ولا لا؟ |
الحل في نظري ما ذكره الله في محكم التنزيل
{وَإِنْ خِفْتُمْ شِقَاقَ بَيْنِهِمَا فَابْعَثُواْ حَكَماً مِّنْ أَهْلِهِ وَحَكَماً مِّنْ أَهْلِهَا إِن يُرِيدَا إِصْلاَحاً يُوَفِّقِ اللّهُ بَيْنَهُمَا إِنَّ اللّهَ كَانَ عَلِيماً خَبِيراً }النساء35 وإن علمتم -يا أولياء الزوجين- شقاقًا بينهما يؤدي إلى الفراق, فأرسلوا إليهما حكمًا عدلا من أهل الزوج, وحكمًا عدلا من أهل الزوجة; لينظرا ويحكما بما فيه المصلحة لهما, وبسبب رغبة الحكمين في الإصلاح, واستعمالهما الأسلوب الطيب يوفق الله بين الزوجين. إن الله تعالى عليم, لا يخفى عليه شيء من أمر عباده, خبير بما تنطوي عليه نفوسهم. - (وإن خفتم) علمتم (شقاق) خلاف (بينهما) بين الزوجين ، والإضافة للاتساع أي شقاقا بينهما (فابعثوا) إليهما برضاهما (حكما) رجلا عدلا (من أهله) أقاربه (وحكما من أهلها) ويوكل الزوج حكمه في طلاق وقبول عوض عليه وتوكل هي حكمها في الاختلاع فيجتهدان ويأمران الظالم بالرجوع أو يفرِّقان إن رأياه ، قال تعالى: (إن يريدا) أي الحكمان (إصلاحا يوفق الله بينهما) بين الزوجين أي يقدرهما على ما هو الطاعة من إصلاح أو فراق (إن الله كان عليما) بكل شيء (خبيرا) بالبواطن كالظواهر |
غلطااااااااااااااااااااااااااااااااانه
>>انج ادخلتي طرف ثالث بينج وبين زوجج الله يهديج يارب اتصلي ع زوجج وتصافوووو وارجعي بيتج وصدقيني الوالد بيرضى عليج يعني زوريه ومستحيل يطردج من بيته |
اخواني واخواتي جزاكم الله بكل حرف كتبتوه خير ويرزقكم الجنان يارب
اختي ام وداد انا للحين ما كلمته ولا كلمني |
, ايت انت عن قوله تعالى : '' لا تخرجوهن من
بيوتهن ولا يخرجن إلا أن يأتين بفاحشة مبينة '' , ماذا ستجيب ربك غدا , اذا سألك بأي حق تخرجين من بيتك وقد منع الله ذلك حتى في حالة الطلاق الرجعي , فما بالك بمشكلة .. أختي يجب ان تتحملي كل صعيرة وكبيرة في هذه المشكلة , فأنت من اججتي نارها وأنت من تتحمليها وستسألين عنها يوم القيامة .. وأما أبيك فأذكره بحديث جابر بن عبد الله قال: قال رسول الله صلى الله عليه وسلم: "إن إبليس يضع عرشه على الماء، ثم يبعث سراياه، فأدناهم منه منزلة أعظمهم فتنة، يجيء أحدهم فيقول: فعلت كذا وكذا، فيقول: ما صنعت شيئاً، قال: ثم يجيء أحدهم فيقول: ما تركته حتى فرقت بينه وبين امرأته، قال: فيدنيه منه، ويقول: نِعْمَ أنتَ". أخرجه مسلم في صحيحه (رقم: 2813/67).. |
أختي العزيزه أرجو من الله أن يعينك على حل مشكلتك وأوافق الأخ زياد النجدي بشكل كبير في طرحه..
تفائلو بالخير تجدوه |
قولي لأبوك إن مستعدة أطلقة ولكن زوجني ( جيب ليي زوج)
روحي أتصالحي مع زوجك وبالنسبة لكلام أبوك بأنه لن يسمح لكي بأن تطبي البيت مره ثانية هذا مجرد كلام |
لازم يكون بينكم اتصال انتي وزجك ولازم فيكم واحد يتنازل والا حياتكم ما راح تمشي
|
بعد السلام
انا العاده ما أكتب في المنتدى بس هذي المره موضوعك شدني اول شي اقولج انج قلطانه لما طلعتي من بيت زوجك و الغلط الثاني انك لما دخلتي الاهل في الموضوع ومثل ماشفتي هذي النتيجه اختي اذا تطلقتي صعب تلقين الي يتزوجك ويحبك نفس زوجك الحالي نصيحتي لك انكي ترجعي لزوجك من ورى ابوك من غير مايعرف وتعتذري لزوج وتبينين له غلطتك وغلطت ابوك في الرد على الموضوع ولما تتصالحو وتصفى النفوس راضي ابوك لانه قلب الاب كبير بس الزوج يمكن ينساك ويدور غيرك حتى اذا فرظنا انه زوجك نزل نفسه وجه البيت عندكم واعتذر اذا رجعتو مع بعض لا تتوقعين تشوفين الزوج الي اني عارفته لانكي نزلتي من مستواه اذا كنت انا في موقف زوجك والله مارجع وبدل الوحده اربع بس عشان يكون عندك خلفيه عن طريقت تفكير الرجال ارجو اني اكون افدتج اختي خلود ومره ثانيه اقول ارجي له الحين واعتذري له وبعدين فكري في ابوك |
| الساعة الآن 04:22 PM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©