|
دلوع أمه ضرب بنتي هل أخبر زوجي ؟
مقهورة ميتة من القهر وقلبي محترق على بنيتي حبيبة قلبي ..
قبل شوي أنا كنت بغرفتي وأهل زوجي بالصالة .. سمعت بنتي تصرخ وتصيح وعمها يصارخ عليها .. ودخلت وهي تبكي وماسكة أيدها اليسرى وصايرة حمرا .. الله ياخذ العدو .. وأخو زوجي يقول لأهله .. لازم أضربها عشان تتأدب وماتمد يدها مرة ثانية .. وأم زوجي طبعا ولدها وحبيب قلبها ودلوعها ماتقول له شي .. مجرد إنها لامتها باسلوب لين جدا .. كلمتين وأسكتت .. أما زوجي إذا ضرب بنتي ضربة خفيفة .. اللي هو أبوها ومعاه حق يضربها عشان يربيها ويادبها .. لو شافته أمه بتصرخ عليه وبتهاوشه وتقول له مب زين والبنت بتتعقد ووووو .. مقهورة ياناس .. وودي أقول لزوجي إن بنتي ضربها عمها .. والله لو إني مو متربية جان طلعت له وقلت له كسر في يدك اللي انمدت على بنيتي .. لكن أنا طالعة من بيت محترم .. وهلي ماعلموني على قلة الأحترام .. حتى لو اللي حولي مايستاهلونه .. لكني أحترم نفسي وأحترم أبوي وأحترم تربيته لي .. |
لاتكبري الموضوع
عمها ومن حقه ان يؤدبها فلا تعترضي على ذلك ابتعدي عن المشاكل |
اقتباس:
معليش يأدبها .. لكن مو يترك في يدها أثر من الضربة .. لو تشوفينه طول وعرض .. أتخيل بنتي النتفة واقفة قدامه وهو يرفع يده الثقيلة عليها ياحبة عيني .. وبعدين أم زوجي .. ليش تعصب لما زوجي يضرب بنته .. وماعصبت لما ولدها هذا ضربها ؟؟ هذا اللي مزيد القهر بقلبي .. |
طيب ماسألتي بنتك ليش عمها ضربها ؟
|
سألتها ..
وقالت إنها ضربته .. وأنا دايما أحذرها من إنها تضرب الناس .. وهي ماتضرب إلا إذا حد أستفزها .. وأنا أعرف عمها دايما يستفزها بصورة غير طبيعية .. أنا مش ضد الضرب للتأديب .. ولكن أعيد وأكرر .. مو بالقوة هذي .. لازم يراعي إنه رجال ويده ثقيلة .. وبنتي صغيرة وضعيفة .. دايما عماتها يضربونها وعمري ماتضايقت .. لكن هالمرة غير .. ضربة تركت أثر .. |
اااااااااخ ذكرتيني بعم عيالي
بزر صغير ويضرب على كيف كيفه ويهاوش عيالي وزوجي المصون مايقدر يدافع عن عياله وام زوجي تناظر وهي ساكته وفرحانه ببطولات ولدها ولو احد من عيالي حاول يدافع عن نفسه قومت الدنيا عليهم وولولت وانا مالي بمشاكل الاطفال سلاحي بعيوني اخز الولد بعينه وانا ساكته حتى يخاف وينحاش |
اقتباس:
عم عيالك صغير .. لكن عم عيالي كبري .. والله عندي صديقتي .. شخصيتها قوية .. ولو اي حد عمل لبنتها شي ماعجبها .. لو إن شاء الله أم زوجها .. ماتسكت عنهم.. وألحين الكل يحسب لها ألف حساب .. مو أنا .. كأني والحيط واحد .. |
لو انا بمكانك
كنت بقول لزوجي انه ضربها وضربه قويه وعلمت فيها واوريه اياها واشرح له اني مااحب المشاكل وعشان كذا سكت وشوفي وش بتكون ردة فعله بس لازم تتكلمين بوقتها مو عقب يوم او يومين الله يخلي لك بنتك |
ماألومك يابحرينية قلب الأم غييييييير
بقولك رأيي ، زوجك لو قلتِ له أتوقع بتكبر المشكلة بينه وبين أخوه لذلك قوّي قلبك شوي وكلمي عم بنتك بكلمتين بالصميم وبهدوء علشان مايحس إنك ناوية صراخ وهواش قوليله مهما كان البنت صغيرة وإنت الكبير وماراح تحس بإحساسي إلا لما يجيك عيال ويحترق قلبك على ولدك . واتركيه وياليت بعد ماتكون أمه موجودة إن كان عنده دم بيحس بغلطته وبيقدّرك لأنك ماكبرتِ الموضوع . والله يخلي لك الدانــة ويحفظها يارب . |
جان انتي اخذتي بحقج و رحتي عليه و ادبتيه عشان مرة ثانية لا يمد ايده على طفلة
صدكيني فاهمة قهرج كله ولا العيال |
والله اني زي ام خالد اخز وبس
ما ربوني اهلي على الهوشات وطولت اللسان |
لا حول ولا قوة الا بالله يا اختي في الله في ناس ما تستحي
كان من اللازم انه يطلب منك انك تادبينها لو عملت شي غلط عشان انتي امها |
لا تكبرين الموضوع ... الله ياخد حق بنتج ....
|
اختى حصل معى نفس الموضوع عم ابنتى ضربها لانها رفضت اعطاء بنته كتب المدرسة وضربها امام صديقتها وكان عمر ابنتى 11 سنة يعنى عمر حساس للبنات واحراج امام صديقتها ولسبب تستحق عليه المكافأة وليس الضرب وعندما علمت بالموضوع اعطيته محاضرة فى الاخلاق وحقيقى طلعت القديم والجديد واستنكرت وشجبت وعملت مجنونة وزوجى كان مسافر وهو واسرته كانو فى زيارة لنا وما اكثرها واثقلها ولقيتها فرصة مسحت بيه الارض وخليته يعتذر ويفتش على طريقة يمسح بيها السواه ومن يومها اصبح يمشى على العجين ومايلخبطه وبقيت بنظرة منى اتحصل على ما ارغب فيه واى افتراء او تعدى على اولادى توقف بس بعد قلبى اتقطع على اولادى والظلم الطاح عليهم من عمهم واولاده واخذت بثأرى خاصة ان زوجى معروف بحبه الشديد لاولاده ولايتحمل فيهم الهوا وماحصل رفع يده على واحد منهم واستغليت الموقف وعندما عاد حكيت له ماحصل وماحصل منى قلت اقول انا احسن وكان رد زوجى انه باسنى فى راسى وقال لى عافى منك الحين اطمئن على اولادى مافى حد يظلمهم وانتى وراهم وكان موقف فيه نهاية ظلم وافتراء على اولادى ومرت الان عشر سنوات لم يحدث شىء من هذا القبيل
|
جزاكم الله خير لكل من مر على صفحتي ..
أنا قررت ما أقول لزوجي .. لأني بصراحة ما أعرف له .. بيوقف معاي .. وللا بيقلب السالفة ضدي .. فأسكت أحسن .. ولأن السالفة مر عليها وقت ماراح أكلم حماي .. لكن مرة ثانية .. ياويله إن مد يده مرة ثانية على بنتي .. مجهزة له محاضرة .. تسنع اللي مايتسنع .. وراح أذخرها لعياله .. <<<< حشى ناقة مو مرة .. خخخخ |
يابعد قلبي
آآةة حاس فيك<<بالهواء سو عايش مع اهل زوجي بالبيت بس شنو بيدينا غير الصبر والا مشاكل وبلاوي اكبر من كذا لكن طول ماحنا عيشيا بالبيت عندهم مالنا الا الصبر الله يفرج لك ويرزقك بيت مستقل ويعوضك عن الايام الماضيه |
يحليلك أنا بنتي دخلتها علي عمتها بشعرها في يوم عيد لأن بنتي كانت تبغى تروح عند الرجال تحسب أبوها عندهم وهو كان حاج
والله ماعلمت زوجي وسكت وبلعت العبرة الى الآن مايدري عن هذا الموقف اللي خلاني أسكت إحترام لعمتي لأنه تعملني زي بنتها |
اختي العزيزه .. انا بعتبرج اخت غاليه علي .. وراح انصحج .. اذا تبين تعيشين مرتاحه مع زوجج واهله .. طنشي هاذي المشاكل .. وانتي مسكي بنتج .. ولا تقوينها على عمها بالعكس قولي لها وقدام عمها اذا مديتي يدج على اي احد انا الي بضربج، حتى لو كان هالكلام مش من قلبك .. لاني آنه اعرف اكثر المشاكل الي تصير بين الكبار سببها اليهال .. فاتمنى انج ما تكونين نفس الناس الي من هالنوع
واذا تبين تعيشين الموقف بطريقه اخرى .. (تخيلي) ان اخوج عنده بنت، وبنته مدت يدها على عمها( الي اهوه اخوج الثاني) .. وقام عمها وطقها.. التصرف الي تحبين ان زوجة اخوج، تتصرفه مع اخوج الثاني .. انتي تصرفيه.. وحده من معارفنا منفصله وعايشه في بيت ابوها مع عيالها .. اخوانها الصغار يطقون ولدها طق.. وولدها الله يحفظه ما يطق وهادئ واهي تتهاوش معاهم وتزعل على الكبار تبي تدافع عن ولدها والكل يتدخل واحيانا تكبر المشاكل.. .. مثل ما تعرفين مافي احد يرضى على عياله حتى لو كانوا اهمه الغلطانين فما بالها اهي الي ولدها مثل ما نقول لا يهش ولا ينش.. إلى ان نصحها الجميع انها اهي تلاحظ ولدها عشان تبتعد عن المشاكل واذا صار شي تنسى ،، لان بيي يوم وولدها بيغلط عليهم وماراح يسامحونه .. وفي الاخير ذيله يهال فعشان جذي نصحتج انج لا تكبرين الموضوع ويقص عليج الشيطان وتروحين تتهاوشين معاه وانتي بنت ناس ومتربيه والحمدلله اكيد ان اهلج ما ربوج على الفوضى .. وعمها ان تقدرون انكم تتقربون منه وتخلونه يتغير .. اهي بنت اخوه واكيد وايد يحبها بس اهو لانه ريال وحس ان انهانت كرامته لانها مدت يدها عليه حتى لو كان ضرب ما يألم بس الاهانه إهانه.. بس اذا تكرر الموضوع انا رايي من راي الاخت ((( غالية))) وسامحيني واتمنى انج ما تفهميني غلط ... والله كل الي اتمناه لج ان تعيشي حياتج بكل هدوء.. |
يا عمري يا بحرينيه انا ما عندي عيال بس حاسه فيش
اكيد الموقف يقهر بس انتي عارفه زوجك يمكن يقلبها عليك و يقول لك عمها و لازم يأدبها بس تبين الصراحه مفروض تعلمين بنتش ان ما تمد يدها على اللي اكبر منها لأنها غلطانه ولا تحاولين تصيرين في صفها ضد عمها علشان لا تكرهه .. اتوقع انه كان يبي يضربها علشان يأدبها بس ما اتوقع ان تكون الضربه قويه و تطلع اثر على فكره كم عمر بنتك ..؟؟؟ انا من رايي تكلمين حماك بأدب و تقولين له ماعليه انت عمها ادبها اذا سوت شيء غلط بس مو بهالشكل و حسسيه انك قابلتي اساءته لبنتك بالحسنى و انك ما تبين مشاكل بس هذي قطعه منك مارح ترضين عليها عزيزتي آسفه لفضولي بس مو انتي قلتي انكم خلاص اخترتون شقه و حتى لو هي صغيره خلاص بتنقلون لها ..؟؟؟ والا انا مشتبهه علي الأسامي ...؟؟؟؟؟؟؟؟؟ |
والله خلاص أنا قررت اسكت هالمرة وأطوف السالفة ..
لكن إن تكررت معاي كلام ثاني .. أم المهدي .. بنتي عمرها 4 سنوات .. وسالفة الشقة صح .. أنا اللي ( كنت ) محصلة شقة وحجزتخا ودفعت عربونها .. لكن الله ماكتب .. وذكرت هالشي في موضوع سابق .. لظروف عديدة .. والله يعوض علي .. والحمد لله على كل حال .. |
هذه من عيوب السكن في بيت أهل الزوج
الطفل يصير عنده 10 يربونه و2 يحبونه ويكون هو ضحية الخلافات آنه لو بمكانك ما أقبل لأن محد له حق على عيالي غيري آنه وأبوهم الله يساعدك تحياتي |
عشرة يربونه ..
وأثنين يحبونه .. صدقتي .. عجبتني هذه المقولة .. والله المستعان .. |
حتى لو عمها خير يا طير يمد ايده !! محد له حق يمد ايده على اعيال الناس الا امه و ابوه و انا ضد مسالة الضرب من اساسه لانه الطفل بالكلام و الاقناع يفهم يا عالم الضرب كان على ايام الجاهليه الحين الناس تقدمت انا ضد هذا العمل ... لازم الاب يعرف قولي له انا ما ابي مشاكل و مابي تتهاوش مع اخوك بس لازم تعرف بالي قاعد يصير و هو ينرفزها ... خل زوجج يكون على علم و صدقيني اختي الي يسكت عن حقه مره حاله حال الشيطان الاخرس مع احترامي لج لكن بعدين الخال يتمادى و محد يقوله شيء ... انا انصح ان الزوج لازم يعرف بالي صار و لكن من دون مشاكل بس مجرد معرفه .... و البنت لحد يمد ايده عليها
اختج بني اختي سمعي كلامي الطناش يزيد الامور سوء لازم يعرفون شنو حدودهم و ما يمدون ايدهم على بنتج على شان ما تصير مضرب حق كل واحد |
اقصد العم عفوا مو الخال ... لازم زوجج يعرف و مره ثانيه اذا ياه عمها قعديها عندج على ان ما يقدر يطفرها هذا انسب حل قولي لها تعالي اب حضن ماما و الله يكون بالعون
اختج بني صراحه مو بنتي بس انقهرت |
حبيبتي أنا انقهرت مكانك من عم بنتك و الله ما له حق يضربها خاصة حرام عمرها 04 سنين
أنا من رأيي ما تخافي من ردة فعل زوجك فهي ستكون حسب سردك للموضوع عليكي التركيز على نقطة الشفقة على البنت مو على الاعتراض على انه عمها ضربها . و حاولي توصليله المعنى بطريقتك الخاصة و أكيد راح يأخذ موقف مع أخوه . خاصة لو أكدتي عليه انه ما يعاتبه . يعني كده و كده من وراء قلبك |
يالغاليه ذكرتيني بطفولتي..
كان عمي اصغر من ابوي بسنتين او ثلاث سنوات..مايرضى احد يلمس اولاده.. واذا تهاوشنا تعرفي اطفال يضربنا ضرب مو طبيعي واذا لمسنا اولاده يقوم الدنيا..ضلينا على هالحال سنتين واخر شي واحد من عمامي كلماه وقاله عيب انك تعمل كذا وقاله ماتلمس الاطفال امسك عيالك اول.. من رأي انك تخبري زوجك علشان يقوله مايضربها كذا حرام طفله انا مااتحمل ضرب الاطفال بصراحه.. الله يعينك.. |
ههههههه اختي بحرينيه فكرتك اكبر من كذا
فاتحه موضوع عشان عم بنتك ضربها ؟ طيب عادي وعمها في مقام والدها . الله يهداك . الشكاية ذي ما يبطلونها الحريم .. |
اختي بحرينيه
الحين بنتك الصغيره ضاربه رجال طول بعرض مؤكد بيطقها تخيلي انتي لو طفل صغير بيضربك شتسوين اقل شئ تطقينه والله انا ااشوف ماتقولين لاابوها لانه بيحط اللوم عليك الله يسعدك |
اخيتي
اعتبري انة إبنتك غلطت وهو ادبها ولو إنة طريقة تاذيبة غلط بالفعل لا يجب ان يترك جرح لها بس حاولي تعطية العذر هلمرة يمكن مو قصدة يعورها هكذا ولا تخبري زوجك هذا رأي لكن إن عاودت السالفة بنفس المستوى اخبرية فهو اخبر بيكفية التعامل مع اخاة |
والله انك طيبة انا مقدر اسكت والله اخد حقي عشان لايتمادى دام الوالد موجود مايمد يدينه عليها مهما حصل
|
أختي بحرينية ولكن
والله إني أنا متابعه مواضيعك من زمااااااان وأتذكر إذا ما كنت غلطانه إنك قلتي بطلعين ببيت بروحك وبعدها والله ما تابعت إيش صار على سكنك الجديد ؟؟؟؟؟؟؟؟؟ |
و عليكم السلام ورحمة الله و بركاته
صراحة اختي الله يعينك انت عاقلة و الحمد لله و عقلك يوزن بلد لكن نصيحة صغيرة حسب ما أسمع ان التربية يجب ان تكون من تخصص الأم و الأب فقط و ليس جميع الاسرة من عمات و أعمام لأن لكل شخص دور معين في حياة الطفل و لا يجوز لكل من اراد ان يؤدب الطفل ان يفعل فما الفرق بين الوالدين و بقية الاسرة ! حتى الاخوة الكبار عليهم ألا يتدخوا في تربية اخوانهم الأصغر منهم إلا في حالة عدم وجود الوالدين و إلا لن يكون هناك قيمة للوالدين و لن يميز الطفل الذي يجب ان يفعله حفظكم الرحمن |
يا قلبي عليكي يا بحرينيه كل هذا صار وانا اخر من يعلم:29:
الله ييسر امروك وان شاء الله بتسكني ببيت بروحك وبترتاحي من هالهم كله انا بصراحه لو صار معي هذا الموقف كان عملت حفله مع زوجي بالذات بنتك حبيبتي صغنونه الله يحفظها لكن لعله خير يمكن هذا جا درس لك علشان تحضري اكم كلمه له ان عملها مره ثانيه :22: وما تخبصي بالكلام يعني تكوني منتقيه الكلمات زين لكن مالك غير تقولي الحمد لله على كل حال بصراحه زعلت وايد عليكي لانك ما اخذتي الشقه لكن لعله خير يمكن ربي كاتب لك اكبر منها وافضل بعشرين مره لعله خير حبيبتي لكن هدي نفسك وان عملها ثاني مره قولي له الكلمات الي حضرتيها :22: علشان ثاني مره بس يفكر يمد يده عليها يحسب حساب لك انه في ام رح تصارخ الحين ومارح تسكت هداهم الله وايانا لطاعه رب العالمين في رعايه الله |
ليش ماخذتها بحساسيه
عمها واكيد انه يحبها ومعتبرها كانه بنته بس يمكن ما يعرف يتعامل مع الياهل وايده ثقيله واهو ما يدري والبنت باين انه عندها طبع تمد ايدها على الكبار والصغار وانتي تكلمينها وتزفينها وماكو فايده الضرب الخفيف والتوبيخ والمعاقبه حل لازم تسوينه وبالنهايه يبقى عمها حسبه ابوها ويحبها واهو مو قصده يعورها قصده يأدبها وخلي علاقتج مع اهل زوجج حلوه تره اهلج هم بعد وان غاب زوجج هم ونيسينج |
افا والله
عمها ويمون هونيها وتهون واحسني الظن يالغاليه |
جزاكم الله خير جميعا على المرور والرد ..
آرائكم متضاربة .. لكن أحس اللي قالوا عادي عمها يضربها .. أكيد ماعنده عيال أو ماعاش موقف إن حد يضرب عياله .. المهم السالفة عدت .. وأنا سكت عن الموضوع .. يعني كالعادة أسكت ويضيع حقي وتضيع شخصيتي .. |
لاتكبرين الموضوع يابحرينيه
انا صار لي موقف ف بيت زوجي شوفي واحكمي ولد اخو ريلي ضرب عمه اللي هو زوجي كف على وجهه والكف كان قوي والولد عمره 4 سنين ف ريلي قام ورد له الصفعه الا مرت اخوه تقول وتصارخ بصوت عالي ع زوجي تخيلي الموقف وانا كنت قاعده وخواته الاكبر منهاا بعد قاعدين وماحطت لنا اي احترام والكل خذ فخاطره عالموضوع يعني انتي لاتكبرين الموضوع يمكن هي غلطت وانتي ماتعرفين شو السالفه وهو ادبهااا تراه هو عمهاااا وله حق يادبهاا اذا غلطت واذا ماغلطت طنشي يختي الا هي ضربه وبتنسى البنوته وصدقيني اذا تدخلو الكبار ماينسون هالموضوع شرات اليهال اللي الحين انضرب وبعد شوي يرجع وهو يضحك عادي خلي الموضوع عادي |
حيالله الغالية
.. ضربه وفاتت بكره حتكبر بنتك وتعدي السالفه . . واضح إنك صايره حساسة ولابرد الموضوع من قلبك خذيها بسعه صدر يمكن غلط . . . لكن إنتي بالمقابل إحفظي بنتك معك وتجلس معك أعرف الموضوع صعب بس تعودي .. . كذا ترتاحي وخالتك بتفهم . . والله يحفظ لك بنتك وتربيتك شي راجع لعقليتك وحسن تصرفك .. وفقك الله |
اخوي عمره 17 سنه حصل كف و الله يعزكم تفل عليه ولد خالي(( احنا عايشين مع بعض)) قام الولد قال حق امه معنا هي
غريبه قالت لا تروح عندهم و قال حق خالي و يا خالي زف اخوي و مد يده و انا ما استحملت تدخلت قلت له هذا ريال تضربه جدام العيال و جدامي عشان ولدك و الغلطه غلطة ولدك يتفل و يطق و يشرد و صاارت سالفه كبيييييره و عيال خالي صايرين يكرهون من تدخلت امهم و ابوهم حتى لو قلنا لهم قومو من هني تعالو اهني سييييييده ماما فلانه قالت جذي و احنا ما قلنا شى غلط او يزعل ساعات اذا انقولهم برع حر لا طلعون يصيحون صياح جنا طقيناهم بالعصا تقول امهم انا اقولكم لا تروحون هناك هذلين يكرهونكم!!!! بالله احد يقول هالكلام حق ياهال انتي والله متربيه و بنات ناس و الدليل انج سكتي عنهم |
السلام عليكم
اختي من حق عمها يادبها لانها مدت يدها عليه و هذا الشي عيب ..المفروض حتى لويكسر راسها ما ترد عليه بكلمة .. هذا الي حنا تربينا عليه و بنربي عيالنا عليه ان شاء الله وانا ايضا معك في نقطة انها ضربة قوية .. كانها انتقام مو تاديب ,., تقدرين تكلمين اما زوجك او عمها مباشرة بانك لست معترضة على تاديبها لانه حسبة ابوها .. ولكن فهميه ان الضرب اول شيء هو اسوا حل للتاديب .. و اذا كانت وجهة نظرة غير فهميه ان ما يكون ضرب مبرح لان مو زين و الله ما يرضى ! المهم ان لا تكون مشكلة وكل الاطراف يتفاهمون بهدوء و ادب و من غير حساسيات .. اعاننا الله و اياك على التربية و اهل ازواجنا:) |
| الساعة الآن 02:59 AM. |
Powered by vBulletin® Version 3.8.7
Copyright ©2000 - 2026, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©