زوجي يبي يشوف بنتي.. وانا خايفة
 

السلام عليكم ورحمة الله وبركاته ...

الكثير يعرف مشكلتي...

احس ان نفسيتي اتحسنت ولله الحمد.. بس عندي مشكله صغنونه ... ماقدر اسميها مشكله بعد .. مخاوف..

اخر مرة زوجي بغى يودي بنتي لاهله .. كان يوم الجمعه ... واليوم قال لي بكره ابي اشوف بنتي بعد صلاة الظهر.. وانا ميته من الخوف.. اخاف يقول لي ابي اوديها بيت اهلي...

مادري يمكن ماتعرفون اهله .. بس سوولي مشاكل ولليوم يتكلمون عني.. وينشرون بالسعودية والكويت .. ان زوجي مايبيني وطلقني.. وزوجي مايدري شسالفه ..

وغير كذا .. ام زوجي الله يهديها ماهمها غير اتفرق بين كل اثنين .. ومستعدة اتسوي اي شي ... ولو شو ماكان عشان اتخرب على كل انسان سعادته ..

بيتنا مافيه احد .. امي مسافرة .. وزوجي مايدري.. بس طلب يشوف بنته بكره بعد الصلاة .. وياخوفي يقول لي بوديها بيت اهلي...

كيف اتصرف؟؟

بنتي صغيرة عمرها اربع شهور.. ماتفهم .. بتاكل اي شي .. يعطونها اياه .. اخاف والله ..

أدري اني غثيتكم بمشاكلي بس والله محد يعرف مشكلتي بتفاصيلها غيركم انتو ...

وادري بانكم بتنصحوني من قلبكم وتدعولي..

صرف ماعرف اتصرف بنفسي فقدت الثقه في نفسي... فأحتاجكم حيل.. أحتاجكم بكل خطوة أخطيها ...

يا أختي ترى بنتك هي بنتهم بعد ولا راح يضرونها بس اشترطي عليه يرده لك ولا تخافين عليها عند أهلها بعد

ممكن ياخذها ومايردها ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟ ؟؟؟؟؟؟؟؟؟؟؟

الحين خفت اكثثثثثر ... يسويها ياخذها ومايردها ؟؟

اخت ام وداد

طمنينا على موضوعك وش انتهى عليه × اعرف ان السؤال خارج الموضوع

وبالنسبة لرؤية البنت , ما اظن الرجل يستطيع ان يأخذها الى مكان لا توجد فيه امها لأنه أحن من امه عليها


فمن مصلحة بنته انها لا تفارق امها , فكوني مطمئنة

وطلبـه لرؤية بنــته إن شاء الله ان الـرجل جعلها وسيلة لمقابلتك والجلوس معك لعله يفتح معك بعض المواضيع والمشاكل التي بينكم

اطمئني على بنتك وعليك بالصلاة والدعاء , ولو اشترطتي عليه قبل ان يأتي انه ما يا خذ البنت فيكون احسن , لكن شرط (طلب) وليس شرط, (فرض اوامر)


موفقة

السلام عليكم ...

ارست له رساله توني... قلتلها بتشوفها في بيتنا اوكي.. قاللي خلاص اوكي.. استغربت الصراحة ...

ماقال لا .. اشمعنا ابي اخذها هذيله اهلها .. وانا ابوها معاها .. ومن هالكلام الي يسم البدن على طول قالي اوكي.. خلاص في بيتكم ..

وهو مايدري ان اهلي مسافرين .. حتى ماقال ماقدر احتك باهلك في الوقت الحالي بسبب المشاكل ولا قال شي.. استغربت ...

معقوله بيشوف بنته ... بهدوء في بيتنا .. من غير مشاكل ولا تدخلات؟ استغربت الصراحة من قلب

اختي والله ما ادري شقول لك

لكن خلي زوجك يشوفها بس ان شاء الله ما يوديها لآهلها وانتي قولي له ما اقدر على فراقها ابداااااااااااااااااا

وان شاء الله ان زوجك حن لك ولها فأخذ شوفة البنت عذر له

الله يجمع بينكم ياقلبي

الحمدلله يالغالية غلا .. قلتله في بيتنا قال ايه .. من غير مايسال منو فيه .. و لاشي..

زياد النجدي.. مشكور على اهتمامك .. مشكلتي نفس ماهي بس هذا الجديد يبي يشوف البنت ..

اختي وداد لا تنسي تتشيكي و تتضبطي زين وشيكي وداد كمان

الله يجمع بينكم على خير

طيب متى تروحي معه لبيتكم المستقل..احس المسألة طالت و اهم اطراف المووضوع اللي هو انتي وزوجك

ماشين تمام

الله يصلح اهاليكم

بشرييييييني عنك والله اني نفسي وواتمنى من كل قلبي تجتمعي انتي وزوجك ووداد تحت سقف واحد

ما اعتقد انه راح ياخذها لأنها صغيره وتحتاج عناااااايه

يابعد قلبي يا ام وداد

اسأل الله في هذه الليلة المباركة ان يفرج همج ويستر عليج ويخلي لج الصغيرونة
ويلقيكِ حجتك ويقضي لكِ بالامور خيرها عاقبةً


يافارج الهم وكاشف الغم يارحمان الدنيا ورحميها صلي على محمد وعلى آله وصحبه وسلم وفرج هم اختي ام وداد واكشف غمها يا واحد يا أحد ياصمد يامن لم يلد ولم يولد ولم يكن له كفوا احد ...

حبيبتي طلعي الليلة عن وداد الصدقات تراها ليلة مباركة
وبكرة اقري عليها المعوذتين وآية الكرسي وادعية التحصين قريت مرة لاخت لنا هنا في المنتدى الله يحزاها خير
حاطة ادعية لتحصين الاولاد ونفسها لانه كان عندها اخو مريض وتخاف يضرب ابنها


كلنا معاج وقلبنا معاج لين ان شاءا لله تردين لزوجج

اتفق مع اخوي زياد
كلامه عين العقل


حبوبة


البنية رحمة وهبها الله لكم

وماتدرين يمكن الله راحمكم بهاللامورة وبتوفيق من الله ثم بوجودها بينكم يصطلح حالكم انتي وزوجج


ويقولون للي عنده من الذرية بنات

ترى البينة رحمة

وااااايد الوالد يقولها

لاتحافين اعقدي التوكل ودامه في بيتكم
مثل ماقالت احد الاخوات تضبطي وتكشخي وكشخي وداد وخليها تطلع غزالة
ياقلبي عليها يا انها تنحب من طيبة امها

القلب داعي لج يالغاليه

بارك الله لك في وداد وابو وداد

اول ماقريت العنوان قلت هذي اكيد اختي ام وداد

طالما انه وافق انه يشوفها في بيت اهلك خلاص اجل انحلت الامور ان شاء الله

واذا قال ابوديها لاهلي تعذري باي عذر انها تستغرب,, تخاف من الناس ,,ومن كذا اعذار

الله يجمع شملكم ياااارب عاجلا غير اجل

لا تخافي أختنا أم وداد من زوجك أن يأخذ أبنته أم أربع أشهر ولعل في أهتمامه بأبنته دليل على تحسن وضعه النفسي والصحي بسبب الرقية التي أنت تقومين بها وخاصة سورة البقرة 0 وياحبذا أن تسقينه كأسا من ماء مقروء فيه من القرآن لكن لاتخبرينه بالموضوع ، أيضا إذا جاء عندكم يريد أبنته فتزيني وأطلعي أمامه كأنك عروسة في ليلة عرسها لأنه إذا شافك بهذا المنظر سوف يتغير جذريا وربما مايروح إلا وأنت معه وفقك الله وسدد خطاك ونحن وراك ندعوا لك من أعماقنا ونتحرى الجديد عن أخبارك وربي يكتب لك الخير والستر والصلاح حيثما كنت وإينما حللتي وفي آمان الله وحفظه0

السلام عليكم ورحمة الله وبركااته...

مثل ماتعرفون انا في البيت بروحي.. ومعاي اخوي بس..

بعد ماتفقنا انا وزوجي على ان اللقى بكره .. اتصلت في اخوي.. وعصب علي وقوم الدنيا وقعدها ...

قالي كيف تتفقين معاه من غير ماتقوليلي.. على كيفك .. بعد ماصارت هالمشاكل هذي كلها اتقوليله تعال البيت .. وعادي ولا كان صار شي.. الي يسمعك يقول هو جاي امس وقاعد معانا ويطالع تلفزيون .. !! !!

تتصلين فيه الحين واتقوليله .. مالك كلام معاي تتكلم مع اخوي.. وبعدين تعال..

قال انا الحين جاي...

اتصلت فيني صديقتي ورديت عليها .. انسولف عادي..

شوي الا اخوي وصل.. قالي ارسلتي المسج قلتله لا .. قالي يالله ارسليه قدامي.. تراني ادور مصلحتك ... ومن هالكلام وارسلته لانه واقف فوق راسي..

بعدين كلمته شوي شوي.. قاالي هي كلمة وحدة تبينه ولا لا..؟ لو تبينه بنحط شروط عشان ماينداس عليك .. واذا ماتبينه انروح للمحاكم ونطلق ونخلص من هالموضوع ..

قلتله ياخوي انا من تزوجت وانا احس عمري بدوامه .. زوجي احبه .. وهذا زواج مو لعب.. واتمنى هالمرة القرار اتخذه بروحي.. مو معناة هالكلام اني ماخذ برايك لا .. بس الي اقصده .. مابي اتخذ خطوة اندم عليها العمر كله .. ابي كل الامور تتوضح لي.. قالي خلاص خليه يكلمني باجر وانتي ارسلتي المسج .. وانا بكلمه بحزم وصراحة عشان يعرف ان الكلام لازم يصير بين رجال.. وبعدين نشوف شو هو ..

سالته انته شو اتشوف.. ؟؟ قالي انا اشوفه صغير ومايفهم وندمت لاني وافقت على زواجك منه احس اني جنيت عليك .. قلتله لا الزواج قسمة ونصيب.. وقالي انا ابيك تدرسين واتعيشين حياتك ...
قلتله واذا اتوفرت لي الدراسة وانا مع زوجي.. قال لي ايه هذا الي ابي اعرفه هل هو قد كلامه ولا بيعاند .. وبيسمع كلام من هني وهناك ..

قال لي انا خايف عليك .. انا اشوف كل الرجال شايلين يدهم .. حتى ابوك!! انا ابي ادخل حطيني في الصورة .. لا تتصرفين من وراي بعدين اسمع الكلام من الحريم ..


وتبون الصراحة اكتشفت ان الكلام كثير.. كلام الحريم كثيييييير.. وكل حرمة كلامها شكل..!!!!!!!!!

وبعدين قلتله .. واذا ماتصل؟؟؟ قالي اذا ماتصل بتثبت نظريتي عليه .. انه مــــــــو رجــــــــــــــال.. !!!!!!!

دمعات الروح يالغالية مشكورة على هالدعاء الي والله حسيت فيه نابع من قلبك ...

جينز .. مشكورة غناتي... اشكر وقفتكم معي.. لا خليت منكم .. ياربي..

الكيسائي.. ماراح انسى اهتمامك بالموضوع .. ونصايحك .. والله ماتقصر..

مشكورين كلكم

ارسلت له .. هالمسج ..

ورد علي انتي شو اتشوفين الحل حياتي؟؟

قلتله كلم اخوي.. احسن شي.. واتفاهمو عشان تنحل الامور

قال لي ليش؟؟ قلتله لاني تعبت وانا احاول واصلح الامور بروجي.. ويد وحدة ماتصفق..

ومارد للحين ..

بس من كلامه في المسجات حسيت كان المسج الاول ماوصل..


يالغالية .. انا صليت استخارة .. بخصوص جيته لبيتنا .. ومادري شاللي بيصير..

صرت اشك بكل القرارات ف أصلي استخارة على كل خطوة ...

اول مرة بحياتي اصير بهالصعف.. من تزوجت وانا مترددة بكل شي..

الله يكون بعوني... وييسر اموري.. ويفرج همي وهم الكل..

ياحبيتي..

الله ييسر أمرج ..ويشرح صدرج ..ويجمعك وياه وبنتكم من جديد ...

لا تحاتين ولا تشيلين هم

لا تختارين انتي الطلاق ..نصيحة ..

عشان ماتحسين بندم بعدين ..

اذا م فكر في الطلاق هو حر ..

بس انتي لا تبدينها ...

الله يفرج همج ..ياااااااااااارب

مشكورة يالغالية انا والله مافكر بطلب الطلاق.. بس اهلي الله يهديهم يسحبوني سحب .. للمحاكم

حيـاتي ؛؛


و الله دايم على البال
الله يريحك و إن شاء الله يصير كل شي على خير بإذن الله
ولا تنسين تطمنينا ... انتظر موضوعك الجاي و انتي براحة و طيب خاطر



يرجى منك كتابة اللفظ الصحيح للكلمة بدون تمطيط

اختي ام وداد اسمحي لي والله صار لي فترة مادش النت ..

بس طمنيني عليح اش صار مع زوجك ان شاء الله جا وشاف اخوك .. الله ييسر لك اللي فيه الخير ..

حبيبتي ام وداد انا من زمان اقرأ مواضيعك و ادعي لك كل ما شفت توقيعك بس من وراء الكواليس
في البداية كنت ضد امش و اخوش علشان انتي تبين ترجعين وهم معاندين
بس بالصراحه بعد كلام اخوش حسيت انه هو الصح
وهو عن جد يبي مصلحتش و يبيش ترجعين قويه و يعرف زوجش يقدرش مره ثانيه
اسمعي كلامه و خلي زوجش يتفاهم معاه و انتي طلعي من الموضوع
لكن قولي لأخوش ان مو من حقه او حقش تمنعين ابو وداد انه يشوف بنته لانه هذا حقه و حق بنته
ممكن يجي يشوف بنته و معاكم اخوش علشان يتفاهم معاه بالمره

الله يوفقك و يجمع بينك و بين زوجك و تعيشون حياة جديده و سعاده لا توصف يارب العالمين ما يجي رمضان الا و انتي متطمنه

السلام عليكم ورحمة الله وبركاته ...

زوجي ماتصل في اخوي.. والمسج الاولي ماوصل.. لانه اليوم قالي انا جاي.. فتحو لي الباب.. قلتله خلها مرة ثانية .. بس حاول اتكلم اخوي باقرب وقت ..

عصب .. وسوالي فلم .. بعدين ارسلتله مسجين عتب.. ورد علي بمسج فيه شعر.. وغزل.. وتاسف لي.. وان شاء الله ... ان شاء الله يارب يتصل...

انا ابي اخوي يقتنع ف ان شاء الله بعد بكره .. بنروح عند التوجيه الاسري انا واخوي.. ونتكلم مع الاستاذة وداد لوتاه .. عشان يطلع اخوي الي بخاطره وبعدين هي بتعطينا رايها.. لان اخوي اذا وقف في صفي.. ان شاء الله الامور بتنحل ..


والله ادري ان مصخت السالفه وطالت ... بس انا ابي ارجع وكل الاطراف لو مب سعيدة بس متقبله الامر .. مابي ازعل حد .. والله

الله كريم

اختي ام وداد

الله ييسر لك امورك ويجمع شملكم انتي وزوجك وبنتك


اللهم آمين

وش أخر اخباااااارك يا ام ودااااااد

قلقت عليك

هل رجعت لزوجك؟؟

طمنيني

الله يريح بالك وويجمعكم على خير

أخوك لما سألك تبين ترجعين لزوجك ليه ماقلتي أيه!!!
ليه شخصيتك سلبيه!!! هي كلمه وحده منك وتنحل الأمور بما أنه زوجك يبغاك وإلى الان شاريك...

الله يفرج همك حبيبتي و يحل مشاكلك و يختار لك اللي فيه الخير ااااميين

و زوجك ان شاء الله مو ماخذ البنت و لا شيء

هو يدري اني ابيه .. يا كل الغلا يدري..

بس الصراحة بالفترة الاخيرة صرت سلبيه كثير وضعيفه وجبانة للاسف اتغيرت كثير

ربنا يقدملك مافيه الخير ويصلح لك بالك:22:

اللهم اجمع بينهما بكل خير وحلال يارب ولاتفرق جمعهما امين يارب

بما ان عمرها اربع شهور قولي له كان ودي تروح معك بيت أهلك لكن في سببين يمنعوني:
1/ البنت معتمده في الرضاعه على الرضاعه الطبيعي وصعبه تروح لأهلك وأنا مو متواجده معها وحرااااام تجوع وهي متعوده ترضع مني ..
2/ البنت لسا بحفاظتها ومااحد يتحمل يغير للطفله لأن أمها موجوده وبعافيتها لو كنت الله لايقدر مريضه أكيد ساعتها أهلك مايقصرون .. وعيب تعملها وتضايقهم بريحتها وفي نفس الوقت حرااام تجلس بحفاظتها الى وقت ماتجيبها لي بعدين يصير عندها طفح الحفاظ وهي طفله ماتتحمل..
هذا حل ممكن ان شاء الله يساعدك واعتبره حل ذوق بحيث ماتجرحيه خليك صبوره وكلامك لطيف لأن ساعتها بيخجل وبيقتنع وماراح ياخذها واياني واياك تقولين أهلي مسافرين قولي طالعين مشوااار اذا تبي تزورنا وخايف من الحساسيه تعال بهالوقت وحددي له الوقت اللي يناسبك.. موفقه أختي والله يجمع بينكم على خير..

السلام عليكم ورحمة الله وبركاته...

عزيزتي ام وداد .. تحيه طيبة من اخت لك مرت بنفس ظروفك (نفس الظروف) ولا ابالغ !!!
ولكن الفرق الوحيد هو انني عندما تركت البيت كان معي طفله عمرها سنه ونصف.
صدقيني حبيبتي اني دموعي تنزل وانا اكتب لك الرد لاني اعرف شعورك وعشته ليلة بليلة مدة سنه ونص. وفجئة وبدون سابق انذار فرجها اللي عينة ما تنام!! "لا اله الا انت سبحانك اني كنت من الظالمين"
حبيبتي اصبري واحتسبي وستجدين اكثر مما كنت تتوقعين انه يسرك "من رب العباد وليس من العباد"
حبيبتي الخص لك حل مشكلتي بعدة نقاط:
1- الاتكال الكامل (الكامل) على الله سبحانه وتعالى "حسبي الله لا اله الا هو عليه توكلت وهو رب العرش العظيم"
2- الدعاء (وما ادراك ما الدعاء) انها سهام الليل اللتي لا تخطئ سبحاااااااااانه "اني قريب اجيب دعوة الدعي اذا دعان" سبحااااااااااااانه عدد خلقه وزنة عرشه ورضا نفسه ومداد كلماته، في الليل بين الاذان والاقامه عصر يوم الجمعة وفي كل وقت لا تتركي الدعاء ولا تملي ولا تيأسي
2- الاستخارة عند اي خطوة اقوم بها سواء كانت الخطوة باتجاه اهلي او زوجي
3- المحبة الصادقة للزوج و الاحتساب
4- مسك العصا من النص (استخدمي كامل ذكائك الذي وهبك الخالق في هذه النقطة واحتسبي، فمن ناحية زوجك وضحي له كامل تعلقك به لكن ما باليد حيله فالموضوع خرج من ايديك واهلك مصرين على رايهم، ومن ناحية اهلك حاولي انك ترققين قلوبهم عليه ولو ببعض الكذب واختلاق المواقف وخصوصا اذا كان لك اتصال مع احد قريباته (انا كان لي اتصال مع بعض قريباته) وتبينين لهم ان الموضوع خارج عن ارادته بعد هم ماراح يقتنعون بس هذي النقطه لها تأثير (الكذب للاصلاح بين الناس يجوز شرعاَ)
5- لا تقطين حبل الوصل كلميه باستمرار وارسلي مسجات واخرجي معاه بدون علم اهلك هذا حلالك زوجك وربي عالم بنيتك انك تحاولين الاصلاح (بعد الاستخارة طبعاً) او حاولي تستقبينه بالبيت بس بدون علم احد وزي ما قالولك بعض الاخوان تزيني له كأنك عروس انا كنت اطلع معاه بدون علم اهلي واحس بعدها انه يتعذب بس كان الله يهديه ويخليه لنا يكابر.

بعد ما وقني ربي لفعل كل هذي الامور مو يوم او اسبوع او شهر، لالالالالالالالالالالالا (سنه ونص) الحمد لله جاب ربي الخير كله مرة وحده (حملت) وكانت فرحته بالحمل اكبر من فرحتي لانه خلاص لقا منفذ لحل المشكله وينفذ شروط اهلي وبسررررررعة بدون ما يصغر نفسه قدامي (الرجال وكبريائهم) علشان ما احد يدري بحملي قبل ما ارجع البيت ولله الحمد والمنه رجعت وصدقيني كأني تزوجت من جديد الرجال مو هو اللي اعرفه تغير 180 درجة للاحسن طبعا وانا صرت مستقلة عنهم وعايشة حياتي مع زوجي حره وربي رزق زوجي وفتحله مشروع ناجح باذن الله والاهم من هذا كله مولودنا الجديد اللي فرحتنا به ما توصف هو واخته

اصبري ثم اصبري ثم اصبري "وبشر الصابرين" وصفي نيتك لله وتوكلي على الله

آسفة على الاطاله انا معاكم من زمان بس هذا اول رد اكتبه والله اني اكتب لك من كل قلبي وربي كريم

اختي حنييييييييييييييييفه .. اسعدني ردك .. ورجعلي الامل بعد مافقدته ..

والله الحين احس بالسعادة والراحة ..

والله ياختي اني تعبانة نفسيا الكل يشوف زوجي سيء بس انا والله ادري بنفسي ان فيه خير.. وهذا اهم شي انا اشوفه.. بس مايعرف كيف يتصرف..

الحين شو موقف اهلك من زوجك .. يحبونه ولا يكرهونه (لان اهلي يكرهون زوجي بشكل مو طبيعي)

ردي علي.. واتمنى اتكونين معاي اول باول ..

الله يفرج كربك يا أم وداد ويبدل حزنك سعادة وأمن واستقرار

ونصيحة حاولي الابتعاد عن تدخلات الأهل عن حياتك الزوجية ..

وتخذي قراراتك بنفسك .. واعطي زوجك فرصة لعله يعود لك كما تودين

وتفتحان صفحة جديدة ولو من أجل طفلتكما البريئة ..

وتقبلي تحياتي

مرحبا اختي ام وداد ..
هاه حبيبتي كيف النفسيه اليوم ؟؟ ان شاء الله تمام؟

والله اني انا اللي اسعدني اهتمامك بردي، والا انا ماعندي اي نية اني اكتب بالمنتدى مع اني اكن له الاحترام والحب الكبير، ولكني مشغولة على طول، ووين ووين لما ادخل واتصفح على السريع.
لكن حسيت اني لازم اكتب هذي اللحظة، ما ادري شي داخلي دفعني دفع لاني اكتب لك واطمنك.
الله يوفقني وياك لما يحبه ويرضاه.
احب اقولك اتركي كلام الناس كلهم واذا انتي نيتك صافيه فاتبعي احساسك "وعلى نياتكم ترزقون" ربك يسيرك للي خير لك (تأكيد من هذا الكلام وامشي وانتي مغمضة).
وارجع واقول لك اتكلي على الله سبحانه حق الاتكال.
اما موقف اهلي الحين يعني انا اشوف انه يتحسن مع الوقت وتبعاً لتعامله معي (الا الوالد) لان الرجال هذي المواقف تأثر فيهم كثير، وعلى كل حال كل شي يبغاله وقت، واهم شي ان الاحترام قائم بينهم وما انهز ولا لحظه من بداية الموضوع ولا تجرأو على بعض بالكلام ابداً لا في بداية الموضوع ولا نهايته والحمد لله.
وبالنسبه لاهلك موقفهم طبيعي جدا لكن ارجع واقولك اتكلي على الله هو اللي بيحلها من كل النواحي، ورحي بالك، ونامي انتي والبنوته قريرة العين ومطمئنه "ان الله معنا" سبحانه "وبشر الصابرين"
عزيزتي ام وداد ارجوا منك انك تطمنيني عن اخبارك اول باول لاني والله قلبي وبالي معاك.
الله يوفقك ويلم شملك بزوجك في القريب العاجل باذن الله

اختك ام رفيف

السلام عليكم ورحمة الله وبركاته ..

مشكورة اختي الدانه على مرورك ودعواتك ..

احتي حنيفه .. والله مادري شقولك .. والله اني سعيدة جدا.. لانك رديتي علي مرة ثانية ...

والله انتي ريحتيني كثير بكلامك .. تعب قلبي يالغلا من هالهم الي انا فيه ... ابي ارضي اهلي وارضي زوجي... ابي ارضي الكل قبل مارضي نفسي ابي ارتاح .. واريح الكل معاي..