|
مشكلتي تؤرقني
السلام عليكم ورحمة الله وبركاته
يا جماعه عندي مشكله و ودي تساعدوني فيها..جزاكم الله خير اولا انا فتاة خريجه وجامعية...تخرجت من سنه تقريبا عمري 22...المشكله من قعدت في البيت وحالتي نفسيه تزداد سوءاا وما خليت مكان ما قدمت فيه للوظيفه بس طبعا مب اي مكان...المكان اللي ما يكون فيه رجال اتجنب الأماكن المختلطة قدر الاستطاع...المهم ما ردوا علي لين الحين..وصديقاتي كل وحده تفرقت يعني اللي اشتغلت وماعندها وقت تتصل ولا تسأل......ولي تزوجت بعد لازم تنشغل بأمورها.......واللي سافرت . المشكله اللي رافعه ضغطي هي..صديقة امي تقول حق امي ليش بنتج يالسه في البيت 24 ساعه؟ ليش ما تطلع ليش ما تزور صديقاتها شوي..؟! قلت حق امي: وين اطلع وصديقاتي كل وحده في صوب...وبنات عمي ما يتصلون ابداا...ياما انا اتصلت واعرف ان هالشي زين بس ما اشوف ردة فعلهم تعبت ونا اتصل لين متى هم ما يتصلون فيني...وافكر الحين اقول شو بتقول عني الحين..ماعندها صديقات ومب اجتماعيه والله اني اجتماعيه واحب اللمه ..بس وين هالبنات ماعرف... يعني اذا طلعنا بقولون 24 ساعه برع....واذا البنت يلست في البيت..يستغربون ليش يالسه في البيت شو اسوي في عمري؟؟؟؟ باختصار انا وحده : بلا صديقات.............................بلا وظيفه....................بلا زواج ......وبلا حظ والله دايما ادعي ربي..والحمدلله الأمل موجود..........بس هالناس اللي يتعبوني نفسيا قولوا لي شو الحل.....طيبوا خاطري ......الله يطيب بخاطركم...........وجزاكم الله خيراا مقدماا |
اختي العزيزه
والله العظيم حالي شبيه لحالك بنات اهلي يكرهوني كره العمى بس لان لما كنت بالجامعه كنت متفوقه ولاني افضلهم اخلاقيا وكان الكل يمدحني بالرغم من انهم كلهم الآن متزوجات وانا الله يعلم بحزني صديقاتي آخر مره يتصلون فيها لأعلامي اما بولادتهم او زواجهم او للأستمتاع بالتشمت علي او التحدث عن علاقتهن الجنسيه مع ازواجهن دون اي مراعاه او خوف من الله اختي ما فيها شي لو جلستي بالبيت لأنه استر لكي اريح لكي احسن من القيل والقال بالبيت اقرئي قرآن خاصه بشهر شعبان ترفع فيه الأعمال وادعي الله بان يرزقك عمل صالحوزوج طيب وصالح بالبيت شوفي التلفزيون ،ساعدي امك بالطبيخ ، اقرئي مجلات ،ادخلي النت واحذركي من الآن بان تقبلي عمل مختلط لان ما يجي منه الا المشاكل وتذكري من ترك شيئا لله عوضه انتي ما شاء الله عليكي ابتعدتي عن الأختلاط ،تاكدي الله بيرزقك الأفضل ما عليك من كلام الناس هالناس شياطين بلاويهم ما تخلص |
اختي ما عليكي بكلام الناس 00 انتي ما سويتي شئ غلط 00 وعلى كلام الناس ما يخلون احد في حاله 0
خيتو حاولي تدخلين تحفيظ قران او دورات مكياج او لغه او محاسبه فبه كثير دورات وتخصصات حاولي تشغلين نفسك 00 والله يكون في عونك تقبلي مروري: حنين الود |
السلام عليك ورحمة الله وبركاته أيتها الاميرة
أسعد الله مساءك أختي عليك بفراغك قبل شغلك تعلمي دينك وأعبدي ربك الآن انت في نعمة والوسائل متوفرة والله سبحانه غاية كل حي اذا عرفت الله وصلتي لكل شيء , اذا حصل هذا سيكون لك أنس بلا أصحاب وصديقات وعز وغنى بلا مال0 أما الناس أحمق الذي يستطيع أن يسكتهم , لا يتركون أي واحد في حالة , لازم يتكلمون , عليك بالمسامحة وحب الخير للناس والله سبحانه وتعالى بيكيفك شرهم وهذا الوقت الناس التهوا في الدنيا والماديات وغفلوا عن الاخرة وضعك بدون أصدقاء أفضلك أما الوظيفة رزق وهو عند الله وأبتعادك عن الاماكن التي فيها الرجال يدل على صلاحك وهذا لعل يأتيك ابتلاء من الله أنك تجدين الاماكن هذه ايسر من الاماكن الاخرى فأصبري فإن طريق الجنة محفوف بالمكاره وفقك الله ويسر لك أمرك. |
الله كريم
لاتقنطي من رحمه الله الله ييسر لك زوج يعشقك ويغليك وينسيك كل همومك تحياتي ابو فهد |
كان الله في عونك ولا تياسي
وان الله يطلع واعلم بحالك واصبري ................. وخلي ايمانك بالله كبير وزيدي من الدعاء والاستغفار |
night2005..
حنين الود.. الرماني.. ابو فهد.. samar84 الصراحه اشكركم على سرعة الرد...والمشاركات الطيبه.. وفعلا كلامكم صح.........بس علما اني دخلت كمن معهد خذت شهادة الانجلش والكمبيوتر..وان شاء الله ناويه احفظ القرآن.... بس انا كارهه نفسي هالآيام...احس وجودي مالها معنى في الحياه .........استغفرالله |
هذا الشعور لأنك حياتك بدون أجندة فارغة فيقذف الشيطان هذا الشعور
تأكدي أنه بيزول سريعا وليس هذه الحياة تفاءلي ولا تيأسي من رحمة الله |
اختي الكريمه الله يكون في عونك
انا بصراحة يعجبني البنت التى تكون جالسه في بيتهم وخلي الناس تقول الى بتقوله البيت استر من العمل والطلعات وغيرها انتي حاولي تساعدين امك في الطبيخ والغسيل وغيره وحاولي تزورين اقاربك "صلة الرحم" والعمل لاحقه عليه وان شاء الله بتتوفقين وكل تاخيره فيها خيره انا ولد صحيح بس اول ماتخرج المعهد جلسة في البيت ومع الشباب بس احس ان الدنيا ضاقت بي ابي شي يشغلني التقاديم كل مكان قدمت فيه وكل واحد يقول بتصل بعدها انفجرة وبحثت عن وضيفه عاديه اشتغلة في بقاله وصبرة فتره والحمد الله انا الحين اشتغل في مدرسه اهليه وان شاء الله مع الوقت احصل وظيفه افضل من هذي اختي الكريمه ازبده في كلامي وطول ثرثرتي "الصبر مفتاح الفرج" "وكل تاخيره فيها خيره" وعلى كلام الناس كلام الناس الحين مايخلي احد في حاله سواء جلس في البيت او في العمل وانتي اصبر اصبر اصبر وتحملي وتحملي ولا تياسي وكلام الناس اذخليه من اذن وخرجيه من الاذن الثانيه |
رضا الناس غايه لا تدرك
|
هههه اثير الأحلام...ردك عجبني..وفعلا نسمع من هني ونطلع من هناك...بس المشكله يوم يقولون لي
شي لازم اتأثر بأقاويلهم.. مياس الحلوه: كلامج صح والله.......الله يعينا على هالدنيا |
امي الحين بدت تقولي ليش ما تطلعين وليش ما تتصلين في صديقاتج وتطلعون برع؟ !!! يعني سبحان الله امي ماعرف كيف الله يهديها...تبيني اطلع واتمشى مع البنات 24 ساعه بس طبعا بحدود...بس انا فيني شي خلاص احس مالي خلق حق حد..مب مثل اول انا احب اطلع مع امي وابوي..مثل اليهال...... واذا طلعت ويا البنات احاتي متى نرجع البيت |
اقتباس:
مو كل من طلع مع امه وابوه صار ياهل وهذا الشي الصح للبنات والشي الاستر لهم وانتي لا تشيلين هم حق الناس وحتى امك اذا قالت لك اطلعين مع البنات قولين لها ما احب اطلع مع البنات خليني جالسه في البيت استر لي وانتي حتى لو طلعتي مع البنات الناس بتتكلم عليك ما بخلوك في حالك و اول كلمه بتسمعيها بعد ثاني يوم على طول "هذي 24 ساعه بره ماتساعد امها في شي " |
اثير الأحلام..
انت صدقت في كلامك......... بس امي من هالناحيه مثل ما تقول : ان ليش بنتي ما عندها صديقات مع ان والله عندي لدرجه اني ما اقدر اعدهم..بس خلاص هاي الدنيا كل واحد ينشغل بحياته ونا ما اجبرهم ان يشوفوني ويطلعون وياي...اعتقد يعني يعرفون رقمي ورقم بيتنا ..ممكن اي وقت يقدرون يتصلون بس الشرهه مب على الأهل الشرهه على اللي يقعد في البيت هههه عموما مشكور على المشاركه الحلووه : )) |
أختي الغاليه
قرأت موضوعك وعلمت ان اكثر ما تشعرين به من الفراغ غاليتي اشغلي نفسك لا تجعلي لك وقت فراغ اقرأي اطلعي ثقفي نفسك , ادخلي دورات انجليزي , كمبيوتر , خذي دبلومات في نفس التخصصات , اشغلي نفسك ببيتكم يوم امسكي غرفتك نظفيها بعمق يوم امسكي المجلس شوفي ايش ناقص اكسسورات وكمليها على ذوقك وهكذا كل يوم غرفه صدقيني رح تحسين بالانجاز ولا رح يضيق صدرك, اقرأي كتب في جميع المجالات ضعي لنفسك جدول من الصباح للمساء حتى لا تشعري بالفراغ من الكتب الجميله التي قرأتها :(روض المربع شرح زاد المستقنع )في الفقه كل امور دينك والتي تحتاجين السؤال عنها موجوده في هذا الكتاب.. رواية السجينه لمليكه اوفقير روايه تستحق القراءه كتب شوربة الدجاج مترجمه راااااااااااااااااااااااااائعه بمعنى الكلمه وهناك الكثير من الكتب التي تستحق القراءة ولكن هذا الذي يحضرني الان الزبده اشغلي وقتك ولا تقعدين فاضيه ابد واخيرا وهو الاهم عليك بالدعاء في كل الاوقات وتحري وقت الاستجابه كل وقت ادعي اذا امطرت وقت السجود اخر ساعه من يوم الجمعه ادعي بصدق ويقين ان ربي رح يحقق لك مبتغاك والله معاك يالغاليه اتمنى اني اضفت لك شي جديد |
الله يستر عليك ان شاء بولد الحلال يجيكي ويشيلك على كفوف الراحه
ياحلو ياطعمه ياسكره ====> ادلعك ههههههههههههههه تستاهلين والله حبيبتي سيبي كلام الناس وطنشيهم واعطيهم الاذن الصقعه اللي ماتسمعين فيها لانوا كلامهم كلوا تفلسف وخبال ووجع رااااس ماله نهايه انا رايي طالما انو مافي وظيفه وانتي لسه مو مرتبطه قدمي على الماجستير ====>كيديهم اللي يتفلسفوون والشهاده بالنهايه لشادخل دورات لغه او حاسب او اي شيء منها تستفيدي ومنها تجميع شهادات تنفعك برضوا ويكفي انو احنا صاحباتك لانوا حالي من حالك من يووم تزوجت وتزوجوا صديقاتي علاقتنا خفت بالبدايه كنا نلوووم بعض بس بعدين تفهمنا بعض وعادي لو كلمنا بعض من السنه للسنه =====> قووووويه ههههههههههههه انا كذا اخذت دوره عن وظيفه الاستقبال وبعدها اخذت دوره مكياج 3 شهووور والحين افكر ادرس لغه English الين اخذ التوفل بس جالسه ادور على معهد كويس والميزانيه مرتبكه مدري مين مخوفها ههههههههههه وبرضوا ناويه اخذ ICDL الشهاده الدوليه لقياده الحاسب وعلى هذا الحال ماشيه انا فلاتحبطي عمرك وتضيقي نفسك على ناس يستنوا يشوفوا وجهك متضايق عشان ينبسطوا عليك عيشي حياتك عادي وقولي الحمدالله على النعمه.... قرقرت كثير عليكي بس مدري انبسطت انا ههههههههههههههههههههههههههههه |
حبيبتي لا تهتمين لكلام الناس طنشي وعيشي حياتك اللي يتابع كلام الناس يتعب وما ياخذ من وراه شي حاولي تشغلين اوقات فراغك بهواياتك اللي تحبينها حاولي تدخلين دورات اذا كنتي تحبين الحاسب ويا كثرها دورات البرمجة والصيانة وادعي الله في كل صلاة ان يرزقك الزوج الصالح اللي يسعدك بإذن الله واحنا معاكي ندعي لك ان الله يوفقك ويرزقك بالزوج الصالح انتي وباقي الاخوات ان شاء الله لا تيئسين وخلك متفائلة |
روز الشرقية
ام جوري زوجه حالمه..... تسلموووووون خواتي على ردودكم الطيبه...وكل وحده ردها احلى عن الثانيه...لالا اصلا كل وحده ردها اسبشل المهم انتو تتحسبوني مب ماخذه دورات ولا شي..والله اني ماخذه دورات العالم وساعات احضر بعض المحاضرات او دورات تقام عندنا...بس خلاص يعني انتهت مدة الدورات وفلست لين ما قلت بس هههه ..واشتغلت مؤقت وانتهى وقت الشغل يعني سويت شي الحمدلله ...مب اني ما سويت ^_^ ...بس بالنسبه للماجستير..والله ان هذا حلم حياتي بس الحين طال عمركم كليتنا شارطين شروط ترفع الضغط....لازم اللي تبي تكمل تكون موظفه..والدراسه في فتره مسائيه...انا عادي عندي مسائي...بس لين الحين ما توظفت للأسف...وبعدين باقي الجامعات اللي عندنا كلها خلط...واهلي يخافون علي من الخلط ويطلعون قصص ..اصلا انا ما احب اولاد وياي ههه يالله ما اقول الا الله كريم ان شاء الله ...ومشكوووووووووووورين مره ثانيه على الرد والطله البهيه |
أختي طنشي الناس ولا تهتمين لانك ما عملتي الاذ الصح
يعني لو على طول تطلعين وزيارات كثير كان قالوا عنك دوّاره وما تقعد في البيت البنت أحلى ما تكون عندما تجلس في البيت بس عزيزتي اذا قدرتي أن تقاومي الوحده بقراءه القرآن وأعمال الخير ومواصله الارحام أفضل من لاشيء ‘أعانك الله ورزقك زوج يملي عليك وحدتك بحقك ياكريم توفقها |
.......
لا تقولين مليت .. مالي دور بالحياة .. لا تقنطي من رحمة الله اذا نظمتي وقتك لقيتي انك مره مشغولة.. مثلا خصصي لك ساعة تقرين فيها قرآن .. وساعة تدخلين فيها النت وتتصفحين المنتدى .. وساعة ترتبين غرفتك .. وساعة تجلسين مع امك وابوك .. وساعة تقرين كتب ثقافية أو دينية .. او قصص مفيدة .. وهكذا .. لين ربي يسهل لك وظيفة تقطع وقتك .. او زوج يونس حياتك :) |
جزاكم الله كل الخير على نصايحكم الذهبيه...جعلها الله من موازين حسناتكم ان شاء الله
|
بس حتى لو خصصت للقرآن الكريم والنت والجلوس مع الأهل...يعني هالأمور كلها تتطلب الجلوس في البيت
الناس الحين تسأل ليش انتي يالسه في البيت .. القضيه الحين يلست البيت :d |
أختي من أهم عندك أنك ترضين هالناس المشفوحة والا ربك ؟؟؟؟ أكيد بتقولين ربي ؟؟؟
أجل ربك سبحانه وتعالى يأمرك أمر شرعي ويقول { وَقَرْنَ فِي بُيُوتِكُنَّ وَلا تَبَرَّجْنَ تَبَرُّجَ الْجَاهِلِيَّةِ الْأُولَى وَأَقِمْنَ الصَّلاةَ وَآتِينَ الزَّكَاةَ وَأَطِعْنَ اللَّهَ وَرَسُولَهُ إِنَّمَا يُرِيدُ اللَّهُ لِيُذْهِبَ عَنْكُمُ الرِّجْسَ أَهْلَ الْبَيْتِ وَيُطَهِّرَكُمْ تَطْهِيراً } [الأحزاب:33] قال ابن كثير رحمه الله في تفسير قوله تعالى: وقرن في بيوتكن أي: "الزمن بيوتكن فلا تخرجن لغير حاجة" والشارع الحكيم أمر المرأة بالقرار في بيتها لأن ذلك أفضل لها فهي إذا خرجت من بيتها استشرفها الشيطان كما قال النبي صلى الله عليه وسلم: "المرأة عورة فإذا خرجت استشرفها الشيطان"(7) ومعنى استشرفها أي: زينها في أعين الرجال. ويمكنك أختي الكريمة أن تستفيدي من وجودك في البيت من خلال حفظك للقرآن الكريم ومراجعته فمنها تحصلين على الأجر العظيم ،،، ومنها أيضا أن الله يحفظك ويحفظ بيتك بالقرآن ،،،، ويمكنك أن تبحثين عن مكان خير فيه يجتمعن الأخوات في قراءة القرآن ومدارسته مثل حلقات التحفيظ وغيرها ... |
| الساعة الآن 12:16 AM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©