|
خطيبة زوجي الاولى
السلام عليكم حابه اخذ رايكم بهالموقف الغريب اللي حصل لي قبل ايام بالبدايه اعرفكم اني انا متزوجه من سنه تقريبا ... زوجي كان خاطب وحده قبل ما يخطبني وماحصل بينهم نصيب هو اللي تركها وفك الخطبه ... بعدها بفتره خطبني انا المهم اني انا الآن حامل ببنت وعلى وشك ولاده وقررنا انا وزوجي نسميها على اسم جدته الموقف الغريب اللي حصل اني قبل كم يوم وراني زوجي رساله جايه على جواله مكتوب فيها ( مبروك سمعت ان زوجتك حامل وبتسمي بنتك على جدتك ... مع انه المفروض هالبنت تكون مني انا ) طلعنا الرقم بأسم مين وتأكدنا ان اللي مرسله الرساله هي نفسها البنت الى كان خاطبها قبلي وش رايكم ؟؟ في وقاحه وجرأه اكثر من كذا ؟؟ بالله عليكم لو اختكم او بنتكم تتصرف هالتصرف وتسيئ لنفسها ولاهلها بهالشكل وش راح تسوون ؟؟ او لو انتم مكان زوجي وش بتكون ردة فعلكم ؟؟ وانا وموقفي من هالرساله .. اسكت واعدي الموضوع ولا لازم احط حد لهالسالفه ؟؟ على فكره قبل قصه الرساله بفتره وزوجي دايم يتصلون عليه ارقام غريبه وبنات يسوون نفسهم غلطانين او يستهبلون انا قلت ان بعض الظن اثم مو اكيد انها هي وقلت لزوجي لو جاك منها اتصال او رساله ثانيه لازم تتصل على ابوها وتقوله عن هالشي وش رايكم ؟؟ يتصل على ابوها فعلا او يكبر عقله عن الموضوع ويطنش؟؟ اتمنى القا عندكم الحلول .. وانا ماطرحت هالموضوع الا عشان استفيد من اراءكم ومشكورين مقدما |
والله قوية خطيبته هذي ..
لا وترسل له بنات يتصلون عليه ..؟؟ خليه يغير رقمه ويرتاح .. وإذا حصلت رقمه واستمرت على رسايلها فالأفضل إنه يخبر أبوها .. بس مايستعجل .. أول شي يغير رقمه .. الله يبعدها عنكم ويبعدكم عنها يارب .. |
بصراحة
بنت ماتستحي وش تبي فيه وهو تاركها يغير رقمه الاول وان تكرر الامر يبلغ والدها بالموضوع أو واحد من اخوانها يشوفون حل معها وانتي طنشيها ولا تعكرين مزاجك وان بديتم اهتمام في الموضوع صدقوني هي بتتمادى ويمكن تكبر السالفة ويصير لك ولزوجك مشكلة الله يعينكم |
شوفي أختي
أولا الله يتمملك حملك على خير ويرزقك بالذريه الصالحه ان شاء الله ثانيا خلى زوجك يغير رقمه ومايكون اللرقم الثاني باسمه لأنو احتما تجيبه من الاتصالات وماتقدر تجيبه اصلا هذي عقلها نااااقص المفروض تنساه |
فعلا قلة حياء من هذه البنت وزوجك يشكر الله ان الزيجه ما تمت ويغير رقم الجوال واذا عرفتو وعاودت الاتصال طوالي يخبر اهلها بالموضوع......وربنا يتملك الحمل علي خير ويرزقك ذريه صالحه
|
عزيزتى طبعا احب اهنيكى واقولك الف مبروك والله يرزقك خير خلف انشاء الله اما بالنسبة للموضوع اللى مضايقك احب افكرك ان البنت دى جوزك هو اللى تركها وعادة الرجل لما هو اللى بيسيب بيبئى عارف كويس اوى ان الست دى مش ممكن تناسبه وعشان كدة ترك وده يخليكى متضايقيش من حاجة ولا مجال للقلق وبعدين احب اقولك حاجة تانية ممكن اوى ان متكنش هى احتمال كبير جدا جدا ممكن يكون حد قريب منكوا حابب يعمل مشاكل ويتعبك فى ايام زى دى ويوتر جو البيت والحركات دى بتحصل من ناس للاسف بيكونوا قريبين منا بس نفوسهم وحشة وحاقدين علينا واحنا مش عارفين فده شئ وارد حدا جدا جدا ولو كانت هى سيبيكى منها دى تبئى واحدة تافهة و ينقصها الاحترام و النضوج بس انا برجح ان متكنش هى وانصحك بالتفكير المطول والحرص
|
وانا مابزيد على كلام الاخوه
خليه يغير رقمه .... واذا مايقدر يغيره....خليه يتصل حق ابوهاااا يكلمه بكل هدوء ويقول له بنتك تزعجني واتمنى انك تنصحهااا لان انا لي بيت وزوجه وزوجتي متضايقه من هالشئ..... وخلاص .... وعسى الله يهديهااااا |
خلي زوجك يغير رقمه هذا الحل الوحيد
|
يعنى اعذوريها الوحدة والعزوبية الله يهديها
اولا ادعى الله ان يرزقها الزوج الصالح الذى يشغلها عنكم ثانيا لا داعى لجرحها واعتقد انه يكفى ان ترسلى انت رساله لها اذا كررت ارسال رسائل الى زوجك وتخبريها بعدم ارسال رسائل الى زوجك لان هذا عيب وحرام والا سيكون لك ردة فعل أخرى وطبعا هى هتعرف ان زوجك اطلعك على رسالتها واعتقد انها لن ترسل اى رسائل اخرى الى زوجك |
وعليكم السلام ورحمة الله وبركاته
بداية اسأله تعالى أن يسهل لك ولادتك وأن يرزقك الذرية الصالحة .. اختي الحبيبة .. زوجك لم يهتم لأمر هذه الفتاة بدليل أنه جعلك تطلعي لهذه الرسالة مع أنه كان بإمكانه أن يمسحها ولاتعلمي عنها .. لذلك ياغالية ... لاتجعليها تفسد حياتك .. وكوني حريصة على زوجك .. لاتظهري انفعالك من هذا الأمر بشكل مبالغ فيه فيندم زوجك على اخباره لك فيتفادى اخبارك بشئ بعد ذلك .. ادعي لهذه الفتاة بالزواج والهداية .. وكوني حكيمة عند اي تصرف .. واسمحي لي ياغالية بنقله إلى مكانه المناسب .. |
اقتباس:
أنا مع هــذا الرأي |
طيب انت متأكده ان زوجك ما يتصل فيها وقطع علاقته بها اخاف الخطا والسبب من زوجك !!
|
على فكره ترى بعض الرجال يكن معزة لانسانه كان يتمناها زوجه ويمكن صارت اسباب واقدرا تمنع من ذلك مثال : قريب لي كان يتمنى اني زوجته واستغربت انه سمى بنت بأسم انا احبه كان يناديني به !!
وانا ما اروح لبيتهم ولا ازورهم من سنوووووات ومع ذلك يكن لي مشاعر خاصه واخره مره شفته من سنه ونصف يوم رحت ازور امرأة من قريباتي ويوم جيت اطلع واركب السياره مع اخوي جى يسلم علي !! وبعدين هي غلطانه البنت لكن يمكن زوجك هو السبب وعموما اطلبي منه يغير رقم جواله هذا احسن حل ولا تكدرين نفسك بمولودك الاول وفرحتك وفرحة زوجك به وما ادري وش انصحك به لكن حطي ببالك كل رجل والله اعلم كانت في حياته امرأة يتمناها زوجه او كانت حبيبه يحبها ويكن لها مشاعر خاصه ويمكن من الصعب نسيانها حتى لو تزوج والله اعلم |
يارب الله يتمم حملك على خير ويسهللك ولادتك يارب ويرزقكم بقرة عين لكم يارب
خليه يغير رقم ولايدق على ابوها لانه من ستر على مسلم في الدنيا ستر الله عليه يوم القيامة |
مشكورين على المرور وابداء الرأي
اخوي ابو مريم : اعذروها ؟؟ الوحده والعزوبيه ؟؟؟ لو هالتصرف كان من اختك او بنتك بتقول وحده وعزوبيه واعذروها ؟؟؟ ما اتوقع الخطأ خطأ بدون اعذار ... الاخت متابعه : لو كانت البدايه من زوجي ماكان وراني الرساله |
حبيبتي انا بعد اربع شهور من زواجي ارسلت خطيبة زوجي الاولى اخوه الى زوجي وقال له
تقول لك ارجع لها خلاص تنازلت عن شروطها لنه صار مشاكل بينهم وعندت وجاني حبيبتي في بيتي وانا سمعته بنفسي يقول الكلام هذا رد عليه زوجي قال له قلها يفتح الله الرجال مع زوجته وهي حامل اختي ثقي بزوجك ولو انه يرغبها كان اخذها من اول الله يعينك ويهدي لك زوجك وييسر لك امورك ويبعد عن زوجك بنات الحرام يارب |
السلام عليكم ...
أنا مع الأخ أبو مريم ... ارسليلها رسالة إنتي من جوالك وانصحيها وقوليلها انك ما تحبي المشاكل وما تبغي تسوي مشكلة ،، لكن الوضع لو تكرر حيكون لك ترف ستندم عليه جدا ... وخلي زوجك يغير رقمه .. والمرحلة الأخيرة لو أعادت ما فعلته خبروا من تخاف هي منه أبوها أو أخوها ... المهم انتي تكوني حكيمة ولا تخليها تأثر على حياتك ... نصيحة لوجه الله .. والله يتمم لك حملك على خير ... أختك .. أم حمزة |
اقتباس:
ام البنت لا تعوطنها اي وجه ولا رساله ولا اتصال ولا نصائح ولا شيء والله معك |
هذي وحدة ماتستحي على وجهها قليلة أدب ومو متربيه
أفضل حل أنه زوجك يغير رقمه وإذا أستمر الحال يخير أحد من أهلها مثل أبوها أو أخوها أو أحد من عمامها علشان يأدبوها وديري بالك على زوجك يا أخيتيييي والله يقومك بالسلامة يا رب ويبعد عنكم كل حاسد وحقوود... |
يكلم ابوها على طول
عقاب على وقاحتها |
ماعليك من النصائح القاسية والي مايتوقعون نتائجها وعواقبها !! الستر زين ( ومن ستر مسلم/ مسلمة ستره الله في الدنيا والاخرة ) و طنشو البنت يمكن من القهر ترسل مسج لزوجك ولا تردون على رسائلها لا بنصح ولا بتخويف وافضل شيء يغير رقم جواله |
مشكورين على المرور وابداء الرأي
|
الله يهديها ويصلح شأنها
ويبعدها عنكم ويرزقكم حياة سعيدة |
الله يهديها ..
مثل ما قالوا الي قبلي خلي يغير رقمة ... |
الله يهديهم بناااات اليووم قسماً بالله جرأه أعجز إني أصدقها ..
لأ يااختي إذا شفتي البنت تمادت مع زووجك ورسايل يمكن قدامك أو من ورااه خلي زوجك يغير رقموو .. وإذا عرفت الرقم الله يهديها فأنصحكم تكلموا أبوووها .. وأنا خااائفه أن قلب الفتاة متعلق بزووجك أو أن يتعلق مع مرور الأيام بها زوجك ...؟؟؟؟؟؟؟؟ والله أعلم |
يغير رقمه ولا يعطيه لأحد من اقاربها او احد تعرفه هي
والباب اللي تجيك منه الريح سده واستريح والا اخبرو اهلها |
هلا اختي
الله يتمم لك حملك وانا راي ان البنت صح ما تستحي بس اكيد الحقد و الغل لعبوا فيها عشان كذا من القهر صارت تتصرف كذا رايي انو انتي ترسلي رساله او تكلمينها من رقم جوالك وتوقفينها عند حدها وماله داعي تكلمون ابوها عشان ما تكرهكم زود و ترا البنت ما يردها شي اذا حقدت والله يوفقك و يسعدك |
قلت التربية ولازم يدق على ابووووها علشان يربيييها
|
انا مع اخواني اللي قالوا يغير رقمه اول
واذا استمرت بهبالها ما له الا يقول لابوها وهو يتصرف معها واذا هي مضايقتك انتي !! كلمي امها واثبتي لها بأنك تورينها الرساله اللي منها يمكن لو تقولون لامها اهون من ابوها والله ان يذبحها هالخبله\ من جد جريئه وقليلة ادب ( والله يوفقكم ويسهل عليك |
اعتقد يطنش احسن لانه اذا رد اعطها اهتمام الطناش احسن دوا
|
لا اغير رقم ولا خرابيط فاضية الا رسالة واحدة بابلاغ والدها اما توقفها او ابلاغ والد الفتاة اما اغير رقمي ومصالحي علشان بنت تافهه مايصلح لو على كذا كل العالم غيرت ارقامها من ابسط مشاكل . كل شخص يلتزم حده .
|
| الساعة الآن 06:09 AM. |
Powered by vBulletin® Version 3.8.7
Copyright ©2000 - 2026, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©