|
أخوها حزن عندما تزوجت .. وصعق عندما تطلقت!!!
بسم الله الرحمن الرحيم و الصلاة و السلام على الحبيب - صلى الله عليه وسلم-.... الموضوع .. لا شكوى .. ولا أريد حل .. ولا زعلانة ... ولا شي ..:d بس حبيت أفضفض لكم.. وتقولوا لي شو رايكم إذا كنتوا في مثل الموقف!!!:11: قبل يومين .. كنت قاعدة ف ساحة الجامعة .. بعد ما انتهى وقت الكلاس ... لقيت بنت أعرفها من أيام سادس ابتدائي كنا نحفظ القرآن مع بعض - الأجزاء الخمسة الأخيرة- وكانت أحلى الأيام .. شكلي بحكي قصة حياتي<<:d :d المهم .. شافتني وسلمنا على بعض وأخذتنا السوالف تقريبا 3 ساعات .. سألتني ليش يا al ameer تطلقتي؟؟ قلتلها ما صار نصيب..!! قالت والله من زمان خاطري أقعد وياج .. أبا أقولج شي قلت : تفضلي .. قالت : تتذكرين يوم كنا نروح تحفيظ القرآن ... قبل سنين ...؟؟ قلت: طبعا.. وهذيك أيام تتنسى؟؟؟:11: قالت: أخوي من هذيك الأيام معجب فيج .. وكان يريدج .. وناوي يخطبج بس منتظر تخلصين الثانوية العامة .. وهو يخلص الجامعة.. أنا و الله استحييييييييييت ونزلت راسي وابتسمت وقلت لها وينه ليش ما جا ؟؟:d :d أمزح معاها... عشان ما يبين خجلي من الموضوع و ما تحس إني تأثرت >>:29: قالت : تصدقين يوم ملكتي ... طار عقله وجن .. وكل ما يدخل ويطلع يقول حق أمي قلتلج سيري اخطبيهم وإنتي تقولين البنت صغيرونه!! وأنا محافظة على ابتسامتي:d قالت : وجلس زعلان كم شهر .. بعدين وصل خبر طلاقج ... هذيك اللحظة ماعرف يفرح ولا يزعل .. و قال لأمي هذي الفرصة مرة ثانية يلا نخطبها بس أمي قالت لين ما تخلص عدتها قلت : وخلصت عدتي وسافرت ولين ما أرجع من السفر .... وابتسمت وقلتلها الله يحفظج بس .. ويرزقه الزوجة الصالحة اللي تحبة وتوده و تكون العؤود الولود الودود .. آمين قالت: بس هو لهذا اليوم يفكر فيج .. ف هذي اللحظة تخليت عن ابتسامتي:( وبصراحة مادري جاني شعور غريب حسيت بجبل حزن على صدري قلت: يوووووووه راحت علي خلاص <<وأنا هني قلت هالكلام مب من باب الاحباط أو الانحباط بس حبيت أصرف نظرها عن الموضوع .. وكملت: اللي انكسر فيني شي كبير ... يبالي فترة لين ما أرجع al ameerالأولية قالت: لا تكدرين خاطرج على واحد ما قدرج !! قلت: لا بالعكس قدرني .. ولو ما قدرني ما وداني بيت هلي يوم كرهني .. وهذا جميل أشيله على راسي لين ما أموت ولو بداخلي.. أما عن إني أكدر خاطري عشانه .. أنا عمري ما حطيت هالشي ببالي ولا فعمري زعلت عشانه أو تضايقت لأنه تركني .. بالعكس أحسه شي عادي وهذا قضاء و قدر ... قالت: بس إنتي صغيرة بعدج ما دخلتي العشرين .. قلت: وأنا ما أريد أخوض تجربة ثانية ف هالعمر .. أحس إني أريد أكبر أكثر وأفهم الدنيا أكثر .. ولين ما يصير هالشي .. أنا معززة ومكرمة ف بيت أهلي وشايليني على رموشهم محد غثاني ولا زعلني ولا ضايقني على هالسالفة .. قالت: صراحة كلامج كبر الفكرة ف راسي .. واليوم جايين نخطبج .. مع السلامة قلت وأنا أضحك ... في أمان الله هذا باختصار اللي صار <<كل هذا واختصار!!!!!!!!:18: المهم .. أتمنى تقولون رأيكم في كلامهما وجوابي.. والأهم إني هذاك اليوم ما كنت ف البيت <<إذا اتصلوا أو .... وأنا بصراحة الزواج أبدا ما أفكر فيه بالعكس أحس بالقرف يوم حد يجي يخطبني مادري ليش:29: :29: وتجيني نوبة من الضحك .. والاستهتار لهذي السوالف >>أبدا ما أقدرها المهم شهر مبارك علينا وعليكم غثيتكم بالسوالف .. بس من زمان ما كتبت سوالف>>:25: والله يتقبل صيامكم وقيامكم وسائر أعمالكم ورزقكم الله الشهادة و الفردوس الأعلى أستغفرك اللهم وأتوب إليك وصلى الله وسلم على محمد وعلى آله وصحبه أجمعين أختكم al ameer |
تيب راحت الفرصه الاولى ليش تقضين على الثانيه انتي اذا ججو واخطبوك من جد استخيري وفكري زين ترا فرصه حلوه مره
|
إذا كان أخو صديقتك لايعاب في اخلاقه ودينه فاستخيري الله ووافقي ...
|
اقتباس:
صح كلامج .. والإستخارة عندي فوق كل شي .. بس فيه شي ف داخلي مانعني مادري شو هو ولحد يقولي بعدج تحبيه>> لاني خلاص غسلته من يدي ... ولا أفكر فيه حتى:29: الله يسعدج وشكرا لمرورج |
اقتباس:
إن شاء الله بستخير لكن المشكله مثل ما قلت ... فيه شي ما نعني حتى من التفكير في هالامور .. وأي حد يفتح لي السالفة تجيني حالة من الاستهزاء و الاستهتار و الكل ملاحظ والوالدة حليلها ليل نهار وهي تقولي : أصابع يدينج مب متساوية.. الله يسعدج .. وإن شاء الله اللي يكتبه رب العالمين فيه الخير |
و عليكم السلام ورحمة الله و بركاته
أختي الغالية أقدر موقفك و هذا الصد الذي تكون لك بسبب تجربتك الأولى و أقول لك اذا كانت أخلاقه جيدة و دينه ترضيه .. فبعد الاستخارة و موافقة الأهل فكري في الموضوع و لا تضيعي فرصة قد لا تأتي فنحن لا نعلم الغيب أتريدي أن تغلقي بابك على نفسك لكي لا يأتي الخطاب حتى هذا الكلام لم يكن له داعي حقيقة لكي لا تتكون عليك سمعة أنك تردين الخطاب بلا سبب مقنع و الله يوفقك يالامير و كل عام و انت الى الله أقرب بارك الله فيك |
اقتباس:
بصراحة أنا ما أعرفه ولا فحياتي شفته ... ولا حتى سمعت عنه لا بالخير ولا بالشر وأنا بصراحة ما أريد اسكر الأبواب ... وما كنت أريد أقول هالشي لكن غصب عني لمن أحد يخطبني ما دري أكره نفسي ومادري شو يستوي لي ؟؟ أتمنى إنها ما أخذت عني فكرة غلط ... وهي صديقتي من زمان و إن شاء الله ما بتفكر هالتفكير والله يسعدج ويوفقج يارب ويرزقنا وإياكم خير الدنيا والآخره |
اقول لج حبيبتي..
هذا شكله شاااريج.. وانت اللي عليج الحين الاستخارة.. واذا فيه الخير الله ييسره لج.. وإن شاء الله يعوضج باللي احسن.. |
يا حبيبتي يا al-ameer اذا كنتي لسه مخلصه عدتك من قريب.. أنا اقترح انك ما تحاولين ترتبطين الفتره هذي.. و كلامك لصديقتك.. عين العقل.. انت لسه صغيره و لسه جاييك فرص.. يمديك تكبرين و تنضجين.. و تلاقين نصك الثاني اللي ترتاحين له و تتهنين معاه بإذن الله وسعي صدرك.. و خذي راحتك و يمديك عالغثا:23: |
انا راح اقولك اعطي نفسك فرصة وان كان فيه خير تزوجية وابني حياتك من جديد
ولملمي احزانك وان شاءالله ربنا يسعدك انا تزوجت وانا عمري 17 وتطلقت وانا 19 وتجمعت على احزان كثيرة وفاة والدي وطلاقي بطريقة مهينة جداً لكن شوفي ربنا كريم وعوضني بزواجي من زوجي الثاني بعد ماخلصت عدتي بسرعة مع اني كنت في نفس موقفك كارهة الزواج والرجال ولكن اهلي اصروا عليه وتزوجت ولي الان اكثر من ست سنوات عارفه دائم يردد الحمدالله اللي اتهبل زوجك وطلقك عشان تكوني من نصيبي ماتعرفي كيف تبدلت احزاني وايامي بزوجي وعيالي صارت عندي اسرة وبيت وزوج محب لاتضيعي هالفرصة اذا كانت مناسبة لكي وباين من كلام صديقتك ان الرجال شاريكي |
لحقي عمرك
تراااااااك مطلقة !!! يعني فرص زواجك اقل من البكر والزمن هذا تفشت فيه العنوسة بشكل فضيع اوول المرأة تتطلق مرتين وتحصل فرصة واعزب بعد !! والان والله العظيم ملكات جمال واخلاق ماحصلوا احد.. زين ان لقيتي خطيب وان لقيتي حافظي على بيتك لان مو كل مرة تحصلين واحد وان مافكرتي في الزواج بكرة تفكيرين وقد راحت الفرصة هذي نصيحة اخ قريبة لي تطلقت ولها عشر سنوات لم يطرق بابها احد مطلقا مع ان عمرها يوم تتطلقت صغيرة !! |
الله يكتب لك إلي فيه الخير
ركزي عالاستخارة وترى طبيعية جدا ردة فعلك إنتي محتاجة فترة نقاهة من التجربة الماضية وأحيانا فترة النقاهة تطول أكثر من اللازم واحسن حل وضع حد لها بدء علاقة جديدة ولكن على أساس متين من الدراسة والتفكير والإستخارة والإستشارة الله يوفقك ويرزقك كل ماتتمنين ويفرح فيك الوالدة آمين |
الأيام دول والفرص لاتتكرر
أنا شاركت عشان شئ واحد فقط ؟؟؟؟!!!!! يشهد الله رب السماوات والاراضين لسبع أنك كبرتي في عيني يوم قدرتي العشره وماسبيتي في زوجك ويمكن يكون توفيقك من الله بسبب حفظ اسرار الزوجيه وياليت كل البنات يسيرون على خطاك سيري في حفظ الرحمن يابنت الرجال |
مواضيع الخطبه تاخذينها باستهزاء وسخريه وماتقدرينها ليش يعني هذا زواج مش مسرحيه ولا شي مصخره
انا اقول اتزوجي ابركلج |
كل سنه وانتي طيبه .. مبروك عليكي الشهر ..
حبيبتي لاتضيعي الفرصه من يدك .. الولد كان شاريك قبل ماتتزوجي والحين شاريكي اكثر بعد طلاقك .. وترا مو بس الولد اللي يبغاكي الظاهر كل اهله معجبين فيكي فكري وفكري وفكري ... الولد يحبك ويبغاك .. وان شاء الله ربي يعوضك معاه لكن لاتضيعي الفرصه من يدك .. لان المنفصله حظها بالزواج اقل ونادرا ماتتزوج شاب لم يسبق له الزاوج .. انتي اعطي نفسك فرصه .. تحرري من التجربه الاولى .. وادخلي تجربه جديده كلها تفاؤل وسعاده بإذن الله .. ولا اخر مره اقولك فكري الفرصه ماتجي مرتين |
استخيري واستشيري.....وعسى الله يوفقج
ان كان مناسب لاتضيعين الفرصة.....رب العالمين قادر على تعويضج بالاحســــــــــــن عسى الله يوفقج ويسعدج |
عزيزتي لم تطرقي باب العشرين.. انتي في مقتبل عمرك..:22: ليس منى فشل تجربة انك لن تسعدي مدى الحياة..لتكن لديك ثقة بالله.. انتي حمدتي الله ..فثقي انه لو لم يكن لك خيرا لما التقيتي هذه الصديقة ولما تحدثتي معها.. لاترفضي ليتقدم.. واستخيري وان شاء الله تبشرينا قبل العيد أنك ملكتي:14: :14: يارب يارب يارب انك سميع الدعاء أختك حائزة |
أنا لو مكانك أحس بكون محتارة:
1- اذا كان فعلا انسان كويس ويخاف الله فإنها فرصه مو شرط تتكرر.. 2- ممكن اكون نفسياً مو مستعدة، وهالشي ممكن يأثر لو ربي كتب أني أوافق أتزوج، لأن الواحد إذا بغى يتزوج لازم يكون 100% متقبل ومستعد.. فكري زيييييييييييييييييين واستخيري الله والله يوفقك للي فيه الخير ويسعدك :) |
اذا شخص اوكي لا تردينه
الله يرزقج برجل الصالح يا رب وكل المطلقات امين |
اقتباس:
جزاج الله كل الخير ... إن شاء الله لما يجي بالأول <<< :d الله يسعدج ويوفقج |
اقتباس:
أنا صارلي مطلقة سنتين تقريبا ... وفترة زواجي كانت 7 شهور وكلامج صحيح ... مادري أحيانا أقول ما بتزوج لين ما أختم القرآن حفظ ... وأحيانا ...:29: :29: الله يسعدج ويوفقج ويرضى عنج ويتقبل صيامج يارب |
اقتباس:
يا الله .. كأنج تحكين قصتي << بس أنا ما تزوجت:d ووفاة والدي الله يرحمة كان قبل زواجي .. وتزوجت وأنا 17 سنة وتطلقت وأنا 18 ... الله يسعدج ياااااااااااارب ويوفقج في دينج ودنياج ويتقبل صيامج ... والحمد لله اللي عوضج خير وإن شاء الله بسوي بنصيحتج وبعطي نفسي فرصة |
اقتباس:
يا الله!!! ليش تخوفني ؟؟؟؟ حسستني إن محد يباني خلاص :29: وإن مدة صلاحيتي انتهت:29: حرام عليك .... شوي وبروح أدق أنا عليهم وأخطبهم:d :d أمزح مب لهدرجة ... بس إذا جو بصلي الإستخارة و اللي كاتبه رب العالمين بيصير .. شكرا لمرورك.. وتقبل صيامك وقيامك ...اللهم آمين |
اقتباس:
آآآآآآآآآآآآآآآآآآآآآآآآآآآآآآآآآآآآآآآآآآآآآآآآآآ آآآآآآآآآآآآآآآآآمين إن شاء الله بيكون هناك دراسة وتفكير وأكيد استخارة واستشارة .. والله يسعدج دنيا وآخرة ويتقبل منج صيامج ودعائج ياااااااااااااارب..<< وكثري من الدعاء لأختج الأمير:d |
اقتباس:
يؤ يؤ يؤ هذا واجبي ... وكيف أسبه وأنسى الفضل ؟؟؟ هذا كان ف يوم من الأيام زوجي .. ويمكن إذا استمرينا مع بعض يكون ابو عيالي .. و نحن ما صارت بيننا مشاكل أو أشياء خلتني أكرهه .. بالعكس كان إنسان زين لين آخر يوم في علاقتنا .. والله يرزقه البنات و البنين يارب ... ويسعده مع زوجته .. اللهم آمين والله يسعدك ويتقبل منك الصيام و القيام يارب.. |
اقتباس:
ما يحس بالنار إلا اللي أصابعه فيها ... جزاك الله كل الخير وبارك في مرورك .. |
اقتباس:
وإنتي بصحة وسلامة يارب... والله يبارك فيج صدق خليتيني أفكر .. ومن ردودكم حسيت إن التجربة الثانية مب شرط إنها تفشل .. ولازم نعطي لنفسنا وقت نفكر .. تفكير إيجابي .. وما نجمد عقلنا بنوع واحد من التفكير ... لازم أعطي نفسي فرصة .. و اللي كتبه رب العالمين بيصير.. الله يسعدج ويوفقج ويتقبل منج الصيام والقيام و الدعاء اللهم آمين |
اقتباس:
ونعــم بالله ... اللهم آمين اللهم تقبل صيامها وقيامها وسائر أعمالها يارب العالمين وأسعدها دنيا وآخرة |
اقتباس:
الثقة و الحمد لله موجودة ... ونعم بالله الكريم المعطي .. أما عن الملكة <<:11: فخليه بالأول يجي ..ولكم منى الحلاوة:d :d شجعتوني مع إني كنت كارهة الزواج 1000% بارك الله فيج أختي حائزة والله يتقبل صيامج وقيامج وسائر أعمالج ويحفظ لكم الوالدة.. |
اقتباس:
وأنا كنت محتارة .. لكن بعد ما قريت ردودكم تقويت وعزمت ع الاستخارة ... صحيح إني نفسيا مب مستعدة لكن مع الأيام أكيد بكون أحسن ... الله يسعدج ويتقبل صيامج وقيامج يااااااااااااااارب |
اقتباس:
بصراحة ما أعرف عنه شي .. بس خواته بنات طيبات وعسولات وهاديات ... الله يسعدج ويرزقج ويتقبل منج الصيام و القيام اللهم آمين |
توكلي على الله
الرجال شاريك باينته وربي يسعدك ويعوضك خير |
اقتباس:
ونعم بالله اللهم آمين اللهم آمين اللهم آمين الله يسعدك ويتقبل صيامك وقيامك وسائر أعمالك.. اللهم آمين |
استخيري حبيبتي
والله يكتب لك اللي فيه الخير الله يوفقك وين ماكنتي وحافظي على الأذكار :) |
لا تضيعين فرصتك اذا هو شاب مناسب ولا تاكدي مالك الا مطلق وعنده كوم عيال ولا تكونين زوجه ثانيه ولا ثالثه وانتي حره
|
بعد اذن صاحبالموضوع
اريد ان اسلم عليكي ام مزنه وابارك لكي بالشهر واسال الله بان يفرج علينا |
حبيبتي الغالية..اشجعك ان تقبليه ان وجدتيه انسان جيد
فمرات تأتي فرص لا تعوض...فأغتنمي الفرصة ولعلك تجدين التعويض فيه لا تضيعين هذه الفرصة فبعض الناس لا يجدون أي فرصة أو خطاب فأستغلي هذا لصالحك يالغلية والله يعوضك يالغالية ونراكي عروسة قريبا ان شاء الله لا تنسينا بالدعاء وفقكي الله |
سأخرج عن الموضوع
وأقول : هنيئاً لكِ حفظ القرآن الكريم ،،، والله إني أغبطكِ على هذا الشرف العظيم من 5 سنوات وأنا أنوي إتمام حفظ القرآن الكريم ، وإلى الآن ما استطعت ، لأني مشغول بتجميع الفلوس علشان أتزوج وأستقر . الحمد لله حفظت 15 جزء ، وأسأل الله أن يتمم الباقي أسال الله أن يرفعني وإياكِ بالقرآن العظيم ، وان يجعله حجة لنا لا علينا ، وأن يرزقنا تلاوته آناء الليل وأطراف النهار على الوجه الذي يرضيه عنا ، إنه على كل شيء قدير |
حبيبتي لازم تفكرين بموضوع الزواج انتي صغيره وبعدين دامه يحبك استخيري وشوفي بس اهم شي لازم تتأكدين من اهله لازم يكونون قابلين ان ابنهم ياخذ مطلقه وهو لسه ماتزوج لانه الناس مو كلهم مثل بعض في ناس لسه تفكيرهم من العصر الحجري وعشان ماتعيشي في هم لاقدر الله بعد الزواج
الله يوفقك ويجعله من نصيبك يارب ياكريم |
انا رايي من راي البنات لا تضيعين الفرصة عليك
|
| الساعة الآن 06:21 PM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©